ПИНЬÖЛА ПУ ДОРЫН

Мийö, пермскöй писателлез, кыдзкö ветлiмö граница дорö, кöдö дозоритöны и Пармаись отир.

Медодзза лунас жö, кöр кольччис бöраным миражжеза пустыня и локтiм отряд штабö, пондiм корсьыны заставаэзö.

— Этö позьö, — висьталiс офицер Кузнецов, — но перво ме висьтася асланым отряд йылiсь...

Юрий Степанович эстöн служитö важын ни и бытшöма тöдö быд заставасö. Сiя бура ошкис уралеццезöс и пример туйö вайöтiс кынымкö мортлiсь фамиллёэз — Хозяшев, Истомин, Плотников, Климов.

— Нiя, натьтö, Коми округись, — шуи ме. — Пантасьны бы ныкöт...

— Часöт тöдам, кысь нiя, — висьталö майор да босьтö телефон вылiсь трубка и тшöктö корны öтiк застава. Минута бöртi сiя шыасис, и офицер юалiс: — Тэ кытöн призывайтчин, Хозяшев? Кудымкарын? А Истоминыс? Тожö сэтчин? Но и бур. Миян дынö локтiсö гижиссез, ны коласын эм тэнат земляк, — и сiя казьмöтiс менчим нимöс. — Кывлiн сы йылiсь? А-а, нельки тöдса. Но, пантасьлат сыкöт...

Мöд рытас ме вöлi заставаын. Сэтчин бытшöма вердiсö, тшöктiсö шоччисьны, и ме пондi тöдсасьны заставакöт.

Сiя йöрйöма бетоннöй йöрöн, кöда пöлöн быдмöны ыджытся-ыджыт тополлез да карагаччез. Ны увтын быдкодь олан да неолан керку, пон видзан, спортплощадка, баня. Быдöс эта керöма басöка, краситöм да весöтöм, пуэслöн дыннэс белитöмöсь, клумбаэзын öгралöны тюльпаннэз. Некытöн и ёгтор абу, бытьтö эстöн дзимлясьöмась сöстöм киа нывкаэз да инькаэз. Но татöн нiя абу, öтiк абу.

Петi ограда сайö да инми пода карта дынö. Сэтöн нырьясис порсь да орсiсö дасся унажык пияннэз. Ылынжык, тростник да камыш коласын, йирсисö кык мöс, и лоис вежöртана, кытiсь солдатскöй столовöйын йöлыс да нöкыс.

Неыджыт бархан вывсянь нёджжала ас гöгöрöс. Öтмöдöрö паськалö неровнöй, лажмытик мыса да гöпа му, кытi чуклясьö нач косьмöм юлöн изъя пыдöсыс. Дзирыт шондi увтас сiя нач быгалöма и вачкисьö тöлöн чукралöм дöра от вылö.

Дас километр ылынаын пондöтчö нёштöм — чегласьöм-жугалöм лиловöйкодь-сьöд керöс, кöда дынö öксьöмась, дзик мам дынö, керöссэз-пияннэз, а эшö улынжык — йыла барханнэз, бытшкасян куста рассэз, öтка саксауллэз. Этö неровнöй мусö керöссэс йöртöмась кытшö, а сы шöрöт мунö граница. Паныт миян заставалö сувтöма мöдöрись застава да югьялö вышка öшыннэзнас. Сы сайын сюа ыббез, сэтöн уджалöны крестьяна. Гуддисьöны пемытсянь пемытöдз, сiдз кыдз вундöны и вартöны киöн — машинаэзныс абу. Эта йылiсь висьталöны наблюдательлöн быдлунся гижöттэз: «Мöдöрас сё дзимлялöны урожай, вердöны пода. Гарйöны окоппез, лöсьöтöны доттэз...» Окоппес да доттэс гöгöрын мырсьöны тожö крестьянаыс, кöднö повзьöтлöны советскöй солдаттэзöн да танккезöн.

Йöз му, мöдкодь олан, мöдiк политика... И быдöс эта пондöтчö мекöт ордчöн, бытшкасян проволокаись керöм йöр сайын. Сы пырйöт, кыдз висьтасис офицер Кузнецов, пондылöмась локны миян ладорö быдкодь бандаэз, диверсанттэз, шпионнэз. Вуджалöны границасö и öнi, но миян пограничниккез дынiсь талун ылö он мун. Сы понда и сулалö эстöн советскöй заставаыс, медбы нем умöльыс, нятьöсьыс эз лок миян сöстöм оланö, эз дзуг отирлiсь лöньсö, долыт уджсö. А служитöны, сэтöн Россиялöн бытшöм зоннэз — роччез, удмурттэз, татара, башкиррез, коми-пермяккез.

Не быд мортыс, кöда гусьöн вуджö границасö, шпион: мукöдыс пышшö и умöль оланiсь. Сэтшöмсö одзза лунас вöлi кутöмась мöдiк заставаын. Сiя пöрись морт, тшыгсянь да сьöкыт уджсянь сiдз умöльтчöм, что öдва вешталö коккесö. Гортас сiйö чапкöмась и государствоыс, и отирыс, и сылöн еныс. Нятьöсь гунькаыс — чöрс вылын треситны, шапкаыс — рака поз вылö оз туй, кедаэс вылын — тринадцать дöмас! Повзьöмсянь оз вермы кыв горöтчыны.

Меным, да и пограничниккеслö, сiя эз вöв враг...

Кöр пыри казармаö, пондiс бöбись горöтны зуммер и сэк жö öдззисö топöтны сапога коккез. Тревога!

Пограничниккес пуксьöны машина вылö, сэтчин жö чеччöвтö Джанка — руд гöна овчарка. Корся и ме, и офицер Кутепов тшöктö пасьтасьны менö шонытжыка. Виктор Плотников (сiя талун дежуритö кухняын) сетö ассис бушлат да шапка, и ме кая машина вылö.

Кынымкö минута машина мунö КСП* бердöт и сувтчö. Медодз му вылö чеччöвтö пон, нюкайтчö бура пинялöм песок дорын, кытöн тöдчö толай кöчоклöн коктуй — сiя, тыдалö, и «звонитöма» тасянь заставаас. Но поныс велöтöм кошшыны морт след, и этö бытьтö оз и адззы. Нюкайтчö, кошшö мортöс.

Мортыс эстöн абу вöлöма, но пограничниккес гортö бертны оз тэрмасьö: синмöн видзöтöны не только сiйö местасö, кысянь мунiс сигналыс, но и матiжык, и ывтiжык, таланьсö и мöдланьсö, волькöтöны, кыдз колö, гöрöм мусö и вöлись иньдöтчöны заставаö. Кинкö ештöма чеглавны бытшкасян ула барбарис, и мийö зэв чöскыта сёям алöй ягöддэсö да дивуйтчам ассяма кöрлö.

Рытöдззас ме тöдсаси не öтiк морткöт. Нiя юасисö, мый вильыс Перемын да Кудымкарын, кыдз олöны-вылöны отир — ештiсö я нiя дзимлявны нянь да картов, уна я быдмисö виль керкуэз, эмöсь я фрукттэз магазиннэзын. И ме висьтаси, мый тöдi. И, конечно, юаси ны олан йылiсь. Но нiя баитiсö етша, дженыта: сётаки ме ны понда йöз морт, кöдалö не быдöс позьö висьтасьны. Быд солдат бура тöдö, что кузь кылыс — шпионлö отсалö.

Унажыкыс служитöны годся дыржык ни, а видзöта ме ны вылö, кывза нылiсь баснинысö, кöр нiя шоччисьöны да сералöны öтамöд вылын, и думайта: «Сё челядь кодьöсь, сё кокнит мывкыдаöсь. Тiян сьöрын эшö син да син колö. И дöнзьö жö, натьтö, тiянсянь командиррезнытлö».

А командиррезныс меным шуöны:

— Перем татчö иньдöтö бытшöм зоннэзöс. Быдöс серьёзнöй отир, ны вылö позьö надейтчыны.

Ме пеллезöс адзза: сэтöн и Пармалöн зоннэс!

Бытшöм зоннэз... Ме эшö öтпыр адззылi нiйö стройын. Сулалiсö оча пельпон и кывзiсö дженытик приказ, кöдалöн лэчыт, вына кыввес йиджисö менам сьöлöмöдз: мунны дозоритны СССР-лiсь государственнöй граница. И ме сэтöн вежöртi, что одзам сулалöны солдаттэз, кöдна вермасö тыртны Родиналiсь кöть кытшöм тшöктöм. Эта вöлi гижöм ны синнэзын, повтöм чужöммезын, вына киэзын.

Горалiс Гимн, а ме бöрйи юрам пограничниккезлiсь характеристикаэз: «Солдат Хозяшев, электроприборрез сьöртi мастер, öддьöн бур специалист, смев и решительнöй, отсалiс кутны кык нарушительöс; солдат Истомин, бытшöм шофёр, некытöн оз öш; солдат Плотников, мывкыда оператор, мыдзтöм морт, кöть кöр отсалас мöдiклö...»

Вот сэтшöмöсь нiя — повтöмöсь, дружнöйöсь, гажаöсь.

Луннас ме пантасьлi Семён Хозяшевкöт, юаси, кытöн чужис-быдмис, и öнi тöдi ни, кытшöм сiя морт. Гортыс сылöн Кудымкарскöй районiсь Софонко деревня, сэтчин олöны аймамыс. Семён чужöмнас и окладьнас унажык вачкисьö мамыс вылö — югыт вира, русöй юрсиа, чож и басниöн оз öш. А мывкыднас-вежöрнас, удж кисьöрнас — айыс кодь, кöда служитöма Будённый армияын, а гортас уна год вöлöма колхозын председательöн.

Ме кывзi Гимнсö, думайтi эта застава йылiсь, кысянь пондöтчö Советскöй му, но син одзам вöлi горт ладорö: вундöм ыббез, быгалöм зорода видззез, чочком крышаа деревняэз, уна тшака вöррез.

А мый йылiсь думайтöны нiя? Мый тöдвылас Семёнлöн?

Пармаись мортлö керöссэс дорын быдöс мöдкодь: коккетö падмöтö изъя му, синнэтö тыртö песок, а керöссэс, кöдналöн йыввезныс пыкöны небосö, сiдз и буждöны тэ вылö. И кыдзкö öддьöнöв лöнь да пустöй — тэ гöгöр абу не ыббез, не туйез, не пода, а юр вевдöрат — не кай, не самолёт, не кымöр. И погоддя мöдiк — öткодь кöс арöдз, дзик тувдöм и оз вермы вöрöтчыны. И ойес дзирс пемытöсь, повзьöтчанаöсь, и кажитчö, что быд кустын, быд кырасокын ежели не пурта шпион, дак кузь пиня шакал.

А Хозяшевлö сё бур, ештöма ни велавны азиатскöй оланыс дынö. Правда, сiя локтöма татчö эшö тулыснас, кöр и барханнэс басöксялöны, и керöссэс югмыштöны да шыннялöны. Нельки меднёштöмыс, кöдö солдаттэс шуöны Шайтанöн, тулыснас миссьöтö самöм рожабаннэсö да сьöдöв-лöз нырсö и лоö рамжык.

Заставаын Семёнлö медодзза жö луннэзас сетöмась ыджыт удж, а öткоста этакöт — ветлыны нарядö.

Кыдзкö майöн, как раз ойшöрнас, лэбис тревога. Семён аслас ёрттэзкöт мунiс сэтчин, кысянь локтiс сигналыс. Сьöлöмнас кылiс, что шумсö керис не кабан, не толай, а морт, и ковсяс бура «уджавны». Да и лейтенантыс тэрмöтö: «Чожжык, чожжык, челядь! Нёльöтыс год вылас öтпыр бöбöтчылö!»

И быль, границасö вуджöма морт, только, кыдз кажитчис медодзза секундаэзас, локтiсьыс нето калека нето код: следыс чуклясьöм, мукöдлаас мунöм коккесö кыскалöмöн. Может, бöра кытшöмкö старикöс вашöтö гортсис тшыг нужда али лёк шогöт?

Кöд коста рация пыр Семён баитiс заставакöт, сержант Ярочкин джын минутаöн тöдiс, что мортыс киэсö сюйöма кедаэзö и границасö поперегалöма нёльподöн. Сэк жö лэдзисö след вылас понöс и вöтчисö нарушитель сьöрö.

Сьöкыт вöтны сiйö, кин дыр лöсьöтчис гусьöн локны граница сайись: сiя и öддьöн хитрöй, и чож, и вермö котöртны не öтiк час. Но быд пограничникыс — тожö спортсмен, тожö ыджыт мывкыда да мылаа и эшö, кыдз хозяин, стрась бура тöдö горт мусö, а эта вöтлiсикас — ыджыт отсöт.

Уна и бура «уджалiсö» эта ойö заставаись йöз, но шпионыс ны киö эз шед: сiйö одзжык панталöмась соседдэс...

Гожум шöр татчö пырö жарся-жар луннэзöн. И эта лöсьöтчис лоны сэтшöмöн жö: асывнас кыкьямыс часö термометр мыччалiс 38 градус.

Керöссэс вевттисьöмась кизерик тшынокöн и сунасьöны. Шайтан зыркйö шар синнэзнас керöс увтöт мунiсь нарядсö и некыдз оз вермы вежöртны, мыйлö морттэс ветлöтöны эттшöм изъя-галяа му кузяс, весись нöитöны коккез?

Лöньын да жарын олiс и граница: камышшезын — шы не тöв, кусттэзын — чив не китш. Только и кылö, кыдз пограничниккез сапог увтын кышöтö песок да няжöтö галя.

Оськалö пограннаряд жагвыв, нёджжасьöмöн. Медодзас — сержант Данилов. Сiя часто сувтчылö, кывзiсьö, синмасьö мöддэскöт. А мöддэс — Семён Хозяшев да Сергей Малых — мунöны ылынкодь сы бöрсянь. И не öтлаын. И тожö и пель, и син чурдöтöны — сiдз тшöктö граница. Нiя этадз часто ветлöтöны и баснитöг вежöртöны öтамöднысö.

Абу юж дозорнöй туёкыс, и сапогыс — не чарки: сьöкыт мунны. Кöть и сьöкыт, а думаэз сöстöмöсь, гажаöсь. Может, сысянь, что öддьöн бытшöма шоччисисö кольöм кресенняö? Нiя ветлiсö сэк Алтын-куль ты дорö. Но и бытшöм сiя: сöстöм ваа, ыркыт руа, уна чериа, изумруднöй берега. Натьтö, басöкыс понда и шуисö сiдз отирыс — зарни ты. Сэтчин сьылiсö и орсiсö быднёж и, конечно, дыр тульöтчисö небыт ваас. И кыйисö жереххезöс да стерлядь, а сэсся сёйисö чöскыт черива...

Шондi сё дзирытсялö, руыс лоö сукжык, сьöкытсялöны винтовка, подсумок, рация.

Петiсö ровнöйжык местö, кытöн быдмö камыш да барбарис. Данилов одзöт быркнитiс фазан. Лэбзис лажмыта и матына — дзик ошшасис уна рöма кузь бöжнас. «Сiйö кинкö повзьöтiс, — думайтiс пограничник. — Ноко видзöтам...» Сiя мыччис колана знак ёрттэслö и сайöвтчис моз камышö, пондiс сэтчинсянь видзöтчыны и казялiс мортöс. Мыччис виль знак: колö пö сувтöтны кортöм гöсьсö.

Кöд коста Сергей Малых радио пыр корö отсöт, Семён кусттэс сайöт чепöссис тöдтöмыс дынö. «Тöдчö, что чужöй, — думыш керис Хозяшев, кöр казялiс мортыслiсь лöз паськöмсö. — И абу вынтöм...»

Йöз мортыс кань моз кокнита чеччалiс туйсö бöрйытöг и бöрас эз дзарнит. Кöр сiя инмис неыджыт нёпö-кушинокö, Семён горöтiс:

— Киэз вывланьö!

Не сэтшöм горöн и шуис, а лöз паськöмасö эта шыыс дзик чарöтiс: сiя тран сувтiс, бергöтчис Семёныс ладорö и шевк лэбтiс киэсö, бытьтö только этö командасö и видзчисис.

Данилов да Малых видзöтiсö, мый сьöрас вайö локтiсьыс, и адззисö писис пурт. Сэтчö локтiс машина, и нарушительсö нуöтiсö. А наряд мунiс одзлань.

— Но, Хозяшев, лоас тэныт «Отличный пограничник» знак! — радуйтчисö ёрттэс. — И эшö отпуск...

Да, сiдз сiя и вöлi. Но этасся одзжык Семён ештiс кутны и мöдiкöс. А шогмис эта сентябрь коста.

— Ойнас лоис тревога, и миян командир Лебединский нуöтiс миянöс участок вылö, — висьтасьö Семён. — Локтiм колан местаöдз, видзöтам: полосасö поперегалöма морт. Следдэс неыджытöсь, но пыдынöсь. Мыля бы? Эстöн, думайтам, мыйкö не сiдз! Может, нöбöтö мыйкö öддьöн сьöкытö? Натьтö, оз. А оз я кыскы вывтас мöдiкöс? Тыдалö, мöдöны ылöтчыны: öтыс шедöтчас миянлö, а мöдыс сы коста мунас, кытчö сылö колö.

Лöсьöтчам радио пыр юасьны заставалiсь, эз я мыйкö кывсьы мöдiккезсянь, а ордчöн кылам баитöм. Командир тшöктö сувтöтны нiйö. Мийö уськöтчим камыш пытшкö — и панталiм ассиным отирöс. Бертiм командирным дынö, звонитiм заставаö, а сэтчинсянь шуöны: тiян участоксянь эшö сигнал локтiс... Думайтiм секунда-мöд и — кошшисьны. Юраным öтiк дума: вöтны граница дорас, не лэдзны пыдöжык горт му вылö. Старайтчам керны быдöс бытшöмжыка, но тэрмасям, пизям, и петö мöднёж... Пантасим соседдэзкöт. Нiя кутöмась ни öтiкöс, сiйö кык пограничник нуöтöмась заставаö. Асьныс кольччöмась связьтöг, а понныс öштöма нарушительыслiсь коктуйсö — мыйöнкö киськалöм... Баитчим сiдз: соседдэзным кошшöны öтiлаын, а мийö — мöдiлаын.

Кынымкö минута бöртi виль юöр: граница дзугисьыс петöма мöдöдз йöр саяс ни. Вот котрасьö дак котрасьö! Разь вöтан сэтшöмсö?

— Вöтам! — шуö Анатолий Истомин. Сiя заводитö машинасö, пуксьöтö миянöс и вашöтö мöд полоса дынас. Туйтöг. Барханнэз, камыша рассэз, изъя местаэз — нем оз видз. Мöдiк бы Истоминыс местын, натьтö, эз вермы этадз... Кытi волькытжык — тöвчикöн пöльтам, кытi умöль — жагвыв кыссям. А минутаэс — лэбзьöны. Тöдам, что сёравно пограничниккес дынiсь оз пышшы, но тэрмасям, ог вермö лöньсьыны — горт му вылын враг!

Сэсся машина сувтiс, одзлань оз позь мунны. Котöртiм подöн, адззим след. Сэтöн ме бура ни вежöртi, что оз пышшы. Сiдз и петiс — чожа вöтiм. Конечно, мыдзöм, пöдöм, кöть и бур спортсмен. Сiя мыйкö сярзис-баитiс ас мознас и сё мыччалiс кинас граница ладорö, но мийö нем эг вежöртö сэтiсь... Вот сiдз шогмис.

Канцелярияö шупыта пырис пограничник, и ме сiйö сэк жö тöдi: Анатолий Истомин. Винеркодь, жаритчöм чужöма, быгалöм гимнастёркаа. Синнэс дзик мыдзöмöсь, но ныын олö чуть тöдчана гаж да серöмок. Сiя армияас кык год ни, и сылöн служба вылын быдöс петö кокнита да волькыта: и тальччыны инмö, кыдз колö, и начальствокöт кужö баитны, и формаыс сылö лöсялö. И, конечно, службасö тöдö.

Заставаись комсорг сы йылiсь шуис: «Истомин — гажа зонка, ёртасьны кужö. Уджсö шуч тöдö и мöдiккезöс велöтö. Да мöднёж оз и позь — комсомолец эд!»

Начальникыс эз вöв, и Анатолий лöсьöтчис петны, но ме сувтöтi:

— Кыдз овсьö, Истомин? Кыдз служба?

— Быдöс бур. Только эта заставаын не öтiк тысяча километр катти... Но — чожа гортö!

— Кытчö мунан?

— Мыля кытчö? Сидöр деревняö! Сэтчин мамö, сизим соя-вона.

— Машинаыт ветлö?

— Ог жалуйтчы, кöть и не виль... Сэтöн эд сiдз: ежели тэ сiйö радейтан, то и сiя тэнö.

— А кыдз начальство? Кыдз ёрттэт? Лöсялат?

— И сэтöн эд быдöс тэсянь. Ачыт бур, дак и отирыс бурöсь — сiдз эд баитсьö. Ёрттэзö вылö ог обижайтчы. Öтлаын олам, öтувья керам. И тöдам, мый понда этчö сувтöтöмöсь.

Сiя тэрмасис, и мийö янсöтчим. А ме пукалi и касьтылi ассим том кадöс, кöда чулалiс армияын служба коста. Кыкьямыс годся дыржык ме олi военнöй уставвез сьöртi, берсясö адззылi, и талун Истоминыс моз жö верма висьтавны: быдöс ассянят, аслат кужöмсянь, аслат кывзöмсянь нето не кывзöмсянь шогмö. Нельки сэк, кöр тэнат не öддьöн кужись начальство, и сiя оз старайтчы вежöртны шоггетö. Но тэнат юрын и сьöлöмын пыр олö дума сы йылiсь, что тэ кöсйисин Гöрд Знамя дорын бура-бытшöма служитны Родиналö, аслат мулö, аслат отирлö, сiдз служитны кöть кытшöм сьöкыт дырни и, ежели ковсяс, пуктыны ны понда ассит юртö.

Да, эна том отирыс, кöднö тöн эшö школаись велöтiссес шуисö челядьöн, эна зелёнöй погона-фуражкаа солдаттэс бура тöдöны, мыйлö эстöн олöны и мый видзчисьö нысянь Родина.

И кöр нiя, челядьыс, ыджыт морттэзас пöрöмась? Натьтö, не кык армейскöй годнас жö эд... А шуны кö веськыта, — кин сiйö тöдö!

Кынымкö час бöртi мела локтiс машина, а ме эг и ешты бытшöмика баитны Виктор Плотниковкöт, кöдалöн, кыдз висьталiсö ёрттэс, татöн öддьöн ответственнöй да сьöкыт удж, мый понда ёна старайтчö зонкаыт. Сылö не тöждыны аслас удж понда оз позь эшö и то мыля: айыс, кыдз одзжык висьтасис меным Виктор, накажитiс сöстöма видзны честьсö семьяыслiсь да Кузьва посадыслiсь, кöда прокод ыставлö ассис зоннэсö дозоритны ылiсь границаэз. Сiя эз вунöт кольласян баснисö и Валерий воныслiсь: служит пö сiдз, медбы миянлö эз вöв стыд тэ понда. (Ачыс служитöма татöн жö.) А эшö Виктор сьöлöмын олö мамыслöн, мам-героинялöн, корöм: берегитны асьсö и лоны добрöйöн отир понда.

Ме коли сумкаöс машинаас да пыри казармаö, медбы прощайтчыны тöдсаэзкöт, но сэтчин быдöнныс узисö. И тöдвылам усис важ басни: солдат узьö, а служба мунö. Но эта — не пограничниккес йылiсь. Ны йылiсь ме висьталi бы мöднёж: пограничникыс и узикас границасö кылö. Мымда ме адззылi, дак нiя етша узисö, а уна керисö. И медбöрья ойнас, кöр сiдз ни менö кыскис гортö и эз узьöт, тревожнöй группа ойбыт котрасис-ветлiс граница пöлöн.

Думанам желайтi ме нылö вöтасьны кокнит вöттэз и мунi. Газик шупыта тарöвтчис галяа туй кузя. Медодзза чукыльын, куш мысок вывсянь, ме дзар кери заставалань, но казялi только карагач, кöда лэбтiсьöма мöддэс сьöртi медвылына, но дзик повзьöм вылынiнсис и мышкыртöм юрсö. Не сы кузя я уйгуррес* шуисö сiдз этö местасö — пиньöла пу? Пиньöла пу...

Этö «пусö» ме пыр кежö пыртi аслам сьöлöмö. Тöдвылам усис не öддьöн волькыта керöм стишок:

Кто здесь не бывал,

Тот и службы не видал...

Этадз весись, натьтö, эз висьталö: кин служитiс заставаын, дак стрась бура вежöртiс, мый сэтшöм граница, мый сэтшöм служба.

Виль год панытö тöдса заставасянь локтiс меным письмо. Адзза: Семёнсянь. Осьтi, син дорнам видзöт кери поздравленнёэз вылö, лыддьöта одзлань:

«Служба мунö кыдз колö. Медбöрья инспекторскöй проверка коста ёрттэзö получитiсö «отличноэз», но и ме тожö, и застава босьтiс медодзза места... Тiян мунöм бöрын мийö кутiм эшö öтiк нарушительöс. Сы вылö инмим, кöр пондiм мунны соревнованнёэз вылö — вöлi марш-бросок. Кутiмö кокнита, позьö шуны, дзик орсiкö. А соревнованнёэс вылын миянлö дöнзис куимöт места. Эта тожö не умöль.

Ыстöны юöр Митроков, Сафиуллин, Плотников. Истомин öнi гортас ни, татчö эз на гиж. Командирнымлö сетiсö ыджытжык должность да сувтöтiсö мöдiклаö... Вот и быдöс, мый мöдi висьтавны.

Ась тiян быдлаын лоас бур — и гортаныт, и удж вылын!

А границаным миян пыр пöдана, и казявтöг сiйö некин оз вудж.

Хозяшев Семён.»

Ме сiдз жö думайта: кытчöдз граница дорын сулалöны Пармалöн эттшöм зоннэз, сiя лоас пыр игана ны понда, кин гусьöн локтö бы миян му вылö.

*КСП ― Контрольно-следовöй полоса.

*Уйгур — Азияын олiсь отир.

Дата добавления: 2015-11-16