Чукыля-викыля

— Чукыля-викыля, тэ кытчö тэрмасян?

— А тэ, шырöм-сыналöм, мый юасян?

Чукыля-викыля... Кыныма нiя, чуклясяннэс, визывтöны му вылöт, некин оз висьтав. Öтiккесö ны коласiсь тöдö быдöс мирыс, мöдiккесö — кытшöмкö öтiк народ, куимöттэсö — неыджыт деревняись отир, а мукöдсö и некин оз тöд.

Öтiккезлöн öддьöн кузь, кыдз асьныс, история да уна ниммез, а мöдiккезлöн — не история, не ним. Волга шусьöма Ра, Узень, Итиль. Дон лö скиффез абу сетлöмась некытшöм ним: просто дон — ва, ю — и быдöс. Но сёжö сiя мöдiк народдэз понда — ним. А эд эмöсь юоккез, кöднö некыдз оз шуö. Нельки миян крайын, кытöн, натьтö, абу ни сэтшöм места, кытчö бы эз сибавлы морт, неетша шороккез олöны нимтöг. Мукöдпырся олöны нiя нимтöг миянкöт ордчöн, миян деревня бокын, миян йöр дорын, миян керку дын. Но этадз, конечно, шоча овлö.

Нiйö шороккесö, кöдна миянöс юкталöны, миссьöтöны, мийö тöдам. А кöдналiсь öтпырись год вылас, жар лунö, одзöстлам чуманок-мöд ва, а ыркыт лунö просто вожмалам, нылiсь нимсö ог юавлö.

А эд виль морткöт, виль деревнякöт, виль юкöт пантасьöм — этö тэнат знаннёэзлö содтöт, а может, и виль гаж, виль ёрт. Эшö унажык босьтан, кöр тöдан ёртытлiсь нимсö, тöдан, кин сiя али мый сiя сэтшöмыс.

Öтiк гожумö ме инми Кудымкар дынiсь Шадринчи (öнi сiя шусьö Таров) деревняö. Петi автобусiсь, иньдöтчи мöдöрас. Кöд коста вуджи деревня шöрсис паськыт логсö, паныт шедiсö нёль морт. Ме каждöйлiсь юалi öтiкö — кыдз шусьö таровскöй шорыс. И вот мый нiя висьтавлiсö.

Нывка:

— Шор.

Первöй старуха:

— Ен тöдö. Мийö тай ричка шуам.

Мöдiк старуха:

— Вот бöрам старик кыссьö, тэ сылiсь юав. А ме кысь тöда?

Старик:

— Чёрнöй Шакшорка öн сiйö шуöны.

Вот мый меным нiя висьталiсö. А эд нiя быдöнныс, натьтö, сiя деревняись. И чуть я не быд лун вуджалöны лог саяс, кöдöрын магазин, клуб, школа, автобуснöй остановка.

Мый, мый, а ассиным гортнымöс бы колiс тöдны. И кыным буржыка пондам тöдны сiйö, сыным донажык лоас сiя миянлö, сыным гажажык лоас олан. Но гажа оланыс ачыс оз лок миян дынö, колö миянлö мунны сы дынö. Босьтны сьöрö юан-сёян, босьтны тетрадь да карандаш, фотоаппарат — и иньдöтчыны роднöй край кузя, медбы öктыны сказкаэз, песняэз, юэзлiсь, местаэзлiсь ниммез, быдкодь важторсö. «А кыдзи нем ог адззö, — юалат тiйö, — и весь коккезнымöс гадьсьöтам?» Овлö и сiдз. Не пыр сэтшöм походсянь тыра мешöкöн бертöны. Но и мый? Мийö кыдзкö петалiмö жö округсиным дзуздинскöй волок сайö, кытöн мöдiм гижны коми сказкаэз, а вайим учöтик легендаок да челядьлiсь то этö прибауткасö: ёма-кулёма паськыт öма. Зато мымда гажсö адззим, мымда вильсö тöдiм! Öнöдз ме касьтывла вöра видззезлiсь аскодя дуксö, öнöдз эг вунöт сöдз шорлiсь кöрсö, небыт раслiсь ыркытсö, косьман турунлiсь чöскыт дурмöтансö. Несчастнöй сiя мортыс, кöда эз кывзывлы вöрлiсь да видзлiсь дуккесö, кöда оз тöд вöр ягöдлiсь кöрсö.

Но ладно. Мыйсянь жö пондöтчыны? А раз кутчим чукыляэс бердö, дак давайте медчукылясö перво видзöтам. А медчукыляыс Прикамьеын, конечно, не Чукыляшор, кöда Пешнигорт посад увдöрын боргö, а Кама. Сiя чужö Удмуртияын и перво котöртö ойланьö, сыбöрын петö асывланьö да мунö Гайна дынö — поперегалö миянлiсь округнымöс, — вöлись бергöтчö лунланьö, локта Перем дынöдз и сэсся бöр иньдöтчö Удмуртияö да дыр мыйись öтлаасьö Волгакöт.

Кама миян крайын медыджыт, медкузь, медвына ю. Сы вылын пукалöны кык мощнöй электростанция, Камскöй да Воткинскöй. Нiя Прикамьеись вашöтiсö пемытсö да зорöтiсö сылiсь промышленность. Нiя сетöны энергия Удмуртиялö, Свердловсклö, Нижньöй Туралö.

Ыджытыс ылöжык тыдалö, ыджытлöн и славаыс ыджыт.

Кама дорын вексö олöма быдкодь йöз, и быд йöзыс сiйö бура тöдöма. Уна отирлö эта юыс вöлi ыджыт туйöн. Сы кузя да сы вожжезöт булгарскöй, хозарскöй да мöдiк торговöй отир вовлöмась Перемöдз, ветлöмась Печораöдз, петавлöмась Северная Двина да Вычегда юэз вылö. И ежели, кыдз висьталöны археологгез, Прикамьеын мортыс олö уна тысяча год ни, то сыным год жö, натьтö, и тöдö сiя миянлiсь медыджыт юнымöс. И мыйсö, натьтö, эз усьлы пантавны Камалö, мыйсö эз усьлы кывны, кытшöм тайнаэз эз ковсьы вöтьны аслас йиррезö! Сiя уна отирöс вердiс, сiя уна отирöс розоритiс, уна отирлiсь босьтiс олан. Öтiккезлö Камалöн ваыс вöлi сöдз да чöскыт, а мöдiккезлö — сьöд да курыт.

Кыдз жö аркмис эта быдöнлö тöдса и сёжö тöдтöм нимыс — Кама?

Дзуздинскöй комиэз Камасö шуöны Камва. И шуöны сiдз вот мыйсянь.

Лöгöтöмась дзуздяккес енсö, öддьöн лöгöтöмась. Мыля и кыдз лöгöтöмась, озö висьтасьö, а вот сы йылiсь, кыдз нiйö еныс мыжйöма, пöрись отирыс шочыника эшö висьтасьлöны.

Дак вот, лöгувьяс еныс иньдас дзуздяккес юр вылö слевнöй зэр. Неделя зэрö, кыкö зэрö, — некытшöм колас абу. Кизьöртчас муыс, незьдасö мыссэс, ваэс береггезсис петасö. Вот-вот быдöс мусö вöтяс, быдöс йöзсö пöдтас. И сэк адззисяс öтiк богатырь, кöда вежöртас, кыдз чукöртчöм васö лэдзны. Босьтас сiя ыджыт и ыджыт из, арканалас сiйö гезöн да кыскас изсö му кузяс — керас ваыслö туй. И котöртас ваыс богатырьыс бöрсянь.

Сэксянь виль юлö сетасö ним Камва — богатырьсö шуöмась Кам.

Кам кыв öнi пантасьлö только сказкаэзын. Кам — этö вöрдядь, лёк существо, кöда куталö челядьöс. Но одзжык, родовöй общество дырни, камыс олiс öтлаын отиркöт, и отирыс сiйö уважайтiс. Кам вöлi начальник — сiя тöдчис енкöт и вермис веськöтны шогöттэз. Легенда как раз и висьтасьö добрöй кам йылiсь.

Ме тожö кывлi öтiк добрöй кам йылiсь и тöдлi сылiсь увтыр — Мичор род. Мичорыс вöлöма кам пиян да тожö, кыдз и айыс, тöдiсь. Сiя отсавлöма отирыслö кыйны руччезöс, кöччезöс, сьöлаэзöс.

Быд легендаын, кытшöм бы сiя фантастическöй эз вöв, учöтик-учöтик, да эм правда. Слевнöй зэр вермис лоны, и ваэс вермисö береггезiсь петны да вöтьны лажмыт местаэз, мый овлö и миян кадö. Но эта легендаыс, может, баитö мöдiк потоп йылiсь, баитö сы йылiсь, кöр ойланись ледник сибавлiс Прикамье дынöдз и тупкавлiс Камалiсь туйсö. Эта коста Кама, видно, вöтьлiс ыджыт места. Отир, конечно, эз кер ваыслö виль туйсö, но Кама, кöда котöртiс одзжык ойланьö, аслыс адззис мöдiк туй — бергöтчис лунлань. Эта аркмис квать — кыкьямыс тысяча год одзтi, и отирыс вермис вайöтны этö фактсö миян луннэзöдз*.

[Öння Кама руслоöт (Гайна увдöрсянь) одзжык котöртлöма Волга, кöда пондöтчылöма Урал керöссэзсянь.]

Öтiк учёнöйез шуöны, что Кама лöн нимыс былись шогмис кам кывсянь, кöдалöн значеннёыс — морт, а сiдзжö — этноним (племялöн ним). Этöн кывнас комиэс шуöмась и ассиныс медыджыт юнысö, мый йылiсь А. С. Кривощёкова-Гантман гижö аслас труддэзын.

Мöдiккез шуöны, что удмурттэзлöн важся кам кыв означайтö ыджыт ю. А ме думайта, что кам — этö просто ю, сiдз кыдз Кама йылас эмöсь Кам, Камка да Нилкам шороккез.

Прикамьеын да Уралын часто пантасьлöны юэз да шоррез, кöдна нимын эм ва кыв: Сёрва, Айва (Яйва, Ейва), Кушва, Косьва. Ва кылыс мыччалö, что энö ниммесö юэслö сетавлöма финно-угорскöй йöз, а ежели висьтавны точнöйжыка — перемскöй йöз (коми-зыряна, коми-пермяккез да удмурттэз). Неетша ним, кытöн эм ва кыв, мийö адззам и мöдiк местаэзiсь (Нева, Москва), но оз ков сразу чуньöн тюкнитны картаö да радувья чирöстны: «Вот ме адззи коми ним!» Тульскöй областьын эм Плава ю, но комиыслöн сы дын и дукыс абу сибавлöм. Сiя аркмöма славянскöй кывсянь: плава — этö идзас (сёрöнжык плава кылöн роччес пондiсö обозначайтны веж рöм). Сiдзкö, Плава да сылöн вож Плавица — веж ваа юэз.

Вöррезöт, видззезöт, изъя крутиккез бокöт визывтö мича Иньва. Öддьöн басöк сiя гожумнас: орсö сылöн ваыс, дзик йöктö аслас борган песня сьöртi. Сылö шыннялöны читкыля баддез, пашмöм ловпуэз, люштыра ула кыдззез. Öтлаын сыкöт сьылöны кöбывкаэз, ыбшаррез, дзилиммез. Нельки нюрбаран, кöр кутас сiйö сьылан завид, пурк лэбтiсяс вывланьö да бöр сунгисяс сук турунас и бакöстас ляксюр баран моз: ме-э-э-э.

Мукöдпырся туруналiсь отир нюжöтасö норакодь гора песня:

Ой тэ Иньва, Иньва-ваиньöй,

Голубöй синбана ва!..

А Иньва югыт-лöз ленточкаöн свиттялö дзирыт шондi югöррез увтын да не тэрмасьöмöн кытшлалö чорыт керöссэз да поперёшнöй яггез, кежавлö деревняэзö — гажöтö отирöс, кывзö счастливöй кад йылiсь песняэз.

Но Иньва тöдö и мöдкодь каддэз. Сiя адззывлiс отирлiсь не только гаж, но синва — кузьö, кызö, чизыр курытö, кöда пемдöтö нельки том синнэз.

...Вексö важын менам крайиньöй

Кисьтiс шоррезöн синва...

Этö вöлöма важынся-важын, кöр эшö коми мортыс абу кужлöма пода вöдитны, кöр немöн вöлöма гöрны. И вашöтлöма мортсö кынöмыс ылiсся-ылö горт дынсяняс, вашöтлöма дырся-дыр кежö.

Сьöкыт тöв, нужнöй тöв петöма öтiк увтырлö: яй абу, чери абу — пинь йылö пуктыны нем. Абу сёян, дак и олан абу. И мунасö сёянсö кошшыны быдöс мужик морттэс, кольччасö гортаныс инька чукöр да челядьпöлöс.

Öтпыр важмылас тöлiсь, мöдпыр важмас, а юрвердiссес оз тэрмасьö бертны шоныт горттэзö, оз тэрмасьö пöттöдз вердны учöт челядьнысö, пöрись аймамнысö, дона иннезнысö.

Вот и лымыс сылас, и вöр ва бульчиктöмöн мунас ыджыт юэзö, а нiя сё оз мыччисьö. Вöлись сэк, кöр сира почка потас да веж листöн пуэз вевттисьны пондасö, бертасö гортаныс вöралiсь-мöд. Ныкöт тшöтш локтас зубыт горе: родлiсь юрвердiссезöс пöрöтöма лёк враг, и сiя врагыс пö локтö öнi ны гортö.

Чапкасö гортнысö шудтöм отир, пырасö пыдöжык пемыт вöрас. И сайöвтас нiйö сук вöрыс лёк враг шогья, да оз вермы сiя дугдöтны отирлiсь синваэсö. Ой и лун горзöны учöт челядьыс, сыркьялöны старухаэз, содззезöн чапкöны синва мича иннез. И горзасö нiя сымда, что синвасис шогмас ва гöп, а гöпсис чепöссяс чож шорок.

Шуасö этö виль шороксö Инь ва.

Сэтшöм гажа ю — и вдруг сэтшöм гажтöма шогмöма сылöн нимыс!

Но меным бöра дöвгасö: то ли сiдз, то ли не; ежели сiдз, то миян областись и мöд Иньва ыс сiдз жö аркмис? Да и куимöт эшö эм — Инью (Инья).

Да, то ли сiдз, то ли не — кöдакö öтыс. Медбы висьтавны — кöда, колас бöра пыравны одззася веккез коласö. И ежели мийö нёджжöвтам важ кадас, то медодз син вылö усяс вот мый: одзжык эта юыс шусьöма Инва. А эта кылын женственнöйыс, ровно бы, абу ни: инька морттэсö комиэс пыр шувлöмась только инь нето ань, но не ин.

Ин кыв чожажык божественнöй, нежели женственнöй. Удмурттэз тöдöны языческöй енöс, кöдалöн нимыс Инмар. А небо, кытöн олö еныс, нiя шуöны ин, инбам. Сiдзкö, Иньва — этö енлöн ю. Да эд и инь кывлöн эм мöдiк вежöртас — тожö ен. Комиэс тöдлöмась не только Войпельöс, Енöс (Иенöс), но эшö и Зарни иньöс (зыряна шуöны Зарни ань).

Сьöкыт висьтавны, мыля сiя енлöн ва. Может, сысянь, что Иньва берегын сулалiс кытшöмкö родлöн языческöй ен-болван. Кытöнкö Иньва йыввезас, Вежайка юок устье дын, эм Бовбан юр, — натьтö, неыджыт мыс. Может, эта мыс вылiсь и застанитiс чудскöй еннэсö татчö локтiсь йöзыс. Эна местаэзын жö эм и чудскöй кар, а неылын сы дынсянь быдмылöма Сырчик кöз, кытчö эшö неважын ветлывлöмась кыдз домавны.

Самöй Иньва йылас — Чойкерöс ын (сiя жö — Круточой), кыдз баитöны отирыс, куйлö уна золото да серебро. Может, эна басниэс миянлö казьмöтöны сiйö кадсö, кöр шогалiсь отирыс ветлывлiсö «ена ва» дорö? Может, сэтчин вöвлi чудскöй вичку — сулалiс пуовöй ен?

«Ена ваа» ключчес сэтчин котöртöмась кыка: öтыс Чойкерöс дорас, мöдыс — кытöнкö Нестер деревня дын. Еныс, тыдалö, вöлöма добрöй, веськöтöма бура, да только не весь: ковсьöма ваас лэдзны золотушка нето серебрушка. И сiдз вöлöма, видно, не öтiк век. Нельки эшö кольöм война коста пöрись морттэс öтi-öтi ветлывлöмась кошшыны бур здоровье — ювлöмась васö, миссьöтлöмась сiйöн висян синнэз, коккез, киэз. Вот керны бы эна ваэзлö химическöй анализ — абу я нылöн кытшöмкö целебнöй свойство?

Пермскöй областьын эмöсь эшö кык ю, кöдналöн ниммес, натьтö, шогмисö тожö ен отсöтöн, — Еньва да Еншор, а Печора бассейнын — Енва ю.

Уна век Иньва-ваиньöй служитö мортлö: вердö сiйö, юкталö, бергöтö изыннэз, кылöтö вöр, козьналö гаж. И кытшöм несправедливость: сы туйö, медбы эта мыдзтöм труженицалö сувтöтны памятник, морт куштö сылiсь береггесö, сылiсь йыввесö, нятьöсьтö, тшыкöтö, тыртö ёгöн васö. А добрöй отирлöн эд законыс мöдкодь — юрвердiсьсö берегитöны, сы понда заботитчöны.

Иньва юлöн эм учöтжык, да счастливöйжык сой — Кува, кöть и уна отир сiйö лыддьö неловья, кулöм ваöн. Эта ю ним гöгöр ветлöтö сэтшöмтор.

Кöркö миян муэзöт гуляйтöма Камскöй вольница. Сэк отирыс часто пантавлöма пöрись да шогалiсь разбойниккезöс, кöднö откажитлöма ватажнöй атаман. Öтiк сэтшöм мортöс вöлi адззöмась öння Отёв посад местаись вöралiсь отир. Петасö ю дорас, кылöны, кинкö ружтö то ли ыджыт долытсянь, то ли лёк зубытсянь. А нылö колö тöдны, кытчö нiя петiсö. Вот и юасьöны.

— Кытчö ми локтiмö? Кыдз шусьö эта местаыс? Разбойниклöн, кöда лöсьöтчö кувны ни, мый юрас, сiя и кыв йылас:

— Кува! Кува!

Вот и вежöртасö вöралiссес, что сiя местаыс шусьö Кува.

А кыдз былись-ту?

Ежели веритны важ гижöттэзлö, то одзжык эта юыс шусьöма тожö мöднёжжык — Кудва. А мый сэтшöм куд, мийö баитiмö ни. Ме только эг висьтав сы йылiсь, что удмурттэз куд öн шуöны нюр. И ежели эта кылыс кыдзкö шедiс миянöдз, то Кува — нюрын чужöм ва, нюрьяинöт котöртан ю.

«Кык сой — Кува да Иньва...» — сiдз песняын сьывсьö. Бытшöмöсь соёккез, нем он шу: öтсö ен сетöма, а мöдсö, тыдалö, — Ёма, нюр хозяйка! А Ёмаыс эд, пожалуй, кöспельыслöн роднöй сой!

Иньвакöт öтлаасьö Юсьва, басöк нима ю. Мыля жö Юсьлöн ва? Юссез сэтöн оз поздiсьö, даже оз и пуксьывлö, натьтö (нiя оз радейтö учöт ваэсö, сё бöрйöны ыджытжыкöсь, паськытöсь). А сэсся мый, поди, вермас лоны öткодьыс юлöн да юсьлöн? Кинкö, может, панöвтас менö: «А мый сэтöн дивуйтчыны? Владимир городöт котöртö юок, кöда сiдз и шусьö — Лебедь». Эта сiдз. Правда, невночка мöдмозжык — Лыбедь, но вежöртасыс нылöн öткодь. Только и сэтöн, натьтö, юссес эзö овлö. Разь буди княззес видзисö гортся юссезöс. Эта нимыс, натьтö, локтiс Киевись. Кöркöся стольнöй городöт, великöй князь керку бокöт, котöртлöма тожö Лыбедь ю. Князь Андрей Боголюбский, например, Владимир городö строитiс киевскöй золотöй воротаэз сьöртi монументальнöй арка — Золотые ворота да киевскöй Софийскöй собор кодьö тшöктiс строитны аслас столицаö мöдiк собор.

Лыбедь юок эм и Рязанскöй кремль дын, и, ме думайта, сылöн нимыс шогмис тожö киевскöй Лыбедь юсянь.

Миянлiсь Юсьва нымöс комиэс шуöны не Юсьва, а Юсва. Петö, что эта юлöн нимыс аркмис не юсь кывсянь. То и гайнскöй Имас деревня одзжык шусьöма Юсма. А Удмуртияын, не сiдз ылын Юсьва йывсянь, котöртö Юс ю. Ме юаси удмурттэзлiсь, мыля сiдз шусьö юыс. Öтiккез шуöны, что юс не мый-нибудь мöдiк, а юсь. Мöдiккез висьталiсö, что эм сэтшöм зверёк, кöда одзжык паськыта овлöма эна местаэзын, но öнi сiя öшöма, орöма сылöн родыс. А вöвлöма зверёкыс öддьöн чож да хитрöй. Юс юыс пö сэтшöм жö чож да хитрöй.

Ежели веритны нылö, то сэтшöм зверёкыс, натьтö, соболь. Правда, деддэзным сiйö шувлöмась низь, да эд вермисö сiйö шуны кыкнёж. Вон лосьöс комиэс шуöны куимнёж: лола, йöра, вöрмöс.

Дзуздяккез тожö кывлöмась юс ыс йылiсь, но только пö юс ыс не соболь. Сэк, мыся, учкись, поди? Сiя эд тожö öддьöн визыв. И хитрöй да коварнöй хищник, кöть и шырся невна только ыджытжык. Дзуздинскöй комиэс оз тöдö, кин сэтшöм юс.

Зыряна тожö вунöтöмась юс кывсö, но нылöн эм сэтшöм выраженнё — юс кодь мудер (юс кодь хитрöй). Только эстöн юс ыс, натьтö, роч кыв: юс öн Россияас шувлiсö чиновникöс, кöда стрась бура соровтiс быдкодь судебнöй делоэзöн.

Юс кыв тöдöны и манси — ны моз сiя лоö орёл, — но этчö сiя оз лöсяв.

Дак кытчö жö мийö локтiм? Кытшлалiм, кытшлалiм, да бöр сiя жö местаö и петiм, кысянь пондöтчим. Кöть и ме чапка юсьсö кыдз кайöс бокö, но ог вермы чапкыны сiйö кыдз морт ним. Юсь нима морт вермис лоны. А ежели вöлi, ва ним сысянь вермис аркмыны. Разь етша миян сэтшöм кодь юоккес — Сенькашор, Петрушор, Клиовшор, Маркашор, Ванюкшор, Рисёвшор да уна мöдiккез. Но сёжö ме сулала тöдтöм юс кыв дор. Юсьва, Юс да сибирскöй Чёрный Юс ваэз ниммезын, видно, олö öтiк кыв, и эта кылыс кытшöмкö важся угорскöй йöзлöн.

Эм Иньвалöн мöдiк сой — Велва. Сылiсь нимсö бöрйöны то кыдз: вел (вевдöрись) ва нето вöв ва, но не öтыс, не мöдыс абу убедительнöйöсь. Чередь я позяс петкöтны Велва лiсь нимсö коми-пермяцкöй кылiсь. Сiя, пожалуй, угорскöй кыв, кыдз и Велсуй, Велгур да мöдiк вел, вол тора ниммез, кöдна шочыника пантасьлöны Прикамьеын. И пантасьлöны нiя сэтчин, кытöн олiсö манси да ханты. Велва öн шусьö и Печоралöн приток, и эта, натьтö, абу случайность.

Кыла, что менö пондасö видны: сё манси да манси, а кытöн коми-пермяцкöй ниммес? Али пермяккес одзжык кывтöмöсь вöлiсö, али эз арталö сымдасö, медбы ас гöгöрсиныс местаэсö кыдзкö шуны?

Не, конечно, не сiдз. Коми нимыс тыр, да ме мукöдыс бердö ог и кутчы — и сiдз вежöртана, а уна ниммез, кöдна аркмöмась коми кыввезiсь, олöны ылын миян Парма дынсянь, а менам задача бöрйыны горт ниммез. И, мöдкö, вот мый: унаись интереснöйжык тöдмавны тöдтöмсö да сыбöрын висьтавны эта йылiсь мöдiккезлö, висьтавны отирлö. Правда, ме тöдмала отирыс отсöтöн жö. Меным отсалöны и комиэс, и манси, и ханты, и удмурттэс, и эстонеццес, и финнэс. А куимöткö, миян гöгöрын былись уна угорскöй ниммез. Мукöдыс сэтшöмöсь жö, кытшöмöсь эмöсь öння мансийскöй му вылын. Вот эм миянын Вежай ю — пелымскöй мансилöн тожö эм, миянын Пелым — сэтчин тожö (правда, нiя шуöны сiйö невночка мöднёжжык — Полум); миянын Кама — сэтчин мöдiк Кама. Ны Камалöн нимыс аркмис, видно, тожö кам кылiсь.

Кин вöвлi Иньва йыввезын, то адззылiс нето кывлiс Гöрдя да Кöтыс юэз йылiсь. Сэтчин ладорын нiя юэс Иньвалöн медыджыт вожжез: öтыс — шульга, мöдыс — веськыт.

Гöрдялöн официальнöй нимыс Кордья — быдлаын сiдз гижöны. А отир шуö сiйö сiдз, кыдз велалöма: либо Гöрдя, либо Гöрддю. Сiдзкö, эта лоö, — гöрд ю.

Эмöсь миян округын сьöд шоррез, эмöсь и лöзöсь. Сьöдöн нiя шусьöны сiйöн, мыля котöртöны нюра местаэзöт, кытöн куйлö сьöдмусин, торф. Лöззэс — пыдын, невизыв шоррез. А мыйсянь — гöрддэс? Гöрднас васö шуöны тожö сы рöм сьöртi.

Отир, кöдна олöны Гöрдя ю пöлöн, вермасö висьтавны меным: «Миян юным абу гöрд, тэ мыйкö соралан». Этö сiдз, абу гöрд. Пожалуй, лöзöв. Но эд не весь жö сiдз шуисö гöрдöн. Одзжык, тыдалö, сылöн рöмыс вöлi мöдкодь. Да только одзжык я? Юньгинскöй мужиккез шуöны, что Гöрдя йылын да сы гöгöрись шороккезын гожумнас ваыс овлö сiмвевья гöрд. А мыйсянь лоö сiм рöм, быдöнным тöдам: кöрт сiмсянь. Дак мый жö, Гöрдя юлöн эм кöрт? Пожалуй, эм. Конечно, не кöрт, а кöртовöй руда.

Дивуйтчыны сэтöн оз ков. Самковскöй вöррес кыссьöны сё Кува дорöдз. Кува гöгöрын эмöсь не öтiк важ рудник, кытiсь Кувинскöй чугуноплавильнöй завод понда миян деддэзным кöркö шедтывлiсö кöрт руда.

Но а ежели сёдаки сiя Кордья? Сэк сiйö колö вежöртны кыдз учöтик, винерик юок (коми кыв корд — кöсыник, винерик).

Кöтыс кыв коми мортлö нем оз висьтав, но эм важмöм коми кыв — ковтыс: юлöн долина, ю дорись кушин. А вот кетскöй юэзлöн ниммес: Кеть, Xет, Туртас, Козас. Кетскöй жö ниммез, видно, босьтöмась миян Кетчер да Иртыс юэз.

Кеттэс, тöдчö, татöн олöмась дыр, раз колисö бöрсяняныс сы ыжда след — и географическöй названнёэз, и фамиллёэз, и мöдiк этническöй признаккез. Йöг ладорын, например (сэтчин и олöны Кетоввез), отир басниын эм кöнтун кыв. Этöн кывнас видöны мортöс, кöда мыйöнкö эз гленитчы отирлö нето керис мыйкö не сiдз, не сы сьöртi.

Кеттэзлöн вöвлöм öтiк род — кöнтан. Не сы родiсь я миян мукöд Кетоввезным? Может, нiйö и видлiсö сiдз? Чужöй, тöдтöм отир прокод оз гленитчы мöдiк народлö. Этасянь и пöрись пермяккеслöн татарин да кыргыз кыввез видчанöсь.

Кöнтун, конечно, вермис аркмыны и коми кыввезiсь: кöн — пыш, тун — тöдiсь, колдун. Серöм могись умöлик тöдiсьöс вермисö шуны кöнтун — пышовöй тöдiсь, кыдз ныж коса тай шуöны нянёвöйöн.

Эз на осьт ассис значеннёсö и Ножа (Ножовка) юок. Сiя, тöдчö, миянын тожö гöсь.

Жа окончаннёа ниммес пантасьлöны Мордовияын да Москва гöгöрись областтезын: Сежа (Тульскöй), Сожа (Ярославскöй), Вожа (Рязанскöй), Вержа Сежа, Ужа (Смоленскöй), Межа, Серёжа (Калининскöй). Этадз, натьтö, юэсö шувлiс легендарнöй меря, кöдалöн племяэс как раз эна местаэзын и овлöмась. Эстöн жа тор, натьтö, кыдз и коми ва, тожö мыччалö ю, шор, ва. Может, нiя быдöнныс аркмисö мордовскöй ужа кывсянь. А ужа — этö юлöн вож. Но мукöдыс эна коласiсь, колö думайтны, вермисö лоны и древнерусскöй кыввезöн: сежа — сесть, садиться кылiсь, вожа — водить кылiсь.

Ножа вермис аркмыны и нож, ньöж коми кыввезiсь. Нiя кыкнанныс мыччалöны предметлiсь признак — жаг, дышкодь, нюжвыв.

Иньвакöт öтлаасьö Пожва. Сiя, шуöны, коми-пермяцкöй ним, но и комиэслö не кокнит висьтавны веськыта, мый сiя лоö. Но, ладно — ась лоас пож ва. А мыля сiдз? Юэслöн, ровно бы, нем абу öткодьыс пожжезкöт. Эстöн, тыдалö, баитсьö не пожнасян пож йылiсь. Пож кывлöн одзжык вöлöма и мöдiк значеннё — гудыр. Пермяккес этö озö ни тöдö, а удмурттэзлöн сiя сё олö. Вот и лоö, что Пожва — гудыра ва.

И юрлинскöй Пож, натьтö, тожö гудыра ю.

Вот сэтшöмöсь эна тöдтöм ниммес. Но ме босьтi только кынымöкö, а нiя эд унася-уна — бастрыгавтöг некытшöм додьö озö тöрö, разь только тракторнöйö. И эмöсь эшö нежык вежöртанаöсь, эмöсь сэтшöмöсь, кöднö он и тöд, кыдз колö правильнöя шуны.

Вот Иньвалöн вож Исыл. Сiя эд миян юэс коласын тожö чочком рака. Кин висьталас, мый сiя сэтшöмыс? Меным кыдзкö висьталiс öтiк мужик сiдз: сiя пö и кын, и сыв овлö, дак сысянь — Исыв. Кыдз пö тай эм льöм и ильöм. Конечно, эта басни — басни и эм. Нельки льöмсö да ильöмсö öтлаö оз туй сувтöтны: льöм — коми кыв, а ильöм (ильм) — роч.

Может, эта нимлö эмöсь эшö кытшöмкö коми объясненнёэз, но ме эг кывлы сэсся. И ог вермы висьтавны часöт, кытшöм сэтшöм ним Исыл. Но сылöн ёрттэс миян крайын эмöсь не öтiк: Косыл, Весыл (сiйö шуöны эшö Весым), и Кунгур сайын — Ясыл ю. Ежели сыл кывлöн эм значеннё, то, колö думайтны, что сiя кытшöмкö отир кылын бöра жö лоö либо юок, шор, либо вож.

Но позьö баитны и мöднёж. Öтiк кетскöй племя кылын олö ул (уль, ыл) кыв — сiдз нiя шуöны ю. И ежели предположитны, что Исыл, Весыл, Ясыл ниммес кетскöйöсь, то нiя оз йитсьö ису, вису этнонимкöт. Исыл да И с юэз (Свердловскöй областьын), натьтö, тёзкаэз, только öтсö величайтöны, а мöдсö — озö (кетскöй ис — чери).

Юэзлöн мöдiк торья группа аслас ниммезын видзö чер кыв. Эта кылыс коми мортлö служитö öтдруг кык служба: обозначайтö керасян инструмент да юлiсь вож. То нiя юэс: Янчер, Очёр, кык Чермоз, Кетчер, Шотчер, Ижичер да мöдiккез. Но бöра оз туй висьтавны увереннöя, что нiя быдöнныс комиöсь. Былись, мый лоö Очёр? Мукöдыс шуöны, что сiя аркмöма ош шор ись. Ежели бы сiдз вöлi, дак и шуисö бы сiдз. А ежели ош чер ись, то вöлi бы Ошчер — эстöн роч мортлö нем сьöкытыс абу, и кывсö сiя оз понды чеглавны. Дак абу я эта группаыс кетскöй? Кеттэз кылын тожö эм чер, и сiя тожö обозначайтö ва — учöт ю. Кетчер юлö нимсö вермисö сетны и комиэс — кеттэзлöн ю. Но вермисö сiдз шуны и асьныс кеттэс, и сэк сiйö юсö коми кыв вылö колö вуджöтны кыдз мужскöй ва.

То тай мый петö: кöдöрö бы эн мун, сэтöн и загадка, сэтöн и крепыт йöр, а то и тупик. Только эта йöрыс, эта тупикыс миянöс не должен повзьöтны. Кыным унажык пантасясö йöррес, кыным сьöкытжык вуджны ны сайö, сыным ыджытжык интерес кыскö ны дынö, сыным унажык лоö отирыслö исследовательскöй удж. Эта ыждöтö отирлiсь знаннёэз, одзлань вештö обществолiсь олан. А кöр быдöс тöдöма ни, кöр нем ни керны отирлö, сэк и оланыс дзик рушмöм кушман — не чöскыт, не курыт. Мортыс сы понда и чужöма, медбы адззыны тупиккесö да штурмуйтны нiйö, дзимлявны нiйö аслас туй вылiсь да тöдны, мый эм сэтчин, сы сайын. Но энö тупиккесö вермö вожмöвтны только сiя, кин бура да уна велöтчас и кинлöн эм ыджыт желаннё да воля.

Ме кыдзкö сё баита округись лунвыв районнэз йылiсь. Но эд и мöддэс йылiсь мыйкö колö жö висьтавны. Сэтчин сымда интереснöйыс, сымда невежöртанаыс да тöдтöмыс, что, кыдз баитсьö, позяс уна чаг-ёг керны. Гайнскöй, Косинскöй да Кочёвскöй районнэзын чудскöй ниммес вевсьöн, не öтпöвса пластöн куйлöны.

Чуддэс понда ме баитi ни, но эг висьтав, киннэз нiя сэтшöммес. А эг висьтав сiйöн, что ме ог тöд этö.

Чуддэс йылiсь спор мунö не öтiк век ни. Чудскöй отир йылiсь гижöма уна десяток книга да статья, да только некин — не историккез, не этнограффез, не археологгез — оз вермö висьтавны точнöя, киннэз нiя сэтшöммес: то ли торья народ, кытшöмкö öтiк финскöй племя, то ли быдöс ойланись да Урал дорись финно-угорскöй йöзыс — коми, удмурттэз, финнэз, ханты, манси да мöдiк неыджыт племяэз.

Мукöдыс шуöны, что чудь — коми-пермяккезлöн предоккез. Асьныс коми-пермяккес откажитчöны этаись, лыддьöны «сьöд чуддэсö» йöз отирöн, умöль отирöн.

Дак вот и висьтав точнöя, кин сетiс Весляна юлö нимсö! Эта дорын мырсисö ыджыт учёнöйез и керисö сэтшöм вывод: Весляна сö сiдз шуöмась вису (ису) йöз сьöртi. Эта нимын пö куим тор: вес, ля, на. Ля да на — этö пö ва. И лоö сiдз: Весляна — висулöн ва.

Эта уна ваа вольнöй юыс перво, натьтö, шусис Висула. А сыбöрын, может, и пермяккес ни, эта ю гöгöрись местаэсö пондiсö шуны Висулана, кыдз и Шойна, Изна.

Коми-зыряна ассиныс öтiк ю шуöны Весыва, а роччес сiйö жö юсö — Весляна.

Оз ков вунöтны и сы йылiсь, что гайнскöй муэз вылын олiсö финскöй племяэз. А ны кылын эм ла, места мыччалан суффикс, кöда часто горалö кыдз ля. Финляндияын, например, быд пельöсын позьö пантавны ла окончаннёа ниммез: Айнола (Айно — женскöй ним) — Айнолöн горт, усадьба, места; Уряла, Таммела, Коувола да мöдiккез. Ленинградскöй областись финскöй деревняэзлöн ниммес кончайтчöны иля вылö. Варикселя (вариксе, варис — рака), Ратталя, Сямяля. Эстöн ла, ля торыс мыччалö не ва, а места, горт.

Дак вот, финскöй племяэз этö юсö вермисö шуны Висула — вису племялöн места. Вермис сiя аркмыны кыдз финскöй ним Весила (веси — ва; ла — места мыччалан суффикс). Весина — ва, уль места.

Лолог йылiсь баитöны сiдзжö неöтмоз: кöдна шуöны, что эта нимыс аркмöма лола кывсянь (лола öн важся коми отир шувлöма лосьöс); кöдна шуöны, что эта юлöн нимыс «пуовöй» — аркмöма лол (ловпу) кывсянь. Но колö эшö и эшö видзöтны сiйö да вöлись керны колан вывод. Сэтöн, может, эм мыйкö öтласа Волга ю да Волого ты ниммезкöт, кöдна, тыдалö, шогмöмась балтийскöй йöз кылiсь.

Лол кывсянь жö аркмöма, тыдалö, и Лолым юлöн ним.

Кокнитжык, ровно бы, эта ладорсянь Тимшор юлöн нимыс — Тима лöн юок. Но, кыдз ме баитi ни, оз ков вунöтны сы йылiсь, что топонимия öддьöн вартчöм-гардчöм штука, и любöй древньöй топоним вермас новйыны личина. Нiя оз куйлö вевдöрын, кыдз ва вылын поплавок, нiя айсберг кодьöсь: тыдалö сымда, а сайöвтöм — кык сымда.

Мукöд топонимлö сэтшöм ни бур объясненнё адззан — быдса крепость строитан, а мöдiк павкöтчас сы бердö мöд ладорсянь — и крепостьыт нёй мунас, паськалас, кыдз пöим.

Коми-зыряналöн эм Тимшор ю, кöдö нiя ас мознаныс шуöны — Тымсер. И шогмöм эта нимыс, кыдз нiя лыддьöны, тым кореньсянь (тымны — йöрйыны, пруддьыны, тыртны). Пожалуй, и миян вöрья Тимшор ным не морт нимсянь аркмис, а тым кывсянь, и лоö йöрмöм, тырöм ю.

Нылва ю гöгöр тожö гöрдззöмась берся баснисö: «Ныл кодь мича да чож — вот и Нылва»; «Ныл пö кöдлöнкö сэтчин вöйöма, да шуöмась Нылва. И час сё Нылва». А пелымскöй Нылва сэтшöм, что и вöйнытö некытчö.

Нылвалöн настоящöй нимыс, натьтö, Онолва нето Онылва. Сiя да Оныл ю — öткодь нимаöсь и, видно, не комиöсь. Ол, ыл торыс эстöн, может, невна мöдкодьсьöтöм мансийскöй или кетскöй ул — учöтик юок.

Сёйва йылiсь, пожалуй, колö висьтавны öтiкö — этö глинаа местаэзöт котöртан ю. А вот Сёрва ю йылiсь сразу он висьтав, мыля сылö дöнзьöма сэтшöм ним. Эм миян сёр — перекладина, потш (грядка сёр, латтянсёр, öшлiсян сёр), дак сiя кыдзкö оз лöсяв этчö. А может, аркмис сiя сёрва кывсянь (кизерик сур, сурбöж)?

Комиэзлöн эм эшö öтiк сёр — вöралiсьлöн туёк, а удмурттэз этадз шуöны туанöс. Дак туан ва, туй ва али сур кодь ва?

Но Сёрва вермис босьтны аслыс нимсö и сёрд кывсянь. Комиэз сёрднас шуöны вöрья оль (низина), кытöн быдмö кöзъя вöр. И эта, ме моз, медбура лöсялö Сёрва дынö..

Пермскöй областьын эмöсь эшö вельтума юэз, кöдна ниммезö пырö ва кыв: Полва, Язьва, Колва, Яйва, Сива, Кизьва, Лысьва, Сыньва, Тулва. Нылö ниммесö сетiсö тожö комиэс, но нылöн одзись торрес сiдз важмöмась либо вежсьöмась, что точнöя сьöкыт висьтавны, мый нiя мыччалöны. Конечно, Полва абу аркмöма пол (половина) роч кылiсь, кыдз и Язьва — язь кылiсь, а Колва да Сива кол да сивая роч кыввезiсь, кöть мукöд морттэс и шуöны нiйö идъя-зöрья ниммезöн — роч-комиöн.

Тöдтöмöсь миянлö лысь, сынь, тул, пол, язь, кузь, яй кыввез, но позьö предположитны, что нiя кетскöйöсь, а мый обозначайтöны, ме сiйö ог тöд.

Луньва да Каква ниммезын тожö кылöны кетскöй кыввез лунь (хариус) да как (керöс).

Эна ниммезкöт öтiк йöрданö ме йöртi бы и Обва юлiсь нимсö, кöть и шуöны, что сiя аркмöма ыб либо об (лым стола) кыввезiсь. Эта обыс, ме думайта, öткодь сибирскöй Обь ю да кочёвскöй Обь шорок нимкöт. (Эмöсь и мöдiк юэз, кöдна нимö пырö об кыв — этö Средньöй Азияись Сурхоб, Яхноб да эшö вит-квать юок. Таджиккез кылын об — ю, шор.)

Сэполь юлöн «национальностьыс», натьтö, не коми-пермяцкöй, кöть и пöртöны сылiсь нимсö сöп (желчнöй пузырь) да оль кыввезiсь. И чередь я вермис шогмыны сiя тюркскöй сэпыль кывсянь (нылöн сэпыль — крепость). Сэполь ю нимын сёжö олö, натьтö, удмуртскöй кыв сэпыль — уль, морока.

Адззисясö эшö не öтiк десяток юок да шорок, кöдна, кыдз магнит, кыскöны ас дынаныс топонимистöс тöдтöм вынöн, кыскöны асланыс древньöй таинственностьöн. Видзöтан тэ важ картаö и адззан берся нимсö. Вот Порож, Камалöн вож, паськыт ю. А Юрлинскöй районын то эм неыджыт юок — Юм. Вон Кемоль шор, кöда устье дын кöркö пуксьöма чудскöй Майкар. И ежели тэ думанат иньдöтчан важын ни чулалöм веккезö, то Порож ю дорись казялан воинственнöй финскöй племялiсь горттэз; Юм юок дорись тэ панталан мöдкодь отирöс. Сэтчинiсь, кытi чуклясьö Кемоль, адззан чуммез нето юртаэз — коварнöй югралiсь* стойбище.

[Югра — угорскöй отир, а сiдзжö нылöн муэз, страна.]

А может, и усяс син вылат, кыдз лёк хан Асыка гусясьöмöн вайöтö ассис ордасö перемскöй муэзö, кыдз чулымскöй татара грабитöны Кама дорись каррез да горттэз. Верман казявны и роч дружина, кöдö кытшöмкö пермяк нуöтö «саран юш» (зырян туй) кузя остяцкöй вöррезö — юграö.

Дата добавления: 2015-11-16