Берся-бер ваэз

Эмöсь я светас сьöд кöччез нето чочком сьöдкайез?

Да, эмöсь. А кöс ваэз? Нач и нач кöсöсь, кыдз сухарь али косьмöм йöв — порошок? Абу. Ваыс, эта диво-минералыс, вермас лоны только ваöн. Нельки сэк, кöр сiя кын — лым либо йы, и сэк, кöр сiя дзирытся-дзирыт и шусьö кöс пар.

Сухарьыс сiйöн и кöс, мыля сэтiсь пакмис ваыс, йöлыс сысянь и лоис пизь кодь, мыля сэтiсь быдсöн пичкисö васö.

Дак кыдз инö сэк петö: öткö, ва эм ва, а мöдкö, миян Пармаöт визывтöны кöс юэз? Вот, например, округсиным медыджыт юсö косинса шуöны Кöсва да просто Кöс. Коми республикаын эм Кöсъю, Удмуртияын — Кöсшор. И быдöнныс нiя котöртöны, абу косьмöмась.

Мöдiк дело уральскöй юэз, кöдна тожö шусьöны кöссэзöн. Ме адззылi Углеуральский город сайись Сухая речка юок — вот сiя кöс дак кöс: эм сылöн только öрыс, долинаыс, а ваыс абу. Но юыс вöлi котöртöма сэтi неважын, мукöдлаас эшö тöдчис паття. Кыдз висьтасьöны, тулыснас Сухая речка ын ваыс эм, а кыдз только лоасö жаррез, юокыс нач косьмö. Правда, сiя, шуöны, не пакмö, а пырö му пытшкö. Но вот пыдын Коса, кöдалö васö сетöны юрлинскöй, кочёвскöй да косинскöй дзибьяиннэз, кöда некöр оз косьмывлы, и вдруг — кöс ва. Эта мыйкö невежöртана!

Может, сiдз сiйö шуисö ылöстöм морттэз? Али кытшöмкö гажа шутник? Али кöс кылыс одзжык вöлi не антоним, а синоним ва кывлö, кыдз уль, нюдз, нютш нето ю, шор?

Кöстiн жö тэ, Кöс, миянлö загадка. Эн бы и кутчы сы бердö, да öддьöн ни сiя забавнöй, кöть и кöс. Дак пондылам перкйыны — мый лоас, сiя и ло.

Коми кöс видзö то кытшöм понятиеэз: косьмöм, шуралöм, ватöм. Кöс юöн позьö шуны непыдын, етша ваа юок. Петö, что нiя понятиеэз некыдз оз лöсялö коса ю дынö. Сiдзкö, комиэс Косалö нимсö сетiсö мöдiк признак сьöртi, а то и мöдiк отир сiдз шуисö. Мöдiк отирöн колö лыддьыны древньöй финскöй племяэзöс, кöдна олiсö сэтöн уна век одзтi, или ны бöрся олiссезöс — угорскöй йöзöс. Угорскöй йöз коласiсь, кыдз вöлi висьталöма ни, эна местаэзын вель дыр олiсö манси.

Мансилöн абу кöс кыв, но эм коса (хоса, госа, коша), мый лоö — кузь, кузя нюжалöм. Дак эз я шуö манси миянлiсь кузь юнымöс Коса öн?

Мукöд учёнöйез шуöны, что Коса лöн нимыс шогмис хоз кывсянь (хозара отир этнонимсянь). Хозарскöй племя овлöма Волга дорын, но вовлывлöма эна местаэзö торгуйтны. Уявлiсö нiя, видно, Коса ю кузя, но быдкодь товарöн вежсьöмась-пансьöмась важ Ныров дын, кöдö хозарскöй базаррес кузя пондöмась бытьтö бы шуны Коса посадöн.

Косинскöй районын эм Косья ю. Сiйö шуöны и Кöсъю, и Косью. Кöс кыв миянлö вежöртана, а кось — не öддьöн. Кöть и шуöны, что сiя аркмöма косьмыны кывсянь, да не совсем сiдз, натьтö. Кось — этö юын порог, перекат, визлач. Миян областись мöдiк Косья да Косьва юэз как раз изъяöсь, порожистöйöсь.

А вот эшö страннöй дело: неетша юэз да шоррез ниммезö мылякö пырö мыс кыв. Бöра загадка: кыдз этö ва вермö шусьыны мысöн? Ва — этö ва, а мыс — этö мыс, и соравны нiйö некыдз оз позь.

Вот тэ и кутчы ныкöт! Не ниммез, а дзугсьöм шöрт — лад абу.

А может, мыс ыс не только мыс, но и ю обозначайтö?

Юсьвинскöй районын сразу кыка сэтшöммес — Бевмыс и Кöсмыс. Да и Мурмöс, натьтö, ны коласiсь жö. Кудымкарскöй районын — Вильмыс (Вельмыс), Сидоршорлöн вож.

Язьвинскöй комиэзлöн, кöдна олöны Красновишерскöй районын, эм Мöсъю. Сэтчин жö, Кваркуш (комиэс сiйö шуöны Кварквож) хребет вывсянь пондöтчöны Молмыс да Ошмыс юэз. Сы ладорын жö Вильва юкöт öтлаасьö Боркмос. Сылöн нимыс, может, аркмис коми быркмöс кывсянь, кöдöн зыряна шуöны рисьва?

Прикамьеöт визывтöны кык Чумöс — öтыс усьö Камаö, мöдыс — Юсьва юö.

Вот кыныма ни — быдса роз. Ежели бы нiя вöлiсö öтiк-кык, то позис бы шуны, что эта — случайность. Но кöр нiя чукöртчöны быдса лёдззез — эта абу случайность, эта — закономерность ни. Да и сэтöн эшö не быдöс ниммес.

Удмуртияын то эм сэтшöм жö — Карамас; Печоралöн вож шусьö Емыс, а неылын сы дынсянь, Ижма бассейнын, эм Öшмöс ю. Свердловскöй областись мийö адззам Лагмас ю, Марийскöй АССР-ын эмöсь Карамас да Маламас, а ылiсь Венгрияын — Темес, кöдалöн нимыс, может, тожö не чужöй прикамскöй ним семьялö.

Мос, мес, мыс, мось, мас кыввезлiсь значеннёсö колö кошшыны, тыдалö, древньöй финно-угорскöй кылiсь. Нiя, может, петiсö öтiк позiсь ма кывкöт, кöдö учёнöйес лыддьöны ва мыччалан суффиксöн. Эта суффиксöн мийö тöдам юэзлiсь уна ниммез: Лама, Клязьма, Улейма, Вязьма, Ведьма, Тотьма, Лохома, Цильма да уна мöдiккез, кöдна паськалöмась Кострома дынсянь Урал керöсöдз да Туласянь ойвыв море дорöдз.

И кин висьталас, что монгольскöй мöс (мус) кыв совсем чужöй миян мос, мес, мыс кыввезлö? Нылöн мöс (мус) — йыа, сöнöга (Мусын-гол — йыа ю).

Интереснöй эшö вот мый. Миян басниын олöны öшмöс да юкмöс кыввез. Öшмöс öн зыряна да миян ойвыв районнэзiсь пермяккез шуöны колодец. Удмурттэз тожö тöдöны сiйö кывсö: нылöн ошмес — ключ, родник.

Öшмöс — кыв, натьтö, не простöй, и позис бы сiйö торйöтны, пожалуй, сiдз: öш мöс. И ежели, кыдз мийö предположитiм одзжык, мöс — этö ва, шор, то öшмöс — öш ва. А коми öш — öшка, пороз. Этасянь öшмöс — порозлöн, öшкалöн ва. Да, натьтö, не простöй, не мувывся öшкалöн, а енöшка лöн ва. Кыдз мийö тöдам, енöшка любитö «юны» сöдз ва, бур ва, а сöдзыс, сöстöмыс только учöтик шороккезын да ключчезын.

Колö висьтавны, что коми отир, видно, ключчесö, öшмöссэсö важся каддэзö шувлöмась эшö бур ва. Архангельскöй областьын (Верхне-Тоемскöй район) роч отирыс нiйö и öнi эшö сiдз шуö. Сэтчин, Тойма ю гöгöрас, олöмась комиэз, мый йылiсь баитöны и коми кыввез, кöдна пантасьлöны ны басниын (керас — керöс; согра — нюр, нюра вöр; курья да мöдiккез).

А мый висьталас миянлö юкмöс? Сiя эд тожö аслас назначеннё сьöртi öддьöн вачкисьö öшмöс вылö, да и бöра жö сэтöн эм мöс кыв.

Юкмöс лöн, видно, основаыс тожö сложнöй: юк мöс. Юк — öтласа, коллективнöй; но юк кыв вермис шогмыны и мöдiк кывсянь — юкны, юкавны (торйöтны, янсöтны).

Удмурттэзлöн эм люкмöс кыв — этö юкмöс, полынья. А удмуртскöй люкыны — этö торйöтны, янсöтны, юкны. Матын эта кыв дынсянь сулалöны и финскöй якаа да хантыйскöй яхöп — торйöтны, янсöтны.

Юкмöс — эта ва босьтан места. И не просто ва босьтан, а öтласа, кытiсь васö босьтö уна йöз, может, быдса деревня. Сiдзкö, мöс кыв и сэтöн лоö — ва: öтласа, общественнöй ва. И этö васö, может, былись кöркö торйöтлiсö отирыс ас коласаныс.

Кудымкарскöй районiсь Чивизгин деревня дын эм нюр. Эта нюрын кöркö овлöмась чудскöй отир, и нылöн сэтöн вöлöма колодец. Кöть и ваыс нюрас уна, да сiя быдлаын вöлöма умöль, и отирыс ювлöма васö только колодецсис. Сетавлöмась васö норма сьöртi.

Овлiсö я чуддэс нюрас, ме ог куж висьтавны, а что Чивизгин мысас вöлöма городище, этö историческöй факт. Отирыс сэтчинiсь адззавлöмась чудскöй чачаэз да сёёвöй аканнез, только некин оз тöд, кытчö лоисö эна чачаэс. А аканнес эд, натьтö, вöлiсö самöй настоящöй чудскöй еннэз.

Висьтасьöны эшö, что Баскоёвскöй нюр ас, чудскöй колодецын, куйлö уна золото. Дзебöмась пö сiйö двадцатöй поколеннё понда, но кынымöдз поколеннё öнi олö, отирыс оз тöдö. Может, и двадцатöй ни пö.

Эта легендаын эм öтiк интереснöй деталь: коми-пермяккес асьнысö петкöтöны не чудскöй увтырись, а двадцатöй поколеннёнас лыддьöны асьнысö!

Пермскöй областьын 14 Мыс да Мысы нима деревняэз да посёлоккез. Ны коласiсь кынымкö, натьтö, шогмисö и миян мыс, мос кыввезсянь. Эна дынö жö вöзйисьö и Москудья деревнялöн ним. Ежели кошшисьны буржыка, позяс адззыны сэтшöм коддесö и мöдiклаись. Может, и миян Родина столицалöн нимыс — быдöнлö тöдса да дона Москва — ас пытшкас видзö миянлiсь досповна тöдтöм кывнымöс жö, только невна вежсьöмö — моск. А что босьтöма сiя аслыс лишньöй звук, эстöн, ме бы шуи, нем удивительнöйыс абу. Коми кылын уна кыввез, кöднö öтiклаын шуöны сiдз, а мöдiклаын — мöдмозжык: кольть и кольк, кос и коск, рас и раск.

Пешнигортскöй старушкаэз сьылöны прибаутка, кöдаын мыссö шуöны мыскöн:

Марка мыскö сьöлöм кыскö,

Мыс увтас потыштлö...

Кочёвскöй районiсь Лягай деревняын матiсь мыссэсö шуöны то кыдз: Чöвпан мыск, Рытвыв мыск, Ыджыт мыск.

Ме ог шу, что Москва непременно шогмис мос да ва кыввезiсь и лоö ключ ва, ключ шор нето шор йыв. Древньöй финно-угорскöй йöзлöн, поди, вöлi и мöдiк значеннёа моск кыв, но, думайта, сiя вöлi тожö родственнöй эталö, тожö обозначайтiс сэтшöм места, кöда йитсьö вакöт — нюр, зыбун, вапукöт, нёп, арай, ключовина.

Миян областись Москвина деревняэзлöн да посёлоккезлöн ниммес чередь я аркмисö татöн: нылö ниммесö сетiсö москвиччез кузя (москвин — Москва муэзiсь олiсь).

Эмöсь эшö дас гöгöр Мосина да кык Мосята, а Перем дын — Большая Мось деревня и Мось нима места, только энö, натьтö, оз ков öтлаöтны одззася ниммескöт.

Ежели тi юалатö Большая Мось ын олiссезлiсь, мыля сiдз шусьö нылöн деревняныс, может, кылатö вот этшöм кодь ответ:

— Олöмась кык сой — Мось да Мотось. Мосьыс дышöтчылöм печкыны, а Мотось чож вöлöма. Мось лун-лун свöнъялö, а Мотось шыркйö-печкö да дöра кыйö — козин керö. Керас козинсö да жöник сайö петас, а Мосьöс некин оз корась, сiдз сiя нывка юрöн и пöрисьмöма. Сы нимöн и деревнясö пондöмась шуны.

Эта, конечно, сэтшöм жö сказка, кыдз и Мосох да Ква йылiсь, кöдна ниммезсянь бытьтö бы шогмöма Москва городлöн ним. Городыслöн нимыс шогмис неважын, сылö вöлись 800 год, а Москва юлöн нимыс унаöн сысся пöрисьжык.

Но Пермскöй районöттяс жö, как раз Большая Мось деревня шöрöт, котöртö Мось, зэв визыв юок. И не дышкуль Мось, а вот эта чож юокыс и сетiс Большая Мось деревнялö нимсö.

А мый лоö Мось?

Не зыряна, не удмурттэз оз тöдö сэтшöм кывсö. А мансилöн, эна местаэзын кöркöся олiсь отирлöн, вöлöма мось увтыр, мось род. И ежели сiя увтырыс олiс эта юок дорын, то мöдiк увтыррес мось пияннэзлiсь юнысö сiдз и шуисö — Мось.

Ме неöтпыр ни баитi, что миян муэзын кöркö овлöмась ханты да манси. Но этö оз ков вежöртны сiдз, что сэтöн нiя олiсö вексö. Ханты да манси татöн вöлiсö кыдз квартиранттэз, а комиэс — хозяиннэз, мöднёж висьтавны, аборигеннэз — кореннöй олiссез. Эта йылiсь миянлö висьталöны археологическöй раскопкаэз, историческöй факттэз.

Вот сiдз. Эмöсь ва мыссэз, эмöсь кöс ваэз. Эмöсь ваэс эшö и мöдкодьöсь — ульöсь, ваовöйöсь, юовöйöсь, шоровöйöсь. То тай и важ песняын сьывсьö вöв йылiсь, кöда «турун сёйö логовöй, васö юö шоровöй». Вот кынымкö ним: Ульва, Вая (ва ю), Шорья (шор ю), Вашор.

Перем сайын эмöсь деревняэз, кöднаын олöны роччез, а ниммезныс нылöн, тöдчö, комиöсь. Эта сiдз и эм: кöркö нiя местаэзын олöмась пермяккез. Да и öнi сэтчинiсь деревняэзас олöны комиöсь (Кынкуроговвез, Мехоношиннэз, Четиннэз, Ошкановвез, Кочеввез да Дозмороввез). Правда, унажыкыс ны коласiсь сэтчö вовлöмась эта векын ни, но мусö сiйö лыддьöны пермяцкöйöн.

Öтпыр кыдзкö ме юалi рочсялöм пермяклiсь, мыля шусьö нылöн деревняныс Няшина.

— Няшина — этö Нашина — нашинскöй, дедовскöй му, — висьталiс сiя меным.

Дедовскöй-то, может, и дедовскöй, да только абу «нашенскöй». Сылö, кыдз и сы гöгöрись деревняэслö — Петухи, Костарята, Красава, — нимсö сетлöмась, тыдалö, роччес. Но аркмöма сiя не нач роч кылiсь: няша — зыбуна места, нюр — тöдса и коми отирлö. А Няшина лöн нюрыс (öнi кушалöм и лоöма кöсжык ни) одзас и паськöтчöма.

Ульва сö ме шуи коми нимöн. Но сiя вермис лоны и ул (уль) кывсянь, мый йылiсь ме баитi ни одзжык.

Косинскöй районын джуджыт керöс вывсянь видзöтчö Юла, неыджыт деревня. Пожалуй, и не деревня сiя, а деревняпиян — хутор. Онежскöй крайын эм Юла ю. Эна, тыдалö, тожö «юовöй юэз». Правда, Косинскöй Юла лöн нимыс, шуöны, шогмис морт нимсянь. Этö как раз сiя повтöм мортыс, кöда сувтöтöма ассис керкусö ва чуддэс горт дынö и кöда йылiсь отирыс висьтасьö то кыдз.

Кыдз кужöм, сiдз и тешитчöм чудпöлöс. Садитас али кöдзас мый Юла, да ежели ен ним оз касьтыв, чуд табун садитöмсö чисто нöитас-вояс, быдöс гöрöмсö подтас — гуна долонь керас. А кыдзи шондiтöг ва кайöтас — эта абу ни ва. Кайöтас, кöньöсö ковйöв кисьтас, а ведрасис вöвлöн кын коколлез торс-торс усяласö. А пемытöн и керкуись эн пет — кок йылiсь пöрöтасö. Да и сьöраныс кыскасö, нем нылiсь он босьт.

Но Юла абу повзьöма, абу чапкöма керкусö. Сiя адззöма кöс кок табунлö бур лекарство — гормöччан. Немись чудыс оз пов, а гормöччансис кыдз биись полö. И эшö вöввезiсь полö.

Сырйылöма, видно, Юлаыс чудпöлöссö да не умöлика: эна местаэзiсь одзжык адззавлöмась чудчуннез (иньвенса шуöны сiйö кульчунь).

Сэтчин, кытöн одзжык овлöмась финно-угорскöй племяэз, пантасьлöны Юг, Йöг, Югшор, Югшур, Юкшур нима юэз да деревняэз. Быдöнныс нiя аркмöмась важся-важ юг кывсянь. А древнепермскöй юг — этö ю. Петö, что нiя бöра жö юовöй юэз — и быдöс. Может, уна век нiя олiсö нимтöг, олiсö сэтчöдз, кытчöдз эна местаэзö эз локтö мöдiк отир, кöдна понда юг лоис нимöн.

Юэслöн сэтшöм ниммес эмöсь и мöдiк народдэзлöн: Ужа мордва кыв вылын лоö просто юлöн вож; Уса — монгольскöй кыв вылын — ю; Упа — латышшез моз — ю; Узень — татара моз — ю; Кан — тунгусскöй ю. Да и ыджыт юэс, кыдз Дон, Обь, испанскöй Эбро, индийскöй Ганг — этö просто ю.

Мыйыс только чочком светас абу! Нельки миян Пармаын, чочком светiсь учöтик пельöсокын, мийö адззам быдкодь юэз, шоррез — сöстöмöсь и нятьöсьöсь, сöдзöсь и гудыраöсь, песöкаöсь и сёйöсьöсь, солаöсь и дубöсь, нярöсь и вынаöсь, гöрдöсь и сьöдöсь. Но эта йылiсь басниыс одзлань.

Ме висьталi ни, что миянлö тöдтöм ма, га кыввез — этö тожö ю нето ва. Сiдз предполагайтöны учёнöйез. Только оз ков вунöтны, что эм эшö мöдiк ма — этö финскöй, да и коми, му (финскöй Саарема — острова му; коми-пермяцкöй Сюзьма — Сюзь му, удмуртскöй Кузьма, кöдö роччес шуöны Кузьмá, — кузь му).

Коми ва ниммезын шочыника пантасьлö да кыв. Мый сiя сэтшöмыс? Может, тожö ва нето ю?

Ежели сiдз, то Далда ю, Кувалöн шульга вож, лоö расöт котöртан ю, вöра местаись шор. Эта нимыс аркмöма коми дав (дал) кылiсь: дав — рас; гривка вылын вöрок; вöрья поскотина. Этадз жö, позьö шуны, аркмис и Долдышер юоклöн нимыс, а может, и свердловскöй Тавда.

Миян областьын да тора ниммес неетша: Павда, Барда, Искильда, Куеда. Но нiя, тыдалö, тюркскöйöсь, кыдз и Орда (орда — татаро-монгольскöй войсколöн штаб, стан).

Нердва ю перво шусьöма Нерда — точно сiдз, кыдз öнi шусьö Тюменскöй областись öтiк неыджыт ю. Сэтчин, Нерда ю дорас, öнi олö роч отир, а кöркö, видно, олiсö ханты да мöдiк йöз, может, и коми-пермяккез. Этадз ме шуа сiйöн, что сэтчинiсь отирлöн эмöсь коми-пермяцкöй фамиллёэз: Ошеввез, Пуртоввез, Ярковвез да мöдiккез.

Нердвалöн ним вермис аркмыны кыкнёж: или нер кылiсь, кöдöн коми отир шуöны нюр бердiсь непаськыт видз, или нырд кылiсь. А нырднас коми йöзыс шуöны мыс, кöдж да эшö и ваныр. Сiдзкö, Нердва — или нюр дорöт котöртан ва, или уна кöджа, или ваныра, или мыса местаэзöт визывтан юок. И быдöнныс эна признаккес сы дынö лöсялöны.

Öтiк кывсянь, натьтö, аркмис и Нердва посад дынiсь Нюрдвич деревнялöн нимыс; сэтöн жö эм Нюрдвич юок.

Нердва кодь чож, беспокойнöй юоккес эна местаэзын не сiдз и уна, разь только эшö Олыч (Ович) аслас бöб вожжезöн — Кекурöн, Олляшорöн, Сергинашорöн. Эна юэс, видно, эшö томöсь, сё эшö кошшöны аслыныс буржык, веськытжык туй, вот и чепсасьöны öтмöдöрö, дзик вöй чаннез, кырöтöны то öтiлаöт, то мöдiлаöт.

Дата добавления: 2015-11-16