Веж, вежöра али вежöм?

Уна ни вöлi висьталöма ваэс йылiсь, а эшö унажык кольччис висьтавтöм.

Ыджытжык юэс, кöдна йылiсь мийö баитiм одзжык, округаным только куим десяток гöгöр.

А разь етша боргöны-муткыльтöны миян му кузя учöтик юоккез — шоррез! Мукöдыслöн и нимыс абу — просто шор — и быдöс. Да и то эна: Борган, Визывшор, Гудырашор, Муткыльтан — тожö эд не созлöй ниммез, а юоккезлöн признаккез. Мукöдыс котöртöны лöня, дзик полöмöн, нылöн и нимыс сэтшöм — Вöньшор, Жебшор. Былись, Жебшор — няр, вынтöм шорок, кöда аркмö ключчезiсь. И кузяыс сылöн — öтiк километр. Эмöсь нач учöтöсь, кöднаын ваыс, кыдз баитсьö, курöглö пидзöсви, кöдаын позьö только рос кöтöтлыны да, может, нямöттэз миськавны. И бöра жö нылöн сэтшöм и ним — Курöгшор, Миськасяншор.

Эмöсь и чукыля шоррез — Чукыляшор, Мегшор (мег — чукыль; этасянь и мегыр — дуга, ош мегыр — кöстiсьöм пу). Кинлöн эм охота, дак адззас и веськыт, и кузь, и паськыт, и ыджыт шоррез. Но нiйö кошшикö сылö пантасясö сэтшöмöсь, кöдналiсь ниммесö сразу оз позь тöдны, кыдз нiя аркмисö, Вот, например, эна кодьöсь: Öньывшор, Клиовшор, Оляшор, Трубиншор, Панняшор, Подымашор, Чуткöмашор да унася-уна мöдiккез.

Кин висьталас, мый сэтшöм öньыв? Миян коласын этiя кылыс, тыдалö, оз ни ов торйöн. А ежели и олö, то сiйö тöдöны, буди, морт-мöд.

Ме бы шуа, что Öньывшор лöн нимыс аркмис морт нимсянь. А сiя морт нимыс, может, языческöй, а может, и церковнöй, только комиэс сiйö вежисö сiдз, что öнi нимыс ас вылас воть оз вачкись: Андрей — Öньыв (эшö öнöдз мукöд пöрись отирыс тöдöны Öньö, Öню, Öнь ниммез). Öнь юлöн нимыс, тыдалö, чужис öнь (туман) кылiсь.

Клиовшор нимись тожö нем мöдiксö он адззы, пожалуй, кыдз только морт ним. Сысянь жö, натьтö, аркмис и тылöн ним — Клиовскöй. Эна местаэс, тыдалö, одзжык вöлöмась Клиов увтырись морттэзлöн (Пешнигортын öнöдз эм сiя увтырыс).

Эна ниммезкöт öтiк валянкаын, некö, валяйтöмась и то энö ниммесö: Трубиншор, Панняшор, Созоншор, Тасимшор. Ровно бы эта жö модель сьöртi аркмöма и Оляшор юоклöн ним. Но мылякö сiйö пöрись морттэс шуöны Олляшор — кык л пыр, а Оля нимын öтiк л. Вот сiя и эм, что эстöн некытшöм Оля абу, а эм оль кыв. Сiдзкö, Олляшор — этö юок, кöда котöртö лажмыт, уль местаэзöт. Öнi, конечно, нiя местаэс абу ни олляöсь — сэтчин важын ни ыббез, но кöркö сiя вöлi непременно сэтшöм.

Юсьвинскöй районiсь Харинскöй сельсоветын Чуткöмашор юок йылiсь баитöны сiдз: Чуткöмашор деревняас кыкьямыс керку, и быд огородечись петöны ключчез. И каждöй ключын ваыс öддьöн чöскыт — дзик масора. Сiйöн и шорсö, кöда шогмö эна ключчезiсь, шуöны Машор. А мый сэтшöм чуткö — некин öнi оз висьтав.

Да, мымда бы ме эг юась, мымда бы эг кошшись — некинсянь и некытiсь эг тöд эта чуткöлiсь вежöртассö. Коми-пермяккез басниын абу чутко кыв. Абу сэтшöмыс и зыряналöн. Позьö шуны, что эта шорлöн нимыс аркмис Чутко нето Чудко нимсянь. Сэки перво сiя шусис Чудко му шор — Чудко му кузя визывтан шорок.

А позьö висьтавны и мöднёж. Эм сэтшöм коми кыв чуткöм (может, правильнöйжык бы вöлi чудкöм — чуд кöмкöт?). Чуткöм — этö кучиковöй нинкöм, бродни, чупошка. Дак эз я шуö этö юоксö кöмкöта юокöн, — чуткöма шорöн? Вермисö и шуны. Топонимика тöдö эшö и образнöйжык географическöй названнёэз, кыдз, например, Кватьморда, Гидыбöсвидз. Хантылöн эмöсь то кытшöм нима юэз: Пут-урын-я — Котёл караулитан ю; Рöчкулам-йигай — Старик кулöм шор. Да и асланым шоррез коласiсь позяс адззыны сякöйсö: эмöсь и стрась басöк нимаöсь, и нёштöм нимаöсь, и страннöй нимаöсь.

Вот Юрлинскöй районын эм Пасашор. Мыля сiя паса? Кин сiйö пасалiс и мыйлö? И кыдз пасалiс? Тöдам мийö, что туйö пасавны баляöс, порсьöс, вöлöс — поткöтны нето тшöтшкöртны пель йыв, калитöм подковöн пятнавны вöвлiсь лопатка. Пасалöны кер, пес, потш, но медбы пасавны юэз — эта йылiсь эг на кывлы.

Конечно, некин эз и думайт пасавны сiйö шорсö: эта юокыс котöртö сэтi, кытöн одзжык вöвлöма поскотина, пода видзан места — пас.

Но колö висьтавны и сiйö, что пас не öтiк значеннёа кыв. Округын ойланись районнэзын да Коми республикаын тöдöны пас кывлiсь мöдiк вежöртас: вöралан туёк, кытчö тэчöны кыйсяннэз, шуöны не только сёр туй да чöс туй, но и пас туй. Сiдзкö, позьö висьтавны, что Пасашор — этö юок, кöда пöлöн одзжык видзлiсö чöссэз, лэччез, каззез да мöдiк кыйсяннэз.

Кудымкарсянь Верх-Иньваö мунтöн Пешнигорт сайын мийö прокод поперегавлам Подымашор да Пышшу юоккез. Öтыс, шуöны, аркмöма пöдны кывсянь — Пöдöмашор, но ваыс эта юын чöскыт — абу пöдöм дука; и шорыс котöртiкас абу пöдöм-атшалöм, кыдз дыр вашöтлöм баля, и невежöртана, мыля сiя — пöдöм шор.

Может, сотня-мöд год одзтi эна местаэзын олiсь отир эшö тöдлiсö подэм кыв, кöда öнöдз олö удмурттэз басниын? А ежели Подымашор юоклöн нимыс аркмис эта кылiсь, то сiя лоö, вуджöтны кö сiйö öння коми-пермяцкöй кыв вылö, тожö паса шор: подэм — этö пас, пятно, метка.

Неöтнёж позьö висьтавны и Пышшу йылiсь. Эстöн, конечно, сразу тыдалö пыш корень. А мый сэтшöм пыш, мийö тожö тöдам. Дак мый жö, Пышшу — этö пыш ю, пышовöй ва? Ог тöд, кин кыдз думайтö, а ме этаö ог верит: эстöн пыш кылыс не быдмас, а мыйкö мöдiк. Может, как раз сiя значеннёыс, кытшöм эта кывлöн пыш куль выраженнёын — бöб, ошшасись, а может, и чож, визыв (сравнитö: Мишуыс чистöй пыш куль; туруныс некой пору пышьялiс-кайис). И прозвище Пыш Мишкач, ме думайта, чужис сысянь, что эта мортыс вöлi öддьöн визыв, уна басниа. Эта значеннёа жö пыш кылiсь, натьтö, аркмис и юрлинскöй Пышья лöн ним.

Пöшашор (Пошашор, Потшашор) нимын тöдчö тöдса ни миянлö кыв пöш — коми-зыряна сiдз шуöны том кöзъяин. Конечно, эта нимыс вермис аркмыны и мöдiк кыввезiсь, например, пöша нето потшша кыввезiсь. Пöша — этö чашья, а потшша — неровнöй, не öтвывья полоса (баитöны тай: кымöррес потшшасьöны ни, чожа мичамас).

А вот ежели шорсö шуöны Ошпöшашор, то сiя аркмис непременно пöш либо пöша кыввезiсь: ош пöша — этö чашья, тшöк кöзъяин, тэль, частэльник.

Потшашор сö шуöны эшö Почашор öн, но сiя, видно, только роч отирöн тшыкöтöм кыв.

Вежöртана ним — Лунлапетшор: лунланьö котöртан шор. А Чомкосашор? Косинса, кочёвса да гайнса, может, и вежöртöны чомкоса кывлiсь смыслсö, но округись мукöд отирлö сiя тöдтöм кыв. Мечкор юлöн эм вож, кöдö белоевса шуöны Чемкосашор, и некöр абу кывлöмась, мый сiя лоö. А шогмöмась эна ниммес чомкост кылiсь, кöда аркмöма чом (тшамья) да кост (кос, колас) кыввезiсь. Чомкост — вöралiссезлöн кык шалаш, кык керкуок коласiсь места; сiдзкö, Чомкосашор — тшамьяэз, керкуоккез коласöт котöртан шор.

Почти сiдз жö аркмöма и Пöвчомколас шорлöн нимыс, кöть и Малак деревняись отир думайтöны эта йылiсь нач мöднёж: вöлöма пö пöввезiсь керöм чом, и сы увтiсь пондöма петны шор. Дак сэк бы колiс сiйö шорсö шуны Пöвчомувт!

Не, эстöн, тыдалö, невна не сiдз. Пöвчомколас — этö джын чомкост: шор, кöда котöртö вöралан избушкаэз шöрöт.

Отир-творец, отир-мечтатель думайтöма унася-уна названнёэз, думайтлöма мукöдпырсяс сэтшöмöсь, кöдна ровно бы оз и лöсялö предметыслö — куш фантазия, а не быль. То тай эм шöма ягöд — туримоль. Моль — этö кизь, пуговка, а туримоль — тури кизь. Разь эмöсь туриыслöн киззес? Вежöртана туригумлöн нимыс — сiя вачкисьö тури гум (кок) вылö и кузянас, и кызанас, и нельки рöмнас. А пондан кö бытшöмика кошшисьны, то и туримольлöн нимыс öддьöн точнöй — киззес эд одзжык вöлöмась тшакылёк кодьöсь — кучишокись каттьывлöмась, как раз туримоль ыждаöсь. А нюрас олö тури, вот и — тури кизь.

Мортлöн фантазия жö сетöма шоррезлö и то энö ниммесö: Лёквож (нiя уна), Кульшор, Бордашор, Шемшор.

Ежели Бордашор йитсьö борд кывкöт, то сiйö колö вежöртны кыдз свободнöй, воля радейтiсь юок. Правда, коштановса сiйö шуöны не öтмоз: то Бордашор, то Бурдашор, а то и Бöрдашор. А ежели шорыслöн нимыс шогмис бурдны коми кылiсь, то этö лоö: бурдöм шор — ёнмöм, вочмöм шор.

Ассяма нимöн шуöмась и учöтик кочёвскöй юок — Шемшор. Но, ме думайта, сылöн нимыс аркмис не сiя шем кылiсь, кöдöн мийö шуам раклiсь клешня, зажим, клещи, и не шöм кылiсь (правда, мукöдыс шорсö сiдз и шуöны — Шöмшор), а мöдiк шем ись, кöдалöн значеннёыс сайöвтöм, дзебöм, нетыдалан (шуöны: шем пельöсын пукавны да тараканнэз пысавны). Мöднёж шуны, Шемшор — неприметнöй, несмев шорок. А ежели эта нимыс тожö идъя-зöрья? Вдруг да сылö нимсö перво сетiсö манси, сэтiсь одззася олiссез? Но кыдзи сетiсö нiя, то сэк сiя перво шусис Шем нето Шемсос (Шемшош) — сьöд, сьöд шор. Комиэс Шем сис нето Шемсос сис кокнита керисö ас ним — Шемшор.

Юсьвинскöй районын эмöсь Ошашор, Маркашор, Тулунашор, Веженашор, Тулеманика, Шардашор. Кытшöм нiя сэтшöм ниммез?

Тулунашор, видно, — туана шор, кыдз и Ошашор — шорок, кöда гöгöрын поздiсьлöмась ошшез, мöднёж шуны — дзибьяинöт котöртан шор. Но оз ков вунöтны и сы йылiсь, что коми отир тöдöны отш кыв, кöдасянь тожö вермис аркмыны миян Ошашор ным (отш — вына, кодя). Фёдорова деревняöт котöртö шор, кöда важ книгаэзын гижсьö Веженашор, а сы гöгöр олiсь отирыс сiйö шуöны то Вежöнашор, то Вежöмашор. А öтiк морт меным висьталiс, что этö шорсö бытьтö пö одзжык шувлöмась Вежöрашор öн, а сыбöрын том поколеннёэс пондöмась шуны мöднёжжык. Конечно, сэтшöмыслö петны недыр. Ме тай баитi ни, кыдз коми ниммезiсь роч отир керисö нач виль значеннёа ниммез.

Ямало-Ненецкöй национальнöй округись ме панталi юлiсь стрась басöк ним — Толька (сiя котöртö Таз юö, а Таз — Обь лöн вож). Ненеццес, кöдналiсь ме юаси, шуисö, что эта юлöн нимыс аркмöма роч морт нимись. И аркмöма вот кыдз.

Энö вöрья местаэсö исследуйтöма кöркö öтiк роч учёнöй. Сылöн сьöрас вöлöма зон. Öтпыр нiя пондасö вуджны визыв ю, и пыжныс пöрас. Айыс петас, а зонсö ньылыштас лёк юыс. Учёнöй аслас картаись адззас этö юсö да гижас сы бокö: Толька — отметитас местасö, кытчö вöйис зоныс. Сэсся вунöтчас сы йылiсь, и кöр пондасö лэдзны виль карта, этö морт нимсö сетасö юыслö.

Сiдз меным висьтасисö грамотнöй йöз — учителлез. Ог тöд, мый баитöны Толька ю йылiсь пöрись отир. Нiя, может, тöдöны и мöдiк, эшö басöкжык легендаэз, но чередь я вермасö висьтавны толька кывлiсь истиннöй вежöртассö.

Былись-ту эта юлöн да ласкательнöй формаа морт нимлöн нем öтласаыс абу. Неылын Толька ю дынсянь котöртö Ватылька. Ме ог вермы висьтавны, кытшöм народ сiдз шуис юсö и мый означайтö сылöн нимыс, но сыын уна öткодьыс Толька нимкöт. Правильнöя, видно, колiс бы сiйö шуны не Толька, а Толь кы нето Тыль кы, если эта нимыс селькупскöй, сiдз кыдз селькуппезлöн кы — этö ю.

Сэтшöм кодь жö легенда кывлi и Не я ю йылiсь, кöда котöртö Костромскöй областьöт. Вот пö кыдз аркмöма сылöн нимыс.

Öтiк татарскöй хан-завоеватель пондiс вуджны этö юсö нылыскöт. А нылыс и усяс пыжсис да галя моз уйыштас пыдöсас. Вот и пондас ханыс кытсавны нывсö: «Нея, Нея, Нея!» Кыласö этö отир и решитасö, что хан тшöктö шуны сiдз юсö, и пондасö шуны сiйö Нея.

Дак кыдз инö — Вежöмашор али Вежöрашор? И мыля сэтшöм противоположность: то вежöм, то вежöра? Вежöм — этö некывзiсь, ылöстöм, а вежöра — этö лöнь, не ыжмалiсь. Тöдат, натьтö, что вежöм — этö чуд пиян, лешак пиян, кöдö чуддэс да лешаккес кольлывлöмась коми инькалö, кöр гусяласö сылiсь кагасö?

Не, эстöн, конечно, мöдiк делоыс. Эта нимыс шогмöма веж нето вежöн кылiсь. Не сiяись, кöда мыччалö рöм, а мöдсис, кöда мыччалö торьясьöм, янсалöм, кежöм. Тöдат, эм кыв — туйвеж? И эшö то этадз баитöны: мöдiмö туй вылас пантасьны, а вежöн лоим. Сiдзкö, Вежöнашор — янсалöм, торьясьöм, боки котöртан шор.

Ме думайта, что и Кудымкарскöй районiсь Вежайка юок — сiя жö Веженашор, только пасьтöтöмась сiйö мöдiк рöма дубасö — Вежа ю, ян ю.

Эта йылiсь жö баитöны Вежайка юок дорись олiссез, и Вежайка деревнялöн важся нимыс — Вежайыв.

Маркашор, тыдалö, Марка мортлöн шор, кыдз и Пешнигортiсь Маркавевдöр да Маркавидз — Марка увтырлöн местаэз.

А кыдз вежöртны Тулеманика юлiсь нимсö? Тулеман мортлöн инь? Но эд сiя ю, а не инь.

Тулеманика лiсь нимсö некыдз оз позь петкöтны не коми, не удмуртскöй кылiсь. Дивуйтчы эн дивуйтчы, а сiя, сёдаки, тыдалö, финскöй кыв и шогмöма тулемаа выраженнёись, мый лоö миян моз — биа му. Страннöй нимыс, да? А эд эмöсь сы коддес и мöдiклаын. Вот хантыйскöй шор — Тугут-ими-йигай. Комиöн бы сiйö колiс шуны то кыдзи: Биöн сёйöм шор. Тулима кыв тöдса и кареллэзлö, и эстонеццезлö «Калевала» эпос сьöртi — сэтчин баитсьö биа му йылiсь.

Карелияöт котöртö Тулемайоки ю, кöдö позяс миян кыв вылö вуджöтны кыдз биа, сотчан му вылiсь ю.

Öддьöн охота тöдны Тулеманика шорлiсь историясö, но кин сiйö висьталас, кöр? И висьталас я?

Шардашор сö позьö шуны шардöм шорöн: сылöн нимыс, тыдалö, аркмöма шарыд (шарыт кылiсь — этö лоö — шупыт, öддьöн чож).

Невежöртана ме понда Промашор лöн ним.

А то Кудымкарскöй районiсь кынымкö шор: Свисташор, Вапöтшор, Сусавож, Оксашор, Катыкшор, Котокшор, Куривашор, Шуканшор, Жуваршор, Ляляшор, Сын, Горич, Öмашор, Кöркнеса, Шатуншор, Писта, Ерча, Гонса, Батшамья.

Сервинскöй му кузя котöртö Свисташор нето просто Свиста. Ме юаси якинсалiсь, харинсалiсь, исаевсалiсь, кöдна олöны Свиста дорын, мыля шусьö нылöн сiдз юокныс, и некин эз висьтав бытшöмика. «Свиста-Свиста и эм — сiдз важжес шувлöмась».

Йöгвинса да сервинса тöдöны Свистайыв места, кытчö кöркö чукöртчывлöмась гажа стречалун коста. Свистайыв понда нiя вот мый шуисö:

— Кыдз тай нö öксяс сэтчин народыс — гушшанас эд öтмöдöрсянь локтö — да и давай орсны-сьывны да шутнявны-свистайтны. Вот и Свиста. Сэтiсянь пондöтчö шорыс, дак бöра лоö — Свистайыв.

Юр мыдзтöдз ме тöдмалi этö Свиста сö да сiдз и эг вермы тöдны. Сыбöрын вöлись адззи öтiк отчётiсь Сисьта нима юок. А эта Сисьта ыс вайöтiс сыста кыв дынöдз, кöдаись, ме думайта, и аркмис шорыслöн нимыс. Сiдзкö, не Свисташор, а Сысташор (сыста — шышыбар, порськок турун).

Ежели топонимист кылас кинсянькö ним да сiдз и гижас аслас тетрадьö кыдз правильнöй ним, то вермас ёна бöбöтны асьсö, а сыбöрын и мöдiккезöс. Вот синтöмовса ассиныс юнысö шуöны Öмашор и Ымашор; порськоковса ассиныс — Куривашор и Кырöвашор; верх-юсьвинса — Оксашор и Ыксашор. Этö сысянь, что коми кылын ö, о, ы да у звуккез öтамöднысö кокнита вежöны. Миян деревняын, например, баитöны öшын и ышын, ырöш и öрöш, ордви и öрдви, бурева и бырева. Мукöдпырсяс й туйö шуöны и, я туйö — а. Йöгвинса Велва дорись видз шуöны Косайир и Косаир, а öтiк вöр — Ошвöрья и Ошвöра. А ежели кытшöмкö нимись вежны буква-мöд, дак он и тöд, мый сiя лоö сэтшöмыс. Пронёвчиись ме кылi месталiсь ним — Туропыт и сразу некыдз эг вермы вежöртны, мый сiя обозначайтö. Перво ме сiйö шуи искажённöй роч кылöн (сiя мыйöнкö вачкисьö следопыт кыв вылö). А вöлöма сiя простöй коми-пермяцкöй кыв — Туропувт (точнöйжыка — Туроп мыс увт). Правда, и туроп кылыс не быд мортлö вежöртана — туроп öн комиэс шуöны падера, пурга.

И Куривашор ыс, пожалуй, не сэтшöм ни загадка, а просто Кырйылашор — сэтшöм шор, кöда йылын эм кырас.

Катыкшор сö кöркö, натьтö, шувлiсö Катытшор — юлiсь вывланисьжык вож, может, деревня вевдöрись. А кытшöмкö поэтическöй душа шуис, поди, кытыкасян (пöлiнясян) шорöн.

Тöдамö мийö суса — дöра кыян инструмент. Но эд думайтö, что Сусавож шороклöн нимыс аркмис эта сусасянь. Эта нимыс, тыдалö, аркмис сус (суспу) кылiсь, кыдз комиэс одзжык шувлöмась (да и öнi ойланиссес сiдз шуöны) кедр. Петö сiдз: Сусавож — этö юок, кöда пöлöн быдмö кедрач. Сiдзкö, верх-иньвенскöй вöррезын одзжык вöвлöма кедр. И öнi ме верита жуковскöй стариклö, кöда пондöтчис висьтасьны сказка сэтшöм кыввезсянь: «Мунасö кык сой вöрö öктыны öрек». Верита, что öрекыс вöлi ны вöрын.

Ныробскöй районiсь Сусоль (Сусола) юок, натьтö, тожö кедровöй оль нето кедровöй ва.

Позьö вежöртны значеннёсö сэтшöм кыввезлiсь, кöднаись аркмöмась шор ниммез: Кöркнеса (гöпа, ямаа), Сын (язь чери), Писта (рыхлöй, небыт), Вапöтшор (лапöтасьöм, игнассьöм, сайöвтсьöм), Оксашор (окса, öкся — князь, вождь); позяс висьтавны, что Ляляшор шогмис не ляля кылiсь, кыдз шуöны кага йöрнöсок, а лёль кылiсь (Лёляшор), но ме нем ог вермы висьтавны Жуваршор, Шуканшор да Котокшор юоккез йылiсь. Может, олiсö сэтшöм нима морттэз? Может, öнöдз эшö олöны этатшöм прозвищеэс? Вермасö и пантасьны сэтшöм роддэс, да чередь я тöдам, кытшöм смысл шукан, жува да коток кыввезлöн.

Йöг топонимияын эмöсь Дзудзин, Дзаманлог, Дзабин. Кöр шогмисö эна ниммез — сто али пятьсот год одзтi, — отирыс озö тöдö, но шуöны, что нiя важöсь. Эмöсь сэтчин и Калюыб, Коньтяйöр — эна эшö томöсь, нылö вöлись пятьдесят — сотня год гöгöр: стариккес эшö касьтывлöны Калю öс (Калистрат), Коньтя öс (натьтö, Иннокентий; но вöвлöма и важся ним — Контей, кöдасянь, видно, и шогмис косинскöй Контиеввезлöн фамиллё. А Коньтя ним, может, сюрис миян кылö финнэзсянь — нылöн почти сiдз шуöны ошöс: контио, контё).

Дзаман, Дзудза (Дзузьдя) — эна, ме шуа, языческöй ниммез. Дзаб — этö месталöн кытшöмкö признак — лажмытiн, логья али кыраса.

Ошмашор лiсь нимсö тожö неöтмоз позьö вежöртны: и кыдз ош му шор и кыдз öшмöс шор, но не ма кöра шор. Ошмашорлöн матiсь соседка, Исаковка шор, видно, аркмис роч морт нимись (сэтчин, белоевскöй Карбас гöгöрас, олöны роч-комиэз — Катаеввез, Епановвез, Шатуноввез).

Не миян öння кылiсь петöмась шорреслöн и то энiя ниммес: Ерча, Гонса, Горич. Тöдчö, что эна юэзлö уна-уна сотня годдэз ни, а вот нiя öнöдз олöны да дивитöны миянöс тöдтöмторнаныс.

Верх-юсьвинскöй Горич шороклöн эм аслас семья, эмöсь сысся ыджытжык сойез-воннэз: Пермскöй областьын — Олыч (Ович), Полыч (Вишералöн шульга вож), Ульвич (Яйвалöн вож), Сепыч да Юрич (Обва бассейнiсь), косинскöй шорок Ерыч; Кировскöй областьын — Колыч (пондöтчö миян округын), Нырмыч. Эна ниммес тожö ни öддьöн дзорöсь. Абу ни сiя народыс, абу ни кылыс, кöдасянь шогмисö эна ниммес. Ежели вермисö бы висьтавны шоррес миянлö сiйö, мый кöркö керсис ны береггез дорын, мийö бы тöдiм уна быдкодь диво.

Кытшöм чудо: нiя, киннэз сеталiсö ниммесö, важын ни пöртчисö пöимö, нылiсь коскаэзнысö нырыштö неöтiк метр сувда му, а географическöй названнёэс, дзик памятниккез, öнöдз олöны миян оланын.

Юрлинскöй районын, ме моз, эм шор ниммезлöн öддьöн древньöй пласт. Этö — Юрла, Зула, Кукола (Куколка), Конгола (Конголовка), Юм. Эна ниммес миянлö бöра жö казьмöтöны одззася тысячелетие йылiсь, кöр öння юрлинскöй му вылын олiсö не роччез, не комиэз, а кытшöмкö мöдiк финскöй племя — может, печёра, а может, лопь. Эта йылiсь баитöны не только географическöй названнёэз, но и легендаэз. Позьö надейтчыны, что кöркö висьталасö ассиныс веськыт кыв и археологгез.

Петраковскöй старик Чащинсянь ме кывлi то кытшöм легенда. Юм шöрас пö одзжык идол сулавлöм — важ юмчанаыслöн ен. Ыджыт и ыджыт. Юм ыс сiя и вöлöма. Гожумнас пасьтöг видзöмась, а тöв кежас пасьö пасьтöтлöмась. А кöр виль еннэс лоасö, дак идолыс пö бытьтö пышшöма кытчöкö. Сы местаö вöлись вичку сувтöтöмась.

Дак не биармийскöй* ли Йомала эта Юм ыс, кöда йылiсь висьтасьöны скандинавскöй сказаннёэз? Может, и скандинаввес татчöдз эз вовлö, а пантасьлiсö море дорын олiсь финскöй племяэзкöт, кöдналöн вöлi асланыс ен. Но сэтшöм жö ен вермис лоны и мöдiк финскöй племяэзлöн, и вöвлi непременно.

[*Мукöд учёнöйез шуöны, что Биармия — этö Пермь (Пермия). Скандинавскöй сагаэс висьталöны золотöй ен йылiсь, кöда пукавлöма тодильнöй йöрокын и видзлöма пидзöссэз вылас ыджыт бекöр сереброöн да золотоöн.]

Кытшöм ен сулалiс важ Юм посад шöрын, некин миянлö часöт оз висьтав. Но сёжö, ежели сiйö шуöны Юм öн, то сiя, видно, вöлi не коми ен: комиэс тöдлöмась только Войпельöс (Пеляöс) да Иенöс.

Интересно и сiя, что комиэс тöдöны ёмаöс — нюрын олiсь кульöс. А ёмаыс, может, лоис как раз эта Юм енсянь, и пöртiсö сiйö нечистöй духас коми-пермяккез: буртiсö да донтiсö ассиныс еннысö и немö воштiсö мöдiк отирлiсь. А Юм ен пöрис нюрись кульö, натьтö, сiйöн, что «гортыс» сылöн вöлi нюра места.

Дак вот, Юм юоклiсь нимсö мийö вермам пысавны сiя жö сунис вылö, кытöн эмöсь ни Иньва, Еншор, Енва, хантыйскöй Торым-пöх (Торым ен ю), мансийскöй Туп-унлын-я (Идол пукалан ю). Но оз ков вунöтны, что эна местаэзын овлiсö ханты, а нылöн эм юм кыв, мый лоö миян моз — льöм.

Кудымкарскöй районас эшö эмöсь интереснöй ниммес, и нiя быдса беремя. Огö пондö сувтчыны сэтшöм шороккез дын, кыдз Изыбшор, Идмысшор, Зöрьяшор, Арьяшор, Ребинашор, Вашор, Увдöршор, Вöрдоршор, Созоншор — мунам мöдiккез дынö.

Басöкöсь, но абу сложнöйöсь Öшкаюрыбка да Кöчьюр шоррезлöн ниммез: нiя петöны öшка юр кодь да кöч юр кодь мыссэз увтiсь.

А то Лёкуб, уна кудымкарскöй тшакьялiссезлö тöдса юок. Этö нимсö колö вежöртны, видно, кыдз лёк ыб, но эстöн лёк кыв не лöг значеннёын, а пыд вöрись ыб, дикöй ыб, кыдз и Лёквож — дикöй шорок.

Но каждöйыс вермас юавны: «Шор — и вдруг ыб?» Да, сэтшöммес йылiсь ме баитi ни, что вермис сiдз лоны — шорыс босьтiс нимсö места нимись. Конечно, не ачыс босьтiс, а отир сетiсö сылö, и сетiсö, видно, строгановскöй чиновниккез, кöр эна местаэзын нiя керисö лесоустройство, но сетiсö отир басни сьöртi.

Пырны кö Лёкубсянь ылöжык вöрас (пöриссес сiйö öнöдз шуöны господскöйöн), то пантасяс Сука ляга (Сукöй ляга — Сухая), сэсся мöдiк шор — Сырöй Лёкуб, сы сайын Ребинашор, Сенькашор. Но эна шоррезлöн эмöсь и коми ниммез: Сука ляга — Кöс лог, Ребинашор — Певычшор (натьтö, певысь кылiсь, мый лоö — рябина).

Графскöй отир жö, ме думайта, сетiсö ним и Гириб деревнялö. Аркмис сiя, натьтö, или дерябы (дебри), или дерб, дербина (вильса) роч кыввезiсь. И Красная горка сö, кытöн гуляйтлöма строгановскöй правленнё, роч чиновниккес жö сiдз пондiсö шуны, кыдз и Нагора да Подгора (Красная горка — может, и гöрд керöс, а может — басöк).

Сiдз бы и позис кольны Лёкуб шорлiсь нимсö, кöбы эз вöлö Куб да Куба юэз (öтыс миян областьын, мöдыс — Вологодскöйын), Куб да Кубень деревняэз. Нiя тшöктöны миянöс сувтчыштны да думайтыштны — а сiдз я аркмис Лёкуб шорлöн нимыс? Может, сiя шусис Лёк об?

Мый, мый, а Пельнянь нима шор некöр эг думайт пантавны. Забавнöй ним. Кыдз сiйö вежöртны? Эшö бы вöлi вежöртана, ежели бы сiдз шусис мыс, ыб, керöс, нюр, кöда мыйöнкö вачкисьö пельнянь вылö. А юокыслöн нем öткодьыс абу эта чöскыт сёянторкöт. Неужто вöвлi Пельнянь нима морт? Может, и деревня сэтшöм вöлi? Эм жö тай Колькьярись деревня, а Пельнянь ыс мыйöн умöльжык — курытжык али пагыражык?

Сякöйыс вöвлöма, и сякöйыс эм, только мийö етша тöдамö эшö — мукöдсö асланым дыш кузя, мукöдсö недосугувья, а кöда бердö кутчисьны и вынным оз тырмы.

Одзлань уна лоас тöдмалöм, но и уна кольччас тöдмавтöг: осьтлiс, мыччалiс сiйö кадыс отирыслö, кадыс жö и бöр пуктас сы вылö ассис сьöд лапöтсö.

Кад — этö не ненецкöй Весану ен, кöда, ежели бура гöснечавны сiйö, томтлöма пöрись отирöс, сетлöма мортлö унажык олан луннэз. Миян кадным — неумолимöй ен, сiя кывтö только одзлань, только пöрисьтö мортсö, и немымда оз томты. И эн видзчись сысянь некытшöм содтöт, а тэрмась овны.

Косинскöй районын, Левичи деревня дын, эм Корлан шорок. Нимыс сылöн тожö аскöра — коми не коми, роч не роч. Кытшöм позын сiйö пöжöмась, кытiсь сiя петöма? Корлыны глаголiсь али карлан кылiсь (карлан — ороп, рукоятка: морда карлан, изын карлан). Но нiя некöда юыскöт оз йитсьö.

Эта кылыс, тыдалö, унавекся старик, кöда чужис эшö чудскöй каддэзö, олö, поди, тысяча-мöд год ни. И сiя не öтка, сэтшöммес Прикамьеын эшö эмöсь: Ветлан — деревня, шор да керöс; Жигалан — ю да керöс; Ветлянка да Ветляны деревняэз. Лан (лань) окончаннёа ниммес эмöсь Коми республикаын (Кослан), Удмуртияын и Марийскöй АССР-ын (Ашлан, Юплань). Натьтö, и Вурлам юок эна жö ниммез дынö корсьö (юксеевса да косинса сiйö шуöны Вурнам).

Эстöн колö казьмöтны и Весляна ю йылiсь — сылöн нимыс матöжык сибалö эна ниммез дынö. Эна ниммес тожö финно-угорскöйöсь, точнöйжыка висьтавны кö, дак финскöй отирлöн, а не угорскöй йöзлöн — хантылöн, мансилöн да венгррезлöн (Венгрияö кöркö мунöмась кык угорскöй племя — мадьяр да ньек).

Косинскöй жö районiсь мийö адззам эшö Кöдз, Попшор, Омен да Самсорда юоккез.

Кöдз — сiдз комиöн шуöны поснитик галька.

Омен, ежели сiя коми кыв, колö вежöртны, видно, кыдз поперёшнöй (котöртö ыб кузя, видз кузя поперёк) или мыйкö пырйöт шуч котöртан юок (баитöны тай, туйыс ыб омöн мунö).

Тöдса коми мортлö сорд кыв — рас; но мыля эта рас дын лякасьöм кытшöмкö сам?

Да и Попшор эд сы кодь жö загадка.

Мыля? — этадз ми вермам юавны и кочёвскöй Корсын, Тулкашор да Сия юоккез йылiсь.

Мыля? — сiдз ми юалам и Муртын (Муртым), и Пöй, и Нонь, и Лочь, и Суч, и Вум да уна мöдiк шор ниммез йылiсь. Но эта мыля? вылö точнöй ответыс абу на.

Ежели Сия юлöн нимыс мансийскöй, то сiйö колö вуджöтны коми-пермяцкöй кыв вылö то этадз: родлöн, племялöн ю (си — род, племя; я — ю).

Сэк и кыкнан Сива юлiсь ладсö колö пондöтны кошшыны эта жö си дынсянь. Нiя, ме думайта, юэс одзжык, кöр ны дорын олiсö манси, шусисö не Сива, а Сия: ас родлöн ю, асланым ю.

Тулкашор да Тулва ю (Камалöн вож), ме думайта, шогмисö öтiк вужись. Öддьöн охота йитны Тулва юлiсь нимсö финскöй тулва кывкöт, кöда лоö — ыждöм ва, береггезiсь петöм ю.

Ответиттöм мыля? увтö колас сюйыштны и Извер юоклiсь ним. А сiя бöрсяняс кыскас ассис урмасö — Бисер, Жеспер, Истер, Бизяр, Инзер (Башкирия) да мöдiккезöс.

Интересно, что Извер лöн эм роднöй сой Калужскöй областьын — Изверь ю (Угра бассейнын). А Истер лöн родняыс паськалöма эшö паськытжыка: Москва дынын, эм Истра, Калужскöй областьын мöдiк Истра, Литваын — куимöт.

Истер город кöркö вöвлöма Сибирьын — Кучум царствоын.

Дата добавления: 2015-11-16