Йöвтöм мöс да квать ен

Кытшöмкö му вылын, кытшöмкö ю дорын олöмась-вöлöмась госа князь, йöвсявтöм мöс да квать ен. Госа князь вексö куйлöма ю дорын, йöвтöм мöс вексö сулалöма вöр шöрын, а квать ен... Но, челядь, тырмас. Ме часöт ог мöд сказкаэсö висьтасьны, а мöда баитны деревня ниммез йылiсь. Да и абу на эта сказкалöн конецыс. И не сказка сiя, а быль.

Госа князьыс — быль? Быль.

И квать еныс? Тожö — быль.

Ме тай баитi ни, что народыслöн фантазияыс паськыт, кыдз миян Парманым, да пыдöстöм, кыдз юр вевдöрсиным кымöрыс. Тiйö асьныт вермат висьтавны, кытшöм отир олö деревняын, ежели сэтчинiсь петöны Ломоносоввез, Репиннэз, Есениннэз. Но народыс, кыдз тöдчö топониммез сьöртi, весись оз кеслы пиннесö, а сеталö öддьöн меткöй да простöй ниммез. А нiя простöй ниммес кажитчöны миянлö загадочнöйезöн сысянь, мыля нiя аркмисö не миян дырни, а öддьöн ни важын. Сэтчö жö быд народыс, кöда вовлiс виль местаö, лöсьöтлiс важ ниммесö ас сьöртöттяс.

Например, Коса посад кöркö шусьöма Ныров, сыбöрын сетöмась сылö виль ним — Кöс, а öнi вот шуöны сiйö Коса. Кöркöся юсьвинскöй Луят [* Луят, видно, мансийскöй ним: сэтшöм жö нима деревня мансиэслöн вöвлöма Лозьва ю дорын (öнi сiя Свердловскöй областьын).] öнi пöртчöма Край-Иньва ö, йöгвинскöй Лепу — Старцева ö, а Кокольöсь да Öшöпек босьтöмась öтiк ним — Виль Добрынин. Мöдпöв «пыртöмась» Ыджыт Коча дынiсь Паголь деревня и сетöмась сылö мöдiк ним — Мара, а гайнскöй Пачкись лö — Никонова.

Вежсьöны ниммес отир синнэз одзын. Вот миян деревня вевдöрнымöс эшö двадцатöй годдэзö шувлöмась Бовдор. Сыбöрын сiйö шуисö то Воротадор, то Гунаувт, то Иньвадор. Сы увдöрись видззес вылын вöлiсö Нюр, Кöчковник, Шательник, Ванёквидз да эшö десяток места, а öнi весöтiсö нюрсö да гöрисö и пондiсö шуны быдöс энö местаэсö Канавадор (нюрас гарйисö пыдын канава).

Мукöдпырсяс быдöнлö тöдса ниммезсис аркмöны смешнöй ниммез: Пес керку лоö Пестерка öн (мукöд отирыс керкусö шуö терку öн), а сэсся пöртчö и Пестерушка ö. И конечно жö том морт, кöда эз тöдлы, эз кывлы, что кöркö вöр дорын сулавлiс керку, кытöн лесообъездчик клеймитлiс да ректывлiс гусьöн кералöм пес, оз понды тöдны, кыдз аркмис Пестерка. Но, ме тай бöра вунöтчи коми-пермяцкöй поговоркалiсь советсö — тэрмась уджнат, а не кывнат...

Пармаись йöвсявтöм мöс нима деревня тiйö од адззö. Но сiя эм, только кыдз бы сайласьöмöн олö, оз бы мыччась коми-пермяккеслö — ме баита юсьвинскöй Мурмöс деревня йылiсь. Баитнытö баита, да ог вермы точнöя висьтавны, сiдз я аркмис эта деревнялöн нимыс.

Ежели Мурмöс шогмис коми кылiсь, то эта лоö — йöвсявтöм мöс, яловица (удорскöй комиэзлöн мур — йöвсявтöм, йöвтöм). Но ежели сiя аркмис удмуртскöй мур кылiсь, то сэк эстöн пода йылiсь абу некытшöм басни, сiдз кыдз удмуртскöй мур — пыдын. Сэки мöд торыс Мурмöс нимлöн лоö мыйкö мöдiк, может, кыдз вöлi предположитöма одзжык, — ва либо ключ, а Мурмöс — пыдын ва, ключ, шор.

Округаным эм эшö öтiк мур тора ним — Кочёвскöй да Кудымкарскöй районнэзiсь Мурмар деревняэз. Эстöн мурмар кылыс, тыдалö, коми-пермяцкöй — сiдз шуöны мортöс, кöда баитö дузöмöн, недовольнöя, лöгпырья. Мый, мый, а коми-пермяккес коласын дузiсь да поперёшнöй морттэс неетша, сiдзкö, Мурмар ниммес, натьтö, вöлiсö быд пельöсын. А вот öтiк ны коласiсь кольöм ассис нимсö миянлö кыдз этнографическöй памятник — вот пö кытшöм коми мортыс вöлi.

Быдыс тöдö Кудымкарись Филичи посёлок. Сiя пондöтчö как раз важ карсяняс, кытöн овлöма кöркö чудскöй пам Кудым-Ош.

Наука миянлö висьталö, что сiя местаын отирыс олö куим тысяча год ни. И кытшöм несправедливость: сэтшöм важ олан места, а нимыс сылöн дзикöдз öння, да эшö не чудскöй, не коми, а роч, кыдз Шебуничи, Ераничи. Шебуничи — этö Щебуня пияннэз нето Шебуня деревняись олiссез (шебуня — вологодскöй кузь пась, тулуп); Ераничи — Еран пияннэз, а Филичи, ежели мунны эта туй кузя, — Филя пияннэз.

Филичи — этö посёлоклöн официальнöй ним, а миянлö буржык лоас видзöтны народнöйö, кыдз коми отирыс баитö. А отирыс этö посёлоксö шуö Пилич. Мый эта лоö?

Коми пилич кывлöн кык значеннё: öтыс — поткöтан тув, клин; мöдыс — тамга, семьялöн нето родлöн пас, пода пятно.

Меным охота Филичи посёлоклiсь нимсö петкöтны пас значеннёа пилич кылiсь. Этшöм выводыс öддьöн бура йитсьö дзор веккескöт, кöдна колисö ассиныс паснысö эна местаэзö. Археологгез, кöр кошшисисö важ могильникын (сiя городище дынас матын), натьтö, адззисö предметтэз, кöдна пятнайтöмöсь важся пиличöн. Позьö предположитны, что эта местын родлöн, племялöн олiсö вожддес, кöдна дынын хранитчис, кыдз öння печать, родовöй знак да реликвия — пилич.

Интересно бы вöлi сравнитны важ кудымкарскöй пассэсö, ежели нiя эмöсь, филичовскöй Ропич увтыр пассэзкöт (Ропич чес ассиныс роднысö лыддьöны öддьöн важсяöн, чудскöйöн, и йитöны Кудымкöт, кöда нимсянь аркмöма Кудымкарлöн нимыс и Ропич увтырлöн — Кудымоввезлöн фамиллёныс).

Капилина деревнялöн, кыдз баитöны капилинса, важ да кузь история. Но документтэз сьöртi сiя абу пöрись деревня, и нимыс сылöн, позьö шуны, аркмис сiдз жö, кыдз сэтчин ладорись Степанова, Петрунёва, Федотова, Пронина деревняэзлöн ниммез. Но давайте-ко бöра кывзам, кыдз сiйö шуöны комиэс. Йöгланись отир сiйö шуöны не Капилина, а Капильна да Капыльна. Ванюковса да пронёвса оз висьталö Капилина туй, а сё ни шуасö Капильна туй, Капыльна ыб. Дак эз я чайды эта деревнялöн нимыс капыль кылiсь (капыль — картов)? Капылин или Капильна — этö места, кытöн быдтылiсö картов. А эд эшö неважын, семьдесят — сто год одзтi, сiйö быдтывлiсö дыша, мукöдыс эз и садитлö. Сэтчин, может, медодз миян ладорын пондiсö быдтыны картовсö, сысянь и лоис сылö Капилина ним.

Кудымкар дынын эм учöтик деревняок — Рак. Сiя пуксьöма пыдын лог йылö — Раклог йылö (одзжык деревняыс шусьöма Раклог). Кöть и пыдын логыс, а шорокыс сэтi котöртö учöтик-учöтик — кушак пасьта только, а жар коста и нач кöс. Сiдзкö, логсö сэтшöм нимöн шуисö не сы кузя, что сэтöн олöны раккез. Да и Рак ыб эм, а раккесö не оз кöдзö, не оз вундö.

Рак — этö морт ним и, пожалуй, коми. А что сiя ним, эта йылiсь баитöны эшö то эна деревняэзлöн ниммес: Ракшина (Раклöн, Ракшалöн горт), Ракшата (Ракшалöн пияннэз, Рак деревняын олiссез).

Кудымкарскöй районын эмöсь Кайдук ниммез — öт деревняыс Велва ладорын, мöдыс вöвлi Юринскöй сельсоветын. Кöть и эта кылыс ровно бы коми, но сёжö сiя татчö локтiс, видно, роч отир дынсянь. Миян соседдэз — Кировскöй областись отир — хайдук öн шуöны чирзiсь, паськыт öма морттэзöс; Казань гöгöрын сiдз шуöны буяннэзöс, воррезöс, грабителлезöс.

Прикамьеын эмöсь и мöдiк деревняэз, кöдналöн ниммезныс горалöны басöка, кокнита, а смыслыс нылöн нёштöм, «преступнöй», кыдз вот эта Кайдук лöн, кыдз Шышкар лöн (шыш — пышшалiсь, шпана), кыдз Леман лöн (роч диалект вылын леман — чёрт). А овлö и мöднёж: нёштöм нимись адззам мыйкö басöкö, рамыникö, гортсяö: Яборова нимын вöлöма сьöдкай кыв, а Бондюг, кöдаын дзик мыйкö эм бандит кывсянь, вöлöма нежнöй быдмас — чочком клевер (сiйö мукöд пермяккес шуöны эшö сизьюр).

Кватьпель — деревнялöн ним, кöдö мийö горöтчам öнi серöмсорöн, а одзжык, может, пернапастöг (ежели язычниккез юрбитiсö сiдз жö, кыдз и православнöйес) эз и горöтчылö энö кыввесö. Ме мöда висьтавны, что пель кывлöн кöркö вöвлöма эшö мöдiк значеннё — сiдз шувлöмась коми енöс: Пель, Пеля, Войпель. Ме бы шуи, что эта нимыс аркмис только Пель ен кузя. Былись, вермас я лоны квать пеля морт али пода? История оз тöд сэтшöм факттэсö.

Сьöкыт висьтавны, кыдз эта деревнялöн нимыс аркмис, но, может, кытшöмкö чудскöй увтыр сiя местын видзис квать идолöс, квать болванöс. Путешественниккес висьтасьöны тай, что чудскöй кумирняэзiсь нiя адззывлöмась дасся унажык еннэзöс.

Эм, правда, и сэтшöм легенда.

Сэтчин, кытöн öнi Кватьпель деревня, олöма кöркö öтiк старик. Сю сiя абу вöдитöм, а кöдзлöма сёртни да анькытш, и кöдзлöма как раз туй дорас. А туй кузяс, конечно, ветлiсö отир. Ыджыт морт, поди, мунас да и öтiк пуртöс оз орöт, а челядьлö кöть тэ мымда баит, сiя кыкись-ту видзсяс, а куимöтпырсяс сё ни анькытшсö нето сёртнисö нетшкöвтас.

И вот лоöма нужнöй год — нем оз шогмы. Мöд годас — бöра засуха лоас.

Старик ой и лун дозирайтö ассис ыбсö. Кин сёяс сылiсь карчсö да шедас сы киö — орöтö сылiсь пельсö да майöг ув вылö пысалö. Сiя годö пö вундыштöма челядьлiсь квать пель. Сэксянь деревнясö пондöмась шуны Кватьпель.

Чердынскöй районын эм Кушпель нима деревня но сiя абу ен дука, а как раз нечистöй дука: кушпельнас комиэс шуöны вöрисьöс. Но сiдз вермисö нимкодявны и мортöс.

Мижуй, Мисуль, Базуй, Слудинчи, Чуртан — этö быдöс коми ниммез. Мижуй — жаг, мошкоритчись морт. Сэтшöм мортыс кыссьö бöрын, а эта мижуйыс, видно, вöлöма боёк, ежели медодз ештöма пуксьыны виль му вылö — панны виль деревня.

Мижуй дынiсь абу ылö мунöма и мисуль — онзыля, неопрятнöй, мисьтöм чужöма морт.

Базуйöн коми отир шуö тожö не вывтi мывкыда мортöс, не удж радейтiсьöс, а шатласисьöс, бродягаöс. Сiдзкö, Шатунов, Шаталов да Базуев фамиллёэзлöн содержаннёыс öткодь, кöть и формаыс абу öткодь.

Косинскöй районiсь Багай деревня нимлiсь вежöртассö, ме думайта, тожö колö кошшыны коми кылiсь; багай нето багаль — этö немöй морт.

Чигас деревнялöн нимыс, кыдз бы мийö эг комиöтö сiйö, сёжö, тыдалö, дöнзьöма миянлö тюркскöй отирсянь — татаралöн да башкиррезлöн эм сэтшöм морт ним.

Пармаын, эта дзибья крайын, олiс сэтшöм отир, кöда бура тöдiс ассис гортсö, тöдiс, кытшöм зверь да кай олö ордчöн сыкöт, тöдiс, мый быдмö вöрас и кушинас. И эта тöдöмыс отразитчис топонимияын. Öддьöн жаль, что сэтшöм тöдiссес миян коласын öнi кольччисö только öтi-öтi. Эна тöдiссес жагöник мунöны эта оланiсь и нöбöтöны сьöраныс быдöс сiйö, мый нiя тöдiсö. А мийö, бытьтö китöм-коктöмöсь, пукалам горттэзаным да ог и думайтлö мунны дыр олiсь отир дынö да босьтны нылiсь богатствосö. Мукöдпырсяс эд оз и ков ылö мунны, а вуджны только улица мöдöрас...

Деревняэзлöн да местаэзлöн ниммез, кöдна аркмöмась быдмас ниммезiсь, миян округын унася-уна: эмöсь пу нимаöсь и сю нимаöсь, тшак нимаöсь и турун нимаöсь, карч нимаöсь и нитш нимаöсь. То кочёвскöй деревня Ой-Пожум, кöдалö нимсö сетöма миян вöррезiсь зелёнöй великан. Ой-Пожум öн сiйö шуисö не сы понда, что сiя ойланьынжык мöд Пожум деревняыс дынсянь (Верещагинскöй районын вöвлöма учöтик деревня), а сы понда, что сiя ой пожума — кондовöй пожума вöрын сулалö.

Вöвлöма эшö мöдiк Ой-Пожум — Юсьвинскöй районын.

Косинскöй Лямпина да Юсьвинскöй Лемпиха деревняэзлöн ниммезныс тожö «пуовöйöсь» — шогмöмась льöмпу кылiсь (мукöд отирыс нiйö и öнi шуöны Льöмпуöн).

Коми-пермяккез тöдлöмась и уржа (ыржа) пу — сьöд тополь (шувлöмась сiйö эшö сiм пипу). Сэтiсь гарйывлöмась öррез да пыжжез, тшуплöмась баняэз да öшмöс сруббез. Öнi эта пуыс важын ни абу миян ладорын, и только кыдз свидетель важся кадлö олö эта пулöн нимыс Уржа деревня нимын да, натьтö, Уржовчина (сiя жö и Уржа) юок нимын.

А то басöк нима деревня — Нинмараск. Может, öнi и абу ни сы бокын нинпуа расыс, а кöркö сё ни вöвлi, раз сiдз шуöмась деревнясö. Этадз увереннöя ме баита сiйöн, что казялi ни важ коми-пермяклiсь хваткасö: сiя ниммесö унажык сеталö простöйöсь, но приметнöйöсь.

Кынымкö деревнялö сетöма нимсö бадь пу: Кудымкарскöй районын — Баддяин, Гайнскöй да Юрлинскöйын — Баддя.

Мöдiк пуэс — кöз, ньыв, кыдз, рябина, понуль, жовпу — тыдалö, абу лöсялöмась ниммезас, и сэтшöм нима деревняэс оз пантасьлö (ме баита только коми пу ниммез йылiсь).

Правда, эмöсь нiя и миян округ сайын. Карагайскöй районiсь тi адззат Ния (лиственница), Сивинскöйись — Кизьва (Кыдзва). Кизел городсö коми-пермяккес шуöны Кыдзов, сiдзкö, и сiйö кыскам эта чукöрö жö. Бадья деревня эм Ильинскöй районын.

Верещагина город сайын эм Кез станция. Сiя тожö видзö пу ним, но не кöзлiсь, а бадьлiсь: кез — этö удмурттэз моз лоö баддяин.

А вот миян Юсьвинскöй Волпа, натьтö, аркмис ловпу кылiсь, только в да л вежсьöмась местаэзнаныс. Да и иньвенскöй коми-пермяк сiйö оз шу Волпа, а шуö Вовпа.

«Туруновöй» деревняэс тожö не зэв унаöсь. Медбасöк «туруновöй» нимыс, ме сьöртi — Одань посёлоклöн ним. Эта нимись ме адзза гаж, мич; сiя — небытик, дзик пух, да сöстöм-сöстöм. Сiя гажмöтö мортлiсь синбурсö, бурмöтö сьöлöм, козьналö покой. Эта нимыс, тыдалö, шогмис коми од кылiсь. А од — тулысся зелень, сю петассэз.

Оз ков од кылiсь петкöтны быдöс Одина деревняэзлiсь ниммез. Нiя вермисö шогмыны и одина кылiсь, кöда мыччалö количество — джын дюжина, а сiдзжö — öтiк (одина öн шувлiсö öтiк керкуа хутор).

Эм эшö öтiк мича ним — Катшасин (ромашка). Но катшасин кывлöн эм и мöдiк вежöртас, и сылöн тожö эм право пöртчыны деревня нимö, только морт ним пыр. Былись, разь эз вермö мортöс шуны катшасин öн сы лэчыт, кыдз катшалöн, синнэз кузя? Вермисö. Петö, что оз позь точнöя висьтавны, быдмас али не катшасиныс.

Чуртан деревнялö нимсö сетiсö, тыдалö, тожö турун сьöртi — сэтчин быдмö дзуртантурун.

Лёнва деревня, может, и быдмас нима, да только не лён кылiсь сiя аркмис, натьтö, а льöн кылiсь. Льöн öн мукöд комиэс шуöны йöн.

Порськок деревня йылiсь, кыдз пондi сiйö тöдны; ме пыр думайтлi, что сылöн нимыс порськöт йитсьö. Но кыдзкö кылi сэтшöм басни: «Сэтчин-ту эд, батя, порсь кокаэс только овлöмась, сiйöн и ним сылöн — Порськок». А киннэз нiя — порсь кокаэс? Нiя пö чуддэз. Ачыс пö чудыс морт кодь жö, только сьöд гöна да порсь кока. Вон инö кыдзи: чуд кок сiя вöлöма, а ме думайтi — порсь кок, мыся.

И сёжö, мый бы эз баит отирыс, а Порськок деревнялöн нимыс, натьтö, лоис Порськок нимкодьсянь.

Пикан нима деревняэз йылiсь, натьтö, нем и баитны: этö турунсö тöдö том и пöрись, кöда тшыг годдэзö комиыслö вöвлöма бур сёянöн.

Пиканыс тöдса-тöдса, а кöктоиныс эшö тöдсажык. Кольöм война коста сэтiсь и пирöг, и каша, и нянь керисö. Позьö шуны, что кöктоин (пистик) — стратегическöй турун: сiя отсалiс фашистöс вермыны. Дак вот, вöвлöма миян и сэтшöм нима деревня Кöктоин.

Кокор, может, и не быд мортлö тöдса, а пöрисьжык пода сiйö öддьöн бура тöдö и некöр оз курччöвт — сiя ядовитöй турун. Мöднёж сiйö шуöны кöкан.

Сiдзкö, Кокор деревня дын быдмö уна кöкан? Сiйö ог тöд, поди, и абу. Дак кысянь инö сэк деревняыслöн нимыс босьтсис? Натьтö, кокорнас шуисö мортöс, сэтшöмöс, кöда лэчыт кыла, лёк басниа.

Чышыв деревня йылiсь ме кыв-мöд висьталi ни — сылöн нимыс аркмöма чишыв турунiсь, кöдалiсь коксö да вуджоксö-дзолькасö учöтувья йирлiс быд мортыс. Только сiйö öтiклаын шуöны чишыв, а мöдiклаын гонюш, а куимöтлаын, может, и эшö кыдзкö.

Дзульган деревнялöн, шуöны, нимыс петöма тожö турунiсь, кöдö рочöн шуöны денежник. Воöм денежник, кöр сiйö вöрöтö тöв, негорöн сярöтыштлö, кышöтö да муркöтö. Этö сяркöтöмсö, видно, киннэзкö шувлöмась дзульгöмöн. Но ме сэтшöм кывсö ог тöд. Ме тöда дзольгöм, дзольган да эта жö вужись аркмöм мöдiк кыввез. А дзольгыны, ме думайта, туруныс оз «куж», дзольгö котöртан ва. И шорсö, кöда визывтö Дзульган деревня дынöт, важся каддэзö, натьтö, шувлiсö не Дзульган, а Дзольган. Этасянь, а не турунсянь, тыдалö, лоис деревняыслöн нимыс.

Быдмас ниммез дын жö, видно, колö пыртны и Чердынскöй районiсь Керчево деревнялiсь ним: сiя, натьтö, аркмис керч кылiсь (керч — нюр турун, рочöн сiйö шуöны багульник).

Косинскöй районын эшö неважын вöвлi Биавужья посёлок. Мыйкö эта нимыс абу ним кодь, но зато оригинальнöй. Только кыдз сiйö вежöртны? Ме кошшиси-юаси, да сiдз и эг адззы сылiсь вежöртассö, но шуа, что сiя турун, и видно, вужыс сылöн гöрд. А гöрд вужа туруныс миян округын быдмö, и иньвенса сiйö шуöны вирвужья.

Ну, туруналiм-керим, а öнi позяс и тшакьялыштны. Только одзлань панöвта: эд лöсьöтö ыджыт пестеррез да корзинаэз — унасö некысь öктыны. Кöть и тшакья местаэзын оламö, а тшак нимаэс миян только деревня-мöд. То нiя: Мутшак, Ниндуль да Пипудзурк. Ны коласiсь оланаыс только Мутшак, а мöддэс абу ни.

Эм эшö Габова деревня, да точнöя оз туй висьтавны, что сiя нимсö одзöстiс гоб тшаклiсь (гоб öн комиэс шуöны и мöс гриб, и гöрд гриб).

Абу унаöсь и карч нимаэс: округсиным ме тöда, ежели не лыддьыны Капилинчи, только öтiкö — белоевскöй Попыль (попыль — картов голи, картошка дзоль).

Созлöй карч ним ровно бы аслыс куртыштöма öтiк чердынскöй деревня — Кушмангорт, но Кушман — морт ним.

Коми-пермяцкöй топонимияын олö быдса пода ферма — уна гöна да быдкодь перьёа. Ныкöт йитсьöны уна деревня ниммез (но мукöдыс öнi шусьöны мöднёж, а мукöдыс абу ни): Порозовчи, Ошов, кык Ошыб, Кöч (посад да эшö нёль деревня), Кöчыб, Урья. Да и эна: Мöскок, Балякок, Вöвьюр, Понъюр, Балябöж, Ошкымöс, Сьöдкай, Чаняыб — нiя эд шогмöмась тожö пода ниммез пыр, кöть и Мöскок, Балякок, Вöвьюр, Понъюр — мортлöн нимкоддез. Ошкымöсöн деревнясö шуöмась логгез коласiсь мыс сьöртi.

Этчö жö колö тöрöтны и Паль деревнялiсь нимсö, сiдз кыдз сiя шогмöма не кыдз пальник, а паль ур (летяга) нимсянь (ме баита не белоевскöй, а верх-иньвенскöй Паль йылiсь). Но Паль öн перво, натьтö, шуисö мортöс, а сысянь вöлись и деревнясö.

Öтiк легендаын баитсьö кык вон йылiсь, кык богатырь йылiсь, кöдна олöмась эна местаэзын — этö Паль да Кöч. Нiя, кыдз и колö лоны богатыррезлö, вöлöмась вынаöсь, ыджыт мыгöраöсь, басöкöсь. Кöртовöй мяччезöн, кыдз анькытш туссезöн, орслöмась. Городище керöссянь Ковыляевчи керöсöдз мяччезнас шупкасьлöмась.

А кöртовöй мяччесö асьныс дорлöмась — Иньва дорас нылöн кузница сулалöма.

Ну и, конечно жö, вермасьлöмась богатыррес, ковыляевскöй увтырыскöт воюйтлöмась. А войнаыс ны коласын пондöтчöма ма кузя.

Паль да Кöч асланыс увтыркöт öктöмась масö и асланыс вöрись, и соседдэс вöрись. Вот и локтасö ны дынö ковыляевскöй йöзыс корны ассиныс пайнысö. А мöддэс нiйö озö лэдзö карас: игнасясö, каясö заплод вылö да ма пондасö сёйны. Сёйöны и ма ёгсö локтiссес юр вылö сьöлалöны. Ковыляевскöй увтыр ляс лöгасяс эта понда, и öзъяс война.

Вот эна богатыррезсянь лоöмась Паль да Кöч деревняэз (Пальлöн лог сайыс öнöдз шусьö Кöч öн).

Кочёвскöй Палькояг деревня йылiсь колö висьтавны сiйö, что этö — Палько лöн нето Палько родлöн яг. И сiя нимыс лоöма тожö паль кылiсь, а не Павел нимись (Павелсö сы ладорын шуöны Паыл, Паöл, Пал).

Борда царство Пармалö тожö сетöма кынымкö деревня ним: Сюзь, Таров, Сюзьпозъя, Чеж (ыджыт утка), Варыш, Рака, Дерскан (герскан), Кöкöв (кöк), Сизь (кыр), Пыстöг (пистöг), Ябыр (сьöдкай), Зиткай (дзиткай, ыджыт пистöг), Жакключ (жак — кеньжак), Катшакок, Кукку.

Да и Челкановка эд не мый-нибудь, а Чавкан нима деревня.

Басöк нима деревняок вöвлi Косинскöй районын — Кöркокá. Абу öнi сiя, и отир шоча касьтылö сылiсь нимсö, а томмес эзö и тöдлö. Мый жö эта нимыс миянлö висьталас? Öткö, сiя важ ним, а мöдкö, сiя шогмöма тожö зверь нимсянь — олень нимсянь. Вачкисьö сiя аркмöмнас Мöскок да Балякок кодьöм ниммез вылö, но сёдаки сiя аскодя — не кöркок, а Кöркока. А кока — этö, видно, туша. Сiдзкö, Кöркока — олень туша.

Но бöра мöдiк невежöртана: сэтчин оленнес озö олö, эта нимыс Коса понда оз лöсяв. А может, кöркö овлiсö? Пыралöны жö тай тулыснас Гайнскöй районö и часöт.

Этчö жö ме пырта и Серакай деревнялiсь ним, и Виль Курöг лiсь ним, кöть и курöгсö оз пуктö кайö. Но ежели страус, кöда кужö только котрасьны, и новозеландскöй бöжтöм киви, кöда и котрасьнытö оз вермы, — кайез, то курöгыс и подавно кай — сiя кöть седола вылiсь борд йылас лэдзчö.

Кудымкарскöй районын эм Сiсьпинь деревня. Кыдз сылöн нимыс аркмис, сьöкыт висьтавны. А юасьны кö, то кинкö, может, висьталiс бы то этшöм кодь бывальщина. Видзöтö-ко, кытшöм басöк.

Аркмöма деревня, а нимыс абу. А нимтöг эд и поп оз ов, кöть и оз ков сылö нимыс — быдöнныс шуöны батюшкоöн. Вот петасö деддэс лудовка шöрас, нырыштсясö беддез вылö и думайтöны, кытшöм ним сетны асланыс гортлö. Сулалöны, тошшезнысö малалöны, а нимыс оз чуж; сулалöны, ныррезнысö гуддьöны, а ним абу; то и юрбöррезнысö ни гыжьялöны, а нимыс сё абу. Сэтчö лысöм синкыма дед казялас кок увтсис сiсь пинь и шуас:

— Сiсь пинь.

И мöдiккез шуасö:

— Сiсь пинь.

И быдöнныс шуасö:

— Сiсь пинь.

И öнi шуöны: Сiсь пинь. Вот.

Но а кытшöм пинь нiя адззисö? Шырлiсь? Вöвлiсь? Мамонтлiсь? Пила пинь? Куран пинь?

Кöть кытшöм — только бы вöлi пинь.

Ежели и кылат этшöмсö, дак эд веритö сылö. Одзжык эз керлö сiдз. Этö öнi öксясö собраннё вылö да и висьталасö: посёлоксö пондам шуны Осиновка — и быдöс.

Сiсьпинь деревня йылiсь висьтала эшö вот мый. Важся списоккезын сiя гижсьö Сизьпель да Сизьпинь (сизь — кыр). Ме ог тöд, кыдз сэтшöм нимыс лоис, но позьö предположитны, что сiдз перво нимкодявлiсö мортöс.

Животнöйезсянь аркмöмась Сырчики (пичик), Сюзи, Сюзьва да Туланова (Ильинскöй район), Чулы (вурд) да Яборова (Чердынскöй район) деревняэзлöн ниммез.

Насекомöйезсянь лоöмась Мошов, Мушыб (мош ыб), Путой (видно, льöмтой).

Дата добавления: 2015-11-16