Быдкодь бырды-гарды

Ме висьтаси ни быдкодь ваэз йылiсь, ны интереснöй ниммез йылiсь. А эд деревня ниммес эмöсь эшö басöкжыкöсь, эшö забавнöйжыкöсь. И быд ним йитсьö кытшöмкö случайкöт, историякöт, кöда шогмылöм деревня местын али неылын сы дынсянь.

Мöсвöйöм деревня пуксьылöма зыбуна местаö, кытчö кöркö вöйлöма мöс.

Косасотчöм деревня бытьтö бы сулалö сэтöн, кытöн кöркö сотчылöма коса. Важся кадö сотны коса — эта, конечно, вöлi событие, кöда дыр кежö оз вун. Только ытшкисян коса йылiсь я баитсьö эстöн? Не. Эстöн басниыс — Коса ю дорын сотчöм места йылiсь.

Юсьвинскöй районын вöвлöма Бачиз деревня. Мый сэтшöм бач и мыля изыслöн эм аслас ним — эг кывлы. Поди, сiя деревняын вöвлi кытшöмкö чудскöй из? Может, Бач ыс — легендарнöй морт и как раз сiя жö, кöда йылiсь висьтасьöны Косинскöй да Кочёвскöй районiсь олiссез? Может, эта бачсянь и мунiс иньвенскöй фамиллё — Бачев?

Конечно, бур бы вöлi тöдны, кытшöм сiя из и кытчö лоис öнi. Этö вермисö бы керны Мелюхинскöй школаись велöтчиссез. Эз бы вöв диво, кöр нiя кылiсö бы сэтшöм кодь жö легенда, кытшöмö висьтасьöны карповскöй изовöй седло йылiсь — богатырскöй седло йылiсь.

Кыдз вежöртны Кузь Васькина деревнялiсь ним? Вöлöма сэтшöм инька? Не, тыдалö, не кузь инька Васькина, а Кузь Васька вöвлöма. И комиöн сiйö деревнясö, натьтö, перво шувлiсö Кузь Васька.

Сэтшöм жö история, ме думайта, аркмис и Карп Васькина деревнякöт.

Миян эшö то кытшöм деревняэз эмöсь: Турбар, Гöрдпоп, Тарабай, Крюкчунь, Гыр, Ректан. Кыдз нылöн ниммезныс шогмисö?

Турбар öн шуöны нянь кока мортöс, кöда умöля видзсьö кок йылас, прокод джöмдалö. Тарабай — тараторка, кöда кöдзö кыввесö, кыдз пулемёт пуляэз. Крюкчунь — или былись кöстiсьöм, крюксялöм чуня морт, или не паок чуня, кöдна некытчö оз сибалö, нем оз письтö босьтны. Ну, а гыр öн шуöны сэтшöмöс, кöдö природа абу öбидитöма кызанас, а ректан öн — кöдалö сетöма кузь мыгöр.

Кин оз тöд важмöм морт ниммез, сылö лоасö невежöртанаöсь деревняэзлöн сэтшöм ниммез, кыдз Öреп (Арефий, Орефий нимсянь), Кустин (йöг ладорын эта морт нимöн шусьлöма хутор. Том отирыс шуöны, что хуторыс сулалöма расок дорын, кусттэз коласын, сiйöн и шуöмась пö сiйö Кустин).

Вот эшö морт нима деревняэс: Киршин (Кирилл), Зинкöв (Зиновий), Анкудин, Акил, Савкина (Савва, Савватий), Потап, Остап, Мироновчи (Мирон, Мироний), Овдош (Овдий, Овдотий), Мартя (Мартирий), Крысанова (Крысантий), Логин (Лонгвин), Митрок (Дмитрий), Вуп (Луппа), Патрук (Патрикей), Самко, Самчик (Самуил), Онтроп (Антроп), Дёмин (Дёма, Демид), Падей (Фадей).

Эмöсь деревняэз, кöдна йылiсь сразу он и висьтав, что нiя шогмисö морт ниммезiсь — сiдз нiя вежöмась ассиныс форманысö. Вот, например, эна: Ивуч, Ивич (Иван нимсянь), Петрован, Петрунь, Петунь, Петрок (Пётр), Öльöк (Александр), Яраш, Ярань (Ерофей), Якшин, Якин, Якунь (Яков), Миконёвчи (Михаил), Оськан (Иосиф).

Ме вель дыр думайтi Пальшин да Коньшин деревня ниммез йылiсь. Что нiя лоисö фамиллёэзсянь, этö тöдöны быдöнныс. А фамиллёэс мыйись аркмисö? Унажык фамиллёэс шогмисö морт ниммезсянь, род ниммезсянь да места ниммезсянь. Но мыля Паль да Конь ниммезiсь, ежели сэтшöммес вöлiсö, абу аркмöмась Палин да Конин или Палев да Конев фамиллёэз? Али эстöн Пальша да Коньша, кыдз Егор — Егорша? Но колö висьтавны, что Паль да Конь — не роч ниммез, сiдзкö, роч правило сьöртi шогмыны эз вермö.

Эстöн, тыдалö, делоыс мöдiк — бöра пантасисö мансийскöй ниммез. Мансилöн эмöсь Пальшин да Паньшин фамиллёэз. Свердловскöй областьын эм Паньшина деревня, кытöн одзжык овлöмась вогуллэз.

А «чикуовскöй панчи да пансисö» эд на вунöтö? Может, сэтчин как раз эта паньшин ыс и эм? Ме ог вермы висьтавны увереннöя, что паньшин кыв пытшкö дзебсисьöма мансийскöй увтыр; но ровно бы сiдз. Эмöсь пö нылöн то кытшöм увтыррез: мань си (си — род, увтыр), пор си, мось си.

Прикамьеас пантасьлöны сэтшöм топониммез, кöднö позьö шуны и хантыйскöй и коми-пермяцкöй ниммезöн. Вот Чердынскöй районiсь Ратегова деревнялöн, может, хантыйскöй ним, сiдз кыдз Ратегов вес, ежели веритны важся учёнöйезлö, хантыэз. То стариннöй остяцкöй (хантыйскöй) фамиллёэс: Лунегов, Иртегов, Шутегов. Ны дынö жö, может, колö сувтöтны и энö: Отегов, Ратегов, Седегов, Тунегов, Ужегов, Колегов, кöть и нылöн хозяиннэс асьнысö лыддьöны коми-пермяккезöн, а мукöдыс и роччезöн. Но энö фамиллёэсö учёнöйес шуöны пермяцкöйезöн.

Этаын нем удивительнöйыс абу, сiдз кыдз и роччес, и комиэс, и манси, и ханты не öтiк век олiсö ордчöн. Манси эта йылiсь висьтасьöны нельки легенда.

Öтлаын олöмась нёль народ, пыр öтувья керлöмась нёль князь. Но öтпырись нырыштас нiйö тшыг нужда — пышшас ны вöррезiсь зверь да кай. Мунасö нёль вождь вöравны, каясö Из керöс вылö. Каясö да казяласö мансинöс. [* мансин — дозмöр (манс.)] Нёль ньöвьёсь шутньöвтасö, нёль ньöвьёсь мöртчасö мансин моросö.

Усяс мансин му вылас, нёль ки лэбтасö сiйö. Да эд оз туй öтiксö пуктыны нёль пестерö!

Оз вермö торйöтны, и мунасö кин кытчö. Сэксянь и янсöтчасö манси, ханты, коми да роч отирыс.

Кочёвскöй сельсоветын вöвлi Кучкöйлэчтуй выселок. Эта нимыс коми, но не быд комилö вежöртана. А сiя лоö, видно, Куч нима мортлöн охотничöй туй (одзжык эд быд вöралiсьлöн вöлöмась аслас чериалан да вöралан местаэз).

Но мöдiккез мöднёж баитöны — эта пö кучкöм (вартлöм) лэч туй (лэч — кыйсян). Ежели сiдз, то колö только дивуйтчыны, кыдз коми мужик кöркö «велöтлiс» шатьöн не только ассис семьясö, но и кыйсяннэсö, ассис вöралан туйсö.

Ме тожö тöдлi сэтшöм мортсö: сiя наказывайтлiс мордаэз, мыля нiя умöля кыйсьöны. Да разь только сiя вöлi! Роч бояра да купеццез кöркö вартлывлiсö воротаэз да ыбöссэз, кöдна лэдзлiсö воррезöс, а царь öтпыр тшöктiс лöсйыны да иньдыны ссылкаö вечевöй колокол, кöда аслас звонöн пантавлiс непокорнöй посадскöй йöзöс.

Кочёвасис жö öтiк деревня кöркö шусьöма Бырды-гардыкар (öнi Тарасова). Бырды-гарды, видно, бöра жö вöлi мортлöн прозвище. А сэтшöмсö вермисö сетны кокнит басни понда. Иньвенса сэтшöм мортсö, арттöм басниасö, шуöны эшö бульды-бальды.

Миянлö пантасьлiс ни числительнöй сора ним — Кватьпель. А кочёвсалöн эм Кватьморда — тожö басöк ним. И юсьвинсалöн адззисяс — Кватьчунь деревня.

Кватьчунь — этö вежöртана. А Кватьморда? Натьтö, этадз мортöс видiсö — тöвбöр кодьöс, кöда öтiк предмет йылiсь баитö не öтмоз: талун — этадз, ашын — сiдз, а куимöт лунас — куимöтнёж.

Эта числительнöйыс вöлöма медсчастливöй: стариккес, кöдна ветлывлöмась уджавны Добрянкаö, касьтывлöны эшö Кватьва, но сы йылiсь нем ог тöд.

Мöдiк числительнöйсора ниммес етшаöсь: Кыквöрколас деревня, Куимтас (кытöнкö Кудымкарскöй районын вöвлöма хутор), Нёльсин деревня (нёльсинöн шувлiсö очкиа мортöс), Дасморт.

Медыджыт числоа ним тiйö панталат Чердынскöй районiсь — сэтчин эм Сюрс деревня (сюрс — тысяча), а медучöтсö — Нердва дынiсь, кытöн вöвлöм Джынтуй нима починок.

Дата добавления: 2015-11-16