Эшö невна öтi-мöдi йылiсь

Парма нимаэс областяным куим посёлок, Пармайыл деревня да, натьтö, не öтiк урочище. Коми республикаын эмöсь Оч Парма, Джеджим Парма, Йöлмач Парма керöссэз.

Парма нас комиэс шуöны вöрья мыс, дзибьяинiсь керöссэз. Мийö велалiм эта дынö и сыись нем необыкновеннöйсö огö адззö. А эд сiя тожö важся-важ кыв и тожö сякöйсö вермис бы висьтавны ас йывсис да аслас кад йылiсь, ежели кутчис бы висьтасьны.

Этö кывсö, ме шуа, аркмöтöмась кык кылiсь. Öтсö мийö тöдам: ма — этö му, участок, владеннё, страна. А мый лоö пар? Конечно, эстöн не öння пар — рудзöг му, а мыйкö мöдiк. И эта мöдiкыс, видно, öткодь значеннёа паркатша, парматег, партшак кыввезiсь пар торкöт. А эна кыввезын сiя мыччалö противоположнöй признак сэтшöм понятиеэзлö, кыдз гортся, тöдса: паркатша — этö катша кодь кай, кöда оз ов деревняын; парматег — не обыкновеннöй матег, а вöр турун, кöдаись шогмö быг; партшак — не сёян тшак, а кульбук.

Учёнöйез эз на висьталö ассиныс кыв, кыдз аркмис Пермь Великая лöн нимыс, эз на исследуйтö, эм я мыйкö öткодьыс Перем да Парма ниммезын. А нiя эд, натьтö, кöркö вöлiсö öткодь значеннёа кыввез, а может, и öтiк кыв. Öнi тай пöрись морттэс сё эшö шуöны Перем городсö Перма. А ежели пар да пер öткодьöсь, дак сэк и кокнитжык лоö адззыны пар кывлiсь вежöртассö.

Быдöнным мийö кывлiм Пера-богатырь йылiсь преданнёэз, кöднаын висьтассьö, кыдз Пера отсавлöма аслас увтырлö да и быдöс коми отирлö, кыдз сiя вöтлöма аслас му вылiсь вöрисьöс да ваисьöс и отирлiсь мöдiк лёк враггезöс.

Мукöд легендаэс Пера сö мыччалöны не кыдз простöй богатырьöс, а кыдз енöс: Пера босьтö ас саяс Зараньöс, енлiсь нылöс, сiя оз пов еныслiсь, кутчисьö сыкöт вермасьны.

Енкöт сiйö öтлаöтö эшö öтiк тор: сiйö шуöны то Пераöн, то Пеля öн, то Пер öн. А Пель, Пеля, Войпель — этö коми народлöн языческöй ен. Ме думайта, что и пельнянь аркмис эта Пель енсянь, и сiйö колö вежöртны не кыдз пель формаа нянь, а кыдз Пель лöн нето Пер лöн нянь (Архангельскöй областись олiссез, видно, кöркöся комиэз, пельняньсö шуöны пернянь). Этадз, натьтö, кöркö шувлiсö не только пельнянь, но и мöдiк сёян, кöдö пуктывлiсö Пель енлö, кöда дорö касьтывлiсö кулöммесö.

Эта бöрсянь лоасö вежöртанажыкöсь и паркатша, и парматег, и партшак кыввезлöн значеннёэзныс — быдöс нiя енлöнöсь.

Быдöс эта басниись позьö керны сэтшöм вывод: Парма да Перем топониммезын кылö важся религиялöн отголосок, и нылöн нимныс лоö Пар, Пер енлöн му, владеннё, страна.

Вежайка шорлöн нимыс, кыдз ме висьталi, аркмöма вежа кылiсь, кöда лоö святöй либо яна, торья. Но позьö сiйö петкöтны и мöдiк значеннёа веж кылiсь: косинсалöн да гайнсалöн веж — этö тöвся кыйсян места, кытчö тэчöны сьöла пезиннэз. Эта веж кылiсь, тыдалö, аркмисö и Вежашор да Гайна бокись Вежаты лöн ниммез.

Эстöн жö колас висьтавны и мöд тыэс йылiсь. Гайнскöй районас нiя неетша, но унажыкыслöн ниммезныс тöдтöмöсь: Нахты, Вахты, Адты да мöдiккез.

Адты йылiсь висьтасьöны то мый.

Уна чери йылö Адты ас, да чисто гырисься-гырись. А эта чери царствоöн юралö не вакуль, а щука. Оз жалейт сiя черисö, кöть кинлö сетö кыйны, но каждöйлiсь сыбöрын босьтö то кулöм, то пыж, а если чериалiсьлöн сьöрас эм пон нето челядь, мырддьö и нiйö. Сысянь и ним сылö — Адты. А былись-ту Адты лöн нимыс шогмöма вад коми кылiсь, а вад — этö ты.

Вахты, ме думайта, аркмис лахта финскöй кылiсь — сiдз финнэс шуöны нюр, зыбун. Да и мöдыс — Нахты — сы кодь жö. Ог вермы нем висьтавны Такты, Кумысты, Койпыты тыэз йылiсь.

Косинскöй районiсь ме тöда Мараты, Кибанты, Лешаты, Пыдöстöмты, Пупиаты. Медбöрья тыыслöн нимыс или дзугöм коми кыв пипуа, или жö мансийскöй пупи — идол.

Эм öтiк шор, кöдалöн нимыс вачкисьö зоночка ним вылö — Юркавож. Но сiя, конечно, не морт ним, а мыйкö мöдiк. Может, эта нимын олö финскöй кыв юрка — йир. Ежели сiдз, то Юркавож — йира приток.

Стариннöй посад Ныроб лöн нимыс, шуöны, аркмöма ныр да ыб коми кыввезiсь. А документтэзын виллезас и важжезас сiйö гижöны Ныроб. И юыс, кöда дорын сулалö эта посадыс, тожö эд Ныроб, а васö, кöть тiйö кыдз думайтö, а ме бы ыбнас эг шу. Важ отирыс эд тожö сэтшöмсö вежöртiсö — васö да мусö эз соравлö. Эстöн, видно, не ыб, а об, кöда, может, кытшöмкö кыв вылын лоö юок, шор.

Сiдз жö колö висьтавны и соликамскöй Нылоб деревня ним йылiсь.

Кытшöм жö вывод позьö керны менам висьтасьöмись? Öткö, мийö мымдакö тöдсасим топонимика наукакöт; мöдкö, унажык пондiм тöдны асланым крайись географическöй ниммез и, куимöткö, казялiм, что миян ниммес шогмöмась не только коми кыввезiсь. Сiдзкö, мийö тöдiм эшö öтiктор: öння Коми му вылын важся каддэзö овлöмась быдкодь отир. Ны коласiсь век кежö татчö кольччöмась и комисялöмась татара, башкиррез, чувашшез, манси, ханты, кеттэз, балтийскöй йöз — финскöй племяэз да кареллэз, вепссэз да мöдiк. И нiя олöмась паськыта.

Мöдiккез сьöртi медуна кольöмась миянлö ассиныс ниммезнысö татара да башкиррез. И эталö оз ков дивуйтчыны: нiя татöн вöлiсö пырся кортöм и корöм гöссез, а сэсся и пырся олiссез. Кудымкар деревняын, например, 1623 годö ни олiсö тюркскöй ниммеза отир: Сидорко Шан Булатов, Ивашко Колупай пиян, Фетка Кынсай пиян, Овдокимко Хозяш пиян, Фетка Нагаев, Офонко Шибаев, Фетка Алтин. 1579 годö сэтöн жö олöмась Ивашко Лязга да сылöн зон Паршук, Рака да Чаз Дмитриеввез, Илейка Обаев Даныр, Утка Ивашко (Утка — Уть нимись).

Но вот и быдöс, мый ме верми висьтавны Парма ниммез йылiсь. Ог тöд, кужи я висьтавны, кыдз мöдi. А думайтi висьтавны сiдз, медбы каждöйлöн, кин лыддьöтас, öзйыштiс интерес топонимика дынö, кöда, кыдз и быд наука, отсалö миянлö овны. Меным лоас öддьöн долыт, ежели менам висьтасьöмö мыйöнкö отсалас отирлö.

Дата добавления: 2015-11-16