Миян фамиллёэз

(< Иньва. Кудымкар, 1987)

Кыдзкö Чердыньын ме пантаси Яборов фамиллёа морткöт. Сiя висьтасис, что Пеля богатырь лöн керöс вылын вöлöма мыйкö вичку кодь, кытчö сiя лэдзавлöма только ассис увтырсö. Ме юалi:

— А кин увтырись Пеля ыс вöлöма?

— Чучкан родiсь, шуöны. Сысянь и пермяккез шогмöмась, — висьталiс сiя.

— Тэ, натьтö, сiя жö увтырись.

— Мыля тэ сiдз думайтан?

— Сiдз тшöктö фамиллёыт: сiя Ябыр — языческöй нимись аркмöма, коми-пермяцкöй кылiсь.

— Эта не сiдз. Миян фамиллёным вöлöма Ярборов, да перепись коста дзугöмась. Ярбор — этö Яркий бор...

Не öтмоз асланыс фамиллё йылiсь баитöны и Ратегов вез: «Ратег — эта лоö ратник. Деддэзным кöркö рать ö (войскоö) ветлöмась, вöт и ратниккез»; «Миян родным абу кужöм матькисьны, сё рать пö да рать. Сiйöн и шуöмась — Ратегов вез».

Этаö оз туй веритны. А то эттшöмыслö — позьö ни: «Миян лöпным — Ратег сянь лоö».

Строгановскöй муэз гижан книгаын, кöдö керис 1579 годö Яхонтов писчик, лыддьöтам: «Починок Быхов на реке на Иньве, а в нем Фетка Степанов сын Ратегов...» Эта лоö: Ратег увтырись Степан пиян Федька. Сiдзкö, былись вöвлöма Ратег нима морт, мыйсянь петiс и Ратегов фамиллё.

Коми-пермяккеслöн -ег суффикса фамиллёэс пантасьлöны часто. То нiя: Гачегов, Волегов, Кочегов, Чажегов, Ужегов, Лунегов, Седегов, Отегов, Кузегов, Категов да мöдiккез. Эттшöм фамиллёа йöзыс асьнысö лыддьöны тожö роччезöн, только пö нiя комисялöмась. Но историческöй факттэс баитöны мöднёж.

Прикамьеись муэз гижан книгаын, кöдö керис 1623-1624 годдэзö Кайсаров писчик ёрттэзнас, гижöма: «Погост Искор на роднике на Чёрном ручью, а на погосте же крестьянских дворов... Олёшка Савельев сын Унегов...» А важ Искарас пыр овлöмась комиэз, сiдзкö, Унегов вес, натьтö, коми вужись улок.

Кöркöся коми йöзлöн вöвлöма гачег кыв — сiдз шусьöма бобр (мöдiк диалекттэзын — мой, мöй) и сэтiсь, тыдалö, аркмöм Гачег ним, а сыбöрын и фамиллё да топониммез (Ильинскöй районын эм Гачеги деревня, Косинскöйын — Гачега ыб да Гачег пальник). Комиэс тöдлöмась и кочег кыв, мый лоö — асныр; бытшкöм, лыйöм (висян).

Кочёвскöй Мошегов вез висьталöны, что нылöн фамиллёыс шогмис мöс шег кыввезiсь, но сiя, натьтö, аркмис мош (муш) кыввезiсь нето мансийскöй мось кылiсь (родлöн ним).

Яхонтов списокын гижöма: «Слоботка Кишконогова на речке на роднике, а в ней... Ивашка Романов сын Мосегов, Пьянко Мосегов»; «Починок Ужегов на реке на Иньве, а в нем Сидорко Ужегов ...»; «Погост Обва, а в нем дворы... Никулка Идегов, Тришка Тунегов»; Кайсаровлöн: «Погост Коса, Ныров тож, а дворы погорели от молнии... Сенки Седогова, Микитки Шадогова...»; «Деревня Юсма на ключе, а в ней Игнашко Леонтьев сын Низнегов».

Строгановскöй вотчинаэзын олöмась Иртеговвез, Унеговвез, Нылоговвез, Дунеговвез, Ожеговвез, Лунеговвез да мукöд. Эттшöм ним-фамиллёнас шусисö, тыдалö, и коми, и удмурттэз, и ханты да манси. Эна фамиллёэс öддьöн важöсь, нiя шогмöмась эшö сэк, кöр пермскöй да угорскöй йöзыс олöмась öтлаын, и талун учёнöйеслö сьöкыт висьтавны, кыдз сэтшöм фамиллёэс аркмисö.

Пантасьлöны и мöдiк чукöрись фамиллёэз, кöдналöн вежöртасыс сiдзжö абу ятнöй. Ме, например, уна кад öштi сы понда, медбы тöдны, кыдз шогмисö Кучевасов, Сюркаев, Тудвасев да мöдiк фамиллёэз.

Öнi видзöтам, кытшöм фамиллёа коми-пермяккез олöны Прикамьеын.

Бажин — вермис шогмыны баж коми кылiсь, мый лоö — волькыт оськöла морт; Бажен роч нимись, а сiя — бажить (бура радейтны, дзик енöс) кылiсь.

Базуев — Баз языческöй нимись, Базуй нимкодись (шатласись).

Бормотов (Бормонтов, Бурматов) — Бурмат воевода овлöма Пермь Великаяын. Бурматов вез öнi комиöн оз баитö, асьнысö лыддьöны роччезöн.

Боталов (Баталов) — Баттал тюркскöй нимись. Сэтшöммес эмöсь Башкирияын, Татарияын, Киргизияын.

Ботев — может, боть (ва воть) коми диалектнöй кылiсь. Эм славянскöй фамиллё.

Батуев — Бату, Бато тюркскöй нимись.

Бачев — Бач, Бачо нимись. Сэтшöммесö сетавлöмась манси, ханты да удмурттэз.

Башарин — Башар тюркскöй нимись.

Бахматов — Бахмат нимкодись. Татара сiдз шувлöмась вöв порода.

Баяндин — Баянда, Баяндей тюркскöй нето угорскöй йöз нимись. XVII векö Кама дорын олöма Боендин нима морт.

Габов — вермис аркмыны Габ, Габö (Гаврил) нимись, кыдз комиэзлöн Габö да удмурттэзлöн Габей, Габы, нето каб кылiсь (кöркö г да к, кöр нысянь пондöтчö кылыс, вежласисö).

Гаинцев — Гайнаись морт; Гайна нима посёлоккез эмöсь Башкирияын, Киргизияын. Гайна — этноним (отирлöн, племялöн ним). Нiя öнi удмурттэз, а одзжык вöвлöм тюркскöй кыла йöз.

Гагарин — Гагара (сералiсь) роч нимись. Этö фамиллёсö сетлiсö пермяккезлö, кöдна вöлiсö Гагарин князьлöн крепостнöйезöн.

Гилёв — Гиль языческöй нимись (гиль, гильыт, гильзьыны кыввезiсь). Роч диалекттэзын гиль — сьöдкай.

Гойнов — Гойно (ур поз) роч нимкодись. Гойнов вес татчö локтiсö рытвыв муэзiсь да и комисялiсö. Калининскöй областьын, например, эм, Гойново посад.

Гордеев — вермис шогмыны кыкнёж: Горда языческöй нимись (утка кряква); Гордей христианскöй нимись, а сiя — Гордиас греческöй нимись.

Долдин — долда (уна басниа) роч кылiсь нето Долду тюркскöй нимись.

Жаков — Жак (кеньжак, сойка) языческöй нимись.

Жунёв — Жунь(жаг, дышöв) нето Жонь языческöй ниммезiсь.

Зеров — Зэр нето Зöр языческöй ниммезiсь.

Зонов — Зон языческöй нимись.

Зюлёв — натьтö, Дзуль языческöй нимись.

Зуев — Зуй (витульган, бекас) языческöй нимись.

З юльганов — Дзульган (дзольган, дзульзян) языческöй нимись.

Иванчин — татаралöн Иванчин нимись.

Исаев — Исай (язьпиян, сынпиян) языческöй нимись; Исаия (древнееврейскöй Иеса Ях — Яхвелö отсöт) нимись, кöда локтiс комиэс дынö христианство пыр.

Исаков — Исак (юрсигусь) языческöй нимись; Исаак (древнееврейскöй Иисаак — сiя пондас серавны) нимись.

Ичетовкин — Ичетов языческöй нимись, кыдз висьталöны зюздинскöй пермяккез, учöт, учöтöв кыввез.

Караваев — натьтö, Каравай роч нимкодись нето Карабай тюркскöй нимись (кара бай — сьöд бай).

Катаев — Китай (Катай) родлöн нимись, а эта родыс — тюркскöй кыла отирлöн. Кочёвскöй районын эм Китай лöп (китай увтыр, род).

Кетов — натьтö, кет этнонимись. Кеттэс овлöмась Сибирьын, öнi нiя сорласьöмась мöдiк отиркöт.

Кивилёв — натьтö, Кивыль нимкодись; кивыльтны — бергавны, öвтны бöжöн.

Кайсаров — натьтö, тюркскöй Кайсар нимись. Вермис аркмыны Кайсар (кай царь) нимкодись.

Калин — может, каля (чайка) коми неылiсь нето Калистрат нимись. Греческöй каллос — басöк да стратос — войско.

Канёв — Кань языческöй нимись. Кочёвскöй районын, тыдалö, вöвлöм ыджыт увтыр — Кань, Канёвчи лöп.

Кокшаров — кокшар (кокдзуль, дзулля) кыввезiсь. Кошкар (кöин) чувашскöй нимись.

Колыхматов — Колохмат чувашскöйись.

Котчуров, Кочуров — натьтö, Кöчьюр языческöй нимись. 1623 годö Кама дорын олöма Овдошко Кочюров.

Кочев — Кöч языческöй нимись; Коч, Кочев тюркскöй ниммезiсь.

Кудымов — натьтö, угорскöй отир кылiсь. Древнетюркскöй кылын эм кудын кыв да и Кудин ним (кудын — гöсь).

Куимов — натьтö, Куим языческöй нимись.

Кучев — Кутш (орёл) языческöй нимись.

Кучевасов — натьтö, Кувчимас коми нимкодись (кувчимасьны — чегласьны). Но вачкисьö и тюркскöй нимись аркмöм фамиллё вылö.

Кыласов — Кылас нимкодись (кылас — кылöтöм, вайöтöм ваöн).

Кынкурогов — Кын курöг нимкодись.

Кышов (Кышев) — Кыш нето Кытш (круг, обруч) языческöй ниммезiсь.

Лызлов — Лызло (ыджыт мыгöра морт; дышкучик).

Маегов — натьтö, Майöг нимкодись. Но вермис аркмыны и Май языческöй нимись -öг суффиксöн.

Майбуров — Майбыр (счастливöй) языческöй нимись.

Мансуров — тюркскöй йöзлöн Мансур (Мансыр) нимись. Сэтшöммес эмöсь Башкирияын, Татарияын.

Мизёв — Мизь коми нимись. Мизь, Мизько ним комиэс сетлöмась семьяись медбöрья пиянлö.

Минин — Миня языческöй нимись (миня — галька); Михаил христианскöй нимись. Древнееврейскöй михеал — енкöт öткодь.

Мисюров — Мисюр (Мусюр, Мисюр — неыджыт керöс нимкодись).

Мичкин — натьтö, Мичко (мича, басöк) языческöй нимись.

Моёв — Мой (Мöй) языческöй нимись (мой — бобр),

Можаев — натьтö, Мож, Можай языческöй ниммезiсь, кöдна вöлiсö пермскöй кыла йöзлöн. Вачкисьö и тюркскöй ним вылö.

Мошев — Мош языческöй нимись.

Мошегов — вермис шогмыны Мош языческöй нимись. Удмуртскöй да тюркскöй кыла йöзлöн эм Мушег ним.

Мушарин (Мишарин) — натьтö, мишар этнонимись — Поволжьеын олö сэтшöм тюркскöй кыла племя.

Мысов — натьтö, Мыс нимкодись,

Надымов — Надым (Надим) нимись. Сэтшöмыс вöвлöма башкиррезлöн да мансилöн.

Нисов — может, аркмис нис, нискыны (пишкыны узикö) кылiсь.

Отинов — отин этнонимись — сiдз кöркö шувлiсö удмурттэзöс.

Ошев — Ош языческöй нимись.

Ошканов — Öшка языческöй нимись нето Ош кан нимкодись (ош царь, ош кодь).

Ошмарин — ош мари (чочком мариец) марийскöй кыввезiсь.

Оньков — Онько языческöй нимись (коми онь — пизь бус, удмурттэзлöн — некодя, вынтöм); Андрей христианскöй нимись. Греческöй андрейос — повтöм.

Онянов — натьтö, шогмис сiдз жö, кыдз и одзисьыс.

Панов — натьтö, пан (пан, пам — языческöй воевода, князь); панöв (отруби, йики) кылiсь.

Панин — вермис шогмыны пань кылiсь; Пантелеймон да мöдiк христианскöй ниммезiсь. Греческöй пантос — быдöс да элеимон — милостивöй.

Пахоруков — коми учёнöйез шуöны, что эта фамиллёыс аркмис пакö (шульга) да рукö (ки) кыввезiсь.

Порсев — Порсь языческöй нимкодись.

Пыстогов — Пистöг языческöй нимись.

Ракин — Рака языческöй нимись; Рак (Ираклий) христианскöй нимись. Греческöй Гера (ен) да клеос — слава кыввезiсь.

Ракишев — натьтö, Ракö, Ракыш языческöй нимись.

Рачёв — рач (радз) коми кылiсь (рач — котёлок, сковорода; кöвдöм; радз — решётка; ён, крепыт морт).

Рочев — роч этнонимись.

Рисков — Рыско удмуртскöй нимись нето Риска (Арис) христианскöй нимись. Греческöй Арес — война енлöн ним.

Рысев (Рисёв) — Рись да Рысь языческöй ниммезiсь (рысь — коми кылын лоö рись).

Сайкинов — вермис шогмыны сайк (ыркыт) кылiсь; Сайка (Исаия) христианскöй нимись; Сайка татарскöй нимись.

Салтанов — Султан (Салтан) тюркскöй нимись.

Селин — Сьöла языческöй нимись; Селя нимись, кöда аркмис Селиван (латинскöй сильва — вöр) нето Селиний (греческöй селене — тöлiсь) ниммезiсь,

Сизимов — натьтö, сизим кылiсь.

Сизов (Сизёв) — натьтö, Сизь (кыр) языческöй нимись.

Сырчиков — Сырчик (пичик) языческöй нимись. Удмурттэзлöн сырчик — сьöдкай.

Сыстеров (Систеров, Шистеров) — может, Сiсь тер (сiсь кер) языческöй нимкодись нето сыста (шышыбар, порськок) кылiсь.

Сюзев — Сюзь языческöй нимись (зюздинскöй пермяккез сюзьнас шуöны и тупкаöс).

Сюркаев — эта вачкисьö тюркскöй ним вылö, но вермис аркмыны и Сюра кай (сiдз шуöны, тыдалö, нюрбаранöс нето мöдiк кайöс, кöдалöн эм сорс) или Сюр Кай, мый лоö Сюр пиян Кай, нимкоддезiсь.

Таскаев — Таскай тюркскöй нимись, кытшöмöсь эмöсь башкиррезлöн да алтаеццезлöн.

Тебеньков — натьтö, Тебень (асныр) нимкодись нето тебеник коми кылiсь (тебеник — капканiсь кöртовöй дужка).

Тиунов — тиун роч кылiсь, мый лоö — царьлöн наместник, управитель.

Тудвасев — Тудвöс языческöй нимись (тудвöс — шатин, кузь пыкöт, кöдöн отсалöны пöрöтны пу). Вермис лоны и тудва (тулысöн ыждöм ва) удмуртскöй кылiсь.

Туркин — Турко удмуртскöй нимись (тур — тар); туркий (чож) роч кылiсь.

Турышев (Турушев) — турыш коми кылiсь — сiдз шусьö вöралiсьлöн чомок, тшамья, кладовушка.

Тунёв — тун (тöдiсь, колдун) коми кылiсь.

Ташкинов — ташка кылiсь. Удорскöй комиэз этадз шуöны: мошка чукöр; котома.

Тютюков — Тютю (сили) нето Тютюк (вамöм; код) удмуртскöй нимкоддезiсь.

Утев ― Уть языческöй нимись (уть — видчöм, зык; перыта свигнитöм).

Хозяшев — Хозяш тюркскöй нимись.

Хорошев — кöрыш коми кылiсь нето Корыш (Кореш) марийскöй нимись.

Цыбин — вермис шогмыны Дзиб (пыд вöр) языческöй нимись. Удмурттэзлöн вöлöма Чибинь (ном) ним.

Чедов — Чед языческöй нимись (чöд — сьöдъягöд).

Черанёв — Чер ань языческöй нимкодись.

Четин — натьтö, чита (чильдöм) кылiсь нето Чет (Чета) тюркскöй нимись.

Чагин — чаг нето чага кыввезiсь.

Чазёв (Чазов) — Чаз языческöй нимись (чаз — гырись пизь, высевки; чорыт).

Чакилев — Тшакыль языческöй нимись нето чакиль (чангыля) кылiсь.

Чугаев — Чугай (Чугуй) тюркскöй ниммезiсь (чугай — гуня, поньток). Зюздинскöй Чугаев вез асьнысö лыддьöны Кыстым увтырись (башкиррезлöн род).

Чугайнов — натьтö, Чугай нимись жö.

Шайдыров (Шайдуров) — Шайдыр тюркскöй нимись (Шай одыр — шай пиян).

Шаньшеров — натьтö, шаньшöр (бур, бытшöм пытшка, бытшöм шöра, кыдз сьöлöмшöр) коми кылiсь.

Шаров — может, шар (ыджыт, гырись; неволькыт) коми-пермяцкöй кылiсь.

Шляков — Шляка (слякоть) нимкодись. Роч шляка — бабка, орсан лы.

Шырпужев — Шырпыж языческöй нимись. Коми-пермяккес босьтöмась удмурттэзлiсь шырбыж, мый лоö ны моз шыр бöж, и сэтiсь керöмась вежöртанажык шырпыж (подорожник).

Щуков — может, тшук (коми — öддьöн перыт, удмуртскöй — асыв кылiсь).

Югов — Юг языческöй нимись (юг — вирдыштöм, чардби). Часто пантасьлö удмурттэзлöн важ ниммезын.

Юков — Юк языческöй нимись.

Юшков — Юк, Юшко языческöй ниммезiсь нето Ефим христианскöй нимись. Греческöй эвфемос — священнöй.

Юркин ― Юр (Юрко) языческöй нимись; юркин роч кылiсь; Юрий (Георгий) христианскöй нимись. Греческöй георгос — му уджалiсь.

Юсев — Юсь языческöй нимись.

Яборов (Ябуров) — Ябыр (сьöдкай) языческöй нимись.

Ярусов — Ярус нимись — сэтшöммес эмöсь мариеццезлöн да чувашшезлöн.

Коми-пермяккезлöн öння ниммес шогмöмась не только коми кыввезiсь, сiдз кыдз ны коласын эмöсь и комисялöм роччез, удмурттэз, башкиррез, татара, ханты, манси да мöдiк отир. Роч отирлöн важ ниммезiсь да нимкоддезiсь аркмöмась

Анфалов (Новгородын овлöма Анфал воевода), Вилесов (роч язычниккезлöн вöлöма Велес ен), Галкин (галка ― чавкан), Голев (голь), Зубов, Зубков (зуб, зубок), Истомин (истома), Канюков (канюк), Мехоношин (мехонос — мешöк новйöтiсь), Радостев (Радогост, Радость ниммезiсь), Распопов (распопа, распоп — вöвлöм поп), Трубинов (труба), Утробин (утроба), Хромцов (хромец), Щербинин (щерба, щербина), Ярков (ярый, яркий) да уна мöдiккез, нiя не öтiк десяток.

Места ниммезiсь аркмöмась

Казанцев (Казанись), Тотьмянин (Тотьмаись), Сысолетин (Сысола ю дорись), Суранов (Сура ю дорись), Лузаков (Луза ю дорись), Усольцев (Усольеись), Устюжанцев (Устюгись).

Сэтшöм фамиллёа отир, кыдз Маленьких, Моисеевских, Белых, — тожö мöдiклаись локтöм отир: нiя сибиряккез. А сэтчин олiссез — Пуртов вез, Юрин нэз, Ярков вез — натьтö, мунöм пермяккез.

Важся веккезö татчö локтöмась да комисялöмась быдкодь роч кыла мастеррез, кöдна профессия сьöртi шогмöмась то эна фамиллёэс: Кузнецов, Плотников, Швецов, Котельников, Сальников, Мясников, Сапожников, Рогожников, Коновалов, Попов, Пономарёв, Трапезников, Пастухов, Сторожев.

А эна мыччалöны ассиныс кöркöся национальность: Вогулкин (вогул ― манси), Д олганов (долган), но вермис шогмыны и долгий роч кылiсь, Зырянов (зырянин), Казаринов (хозарин), Отинов (отин — удмурт), Пермяков (пермяк), Остяков (остяк — ханты), Черемисин (черемис — мари), Югринов (югранас шуöны угорскöй отирöс — ханты да мансиöс).

Берся нимись да нимкодись чужöмась мöдiк коми-пермяцкöй фамиллёэз: Андров, Батин, Башарин, Будрин, Голигин, Гомзяков, Дровнев, Дровняшин, Крохалев, Лопатин, Лунёв, Мазеин, Миков, Мырзин, Носков, Патрушев, Порошин, Першин, Тетерлев, Тетюев, Тутынин, Харин да уна мöдiккез.

Комиэзлöн неетша фамиллё аркмöма христианскöй ниммезiсь, а нiя, кыдз висьталöны справочниккез, латинскöй, греческöй, арабскöй да древнееврейскöй кыввезiсь.

Аксёнов — Аксён (книжнöйыс — Авксентий) нимись. Греч. авксано ― быдма.

Вавилин — Вавила арабскöй нимись.

Денисов — Денис нимись. Греч. Дионус — енлöн ним.

Зотев — Зотя (Изот) нимись. Греч. зотикос — олан сетiсь.

Климов — Клим (Климент) нимись. Греч. клеменс — милостивöй.

Кольчурин — Кольчура (Николай) нимись. Греч. нике — победа и лаос — отир.

Лунёв — Луня (Лука) нимись. Лат. лукс — югыт, свет.

Коньшин — Коньша (Кондратий) нимись. Греч. Кондратос нимись, а сiя шогмöма лат. квадратус кылiсь.

Мартюшев — Мартюш (Мартин, Мартемьян) нимись. Греч. мартюс — свидетель; лат. Мартиус — воинственнöй.

Мелехин (Мелюхин) — Мелеха, Мелюха (Мелентий) нимись. Греч. мелете — забота.

Меркучев (Меркушев) — Меркуша (Меркурий) нимись. Лат. мерк — товар, Меркурий — торговля сьöртi ен.

Митюков, Митюшкин — Дмитрий нимись. Греч. Деметра — мууджалöм сьöртi ен.

Пальшин — натьтö, Пальша (Павел) нимись. Лат. паулус — учöтик.

Полуянов — Полуян (Полиен) нимись. Греч. полю — уна да айне — ошкöм.

Попов — аркмис не только поп кылiсь, но и Поп, Полан ниммезiсь, кöдна вермисö лоны Феофан нимись. Греч. феос — ен и фаино — мыччала, казяла.

Трошев — Трош (Трофим) нимись. Греч. трофимос — вердiсь.

Фадеев — Фаддей нимись. Древнеевр. Фадде нимись.

Федосеев — Федосей (Феодосий) нимись. Греч. феос — ен да досис — козин кыввезiсь.

Яковкин (Яговкин) — Яковка (Яков) нимись. Древнеевр. Ягоб нимись.

Энася эмöсь и мöдiкöсь, кöднö ме ог тöд нето кöдна бура вежöртанаöсь, и нiйö оз ков бöрйыны. И конечно, не быдöнныслiсь точнöя осьтi вежöртаснысö, сiдз кыдз комиэзлöн (зыряналöн да пермяккеслöн) дасся унажык диалект, кöдаын мукöд кылыслöн не öтiк вежöртас. Сiйöн и кытшöмкö говорын мортлöн нимыс лоöма басöк кылiсь, а сiя жö нимыс мöдiкын — нёштöм, видчан, шусян кыв. Сэтшöмöсь миян и фамиллёэзным, да мый сэтöн керан? Нiйö ми асьным эг бöрйö, кыдз эг бöрйö аймамнымöс да гортнымöс.

Дата добавления: 2015-11-16