Мортас пöртöны зыбка дорсянь

(Миян шог, 1990)

Быд годö статистика юöртö сы йылiсь, мымда чукöртöма сёян да машина, ольсалöма асфальт, кыным специалистöс велöтöма. Но эг на кывлö сы йылiсь, кыным бур мортöс воспитайтöма годнас — этö оз позь лыддьыны.

А ежели сибöтчыны мöд ладорсянь — кыным умöль мортöс воспитайтiм годнас?

Этö мымдакö позьö. Мымдакö — сiдз кыдз и ыджыт гласностя кадыс сё эшö оз висьтась öмтыр голосöн, а только шушкöтчö, и сiйö кылö не быд мортыс.

Умöльыс йылiсь уна висьталö сэтшöм фактор, кыдз преступность. И сiя годiсь годö страна пасьта тöдчöмöн ыждö, и 1989 год эта сьöртi лоис рекорднöйöн.

Миян партия да правительство уна вын пуктöны сы понда, медбы бурсьöтны уджалiсь йöзлiсь олансö быд ладорсянь, медбы ыждöтны демократия, сетны мортлö колана право, небзьöтны чорыт законнэз. Эта йылiсь миянлö висьталöны медбöрья выборрез, Верховнöй Советлöн удж, экономикаын вежсьöммез. Эта йылiсь баитö и сiя, что бöрья кык годö лагеррезiсь да колонияэзiсь срок чулавтöдз петiсö джын миллионся унажык пукалiсь. Тшöтш этакöт чинiс и МВД-лöн штат. Но дыр я пондасö пустуйтны лагеррес, ежели преступностьыс оз чин?

Сiдз, тыдалö, сiя и эм: природаыс пустотасö оз радейт.

Миян Пармаын, кöдö мийö пыр лыддим областись лöньжык да рамжык пельöсокöн, преступностьыс сiдзжö содö. И мед ни умöль сiя, что содö лыдыс учöт преступниккезлöн-челядьлöн. Сё частожык миянлö кывсьö дасгодся воришкоэз, хулиганнэз, наркоманнэз йылiсь, машина гусялiссез да грабителлез йылiсь. И умöль делосö керöны не öткöн, а чукöрöн.

Быдтыны мортöс — сьöкыт удж, сы понда колö уна мыла, уна кад.

Быдтыны бур мортöс — куимись сьöкытжык. Но кытшöм бы сьöкыт эз вöв, а этö колö керны. Керны аслыным, а не надейтчыны «варяг» вылö, кöда кöркö керис порядоксö Русьлö. Керны аймамлö, школалö, колхозлö, заводлö. Керны сы понда, медбы сыбöрын эг ойзö, эг кисьтö синва, а быдöнным олiм бытшöмика.

Ясли, садик, школа да вуз тöдöны, кыдз колö дозирайтны-велöтны челядьсö. Государство эта понда быдöс сетö. А бытшöм воспитаннёыс, кытшöмö видзчисям, тöдчö не пыр и не быдлаын.

Дак мыля сiдз петö?

Öтiк кылöн, öтiк примерöн сiйö он висьтав. Но быдыс тöдö, что дона чача да паськöм-кöмкöт, виль квартира да пöт олан бур воспитание понда эшö не быдöс, И кöть кытшöм ни бур программа да методика öтнаныс тожö етша керасö.

Бур мортсö вермас быдтыны только бур сьöлöма-лола аймам, дед-баб да велöтiсь. А мустöм велöтiсьлöн и велöтчисьыс лоас мустöм. Мöднёж шуны — мый кöдзан, сiйö и вундан.

А миян велöтан ыб вылын эм берся ёгтуруныс, сiдз кыдз кöдзикас — тэрмасям, быдтiкас — эшö öддьöнжык, нельки ог и видзöтлö, мый быдмö. Миянлö колö, медбы аркмис, кыдз сказкаын: макнитiн косаöн — турун ольсассис, гуддьыштiн куранöн да вилаöн — и сувтiсö зороддэз, дзик деревняын керкуэз. Сьылам тай: «Ми чужтöмöсь, мед сказка пöртны быльö...»

Мийö шупыта керам комбайннэз, книгаэз, атомнöй электростанцияэз. Сiдз страна тыртiс пятилеткаэз, тэрмасьöмöн камгис-дорис социализм. Сiдз талун гымöтö-пизьö перестройка. Только бюрократизм оз тэрмась. Сiя, топ айсберг, уйö паныт перестройкалö, кöдалöн часто гыэс-законнэс люкасьöны эта керöс бердö да жугалöны нето паджсьöны.

Но мийö не öддьöн тэрмасям сöстöмтны да бурсьöтны отирлiсь сьöлöммез — лэбтыны мортлiсь нравственность: эта уджыс пö керöма ни. Сiйöн и öнöдз ошшасям: советскöй йöз — му вылас медграмотнöй, медгуманнöй, меддружнöй.

Дыр миянöс вердiсö идъя-зöрья правдаöн. Бöбöтлiсö сэтчöдз, что мийö эг пондö тöдны, кöда ен, кöда куль, и некинлö эг пондö веритны. А вератöг ылöдз я мунан, мымда керан? И жмитчис сьöлöмным, чорзис ловным. Сайкалiс и тöвзис совестьным, а мукöдыслöн нач косьмис. А ловтöм-совестьтöмыс — дзик сартас пес: кöть кыдз шуляв, сылö сё бур...

Ме быдми мöдкодь, вежöражык кадö, кöр деревняын эз на вöв радио да кино, но быд посадын вöлi вичку нето часовня, вöлi порядочнöй хозяин — Совет. И вöлi ыджыт семья — деда-баба, ая-мама, уна челядя. Эта семьяын быд мортлöн вöлi удж: старик, кöда эз ни вермы кайны ыб вылö, кыйö нинкöм, керö рос да öр, гöрдззö сак да морда, висьтасьö сказкаэз; старуха лöсьöтö-вочö паськöм, пусьö да пöжасьö, дозирайтö челядьöс, карч да пода. Нельки дасгодся пи оз ов уджтöг.

Семьяыс да уджыс деревняас вöлi медодзза велöтiсь. Нiя мортыслö учöтсянь мыччалiсö, кытшöм донöн шедö нянь да ырöш, дöнзьö шоныт паськöм да керку, кöдöрсянь мыччисьö гаж, кысянь уськöтчö нужда.

Дед да баб асланыс олöмöн, йöз приметаöн да обычайöн зорöтiсö челядьлiсь ловсö, басöксьöтiсö сiйö прибауткаöн да сьыланкылöн, берсянас велöтiсö радейтны мортöс да быдöс ловьясö и неловьясö, кöда эм мортыс гöгöрын.

Удж да семья учöт мортлö отсалiсö вежöртны, мый лоö бур, а мый — умöль, велöтiсö ыждöтны бурсö да кидтыны ас дынiсь умöльсö.

Этаын бытшöма отсалiсö и вичкулöн заповеддез, библейскöй притчаэз, кöднö сэк деревня эшö бура тöдлiс. Челядьлiсь вежöрсö бурсьöтiс и небытик шатёк.

Мöдöдз бытшöм велöтiсьöн вöлi, конечно, школа. Сiя вынсьöтiс мечталiсь борддэз, петкöтiс горт деревня сайö и мыччалiс бур оланлань веськытжык туй. Мыччалiс кылöн, книгаöн, велöтiсь примерöн. Велöтiсьсö мукöдпыр вежлiс Овдя тётка, сторожиха. Кöть и сылöн вöлi мöдкодь велöтан методика, но сiдзжö неумöль. Медбур «нагляднöй пособиеöн» сы воспитательнöй уджын вöвлi шать, кöда олiс ыбöс юр вевдöрын. Сы вылö мыччавтöн Овдя тётка казьмöтлiс некывзiссеслö: «Видзöтлö эта вылö, сiя бура швычкö!»

Мийö пыр шатьсö видзим тöдвылын, а судзöтны эг пондылö.

Сiя кадö морт олiс беднöя: пасьтасис, кыдз шедас, не быд гожумöдз тырмывлiс нянь, не пыр вöвлi керосин, и рытйывлiм сартас дырни, но оланыс вöлi кыдз бы югытжык, мичажык, а мортыс простöйжык, добрöйжык.

А нравственность ладорсянь деревенсалö медодзза примерöн вöлi велöтiсь. Сыкöт лыддисис быд мортыс, сiя деревняыслöн вöлi совесть.

Сэтшöмöн ме лыддя ассим медодзза велöтiсьöс — Иван Иванович Фирсовöс, кöда дынын учöтнас пондылöма велöтчыны и айö. Сэтшöмöн менам сьöлöмын кольччис сылöн зон-быдтас — Сергей Ильич Зубов, сiдзжö велöтiсь да общественнöй деятель.

Нiя кыкнанныс ёна сулалiсö коми йöз дор да асьнысö жалейттöг отсалiсö горт мулö. Эта понда öтыслö страна сетiс Ленин орден да бытшöм слава, а мöдсö шуис отирлöн врагöн да сюйыштiс каторгаö. Но не лагерьыс, не лагерь бöрся ссылкаыс эз пöдтö Сергей Ильичлiсь ловсö: сiя гортö бертiс сöстöм сьöлöма мортöн, отирсö радейтiсьöн да ештiс кок йылö сувтöтны Пешнигортскöй колхоз, сэсся уджалiс горт школаын. Да и сыбöрын, кöр петiс пенсия вылö, эшö вель дыр уджалiс. И не деньга понда — сiдз тшöктiс совесть да коммунистлöн долг.

Эз вöв кокнитжык олан туйыс Савватий Фёдорович Зубовлöн, менам кöркöся соседлöн. Быдмис крестьянскöй семьяын, учöтсянь пондiс тöдны черсö да гöрсö. Горт школа кончитöм бöрын И. И. Фирсов отсöтöн велöтчис одзлань, лоис велöтiсьöн, уджалiс издательствоын, нуöтiс ыджыт общественнöй удж и дзирыта, сьöлöмсянь, старайтчис лэбтыны коми йöзлiсь культура.

Эна морттэс эз чуклясьö не сёрниöн, не оланöн, эз сайласьö йöз спина сайын, мортыс чужöмö видзöтiсö веськыта. Нiя, юралiссез да туйдiссез, эз пуктö асьнысö простöй мортся ыджытжыкöн да буржыкöн, эз нимкодясьö, а тöдiсö мортлiсь ним да айним. И, конечно, йöзыс тöдвылын кольччисö кыдз бур морттэз.

Эз я отсав нылöн сöстöм оланныс, горт понда тöждöмыс томжык поколеннёлö лоны ны кодьöмöн жö, а мукöдыслö — керны подвиг? То тай Пешнигортсис петiсö куим Герой, учёнöйез, чемпионнэз.

А кытшöм талуння велöтiсьыс, кöдасянь челядьлö и ыджыт мортлö колö босьтны примерсö?

Сiя öддьöн грамотнöй, специалист. Тöдö, мыйö и кыдз велöтны том отирöс. Но не сымда, кыдз кöркöся велöтiсь, радейтö ассис уджсö, оз пукты сэтчö джын ловсö. И йöзыс öнi не сiдз бура донтö велöтiсьлiсь уджсö, но ассис уна грех кышалö сы вылö, ежели том морт петiс школаись дышкучикöн, аснырöн, нечулимöн, нач оз кывзы аймамсö, а тöдвылас пыр видзö ыджыт скоростя «лешегон» да рок-музыка.

Бура я радейтö челядьыс талуння велöтiсьсö?

Не сiдз, кыдз вöлi джын векöн одзжык. Эта йылiсь баитöны уна факттэз. Öтiлаын и мöдiлаын позьö кывны, что велöтчись куштö аслас велöтiсьлiсь не только карчйöрсö, но и гусьöн пырö сы карманö, керкуö, видö сiйö нёштöм кылöн. Нёштöм кывсö талун позьö кывны быдлаись. Позьö и синöн адззыны. И частожык сэтчинiсь, кытöн овлö уна отир: автовокзалiсь, клубись, сельсовет коридорись и нельки институтскöй пызан вылiсь. А автобус сувтчанiн йылiсь нем и баитны, öткö, нiя вексö нятьöсьöсь, ёгьяöсь, туалет дукаöсь. Мöдкö, сэтiсь адззан сэтшöм рисуноккез да гижöм кыввез, кöднасянь культурнöй мортлöн юрсиыс кышöпöн сувтö. Да эд гижöм не мелöн, не карандашöн, кöдö бы позис чышкыны. Кирпич да бетон кырлалöма кöртöн, пу вундалöма пуртöн, медбы сэрпöсь кыввесö и краска эз мавт.

Кин сiйö керö, кытшöм хулиган, кытшöм вандал?

Советскöй, коми-пермяцкöй. Том, басöк паськöма, золотöй чунькытша, магнитофона, кытшöмö автобус видзчисьтöн ме адззывлi Пешнигортын, Крохалёваын, Ыджыт Кочаын, Кудымкар шöрын.

И эта лёкыс бöра жö ыждö-паськалö миян отсöтöн. Адззам: нылочкаэз ёгйöсьтöны автобус семечко кышöн — шы ог сетö; поннясьöны том отир — бытьтö ог и кылö; тöдам, кин разьö палисадник, жугдö столб вылiсь лампочкаэз, босьтö заводiсь нето колхозiсь быдöс, мый «умöля» куйлö, — чöлам: «Ась, не менам... Да и висьталан кö, ачыт мыжа кольччан». Вот и паздöны паркын лабиччез, косявлöны школьнöй книгаэз, шойна вылiсь берездöтлöны памятниккез да кресттэз.

Вандалöн мортыс лоис не öтiк лунöн, нельки не öтiк годöн. Лёк удж бердас сiя велалiс зыбка дорсянь, яслисянь.

Кöр кага жугдас чача, орöтас бабывлiсь борд, нетшкöвтас лягушалiсь кок, шуам: «Учöт эшö — мый сылiсь босьтан? Быдмас — вежöртчас». Но и кагаыс быдöс вежöртö: раз ыжмалöмыс понда нем оз шуö, сiдзкö, позьö и одзлань ыжмавны. Сiдз öтпыр, мöдöтпыр — и велалö быдмись мортыт ыджытжык покась дорö. Дас год бöртi пондö лэдзавны öшыннэз, медбы сёрöнжык кутчыны морт юррез бердö.

Вöлись аймам пондöны вотшкöтны ассиныс боккез да чавзыны: мыйсянь бы сiдз, кысянь бы? И винитöны зон-нывлiсь ёрттэсö, кино да телевизор, кöдна мыччалöны быдкодь срамсö и сiйöн тшыкöтöны бур отирсö, видöны школа, велöтiссезöс, кöть асьныс, поди, пияннэзныслö и кага онмöсьтан сьыланкыв эз нюргö, театрö да циркö эз пыртлö, öтлаын öтiк цветок эз быдтö — то некöр вöлi, то дыш петiс, то деньга абу — öдва вина вылö тырмö.

Мийö эд сэтшöмöсь: цветтэз садитны — немлö; ягöд понда места оз тырмы. Но челядьлö öтыс я мöдыс ковсьö, и нiя ягöдсö гусялöны соседыс садiсь, цветтэсö — велöтiсь клумба вылiсь, медбы сылö жö козьнавны сентябрь первöй лунö.

Öнi, кöр миян оланö бöр бертö религия, уна отир шуöны, что лэбтыны йöзлiсь нравственность отсалас вичку. Отсалас деддэз-баббез пыр, кöдна бытшöма тöдöны енлiсь заповеддез: эн гусяв, эн бöбöт, эн вий, донты айтö да мамтö, радейт мортöс.

Эта бур, но миян моральлö, миян культуралö колö лэбтiсьны вылöжык, ежели мийö олансö мöдамö керны сэтшöмöн, кöдаын мортыс адззас настоящöй, а не гижöтовöй счастье. Но счастливöйöн обществоыс лоас сэк, кöр сылöн лоас бытшöм культура, кöда пытшкын поздiсьö нравственность.

Округись быд пельöсын то гажöн, то норöн, комиöн и рочöн горалö матькöм, нёштöм кыв. Сiйö кылан вöр заптанын и пода видзанын, заводскöй цехын и ыб вылын, нельки больницаын да мортöс дзебикö. Матькöмтöг оз вермы овны колхозник и председатель, керку керись и военкоматын уджалiсь. Кылан сiйö не только код сёрниись, не только видчикö, но и пырся басниись.

Кöр ме кыла, кыдз кыскалöны мамлiсь ним, кыдз инькаэз сэрпöсьтöны ассиныс дон, дак чужöм гöрдöтö и пондö бытшкыны тымусын.

Мукöдлаын велалöма матькыны дзор юрсиа морт и зырымбедь, коммунист и гöрд галстука морток. И эта лёккöт пессьö, натьтö, только школа, а сiя öтнас эстöн нем оз кер. Матькöмлö паныт колö сувтны быдсöн народлö. Одзас эстöн колö мунны комсомоллö, милициялö, Советлö, кöдна вунöтöмась ни правительстволiсь бур постановленнёэсö.

Нёштöм кыла сёрни талун лоис отирлöн шогöтöн. А шогалiсь отир оз вермы керны здоровöй олансö.

Этö шогöтсö зорöтö мöдiк, сизимись лёкжык социальнöй висян — винаюöм, кöда сывьялiс странасиным, натьтö, джын йöзсö, сидзис быд деревняö, аулö, кишлакö, кöда паджö отирсö уджись, тшыкöтö мортлiсь здоровье, велöтö гусясьны, тышкасьны, вийны — государствосö кыскö гу дорö.

Поговорка шуö: «Быдöс вузав, но горттö эн вöрöт». Но кодуль вермас и мöднёж керны. Сылöн гортыс сэтчин, кытöн юкталöны.

Колö висьтавны, что öнi горт ладор йылiсь вежöртасыс сiдзжö мöдкодьсялiс. Талун горт абу ни святöй пельöсок. Сы понда дугдiс тöждыны сьöлöмыс и сэтшöм мортлöн, кöда винасö оз радейт. Уна пермяклö гортыс лоис только чужан местаöн. Мукöдыслö йöз ладорас эшö кокнитжык: оз ков думайтны сiя му йылiсь, кытöн олö — не век кежö сэтчö локтiс, оз тöжды аймам понда, кöдна ылын сы дынсянь, и челядьыслö оз ков мырсьыны-велöтны уна падежа грамматика. Олö аскöттяс, олö ас пондас. Олö жагвыв, лöня, пöта, некытшöм национальнöй проблема сьöлöмсö оз вöрзьöт. Разь только сёрöнжык, кöр петас пенсия вылö да кольччас öтнас, пондас мидзöвтны сьöлöмыс одзза гортыс понда, кытöн сэтшöм гажöна больгö шорок, кытöн шушкöтчöны важ кыдззез да льöмпуэз, кöднö сiя кöркö сы бура радейтiс, а сэсся жалейттöг чапкис нiйö да вунöтлiс уна год кежö...

Дас год одзтi кык ой узис миянын старуха Анна Зубова. Сiя чужлöма миян ладорын и дыркодь эстöн олöма, а сэсся чапкöма гортсö да мунöма Кемеровскöй областьö. Уджалöма «Горняк» совхозын, олöма и чöскыта, и курыта, но кок вылö сувтöтöма куим зонöс. Санко, медыджытыс, лэбтiсьöм интеллигентöдз, Коля — механизаторöдз, а Толяись, медбöрьясис, петöма урка.

Санко мамыслö мымдакö комиöн шыасьлöма. Коля вежöртö комиöн, но мам кывсö оз ни мыччы, а Толя гортас вовлывлö не быд пятилетка да нач рочсялöм. Внучек-внучатка сымда и тöдöны, что бабныс — коми-пермячка.

Анналö пöрисьувьяс сiдз охота лоас коми морткöт ордчöн пукыштны да том кадсö касьтыштны, что сiя решитас ветлыны Иньва дорö — кöть недыр кежö сьöлöмсö бурмöтны.

Джын векöн, кöд коста инька олiс мöдiлаын, важ гортыс ёна вежсьöма. Етша кольччöмась тöдсаэз, аслас увтырись некин ни абу ловьяыс, абу керкуыс, кытöн чужтiс челядьсö. Но льöмпуыс, кöда сетлiс сымда гажсö тулысöн и вердлiс чöскыт льöмнас, — сё одззакодь (Анна эз тöд, что сы дырся льöмпуыс косьмис да сiсьмис, а вужжес быдтiсö мöдiкö).

Час я, кыкö я льöмпу увтас пукалас, и сьылыштас, и горзыштас — ылалöм сьöлöмсö лöньсьöтас — да и шуас: «Эсся татiсь некытчö ог мун. Кула татöн да аймамöкöт ордчöн вода».

Эз пет сiдз, кыдз мöдiс керны старуха. Эстöн сiя некинлö эз ков, кöть сылöн и öктöм деньга вöлi, и пенсия, кöда вылö деревняас позьö овны. Важ гортыс, чужан деревняыс сiйö эз примит: сiя абу на вунöтöма Анналiсь (висьтавны кö точнöйжыка — Иван жöникыслiсь) кöркöся греххесö. И старуха бöр мунiс сэтчин, кытчö эз кыскы сьöлöмыс.

Важ горт понда гажтöмсянь, ыджыт сьöлöмшогсянь Анна чожа мыйись кулöма.

Кин эстöн виноватыс — Анна али гортыс, кытöн сiя чужис-быдмис?

Позьö висьтавны: гортыс, сiдз кыдз гортыслöн бырöмась сэтшöм качествоэз, кыдз милосердие, нравственность.

Но гортным сiдзжö видзö тöдвылас отирлiсь быдöс бурсö и умöльсö. Видзö веккез сьöрна и керö сiдз, кыдз сылö колö: бурыс понда мортыслö вештö бурöн, умöльыс понда — лёкöн.

Мийö огö тöдö, мый шуис Анна кулiкас миян деревня йылiсь — поди, видiс, поди, каитчис да корис важ гортыслiсь прощеннё кöркöся греххес понда. И мийö, цивилизованнöй отир, проститамö сiйö, пöрись мортсö, кöда полiс кувны йöз ладорын. Но вермам я талун проститны том мортöс, кöда поннясьö меднёштöм кыввезöн, дойдö мортлiсь сьöлöм да вежöр? Позьö я шуны нравственнöй мортöн сiйö, кöда ёрдчö этадз: «Заречнöй Пешнигортсö да Заречнöй Ивуковасö важын ни сотны колö!»?

Мыля сотны? Мый понда? Может, нiя деревняэзын олö куш преступник, кöднакöт мöднёж некыдз оз ни туй пессьыны?

Да абу жö сiдз. Сэтчин олöны уджалiсь йöз и пöрись отир, ветераннэз, кöдна мунiсö война би пырйöт Волга дорсянь Одер береггезöдз и ас горт понда эз жалейтö ловнысö. Öнi нiя отсалöны томмеслö быдтыны челядьöс, видзöны пода, медбы государстволö вузавны йöв, яй, вурун, заптöны картов да быдкодь карч.

И сэтшöм лёк кыввесö горöтчис не кытшöмкö быздыль, не кодуль, а «Скорöй помощись» медик, кöдалö шочыника ковсьö вовлыны шогалiсь дынö умöль туй кузя, джын километр мымда мунны подöн. И кинлö шуö — шогалiсьыс семьялö!

А семьяыс кывзö да, натьтö, думайтö: «Таво деревняаным ыждалiс ни биыс, сэсся ась ен оз шу!»

Эта учöтик примерыс эшö öтпыр висьталö сы йылiсь, что миян велöтан заведеннёэс медодз старайтчöны пöртны велöтчисьсö специалистö, бур уджалiсьö и етша керöны сы понда, медбы специалистыс вöлi Мортöн.

Дата добавления: 2015-11-16