Сёрнилöн зарниа роззэз

(<Оласö да вöласö. Кудымкар, 1990)

Коми-пермяцкöй фольклор олö учöт му вылын, но сiя öддьöн бура вужьясьöма. эта му бердö, пыдына йиджöма отирыс сьöлöмö да юрö. Фольклор бура йитсьöма и природакöт, кадкöт, кывкöт, отирыс ловкöт. Нельки зюздинскöй да верх-язьвинскöй коми-пермяккез, кöдна важын ни олöны роч отир кытшын, öнöдз абу вунöтöмась ассиныс фольклорнысö. А ловья фольклор, кыдз и отирлöн кыв — нациялöн, народностьлöн медодзза признак, сiя бура, уна ладорсянь мыччалö йöзлiсь олансö: кытшöм енлö йöзыс юрбитö, кыдз уджалö, мымда тöдö природа йылiсь, кытшöм сылöн культура, ыджыт я духовнöй вын.

Миян округын фольклор и талун олö паськыта, но чукöртöм етша, а эшö етшажык велöтöм, сiдз кыдз эта уджыс ёнжыка пондöтчис вöлись 30 год одзтi ¹.

Эта книгаö пырöны сказкаэз, легендаэз, преданнёэз, сказзэз, быличкаэз, висьтассэз. Мöд жанррес торья книгаöн петасö сёрöнжык.

Сказзэз да быличкаэз фольклорнöй сборниккезын эз на вöлö, а сказкаэза книгаэз шочыника петавлiсö и одзжык. Медодззасö лöсьöтлiс Питю Öньö (А. Н. Зубов) 1935 годö ². Мöдпырся сказкаэс комиöн петалiсö 1947 годö. Сэтчö одзза книгасис вöлi босьтöмась дас мымда сказка да кынымакö содтöмась вильöсь ³. Кыдз и одзжык, сэтöн вöлi только öтiк реально-бытовöй сказка, и мукöд фольклористтэс шуисö, что коми-пермяцкöй сказкаыс лоö быдсöн волшебно-фантастическöйöн и, натьтö пö, унажыкыс сiя сюрис роч отирсянь. Но куимöт фольклорнöй книга ⁴, кöда петiс 1960 годö, мыччалiс, что коми отирлöн эмöсь и новеллистическöйöсь, и сатирическöйöсь, и животнöйез йылiсь, и берся бывальщинаыс, а сiдзжö сьыланкыввез, частушкаэз, легендаэз, преданнёэз, челядьлöн фольклор, учöт прозаическöй жанррез. Öддьöн оригинальнöйöн сiя книгаын лоö Пера йылiсь преданнё — коми-пермяккез эпосiсь ыджыт тор, кöдалiсь мукöд варианттэсö тöдöны Коми АССР-ын, да Кировскöй областьын ⁵.

Коми-пермяккез öддьöн ни важын пондiсö тöдчыны мöдiк народдэзкöт, мый йылiсь миянлö висьталöны не только легендаэз да преданнёэз, но и историческöй гижöттэз, серебрянöй да золотöй предметтэз, кöднö адззисö и адззöны коми-пермяккезлöн олан местаись. А серебро Прикамьеö сюрлiс лунвыв муэзiсь скиффез, сарматтэз да булгара пыр.

Миян пöрись отир басниын бергалöны мукöд йöзлöн ниммез: татарин, кыргыз, вогул, остяк, чуваш, тунгус, ногай да мöдiккез. Эна йöзкöт коми морт, тыдалö, тожö пантасьлiс — торгуйтiс ныкöт, öтлаын вöравлiс, а может, и воюйтiс, кыдз висьтасьöны преданнёэз, нето лэдзис овны аслас му вылö, кыдз вöлi X—XIII веккезö, кöр мукöд йöзыс пышшисö татаро-монголлэз дынiсь. Сёрöнжык комиэс тöдсасисö новгородсакöт.

Эна пантасьöммес, öтласа удж да олöм комилö отсалiсö тöдсасьны мöдкодь культуракöт да сы пыр вильсьöтны и ыждöтны ассис.

Этасянь и лоис сiдз, что миян мукöд фольклорнöй произведеннёэс öткодьöсь нето мыйöнкö вачкисьöны мöдiк йöзлöн произведеннёэз вылö.

Мийö талун ог вермö висьтавны, кытшöм йöзлöн «Кыдз старухаöс ош веськöтiс» сказка, но бура тöдчö, что стариклiсь прибауткасö лöсьöтiсö не роч, не манси. «Юж вывтi — юж-яж, турун вывтi — кыш-паш, потш вывтi — турс-тарс» — этадз вермис висьтавны только коми морт. XV векö Пермь Великая — коми йöзлöн му — сюрис роч государство кипод увтö, и сэксянь коми-пермяк зэв уна вежис аслас оланын, но ассис важ искусствосö эз öшты, эз вунöт, а вайöтiс öння кадöдз.

Коми-пермяк не только кывлiс роччезсянь царевиччез да поппез, богатыррез да кладдэз йылiсь преданнёэз да легендаэз, но и ачыс вермис лöсьöтны, сiдз кыдз царь да вичку увтын сiя олiс нёль век сьöрна. Эта коста сiя бурлачитiс Кама да Волга юэз вылын, Ермаккöт ветлiс Сибирьö, сюрлiс Минин да Пожарский ополченнёö, участвуйтiс Казань босьтöмын, штурмуйтiс Альпы керöссэз, сибавлiс Парижöдз да Порт-Артурöдз.

СКАЗКАЭЗ. Миян мукöд сказкаэс öткодьöсь коми да удмуртскöй сказкаэзкöт, и эта вежöртана: комиэс (зыряна), удмурттэс (вотяккез) да коми-пермяккез кöркö олiсö öтлаын, сёрнитiсö öтмоз, тöдiсö öткодь еннэзöс да куллезöс, кыйисö öткодь зверь-пöтка, видзисö öткодь пода. Животнöйез йылiсь сказкаэзын миян олöны ош да кöин, руч да кöч, вöрмöс да сана, дзодзог да тури, вöв да öшка, балябаран да козабаран, пон да кань, шыр да пышкай. Унажык сказкаын быд животнöйлiсь мыччалöма аскодь мывкыд, олан, кöдаын эмöсь лэчытжык гыжаöсь и нач гыжтöмöсь, пöтöсь да тшыгöсь, эм лёк, кöдö не быдпырся вермö нильны добро. Сiдз, ош пуксьö лекарьö, сёйö старухаöс да пышшö. Эта понда старик оз вермы накажитны ошсö, но сё жö пондö думайтны, кыдз вештiсьны мортсёйиськöт. А вельмöм шыр, кöда бöбöтчöмсянь кулiс воробей, медбöрын шедö ош кок увтö.

Кöть коми-пермяк вексö олiс вöр коласын, уна кыйсис да прокод пантасьлiс вöрын олiссезкöт, а сы устнöй творчествоын животнöйез йылiсь сказкаэс етша. Этадз, может, шогмис сысянь, что сiя, язычник, пыртiс асьсö зверь увтырö, и уна роддэзлöн животнöйес вöлiсö тотемнöйöсь, кыдз еннэз, и ны йылiсь нем умöльсö эз позь висьтавны. Зверрез-еннэз йылiсь миянлö мымдакö висьталö и сказка «Кыдз ош старухаöс лечитiс»: старик лекарьсö кошшö не деревняись, не отир коласiсь, а зверрез коласiсь. Сiя сказкалöн нельки эм мöдiк вариант, кöдаын ошыс старухасö оз сёй, а сiдз веськöтö, что доймöм баб петö пывсянсис, дзик ичмонь.

Аскодя сюжеттэзöн, образзэзöн, атрибуттэзöн коми-пермяцкöй фольклорын олöны волшебнöй сказкаэз. Ныын уна быдкодь предметтэз, кöдналöн эм чудеснöй, волшебнöй вын, и эта выныс отсалö бытшöм сьöлöма, но беднöй мортлö-геройлö петны тюрьмаись, пышшыны богатöй да лёк вон дынiсь, змей ордiсь мездыны невестаöс нето сойöс, капризнöй царь понда öтiк ойöн керны хрустальнöй дворец и нельки «вольнöй вольница», кыдз керö Лёгостай. Уна сказкаын волшебнöй предметтэзöн лоöны пестер, лабич, шать, гырнич, бордтыв да мöдiккез, мый эм коми мортлöн гортас да сы гöгöрын.

Волшебнöй сказкаын бура тыдалö кöркöся пемыт мортлöн мировоззреннё, сьöкыта уджалiсьлöн бур олан йылiсь мечта, счастье да свобода понда пессьöм. Мукöдпыр герой, медбы эз кулö тшыгсянь нето кöдзытсянь учöт сойез-воннэз, пöрись аймам, кайö анькытш кузя кымöрö, мунö била мортсёйись Кам ордö, кутчисьö строшнöявны Вакуль ордын и аслас мывкыдöн, лэчыт ылöсöн да удж радейтöмöн ловья петö и мöдöр светсис. Сэтшöм ыджыт пессьöмас сылö отсалöны ошшез, чуддэз, вакуль, пуэз — сы дор ачыс природаыс сувтö. А природа овлö сэтшöм морт дор, кöда тöдö и бура радейтö мусö, гортсö, йöзсö. Эта геройыс — Иван — мужик пиян, Ошпель, Кабморт, Сяпарись Ваней, Паччöр ныв, Трисан. Сiя геройыс чужöм-быдмöм Пармаын, новйö нинкöм да шабур, оз пов не Вöрисьлiсь, не Ёмалiсь, мунас ва пыр и би пыр да сёравно локтас гортас, ежели кöсйисис. Сылöн кикокыс вына, мылаыс да мывкыдыс ён, висьталöм кылыс чорыт. Сэтшöммезöн нiйö керис уджалiсь йöз.

Но сказкаэзын пантасьлöны и царрез да царевиччез, кöдна сiдзжö повтöмöсь, вынаöсь, бытшöм сьöлöмаöсь и быднёж отсалöны отирлö — эта тожö кöркöся беднöй мортлöн вöрдöм-мечта: вот пö чулалас эта умöль кадыс, и миян му вылö локтасö добрöй царрез да справедливость.

Эна сказкаэс, может, и локтiсö миян дынö роч отирсянь, но ныын мыччассьö коми морт да сылöн ассяма олан, ныын аркмöма мöдкодьжык сюжет, вежсьöмась геройез, и фольклористтэс нiйö шуисö национальнöйезöн.

Реально-бытовöй, новеллистическöй сказкаэзын олан мыччассьö сэтшöмöн, кытшöм сiя вöлi кöркö, кытшöм эм талун. Эта дырни мукöдас мымдакö пырöны и фантастическöй мотиввез, мый отсалö геройыслö вермыны ассис врагсö, лёксö. Эна сказкаэзын öддьöн бура тöдчö классовöй пессьöм, антагонизм. Сэтöн положительнöй геройыс — деревняись мужик, солдат, беднöй дöва, нищöй, простöй морт. Сылö паныт сувтöны царь, министр, помещик, поп, судья, купец, богатöй вон нето жöник. Öттэсö сказка мыччалö небыт сьöлöмаöн, честнöйöн, рамöн и вежöраöн, нiя готовöсь кöть кинлö отсасьны. Эта кузя нiя и сюрöны быдкодь «налькö», адззöны уна горе, но кольччöны бур морттэзöн, мый и отсалö нылö мездiсьны быдкодь лёксянь.

Мöддэс — надзöсь, горшöсь, бöбöсь, лöгöсь, нiя ылöтчöны, гусясьöны, развратничайтöны, кытшöмöн отир нiйö петкöтö «Тыра курöг», «Не поп, не чёрт», «Хитрöй мужик» да мöдiк сказкаэзын.

Сказка — не öтiк веклöн да уна мортлöн удж, сiйöн сiя и абу öткодь композициянас, ыжданас, висьтасьöм сьöртi. Кокнитика, öддьöн простöя висьтассьöны «Лёнсювко», «Богатöй корасись», «Кытчö ветлiн да мый адззылiн?». Нiя дженытöсь, веськыт сюжетаöсь, простöйöсь тема да вежöртас ладорсянь. Мед ни учöтöсь да гажаöсь анекдоттэз да бывальщинаэз. Серöм петö, кöр лыддьöтан хитрöй нето дыш инькаэз йылiсь, асныррез да ылалöм морттэз йылiсь. И полöмöн, вель дыр ветлöтан геройескöт вöра да керöса туйезöт, лэбзян саридз-океан вевдöрöт, пыран ваувтся нето мупытшкся царствоö, кöр лыддьöтан героическöй, богатырскöй сказкаэз, кытшöмöн позьö шуны «Рытко, Ойко да Асывко», «Иван — мужик пиян», «Ошвердас». Эна сказкаэс кузьöсь, ныын уна геройез, действиеыс кыссьö дыр, кыдз бы сьöкыта, сiдз кыдз геройеслö колö пессьыны быдкодь лёк вынкöт да вермыны нiйö, медбы бедаись мездыны невиннöй мортöс. Эмöсь и сэтшöмöсь, кöднаын öтлаö йитöмöсь кык-кум сказка, кыдз «Шыр да кеня».

Эта сборникö первуись пырисö зюздинскöй да верх-язьвинскöй пермяккезлöн сказкаэз.

Эмöсь сказкаэз, кöднö позис бы шуны историческöй преданнёэзöн (шуам, «Петра Великöй да разбойниккез»), но ныын тöдчö сказочнöй сюжет.

ПРЕДАННЁЭЗ ДА ЛЕГЕНДАЭЗ. Коми-пермяцкöй фольклорын ыджыт торöн аслас значеннё сьöртi лоö Кудым-Ош да Пера йылiсь эпос. Эна преданнёэзлiсь торресö отир тöдiс не öтiк век сьöрна, но нiя вöлi чукöртöмöсь коми-пермяцкöй кыв вылын да публикуйтöмöсь нач неважын ⁶. Эна преданнёэс оригинальнöйöсь содержаннё да художественность ладорсянь, нiя — важся йöзлöн олöм да героическöй пессьöм йылiсь ыджыт национальнöй памятник. Сiя мыччалö йöзлiсь удж, культура да сiйö, кыдз морт вежöртiс олансö, природасö.

Кудым-Ош йылiсь преданнё тöдöны Кудымкар гöгöрись деревняэзын, сiя — иньвенскöй йöзлöн. Эстöн баитсьö сэтшöм кад йылiсь, кöр увтыр (род, племя) матриархатсянь вуджö патриархатö, кöр увтырын юралiсь инькалiсь властьсö мырддьö мужик. Кудым-Ош оз ни кывзы не тöдiссезöс, не мамсö, а керö ас мознас. Эта коста сiя тöждö не ас йывсис, а отир понда — сы пöт, шоныт да мирнöй олан понда. Том пам, увтырлöн юралiсь, бöрйö родыслö виль олан места да керö каргородище. Кöр кывсис, что увтырыс лоас счастливöй, ежели Кудым-Ош гöтрасяс вогульскöй нывка вылын, кöда «не морт, не кукань», том пам корасис сiйö. А сыбöрын мича Костö былись керис Кудым-Ошöс счастливöйöн, а Кудым-Ош отсалiс судзöтны бур олансö аслас увтырлö: велöтiс керны кöрт, быдтыны нянь да дружитны ордчöн олiсь отиркöт. Кудым-Ош йылiсь преданнёын эм сэтшöм тор: вийöм богатырьöс ловзьöтöны мамыс да тöдiсь. Волшебствоын нылö отсалö роднöй му, природаыс, сверхъестественнöй вын. Эта висьталö сы йылiсь, что миян предоккез-язычниккез не только еннэз вылö надейтчисö, но и старайтчисö тöдмавны стихиялiсь явленнёэз, нылiсь вынсö да причинаэсö, тöдмавны морт ловлiсь тайна.

Роч йöз коласiсь пöрись отир, кöдна олöны миянкöт ордчöн, и талун шуöны, что коми-пермяккез коласын пыр вöлiсö и öнöдз эмöсь ыджыт вына тöдiссез. Нiя вермöны пö веськöтны берся шогöттэз, керкуись кидтыны лудык да таракан, ыб вылiсь «вашöтны» ёгтурун, Вöрись ордiсь «петкöтны» мöсöс и нельки мортöс «пöртны» зверьö да бöр «бергöтны» мортö. И этö колдуннэс вермöны керны сэтчöдз, кытчöдз нылöн оз усялö юрпиннез.

Эта преданнёлöн öддьöн аскодя да басöк конецыс. Кувны лöсьöтчись Кудым-Ош аскöттяс тшöктö прощайтчыны сiдз: «Быд мужик ась павкöтчас веськыт пельпон бердам öтiк чуньöн да босьтас менчим вын. Кин павкöтчас кык чуньöн да босьтас кыкись унажык, сiя выныс лоас лёк вын».

Пам и кулiкас сё думайтö аслас увтыр йылiс, сы одзланься судьба йылiсь: лёк вын вермас дзугны увтырлiсь олан, велöтас тышкасьны-воюйтны, мырддьыны мöдiклiсь гаж, сёян, олан.

Богатырь кыввезö народ пуктöма ыджыт вежöртас, мыччалöма важ отирлiсь этика, мортöс радейтöм.

Кудым-Ошöс миян эпос пуктö юралiсьö, кöдö простöй мортсянь торйöтö ыджыт вын, буржык паськöм, оружие, ён мывкыд, мöдiк муэзiсь отиркöт тöдчöм. Сiя — вождь.

Мöдiк эпохаö, унаöн сёрöнжык, чужö Пера-богатырь и сылöн образыс нач мöдкодь: сiя — простöй деревенскöй мужик, олö вöралöмöн да черикыйöмöн, соседдэслö отсалö керны пес, доддез, керкуэз да мöдiк сьöкыт удж. Сiя лöня олö Луп ю дорын, гайнскöй му вылын, некинöс оз вöрöт, некинлö оз мешайт, кöть и Пармаас сы кодь вынаыс абу некин. Аслас мыгöр сьöртi, вын сьöртi Пера оз вермы адззыны инька, олö öтнас. Сiя сэтшöм сьöкыт, что оз лысьт пуксьыны вöв вылö и пыр ветлöтö подöн да лямпаэз вылын, нельки Москваöдз мунö кок йылын.

Пера — простöй отирлö отсасись, сылöн дорйись и лёк враг быдöнлö, кин дзугö уджалiсь йöзлiсь олöм. Сiя оз ни лыддись, кыдз Кудым-Ош, вöрись да ваись чуддэзкöт, а повтöг кутчисьö ныкöт пессьыны и кужöмöн вермö нiйö. Корöны кö Пераöс отсавны Москваись нето Перемись войсколö татаракöт пессьöмын, богатырь мунö воюйтны да отсалö судзöтны победа. Сiдзкö, Пера йылiсь преданнё лоö патриотическöйöн и мыччалö миян страналiсь не öддьöн важся история — Иван Грозныйлiсь кад. И петö, что Пера-богатырь йылiсь преданнё мымдакö отражайтö коми-пермяккезлiсь олансö родовöй стройсянь капитализм пондöтчöмöдз.

Эта преданнёкöт не öддьöн бура йитсьö змейкöт пессьöм йылiсь мотив. Сiйö торсö коми-пермяк, тыдалö, босьтiс мöдiк национальнöй эпосiсь нето роч сказкаись.

Гайнскöй районын Пера-богатырь йылiсь висьтасьöны и талун. Преданнёлöн кынымкö тор лоисö сказкаэзöн, нiйö тöдöны Коми АССР-ын и округись мöдiк районнэзын.

Кудымкарскöй районын баитöны, что Пера-богатырь öтiк тыись кыйлiс чери, кöдö öнöдз шуöны сы нимöн — Ператы. Но сiя тыыс видзö мöдiк Пералiсь (Порфирийлiсь) ним: сэтшöм нима мортыслöн ты дорас вöлöма ытшкас, сысянь тысö пондöмась шуны Пера нимöн.

Кочёвскöй районын Л.С. Грибова гижис преданнё, кöда сьöртi Пера не просто богатырь, а ен-богатырь: сiя мöдö мöднёж сувтöтны Мушарсö сы понда, медбы Парма вöлi матынжык шондi дынö, медбы эз вöв Пера гортын тöвся кöдзыт. Кымöрись ыджыт енлö эта оз гленитчы, и сiя асныралiсь богатырьсö пöртö изö ⁷.

Пера-богатырь да Кудым-Ош йылiсь преданнёэсö колö лыддьыны не только важ йöз йылiсь картинаöн, этнографическöй гижöттэзöн, но и кыдз отирöн керöм художественнöй произведеннёэзöн. Колö висьтавны и сы йылiсь, что энö преданнёэсö сэтшöм кузьнас, кыдз книгаын, отирыс оз тöд — нiя олöны неыджыт торрезöн да уна варианттэзöн. Нiйö торресö гижисö фольклористтэз и не фольклористтэз и не быдпыр сэтшöм кылöн, кыдз висьтасисö отир. И эшö öддьöнжык кыв ладорсянь вежсисö своднöй тексттэс: нiя гижöмась öння литературнöй кылöн.

Миян фольклорын шочыника пантасьлöны и богатыршаэз — Матрёна-силачка, Дзузьдя.

Коми-пермяк тöдвылын олöны и мöдiк историческöй преданнёэз — Ермак да Пугачёв йылiсь, караваннöй бунт йылiсь. Доисторическöйес висьтасьöны вына отир да чуддэз йылiсь, разбойниккез да кладдэз йылiсь. Эмöсь и топонимическöй преданнёэз сы йылiсь, кыдз аркмисö каррезлöн, юэзлöн, деревняэзлöн ниммез. Ны коласiсь сiдзжö вöлi публикуйтöмась нач етша, и нем эз вöв зюздинскöй да верх-язьвинскöй пермяккез фольклорись.

Быдлаын висьтасьöны отир йылiсь (важжез, чучкöйез), кöда олöма Прикамьеын коми-пермяккез вотöдз. Öтiккез шуöны, что важ отирыс вийöмась асьнысö гуэзын, мöдiккез висьталöны, бытьтö нiя мунöмась мöдiлаö. Косинскöй районiсь преданнёэзын баитсьö: «Босьтöмась котомаэз, челядьöс кипöлöт кутöмась, висьталöмась: «Прощай, Важ Деревня! Ми сэтöн ог лоö, и некин оз ло!» Мунöны пö, гортнысö кольöны, и быдöнныс риксьöны...»

Кытчö нiя мунöмась — отирыс оз тöдö. А верх-язьвинскöй преданнёэз висьталöны, что коми-пермяккес Ёдз (Язьва) ю дорö локтöмась мöдiлаись, но кöр и кысянь — öння отирыс сiдз жö оз тöдö ⁸.

Разобйниккез йылiсь преданнёэз частожык йитсьöны кладдэз йылiсь преданнёэзкöт. Кладдэс — разбойниккезöн муö нето ваö дзебöм золото да серебро ⁹. Разбойниккес коласын пантасьлöны богатыррез, нiя — важ отир. Эмöсь разбойниккез, кöдна грабитлöмась богатöйезöс да отсавлöмась беднöй йöзлö. Кладдэс овлöны завечайтöмöсь (адззыны лöз сина мортлö, Анна нима нывкалö, сьывны 40 песня и сьöлöмшöрöс не касьтывны да с. одз.) и простöйöсь, кöдна асьныс шедöтчöны бы морт киö.

Кладдэс йылiсь быдöс преданнёэсö позьö торйöтны кык торйö: öттэзас висьтассьö кладдэзкöт пантасьöм, мöддэзас — кыдз нiйö пондылöны босьтны, да кладыс «пышшö». Преданнёэзын шочыника пантасьлöны фантастическöй образзэз, мифическöй персонажжез, и сэтшöм преданнёэс пöртчöны легендаэзö, кыдз, шуам, Пера да Зарань йылiсь, кöдö учöтик варианттэз сьöртi лöсьöтiс Л.С. Грибова.

СКАЗЗЭЗ. Коми-пермяцкöй фольклорын, кыдз и эта книгаын, медучöт торöн лоö сказлöн жанр. Школьнöй книгаэзö вöлi пыртöмась Ленин да Сталин йылiсь сказзэз, но нiя абу народнöйöсь, нiйö гижис М.И. Боталов, журналист, роч да белорусскöй сказзэз сьöртi. Прикамскöй фольклористтэз 60-й годдэзö кывлöмась, бытьтö Ленин вовлöма Вишера дорö нето Прикамьеö, но эта йылiсь нем абу гижöма.

БЫЛИЧКАЭЗ ДА БЫДКОДЬ ВИСЬТАССЭЗ. Энö жанрресö öння фольклор мылякö чапкö бокö. А нiя йöзас олöны медпаськыта и медбура да öддьöн ятнöя, выразительнöя мыччалöны важ коми йöзлiсь мифология, мортлiсь мировоззреннё, абу на тöдöм природнöй явленнёэз дынö отношеннё. Нiя фольклорас сэтшöм жö унаöсь, ассямаöсь да мичаöсь, кыдз гожумся видз вылын берся рöма дзоридззез.

Коми-пермяцкöй быличка да висьтас — учöтик устнöй произведеннё. Сылöн абу устойчивöй форма, сюжет, висьтасьöмын öткодь приёммез, кыдз, шуам, сказкаын пондöтчан да помалан кыввез. Но сэтöн прокод эм морт, кöда ачыс адззылöма кытшöмкö чудо либо эта йылiсь кылöма мöдiксянь. Конечно, сэтшöмыс эз вöв и оз вермы лоны, медбы морт адззылiс да баитiс вöрись чудкöт, вакулькöт и нельки пыралiс сы керкуö. Эта — религиознöй мортлöн висьтас сы йылiсь, мый мортыс син одзын пöртмасис повзьöмувья нето ойся пемытöн, кöр и выскырыс вачкисьö вöр чуд вылö. Сэтшöмсö висьтасьлö и öддьöн шогалiсь, бöбсора морт. Но шочыника пантасьлöны и быд ладорсянь нормальнöй морттэз, кöднакöт шогмылöм фантастическöй история, кöдö мийö ог на кужö объяснитны.

Унажык быличкаэзын öткодь концовка: калян, боболь, вакуль, вöрись, ёма (лёма) да мöдiк чуддэз керöны мыйкö умöльö нето мыччасьöны умöль одзын. Но мукöдпырся суседко отсалö печкыны али кыйны дöра нуждаö шедöм мортлö, вöрись отсалö вöралiсьлö.

Öнöдз висьтасьöны тöдiссез йылiсь, син пöртмалiссез йылiсь. Нiя отирыслö керöны и бурсö, и умöльсö: кужöны веськöтны шогалiсьöс, вермöны öтлаöтны (смилитны) радейтан морткöт нето янсöтны, ёрдны, тшыкöтны (лэдзны шогöт, икота, шева, кöртавны кила да мöд.). Тöдiсь тöдчö быдкодь чудкöт, дявкöт, сiя адззö туруннэзлiсь, гаггезлiсь, дзöдзыввезлiсь тайнöй, колдовскöй вын, тöдö кöрткыввез (заговоррез), кöдна отсöтöн бытьтö пö вермö тупкавны рана да сувтöтны котöртан вир, кужö тшöктыны мортöс кытсасьны петух моз.

Отирыс — уна пеля, уна сина, уна сьöлöма. Сiя адззö и кылö быдöс бурсö, басöксö, долытсö. Отир син одзись нем оз позь дзебны, суськыны, оз позь тупкавны сылiсь öмсö, тшöктыны чöвны. Отирлöн пырся, унавекся оланыс, берся кужöмыс да тöдöмыс, сылöн фольклорыс — память да правда. Ежели этö правдасö народ эз ешты висьтавны тöн, дак висьталас ашын. Висьталас, бытьтö зарниа роззэзöн серöтас сёрнисö.

_______

ЫСТIСЬÖММЕЗ:

1 Коми-пермяцкöй фольклор сьöртi медодзза исследованнё вöлi публикуйтöма 1961 г. Видзöт: М. Н. Ожегова. Устнопоэтическое творчество коми-пермяцкого народа. Коми-Перм. кн. изд. Кудымкар, 1961.

2 Сказкиэз. Комипермгиз, Кудымкар. 1935.

3 Сказкаэз. Комипермгиз, Кудымкар. 1947. Составителлес А. М. Спорова, З. В. Распопова, И. И. Лунегов.

4 Коми-пермяцкöй народнöй устнöй поэтическöй творчество. Коми-перм. кн. изд. Кудымкар, 1960. Составительыс В. В. Климов.

5 Преданнёыс босьтöма роч книгаись. Видзöт: Коми-пермяцкие народные предания о Пере-богатыре. Комипермгиз, Кудымкар. 1956. Составительыс Д. И. Гусев. Коми-пермяцкöй кыв вылö вуджöтiс М. Вавилин.

6 Пера-богатырь йылiсь преданнё комиöн публикуйтöма 1960 годö «Коми-пермяцкöй народнöй устнöй поэтическöй творчество» книгаын. А Кудым-Ош йылiсь — 1964 годö «Иньва» сборникын. Роч кыв вылын Пера-богатырь йылiсь невна висьтасис аслас книгаын учёнöй И. И. Лепёхин, кöда Петербургö Сибирьсянь бертiкö 1771 годö сувтчылiс Селище, Чазёва, Подъячева да Юксеева деревняэзын. Кудым-Ош йылiсь роч книгаэзын медодзза гижöттэз мыччисисö вöлись XIX векö.

7. Натьтö, вöлiсö и мöдiк, важжык преданнёэз, кöднаын Перасö шуисö енöн. Миянлö тöдса Ойпель ен, мый лоö: ойся нето ой ладорись ен, ой тöвлöн ен. Тöдамö и сiйö, что мукöд преданнёэс Перасö шуöны невна мöднёжжык: Пер, Перь, Пель. Эстöн пель кылыс видзö ен кывлiсь значеннё. Пер, Перь, Пель ниммес вермисö аркмыны пöрись да пöль кыввезiсь (коми пöль — дед, старик). Но вермис аркмыны и Перун нимись — роч язычниккезлöн вöвлöм сэтшöм нима ен, кöдалö мукöд роччес дыр эшö юрбитöмась христианскöй вераö пырöм бöрсянь.

8. Мукöд отирыс татiсь пышшис, öткö, сэк, кöр Пермь Великаяын пондöтчис христианизация (эта йылiсь и преданнёэс висьталöны: «Звон лоис»), а, мöдкö, сёрöнжык, кöр православнöйес коласын шогмис раскол да никоновскöй вичку пондiс дзескöтны староверресö. Язьва дорись комиэс унажыкыс староверрез, нылöн эм кержацкöй вичку, сэтчин службаыс чулöтсьö важ обряддэз сьöртi.

9. Что эта сiдз, оз позь висьтавны, но Прикамьеын вöлi адззöма уна клад. Эрмитажö чукöртöм серебрянöй посуда, например, вайöма быдсöн Прикамьеись.

Дата добавления: 2015-11-16