Читайте также:
|
ПЫТШКÖС:
Матрёна – вына инь (< Лöз йöрнöс. К., 1992)
Чуманок (< Лöз йöрнöс. К., 1992)
Кузька да гöрд борда тури (< Лöз йöрнöс. К., 1992)
Бедьпи (< Куськось ― Яшалöн козин. К.,1985)
МАТРЁНА – ВЫНА ИНЬ
Легенда
Кöркö вöлöма Матрёна.
Учöтсянь визыв да басöк быдмöма, а кыдз невестаöдз локтöм — кызамöм да жагмöм. Подружкаэс чисто жöник сайö мунасö, а сiйö некин оз корась. И аймамыс сетасö нывкасö батрачитны, а сэтчин сiйö босьтас ас саяс Петра, батрак жö, полiсёвöй детина. Гöтрасясö, öтлаын пондасö овны. Быдкодь удж керöны, немись оз полö: и вöр пöрöтöны, и нянь быдтöны, и пода вердöны. Петра гöрö-кöдзö, пес да турун ваялö, а Матрёна крут керöс увтiсь ва кайöтлö.
— Тэ надсадитчан, — жалейтö жöникыс. — Метöг эн кайöтлы.
— Ме жагöника да небурика, не зэркыта и не зубыта, — шуö Матрёна.
Перво Матрёна учöт ведраэзöн кайöтлас, сыбöрын ыджытжыкöсь босьтас, сэсся кыкö коромысла вылас кышалас, а киас куимöтö кутас. Гумыштас юсис васö, висьталас:
— Ноко отсав, тöлок, керöс вылас кайны! — и кок чунь йылас котöрöн лэбтiсяс.
Котöртö лун бöрсянь лун, и Матрёна сё сiдз жö котрасьö. Кыдзкö ны хозяинлöн зыбунö порозок сибдас. Хозяиныс ачыс пондылас кыскыны — оз вермы. Петраöс корас отсавны — тожö оз вермö. Матрёна локтас — öтнас кыскас, но порозокыслiсь сюрсö чегöтас.
Хозяиныс öдззас горöтлыны-видчыны, чуть оз вартлы ассис батрачкасö.
— Чöв, — шуас сiя, — ме тiянлö эта понда вештiся!
И вештiсяс: янсöтас том гозъясö — Петрасö аслас зон туйö рекрутö* иньдöтас.
Кольччас Матрёна öтнас и важмоз ниртö-уджалö: вундö, вартö, вильса вылын мыррез шедталö — югыт лунсö оз адззыв. Не олан, а каторга.
Вот öтпыр локтас йöзайыс ордö, пондас баитны:
— Мыйлö ме йöзсö богатсьöта? Примитö менö дынаныт, ме тiянлö понда отсавны. Аслыным вильса керам, бур нянь быдтам да, может, кок йылö сувтам.
Йöзайыс шуö:
— Ме пöрись ни, а зоннэзö томöлöсь — вынным оз судз вöрсö ректыны.
— Сэтiсь эд полö, вильсасö ме кера. Согласитчас старикыс моньыскöт, вайöтас сiйö гортас. Сетасö нылö шутёмовöй вöрок — нёп да кырас. Умöльöв местаыс, да мый керан, ежели сэтшöм дöнзис?
Петасö уджавны куим мужик да инька. Старик зоннэзнас вöрсö пöрöтö, суййисьö да пöрлалö пуэсö, а моньыс мырресö няркйö-шедталö да öсекö тэчö — йöр керö.
Неделя керасясö, кыкö да и куимö — и весöтасö вöроксö. Увсö, йывсö, шать-бадьсö быдöс сотасö — и ыбок готов, гöрны позьö. Да вот беда: вöвныс абу. Корасö богаттёлiсь — некин оз сет. А беднöй отирыт ачыс вöвтöм. И шуас сэк Матрёна:
— Весöтны вермим, дак гöрнытö вермам ни. Вöлыс туйö ме лоа.
Доддясяс инькаыт сабанö, кыскö, йöзайыс гöрсö видзö, а зоннэс сю ваялöны да кöдзöны. Сiдз и гöрасö да пиняласö вöвтöг.
Кыдзи кöдзсяс, деревняын помеч бöрсянь помеч.
— Ичмонь, отсышт-ко пес керавны, — корö Матрёнаöс родняыс.
— Мийö бы из шедтамö, он я вовлы? — юасьöны соседдэс.
— Матрёна, ашын лок керку лэбтыны, — тшöктöны куимöттэс.
А инькаыт оз лысьт откажитчыны — кыдз тэ аслат роднялö да соседдэзлö он отсав?
Лун-лун помечалö Матрёна, мыдзтöдз уджалö, а узяс ойсö — мыдзсö дзик киöн босьтö: эшö вынажык лоö, эшö öддьöнжык охота уджавны.
Гожум чулалас, ар локтас. Матрёна йöзайыскöт уна турун заптасö, бур нянь быдтасö да олöны, нужда оз тöдö.
Праздник коста деревня шоччисьö, гажöтчö. Матрёнаöс каждöй керкуö корöны:
— Пырав жö, бур мортiньöй, сур-брагасö миянлiсь пешлы...
— Эн орддьы, Матрёна, миянöс.
Пыралас, гöститас, сэсся гортас инькаэсö нуöтас, сьыласö-йöктасö да вöлись и янсöтчасö.
Петра служитö армияын, а Матрёна йöзайыскöт вöр пöрöтасö да виль керку лэбтасö, сыбöрын вöв босьтасö да вöлись янсöтчасö: старик семьянас виль керкуас петас, а Матрёнасö важас коляс.
— Меным и сiя бур, — шуö Матрёна, — только керку дынö карта-ограда керö.
Кöсйисяс йöзайыс картасö керны, но оз кер. Матрёна öтпыр тшöктас, мöдпыр баитас, а мöдыт оз и думайт. Сiдз быдса год кыссяс. Лöгасяс Матрёна, йöзайыс öшын увтö локтас, шуас:
— Кыдзи картасö одö керö, ассиныт разя да гортö новья.
— Кисельсö етшаöв панялiн! — дöвкасö сылö.
— Дак тiйö сiдз?! — лöгасяс Матрёна да воротасö дзир вывсис чöвтас.
Ичипияннэс кыласö шумсö, петасö öтöрас да кулаккезнысö пидзралöны. Матрёна сапырнитас öтсö да йöр вевдöрöттяс огородечö лэбзьöтас, а мöдсö керку юр вылö шупкас. Йöзайыс нагайкаöн петас, лöсьöтчö моньыслiсь спинасö волькöтны, а Матрёна стариксö сарайö, турун коласö, юрнас зангас.
Мунöны соседкаэз, дивуйтчöны:
— А мый, а мый! Кыдз тэ лысьтан сымдасö керны?
— Нiя тай лысьтöны, а ме мыля ог?
— Кысь инö сымда вынтö да смевтö öктiн?
— Быдлаись, инькаэз: и гöр дорись, и мыр увтiсь, и мешöк сайись, — висьталас Матрёна да каяс карта вылас и окупеньсö чапкас, крышасö гиль-голь улö лэдзас. А вöлись и столббесö шедталас, гортас новьяс да йöзыс отсöтöн карта сувтöтас. Не весь баитöны: ачыт бур, дак и йöзыс бурöсь.
Олас, олас Матрёна да шуас: «Вай-ко ме Петраö дынö ветла, сё гажажык лоас». И мунас солдат дынö, кöда неважын армиясянь бертас, юасяс сылiсь, кыдз жöниксö адззыны, а сiя и висьталас:
— Туйыс сы дынö веськыт: тасянь мун Перемö, а сэтчин — Казань юав, и нинкöммет нуöтасö.
— Уна я сухарсö сьöрам босьта?
— Кыдзи öтпырись луннас сёйны — öтiк котома, кыдзи кыкись — кыкö.
«Кык котомаыс ― бур, а куимыс — эшö буржык», — решитас Матрёна и сухарресö босьтас куим мешöк.
Локтас Петра дынö, а сiя лöсьöтчö городö: сэтчин пö силаччез пондасö вермасьны.
— Босьт менö сьöрат, — корсьö иньыс. — Ме бы видзöта жö.
— Но дак мунам!
Силаччес ыджытöсь, кызöсь, дзик суслоннэз. Ветлöтöны отирыс одзöт, кошма гöгöрöт, öтамöднысö нёджжалöны да аснаныс ошшасьöны. А отирыс видзчисьöны, кöр вермасьны пондасö.
Вот петасö öтiккез кошма вылас, кутчисясö öтамöд бердö — и учöтжыкыс сразу ыджытжыксö пöрöтас.
Вот виль пара пондас пессьыны. Бергалöны, тойласьöны, мурзьöны, а некöда оз вермы. Отирыс тэрмöтö нiйö:
— Мый йöктат, бытьтö петуххез!
— Давай пöрöт, пöрöт!
Бергаласö, бергаласö да сiдз и янсöтчасö.
— Ме бы сэтшöммескöт тожö кутчылi, — шуö Матрёна.
— Эн баит, кöдö оз ков, — панласьö Петра.
— Былись кутчылi бы...
Быдöннысö вермас дженытик тошока татарин. Уна козин сылö сетасö, бура ошкасö, а сiя пукалö, юö чай да югьялö, дзик тулысся шондi.
Но вот юалöны отирыслiсь, оз я кинкö кутчы вермасьны сыкöт, и Матрёна петас кошма дорас.
— Ноко ме пондыла.
Татариныс дугдö юны, косöйöн видзöтö сы вылö да шуö:
— О, аллах, тэ мыля лэдзин инькасö менам син одзö? Позор, позор, меным!
— Дак повзин? — юалö Матрёна. — Сэк сiдз и висьтав, а эн няргы.
Силачыс чеччас да шытöг сибöтчас Матрёна дынö. Видзöтöв-керас сiйö и тапкас ки бöрнас сы пельпонö. Матрёна бöр-бöр, но ештас кутчисьны силачыс сос бердö да усикас ни шупкас сiйö ас вевдöрöттяс и нырыштас му бердас.
Йöзыс горöтö, шутнялö, кокöн топöтö, а Матрёна повзяс, чайтас, неладно мыйкö керис, и давай пышшыны сэтiсь. Петраыс кытшöм ни боёк и то öдва вöтас.
— Тэныт козин козьналасö, эн пышшы!
Сетасö Матрёналö деньга, гöрд сапожоккез да басöк пристеж.
Сэксянь и пондасö шуны инькасö ыджыт вынаöн.
Дыр я не я Петра служитас, но сё бура-бытшöма. Сiдз и думайтас двадцать пять годсö чулöтны да гортö бертны, но вдруг война: Перем вылö уськöтчöм Кудаин-хан. Сылiсь войскосö вермасö миянiссес, а ханыс инькаöс вайöтас — Латыпа шуöны сiйö. Ён, ыджыт, дзик стопа. Ачыс чышьянтöм, семнадцать чикися, и каждöй чикисьö иззэз кыйöмась — дзик гиряэз öшалöны. Кыдз бергöтчас да öвтыштас нiйöн, миян войскоыс — гатш-гатш. А Латыпа кок увтас масьтö сiйö.
— Богатыршаöс этчö колö, только сiя уськöтас Латыпасö, — шуöны пöрись солдаттэс.
Воевода прикажитö:
— Адззыны сэтшöм инькаöс, кöда вермас сувтöтны басурманкасö!
Петра кылас этö и думайтö: «Россияыс паськыт, сiйö и месяцöн он гöгöрт. А Латыпа не талун дак ашын миянöс быдöннымöс куж-каж керас и Перемсö розоритас».
Мунас сiя воевода дынö, висьталас:
— Менам Матрёна иньö силачка, сiя пöрöтас Латыпасö. Воевода сетас сылö кык медбур вöв, шуас:
— Вайöт татчö иньтö. Пукта тэныт сроксö ой да лун. Локтас Петра гортас, ыбöс дынсянь висьталö:
— Матрёна, тэнö воевода воюйтны корö — басурманкаöс вермыны. Давай пасьтась да гöнитам.
— Вурышта дубасöс и мунам. Важö бырис, сiйöн йöзас ог жö пет. А тэ сы коста шоччись да вöввеслö виль подковвез дор.
Матрёна вурас пышовöй дубас, подувсö басöк серöн серöтас. Пасьтасяс, кöмасяс, пристеж босьтас да тöдiсь дынö мунас, тшöктас сы весьтын вына кыв висьтавны. Тöдiсь висьталас: «Этö пристежсö некин оз вермы». Кышалас голяас Матрёна заветнöй пристежсö, ыджытжык тоин бöрьяс, шуас:
— Ме лöсьöтчи, Петра. Петра шуö:
— Эн босьт тоинсö, сiя учöтöв. Матрёна босьтас слега.
— Сiя ыджытöв.
Сэк силачка тырлöс* босьтас.
— Эта лöсялас.
Пуксясö нiя вöввез вылö да мунасö Перемскöй му дорйыны. Гöнитасö, гöнитасö, Перем чулаласö, а сэтöн — бой. Перемскöй войско дойдöм-вартлöм, воевода юрсисö летö, ачыс чуть оз горзы:
— Сё ни Перемсö мырддясö! Петра сылö:
— Эн пов, Матрёнаö уськöтас Латыпасö.
— Дак иньдöт сiйö чожжык!
Петас Матрёна асланым войско одзö, казялас: ыджыт инька, топ зород, миянiссесö калечитö, и некытшöм пуля сiйö оз босьт. Кыдз бергöтчас, кыдз бергöтчас — чикиссезнас дас морт пöрöтас, коккезнас куж-каж керас. Мöдпырись öвтыштас — эшö унажык пöрöтас.
Матрёна лöгасяс, горöтчас:
— А-а, дак тэ Латыпа — идзас стопа?! А ме Матрёна — вачка ёна!
Горöтчас сiдз да кыдз сöтас Латыпаыслö тырлöснас — джын чикиссесö сылiсь шырзяс. А басурманка чывкйö бергалö да миянлiсь йöзсö дойдö.
— Ой вияс, ой быдöс вияс! — тöждö воевода. — Тэ вачкы, бытшöмик вачкы, Матрёна!
Лöсьöтчас, лöсьöтчас силачка да кыдз вартас — Латыпалiсь öстатки чикиссесö летöвтас.
— Вот сiдз, вот сiдз! — ошкö воевода.
Сы коста Латыпа йисö пöрччалас да йинас вачкас — Матрёналiсь тырлöссö кисис уськöтас.
— А-а, дак тэ Латыпа — идзас стопа?! — висьталас Матрёна да голясис пристежсö чöвтас. — А ме Матрёна — вачка ёна! — и кыдз виззьыштас — басурманкасö кыминь водтöтас.
Казялас этö перемскöй войско, «ура» чалöстас-горöтас и Латыпасö кок увтас нöитас, Кудаин-хансö войсконас берездöтас.
Сэтöн вöлись и праздникыс и лоас: куим лун да куим ой Латыпасö ёрдасö да Матрёнасö донтасö, а нёльöт лунас воевода шуас:
— Тэ, Матрёна, Перемскöй мусö дорйин, кор мый тэныт колö.
— Да мый колас? Ме и ассим муöс эд дорйи! — шуö Матрёна.
— Сёравно кор.
Думайтас-керас ыджыт вына инь да шуас:
— Лэдзин бы Петрасö гортö, а то гажтöм öтнамлö. Да изын сет, миян немöн сюсö изны.
Петралö уна эшö коляс служитны, но воевода лэдзас сiйö гортас. И изынсö сетас, и вöв сетас.
Мунасö Петра да Матрёна гортаныс, Сордва ю дорö, да мельница керасö. Вöлись пондасö овны-вывны, песняэз сьывны да сьöрна челядёкöс быдтыны.
* Рекрутö иньдöтны ― иньдöтны служитны армияö.
* Тырлöс ― потш, кöда отсöтöн зэлöтöны додьö тэчöм турун, идзас. Бастрыг.
ЧУМАНОК
Сказка
Оласö-вöласö дед да баб да нылöн быдтас — Машу. Дед да баб вöласö дышöсь и лёкöсь. Быдöс гортся уджсö ковсяс керны Машулö, а эта понда нылочка и бур кыв нысянь оз кывлы. Только и адззывлас гажсö, кöр ыбшар сьылö, кöр кытöнкö пöлян орсö.
Öтпыр мунас Машу вадöрö, пондас гумавны васö да кылас нора горзöм:
Куим кольть позам вöлiсö,
Да лёк тöввез нiйö гусялiсö:
Öтiкö ойвылö нöбöтiсö,
Мöдiкö лунвылö нöбöтiсö,
Куимöтсö ю шöрö чапкисö.
Кöть бы ю шöрсис кинкö судзöтiс ―
Мам сьöлöмсö бы невна лöньсьöтiс.
Видзöтö Машу: кöз вылын дудi пукалö да горзö. Жаль лоас Машулö дудiыс, и сiя шуас:
— Эн жö сiдз горзы, дудi, ме кыска васис кольтьтö, сьöлöмтö тэнчит лöньсьöта.
А сэтчö дедыс горöтлыны пондас:
— Тэ мый маласян, нывкажуг?! Кайöт чожжык васö! Машу оз ешты судзöтны кольтьсö.
Мöдпырся лэдзчас Машу ваысла и бöра кылö дудiлiсь горзöмсö, да эшö норажыка:
Куим кольть позам вöлiсö,
Да лёк тöввез нiйö гусялiсö:
Öтiкö ойвылö нöбöтiсö,
Мöдiкö лунвылö нöбöтiсö,
Куимöтсö ю шöрö чапкисö
Кöть бы ю шöрсис кинкö судзöтiс ―
Мам сьöлöмсö бы невна лöньсьöтiс.
Машу тэчас ведраэсö бокö, чöвтас нинкöммесö, а сэтчö бабыс ножö чирзыны ыждавны:
— Кытчö нö öшин, дышкуль?! Али шатьсö важын ни эн пешлы?
Машу бöра оз ешты дудiлiсь кольтьсö судзöтны. Куимöтпырся нылочка ваысла лэдзчас, а дудi сё сэтöн горзö, да эд норöнся-норöн:
Куим кольть позам вöлiсö,
Да лёк тöввез нiйö гусялiсö:
Öтiксö ойвылö нöбöтiсö,
Мöдiксö лунвылö нöбöтiсö,
Куимöтсö ю шöрö чапкисö.
Кöть бы ю шöрсис кинкö судзöтiс ―
Мам сьöлöмсö бы невна лöньсьöтiс.
Машу пöрччасяс-лэбтасяс да кула-кола ваас пырас, пондас дудiлiсь кольтьсö кошшыны.
Дедыс да бабыс мый вын горöтлöны:
— Кайöт васö! Кайöт чожжык!
А дудi ю весьтас шевкйисьö, Машулö висьталö:
— То кытöн кольтьö, то кытöн!
Машу судзöтас кольтьсö ва пыдöсiсь, петкöтас берег вылö да пуктас турунок шöрö:
— Босьт, дудi, кольтьтö да пукты ылöжык, мед тöввес эз ни гусялö сiйö.
Дудi вевттяс кольтьсö борднас да висьталас Машулö:
— Ме тöда, Машу, тэ радейтан кывзыны кай сьылöм да пöлянлiсь орсöм. Дак вот, кольтьсö судзöтöм понда сета тэныт чуманок, кöда орсны, сьывны да висьтасьны кужö. Кыдз висьталан: «Оссьы да орс, чуманок!», сiя орсны пондас; тшöкты сьывны — сьывны пондас; тшöктан висьтасьны — берсясö висьтасяс. А колас кö сувтöтны, дак шу: «Игнассьы-пöднассьы, чуманок!» — и сiя вевтасяс, чöвны кутчас. Пондан кö сiйö берегитны, сiя сьылас-орсас тэныт куим тöв да куим гожум.»
Висьталас сiдз дудiыс да лэбзяс кольтьнас, а Машу одзö усяс веж симöтiсь керöм чуманок. Учöтик сiя — кырым кык ягöд сэтчö тöрас, но басöка-басöка серöтöм, а вевдöрас — гöрд вевток.
Мöдас Машу кывзыны, кыдз чуманокыс орсö, да казялас, что дедыс шатьöн öвтчö, и дзебас чуманоксö пиас, а вöлись васö кайöтас да миськасьны-песласьны кутчас.
Сiдз и чулалас уджын луныс, локтас сёр рыт. Сэк Машу пырас чуланö, кытöн узьлiс, кыскас писис чуманоксö да висьталас: «Оссьы да орс, чуманок!»
Чуманоклöн гöрд вевтыс оссяс, и пондас горавны чиння голоса пöлян, а тшöтш сыкöт — силькан орсны. Да сэтшöм гажöн — Машулöн сьöлöмыс ны моз жö орсö да сьылö.
Пöттöдз кывзас этö гажсö Машу да висьталас: «Игнассьы-пöднассьы, чуманок!»
Чуманок вевтасяс гöрд вевтокöн, нылочка водтöтас чуманоксö бокас да только и шуас: «То тай вöлись дудiыс орсöмсö мыччалiс!»
Ашыння рытас, кöр мунас узьны чуланас, Машу висьталас: «Оссьы да сьыв, чуманок!»
Чуманоклöн гöрд вевтыс оссяс, и пондас киссьыны ыбшарлöн дзульзьöм. Ножö сьылас сiя, ножö дзирдалас! А кöр дугдас ыбшарыс, öдззасö нывкаэз чалöтны-сьывны, да эд сiдз ни гажöн — Машулöн сьöлöмыс нач бурмас.
Нылочка сувтöтас чуманоксö да только и шуас: «То тай вöлись дудiыс сьылöмсö мыччалiс!»
Куимöт рытас Машулö охота лоас тöдны, мый висьтасьö чуманокыс, и тшöктас: «Оссьы да висьтась, чуманок!»
Чуманоклöн гöрд вевтыс оссяс, и Машу кылас дудiлiсь голоссö:
― Машу тэ, Машу, кытчö нö удерлун ветлiн? Машу висьталö дудiлö:
— Вадöрö лэдзчылi.
— Кинöс сэтчин панталiн?
― Дудiöс.
— Мый дудiыс шуис?
— Тшöктiс кольть судзöтны.
— Судзöтiн я кольтьсö?
— Судзöтi.
— Мый дудiыс сы понда сетiс?
— Симöтiсь чуманок.
— Мыйлö чуманоксö?
— Медбы оланöс гажöтiс.
— Вай и ме тэнö гажöтышта!
Шуас сiдз дудiыс да сказка висьтасяс. Сэтшöм мичаö, сэтшöм басöкö, кöда йылiсь и кылöн он висьтав, и пероöн он гиж.
Сiдз чуманок гажöтас Машусö кык гожум да кык тöв, и нылочка пондас тöдны быдкодь сьыланкывсö да сказкасö. А куимöт год вылас лёк старик гозъя сё жö адззасö чуманоксö да биö чапкасö, и чуманок чижа-важа сотчас.
Эта кузя Машу мунас дыш гозъя дынiсь, и нiя öнi олöны кыт пöт, кыт тшыг, а нять-буссянь керкуаныс ёгтурун быдмö.
Машу ачыс хозяйка лоас и, шуöны, бура пондöма овны. Кыдзкö кывсис тай: и уджавны кужö пö, и гажöтчыны ештö. Да и челядьсö орсöмöн, сьылöмöн да сказкаэзöн гажöтö. Только öнi сiйö шуöны не Машу, а Марья баб. Ме сыкöт пантасьлi, сiйöн и тöда öтi-мöдi сы йылiсь.
Кин йöзöт уна ветлöтö, сiя унажык и тöдö.
Дата добавления: 2015-11-16; просмотров: 40 | Нарушение авторских прав
| <== предыдущая страница | | | следующая страница ==> |
| ЫДЖЫТ НИМА КАР | | | КУЗЬКА ДА ГÖРД БОРДА ТУРИ |