|
Читайте также: |
Сказка
Керкуыс керсьö керрезiсь, сказкаыс — кыввезiсь.
Керрес кö ёнöсь да веськытöсь, а мастерыс бур, дак и керкуыс шогмö бур. Кыввес кö сьöлöмсянь петöны, а висьтасисьыс бур сьöлöма, дак и сказкаыс бур шогмö.
А ноко эта кытшöм шогмас?
Олас-вöлас Кузька, айтöм-мамтöм зонка. Мыгöрнас учöтик, топ зöр кольта, и винерик да вынтöм, а уджавны оз пов. Видзас зонкаыт вöв, мöс да понöс. И оланыс вылö оз лёкöтчы.
Но вот локтас сы ордö беда: öтiк лунö вöвсö цыганнэз гусяласö, мöсыс кулас, а поныс кöин кынöмö сюрас. И кольччас Кузька податöг. И олö тшыг не пöт, кынмалöм не пымалöм, ёрдöм не ошкöм. И некинлö оз понды ковны.
Вöлi вöв, дак нянь быдтiс, пес да турун ваялiс — аслыс и йöзыслö. И гортыс вöлi шоныт, и мöсыс пöт. А мöсыссянь и ачыс пöт, и поныс абу тшыг.
Олас, олас — няньыс бырсяс. Но мый öнi керны, кыдз одзлань овны?
«Ноко кортöн ветлöтышта, — решитас Кузька. — Может, кин картов, кин няньтор мыччас. А может, кинкö уджавны медалас».
Горт деревняас стыд петны, дак иньдöтчас ылöжык, йöз ладорö.
Мунö Кузька, бедьöн беддясьö да ачыс аскöттяс баитö:
— Öтiк котомаö нянь öкта, мöдiкö — лук да картов, куимöтас — чöскыт сёяннэз.
Мунас, мунас, вöр сайö петас, одзас ыббез паськаласö — дорсö синöн он судзöт. Ыббес быдöс вундöмöсь, сюыс шороммезö тэчöм, а шороммес сымда — нылö и лыд абу,
Видзöтчö Кузька да радуйтчö: эстöн бура олöны, эстöн корисьсö берся сёяннас тыртасö.
Пырис Кузька посадö. Сiя гажа, быдöс керкуыс бур киння бур. И быд керку дынын кöин ыжда пон — эн сибöтчы матö, орлалас!
Кузька посадсö кузя нёжас и пасьта нёжас ветлöтас, но некин сылö ыбöс-воротасö оз осьт, некин и кыв оз мыччы, нетолишто нянь шöрöм. Только медбöрья керкуыс, понтöмыс, осьта ыбöса вöлас, да сэтöн сы кодь жö эмтöм морт олöма — амбарын и шырлö нем сёйны. Эта мортыс пыртас корисьсö гортас, сола тшакöн да картовöн вердас, сöдз ва удас, гор вылö шонтiсьны лэдзлас.
Этöн бурмöтас сьöлöмсö зонкаыт да одзлань иньдöтчас.
Куим деревня кытшöвтас да куим торок котомаэзас пуктас: картов, лук да боби тусь.
Мый сэсся керны, кытчö воштiсьны?
Пуксяс туй дорись кöчка вылö, пукалö да тöждiсьö. Сы одзö жагвыв, пöлiнясьöмöн, локтас ыджыт тури: чочком мороса, сьöд кока, гöрд борда — сэтшöм эд басöк! Нырыс кузь да кöрттув кодь ёся (сэтшöмнас кынöмтö шучкöп писькöтас!), а Кузька оз и повзьы: кылö, эта не мукöд кодь, эта бур тури.
— Мыйись тöждiсян, зонка, али кытшöмкö висян кутiс? — юасьö тури. — Али туйсö гортланят öштiн?
— Туйсö гортö адзза, ― шуас Кузька. — А вот кыдз тшыгйöн не кувны, сiйö ог тöд. Он я велöт менö, тури дядь?
Тури кузь нырнас öт бордсö перкйыштас, мöдсö, сэсся висьталас:
— Велöта, зонка. Лок кежав ме ордö, шоччисьышт да сьöкыт думаэтö кокньöтышт. Ме тасянь матын ола.
Тури жагвыв, пöлiнясьöмöн иньдöтчас вöр дорö. Кузька ляшмасьöмöн кыссяс сы сьöрö. Кыз пожум увтын туриыс сувтчас, тарс павкöтчас нырнас пу бердас, и пожум дорыс дзур-вир оссяс, дзик ыбöс, и нiя пырасö пожум пытшкас да инмасö ыджыт öшына керку пытшкö, кöда шöрын сулалö веж пызан, а сы дорын — пукалан джеккез.
— Пуксьы, зонка, пызан дорас да пешлы менчим стряпняöс, — висьталас тури да пызан бердас тарс-тарс павкöтчас нырнас. И сэк жö пызан вылас ольсассяс пызандöра, а сы вылö сувтасö тыра бекöррез, кöднаын и дзирыт сёян, и тшак-ягöд, и ма.
Туриыт вöлöма не только бур сьöлöма, но и богатöй!
Кузька сёйöв-керас да дугдас: оз жö пö ков пöттöм подаöн лоны, мед оз жö кулит туриыс.
― Но и бура сёйи, ― шуас Кузька. ― Чöскыта тэ пусян-пöжасян... Öнi велöт-ко, тури дядь, кыдз пöт мортöн овны, кыдз тэ кодь богатство шедтыны.
Тури пуксяс Кузька бокö, пуктас гöрд бордсö сы пельпон вылö, дзик шальöн вевттяс, да шуас:
— А эстöн, зонка, и велöтнытö нем: олан бы пöта, дак и уджав пöттöдз, а йöзыс нянь вылö öмтö эн осьтлы. Вежöртiн?
— Вежöртi, тури дядь.
— Тэ меным гленитчан, зонка, — баитö тури. — Лок петам öтöрас, сэтчин ме сета тэныт козин.
Тури тарс-тарс-тарс керас нырнас ыбöс кузяс, ыбöс ванйöвтчас, и нiя кыкнанныс лоасö öтöрас, пожум увтын.
— Кытшöм бы козин медодз корин менчим? — юалас тури. — Менам быдöс-быдöс эм!
«Кöбы тэ вермин вöв сетны, — думайтö Кузька, — вот сiя бы вöлi козин!»
Тури лэбтас веськыт бордсö, шуас:
— Кыскы борд увтсим, мый тэныт колö.
Кузька сюйыштас кисö тури борд увтö и кыскас сэтчинiсь сермöт, а сермöт сьöрас петас чочком вöв, доддялöм виль телегаö. Телегаас турун чапкöм, турун вылас сю мешöккез, а мешöккез вылас — золотöй самовар.
Кузька радсяняс и кывджын оз ешты горöтчыны, а тури шуö ни:
— Мый бы босьтiн, зонка, мöд козин туяс?
«Кöбы тэ вермин мöсок сетны, вот сiя бы вöлi козин!»
Тури лэбтас шульга бордсö, шуас:
— Кыскы борд увтсим, мый тэныт колö.
Зонка сюйыштас кисö тури борд увтö, киас шедас джыннян. Кыскас джыннянсö, а сыкöт тшöтш петас паськыт сюра мöс. Кузька радсяняс и кыв оз ешты горöтчыны, а тури бöра юалö:
— Мый бы тэ, зонка, босьтiн куимöт козин туйö? «Кöбы тэ вермин сетны сэтшöм пон, кытшöм вöлi менам!» Тури паськöтас веськыт бордсö, и сы увтiсь чеччöвтас чурдöм пеля, визыв сина сьöд пон.
— Босьт, зонка, козиннэзöс да мун гортат. Да эн вунöт менчим велöтöмöс, — висьталас тури и пырас гортас.
Кузька домалас мöссö телега бöрас, ачыс пуксяс мешöккес вевдöрö, ордчöн золотöй самоварыскöт, вöрзьöтас вöвсö:
— Ны, Сивко, гортö!
Мунö Кузька гортас, а самоварас чай варкйö-пизьö, а самовар вылiсь бекöрын конфеттэз да сахароккез тарласьöны.
Локтас Кузька богатöй посадö, пыралас дорись керкуас, кытöн шоччисис одзжык, сэтiсь олiссесö юкталас чöскыт чайöн да коляс нылö сю мешöк.
Рочаласö Кузькаöс и мöдiк керкуэзö, кöдна дынын авзöны поннэс, да Кузька некытчö оз кежав: некöр, колö гортö тэрмасьны, медбы тöв кежö заптiсьны.
Ай да Кузька, айтöм-мамтöм зон!
БЕДЬПИ
Визыв шорок дорын, учöтик керкуокын, олiсö старик да старуха. Ны гöгöр омöн сунасис пыд вöр, и матын öтiк морт эз ов. Олiс жö ордчöн Ягинь, крут ягсис хозяйкаыс, да разь позьö сэтшöмсö мортнас шуны? Сiя только сы йылiсь и думайтiс, кыдз бы отирыслö мыйкö умöльö
керны, кыдз бы аслас саккезö-куöммезö отирлiсь челядьсö кыйны. Сылöн ныввез вöлiсö, мамныс кодьöсь жö и умнаныс, и чужöмнаныс.
Олiсö, олiсö старик гозъя öтнаныс, да гажтöм кутiс, и шуисö быдтас вайöтны.
Öтöрас мороз шовкöтö — пуэсö поткöтлö, а дед лöсьöтчис туйö. Кöмалiс ыджытжык нинкöммез, пасьталiс лысöм пасьжуг, шоныт шапка пуктiс, киэсö дзебис ноёвöй кеписсезö, босьтiс вужовöй бедь-коколюка да петiс гортсис.
Мунö старик — нинкöммезнас топ да топ, бедьнас тюк да тюк, а кöз йывсянь воробей чивзö-баитö:
— Кытчö, кытчö, пöрись, иньдöтчин? Куйлiн бы, чив-чив, горвыв сёрдын да йирин чорзьöм кöвдöм. Кин тэнö этшöм кöдзытас вашöтö?
— Не вежöртны тэныт, руд шабура, морт нуждасö, — шуö старик. — Вöлi бы миян зонок, дак и васö бы кайöтiс, и пессö пыртiс, и горсö лонтiс да миянöс, пöриссесö, удiс-вердiс, но абу сiя. Может, тэ, руд шабура, зон туйö локтан?
Воробейлö эз гленитчы эта басниыс, мымда вын пондiс чивзыны-чирзыны:
— Чöв, чöв! Эн баит, кöдö оз ков! Менам коккезö оз любитö мусö лойны, менам киэзö оз кужö сьöкыт ноппесö видзны. Кошшы, пöрись, мöдiкöс, а менö эн кор. Чив-чив!
Сайöвтчис воробей кöз уввес коласö, сэсся эз понды старикыскöт баитны.
Лöгасис старик, видчыны пондiс:
— Этта, кыдз кутöма ыждавны! Он лок, дак оз и ков! Да и вöзйисьны кутчан, шыла син, дак тэ кодь няр киасö ог босьтö!
Старик лöгувьяс сiдз тюкнитiс коколюканас, что бедьыс тресь только чегис.
Гогинь-беринь керис юрнас старик, горöтчис:
— И тэ, коколюка, менам добрöй пыкöт, пöрисьман, тыдалö!
Босьтiс сiя чегöм торсö да сюйыштiс конувтас — поди пö, и ковсяс кытчöкö.
Дженытöв лоис бедьыс, и старикыт тöждiсьны, пондiс:
— Но кыдз öнi этшöмнас беддясьны? Сэтчö кинкö шыасис:
— Эн тöжды, деда! Эта бедаыс — абу беда!
Мун гортат и некытчö эн лöсьöтчы. Ме и васö понда кайöтлыны, и пессö пыртлыны, и горсö лонтны, и быдöс уджсö керны.
Дзарьясьö старикыт, ас гöгöрсис мортсö кошшö, да некинöс оз адззы.
— Кин нö этö сiдз баитö? Не Ягинь я отсасьны кöсъясьö?
— Этö не Ягинь, этö Бедьпи — коколюка пиян.
Старик кошшисис-керис пиас и кыскис учöтикö — пань ыждаö — пасьтöм мортокöс.
— Тэ и эм Бедьпиыс?
— Ме, деда.
— И тэ вöлiн менам бедьлöн йыв?
— Вöлi, деда.
— Здравствуй инö, Бедьпи!
— Здравствуй, деда!
— Уна я тэ, сэтшöм учаликыс, отсалан?
— Эн пов, деда, отсала. Дзеб-ко менö бöр пиат, нуöт гортат да зыбкаö водтöт. Узя пöттöдз да сайма — пельняннезöн верд, вот ме и быдмышта. А быдмышта, дак и васö вая, и горсö лонта, и дедöс да бабöс шоччöта и гажöта.
Бертiс старик гортас, бур юöрсö тэрмасьö висьтавны:
— Бабу, бабу! Пет жö öтöрас, пантав зонокнымöс!
Старуха посöдзö чепöссис, юасьö:
— Кытшöм инö зонок, дед, некытчö эн ветлы да? И некин тэкöт абу, кыдз ме видзöта. Али чегöм бедьтö зон туйö лыддян?
А старик сё ошшасьö:
— Эм миян зонок — Бедьпи. Ноко шыась, кага, ась миян бабным казялас вöлись.
— Былись, баба, сiя баитö, — шыасис Бедьпи. — Ме понда тiянкöт овны и быдöс уджсö керны.
Старуха лэдзчис посöдзсяняс, шуис:
— Одö я бöбöтчö тiйö, менам пеллез?
— Мийö, тэнат пеллет, висьталам, мый эм, — шуисö пеллес.
— Мыччась нö, кага, меным. Адззыла, дак и верита вöлись.
Бедьпи мыччис юроксö дедыс пась увтiсь, горöтчис:
— То кытöн ме, баба, пукала — дедö пиын! Видзöтöв-керис старуха да юалiс:
— Одö я бöбöтчö тiйö, менам синнэз? Синнэс шуöны:
— Мийö, тэнат синнэт, мыччалам, мый эм. Старик сетiс Бедьписö старухалö:
— Босьт-ко зонокнымöс аслат киö, дюттьöтышт сiйö, чочком кудриэсö малышт, спинасö лапкöтышт.
Босьтiс старуха Бедьписö, долонь вылас пуксьöтiс, чочком кудриэсö малыштiс, спинасö лапкöтыштiс да юалiс:
— Одö я бöбöтчö тiйö, менам киэз? Не путор я тiйö видзат, ловья кагаöс я?
Киэс шуöны:
— Мийö, тэнат киэт, видзам ловья мортокöс. Бергöтчис старуха сизим ладорö, сизим копыр-поклон пуктiс да шуис:
— Спасибо мулö, спасибо шондiлö — сетiсö миянлö, пöриссеслö, сэтшöм счастьесö! Пырам жö, старик, чожжык керкуас, шонтам да вердам зонокнымöс, пасьтöтам шоныт паськöмö.
Пасьтöтiсö Бедьпиöс акань паськöмö, латтянсёр бердö лайкыт зыбка кышалiсö да и водтöтiсö узьны. А кöр саймис, гор лонтiсö, пельняннез пуисö да пондiсö вердны сiйö.
Сёйис учöт пиянок öтiкö — мыгöрнас кашникся вылынжык лоис. Мöдiкö сёйис — эшö сымда жö нюжалiс. Куимöтö сёйис — пызанся ыджытжык лоис.
— То мый ыжда ме быдми!
Старуха вурис сылö вешьян да йöрнöс, шоныт гунька вурис. Старик басöк нинкöммез кыйис, шапка лöсьöтiс.
Пасьтасис-кöмасис Бедьпи, быдöс гортся уджсö некой пору керис — мыгöрнас учöт, да уджнас перыт!
Шыннялö дед, радуйтчö баб: бытшöм отсасись нылöн эм! Только Ягиньсянь сiйö берегитны колö, а то пышшöтас зоночкатö пашмöм юра старухаыт.
— Яг вöрас старуха олö, дак тэ сылiсь пов, — велöтö бабыс. — Нёштöм и нёштöм сiя: киэс — дзик кураннэз, коккес — чукыля беддез, юрыс — калиг кодь, нырыс — топ косьмöм капуста кок. Öмас кык пинь, да и нiя öтöрас петöмась. Некöр и некöр оз сынасьлы, юрсиас тыр каттисьöма лыс да голи.
— Ме нёштöмсис ог пов!
— Сiя челядьсö сакöн-куöмöн кыйö да гортас нуöтö. И некин сiйö оз вермы кидтыны этаись, — баитö старик.
— Ме ог шедöтчы сылö...
Öтiк лунö Ягинь аслас куöмöн мунiс матi старикыс керку дынöт и кылiс басни:
— Дона дедук! Дона бабук! Бедьпи тiянлö ва кайöтлiс, пес пыртлiс да гор лонтiс, а часöт сiя ысласьыштö бы. Лэдзö менö яг вылас.
Вежöртiс Ягинь, что эта визыв Бедьпиыс — старикытлöн зон, и сылö сiдз охота лоис гусявны зоночкасö, что нельки капуста кок кодь нырыс зелёнöйсялiс.
Старик и шуö Бедьпилö:
— Ысласьнытö ыслась, да не яг вылас. Сэтчин Ягинь олö, сiя кутас тэнö.
— Оз вермы. Муна кöть öтпыр ыскöвта.
Ягиньыс кывзö этö да радуйтчö, и радсяняс нырыс нельки бöра чочкоммыштiс. Йöктö нёштöм старуха, гажöтчö:
— Хой-хо! Бедьпиыс ачыс менам куöмö корсьö! Ноко нюжöта куöмöс яг увтас!
Босьтiс Бедьпи дадёк и кайис яг вылö, а Ягинь важын ни ассис саксö-куöмсö керöс увтас пуктöма да и горöтлö:
— Бедьпи! Öй, Бедьпи! Татчö ыскöвт, татчö! Татöн туйыс öддьöн ни волькыт да валькыт!
— Ау, Ягинь! Ыскöвта, да не тэ дын, а тэнат куöм бокöт! — шуис Бедьпи да вашöтiс дадьсö мöдiклаö.
Ёна гленитчис эта ыскöвтöмыс, и зоночка мöдпырся лöсьöтчис ыскöвтны. А Ягинь бöра:
— Бедьпи! Öй, Бедьпи! Татчö ыскöвт, татчö! Татöн туйыс öддьöн ни волькыт да валькыт!
— Ау, Ягинь! Ыскöвта, да не тэ дын, а тэнат куöм бокöт, — шуис зоночка да вашöтiс дадьсö мöдiклаö.
Ыскöвтiс, кайис яг вылас да и юалö:
— Кытöн нö тэ, Ягинь?
А лёк старухаыт тэчис кыйсяннэсö, вешшис ны дынсянь ылöжык да и шуö:
— Татöн ме, Бедьпи, татöн! Ыскöвт ме дынö, дона, ме тэныт гöснеч сета да эшö лöг Ёма йылiсь сказка висьтала.
Бедьпи паныт:
— Ау, Ягинь! Ыскöвта, да не тэ дын, а тэнат куöм бокöт! — шуис Бедьпи и иньдöтiс дадьсö керöс увтас.
Мöдiс орддьыны Ягиньлiсь кыйсянсö, да как раз и инмис сы куöмö, каттисис сэтчö. Вартчö, мездiсьö бы, дзик кöч, да некыдз оз вермы.
Ягинь радся-рад! Йöктö-чеччалö, куран киэзнас лымсö соровтö да жексан голосöн сьылö:
Гудыр-бадыр, шудыр-мадыр,
Турундыр!
Ой и чöскыта ылöстöмыт
Ысласис,
Да Яг-иньыслö кыйсяннэзас
Кышасис!
Öнi юрсиöс ылöстöмыт
Сыналас,
Кокпятаэзöс ылöстöмыт
Гыжьялас!
Пöттöдз йöктiс да сьылiс Ягинь, вöлись кышалiс ношасö спина вылас и кыскö гортас.
Вартсьö куöмас Бедьпи, дедсö-бабсö кытсалö:
— Дона дедук! Дона бабук! Шедi ме Ягиньыс куöмö, нöбöтö сiя менö гортас! Вöтчö жö сы сьöрö, мырддьö сы киись зоннытö!
Горöтлiс, горöтлiс, да не дедыс, не бабыс сiйö эзö кылö.
Локтiс гортас Ягинь, чапкис ношасö джоджас. Сылöн ныввес — Ера, Ёра да Яра — казялiсö зоночкасö да йöктыны кутчисö: öнi пö лоас миян работник, сiя быдöс уджсö пондас керны, а мийö пö öнiсянь пондамö только сьывны да йöктыны, чöскыта юны-сёйны да узьны.
Казялiс Ягинь, что горыс оз на лонтiсь, öбедыс оз на пусьы, горöтыштiс:
— Öй, ньöр — кузь мыгöр! Ноко казьмöт менам дышкуллезлö, мый ме тшöктi керны!
Строкйис-локтiс ньöр — кузь мыгöр, шлычкöтiс Ягинь ныввезлiсь лядьвейезнысö. Чирзöны-горзöны ныввес, кöсйисьöны одзлань быдöс керны сiдз, кыдз тшöктас мамныс, да гыжьялöны вачкöм местаэзнысö.
Ягинь иньдöтiс ньöрсö аслас позö да накажитiс ныввеслö:
— Ме ветла да видзöта кыйсяннэзöс, а тiйö сы коста пуö öбедсö.
Мунiс сiя, а ныввес давай споритны. Ера шуö: — Бедьпиыс ме туйö ва ваялас. Ёра шуö:
— Не, сiя ме туйö пес пыртлас да гор лонтас! Яра шуö:
— Öддьöн тай мöдат! Сiя ме туйö öбед пуас. Споритiсö, споритiсö — некöда эз вермö. Сэк
Бедьпи ны коласö пырис:
— Эд шумитö весь, ме быдöс кера.
Сiя вайис ва да пес, лонтiс гор и пуис повалика да пöттöдз вердiс сiйöн Ягиньлiсь ныввесö. Кольччöм поваликасö мамныслö лöсьöтiс, но казялiс, кыдз ньöрлöн дульыс петö, и сылö сетiс. Ньöр ньылыштiс поваликасö да узьны водiс.
Пöтiсö Ягиньлöн ныввес да орсны-сьывны кутчисö. Чеччалöны, пиньласьöны джодж шöрас и куим голосöн сьылöны:
Мийö сьылам басöка,
Мийö йöктам басöка,
Сiдз кыдз олам,
Сiдз кыдз олам
Öддьöн-öддьöн гажöна!
Мийö васö ог ваялö,
Мийö джоджжез ог миськалö,
Ог ваялö!
Ог миськалö!
Нем ог пуö, ог пöжалö,
Ог пöжалö!
Сiдз кыдз этö,
Сiдз кыдз этö
Керö Бедьпи быдöс.
Сьылiсö, сьылiсö, йöктiсö, йöктiсö да узьны водiсö.
Бедьпи босьтiс дадёксö, мöдiс гортас пышшыны, а ыбöс вевдöрас джыннян пондiс тронгыны-вартны. Сы шысянь Ягиньлöн ныввес саймисö, кутiсö зоночкасö, гор сайö йöртiсö, асьныс узьны водiсö.
Медбы джынняныс эз понды вились тронгыны, Бедьпи курмалiс кашник пыдöссис поваликасö да лякис сiйöн джынняныслiсь кывсö. Сiя лöньсис и шытöг лэдзис зоночкасö ыбöс саяс, но сэтöн пöрись сюзь пондiс уксыны. Сiдз пондiс, что керку стенаэс зэгалöны.
Саймисö дыш нывкаэс, вöтiсö Бедьписö да бöра керкуас пыртiсö. И бöра сылö ковсис ва да пес ваявны, гор лонтыны да повалика пуны. Пуис, вердiс дыш нывкаэсö, гусьöн сетыштiс поваликасö ньöрлö, джыннянлö, а кöда кольччис — сюзьлö дознас петкöтiс.
Но пöрись сюзь и нюкайтны эз понды, а только несйис.
Сёйисö весь олiссес да бöра йöктыны-вежмасьны кутчисö. Йöктöв-керисö да пондiсö ошшасьны.
Ера шуö:
— Ой и басöка ме йöкта!
Ёра шуö:
— Этö ме басöка йöкта, а тэ ош моз тапикасян!
Яра кыкнаннысö кулитö:
— Баля моз чеччалöны, а шуöны — йöктам! Тьфу!
Ошшасисö, ошшасисö да и юрсиэз бердö кутчисисö.
Бедьпи видзöтiс-керис да горöтчис:
— Эд шумитö весь. Татöн медумнöйыс сюзь, дак ась сiя и висьталас, кин буржыка йöктö. Пыртö сiйö керкуас, ась судитö тiянöс.
Нывкаэс пыртiсö сюзьсö, пуксьöтiсö гор вылö, асьныс йöктыны пондiсö. Чивкйöны-йöктöны, а сюзь видзöтö ны вылö, борддэзнас шовкöтыштлö да уксö:
— Ук-ук-уук! Ук-ук-уук!
А Бедьпи эта кадö гусьöник петiс керкусис, кватитiс ассис дадёксö и давай котöртны, давай котöртны! Котöртiс, котöртiс, яг вылiсь лэдзчис да туй кузя мунö. Мунö, шондiнас да паськыт мунас любуйтчö и горöн сьылö:
Кытшöм бур эд, кöр шыннялö шондi!
Тот-топ!
Кытшöм бур эд, кöр вермалö правда!
Тот-топ!
Кытшöм бур эд, кöр горалö песня!
Тот-топ!
Песня Бедьпиöс вайöтас гортöдз,
Тот-топ!
Зоночка локтiс горт дынас, адззö: керкуыс дзöрö-ветлö, бытьтö ловья, стенаэс куснясьöны, öшыннэс пöлiнясьöны. Мыйсянь нö сiдз?
Осьтiс керку ыбöссö, вожмöвтiс порогсö и сэтöн вöлись вежöртiс: бабыс да дедыс видчöны-тойласьöны.
— Сiя блиныс менам! — горöтö бабыс.
— Бöбöтчан, баб! — оз сетчы дедыс. — Тэ кыкдас блин ни сёйин!
Старуха паныт:
— А тэ эшö унажык! И эн спорит весись: медбöрьяыс — менам!
Вот и мырддясьöны, вот и тойласьöны, сiйö и видзчись, что керкусö кисьтасö. Сэтчö и юалiс Бедьпи:
— А кытöн менам блинö?
Дед да баба казялiсö зоннысö да радмисö и дугдiсö споритны, а медбöрья блинсö Бедьпилö сетiсö.
Дата добавления: 2015-11-16; просмотров: 45 | Нарушение авторских прав
| <== предыдущая страница | | | следующая страница ==> |
| ФОЛЬКЛОР СЬÖРТI ГИЖÖМ | | | ВУДЖÖТÖМ |