ПÖТТÖМ

Пыд вöрын олiс-вöлiс вöр инька ― Кикимора. Не том, не пöрись вöлi да зэв гажа. Пыр вак-вак да вак-вак ― некöр эз тöждiсь. Зверресö гажöтiс, кайесö гажöтiс. И асьсö тожö. Олiсö бы вöрас отир, дак и нiйö гажöтiс бы.

Да эд не только кузьлун ваксис-сералiс, а и ойнас мукöдпыр эз дугдыв. Нельки узикас гусьöника шыннялiс.

И быдöс вöрын олiссес радейтiсö сiйö кыдз ёртöс. Сiдз вöлi тридцать три тöв, тридцать три тулыс. А кöр локтiс виль тулыс, Кикимора лöньсис, кутiс сiйö гажтöм.

Горт вöрас, кытöн гöгöр сьылiсö-гажöтчисö, сылöн гажыс öшис!

Лун-лун шатласьö дзибьяиннэзöт шытöг, не зверьöс, не кайöс оз серöмтöт, а ачыс ― кыдз вамöм курöг.

И ойезнас дугдiс узьны, сё тöлiсь вылö видзöтö, бытьтö зеркалоö нёджжасьö.

Пуксяс рытсяняс мыр вылö да ойбыт не оз вöрзьöтчы, не оз горöтчы.

Сэтшöм кадö и сибöтчис Кикимора дынö Тупка, пуксис пу вылö да юасьны пондiс:

― Мый нö лоис, Кикимора?

― Ог и тöд, ― ыш ловзисис вöр инька. ― Эн и юась! Локтыштiс Руч, сы коккез увтö пуксьыштiс, юалiс:

― Мый нö чöлан, Кикимора? Эн я понды шогавны?

― Ачым ог тöд, мый лоис.

Кыш-паш кыссис Дзöдзыв, Кикимора öлöдзö кайис, юалiс:

― Мый кымöртчин, Кикимора? Али кинкö öбидитiс? Кикиморалöн öтiк басни: ог тöд да ог тöд. Бергöтлiс-керис юрнас Тупка да велöтiс:

― Висьтала тэныт гусьöн: чужты зонöс ― и быдöс чулалас! И Руч, чуксö весöттöн, мыччис кыв:

― Сiдз, сiдз! Пет жöник сайö, кага вай! Да и Дзöдзылок ны моз жö:

― Нылокöс чужты, Кикимора! Вöр инька дöвкис велöтiссеслö:

― Да но тiянöс! Кывзыны нелюбо!

Велöтiссес öбидитчисö да мунiсö сы дынiсь. И сэк Кикимораöс кутiс дума: «А может, сiдз и керны меным, кыдз висьталöны? Ручыс унаöв сярзьö. Но Тупка и Дзöдзыв ― ыджыт тöдiссез...»

Ойбыт мыр вылас Кикимора пукалiс, ойбыт думайтiс да асывнас висьталiс аслыс: «Чужта инö зон! Чужта и одзза мозöн гажöна понда овны!»

Пасьталiс сiя медбур мöдöтчан, кутчис котрасьны аслас дзибьяинöт да кошшыны жöникöс.

Чепöссяс ю дорö, пуксьыштас кокора вылö, бергöтлö юрас да висьтавлö:

― Ежели öтлаасьны Вакулькöт, дак мый сэтiсь петас? Олас мекöт сiя лун-мöд да бöр аслас йирö дзебсисяс... Оз, оз лöсяв Вакульыскöт öтлаасьны!

Петыштас пыд вöрсис кушинö, кöда дорын льöмпуа хуторок сунасьö, аскöттяс баитыштас:

― Эстöн бытшöм Суседку эм. Чунь öтнас олö, рам-рамыник... Оз, оз лöсяв меным Суседушко. Олыштас мекöт неделяок да отирыс дынö бертас.

Сюрöтчас медтшöк пуа местаö, кытöн и зверь-пöткаыс оз ов, сувтыштас пипу увтö да аскöттяс баитыштас:

― А мый, корасьны кö асьсö вöр хозяинсö? Кöть и эг ёртасьö сыкöт, да некöр эг видчö-лöгалö... Сiя, натьтö, лöсялас меным.

Горöтчис этö, адззö: сы одзын Вöрисьыс сулалö. Ыджыт, басöк. Паськыт тошыс да кузь юрсиыс пемыт-зелёнöйöсь, чужöмыс ― дубитöм, ыджыт синнэс ― дзик юкмöссэз, а öмыс четверть пасьта.

Кикиморалö усис тöдвылас, что Вöрись мукöдпырсяс ыжмавлö и лöгöв овлö, но сэтшöмыс сылöн чожа чулалö. Висьтавны кö дженыта ― вежöра ёрт. А видзöтны кö сы удж вылö, дак Вöрисьлöн бурыс и лёкыс öтмымдаöн, кыдз и Кикимораыслöн аслас. И мый мед ни бурыс ― öтiк вöрын олöны. Мый сэсся колö?

И Кикимора пондöтiс Вöриськöт рамыник сёрни:

― Тöдан я, Вöрисюшко: меным зонок колö. Вот и видзöтча-кошшися, кин бы вермас зонöлö айнас лоны. Тэ меным гленитчан. Давай öтлаасям.

Вöрись корснитiс нырнас, öвтыштiс кузь юрсинас да кутчис думайтны. Думайтiс, думайтiс да медодз юалiс:

― А кин пестунавны-быдтыны пондас?

― Ме ачым, Вöрисюшко.

И сэк Вöрись согласитчис гöтрасьны. Да мыля оз? Эд бура баитчисö: чужас кагаыс, дак сiйö мамыс пондас дозирайтны öтнас. Сiдзкö, Вöрисьлö оз понды ковсьыны не вердны, не пасьтöтны кагасö, не киын новйöтны. Нельки сiйö пияныс айöн оз понды шуны.

Эттшöм баитчöмыс и öтлаöтiс Кикиморасö да Вöрисьсö.

Дыр я, чожа я, а Кикимора понда локтiс сiя видзчисьöм луныс, и сылöн öтдруг чужисö зон да ныв. А вöрись куллезлöн приметаэз сьöртi эта умöль. Кöбы кык зоночка нето кык нылочка ― сэк мöдiк дело.

Что Кикимора лоис мамöн, сэк жö быдсöн пыд вöрыс пондiс тöдны. И быдöнныс-быдöнныс повзисö.

Тупка висьталiс:

― Быдöс кайпöлöслö лоас беда! Руч баитiс:

― Быдöс зверьпöлöслö лоас беда! Дзöдзылок кöсйис:

― Миянлö быдöннымлö лоас ыджы-ы-ыт беда!

И ачыс Кикимора вежöртiс, что и сiйö бедаыс оз орддьы: нето сылöн кагаэс куласö, нето быдмасö нечулиммезöн ― не аслыс, не вöрын олiссезлö бурыс оз ло.

Да мый ни сэтöн керан?

Тöждiс-керис Кикимора, ойзыштiс мымдакö да лöньсис: может, лöсялас пö.

И лун-лун сiя орсö пияннэзнас, берся гажсö нылö керö. Бöра рызйöмöн и олö: зверресö серöмтöтлö, кайесö серöмтöтлö. И зон-нывсö тожö. Быдсöн сьöд вöр пасьтас только и кылö вак-вак да рыз-рыз. Нельки ойнас киксö, кöр оз узь. Да и узикас сералö.

А пияннэс быдмöны, нем йылiсь оз тöждö. И тожö быдкодь гажсö аслыныс адззöны: нылыс прокод ваксьö-сералö, а зоныс кайезлiсь поззэз паздö. А мыля не паздыны ― айыс абу, мамыс нем оз шу.

Видзöтö Кикимора ны вылö да шыннялö: нылыс нач и нач сы кодь, а зоныс ― дзик жö Вöрисьыс. И быдмö сiя не лунöн, а быд часöн казялöмöн.

Кытiсь сылö, бедаыслö, босьтсьыны?

Но чожа мыйись Кикимораыслöн гажыс кусiс: зоныс лоис сэтшöм горш, кöда йылiсь сiя пельöн эз кывлы, синöн эз адззывлы. Ештас сёйны да и бöра чирзö:

― Кынöмö сималö! Кынöмö сималö!

И чужöмыс нёштöмся-нёштöм лоис: öмыс паськыт да пиньöла, тшöкаыс кузь. Синнэс ыджыт лёксянь гöрдöсь, горшся-горшöсь. А кынöмнас ― быдса öркынöм.

И Кикимора вились пондiс тöждiсьны, не гажöтчöмви, не ваксьöмви сылö лоис. Нельки узьöтны сiйö дугдiс. Да кыдз оз дугды, кöр пöттöм зоныс и ойнас горöтö ― сёйны корö. Сы ыксöмсянь быдсöн пыд вöрыс оз узь.

Эта кадсянь вöрын олiссес Кикиморалiсь зонсö пондiсö шуны ― Пöттöм.

Öтiк неделяöн Пöттöмыт гортсис быдöс сёянсö сёйис.

Мöдiк неделя костас Кикимора нывнас кок йылiсь усьтöдз котрасисö, медбы öктыны тшак, ягöд да турун вужжез, а Пöттöм туплясьö пу увтын да тэрмöтлö нiйö:

― Кынöмö сималö! Чожжык вайö сёйны!

Сёяс Пöттöм, узьыштас час-мöд да вились сьöд вöр пасьтас ряксö:.

― Кынöмö сималö! Чожжык вайö!

Вöлись Кикимора каитчöв-керис, что Вöриськöт сiдз баитчис, медбы сiя немöн эз отсав сылö. Но каитчы эн каитчы, а овнытö колö!

Куимöт неделя вылас Кикимора нач вынтöмсялiс, пондiс шогавны, а нылыс эшö учöтöв, öтнас оз вермы сёянсö кошшыны. Кыдз Пöттöмсö вердны?

Думайтiс-керис Кикимора да висьталiс зоныслö:

― Тэ абу ни кага, вон мый ыжда лоин. Öнi ачыт вöрав-шырав.

Чеччис Пöттöм ― мыгöрнас керкуысся вылынжык,

кынöмнас кызжык зородся, кöдö вöр дорас морттэз сувтöтöмась.

Мунiс Пöттöм аслыс сёян кошшыны.

Матi гöгöр эз ни вöв не тшак, не ягöд, не турун вуж, дак пондiс ньылавны быдöс, мый горшас тöрö: лягушаэзöс, дзöдзыввезöс, змеяэзöс. И ачыс эз тöд öнöдз, что сiя сэтшöм бытшöма кужö кыйсьыны ― кöть кытшöм зверьöс и кайöс вермис бöбöтны дынас.

Öтiк неделяöн Пöттöм кытшöвтiс пыд вöрсö да сёйис быдöс поснит зверьсö, нельки кöдзывсö.

Мöд неделянас сёйис быдöс кöччесö, руччесö да кабаннэсö.

Куимöт неделяас тыткис кöиннэзöс, ошшезöс, вöрмöссэзöс.

Кикимора да нылыс и керкусö ассиныс чапкисö да дзебсисисö Пöттöмыс шогья ош гуö. Кулöм не ловья куйлöны, дрöжитöны.

А Пöттöм кылiс нылiсь дуксö, сувтiс ош гу одзас да ыксö:

― Пет, Кикимора, да гывьясь тыас! Тэнö ме öнi сёя, а нывтö бöрынжык кежö коля.

Кикимора шуö:

― Кера, зонö, кыдз тшöктан. Тэ узьышт эстöн, а мийö ты дорас ветлам да вывсиным нятьсö миссьöтам.

А зоныс чурка кыза коккезнас топöтö да горшсö летö:

― Онö оз на пет! Кынöмö сималö... Мунö чожажык! Эта кадö матi мунiс ачыс Вöрисьыс и ёна лöгасис: кин лысьтö сы вöрын сэтшöм шумсö лэбтыны? И уськöтчис сiя горöтлiсьыс дынö ― чашьяыс кок увтас ризьöтö-кажöтö.

Кылiс Пöттöм кажöтöмсö, радмис: эта дзибьяинын кинкö тай эшö ловья эм!

Чепöссис Пöттöм Вöрисьлö паныт, уськöтчис сы вылö. Но Вöрисьсö куш киöн он кут: чеччöвтiс сiя вöрысся вылöжык да увья кокораöн усис сэтшöм сук тэльö, кытчö и вöснит кынöма лешакпиян оз тöрöтчы.

Кöда коста Пöттöм кошшис Вöрисьсö, Кикимора велöтiс нывсö:

― Котöрт отирыс дынö да висьтав нылö Пöттöмыс йылiсь. Ась думайтöны, кыдз сы дынiсь мездiсьны. Озö кö нем адззö, дак Пöттöм оз коль ловйöн не миянöс, не нiйö.

Иньдöтчис нылыс отир дынö, а Кикимора котöртiс нюрö да зангисис кизьöр нятяс берег дорсяняс ылöжык ― только юрси пилиммес тыдалöны, дзик кöчка вылын осока, да джын пельыс ― медбы вöрсö кывзыны, да крючок кодь нырыс ― медбы лоласьны.

Кылiсö отирыс лёк беда йылiсь, кутчисö Кикимораöс видны, мыйлö сiя быдтiс сэтшöм öркынöмсö.

И висьталiсö сiдз:

― Кикимораыс сылöн мам, дак ась сiя и видзö зонсö! Мöдiккез шуисö:

― Колö миянлö пышшыны татiсь и быдöс подасö сьöраным нуöтны, сэк Пöттöм тшыгйöн кулас.

Куимöттэс горöтчисö:

― Сы дынiсь он пышшы. Сiя вöтас миянöс и быдöннымöс сёяс. Кеймисям-ко Шондiыслö, медбы сiя босьтiс миянöс гортас.

Кеймöны отирыс Шондiлö, корöны сiйö:

― Шондi! Эн сет миянлö кувны, босьт ас дынат! Шондi висьталö:

― Ме бы рад отсалi, да менам сэтшöм жар, что тiйö сотчат сысянь. Думайтö, кыдз позьö аслыныт бедасö вашöтны.

Висьталiс сiдз Шондiыс да мунiс узьны. Кымöр дорас петiс Тöлiсь, и отирыс пондiсö кеймисьны сылö:

― Тöлiсь! Эн сет миянлö кувны, босьт миянöс ас дынат. Он кö босьт, сёяс миянöс Пöттöмыс.

Тöлiсь висьталö:

― Ме бы рад отсалi, да менам сэтшöм кöдзыт, что быдöнныт кынмат. Асьныт думайтö, кыдз му вылас ловйöн кольччыны.

Висьталiс сiдз Тöлiсьыс да пырис юра кымöр сайö. Казялiсö отир кымöрсö, кеймисьöны сылö:

― Юра кымöр! Эн сет миянлö кувны, босьт миянöс ас дынат!

Юра кымöр висьталö:

― Ме бы рад босьтi тiянöс, да менам абу му кодь чорытыс. Асьныт думайтö, кыдз тiянлö ловйöн кольччыны.

Жöв керсисö отирыс: кыдз Пöттöмсö ылöтны? Абу разь нем сысся вынажыкыс?

― Эм сэтшöм выныс, ― висьталiсö отирлö мывкыд юра стариккез. ― Эта выныс ― ми асьным. Висьталö кузнецлö, медбы сiя дорис кöртовöй ньöвьёссез, а тiйö лöсьöтö ньöввез. Тöдö: вöрись злодейлö отирыс оз сетчы!

Ойбыт кузницаын клёнöтiсö молотоккез, ойбыт деревняись отир лöсьöтчисö пессьыны Пöттöмкöт. Только Кикиморалöн нылыс котрасис керкуэз бöрöт да кошшис места дзебсисьны, кытiсь бы сiйö эз судз Пöттöм. А сiя ойбыт кошшис мама-нылаöс да сiдз и эз вермы адззыны.

Асъяпон сьöд вöр пытшкын кылiс эрзан шы.

Зэгнитчис эта шысянь деревняыс, но эз дзебсись, а петiс Пöттöмлö паныт. И сэк жö вöрсис тупыльтчис-мыччисис гöна чуд да бакöстiс:

― Сёя бы-ы-ы!

Отир медодз казялiсö ыджытся-ыджыт, дзик йики короб, кынöм да чукыля коккез. Öмыс оссьöм-öшöтчöм моросöдз, тырп вевдöрас мыччисьöмась, дзик пиня туввез, кык ковпинь.

Эз повзьö отирыс, эз пышшö, а зэвжыка ньöввезнысö кутiсö.

Мунö-тапикасьö Пöттöм, ачыс горзö-баксö:

― Сёя бы-ы-ы!

А отирыс только зэвжыка оча пельпон керсисö. Тэрмасьö Пöттöм, пиннесö гичыралö да авзö:

― Быдöннысö сёя-а-а!

И сэтöн отирыс эз повзьö, эз пышшö горттэзаныс, а öтдруг лыйисö Пöттöмлö кынöмас. Уна ньöвьёсь мöртчис кынöмас, и нiя поткöтiсö öркынöмсö шöри.

Усис лёк чуд му вылас, а сы кынöмись, дзик осьта воротаись, петiсö гырись и поснит зверрез ― быдöнныс ловьяöсь ― да сьöд вöрö уськöтчисö.

Ны сьöрö жö котöртiс Кикиморалöн нылыс, кöда сайласьöма öвинын. Котöртö да радувьяс, что ловья, ваксьö. Тэрмасьö сiя мамсö бур юöрöн гажöтны да сыкöт эта гаж кузя йöктыштны.

Быдöс сьöд вöрсö нылыс гöгöртiс, да эз адззы мамсö: Кикимора пöдöма нюр ванас да и вöйöма.

Но мамыс понда нылыс эз понды горзыны: вöрын олiссез оз тöдö жальсö.

И Кикиморалöн ныв пондiс овны чуддэзлöн гажа оланöн да кутчис зверресö и кайесö серöмтöтлыны. И асьсö тожö. Пыр вак-вак да вик-вик! Вак-вак да вик-вик!

ВИДЗМОРТ

Олiс-вöлiс чочком юрсиа да лöз синока зон Пронька, айтöм-мамтöм. Ордчöн сыкöт олiс богатöй мужик. Сiя мужиклöн вöлi öтiк ныв, зоннэс эз вöлö. Вот и босьтiс богатöйыс Пронькасö бытьтö зон туйö, а былись-то сылö удж керись колiс. Уджалiс Пронька пемытсянь пемытöдз, а хозяиныслö эта сё етша вöлi. Зонкаыслö сiя и гаж вöлi, что сэтöр сина Матонька, мужикыслöн нылыс, бура жалейтiс сiйö да быдлаын отсалiс: нiя учöтсянь ёрттэзöн вöлiсö.

Кыдзкö видз вылын ытшкисикö Пронька пуксис пуок увтö шоччисьны. Пукалö, видзöтö пуокыс вылö да дивуйтчö: листтэс топ рябиналöн, а качыс ― пожумлöн.

― Мыйкö тай эг и адззывлы ме тэнö одзжык, ― висьталiс

Пронька пуокыслö. ― Кöр инö тэ, ёртушко, быдмынытö ештöмыт?

Пуокыс чöлö, нельки улокыс тöв вылас оз вöрзьышт.

Локтiс Матонька ― зонкалö павжун, вайис. А сы бöрсянь и Маська коза котöртöма.

Пронька сёян бердö кутчис, Матонька туруннэз öктö, а Маська пуокыс дынö кыссьö, медбы листоккезöн да качöн öмсö чöскöтны.

Пуокыс пондiс уввезнас öвтны, листнас кышöтны. Пронька казялiс этö да вашöтiс козасö:

― Тэ мый сэтшöмсö керан? Етша разь видз вылас сёяныс? Эн тшыкöт пуоксö, ась быдмö шогавтöг.

Маська бокö мунiс, а пуокыс дынö Матонька сибöтчö, медбы улок чегöтны.

Пуокыс пондiс уввезнас öвтны, листнас кышöтны. Пронька казялiс сэтшöмсö да сувтöтiс Матонькасö:

― Тэ мый керан, Матонька? Эн вöрöт, ась басöк быдмö.

Матонька кывзiс зонкалiсь тшöктöмсö, эз вöрзьöт пуоксö.

И былись: мыйлö улокыс, кöр сы киын туруныс сывтыр öктöма.

Мунiс Матонька гортас, а Пронька кутчис ытшкисьны.

Ытшкö да ытшкö, а пуокыс, кылö, бöра листнас шумитö. Видзöтö Пронька: пуокыс дынö сылöн вöлыс сибöтчöма да листоккесö чеплялö.

Пронька горöтiс вöлыслö:

― Тэ мыля ыжмалан?! Разь видз вывсис туруныс оз тырмы? Эн вöрöт пуоксö, ась быдмас сiя ён.

Кыдз Пронька горöтчис энö кыввесö, пуокыс эз ло, а сы местаö кысянь и лоис морт ― зелёнöй паськöма, зелёнöй шляпаа, а шляпа бердас лякöм-тэчöм цветоккез. И юрсиыс зелёнöйкодь, читкыллес пельпон вылöдззас öшöтчöмась. Зелёнöй улокöн öвтчö, ачыс шыннялö.

Повзис Пронька, нем оз письты горöтчыны ― кыввес горшас сибдiсö. А мортыс шуö:

― Тэ менчим эн пов, ме ― Видзморт, татiсь хозяин. Талун охота лоис пуокöн овны, да невна эз дойдö менö. Сы пондаись, что тэ эн лэдз менö öбидитны, ме тэнö ас мознам козьнала.

Пронькалöн чулалiс повзьöмыс, и сiя висьталiс:

― Меным нем понда козинсö сетны, тэ весь тöждан.

― Тэ шедтiн сiйö. И босьтан... Дак кывзы менö. Ыджыт кыдз увтас, кöда туй дорас быдмö, клад куйлö. Тэ ойнас гарйы сiйö да аслыт босьт.

Сэтшöм делоыс не Пронька сьöртi:

― Кыдз ме йöз пуктöмсö босьта? Эд сiя кладлöн, натьтö, хозяин эм!

Видзморт лöньсьöтö:

― Шуи тай: босьт! Вöлi хозяиныс, да кулiс и некинлö эз кöсйы сiйö. И öнi сiя менам, сiдз кыдз менам муын куйлö. Но меным сiя оз ков, и ме козьнала тэныт.

Пронька кывзiс Видзмортсö и сiя жö ойö кыдз увтсис гарйис сундук, а сундукас вöлöма меднöй деньга. Сундукыс ыджыт, сьöкыт, и мортытлö ковсис деньгасö содззезöн куравны да мешöккезö тэчны. Бур, что вöлöн локтiс, а подöн и джынсö бы эз вермы нöбöтны.

Эта клад дорын и чулалiс ойыс, деревняас локтiс вöлись шондi петандор. Мунö да сундук вылас пукалiкö сьылö. Сы сьылöмсянь йöзыс саймис да деревняас петiс: кытшöм пö мортытлöн сэтшöм гаж? А Пронька сундуксö осьтiс ― видзöтö пö, мый меным сюрис! ― и йöзыс эта дивосянь шай-пай лоис!

― Лöсялiс дак лöсялiс зонкаытлö! ― дивуйтчöны мужиккез. ― Кöть пятакöн бы миянлö шупкис!

Пронька бергöтлö юрас: «Эта деньгаыс меным весь дöнзис, дак мыля бы и не юкасьны аслам соседдэзкöт?»

И пондiс сiя быд мужиклö содзнас сетавны, быд инькалö кырымнас, зон-нывлö ― чепöльнас, учöт челядьлö ― деньгаокöн. Некинöс эз орддьы, не рамöс, не лöгöс.

Кылiс эта йылiсь ай кодьыс да уськöтчис Пронькалiсь деньгасö босьтны, но сундук пыдöссис адззис кырым мымда деньга.

― Ок, Пронька, Пронька ― ылöстöм юр! ― видчö-кöритчö мужик. ― Мыля деньганас чапкасян? Вайин бы гортö быдöс, и пондiм бы овны тэкöт купеццез моз!

Пронька сэтчö горöтчис:

― Эн тöждiсь, ая, миянлö и эта тырмас! ― и быдöс, мый кольччис, сетiс сылö, только пятак босьтiс, медбы Матонькалö пряниккез небны.

Ашынас Видзморт вились локтiс Пронька дынö да висьталiс:

― Тэ кладсö аслыт эн босьт ― и бур. Öнi сета тэныт серебрянöйö, сiя куйлö öшмöс дорись ыджыт из увтын.

― Но кыдз ме йöзыслiсь босьта?

― Сiйö кулан одзас пуктiс инька. Сiя вöлi öтка и ассис богатствосö жалейтiс йöзыслö кольны. А öнi кладыс тожö менам. И ме сiйö козьнала тэныт. Мун сэтчин ойнас да и босьт.

Пронька и мöд кладсö гарйис да шондi петандор сьылöмöн пырис деревняö. Отирыс саймисö, кытшöвтiсö Пронькалiсь телегасö, кöда вылын сулалiс ыджыт сундук. Зонка сэк жö и осьтiс сундуксö да быдсöн ректiс сiйö, не томöс, не пöрисьöс эз öбидит: мужиклö содзтыр сетiс, инькалö ― кырым, томмеслö ― чепöль, челядёклö ― деньгаок. Аслыс кык кырымок колис.

Уськöтчис Пронька вылö ай кодьыс:

― Мый инö бöра керин, письтöм юр?! Эттшöм богатство öмись лэдзин! Сымда деньганас позис баринöн лоны!

― Эн видчы, ая, миянлö и эта тырмас, ― висьталiс Пронька да сетiс, мый кольччис, ай кодьыслö, только рубок колис, медбы Матонькалö сапожоккез небны.

Куимöдз лунас Видзморт панталiс Пронькасö сэтшöм кыввезöн:

― Но и морт жö тэ, Пронька! Бöра тай немтöг кольччин!.. Да мед ни, ме тэныт мыччала куимöт клад. Сiя дзебöм нюр шöрись мысок вылын.

― И тожö некинлöн?

― Сэтчин олiсö камскöй разбойниккез. Нiя вöйисö Кама юас, и кладыс менам лоис. Босьт и сiйö, козьнала тэныт.

Пронькалö тöдвылас усис пословица: «Сетöны, дак босьт, вартлöны, дак пышшы» ― и кöсйисис босьтны.

Вот сiя ойнас мунiс нюр шöрись мысок вылö, гарйис да адззис ящик. Сiя вöлi унаöн сьöкытжык одззаэзся: сэтöн куйлiс золотöй деньга. Буракодь мырсис, но кыскис ящиксö, тöбалiс телегаас и шондi петандор сьылöмöн пырис горт деревняас. Сылiсь телегасö кытшöвтiс отир, и сiя кир-пар ректiс ящиксö, только куим деньга колис аслыс да öтiкö ― Матонька мöдöтчаннэз понда.

Варыш моз уськöтчис Пронька вылö ай кодьыс, зверь моз рявзö:

― Мун, р-р-розор-р-ритель, вакр-р-рамеш! Сэсся видзöтны ог вер-р-рмы тэ вылö! ― И сöтiс Пронькалö плетьöн.

Матонька мöдiс дорйыны Пронькасö, но айыс и сiйö вашöтiс гортсис ― мун пö да вексö маитчы-ов!

И мунiсö Пронька да Матонька кошшыны паськыт му вылiсь ассиныс шуднысö. Кытшöмкö деревняын нiйö пыртiс гортас öтка баб. Сiя лэдзис овны нiйö недыр кежö, да сэтчö пыр кежö и кольччисö.

Пронька босьтiс вöв да мöс, пондiс нянь быдтыны ― ачыс хозяин лоис.

И бабыслö бур, и томмеслö бытшöм. Олöны!

Дата добавления: 2015-11-16