Боболь Ванялöн шапка 2 страница

Прокоп казялiс Егорлiсь состояннёсö, шынньöвтiс:

— Киэт, киэт! Эн я Пальникас курöггез гусяв? Ноко, вай лыддьöта.

— Лыддьöт, сват...

Заметкаын вöлi гижöма, что Волысина деревняись колхозник Сергей Платонович Волысин, районнöй посадö локтiкö, адззöма туй вылiсь бумажник. Сыын вöлöмась документтэз да сто рубся унажык деньга. Документтэс сьöртi и тöдöмась, что бумажниксö öштöма Тубызовскöй сельпоись заготовитель Семён Бабкин. Бумажник сетöма владелецлö.

— Вежöртiн? — юалiс Прокоп.

— Э-э...

— Но-но! Адзза, вежöртöмат. Ладно инö. Прощай, сват, — тэрмася. Праздникнас кежала Тубызас. Может, и тiянö пырала сурок юны. А газетасö сет учительыслö...

Прокоп мунiс. Осьта öшын увтöт оськалiкö сiя виш-виш керис воздухсö, нюмыртчис. Öшынöт петiс страшнöй дук. Сiя дзик нöшöн сöтiс Прокоплö ныр кузя. «Но-но!» — кылö шуис Прокоп и сайöвтчис пельöс сайö. А Кона Егор эз вермы вöрöтчыны, сулалiс посöдз дынас, павтыралiс газетасö и дугдывтöг нюлiс кывнас кöс тырппесö. Вежöртiс я быдöс, мый лыддьöтiс почтальоныс, — висьтавны сьöкыт.

Боболь Ваня ештöма ректыны бекöрсö и, бур öбед бöрын кань моз мурзикö, пöлiнясьöмöн петiс керкусис. Вöлi сiя дзик код: синнэс пöльтчöмась вирöн, гöрдöтöм тырппез вылас кынмöма ылöстöм шынньöв. Кушман сидзöма, тыдалö, сьöлöмöдз и, кыдз крепыт вина, вöрзьöтöма вирсö.

Егор дынö сибалiкö Ваня горзьöтiс:

— Тувдöмыт тай! Кинкö öбидитiс разь?

— Э-э... адззисьöма эд деньгаокыс, — юöртiс сылö Егор.

— Мы-ы-ы-й?

— Адззöмась, мыся, деньгаоксö. Зонкаö öштывлöма кöдö. То тай гижöмась.

Ваня дугдiс шыннявны, сразу садясис. Киэс сылöн öшöтчисö, тошыс треситчис.

— Кин адззöм? Мыля?

— Платон Серга Волысинаись... адззöм...

— И сетöм?!

— Сетöм. Честнöй мортыс вöлöма.

— Хо! Тöда ме Платон пиянсö. Некöр умнöйöн эз лыддиссьы. Да кыдз жö сiдз: адззöм деньга и сетöм? Позьö разь?

— Неужто оз позь? Тэ бы, шуам, адззин, дак неужто бы эн сет?

— Ме? Деньгасö? Мый тэ и юасян, сэтöнкан...

Ваня öддьöн лöгасис. Сiя дугдывтöг сьöласис, сьöласис сiдз, что пашмöм тошыс, кытöн сё эшö вöлiсö нянь крöшкиэз, чожа пондiс вачкисьны сэрпöсь бон вылö, кöдöн неважын миськалöмась джодж и вунöтöмась, кыдз колö пидзыртны. Быдöс видыс Бобольлöн баитiс: «Кыдз жö сiдз: сетöма сто рубся унажык деньга! Вот срамыт! Да позьö разь?» Медбы лöньсьöтны асьсö, Ваня босьтiс зор, сöтiс лöгувьяс кер кузя и быгыльтiс сiйö потшшез кузя. Страшнöй сiя вöлi эта минутаö, öддьöн страшнöй. Егор каитчис ни, что висьталiс деньгаыс йылiсь и, медбы юрыс эз шед зорыс увтö, невна петитчис Ваня дынiсь.

— Но, сэтöнкан, тшупсьыны колö! — шуис Ваня.

Кона Егор эшö ылöжык вешшис сы дынсянь и вöлись висьталiс, что тшупсьыны сэсся оз понды. Сiя сетiс газетасö хозяйкалö, кöда локтiс кысянькö пельöс сайсянь, пуксис поспу вылö и пондiс видзöтны, кыдз нервничайтö Ваняыс: «Завидуйтö Боболь, жалейтö, мыля не сiя адззис... Но и морт! И этакöт ме ёртаси... Ох, тöдi бы, тöдi!»

Да, эта сiдз.

Рытъяв кадö школаись локтiс учитель, и сэтöн жö, срубыс дынын, Кона Егор получитiс расчёт. Сiя дыр бергöтлiс киас нöитöм бумажкаэсö и, тыдалö, эз тöд, кытчö нiйö воштыны. Но вот жагвыв дуллялiс веськыт кисис кык чунь, солиднöя и важнöя лыддис быдöс, тэчис бытшöмика, кыдз кассир — гырисьжыккесö увдöрас, руббез — вевдöрас, мыйкö думайтыштiс и перыта, дзик бумажкаэс сотiсö кисö, сюйыштiс нiйö кытчöкö пиас. Наблюдательнöй морт казялiс бы: Егор рад и не рад эта деньгалö. Кытшöмкö кыкпöвса выраженнё везъялiс чужöмсö, тырп дорресö. Эта выраженнё дзик баитiс: «Эм деньгаок, мыйкö небны позяс, — и сэк жö кöритiс: — Пырöв-керин грехас, пöрись чёрт!»

Боболь Ваня сулалiс сэтöн жö, ордчöн Егоркöт, и орöттöг видзöтiс сылö öмас. Синнэс сылöн югьялiсö нёштöм биоккезöн, тошыс треситчис эшö öддьöнжык, нежели öнтай.

— Бöбöтiн тэ менö, Егор, вот кыдз бöбöтiн!

— Мыйöн?

— Эшö юасьö — мыйöн... Да кин жö оз тöд, что увдöрись ряддэсö кокнитжык тшупны, нежели вевдöриссесö. Вевдöрас лэбтавны колö керресö, а увдöрас только быгляв да быгляв. Думайтi, бытшöм тэ мортыс, сiйöн и соглассё сетi: öт джынсö тэныт, мöдсö меным... сэтöнкан... А тэ хитрöй вöлöмыт. И жаднöй. — Ваня керис вид, бытьтö сiйö öддьöн öбидитiсö. — Увдöрись ряддэсö кокнитжык тшупны, дак тшупсис, а кыдз колö керрез лэбтавны, дак шагом марш гортö...

Кывзыны этö басни учительлö вöлi неинтересно, и сiя пырис керкуö. Егор сюйыштiс черсö коскас, лöсьöтчис гортлань. Но Боболь Ваня кутiс сiйö сосöттяс, кöин моз дзарнитiс синнэзас:

— Не-е, сiдз оз лöсяв! — горöтчис сiя. — Тэ вот мый... Давай лыддисям морттэз моз, а вöлись и мун...

— Кытшöм эшö... э-э... лыддисьöм? — дивуйтчис Егор.

— Джын пай тэ босьтiн? Сымда жö, мымда ме? А мый понда? Тэныт етшажык бы колiс, сэтöнкан... раз вевдöрись ряддэсö öтнам понда тшупны, то меным ыджытжыкö пайсö колö...

Кона Егор ниртiс кымöс кучиксö, кваркышалiс синнэзнас. Сiя старайтчис вежöртны, мый этö сэтшöмсö сюльтыртö ёртыс, кытчö сiя пиньöвтö, и кöр вежöртiс, — ёна лöгасис. Охота вöлi сьöвзьыны Бобольлö чужöмас, висьтавны нятьöсь кыв, но сэтшöм кылыс дзик нарошно эз пантась, а керны мыйкö колiс, и Егор резкöя нетшкöвтiс Ваня киись соссö, шупыта кыскис писис деньга, метитчис и быд вын свиснитiс ёртыслö чужöмас. Нöитöм бумажкаэз дыша лэбзисö öтмöдöрö. Öтiк веж руб, кыдз кельдöтöм арся лист, лякасис Ваня тошö, сибдiс сэтчö.

— Джагав, каналья! — горöтчис вöлись Егор и чуть ли не котöрöн чепöссис Тубызлань.

Туй вöлi нильыг. Кизерик нять сулалiс гöпоккезын, мукöдлаын быльсъялiс сöнöг сора гудыра ва. Но Егорлö некöр вöлi кошшыны кöсжык местаэсö, лэбзис веськыта — кытчö павкис кокыс, а кытчö и эз. И только сэк, кöр локтiс вöр дорöдз, сувтiс лапыт кöз увтö и невна шоччöтiс ловсö. Лöгыс Боболь вылö казявтöг чулалiс, но кытöнкö пыдын-пыдын, самöй сьöлöм пыдöсас, сё эшö поздiсис öбида, и Егор аскежас видiс Ваняöс канальяöн, ёрдöм коскаöн. Сэсся вдруг паськыта шынньöвтiс, жаднöя кыскис моросас воздух. Мезмис, мезмис сiя, колис позорсö Пальникö! У-фф! И быдöс сiя, мый маитiс медбöрья куим лунö Егорöс, кыдзкö казявтöг öшис, пöртчис туманö, кöдö сэк жö рознитiс кокнитик тöлок. Деньга йылiсь одзза дума, зоныслöн бедаыс кажитчисö öнi сэтшöм учöтик тороккезöн, кöдна вылö и сьöвзьыны неохота. «Главнöйыс — совесть, — думайтiс Егор. — Сiя не резиновöй, он нюжöт...»

Вöр дорас бобгисö кöччез, сьылiсö ассиныс немудрёнöй любовнöй песня. Чуть ылынжык, тэлляинын, курзiсö таррез. Кона Егор, пöрись вöралiсь, кывзiс энö тулысся шыэсö öшöтöм пеллезöн и быдöс душанас кывзiс природалiсь ловзьöмсö и сё шыннялiс и шыннялiс, кöть тöдiс, что некин оз казяв сылiсь блаженнöй настроеннёсö. Сiдз шыннявтöн и нетшкöвтчис сiя местасис, оськалiс вöрöттяс. Вöрын, тшöк пуэз коласын, сё эшö куйлiс кöс лым. Луннас сiя пондывлöма сывны, а öнi, кöр сайöвтчис шондiыс, вевттисьöма кыз коркаöн, и сiя стекло моз кажöтiс сьöкыт сапоггез увтын. Мукöд местаын, кушиннэзын, лымыс сылöма ни досповна, и мунны нятьöттяс вöлi сьöкыт: коккез нильдалiсö и лякасисö муыс бердö. И кыдз нарочно сэтшöм местаэзын тöдвылö усьлiс Боболь Ваня. Кытчöдз сiя локтöм, каналья. Деньга вермöма мортсö, пöртöма кöинö и вот, натьтö, вийис бы сiйö, пöрись Кона Егорöс, если бы эз свиснит чужöмас деньгасö. А мыля сiдз шогмис? Да муокыс наказывайтö! Калькалiс муыс бердiсь, вунöтiс сiйö — и прощай мортлöн достоинство, няньбыдтiсьлöн честь!

Егор сiдз ылалiс эта рассуждайтöмöн, что эз и казяв, кыдз пондiс баитны горöн, дзик ордчöн мунiс эшö кинкö ловья:

— Сьöвзьы пö колхозыс вылö! Вот порсь... Вунöтöм, что колхозыс и эм сiя улыс, кöда вылын пукалö быд крестьянин. Керав сiйö и пöртчан бобольö, лоан кыдз кок увтам эта нятьыс: сувтöтны оз жö вермы, а мунны мешайтö...

Тубыз дынö сiя сибалiс, кöр вöлi совсем ни пемыт. Деревняын öтi-öтi югьялiсö биоккез, мигайтiсö и вöрисö пемытiнас. Керкуэз тöдчисö неятнöя, вöлiсö дзик лажмытик руд вуджöррез, и ны дынын эз кыв öтiк шы торок, бытьтö нырыштöма быдöс тулысся уль пемытыс, сывьялöма — нельки поннэз онмöссьöмась лунся заботаэз бöрын, ляв оз керö. Эттшöм гажтöм пораö Тубызiсь öдва ли кинöс панталан, но Егор, полiс шедны паныт кытшöм-либо тöдсалö и решитiс мунны карчйöррез увтöт, лог пöлöн, кöда пыдöсöт, кылö, больгис ни шорок. Кусiньтчöмöн, чуть я не чибу-чаньöн, сiя кайис крут берегас и, медбы не таравны бöр, кутчисис лажмытик йöр бердö. И вдруг öшöтiс юрсö. Мыйкö нёштöм пырис бöра сьöлöмö, дойдiс морос. «Шабашник... тьфу! Вот кытчöдз локтi, — шушкисö сылöн тырппес. — Деревня шöрöт мунны пола, дзик вор». Юрын кильöтчис бöра сiя важыс: «А мый, вашöтiсö кö? Вашöтiсö парниккез дынiсь? Позор! Эх, тöдi бы, тöдi...»

Да, если бы тöдiс Кона Егор, кытшöм сьöкыт честнöй мортлö лоны шабашникöн, некöр бы эз кутчись Боболь Ванякöт. Если бы тöдiс, кытчö усяс, ольсалiс бы сэтчö мый-нибудь. Но оз тöд морт, мый сыкöт лоас... Да. Но висьталам дженытжыка: гортас Егорöс видзчисьöма эшö öтiк виль юöр. Зоныс вежтiсьöма сельпокöт и петöма удж вылiсь. Тубызовскöй бригадир Степан Степанович Меливасин — бур сiя мужичок — сетöма Сенялö трактор, и зонка лöсьöтчö öнi сев кежö.

— Эта быль?! Висьтав... э-э... быль? — нятьöсь сапоггесö порог дынын гыжтöтiкö, юасис Кона Егор. — Молодец, зонö! Важын сiдз колiс керны! Бур! Сувт, батя, му вылас, чорыта сувт кыкнан кокнат. И нем оз пöрöт... Э-э... А деньга сьöрын не миянлö вöтлiсьны. Деньга ачыс локтас гортö сы дынö, кин оз вöтлiсь.

Пызан сайын пукалiкö, Кона Егор аппетитöн сёйис пым шыд и бöра баитiс:

— Деньга... Мыйлö сiйö только керöмась... каналья!

ОЙСЯ ЦВЕТТЭЗ

Кöр Льöмва сайсянь пöльтыштас тöлок, сэк юыслöн чужöмыс дзик моршитчö, и кокнитик валлэз тэрмасьöмöн локтöны менам поплавоккез дынöдз, вöрöтöны нiйö. Эта жö кадö дрöгнитöны паськыт уввеза пипуэзлöн листтэз, и спина сайын расыс пондö гажöн шушкöтчыны. Но тöлокыс сэтшöм вынтöм, что минута бöртi öшöны юыслöн чукыррес, пипулöн листтэз öшöтчöны — и бöра быдлаын шы не тöв.

Пукавны сьöкыт. Кöть сибалö ни рыт, а июльскöй шондi сё эшö пöжö жалейттöг, визывтö ньылöм. Номмез — а нiя татöн быдса кымöррезöн лэбалöны — лякасьöны чужöм бердö, дзингöмöн пырöны йöрнöс сикöдж увтö, и менам яйкучикö важын ни садейтö сiдз, бытьтö койыштiсö сы вылö крепыт кунва.

А юрын думаэз кокнитöсь, гажаöсь. Мортлö пыр овлö долыт, кöр сiя локтас сэтшöм пельöсокö, кöда чужтö памятяс приятнöй касьтылöм. Меным эм мый касьтывлыны. Мöйму, эта жö кадö, неделяся дыржык ветлöтi эна местаэзöт, узьлi, кытöн шедас: кöз увтын, ю дорын, киссьöм сарайын, быд лун кошши тшаккез да ягöд, чериалi. Гортö татiсь нöбöтi ыджыт туисын свежöй щукаэз, тело вылын — бронзовöй загар, пельпон вылын, кыдз сёрöнжык баитiс öтiк тöдса, вайи городö пуд здоровье.

Ме тöвбыт мечтайтi, кыдз бы вились сюрны Льöмва вылö, эта гажа пельöсокö, и талун, павжун кадö, паром вылын вуджи паськыт таёжнöй ю Вильва, невна шоччисьыштi кузь туй бöрын Тыраяг деревняын, сэсся вит верста мымда оськалi вöрöт и петi татчö. Петi и сразу жö пукси вуграсьны.

Ме татöн не öтнам. Ордчöн мекöт пукалö сьöд тошока и гардчöмкодь уссэза мужик, öт конувтас сылöн öшалö пешорка, мöдас — быдкодь узöррезöн да свиттялан кружоккезöн басöксьöтöм сермöт. Ме тöда сiйö. Мöйму, кöр ковсис мунны гортö, сiя кыскис менö посадöдз и кузьтуй висьтасис, кыдз дозирайтö ойнас колхознöй вöввезöс, а мукöдпырся кыскалö почта. Годдэз сылö пятьдесят гöгöр ни, но деревняын, Тыраягын, кытöн мужикыс олö меддорись керкуын, сiйö инькаэз шуöны сё эшö челядь нимöн — Митяöн, а мужиккез содтöны эта ним дынö кыв — Сюромка. Сюромка Митя — вот кыдз шуöны этö мужиксö. И не весь. Ме кылi, бытьтö ён да ыджыт мыгöра Митя вермö ловзисьтöг юны джын ведра мымда шöма сюромка. Этöн и знаменитöй аслас соседдэз коласын, да эшö, пожалуй, сiйöн, что, кöть годдэс диво ни, чожа старикöн лоас, а олö öнöдз öтнас, иньтöг. Ачыс сiя песлалö паськöм, сысъялö ырöш, пöжалö нянь — быдöс керö ачыс.

— Охота меным тöдны, мыля тэ öнöдз эн гöтрась? — юалi мöйму, посадас мунтöн.

Сiя бытьтö эз и кыв юасьöмöс, ылöтiс мöдöрö:

— Лок мöдчид миянö. Чериок бöра кыян, шоччисян. Ме тэнö, вонö, бытшöм сюромкаöн гöститöта...

Ме шынньöвтi и дугдi юасьны.

Мыля пöрисьмытöдз эз гöтрась Сюромка? Тыраягын этö некин оз тöд. Öтiккез сералöм могись баитöны, бытьтö эта богатырьлöн оз тырмы прокыс овны инькакöт, мöдiккез сайласьтöг шуöны сiйö сэтшöмöн, кöдалöн «не быдöс гортас». А дядя Митя сё олö и олö öтнас, гордöя новйöтö ассис нимкодьсö, некытшöм басни вылö и синöн кваркыш оз кер. Талун, кöр пантасим ю дорас, сiя медперво кыскис бадь кусттэз коласiсь ыджыт лагун и нюжöтiс меным.

— Ю жö, вонö, бытшöм сюромкаокыс аркмöма. Пешлы.

Ме пешлi. Юаныс вöлi уксус кодь: сэтшöм шöма, что, кажитчö, койышт лагунсис ош вылö, и сылöн гöныс кыртас син одзын. Дядя Митя видзöтiс, кыдз пиньöвтчисö менам аннэзö, и шыннялiс довольнöя:

— Первöй сорт, а?

— Кулитны ог вермы. Бытшöм...

Миян бöрын, вöрокас, тронгöны джынняннэз и кылö, кыдз дядя Митялöн вöввез марскöны турун да швычкöтöны бöжжезнаныс — вашöтлöны дынсиныс номмезöс. Невна увланьынжык, паськыт нюрын, кривзöны туриэз.

— Сiдз!.. Адзза, кыскö тэнö миян ладорö, — баитö Митя. — Сiдз. Гажа татöн, бур местаыс. Ме, вонö, тожö эд овны ог вермы Льöмваыстöг. А эта, пустöй местаыс, — дядя Митя öвтыштiс кинас веськытлань и сьöвзис ваас, — син одзö оз ков. Эг бы и видзöт сы вылö. Да...

Веськытланьын, кытöн тыдалöны шутёммез и видзоккез, пыдын лог дорын сулалöны куим пöлiньтчöм керку, кынымкö сарай и крышави муö пырöм важ баня. Этö кöркöся отруб починок Чаняыб. Эшö год-мöд бöрланьын сэтöн олiс отир. Но неважын, льöмвинскöй вöррезын оссис ыджыт лесопункт, и кынымкö семья мунiсö сэтчин, а мукöдыс, ны коласын и Сюромка Митя, строитiсö виль керкуэз Тыраягö, уджалöны колхозын. Важ отруб кольччис нач пустöй. Сюромка эта йылiсь висьтасьö гажöн:

— Сьöвзимö сы вылö, нельки керкуэсö пес вылö эг пилитö. Мед досповна сiсьмöны. Сiдз нылö и колö... И если ме каждöй ой узьла не берег дорын, а Чаняыбас, то только сiйöн, мыля керку бокын лысва абу и номмез етшажык курччасьöны. Да... Тэ эн думайт, что жаль отрубыс... Син одзö оз ков...

Сюромка ыджыт гульккезöн юис лагунсис, сэсся вугыр бердiсь мездöтiс чочком сьöма кельчиöс, сразу жö весöтiс сiйö и сюйыштiс пешоркаö. Меным охота тöдны, мыля сылö важ селитьбаыс син одзö оз ков, и юася:

— Видно, не чöскыта овсис татöн?

— Кытшöм, лешак, чöскыта! Сорок год сэтöн олi, а мортöн эг ло. Зверь моз олi... да... Мыйсö ме только эг терпит эта отрубын, ась би сiйö сотö, тьфу! Колö тэныт, вонö, тöдны öтiк тор. Этö сiйö, что мамöс ош гыжьялöма как раз сiя гожумö, кöр меным тырас кык год. Айö, царство сылö небеснöй, гöтрасьöм недель бöртi, босьтöм кикимора Парасьöс (тожö коскаэс ни, натьтö, сiсьмисö), а менö сетöма быдтыны Гаврил Опоньлö. Вöлi татöн сэтшöм кулак и вирьюись. Ог тöд, кытöн öнi олö, может, тожö кашниккез ни керö. Но да ладно. Вот и быдтiс менö эта мужикыс. Ох, лешак, кыдз сiя менö быдтiс! Вит годсяöн пинялi ни, дас годсяöн летъялi гöр бердын, а кöр тырис двенадцать, уджалi ни ректас вылын, ветлi туйö, мельницаö, дозирайтi вöввез и мужиккезся не умöльжыка юи сюромка.

Дядя Митя мездöтiс вугыр бердiсь бöра учöтик кельчиöс, весöтiс бытшöмика и пуктiс пешоркаас. Ме кыйи кынымкö ёдiпиянöс и важын ни думайтi пуны черива. Ю дорын пондöтчис везъясьны туман, ыркытсялiс. А номмез сё эшö лякасьöны чужöм бердö, бытшкалöны голя. Сюромкалöн чужöмыс пыктöм ни, киэс гöрдöтöмась вирсянь. Юрсиыс сылöн пашмöм, и номмез сибдöны пилиммес коласö. Сэтöн и дзингöны вöснитика-вöснитика.

— Тьфу, лёквир, — пондiс сьöласьны сiя, кöр ыджыт ном лöсялiс öмас. — Баитны оз сетö... Лок, вонö, Чаняыбас. Сёр ни эд, а эшö черива колö пуны.

Ми вуджим Гырка логсö, сибöтчим дорись керкуокыс дынö. Вöлi сiя лажмытик, пöввезöн дорöм öшына, крышатöм. Сiсь дук вайöтiс учöтик гид ладорсянь, пöльтiс пöжшöм назёмöн. А ордчöн керкуыскöт шумитiсö листтэзöн öшöтчöм уввеза кыдззез, кынымкö льöмпу.

— Вот, вонö, эта коромина увтын и олi ме... Да... Дядя Митя öвтыштiс кинас и бöра сьöвзис лöгöн, дзик керкуыс вöлi мыйöнкö виноват. Сэсся петкöтiс гидсис сiсь пöв торрез, кынымкö бырöм отопки, öзтiс кыдззез увтö би.

— Колö тэныт тöдны, — би весьтö котёлок öшöтiкö баитiс сiя, — что эта отрубын олiсö вит семья. Сэтчин, вöр дорас, сулалiс Гаврил Опоньлöн керку, ордчöн сыкöт — Ошнямыр Сергалöн. Богатöсь вöлiсö кыкнанныс, сiйöн и торйöн строитчывлöмась мöддэс дынсянь. А кытöн öнi богатствоыс? Тю-тю, нельки керку местаэс оз тöдчö, петшöрöн тырисö. А вот эна кык керкуын олiсö воннэз: Нетулика Сеня да Тулика Прокоп. öтыс колхозын öнi уджалö, старик ни, а мöдыс, колö тэныт тöдны, Льöмваын, Нетулика Сеняыс, значит. Эм Нетуликалöн зон, ылöстöм Проня. Но, висьтала ме тэныт, — мо-орт! Тöвнас кöмтöг котрасьö и кöть бы мый! А эд видзöтны нем вылö: кульöм ур и только.

Öтiк годся мекöт, лешак, а гробö ни видзöтö. Вина сет, дак сымда юас, мымда вöв оз вермы ва юны... Да...

Дядя Митя висьтасьö аслас соседдэз йылiсь, висьтасьö гажöн. Но сiйö кывзiкö менам син одзын чужöны нёштöм картинаэз. Олiсö отир, и эз тöдö нiя некытшöм счастье, эз тöдö, мыйлö и олöны светас. Праздник коста вина юöны, сур, сэсся тышкасьöны öтамöдкöт. Тышкасьöны мужиккез и инькаэз. Нетулика Сеня тузитö ассис томжык вонсö, Тулика Прокопöс; Прокоплöн иньыс кыскалö юрсиöт Санко Петрикаöс. Санко Петра видзöтас, видзöтас эта вылö, сэсся босьтас кляч, гусясьöмöн локтас тышкасись иннез дынö и — раз! раз! — сöтас кыкнанныслö, кытчö инмас. Сы сорöн и рознитчасö...

А мукöдпырся семьяэзö пыравлiс и гаж. Кулас, шуам, Нетулика Сенялöн мöс — остальнöй семьяэзын праздник. Радöсь быдöнныс, что соседныс мöстöг кольччис... Нетулика Сеня лöгувьяс осьтöн коляс Санко Петра йöрись завор, пырасö сюö вöввез да мöссэз, джынсö сёясö да талясö. А мöддэс радуйтчöны. Но Санко Петра ой и лун думайтö, кыдз бы Сенялiсь керкусö öзтыны...

Черива пусис чожа. Сёйим пöттöдз. И, медбöрья чериоккесö вильöттöн, Сюромка бöра öдззис висьтасьны, кыдз Ошнямыр Серга да Гаврил Опонь видзисö асланыс киын быдöс отрубсö, уджöтiсö и стариккезöс, и томмезöс, уджöтiсö пипу качсора нянь кусöк понда. Висьтасис сiя, кыдз Опоньлöн иньыс прокод кыскасьöма Ошнямыркöт, а Ошнямырлöн иньыс — Опонькöт. Дядя Митя баитiс бура, кокнита, и ме некыдз эг вежöрт, мыля сiйö Тыраягын лыддьöны сэтшöм мортöн, кöдалöн «гортас не быдöс». Но вот Сюромка зубыта сöтiс кидолоньнас кымöс кузяс и чожа чеччöвтiс кок йылö, дзик зор увтсянь пышшис.

— Кытшöм талун луныс? — ылöстöма юалiс сiя. Ме повзи сiдз, что нем эг письты висьтавны. А сiя видзöтiс чужöмам, видзчисис ответ и тöдчöмöн нервничайтiс: уссэс вöрисö, кыдз налькö шедöм крысалöн, тырппес дрöжитiсö.

— Середа? Висьтав — середа талун? Эх, лешак! Вот кытчöдз ылалi баснинам! Вонö, тэ висьтав меным — середа талун али не?

И кöр ме висьталi, что талун былись среда, сiдз кыдз вöрзи ме городiсь тöн, а тöн вöлi вторник, Сюромка кулöм не ловья шлёпкисис костёр бокас, сэсся дрöжитана киэзöн босьтiс лагунсö и пондiс юны. Сiя юис, а ырöшыс горöн гулькöтiс лагунас и Сюромка кынöмын. Юис сэтчöдз, кытчöдз садьыс эз быр.

— Тöдан мый? Да... Тöдан мый? — сюльтыртiс сiя, кöр пондiс вермыны лолавны и невна лöньсис. — Мунiн бы тэ татiсь, а? Котöртiн бы, но шуам, Тыраягö нето Льöмваö. Буржыка шоччисян сэтчин отирыс дынын. А эстöн талун, веськыта висьтала, неладно делоыс!

Ме лэбтi синнэзöс.

— Мый сэтшöмыс? — юалi повзьöм голосöн. — Мыйкö умöль дело я мый я?

— Э-э, кыдз бы тэныт шуны, э-э... — мыкталiс Сюромка. — Да... Тöдан мый? Повзьöтчыны Чаняыбыс пондiс. Кыдз ой, сiдз и оказзё. А медöддьöнсö повзьöтчö середа ойö.

— Но-о-о!

— Быль баита! — Сюромка вешшис матöжык ме дынö и повзьöмöнмоз шушкис: — Кöть верит, кöть эн, а ачым адззылi кольöм середа ойö... Ох, лучше не касьтывлыны, мый ме адззылi... Полöм петö висьтасьнытö.

— А тэ висьтав. Может, оз жö сьöлöмö пот.

И Сюромка висьталiс:

— Кузь юрсиа инька васис петалiс... Он верит?

— Ог.

— Быль баита. Пукси ойнас берег дорас, вуграся. И вдруг буль-боль ваас керис. Нёджжöвтi сэтчин, думайта: мый лоис? И чуть гатш эг усь. Петiс васис нач куш инька, юрсиыс чочком, каджви öшöтчöма, яйкучикыс дзик зелёнöй, сiдз и свиттялö тöлiсь увтас. Петiс и öдззис котрасьны вöрöттяс. Сэсся давай менö кытсавны. Корö этадз нюжвыв голосöн: «Митю-у, Митю-у». Но ме и садь öштi. Кыла только, кыдз инькаыс котрасьöв-керис да и шуис сэсся: мöд середа ояс бöра пö пета... Вот кытшöм делоыс, вонö...

— Но и мый жö? Ась петö. Видзöтам кыкöн, — шынньöвтi ме.

— Не, дружок, тэ эн кольччы татчö. Оз сiя кыкыс дынö пет. А меным... но тöдан... стрась охота адззывны сiйö. Öддьöн ни гленитчис. Басöк сiя, да и голосыс бытшöм, дзик серебрянöй сильканок тиньгö.

— Сказка эта, дядя Митя, челядьöс бы сiйöн повзьöтлыны, — шуи ме серьёзнöя. — Да и кытчö ме öнi муна? Адззан, ой локтö, а туйесö умöля тöда. Öшны верма. Сэтчö жö, мыдзи ёна, коккезö сiдз и сотчöны. Вода кыдззес увтö и онмöсся сразу.

И былись, сибалiс ни ой. Локтiс сiя жагöник, гусясьöмöн. Перво ыждiсö вуджöррез, нюжалiсö, сэсся пемытыс кыдзкö сразу, öтiк мигö, уськöтчис вылiсянь, петiс вöрись и лог пыдöсiсь, казявтöг ньылыштiс мусö, пуэсö, сiсьмöм керкуоккесö, а öтлаын ныкöт и миянöс.

Сюромка дыр пукалiс чöлöмöн, пишкис нырнас. Ме вежöртi, что дзуга сылiсь кытшöмкö планнэз. Сiя думайтöма чулöтны татöн ойсö öтнас, может, мöдiс мыйкö керны гусьöн, и вот мешайта ме сэтöн. Унаись кывлi, что татöн олiссез любитöны глушитны чери, кöть тöдöны, что керны этö оз туй. Может, и Сюромка бöбавны мöдö? Ужо, видзöтам... Ме чорыта решитi не мунны татiсь, мый бы эз ло, а тöдны, мыйлö Сюромкаыс кольччö бы öтнас. Пондас кö глушитны чери, ме, конечно, падмöта, ог сет бöбавны.

Дыр чöлiс Сюромка. Сiя думайтiс, тыдалö, кытшöмкö виль «оказзё», кöдöн позис бы повзьöтны менö. Но бурыс, видно, нем эз адззись. Сiя босьтiс бöра лагунсö, юис пöттöдз, чышкис шабур поланас чужöмсö и тырппесö, сэсся нюжöтiс юансö меным.

— Ю, вонö, — кыдз бытьтö нем эз и вöв, добрöя висьталiс сiя, — ю да вод, пожалуй, кыдззес увтö.

Морт тэ, адзза, простöй, честнöй, а честнöй дынö, может, и петас сiя. Ме вода вон керкуыс бокö, торйöнжык. Повзяс тэись, дак меись оз повзьы. Торйöн эд лоамö...

Костёр миян кусiс совсем, и ме казялi, что ойыс не сэтшöм ни пемыт, кыдз кажитчис одзжык. Пондiс вöйсасьны тöлiсь: мыччисяс вöр весьтас, минута-мöд нёджжасяс и öшас бöр. Усис лысва. Турунын сё эшö чирскисö кöбывкаэз, неылын тронгисö джынняннэз. Ме босьтi плащöс и лöсьöтчи сайись кыдззес дынö. Сюромка чеччис тожö, дыр сулалiс шы сеттöг, кывзiсис.

Дата добавления: 2015-11-16