Боболь Ванялöн шапка 3 страница

— Эх, привольеыс кытшöм татöн! — шуис сiя сыбöрын. — Видзöтан-керан, да и сьöлöм пот мунас. Да... — Сэсся бергöтчис мелань и содтiс кыдзкö мечтайтöмöн: — А сёжö муна ме татiсь. Муна, вонö. Пантасьлi öтiк леспромхозiсь ыджыт начальниккöт, дак корис уджавны. Вöввез, шуö, миян эмöсь. Пондан пö дозирайтны нiйö да товар кыскавны.

— Мый татöн оз гленитчы? Шуан тай: приволье эстöн, сьöлöм радуйтчö...

— Счастье абу, — простöя шуис Сюромка, — овны оз сетö. Томмес менö озö вежöртö, а пöриссес — кокаласö... — Сэсся содтiс гажтöма:

— Вот адззыла сiйö — и муна. Ог сэсся вермы терпитны. Мыла бырис.

— Неужели тэ веритан, что быльнöй морт васис петас? — юалi ме, ольпасьöс лöсьöтiкö. — Эта жö сказка...

— Сказка, шуан? А тэ верит. Кöр веритан, сэк кокнитжык овнытö. Колö тэныт, вонö, тöдны, что юас кöркö не öтiк инька вöйöтчисö. Пондасö жöниккезныс öддьöнöв тешитчыны, вартлыны да мый да, и нiя — бульк! — ваö. Öнi, кöр отрубыс пустöй лоис, вот и петавлöны. Гажтöм жö нылö. Вот висьтала ме тэныт öтiк оказзё, а тэ кывзы. Тэ, адзза, юра детинаыс, тэныт позьö висьтавны. Вöлi татöн Ошнямыр Сергалöн ныв. Но, кыдз бы тэныт висьтавны, дзик цветок вöлi. Да не простöй, а ойся. Да, ойся. Эмöсь сэтшöм цветоккез. Луннас оз тыдалö, вевттисьöны, дзик стыдитчöны шондiыссянь. Но зато ойнас оссьöны. И видзöтiн бы тэ, кытшöм нiя сэк басöкöсь. Нёджжöвтан ны вылö и орöтчыны сэсся он вермы. Сiдз и кыскöны дынаныс. Вот сэтшöм и вöлi Сергалöн нылыс. И пондiс сiя радейтны öтiк зонöс, татiсь жö детинаöс, соседöс, позьö шуны. И верма ме тэныт висьтавны, бура нiя радейтiсö öтамöдöс. Зонкаыс вöлi честнöй да добрöй сьöлöма, мича чужöма да бытшöм статя. И вот петiс оказзё. Кöть нем эшö эз и вöв ны коласын, а кинкö бöбалöм могись мавтöма Ошнямырыслiсь воротасö дьöгöдьöн. Аслам синнэзöн ме адззылi, кыдз асывнас öксисö эта ворота дынö отир, пондiсö ванзыны-серавны. А Ошнямыр босьтiс чер, öтiк минутаö пизьдiс воротасö чагоккезö, а сэсся петкöтiс нывсö öтöрö. Петкöтiс, юрсиöттяс кыскöмöн. Да... Мый сэтöн вöлi, ог ме тэныт висьтав. Оз тырмы мыла, вонö. Только висьтала, что кынымкö лун бöртi, кöр нывкаыс ловзис вартлöмсяняс, айыс сетiс сiйö ылöстöм Проня сайö. Эн позорит, шуö, менö, кöбыла. Ов законнöй жöниккöт. Тыраягын кытшöмкö тöдiсь морт венчайтöм нiйö сьöд баняын, ен нимöн гöрöдалöм. Вот сiдз... А недель бöртi инькаыт лэдзчöм ю дорö. Проняыс ой и лун вартлыны пондöма да. Лэдзчöм, а сэтöн видзчисьö сiйö сьöлöмшöрыс, кöдö радейтiс. Мöдöмась кыкнанныс уськöтчыны ваас, медбы, значит, не маитчыны. Да петöма сэк васис öтiк инька и висьталöм нылö: эд вöйöтчö пö, умöль пö татöн. Сетö пö лучше ен одзын клятва не вунöтны öтамöдöс, радейтны пыр. Сэк пö и му вылас овны позяс... Вот кытшöм делоэз вöлiсö, вонö... Конечно, недель бöртi Ошнямырöс судитiсö нывсö вартлöм понда. Судитiсö, кыдз кулакöс, иньдiсö тюрьмаö, да мый толкыс? Нылыс öнöдз маитчö Пронякöт.

— Öнö-ö-дз?! — дивуйтчи ме. — А мыля сiя оз мун сы дынiсь?

— Э-э, вонö, да тэ тай юртöм! А еныс? Кытчö, шуö, муна, кöр грех эта... Вот эд мый! Висьтала ме тэныт, сiя, еныс, вына эшö миян инькаэз коласын, авторитетнöй, позьö шуны, пöрись лешак. И колö висьтавны, пыр сы нимöн отирсö повзьöтлiсö, не чожа вунöтан.

И вдруг Сюромка вились сöтiс кымöс кузяс, горöтчис:

— Тьфу, пöрись икота, бöра тай ылалi! Ой ни локтiс, а ме сё иза кывнам. А сiя эд видзчисьны оз понды, кöр дугда боньгыныт. Ладно, вонö, узь, а ме смекайтчышта невна.

Сiя öвтыштiс мелань кинас, тшöктiс онмöссьыны и мунiс керку бокö, кытöн мудьöт вылын сылöн вöлi ольпась: перина туйö кыза вöвдöм турун, а юрöдзас — пешорка.

Сюромка эз вод ольпасяс, а пуксис керку пельöсас, юрсö öшöтiс морос вылас, кывзiсис. Ме пыри аслам плащ увтö, жмитчи кыдзыс вуж бердö. Думайтны Сюромка висьтасьöм йылiсь вöлi неохота, но юрö нет-нет да и пырисö гажтöм думаэз, син одзын вежмасисö нёштöм картинаэз. Маитiс кытшöмкö беспокойство. Ёртöлö, тыдалö, вöлi öддьöн охота, медбы ме чожжык онмöсси, и юалiс недыр мыйись:

— Но кыдз, вонö, бур узьнытö?

Ме эг шыась, а нарочно сэтшöм горöн пондi пишкыны нырнам, что кынымкö минута чöлiсö турунын кöбывкаэз, и нельки джынняннэз гусьöнжык пондiсö тронгыны. Сюромка сэтшöм пишкöмöн кольччис довольнöй и жалейтiс менö:

— Былись эд мыдзöма, беднöйка...

Чулалiс джын час мымда. Сюромка пукалiс вöрзьöтчытöг, только мукöдпырся зубыта сöтлiс кымöс кузяс, нилис номмесö. Ме видзöтi, кыдз небоын орсiсö звездаэз, вöйсасис тöлiсь. Вöлi мылякö гажтöм. Вöрас шумитiсö паськыт лыссэз, шушкöтчисö, дзик ловьяöсь, и меным кажитчис, бытьтö сэтчин кинкö ветлöтö. Ю дорын, лажмыт местаэзын, тожö кылiсö кытшöмкö шыэз, дзик кинкö ружтiс сэтчин и кыскалiс турунöттяс мыйкö небытикö.

Ме кутi ачымöс сы вылын, что пола видзöтны вöрас. Меным кажитчö, бытьтö пуэз коласын кинкö сулалö и видзöтö мелань. И пырис юрö дума, что вот петас вöрсис кытшöмкö ошнямыр, локтас ме дынö и юалас кыз голосöн: «А ноко висьтав, лешакпиян, мыйлö татчö локтiн?» Юалас и сöтас юрвоманö зорöн.

Чулалiс эшö джын час мымда. Сюромка сё пукалiс важ местаас, пукалiс вöрöтчытöг, нельки дугдiс вашöтлыны номмесö. А вöрыс шушкис и шушкис гажтöма, и меным вöлi öддьöн охота, медбы Сюромка эз мун некытчö.

И — мый эта? Кытöнкö дзик мыйкö тарснитiс, кинкö уфнитiс, бытьтö сьöкыта ловзисис. Ме ятнöя кылi, кыдз совсем неылын кышöтiс турун. Юрö ачыс бергöтчис эта шылань, синнэз оссисö паськытжыка, а сьöлöм токöтiс горöн-горöн. Ток-ток, ток-ток... Ме нёджжаси пемытiнас, видзöтi орöттöг керкуоккез коласöт, но некинöс эг казяв. Дыр видзöтöмсянь синнэз мыдзисö, куньсисö. А кышöтöмыс сё кылiс одзза местаын, керкуыс бокын, и бöра кинкö дзик ойнитiс гусьöн-гусьöн. И кöр ме вились осьтi синнэзöс, то казялi сэтшöмö, мыйсянь öтiк минутаö быдсöн менö сывьялiс страшнöй повзьöм, сэтшöм повзьöм, кöр охота кутчисьны кыкнан киöн морос бердö и видзны сьöлöм, медбы эз пот сiя нето эз чеччöвт аслас местаись: керку пельöс сайсянь вöджжис кузь вуджöр. Точнöйжыка шуны, эта вöлi кытшöмкö сьöд фигура. Кöр вились мыччисис тöлiсь, вуджöрыс сразу нюжалiс, лоис руд рöмаöн. Ме öнi бура адззи, кыдз сiя жагöник вешшис стена пöлöн, и первöйыс, мый пырис юрö, дак этö чеччöвтны местаись, öдззыны котöртны, пырны му пытшкö, ваö — только не адззыны, не кывны, кыдз страннöй фигураыс кышöтö керкуыс бокын. Вöлi и мöдiк дума: ме просто пола, и эта быдöс меным кажитчö Сюромкалöн страшнöй висьтасьöм бöрын. И кöр пондi думайтны этадз, меным лоис кокнитжык, нельки верми казявны, что Сюромка важмоз пукалö пельöсас, оз и думайт вöрзьöтчыны.

Но керкуыс бокын, туй ладорсяняс, мыйкö сё вöрис, и ме вежöртi, что сэтöн кинкö ловья... Да, эта вöлi кинкö морт кодь! Сiя видзöтiс мелань и вешшис жагöник, кывзiсьöмöн, и кышöтiс коккезнас. Неужели быль, мый висьтасис Сюромкаыс? Неужели? Нет, оз вермы лоны! Но кин эта?! И ог тöд, мый бы ме кери одзланьын, если бы эта ловья существоыс эз шыась морт голосöн:

— Митю-у-у...

Сьöлöм вылiсь усис сьöкыт из, кокнитжык лоис лолавны.

И колiс адззыны, кыдз Сюромка чеччöвтiс кок йылö! Дзик пуртöн сiйö бытшкисö нето лэдзисö сы пырйöт вына электрическöй ток.

— Тэ?.. Локтiн? — шыасис сiя дрöжитана голосöн и тулис синнэсö. — Тьфу, кыдз повзьöтiн, чуть сьöлöмö эз пот...

— Т-с-с, — öмалiс сiйö инькаыс и мыччалiс мелань кинас. — Кин?

— А-а, эта? Да городскöй öтiк... Мöйму тай чериалiс татöн... Кыскалöны сiйö куллес, керны нем да. А тэ эн пов. Мыдз сiя, узьö, кыдз вийöм. Сэтчö жö, сюромкаöн ме сiйö юкталi, литра куим, натьтö, больскис и син одзын коддзис, мыля некöр сiйö абу ювлöма.

— А ме думайтi — тэ сэтöн узян. Джын час сьöрна, чомору, эг лысьт петнытö. Мыся, эн узьлы тай сэтöн да...

— Ме? Мый, менам аслам ольпась абу? Тожö... Инька вöлi неыджыт мыгöра. Пасьталöма то ли сарафан, то ли вылын костуя дубас, юр вылас пуктöма кокнитик чышьян, öт кияс сiя видзис кытшöмкö сумка, мöднас вылына лэбтöм дубас подувсö, медбы не вадны лысваас. Кöр сiя пуксис ордчöн Сюромкакöт, ме казялi, что чужöмыс сылöн векнитик, ачыс кöсыник, высиныс невна горбыльтчыштöма. Сюромка ордчöн сыкöт кажитчис богатырьöн.

— Мый нö дыр эн лок? — инькасö ас бердас жмитiкö юалiс сiя. — Пукалi, пукалi, тэнö видзчисьтöн, и ланьтсьöма...

Инька мугтöг жмитчис Сюромка бердö, юрсö сюйыштiс кытчöкö сы конувтö, бытьтö вöлi кöдзыт сылö, чышьяныс эта коста лэдзчисис пельпоннэз вылас, ачыс, тыдалö, дрöжитiс.

— Дыр эз ланьт, — горöтчис сiя негорöн. — Быдса бутылка лакис да сё боньгис нетуликасö. Сэсся иньдiс менö мöдiк бутылкала. Локтi гортö, а сiя узьö ни джоджас...

— Сiдз, — шуис равнодушнöя Сюромка и малыштiс инькаыслiсь юрсö, пельпоннэсö. Мöдыс пукалiс сё сiдз жö юрсö сайöвтöмöн, мыйкö шушкис гусьöник, дзик ас кежас, сэсся ыш ловзисис. Ме вежöртi, кин эта инькаыс, кöр кылi тöдса ни меным кыв — нетуликасö. Сiя вöлi ылöстöм Пронялöн иньыс. А Сюромкаыс — не кин мöдiк, кыдз сiя добрöй и небыт сьöлöма детинаыс, кöдö любитiс Ошнямырлöн нылыс... Дак вот мыйлö ковсьöм Сюромкалö кольччыны татчö ой кежас öтнаслö! А ме думайтi... Но да сёр ни каитчыны. Не чеччыны жö öнi да мунны кытчöкö, кöть бы вакрамешö... Меным только öтiк тор и кольччис керны — этö думайтны, что важ ни отрубыс, совсем пустöй, и керкуэс сiсьмöмась ни начöдз, а видзöт, сё эшö олö кытшöмкö страннöй и невежöртана оланöн. А думайтны умöля эна кык морт йылiсь ме эг вермы. Сьöлöмö пырис чувство, кöда тшöктiс относитчыны ны дынö уваженнёöн. Эд кыным ни год нiя пантасьлöны гусьöн, кытшöм бы эз вöв сьöкыт, а любитöны öтамöдöс!

Инька калькöтчис Сюромка бердiсь, серöмтчис гусьöн:

— А ме тэныт кöч нянь вайи...

И кыскис сумкасис нето чышьян, нето пызандöра, ольсалiс му вылас, сэсся кыскис кытшöмкö посуда, стакан, кольттез, нянь. Сюромка радмис, кыдз кага, кöдалö нюжöтасö чöскыттор, шыасис дивуйтчöмöн:

— Эхма, быдса петырлун! И сурок, тыдалö, эм...

Инька бöра жмитчис Сюромка бердö, чöлiс. А мöдыт кисьтiс стаканö сурсö, юис и курччöвтiс няньтор.

— Ох, сьöкыт меным, Митю, стыд маитö, — шушкис инькаыс. — Грех эд...

— Эка, кытчö кöстö! Грех... А сiя тэнö дугдывтöг вартлö, дак эта не грех? Тэ вот мый... Мунам татiсь! Эх, кыдз ми пондам овны тэкöт! Мунам ашын жö.

— Ашын? Ой, Митю, пола!

— Бöбöв! Тырмас сыкöт маитчыныт! Тэ видзöт, кин вылö вачкисян? Куш коска. А ме тэнö барыня туйö видзны понда, ме тэнö...

Инька шы эз сет.

Сурыссянь Сюромка коддзыштiс и видзис асьсö смевжыка: малалiс инькалiсь мороссö, жмитлiс ас бердас. Мöдыслö, тыдалö, эта эз гленитчы, сiя вешшис ылöжык бокö и шуис лöгöнмоз:

— Но, кытшöм тэ! Кольлав менö кöть джын туйсö, пола öтнам вöрас. Куим верста эд...

Сюромка бöра жмитiс сiйö морос бердас, мыйкö баитiс гусьöн, лолалiс сьöкыта. Инька мездöтчис, сувтiс кок вылö.

— Мунам, ужо...

И босьтiс киас сумка.

Сюромка дыша чеччис местасис, пыркöтiс вешьян бердсис турунчирсö, кутiс инькасö пельпоннэзöт, жмитiс. И мунiсö жагöник, öтамöд бердö кутчисьöмöн, саясисö керку пельöс сайö.

Кадыс вöлi, натьтö, матын ни югдандорын. Лоис кöдзыткодь. Турун вылö усис сьöкыт лысва. Кокнитик тöлок пöльтiс вöр ладорсянь крепыт сира руöн, вайис сьöрас ульсалöм лыс дук. Вöрыс важмоз ружтiс и сё кышöтiс, бытьтö сэтчин кинкö ветлöтiс, ляшмасис, коккесö кыскалöмöн. Но ме эг ни пов эта кышöтöмись, думаэз юрын вöлiсö кокнитöсь.

Шондiпетандор локтiс Сюромка. Вöлi сiя мыдз, пидзöсви вамöма. Медбы саймöтны менö, сiя чувйыштiс кынöмам плеть оропöн, шуис гажöн:

— Думайтан, чериыс видзчисьны тэнö пондас? Мун жö вугрась, как раз кадыс. И ыркыт, и мича, этшöм асылас ёна кокалö.

— Не, дядя Митя, Льöмваö колö мунны. Охота видзöтны, кыдз вöрсö заптöны...

Сюромка эз кыв медбöрья кыввезöс. Сiя öддьöн радмис менам юöрсянь, чужöмыс вевттисис паськыт шынньöлöн, синнэс свиттялiсö.

— Льöмваö? Мöдан Льöмваö мунны? Ах тэ, лешак! — сiя перыта котöртiс аслас ольпась дынö, босьтiс öт киас пешоркасö, мöдас лагун и нюжöтiс нiйö меным. — Босьт! Босьт чериоксö, пригодитчас. А лагунсис ю, бытшöм сюромкаыс!

Черисис ме откажитчи, а лагунсис ковсис юыштны.

— Но мый, адззылiн кузь юрсиасö?

— Кытшöм, лешак, адззылiн! — серьёзнöя шыасис Сюромка и öвтыштiс кинас. — Вöввезö тай вуджöмась сай берегас, ойбыт вöтлiси. Да и тэ, увья ректан, мешайтчин тожö. Баитi, мыся, оз сiя кыкыс дынö пет, дак тэныт кывджын эз тöр.

— Виноват! Сейчас муна вот, а тэ смекайтчы, дозирайт сiйö. А нывкаыс, кöда вöйöтчыны тай мöдöм, ойся цветок вылö вачкисис, шуан?

Этö вопроссö Сюромка бытьтö эз и кыв, ылöтiс менö мöдöрö:

— Бöр мунтöн кежав Тыраягас, пырав ме ордö. Ме, вонö, настоящöй ырöшöн гöститöта, может, и винатор адззисяс.

И ми янсöтчим. Сюромка вашöтiс вöввесö деревняö, а ме мунi Льöмваö.

Юны Сюромкалiсь настоящöй ырöшсö сiдз эг и ешты. Кöр, кык неделя бöртi, гортö ни мунтöн, сувтчи Тыраягö, меным юöртiсö, что дядя Митя кытчöкö мунöма татiсь. И не öтнас.

— Инькаöс жöник дынiсь гусялiс, нёштöм рака, — жевгис öтiк старушка. — Мыйнö, мыйнö, этшöм грех... Страшнöй суд лоас сылö, вежöмлö.

Эта юöрыс эз дивит менö. Ме тöдi, что Сюромка мунас. И мунас не öтнас...

СВАДЬБА ПАНЫТÖ

Турикок деревня весьтöт, гажтöма кривзöмöн, лэбзьöны медбöрья туриэз. Крив-крив! Крив-крув!.. Адззисьлытöдз, гажа гожум! Адззисьлытöдз, зыбуна нюр!.. Туриэз лэбзьöны вылына, кымöррез вевдöрöт, оз и тыдалö нельки.

Складдэз дынiсь сторож дед Опонь, читкыля тошока, векнитик чужöма старичок, чатыртлiс вöлi юрсö, да кытчö тэ! — синнэз ныжмисö, тырисö синваöн...

— Уна-а лэбзьöны... Тöн лэбзисö, талун лэбзьöны. И нюрас узьлöны, дзик жö локтöм отир гостиницаын. Не весь, батя, тури нимöн селитьбаным шусьö, — бобгö сiя ныр увтас.

Опонь пасьталöма шоныт зипун, юр вылас пуктöм кукань кучикись кузь пеллеза шапка, а пиннез сёровно ляскöтöны. Кöдзыт. Сэтчö жö спина коска лун-мöд ни спокой оз сет — висьö да и только! «Ой гöгöрас лэбас морока-непогодь, зэрны пондас», — думайтö сторож. Опоньöс кыскö гортас, шонытiнö, но тöн сiя колхознöй шофёр Иван Тоинов ордын юыштiс сурок да рюмка-мöд вина, и старухаыс лэбтiс битва, лöгувьяс тойлалiс жöниксö сторожкаö: пируйт пö сэтчин, пöрись кöин!

Сторожкаын печка оз на сулав, и Опонь аслас зипун вевдöрö кышалöм эшö сьöкыт тулуп. Конечно, буржык бы вöлi мунны старухаыс дынö, сувтны сы одзö пидзöссэз вылö, корны прощеннё, но Опонь гордöй и чорыта решитiс видзчисьны сiйö чассö, кöр старухаыс локтас сы дынö ачыс.

— Эй, кин сэтчин ловья эм? — кылö ворота сайын кыз голос. Опонь тöдö этö голоссö. Складö локтiс не кытшöмкö ниндуль-морток, а ачыс председатель Тарас Игнатьевич. Сторож рад, что лöсялiс татöн, котöрöн петö осьтны ворота.

Председатель — ыджыт мыгöра мужик. Сiя ён и визыв синнэза, новйö брезентовöй плащ, кирзовöй сапоггез, юр вылас дед Опонь моз пуктöма тöвся шапка, только пеллесö абу лэдзöм. Кöдзыт, тыдалö, вöлöма и сылö, тожö эд не том ни морт, важын ни, натьтö, пятьдесят саяс.

— Кыскисö шогдiсö? — юасьö сiя.

— Иван Тоинов одз асывнас мунiс. Тöбалiс быдса машина и мунiс. Пемыт эшö вöлi.

Крив-крув! — кылö небоын. Воздухын лэбалöны кельдöтöм листтэз.

— Ар локтiс, — баитö председатель. — Благодатнöй кадыс.

— Бо-огат таво арыс, — гогинялö юрнас сторож. — Сюокыс вон öксис быд сусекö тыр. Праздниккез сибалöны... Юыштам бöра суроксö, öнджа. Арнас воробей — и то пö сурок аслыс пуö...

Басни кыдзкö казявтöг вуджö свадьбаэз вылö. Турикокын сэтшöм обычайыс: кыдз ар, сiдз и нёль-вит свадьба. Медбöрья годдэзö, кöр колхоз лэбтiсис ни аслас кок вылö, деревняын том отирыс казявтöг содö. Свадьбаэз чулалöны шумнöйöсь, гажаöсь, не öтiк лунöн кыссьöны.

— Баитiс асывнас Иваныс, сур ни пö виялöма. Вина не öтiк ящик босьтöма, — юöртö старик.

Председатель дыр эз шыась, чöлöмöн ветлöтiс складöт, пыравлiс быд амбарö, видзöтiс сюсö: босьтас кырымтыр шогдi, пешлас тусёккесö пинь коласын, нюкайтас — оз я пöд? — и мунö одзлань. Только сторожкаö ни пыртöн горöтчис Опоньлö:

— Унаöв жö винасö небöма, позис и етшажык бы. Кывсьö, кладовщицасö корасьöма?

— Сiйö пö. Бытшöм нывкаыс, вежöра. Только ачыс Иваныс... Ох-хо... Оз мыйкö гленитчы меным.

— Этö мыля жö? Зонка — механизатор, уджын оз дышöтчы.

— Öддьöнöв, Тарас Игнатьевич, деньгаöн соровтны пондiс. Оз я, öнджа, левацкöй дело кер? Тöн пыралi сы ордö, гöститны корлiс, адззылi öтi-мöдi...

Председатель дивуйтчöмöн дзарнитiс Опоньлöн векнитик руд чужöмö, шыасис лöгöнмоз:

— Но этö тэ весь. Быд сторожлö вöтö только вор и уськöтчö...

— Эг на вöтасьлы нiйö, — öбидитчис старик. — А мый баитны Иван йылiсь, то адзза: не сöстöм делоыс. Унаöв ни босьтасис.

И Опонь сьöрсьöн-бöрсьöн пондiс куснявны чуннесö, лыддис, мый медбöрья кадö небис Иван. Лыддис, лыддис и кыкнан кисис чуннес эз тырмö: уна ни небöма быдторсö. Кытiсь сылöн сымда деньгаыс?

— Может, одзжык заптылiс да и лотерея сьöртi выиграйтöма. Сэтчö жö мамыслö пенсия петö.

— Мамыс оз сет сылö, о-оз, батя, — нюжöтiс Опонь. — Жила старухаыс, тöвнас лым коколь он одзöст...

Сторож эшö мыйкö мöдiс висьтавны, но аскадö курччöвтiс кывсö: сторожка дынö перыта локтiс ватнöй телогрейкаа, резиновöй сапожоккеза томыник нывка. Эта вöлi ачыс невестаыс ― кладовщица Катя.

— Тыртiмö, Тарас Игнатьевич, тыртiмö! — чирзiс сiя рад голосöн, — медбöрья машина асывнас иньдöтi. Голос нывкалöн гора, кыдз силькан, синнэз югьялöны, дзик рудзöг чачаэз. Председатель лэбтiс певсö неболань и горöтчис тожö радöн:

— Во! Мöднёж и лоны оз вермы! «Союз» колхоз районын медодз тыртö ассис планнэсö! Шуöны, жöникыт пö кыскöма шогдiсö?

Катялöн быдöс чужöмыс вевттисис гöрд краскаöн, лоис кумач кодь. Этö и вежöртана: деревняын только неважын пондiсö баитны корасьöм йылiсь, Катя эз на велав лыддьыны асьсö невестаöн. Сёжö сайлавны эз понды, шынньöвтiс счастливöя:

— Сiя.

— Но вот и дело. Кöр свадьбаныт? — Ашын, бытьтö эн кыв...

Председатель кöсйисис пыравны ашын томмес ордö юыштны сур и мунiс правленнёö. Сылö колiс юöртны райкомö, что «Союз» колхоз талун тыртiс нянь вузалöм сьöртi государственнöй план.

Иван Тоинов эшö мöйму уджалiс городын, шоча и гортас вовлiс, а таво тулыснас мамыс корис сiйö дынас. Локтiс Иван колхозö и пондiс уджавны шофёрöн. Морт сiя ыджыт мыгöра, вына и ён. Чужöмыс сöстöм, öгралö биöн, юр вылын гардчöны русöй кудриэз. Клубын Иванся буржыка некин оз йöкты «камаринскöйö», а гармонняöн орсöм йылiсь нем и баитны — быдöнöс вермö. Нывкаэз Иванöс любитöны, асьныс лякасьöны, но Иван дыркодь некин вылö дзар эз кер, только неважын мамыс отсöтöн бöрйис ас кодяс жö русöй юрсиа да статя кладовщица Катяöс. Катя год-мöд ни кыдз кончитiс шöрöт школа, вöлi басöк и боёк, уджалiс бура, умöль кыв сы йылiсь некин эз горöтчывлы.

— Вот параыс! — баитiсö öнi соседдэз. Нывкаэз завидуйтiсö Катялö, зонкаэз — Иванлö.

Кöр кывсис, что чожа свадьба, Турикокын лэбис настоящöй содом. Нывкаэз вурисö виль мöдöтчаннэз, зонкаэз тэрмасьöмöн лöсьöтiсö гармонняэз, председатель думайтiс, мый бы козьнавны том гозъялö правленнё нимсянь. Йöктыны любитiсь инькаэз местнöй сапожникöс öтiк лунöн тыртiсö заказзэзöн: вайисö туфлиэз, сапоггез, башмаккез и öтiк öмись тшöктiсö дорны виль каблуккез. А даровöй вина любитiссез лыддисö ни, уна ли нылö чельдас свадьба коста — эд кык ящик пö небöма Иваныс, а ыджыт я деревня Турикок?

Свадьба кежö лöсьöтчыны эз кольччы бокö и жöник. Перво-наперво сiя небис аслыс сниток виль паськöм, сэсся небис радиола. Корасьöм бöрын Иван кутчисис невеста бердö: первöй жö рытö козьналiс сылö шёлковöй кофточка да сэк жö тшöктiс меряйтны сiйö. Кофточка вöлi басöк и öддьöн лöсялiс Катялö. Мöд рытас Иван вайис кык косинка — öтсö голубöйö, мöдсö чим гöрдö. Катя пуктылiс юр вылас перво голубöйсö и радсянь мамыс дырни кыкись окалiс Ивансö. А гöрд косинкасö меряйттöн нывкалöн сiдз вöрзис сьöлöмыс, что окалiс зонкасö куимись ни да эшö горöтчис:

— Кыдз тэ любитан менö, Ванюш!

Тöн рытнас Иван локтiс невестаыс ордö и порог вывсянь горöтiс:

— Катюша! Йöкты «барыня», виль платье тэныт неби!

Платье вöлi голубöй крепдешинiсь, вурöм медбöрья мода сьöртi: не öддьöн паськыт подола, не öддьöн кузь и кокнитик, кыдз гöн. Катя вöлi сэтшöм рад, что эз ни вермы окасьны и шуны нем эз письты. Зато Иван окалiс сiйö сэтшöм дзирыта, что нывкалöн ойбыт сотчисö тырппес.

А Маланья Карповналö, невестаыс мамлö, Иван козьналiс халат, öддьöн бур, öддьöн паок халат: вурöма паськыта — некыт оз зэлöт, соссэс кузьöсь, киззес свиттялöны и, мый главнöйыс, — вöлi шоныт.

— Новйы, мама, да ло здоров!

Маланья Карповна жмитiс Иванöс паськыт, но рышкыт морос бердас и чуть эз пöдты.

— Ах тэ, менам дона зятиньöй!

Сэсся мунiс комö, клоп вачкис боккес кузя и сьöласис ас кежас: «Тьфу, эз на и гöтрасьö, а зятьöн шуи, öртат менö, чомору!» — и шлёп-шлёп керис пиньтöм ни öмнас — серöмтчис...

Кöр жöник мунiс гортö, счастливöй мама-ныла вельдыр эз вермö лöньсьыны: вон кытшöм ласковöй, вон кыдз любитö нiйö Иваныс! Медбöрын Маланья Карповна шуис нылыслö:

— Вöрзис, видно, мамыслöн надз сьöлöмыс: дас год деньгасö чукöртiс, сё пензиясö банкаö тэчис, а öнi сетöма зоныслö...

Дед Опонь ветлiс сёжö миритчыны иньыскöт и, кöр локтiс бöр аслас пост вылö, висьталiс Катялö:

— На мази делоыс.

Катя тшöктiс сылö игнавны ворота, ачыс мунiс гортас. Вöлi пемдандор. Клубö öксисö ни молодёжь, и Катялö ковсис тэрмасьны: нывка тожö лöсьöтчис сэтчин сюрны. «Ох, и йöкта жö талун, свадьбаным панытö!» — думайтiс сiя, горт посöдзö кайтöн.

Керкуас вöлi только мамыс. Сiя гуддисьыштiс мыйкö комын, сэсся петiс кылö карчйöрö — сяркнитiс карта ыбöс каличöн. Катя кыш-паш чöвтiс вывсис лунся паськöмсö, кыскис сундукись виль мöдöтчаннэз. Медперво сiя пасьталiс, конечно, козьналöм крепдешиновöй платьесö, кöмалiс вылын каблука туфлиэз. Нывка размöд шват керис джодж кузя каблуккезнас, паськыта шынньöвтiс и йöктöмöн локтiс зеркало дынö. И ачыс асьсö эз тöд: зеркалоын шыннялiс настоящöй городскöй красавица! Не весь, батя, баитöны, что бур мöдöтчаныт кöть кинлö жö лöсялö. Да лöсялö ли? Вон мыйкö дзик оз тырмы платьеас? Воротыс паськытöв я мый я? Ах, да! Брошка, брошка оз тырмы! И нывка кыскис сундук пыдöсiсь золото рöма бабывся кокнитжык брошка, любуйтчыштiс чикыртöм синнэзöн, сэсся чуп окалiс — тожö козин...

Эта кадö керкуö шумöн пырис Иван. Рейсiсь локтöм бöрын ештöма ни кежавны гортас, вежöма паськöмсö. Сы вылын вöлi коричневöй виль костюм, кокас моднöй штиблеттэз. Боксянь видзöтан-керан да он и думайт, что сiя колхознöй шофёр, нельки галстук вон кышалöма голяас, юр вылö пуктöма шляпа. Иван, тыдалö, юыштöма вина: синнэс öддьöнöв югьялöны, тырп доррез вылö кынмöма блаженнöй шынньöв. Но и мый? Нем сэтöн умöльыс абу. Свадьба! Невна позьö и юыштны...

— Катюша! Горадзуль тэ менам! — ыбöссянь горöтлö сiя. — Кытшöм тэ басöк эта платьеöн, но дзик акань! — и хитрöя дзарьялö öтмöдöрö: абу ли керкуас лишньöй морт? Кöр тöдö, что Катя öтнас, Иван жмитö сiйö ас бердас и окалö кынымиськö веськыта тырппезас. Мыйкö öддьöн дзирыт ымйöвтiс Катя сьöлöмын, быд жилаöт рознитчис тело пасьта, пемдöтiс синнэз. «Ох!» — только и вермис шуны Катя. А Иван сё окалiс и окалiс — тырппезö, синнэзö, кыкнан рожабанас.

Дата добавления: 2015-11-16