Боболь Ванялöн шапка 4 страница

— Ой, тырмас, тырмас... Да дугды жö, часöт мамö пырас!

Но Иван лэдзис сiйö не чожа. Если бы туйис, дак эз и лэдз, йöртiс бы моросас, эз бы и мыччав некинлö. Гöрдöтöм рожабана, öтмöдöрö ветлан синнэза, сiя пуксьö ордчöн невестакöт, малалö сылiсь волькыт пельпоннэсö. Катялö бур, öддьöн долыт. Вот этадз и пукалiс бы век, лележитiс бы дона сьöлöмшöрсö, баитiс и баитiс бы нежнöй кыввез... Иван кутчисьö вöлi эшö окасьны, но Катя эз лэдз — уна окасьöмсянь сылöн висьö юр...

— Лучше висьтав, кыдз талун ветлiн, — тшöктö сiя. — Тырис планыс?

Иван не сразу вежöртö вопроссö.

— План? Ах, да... План... — зонка кыскис портсигар, тарс-тарс керис сы бердö папиросаöн. Медбöрья кадö счастливöй жöник куритö только «Казбек». Небытик и аромата тшынок кöвьясьö керкуас. — План... Эз эд, Катю, тыр. Центнер да джын эз тырмы...

Катя чеччöвтö стул вылiсь, дугдö шыннявны.

— Эд тырмöмви тöбалiмö шогдiсö...

Нывка веськыта видзöтö жöникыс синнэзö. Иван оз вермы терпитны этö видзöтöмсö, тожö чеччö, пондö ветлöтны пельöссянь пельöсöдз. Дзурк-вирк... дзурк-вирк... Штиблеттэз вильöсь, музыкальнöй инструменттэз моз лэдзöны гора шыэз. Но Катя оз ни кыв нем. Кытшöмкö тревога казявтöг пырис сьöлöмö.

— Ванюш, кыдз жö сiдз? Неужели ошибка петiс? Вон Тарас Игнатьевич и районö ни звонитiс, что плансö тыртiмö.

— Тöдан, Катя, давай баитам эта йылiсь сёрöнжык, а сейчас мунам клубö, йöктыны тэкöт охота.

— Тэ мыйкö сайлалан ме шогья. Этадз оз лöсяв. Тревога ыждö и ыждö. Эшö бы не ыждыны! Эз ештö гöтрасьны, а Иванлöн эмöсь ни тайнаэз.

— Ванюш, мый шогмис? Давай висьтав öнi жö!

— Да пустяк... Тэ вежöра нывка, ме любита тэнö, ашын свадьба. Мый тэ тöждiсян? А-а, — Иван вдруг макнитiс кинас, — если охота, то кывзы. Сёравно висьталi бы... Кык мешöчок, тöдан, чапки öтiк тöдсалö оградаас. Только тэ — чöв! Некинлö и шы эн сет, нельки мамытлö... Морт сiя, тöдсаö, надёжнöй, быдöс шито-крыто! А деньгаыс вот!

Иван кыскис писис кыз пачка, треситыштiс сiйöн, сюйыштiс бöр карманас.

— Пондамö öтлаын овны, тырамö деньганас... Катя минутася дыржык ылöстöма видзöтiс жöникыс вылö, старайтчис мыйкö вежöртны, но юрыс уджалiс умöля. Сэтчö жö моросас пыкис, ловзисьны оз лэдз. Зато Иван кваркышавтöг видзöтiс одзас и дзик кокнита шынньöвтiс: «Сюрин, дудiок! Öнi некытчö ни воштiсьны, ковсяс согласитчыны. Ашын свадьба, вот и гöссез ни öксьöны». И эта коста дзик пыжьянöн пышналiсö Катялö юрвемас. Вежöртiс сiя, вежöртiс Иванлiсь кыввесö! Бура вежöртiс!

— Тэ вузалiн колхознöй сю? Тэ — вор?

— Но, сразу и вор... Мыля сiдз строгöя? Ыджыт убыток колхозлö, если кынымкö мешöк кывтiсö бокö. Мореын вотёк! Да и мый тэ полан? Висьталi, мыся, надёжнöй мортыс, не первуись...

Катя дыр видзöтiс öтiк точкаö, думайтiс и думайтiс мыйкö. Эта коста öтпыр эз и лэбтыв синнэсö Иван вылö. Нывка старайтчис лоны спокойнöйöн, юасис гусьöник:

— Не первуись, шуан, надёжнöй? А кин сiя? «Согласитчö, некытчö сылö воштiсьны... да», — радъялiс Иван. Сiя горша кыскис моросö табак тшын, дзуркнитiс штиблеттэзöн.

— Надёжнöй, Катя, эн пов. Чукыль-Мукыльöн шуöны, мамöлöн бур тöдса, городас олö...

— Ладно, мед лоö мамытлöн тöдсаöн. Ашын ветлам сы ордö. Может, оз жö ешты вузавны сюсö мöдiклö. Председателькöт ветлам...

— Председателькöт? Да тэ мый?! — муркнитiс Иван. — Да тэ мый?

— Пет! — чирöстiс не аслас голосöн Катя. — Пет öнi жö, но! — и сiдз öбыртiс Иван моросö кулакнас, что мöдыт чуть только эз нюжав гор бокö.

Иван бöрöн-бöрöн вешшис пороглань, сюльтыртiс кеймисьöмöн:

— Катюш, дугды! Катюш, свадьба эд ашын. Мый тэ маитан асьтö?

— Пет, мыся, öнi жö, мун вакрамеш аслат свадьбаöн!

Жöник кутчисис ыбöс вуг бердö, дрöжитiс, кыдз ва вылын шать.

— Ужо, сулав! — чорыта горöтчис Катя. И стыдитчытöг павтыртiс вывсис дона платьесö, летыштiс мымда вын и шентiс Иванлö кок увтас. Сэсся котöрöн чепöссис комö и шенталiс сэтчинсянь кофточка, косинка, эшö öтiк косинка, ны бöрын увгöмöн лэбзис фланелевöй шоныт халат. Нывка казялiс пызан вылiсь брошка и желльыштiс тожö джоджö да эшö камгис сы кузя кынымиськö каблукнас: — Вот! Вот! Босьт этö быдöс и тарöвтчы!

И колiс жö эта минутаö пырны высьтiсян ведраöн Маланья Карповналö. Пырис и тувдiс местаас, синнэс кылалiсö.

— Ай-й! — горöтiс сiя, кöр казялiс платьетöм нывсö. — Караул!

И шлёпкисис джоджö. Ведра жольк сувтiс кыминь, йöв визывтiс шороккезöн джодж кузя, вадiс басöк мöдöтчаннэз, рудзалiс джоджулö. Катя чепöссис мамыс дынö и вöрöтiс сiйö пельпонöт, старайтчис бурöтны:

— Мама, свадьбаыс оз ло! Иваныс — вор!

— У-ф-ф, — шыасис Маланья Карповна и лöнис бöр. Сiйö треситiс кудоба.

Öтöрын увгис страшнöй ой тöв, кöин моз уннялiс быд щельын, павтыралiс крышаэз вылiсь сiсь тёссэз. И вöлi пемыт, кöть синмö рос мöрт. Не весь баитiс сторож Опонь, что ой гöгöрас лэбас морока-непогодь. То и ва воттезöн тöлыс резсьö ни — пондöтчö поснитик, кöдзыт, дыр кыссяна арся зэр. Турикок деревня лöсьöтчö ни узьны, сьöрсьöн-бöрсьöн кусöны биэз. Только клубын да правленнёын дзардöны эшö югыт öшыннэз.

Иван дыр мунiс ляшмасьöмöн, кыдз код, мунiс, коккесö му бердöт кыскöмöн, пöлiнясис öтмöдöрö, дзик пон, кöдалö бöр кузяс сöтiсö зорöн. «Шедi, шедi, тыдалö, — мелькайтiс сы юрын. — Эх тэ, паразит, кинлö лёбин?» И öдззис котöртны! Котöртiс перыта, чеччалöмöн, веськыта нять гöппезöт, кырасоккезöт, туйтöг. Сылöн чужис дума: öнi жö пуксьыны машинаö и мунны городö, локны Чукыль-Мукыль ордö, босьтны бöр мешöккесö, висьтавны, мед оз лёб. «Морт сiя умнöй, отсалас...» — думайтö Иван. И котöртö эшö чожжыка. Ойыс кузь, позяс керны быдöс, только вот машинасö складö колис, сторожкöт пантасьны ковсяс, эх!

― Стой! Кин сэтчин пырö?

Но вот, сiдз и эм! Старик, конечно жö, оз узь. «Кувны сiя оз вермы, пöрись тупкан!»

— Этö ме, деда! Ме — Иван Тоинов! Городö колö ветлыны, осьт жö воротасö.

Дед Опонь маласьöмöн осьтö ворота.

— Городö, шуан? Мый сэтчин вунöтiн этшöм пемыт ойö?

— Свадьба кежö колана тор вунöтi небны. Натьтö, осьтаöсь эшö магазиннэс. Пырав, деда, ашын сур юны! Да и винаокöн бöра юкталышта...

Иван баитö перыта, голосыс дрöжитö. Дед Опонь казялiс ни: зонка öддьöнöв тэрмасьö. Мыйлö бы сiдз?

— Некытчö ог лэдз! — баитö сiя строгöя. — Вай правленнёись разрешеннё!

— Деда, тэрмася öддьöн, лэдз! Винаöн, мыся, юктала...

— Разрешеннё вай! — Ах, сiдз!

И шофёр сэтшöм вынöн тангис стариклö кынöмас, что Опонь, кыдз рака, лэбзис куим метр ылына. Но Иванлö ли вермасьны стариккöт? Опоньлöн иньыс вон богатырься вынажык и то сiйö шоча ыбöс сайö тойлавны вермö, а сэтöн кытшöмкö щёголь Иван, тьфу! Опонь чеччöвтiс кок йылö, гымгис пемытiнас пишались, чепöссис шофёрлань.

— Сулав, паразит! Тэ кинкöт?!

Иван эз ешты и кваркыш керны, кыдз Опонь лонтыштiс моросас прикладöн да эшö сьöвзис рожаас.

— Мунам правленнёö! — сторож вились зарядитiс пишальсö, чапкис вывсис тулуп — сытöг жар лоис, дулоöн чувйыштiс Иван кынöмö. — Ме тэныт, зырымöсь бедьлö, мыччала, кыдз Опонькöт тышкасьны!

Вына и смелöй морт вöлi Иван, но öнi лоис дзик куштöм курöг. Казялiс сiя, что нем ни оз пет и сторожкöт лучше не кутчисьны — öтiк шум. Иван чорыта решитiс пышшыны, пышшыны ылöжык, талун жö. «Кык мешöк понда некин кошшыны менö оз понды», — думайтiс сiя, правленнёö пырикö.

— Силой бы городö мунö, машина корö. Винаöн, шуö, юктала... ачыс тышкасьны пондiс, — баитiс Опонь правленнёын. — Сiя, тыдалö, менö вина вылö небны мöдöма, вот сьöд кырныш!

— Городö? Ойнас? Этö мыйлö жö? — лэбтiс Иван вылö синнэсö председатель.

Шофёр мыйкö мöдiс висьтавны, но эз ешты осьтны öмсö, кыдз правленнёö ышки-пойки пырис Катя. Сiя дрöгнитiс, кöр казялiс Иванöс да сторожсö, и шумöн чапкис пызан вылö, Тарас Игнатьевич одзö, дона мöдöтчаннэз.

— Вот! Иваныс вор вöлöма, вузалöм кытшöмкö Чукыль-Мукыльлö колхознöй сю.

И öдззис горзыны, сiдз горзыны, что немöн бурöтны оз позь. Курыт синваэз визывтöны чужöм кузя, вотялöны öлöдзö...

Отирыс, может, и вунöтас этö арся рытсö, а сылö, Катялö, век не вунöтны.

Дата добавления: 2015-11-16