Шоныт кеписсез

Шерва ю дорын, кытчö Шордынскöй лесопункт петкöтö вöр, ой и лун сотчö ыджыт костёр. Сир дука тшын путриктöмöн кайö кöдзыт неболань, веськыта сулалö вöр весьтын, кыдз ыджыт швавья столб. Тöвся кымöррез лажмытöсь. Тшыныс павкö ны бердö, сэсся дыша рознитчö, а вöр весьтiсь сiдз ни гудыра небоыс лоö эшö гудыражык.

Хозяйкаыс эта костёр дынын Валя Долганова, вöр примитiсь. Кöр локтас грузитöм машина, Валя лыддьö кубометррез, а кöр машинаэз абу, шонтiсьö би дынын. Вот и öнi пукалö ыджыт чурка вылын, чапкалö биас кöзовöй да пожумовöй лыссэз. Нiя ульöсь, но сираöсь, сотчöны бура, чижöтöмöн, и нывкалö кажитчö, бытьтö сiя пöжалö горби одзын блиннэз.

Костёр бокöт, сьöкыта гурöтöмöн, бытьтö ружтöмöн, мунö грузитöм машина. Этö локтiс Николай Мехоношин. Сiя сувтöтiс лесовозсö берег дорас, кытöн цеппезöн жольöтö лебёдка, ачыс шупыта петiс кабинаись и, оча ки шовкöтiкö, тэрмасьö би дынö. Ылiсянь сiя чирзö Валялö:

— Но и мороз! Тэ он кынмы?

— Ме дзирыт, — шыннялö нывка.

— А ме чуть эг гöж. Вот сотö, нельки кабинаын спасеннё абу!

Николай Мехоношин только арнас локтiс армияись и сё новйö солдатскöй паськöм: кокас сапожоккез, юр вылас фуражка. Только шинельсö ватнöй телогрейка вылö вежöма. Зонка рад пасьтавны мыйкö шонытжыкö, да кытiсь сразу ваян? Нельки бытшöмжык кеписсез абу, и киэз кынмöны, кöть сюйышт нiйö биас.

Папироса öзтiкö шофёр юöртö Валялö:

— Ветлi тöн начальник дынö, кори пимиэз и пась, дак абу, шуö, не талун дак ашын ваясö, сэк и сета пö.

— И тэ согласитчин видзчисьны? — юалö Валя. — Ме бы тэ местын пукси кабинетас гор бокö и пукалi, кытчöдз начальникыс ачыс эз вай одзам виль пимиэз и шонытжык пась. — Нывка чöлö кынымкö минута, сэсся кыдзкö полöмöнмоз дзарнитö шофёрыс вылö и содтö: — Колö жö вежöртны, что тэ кынман и пондан шогавны.

Эна кыввезын, а сiдзжö Валялöн дзарнитöмын тöдчö ыджыт забота, и Николайлö лоö не ас сьöртi. Сiя чапкö окуроксö костёрас и шы сеттöг иньдöтчö ректыны ни пондöтöм машиналань. Мунiкас Николай чувствуйтö» кыдз Валя орöттöг видзöтö сы спинаö. Этасянь лоö эшö недолытжык, и Николай чуть ли не котöрöн тэрмасьö сайöвтчыны.

Кысянькö юыс сайсянь, лымсö бергöтöмöн, пöльтыштiс тöвчик, пöрöтiс костёр весьтiсь тшын столбсö, резiс öтмöдöрö. Валя сайöвтiс чужöмсö кинас, но тшын ештiс пырны синнэзас и курöтiс нiйö. Нывка сьöкыта ловзисис, крута бергöтчис и котöртiс лыддьыны кубометррез.

— Э-эй, уджав шупытжыка, а то гöжан! — чирзö сiя лебёдчиклö.

Валя старайтчö лоны весёлöйöн, бытьтö сылö долыт и гажа, но этадз оз пет: вöрзьöтас чужöмсö шынь-серöм, пыкнитасö синнэс мича югöрöн и сэк жö кусасö. Лун-мöд ни сылiсь юрвемсö кокалö сьöкыт дума, сьöлöмсö гыжьялöны каньпияноккез. Повариха тётя Даша, кöдакöт Валя олö öтiк комнатаын, горöтчис кыдзкö:

— Козьнав сылö мый-нибудь, и вöрзяс сьöлöмыс, любитны пондас.

«Козьнав»... Бур этö сылö, пöрись мортлö, баитны! Валя рад бы козьнавны мыйкö бытшöмö-бытшöмö, да примитас я Николай, мый сiя думайтас? Эд любитöм йылiсь ны коласын басниыс эз на вöв...

Шуны кö веськыта, Шордынскöй лесопунктын Валя Долганова вöлi медбасöк нывка. Да только разь татöн! Лесовоз вылiсь шофёр Петька Ушаков авторитетнöя баитiс:

— Светсö гöгöрт, а сэтшöмсö он пантав! Мыгöрнас Валя неыджыт, лапытик, а чужöмыс öддьöн симпатичнöй: синнэз голубöйöсь, ыджытöсь, нырыс вöснитик да веськыт, тырппез гöрдöсь. Юрсиыс Валялöн лёнся чочкомжык, волнаэзöн лэдзчисьö пельпоннэзöдз, а синкыммес — эд вермас жö сiдз шогмыны! — сьöдöсь, дзик саöн мавтöмась. Тётя Даша быдöнлö баитö, что синкыммесö нывкаыс воть немöн оз мавт, но Петька Ушаков, а öтлаын сыкöт и мöдiккез, шуöны, бытьтö пöрисьувьяс тётя Даша велалöма бöбöтчыны. Но не синкыммезын дело. Дело сыын, что Петька Ушаков гожумбыт вöтлiсис Валя сьöрын, сё старайтчис кольлавны сiйö гортöдз, а öтпыр нельки ветлöм корасьны. И сылö, Ушаковлö, Валя мыччалöм порог: перво миссьöт пö солидолöн ляксьöм ныртö да быдмышт невна...

— Вот, челядь, — баитiс Петька аслас друггезлö, — сiдз и шуис: миссьöт пö ныртö. Кытчö öнi меным воштiсьны?

Эта вöлi гожумнас, кöр Валя ештiс только мыччисьны татчö. Сэк сiя вöлi öддьöн весёлöй, голубöй синнэс сiдз и койисö смех, а берег дорись складын асывсянь и рытöдз горöтлiсö песняэз, Голос сылöн небытик да гора, кыдз пöлян, и вöвлi, кöр нюжöтас:

Öшынокат сотчö свет,

Сiя воть спокой оз сет.

Дзик экран вылiсь видзöта

Тэнчит тöдса силуэт, —

говк валлэзöн ветлö вöрас, и быдöс шофёррез осьтöны öммезнысö. Не öтiк зонкалöн косьмис сы понда сьöлöмыс, не öтiк видзчисис нывкасянь дзирыт кыв, а Петька Ушаков эз вермы терпитны и мунiс мöдiк лесопунктö. Валя бытьтö эз и адззы, мый шогмис зонкаэз коласын, некин вылö и дзар эз кер.

Но чулалiс гожум, сибалiс зэра да кöдзыт ар. И öтлаын аркöт нывка сьöлöмö пырис первöй любитöм. Сiя локтiс гусьöника, казявтöг и вöлi совсем не сэтшöм, кытшöм олiс Валя юрын. Нывка думайтiс, что любитöм — эта мыйкö öддьöн кокнитик, гажася-гажа чувство, а вöлöма сiя сьöкыт, кыдз из, вöлöма гажтöм — дугдывтöг висис сьöлöм, пессис, дзик клеткаö йöртöм кай, и кытчöкö кыскис, кинöскö корис дынас.

Валя öнöдз оз вежöрт, кыдз шогмис эта. Некöр одзжык эз думайтлы, что любитöм вермö öзйыны первуись дзарнитöмсянь, а шогмис как раз сiдз. Öтпыр асывнас, кöр быдöс шофёррез мунiсö вöрö, а сiя лыддис кубометррез, чукыль сайись мыччисис тöдтöм машина прицепöн. Ылiсянь кылiс, что сiя шумитiс не сiдз, кыдз мöддэс: мыйкö жольöтiс, трингис, тарскöтiс и эшö дзуртiс, кыдз умöлик нярьян. Машина сьöкыта кайис неыджыт керöсок вылö, не öтпыр сувтчылiс и пондылiс тарöвтчыны бöр. Сэк Валялöн ёткöп мунiс сьöлöмыс: «Кöть бы эз нильды бöрöн, эз пöр логас»... Но шофёр, тыдалö, вöлi опытнöй, и машинаыс, кöть и жагöна, сёжö локтiс ректiсян местаöдз. Кабинаись петiс шöрöт мыгöра детина. Сы вылын вöлi солдатскöй ременьöн йиалöм ватнöй телогрейка, юр вылас военнöй фуражка. Валя ештiс казявны, что детиналöн юрсиыс сьöд, нырыс невна чангыля, а рожабан йыввес гöрдöсь. И эшö казялiс сiя, что кöть вöлi кöдзыт ни, а зонкаыс новйö хромовöй сапоггез. «Форсун», — мелькнитiс дума.

«Форсун» казялiс Валяöс и гажöна здоровайтчис:

— Здравствуйте, нылочка!

Валя гöрдöтыштiс невночка и шуис лöгöнмоз:

— Привет! Только ме не нылочка, а нывка ни. Нылочкаэс аканнезöн орсöны, а ме вöр примита!

Зонка гажöна шынньöвтiс, мыччалiс лымся чочкомжык пиннесö и виноватöя шыасис паныт:

— А-а, вежöртi. Простит, ежели öбидитi. Давай тöдсасьны ме Николай Мехоношин, демобилизованнöй солдат...

Нывка кошшис ни лэчытжык кыв, кöдöн позис бы тшыкöтны демобилизованнöй солдатлiсь бур настроеннёсö, но эз вермы горöтчыны нем. Солдат видзöтiс веськыта чужöмас, и Валя казялiс, что синнэс сылöн гажаöсь, добрöйöсь и кытшöмкö особеннöйöсь. Мый ныын вöлi особеннöйыс, сiя, конечно, эз тöд, но вермис бы висьтавны, что лесопунктын сэтшöм синнэс некинлöн абу. Валя каитчис ни, что не öддьöн рама панталiс этö тöдтöм зонкасö, мышкыртiс юрсö и шуис гусьöн:

— Ме — Валя...

Вот и быдöс. Сэсся нем йылiсь нiя эзö баитö эта лунö, и öтiк кыв эз горöтчö, а шогмис невежöртана дело. Тётя Даша адззылiс рытнас, кыдз удж вывсянь локтöм бöрын Валя чожа чöвтчис и сразу жö водiс кроватьö. Сылöн висис юр. Мöд рытас тётя Даша дивуйтчöмöн видзöтiс, кыдз нывка пасьталiс ассис медбур платье, кöмалiс моднöй туфлиэз, джын час мымда бергалiс зеркало одзын и вöлись мунiс клубö. «Вот кыдз! — ас кежас думайтiс старуха. — Вöрзьöма сьöлöмыс! Этö платьесö некöр эз пасьтавлы, а талун — на тэныт!» А лун-мöд бöртi тётя Даша кылiс, что клубын Валя танцуйтö кытшöмкö солдаткöт и кыдзкö пыр шогмывлö сiдз, что кино видзöттöн нылöн местаэз лöсявлöны ордчöн...

Локны удж вывсянь посёлокöдз Валя тожö инмывлiс Николай кабинаö. Сэтöн вöлi öддьöн бур и шоныт. Шофёр висьтасис солдатскöй олан йылiсь, а Валя сы йылiсь, кыдз быдмис детдомын, кыдз кончитiс лесотехникум и таво локтiс уджавны лесопунктö. А мый йылiсь нiя баитiсö сэк, кöр Валя первуись пуксис Николай кабинаö? Ох, эта йылiсь лучше не касьтывлыны — öнöдз пель йыввез гöрдöтöны! Николай сэк шуис Валяöс... кагаöн.

— Мый нö машинаыт сiдз гольöтö, дзик киссьыны мöдö? — юалiс сэк Валя.

— Не машина, а гроб музыкаöн, — согласитчис шофёр. — Важ ни, сiйö и видзöт — киссяс, да и тормоззэз оз видзö...

Валя повзьыштiс:

— Оз видзö? А кыдз нö ми керöс увтас лэдзчам?

— Жагöник лэдзчам, эн пов.

И Николай висьталiс, что кöр шофёр оз надейтчы тормоззэз вылö, сiя лэдзчö керöс увтö первöй скорость вылын. Мотор сэк бергöтö карданнöй валсö жагöника, и колесоэс бергалöны тожö жагöна. Конечно, инструкция сьöртi сiдз ветлыны оз туй, но кытчö воштiсян, кöр абуöсь буржык машинаэз, а лесопункт оз тырт годовöй план? Вöрсö пельпон вылын он петкöт. Валя нем эз шу паныт, только тшöктiс мыччавны, кыдз включайтöны первöй скорость. Сэк Николай нырыштiс кокнас кытшöмкö кöрток, веськыт кинас тойыштiс рычаг и бöр лэдзис кöртоксö. Кабина джодж увтын пондiс сярöтны, кыдз умöлик вартан машинаын. Лесовоз дрöгнитiс и лэдзчис керöс увтö жагöника-жагöника.

— Вот и быдöс. Вежöртiн, кыдз керсьö?

— Вежöртi, — шуис Валя. — Этö рычагсö колö тойыштны одзлань.

— Перво одзлань, а сыбöрын невна шульгалань. И эшö колö нырыштны кокöн вот этö муфтасö.

Машина мунiс вöрöт. Валя видзöтiс, кыдз нылö паныт котöртiсö ыджыт пуэз, мелькайтiсö нитшсялöм мыррез, и сё юасис.

— Эта мый сэтшöмыс кок увтат?

— Эта? Газ. Кöр сiйö нырыштан, карбюраторись петö унажык бензин, и моторыс уджалö буржыка.

— А эта мый?

— Сiя зажиганнё.

— Вежöрта. А эта мый?

— Эта?.. Тöдан, Валя, эм менам вонöлöн нылочка, кык год сылö тырис, дак веритан, чуть менö эз пöдты вопроссэзöн, кöр вовлi гöститны. Чеччас асывнас одзся-одз и давай юасьны: «Дядя, эта мый?.. А эта мый». Тысяча вопрос и сё — «Эта мый?» Тэ мыйöнкö вачкисян сы вылö.

Николай эз мöд öбидитны Валяöс, но мöдыт öбидитчис. Сiя нюмыртiс тырпоккесö, косöйöн видзöтiс Николай вылö, мöдiс сёйны синнэзнас, и шуис мыкталöмöн:

— Тэ менö он я кагаöн лыддьы?

Эта случай бöрын нывка неделя мымда эз пуксьывлы Николай кабинаö, эз баит сыкöт, ветлöтiс подöн. Конечно, Валя вöлi ачыс виноват, сiя видзис асьсö былись кага моз. И колiс жö юасьны кытшöмкö несчастнöй тормоззэз йылiсь. Да мед нiя мунiсö вакрамеш. Валялö вöлi сьöкыт, öддьöн сьöкыт. Но чулалiсö луннэз, и нiя казявтöг миритчисö, нывка бöра пондiс ветлыны гортö ордчöн Николайкöт. Сiя нельки öтпыр пуксьылiс руль сайö и нуöтiс машинасö не öтiк верста. Хитрöйыс нем сэтöн эз вöв.

...Вот сiдз и чулалiс кадыс. Чулалiс нятя ар, и локтiс сöстöм, топ гöстя, куржаваа тöв. Лоис кöдзыт: то падеритiс, то поткöтлiс кын пуэсö мороз. И вот диво: öтöрын шовкöтö мороз, а Валялö бытшöм — биок сотчö сьöлöмас, шонтö нывкасö. Только öтiк умöль: Николай танцуйтö сыкöт клубын, порой ордчöн пукалö киноын, а вот кольлавны гортöдз — эшö öтпыр эз кольлав. Мыля бы сiдз? Может, Валя оз гленитчы сылö? Может, зонкаытлöн эм невеста? Али былись лыддьö сiйö кагаöн?

Нывкалö охота тöдны этö, охота локны Николай дынö да висьтавны сылö мыйкö дзирытö-дзирытö. И вдруг, кытчöдз сылiсь ректiсö машинасö, Валя юрын чужис дума. Сiя вöлi важнöй, öддьöн важнöй. Нывка нельки дрöгнитiс, ёна повзьыштiс, кöр думаыс павкис вемöдз. А мый, если Николайлö козьнавны кеписсез? Да, да, нiйö кеписсесö, кöднö Валя гöрдззис небытик вурунiсь и кöдна шогмисö ыджытöлöсь, а Николайлö лоасö самöй раз. Вот нiя — пушистöйöсь, небытикöсь, шонытöсь... Эта думасянь Валялöн гöрдöтiс чужöмыс, дзик сiйö нюлыштiс бикыв, а сьöлöмыс сылiс чöскыта-чöскыта, бытьтö сiйö кинкö нималiс. Валя мылякö полiс, мыйиськö стыдитчис. Но эта кыссис недыр. Мыля бы и не козьнавны? Каждöй нывка козьналö аслас сьöлöмшöрлö мый-нибудь, а Валялö оз разь туй? «Эх, бöбöв! Да кыдз жö ме одзжык эг ылöст этö керны?» И сiя решительнöя иньдöтчис шофёр дынö, кöда пукалiс ни кабинаын и лöсьöтчис виль рейсö.

— Коля, сулышт невна! Коля, тöдан мый? Вот тэныт кеписсез... Нiя шонытöсь-шонытöсь... Вот пешлы...

Шофёр барöтiс синнэсö и, тыдалö, нем эз вежöрт. А Валя сюйыштiс Николай киэзö кеписсесö, ачыс гöрдöтiс, кыдз мак, и ньöвьёсьöн чепöссис штабеллез сайö. Шофёр эз и ешты горöтчыны öтiк кыв.

Валя нем эз думайт, но вежöртiс, что шогмис мыйкö важнöй и значительнöй. Перво и пессис сьöлöмыс: сiдз я аркмис? Сэсся нывка öвтыштiс кинас — мый лоас, сiя и ло! Ась Николай думайтö, мый сылö охота. Юр сы понда и керöм, медбы думайтны. И Николай думайтiс.

Сiя важын ни мöдiс висьтавны, медбы нывка дугдiс маитны асьсö, но сё веритiс, что чувствоэз сылöн сайкаласö и быдöс лоас бур. И вот — колö жö! — кеписсез... Ачыс кольччис куш киöн, а Николайлö сюйыштiс кеписсез! Нет, кыскыны сэсся оз туй! Колö висьтавны, мед вунöтiс. Конечно, сiя басöк. И öддьöн вежöра. Мунны сыкöт ордчöн кöть кинлö любо. Но некöр оз ков вунöтны, что Валялö только неважын тырис семнадцать год, а Николайлö мунö двадцать четвёртöй. Босьт сэтшöм томсö ас сайö — паньыштан горесö! Да и гöтрасьны кытчöдз эз вöв некытшöм охота: зон мечтайтiс год бöртi мунны велöтчыны. «Непременно висьтала быдöс, ась вунöтö. А кеписсесö... Ах тэ, чёрт! Мый ныкöт керны? Сетны бöр? Öбидитчас ёна, лöгасяс. А может, эшö невна кыскыны? Но и кыскыны сэсся оз туй. Вот шогмас жö...»

Эна думаэзöн Николай керис медбöрья рейс, отсалiс лебёдчиклö ректыны вöр, сэсся бергöтiс машинасö, сувтчис мысок вылас. Валя юасьöмöн дзарнитiс сылань: чожа ли гортö? Сылö сьöкыт, öддьöн сьöкыт. Сылö колö баитны Николайкöт, висьтавны веськыта, мый эм сы сьöлöмын и юрын. «Вот пукся кабинаас и висьтала...» — думайтö нывка.

— Сейчас, Валя, мунам. Только папироса öзта, — горöтчис Николай и котöртiс костёр дынö — сылöн, тыдалö, бырсьöмась спичкаэз.

«Колö висьтавны», — думайтiс Николай. «Колö висьтавны», — думайтiс Валя. Но шогмис быдöс не сiдз, кыдз мöдiсö керны. Öдва шофёр сайöвтчис штабеллез сайö, кыдз Валя син одзын пондiс керсьыны мыйкö невежöртана. Лесовоз колесоэз увтын вдруг дзуркнитiс лым, мыйкö голькнитiс кузовын, и машина жагöника вöрзис местасис. Вöрзис и пондiс тарöвтчыны! Öтiк секундаö быдöс думаэз петiсö Валя юрись, пот мунiс сьöлöмыс.

— Николай! — горöтiс сiя и, кыдз кань, чеччöвтiс подножка вылö. Öт кинас сiя видзсис кузовыс бердын, мöднас кошшис ыбöс вуг и, кыдз нарочно, кабина ыбöс вылын эз вöв чочком ручкаыс, немöн вöлi осьтны ыбöссö.

— Николай, Коля-а! — мымда вын горöтiс Валя. Ачыс мöдiс чеччöвтны му вылö, вуджны мöдöрас, кыт позис бы пырны кабинаö. Но машина гольöтiс сё ёнжыка и тарöвтчис сё перытжыка. Вот-вот сибалас медкрут местаöдз, и сэк он ни сувтöт немöн, пондас лэбзьыны, кыдз пуля. «Лоас авария!» — мелькнитiс Валя юрын, и сiя быд вын сöтiс кулакнас кабина стекло кузя, сэсся эшö и эшö... Сöталiс сэтчöдз, кытчöдз быдöс стеклоыс эз резсьы учöт тороккезöн. Эта коста мыйкö öддьöн дзирыт сидзис долоняс, пемдыштiсö синнэс. Но маласьны некöр. Нывка перыта пырис кабинаö, пуксис руль сайö. «Первöй скорость... Только бы не сорасьны... первöй скорость!»

Кык сюра тöлiсь чуйнитiс кöз йыввез коласöт и казялiс, кыдз хромовöй сапоггеза да военнöй фуражкаа детина котöртiс машина сьöрын. Детина вöлi дзик ылöстöм: эд адззö, что не вöтны машинасö, дак нет — сёравно котöртö. Тöлiсь любопытнöя видзöтiс, мый лоас одзлань. И вдруг машина дрöгнитiс, невна ыскöвтiс юзöн и пондiс лэдзчыны керöс увтö жагöника-жагöника, а недыр мыйись совсем сувтiс. Сэтöн сiйö и вöтiс Николай...

— Валя, Валя! Да мый эта сэтшöмыс?!

— Нем, — горöтчис Валя. — Мöдпырся эн сувтöтлы нярьянтö керöс йылас. Ачыс тарöвтчö. Кöртав киöс чышьяннам, вундыштi стеклонас. Нельки вугыс тэнат абу... эх тэ...

Николай кыскис кармансис чочком чышьянок, каттис Валялiсь кисö. И сюра тöлiсь адззылiс, кыдз детинаыс лэбтiс вына киэзöн учöтик нылöс, жмитiс морос бердö и дзирыта окалiс веськыта малиновöй тырппезас.

— Роднöй тэ менам...

Гортö ни мунтöн Валялö усис тöдвылас, мый сiя мöдiс баитны, но эз ешты висьтавны нем. Николай ачыс шуис как раз нiйö кыввесö, кöднö видзчисис нывкаыс:

— А кеписсет шонытöсь, öддьöн шонытöсь, Валя...

Дата добавления: 2015-11-16