МАКАРИХАЛÖН СЧАСТЬЕ

(ордч.: повесь Кыдз шыннялö апостол)

Посвящайтчö

Пётр Кучевасовлö

Важ Дзимбырын, неыджыт деревняын, кöда шлёпкисьöма паськыт вöр коласö, пöрись Макарихалöн керкуыс мед ни умöль. Сулалö сiя рас дорас, улица конецас, öшыннэзви пырöма муö, пöлiньтчöм, сiйö и видзöт — пöрас и киссяс, кыдз важ остожья. Кöр ыб ладорсянь бöбалöм могись пöльтыштас вынажык тöлок, Макарихалöн керку пельöссэзiсь путриктöмöн петö сiм рöма поснитик бус, крыша вылын öдззöны шовкöтны багсялöм тёссэз. И локны сэтшöм кадö керкуыс дынö нельки полöм петö: бус тыртас синнэтö, а вермас лоны и сiдз, что тёс тор мезмас местасис и öбыртас кымöс кузя. Касьтыв вöлись, кыдз тэнö шуисö!

Важ керкуыс, сiсь. Учöтик öшыноккес пильтырасьöмась, мукöд стеклоэс жугалöмась. Пöрись Макариха тупкалöма осьтаэсö кытшöмкö нёштöм трепиччезöн, и нiя чуй видзöны, дзик син вылын бельмо. Натьтö, этасянь и видзöтöны öшыннэс чочком светас гажтöма, бытьтö синвасорöн норасьöны: абу татöн некытшöм гаж, абу некытшöм счастье.

И быль, эз вовлы эта керкуын гажыс. Прокод сэтöн кижгана голоса старушкаэз кузь молитваэз лыддьöтöны, ышлолалöмöн мöдöр свет йылiсь баитöны, ойзöны да сыркьялöны. Только сiйö и кылан быд пельöсiсь: «Ох-хо-хо, енiньöй-батюшко... Греххез миян, греххез... Кыдз и овнытö пондамö...» Гажтöм, недолыт. Сьöлöм гудрасьö. Кöркö Важ Дзимбырын вöлöма неыджыт часовняок, и быльнöй поп посадiсь вовлывлöм öбедняэз служитны. Но коллективизация коста часовнясö пöдналöмась, попöс иньдöтöмась кытчöкö дыв, а святöй ликкесö — сотняся унажык! — Макариха аслас жöниккöт гусялöма гортас. Öнi сы керкуын быд пельöсын и быд джаджок вылын сулалöны микола угодниккез, иван крестителлез да мугсьöм чужöма дева марияэз. Быдöнныс нiя сэтшöм лöгöсь, бытьтö век тшыгйöн олöмась; синнэзныс сiдз и свиттялöны недобрöй чочкоммезöн, сiдз и мöртчöны моросöдз... Ыджыт лун панытö пöрись Макариха быдса сипож кольттез пöжалас, дзирыт ваын лук киль пöжас, кольттесö бытшöмика краситас сэтöн да быд святöй одзö торс пуктас: «Сёйö, кöрмилеччез, эд лöгалö...» А ликкес сё лöгалöны.

Дас год мымда ни чулалiс сэксянь, кыдз Макарихалiсь жöниксö чарöтiс шоныт июльскöй лунö. Мый понда сiйö ен-батюшкоыс аслас кипод увтö босьтiс — пöрись Макарихалö некыдз не вежöртны. Эттшöм славнöй мужик вöлi, кытшöм дзирыта радейтiс сiя молитваэз лыддьöтны! Макар размöд нельки вичкуö ветлiс, кöть сто верстася ылынжык сэтчинöдз, а лöгасьöма мылякö «кöрмилечыс». «Ох-хо-хо, — ружтö öнi пöрись Макариха, — греххез, миян греххез... Не весь, тыдалö, баитöны: «Му вылын ов, а небоись пов».

— Кытшöмкö грех, натьтö, вöлi Макарыс сайын, — шлёпöтö тырппезнас Кутю Öльöксаниха, рушмöм сёртни кодь пöрись старуха. — Етшаöв, поди, юрбитiс сускристосыслö да... Ох, ох... Кöть тэ эн вунöт сiйö, Макарика, юрбит унажык, кор счастье. Да и зоныт, вон, жöник чожа лоас. Кеймись, медбы талан сылöн вöлi, медбы ум бердö кутчисис, медбы бöбавны эз понды.

— Мый тэ, мый тэ, сваття! Кыдз позьö енöс вунöтны? Ой и лун юрбита, ой и лун поклоннэз тэча. И зонöлö счастье кора. Бöбöв эшö сiя, Опонюшкоö, нем оз вежöрт. Но ме велöта... Ох, велöта. Суд менам öтiк: юрыт виноват, дак небыт местаэзнат отвечайт. Кыдз инö, кыдз инö... Еныс строгось любитö.

Öльöксаниха часто-часто мигайтö куньсьыны пондöтчöм синнэзнас, Иван Крестительлö муöдз поклон сетö.

— Велöт, Макарика, велöт бытшöмика. Кöркö миянöс тöдан кыдз велöтiсö? Бу-ура велöтiсö. Мамö, покоенка, кутас, вöвлi, косöттям, юрöс шемалас коккезнас да вирöдз... нагайкаöн... Вот и мортöн лои. А öнi мый? Томмес воля босьтiсö. Ен вылö некин дзар оз кер. Вот и наказывайтö миянöс сускристосыс. Может, и Макарушкотö сiйöн чарöтiс да? Тожö эд челядьсö етша шовкöтлiс!

Жевгöны и жевгöны кык пöрись. Пондöтасö баснисö погоддясянь, а кончитасö бöра ен нимöн.

Рыттэзнас пöрись Макариха ордын бергöтчыны оз туй. Локтасö старухаэз да быдкодь шогалiсь отир, сувтасö пидзöссэз вылö, ойшöрöдз кымöссэзнаныс джоджсö тюкйöны, счастье да здоровье еныслiсь корöны. Мукöдыс сэтчöдз юрбитас, нельки садьыс бырас — бряк усяс кыминь, сэсся и чеччыны оз вермы. Медсёрöдз Кутю Öльöксаниха поклоннэз тэчö, медуна юрбитö. Видзöтан, быдыс пöтiс ни молитваэзнас, быдыс гортас ни ляшмасис-мунiс, а сiя сё эшö шлёпкöтö тырппезнас. Быдтiс Öльöксаниха öтiк нылöс, пыр сылö счастье енсянь корис, да кынымкö год бöрланьын, арся микола коста, кöдувьяас сiдз «велöтöма» нывсö, что öнi сiйö кудоба монлалö. Бöра забота содiс — нылыслö здоровье еныссянь корö.

Юрбитö и шушкö, юрбитö и шушкö ойшöрöдз Кутю Öльöксаниха.

Нö вот и сiя мыдзас, сувтас кок йылö, чышьян конечнас синваэз чышкас.

— Спасибо, кристосiньöй, спасибо, батюшко, — баитö строгöй ликлö. — Сразу долытжык лоис, сьöлöмö ö-öддьö-öн бурмис.

Гортö мунтöн Öльöксаниха сувтас порог дынö да эшö минута-мöд жевгас.

— Дак велöт, Макарика, чадушкотö, медбы эз жö понды бöбавны. Быдторыс эд овлö, ох-хо-хо... Айтöг быдмö, айтöг! Медбы эз жö чапкы тэнö, кыдз Иванушкоыт. Ох, согрешеннё!

Макарихалö сьöкыт кывзыны этö баснисö, синваэс петöны, мыля ыджытжык зоныс, Иваныс, мунiс городö да и вöйсö сэсся эз вайлы. Олö пö кытшöмкö инькакöт и нем сэсся сылö оз ков. Сьöкыт. Но пöрись Макариха баитö чорыта:

— Прокленитi ме сiйö, зырымöсь бедьöс. А Опоньöс кера мортöн. Кыдз висьталi, сiдз и лоас.

— Кер, кер, матуш!

Дыр баитöны пöрись старухаэз, янсöтчыны оз вермö. И кыдз нылöн мыла оз быр!

— Быдса суткиэзöн юрбитöны, — норасис кыдзкö меным Дзимбырись меддошлöй старичок Гаврило Фокич, кöдö унажыксö шуöны татöн Гырдзза-аршинöн, мыля томнас уджалöма купец ордын и меряйтлöма ситецсö не аршинöн, а гырдззанас. Вот и касьтывлö дед энö кыввесö, чуть да и шуö гырдзза-аршин.

— А мыля нылiсь синнэзнысö од осьтö? — юалi ме.

— Хех-хех-хех... Пондыв, осьт. Посадiсь чуть да и бöра лекторрез вовлöны, коммунизм йылiсь баитöны, висьтасьöны, что еныс — тю-тю! — пустöй места. Но кин лекцияэсö кывзö? Да сiя, кин еныслö оз верит. А Макарихаöс да Öльöксанихаöс лекция вылö арканöн он кыскы. Но мыйкö керамö, ужо... «Не мытьем, так катаньем», кыдз баитлiс кöркö öтiк роч купец.

Мыйкö керамö пö... Ноко видзöтам, мый сiя керас.

* * *

Макариха керкуын добрöй мортлö и лолавнытö немöн. Воздухыс боссьöма ладанöн да кытшöмкö туруннэзiсь курыт настойкаöн — нырвуж пиньöвтö. Джоджулiсь пöльтö сьöкыт ульсöт, залавка сайсянь ужгö син курöтан дук. А быд пазын да щельын тараканнэз кышöтöны, чепсасьöны, а лудыккез, чуть павкöтчан стена бердö, курччасьöны, кыдз поннэз, — зника абу.

«Ох, мученнё, — ружтö Макариха да гыжьялö боккесö, спинасö. — Но ужо, гöтрасяс зонö... виль керку лоас...»

Öтöрын май. Шондiыс синнэз гусялö, гöгöр кайез чивзöны-сьылöны. Видззез ладорсянь пöльтö ма дука шоныт тöлок. А Макариха керкуын пемыт, гажтöм, дук. И думаэс хозяйкаыс юрын гажтöмöсь, сьöкытöсь. «Надейтчам Опонь вылö, а сiя, кырныш, может тожö мунас городö, воныс дынö... Берсяыс эд овлö. Ох-хо-хо...»

Пукалö Макариха лабичын, тэчö бырöм шабур вылö дöмассэз, а ачыс Николай Чудотворец вылö видзöтö: «Отсав, батюшко!» Сэсся чапкис шабурсö, киэсö лэбтiс неболань, шуис чорыта:

— Кывзыны пондас! Пондас — басни абу! Суд менам öтiк...

Строгöя быдтiс Макариха томжык зонсö, Опоньсö. Старайтчис, мед не кольччыны пöрисьувьяс юрвердiсьтöг, не уннявны кöин моз. Медбы зоныс юрын эз чужö умöль думаэз, Макариха лун и ой повзьöтлiс сiйö страшнöй судöн, быдпырся велöтiс почитайтны Христоссö. Кин оз кеймы енлö да оз кывзы ассис мамсö, Христос иньдö сэтшöмыс юр вылö медлёк мыжа. И зонка кывзiсис. Мый тшöктас мамыс, сiйö и керö, паныт оз и пикöст. И юрбитны эз пыксьы: лучше кынымиськö киöн öвтыштны, нежели видзчисьны, кöр юрвоманö кулакöн гымгасö. Лöг Макариха, недобрöй. Мый не сы сьöртi, сразу öбыртö-клёнгö, сразу юрси бердö кутчисьö-öшöтчö. Неетша новйöтiс мамыссянь Опонюшко ноппесö, дырöн висьлiсö сылöн боккес да небыт местаэс. Натьтö, этасянь и шогмис сiдз, что зонка öдва-öдва кончитiс сизим класс, кöть и дас год сьöрна школаас котрасис.

Но кыдз бы эз вöв, а быдмис славнöй детина. Дзарнитас мукöдпырсяс зоныс вылö Макариха и сьöлöмыс пот мунас — вон кытшöм сiя: ладнöй мыгöра, югыт вира, синнэс голубöйöсь, а юр вылас читкыллез гардчöны. Ох, киын сiйö колö видзны, киын! Велöтны колö, медбы эз тшыксьы. И Макариха кадiсь кадö велöтлiс: то кöс кулакнас юр кузя инмас, то ухватöн малыштас. «Эн вунöт, кульпиян, что тэнат мам эм!»

Колхозын уджавтöн, добрöй отир коласын, Опонь велалöма веськöтлыны тракторöн, кужö лöсьöтны сеялкаэз да плуггез. Чулалас эшö невна кадыс, и Опонь лоас юрвердiсьöн, настоящöй хозяинöн. А мый? Вот и öнi ни хозяйство бердö кутчисьö. Локтiс сiя талун ыб вывсянь павжнайтны, сёйыштiс нянь торок да луккез и сразу жö петiс öтöрö. Босьтiс чер и гöгöртiс ассиныс сiсьмöм керкусö, быд пельöсö дзарнитiс, быд пазö чуньсö мöртлiс, сэсся пырис керкуö и шуис мамыслö: — Киссяс чожа. Вильö колö строитны. Колхоз вöрсö сетас, соседдэз тшупны отсаласö. Вот овнытö пондамö — виль керкуын!

Любо вöлi кывны пöрись мамлö энö кыввесö, öддьöн любо. Да пондыв виль керкусö строитны! Кытчöдз строитчан да мырсян — коккетö нюжöтан. Ненадёжнöй эта делоыс. Лучше уж керны сiдз, кыдз важын думайтöма, лучше уж ен отсöтöн... Видзöтан, öтiк копейка оз мун, а керку лоас.

Гогинялыштiс Макариха дзор юрнас, горöтчис осудитöмöн:

— Быдмин тэ, зонö, ыджыт мыгöра да статя, а юрыт — дзик пустöй гырнич. Дук ылöсыт абу, умокыт и чепöль мымда оз öксьы. И мыля менö господь наказывайтö, мыля сiя умсö менам челядьлö эз сет? Да тöдан тэ сiйö, зырымöсь бедь, что керкусö строитны капитал колö? А кытöн сiя, капиталыс? Кин тэныт вöрсö октас? Кин сiйö гортö кыскалас? Да тöдан тэ сiйö, что быд керсö колö дасiсь лэбтыны да бöр лэдзны, дасiсь быгыльтны да сымдаись жö бергöтны? Надсадитчан... Тэ жö зонка морт. Тэ верман оча чунь не вачкыны, а виль керкуö пырны!.. Вежöртiн?

Опонь мöдiс мыйкö горöтчыны, да курччöвтiс кывсö: дзуркнитiс-оссис ыбöс, и керкуö куллес пыртiсö Кутю Öльöксанихаöс. Старушка, порог дынын сулавтöн, гöгöртiс завидуйтана синнэзöн быдöс ликкесö (господи, богатствоыс кытшöм!), сэсся важнöя и достоинствоöн пернапасасис, шлёпкисис лабичö:

— Енiньöй-батюшко... Греххез...

— Кыдз и овнытö пондамö, — ответ видзис Макариха.

Опонь öвтыштiс кинас и петiс öтöрö. Старухаэз пуксисö оча бок, киэзнысö öлöдзö тэчисö. Бобгöны молитваэз, ыш лолалöны, а юраныс думаэз ветлöны. Кутю Öльöксаниха медбöрья кадö спокой öштiс, ой и лун думайтö: «Мунас нылiньöйö Опонь сайö, местаын лоас. А сэтчин, видзöтан, и кулас пöрись Макариха. Быдöс святöй ликкес меным дöнзясö, кыдз роднялö. Сьöрас эд оз нöбöт, пöрись коромысла. Гусялöмась, вижлоккез, святöйесö вичкусис, нöбöтöмась ойнас. Тьфу!»

Пöрись Макарихалöн тожö аслас дума эм: «Вот гöтрасяс зонö, босьтас Параськаöс. А сэтчин, видзöтан, Öльöксаниха нюжöтас коккесö. Век эд оз понды овны. Сэк вöлись и ловзисьны позяс. Öльöксанихалöн керкуыс ён, ыджыт. Сьöрас сiйö оз нöбöт. Ужо, дöнзяс миянлö».

Пукалöны ордчöн, молитваэз шушкöны и думайтöны кыкнанныс. А Опонь петiс öтöрö, пуксис посöдзö и шондi вылö дзарьялö. Тожö думайтö. Босьтны ас сайö Параськаöс? Роднитчыны Кутю Öльöксанихакöт? Тьфу! Лучше джагöтчыны! Не лоны эталö! Опоньлöн аслас туйыс: локтас кад, и зонка мунас армияö. А сэсся... адззисьлытöдз Важ Дзимбыр... Вермас, конечно, и велöтчыны мунны. Бригадирша Ольга Фомина кыдзкö баитö ни вöлi: тэныт, шуö, Опонь, велöтчыны колö, тэ, шуö, трактористöн-машинистöн верман лоны. Трактористöн-машинистöн? Ух тэ! А мый? Вермас и лоны. А вдруг мамыс öтлаöтас сёжö Параськакöт, кутас да и гöтралас ен отсöтöн? Гажтöм. Сьöкыт. Кытшöм туй кузя мунны, зонка оз на тöд. Охота уджавны спокойнöя деревняын, да мамыс мешайтö. Сьöвзьыны быдöс вылö и мунны городö, воныс дынö? Бöра жö оз туй. Мам эм мам — кытчö сiйö воштан? Мый сэтöн керны?

Чеччис Опонь поспу вылiсь, нёджжöвтiс öтмöдöрö и карта бöррезöт иньдöтчис дошлöй старичок ордö, Гырдзза-аршин дынö, и висьталiс быдöс. Старик кывзiс. Сэсся гыж-гыж керис юрбöрсö, тошокöн трекнитiс:

— Гöтрасьны тэныт колö! Босьт сэтшöмöс, кöда мамтö, гырдзза-аршин, сразу бы велöтiс.

— Кытiсь сэтшöмсö? Туй вылын оз валяйтчö...

— Посадiсь вайöт. Висьтала ме тэныт: нывкаэс сэтчин — ой, ой! — настоящöй солдаттэз. Ужо, отсала ме тэныт, тöдсöта öтiккöт... Да мый тöдсöта! Тэ öтiк школаын сыкöт велöтчин.

— Кин сэтшöмыс?

— Важ Гундырын кöркö олiс. Тöдан, поди, Пиля Сергасö? Кулiс тай кынымкö год бöрланьын. Но дак вот, нылыс сылöн. Быдмöм кытöнкö детдомын, городын поварихаö велöтчöма. Öнi посадын столовöйын уджалö. Висьтала ме тэныт — нывка! Не нывка, а настоящöй солдат.

Опонь эз ни кыв старикыслiсь медбöрья кыввесö. Сiя думайтiс Пиля Серга ныв йылiсь. Эта нывкакöт сiя былись вöлi тöдса. Велöтчисö Важгундыровскöй школаын öтiк классын. И сэк ни нывкаыс вöлi солдат кодь: тышкасьлiс зонкаэзкöт и, колö висьтавны, прокод нiйö вермывлiс. А Опоньöс некöр чуньöн эз вöрöт. Натьтö, сiйöн, мыля пукалiсö öтiк парта сайын, и Опоньыс пыр сiйö кывзiсис. А может...

— Но дак мый? Оча ки? — юалiс Гырдзза-аршин.

— Оз ме сайö мун. Сiя басöк... Сэтчö жö, городскöй, позьö шуны, а ме? Кин ме?

— Хех-хех-хех... «Кин ме!» Да жöник, кин жö сэсся? Мыйöн тэ умöль? Басöк тожö, здоровöй. Висьтала ме тэныт, гырдзза-аршин, любöй нывка тэ сайö мунас. Вöлi бы менам ныв-невеста, дак кыкнан кинам сетi бы тэ сайö. Но дак кыдз? Ветлыны я мый я посадас? Видзöтам-керам, баитыштам йöзыскöт, юасям. Кыдз тэ думайтан? Радейта ме тэнö, Опонь, и отсала, мыйöн верма. Эшö мамытлiсь синнэсö осьтам.

— Ачыт тöдан, — шуис Опонь да мунiс ыб вылö гöрны.

* * *

Кыкись Гырдзза-аршин посадö туйсö талис, хитрöя шыннялiс да шульга синнас мигайтiс, а недель бöртi Опонь дынö локтiс.

— Мунам ашын кыкöн. Делоыс, колö думайтны, лöсялö...

Ветлiсö посадö кыкöн. Опонь радъявны пондiс.

Сэсся Опонь öтнас кынымиськö ветлiс. И эшö ёнжыка радъялiс.

А кадыс сё чулалiс и чулалiс, котöртiс, пöльтiс сiя, дзик пон одзын кань. То и гожум ни кымöссö мыччö. Не талун, дак ашын сенокос пондöтчас. А быд сенокос пондöтчикö Важ Дзимбырын, унагоддэзся традиция сьöртi, шум сулалö. Сiдз вöлi одззуну, сiдз вöлi мöйму. Сiдз и таво лоис. Öксисö бригаднöй контора дынö инькаэз, öдззисö ванзыны. Колö висьтавны, Важ Дзимбырын быд инькаыс сэтшöм гора голоса, что кыка пондасö споритны, дак пельшы оз кыв. А талун дасся унажык чукöртчöмась öтлаö и быдыс öтамöдöс пöдтыны голоснас старайтчö, быдыс мымда прок горöтö-няркнитö. Дзимбыр сайись вöрын говк валлэзöн ветлö, повзьöтлö быдöс зверресö да пöткасö, а деревняас öшын стеклоэс тринньöтöны.

— Бригадир-р-р-шаö-öс! Öнi жö адззö бригадиршаöс! — ванзiсö öтiккез.

— Кытöн сiя, кытöн Фоминаыс? Сiйö миянлö колö-ö! — отсалiсö нылö мöдiккез.

— Ооо! Ааа! Ууу!

Мöдiк бы, может, повзис эта шумсянь и пышшис вакрамеш, но не сэтшöм вöлi Ольга Фомина. Голосыс тожö — ой-ой! — берегит пеллетö, кöр ряксö. Тожö эд инькаыт Важ Дзимбырын чужис. Чеччöвтiс Ольга Фомина ольпасись — делоыс одз асылö вöлi — чапкис жöникыс юр вылö кык подушка, медбы пеллес сылöн эз дурмö, и чожжык öтöрö, инькаэс дынö.

— А-а-а!

— О-о-о! — панталiс бригадиршаöс зык. Фомина локтiс контора дынö, киэсö тэчис кадж вылас, моросас кыскис унажык воздух да кыдз чирöстiс-нюжöтiс:

— Дугдö-ö!

Дзик плетьöн сöтiс. Но пондыв, дугдöт дзимбыровскöй инькаэзöс, кöдна куим лун лöсьöтчисö эта шум кежö.

— Висьтав миянлö, кöр морттэз моз овны пондамö? Пемытсянь пемытöдз видз вылын уджав, а гортö локтан — бöра колö гор лонтны да похлёбка пуны!

— Важ Гундырын эшö одззуну столовöйсö осьтiсö, а миян öнöдз абу!

— Висьтав, кöр столовöй осьтан?

— Ог сэсся жалайтö горби одзын жöдзны. Мужиккезным узьöны, а ми быд асыв похлёбка увья рожаэз палитамö! Тырмас!

— Тырма-а-ас!

Ольга Фомина кыскис моросас эшö унажык воздух, пöльтчис, кыдз кузнечнöй мех, рявкнитiс:

— Дугдö, мыся!

И вермис эд! Кык инька, кöдна матынжык сулалiсö, вирöдз курччöвтiсö кыввезнысö, шатöвтчисö-кусiньтчисö, бытьтö тöвныр увтын вöснитик шатёккез. А остальнöйес вевттисö öммезнысö запон доррезöн да чышьян конеццезöн. Шы не тöв лоис.

— Но мый ванзат? Мый чирзатö? — юалiс Фомина. — Столовöй колö? Конечно, колö! Да кинöс повариханас пуктан? Тэнö, Öгрöпен? Дак тэ порссез дынын уджалан, ачыт шуан — кувтöдз фермасис некытчö ог мун...

— Ог!

— Но, дак кинöс нö сэк? Может, тэнö, Марья?

— Нет, ме ытшкисьны понда!

— Сэк тэнö, Паладь?

— Кытшöм меись повариха, кöр аслым похлёбкасö пуны ог куж? Жöникö пыр öмсö нюмралö...

— Вот, вот, сiя и эм! — горöтчис Фомина. — Но, дак мый нö сэк?

— Тэ бригадир, тэ и думайт!

— Ог сэсся жалайтö горби одзын жöдзны!

— Тырмас!

— Тырма-а-ас!

Шум лэбис бöра виль вынöн, сiдз чавкнитiс-öзйис, что нельки Кутю Öльöксаниха, кöда эта кадö ойся молитваэз бöрын пыр узьлiс кыдз вийöм, узьлiс сiдз, что пушкаöн он саймöт — нельки сiя осьтлiс синнэсö да бергöтчис мöд бок вылас. И кин тöдö, мый дырна бы кыссис эта шумыс, если бы эз лок контора дынö пöрись старичок Гырдзза-аршин. Öвтыштiс сiя бедьнас, трекнитiс тошокöн:

— Ась менö эта местаын, гырдзза-аршин, öнi жö чарöтö, ог кö отсав тiянлö, инькаэз! Кывзö! Тöн посадын вöлi, столовöйын пукалыштi... Пензия получитi да... Висьтала ме тiянлö — пуöны сэтчин! Шыдсö панявтöн чуть кылöс эг ньылышт. Во! Мун, Ольга, посадас, гусяв столовöйсис шеф-поварсö!

— О-ах! — чирöстiсö инькаэз. — Кыдз этö позьö гусявны?

А бригадирша локтiс ни Гырдзза-аршин дынö, кутiс сiйö косöттяс да сiдз жмитiс кыз морос бердас, что стариклöн только коскаэс мутш-мутш керисö.

— Дедiньöй, золотöй тэ миян! Вай жö ме тэнö окала, коза тошöс! Эд столовöяс, кытöн тэ пукалöмат, менам öтiк тöдса эм! Быль! Неважын баитiс: нуöт, шуö, менö татiсь асланыт деревняö. Стрась, шуö, любита деревняын овны. Кыдз тэ и казьтiн сiйö.

Фомина эшö öтпыр жмитiс старикöс, висьталiс сылö спасибо и мунiс доддясьны. Инькаэз чöлöмöн рознитчисö. Гырдзза-аршин нюлiс кöс тырппесö и шыннялiс.

* * *

Эта жö лунö, самöй сiя кадö, кöр дзимбыровчи локтiсö горттэзö удж вывсянь, öтiк керку дынö, кöда важын ни пустуйтiс деревня шöрын, сувтiс телегаö доддялöм вöв. Плетёнкаись кокнита чеччöвтiс Ольга Фомина, пыркöтыштiс платье бердсис кöс турунчиррез, сэсся отсалiс лэдзчыны му вылö кытшöмкö тöдтöм нывкалö.

— Но вот и локтiмö, Фаинушка! — шуис бригадирша. — Гленитчö деревняным?

— Эшö бы! Ордчöн вöр, юок эм. Вон ыббез лöз видзöны. Настоящöй природа...

Вöлi нывкаыс ыджыт мыгöра, читкыля юра, вывтас свиттялiс дженытик соссэза голубöй платье. Мортыс не öддьöн кыз, но и вöснитöн он шу — быд ыбöсас он жö тöрöт. Но мый главнöйыс, вöлi сiя мича чужöмбана, моросыс пöльтчöма, кыдз подушка, кисойезас тöдчис вын. Здоровöй морт, абу тшыгьялöма.

Фаина и Ольга Фомина пыртiсö пустöй керкуас ыджыт чемодан, кöртöн дорöм сундук да паськыт варшавскöй кровать. Эта кровать вылö видзöтiкö, бригадиршалöн трек-трек керисö пельпоннэс.

— Висьтав, Фаинушка, — горöтчис сiя. — Висьтав, кыдз ен одзын: тэ жöниксайын али не?

— Даса ни вовлiсö корасьны, да быдöннысö репöтi: нёштöмöсь быдмöмась, — ошшасьöмöн шуис Фаина.

— Сiдзкö, öтнат и олан?

— А кинкöт нö сэсся?

Бригадирша косöя дзарнитiс нывка вылö, бöра трекнитiс пельпоннэзнас: невежöртана делоыс. Эттшöм здоровöй, а öтнас олö! Бöбöтö, натьтö. Бригадиршаöс маитiс дума: «Вот эшö пондас гöтыра мужиккезкöт кыскасьны. Лэбтас деревняаным шум. Поди, эта понда и локтiс татчö да?» Дзимбыровскöй инькаэз öддьöн вежöктiсь морттэз, и бригадирша полiс, кыдз бы умöль дело эз пет.

Фаина дзик тöдiс сылiсь думаэсö, висьталiс:

— Эн пов. Öтiк мужикöс дынам матö ог лэдз! Бригадирша нем эз шу. Керку дынö чукöртчис ни отир. Локтiсö инькаэз, мужиккез. Быдыс ыджыт любопытствоöн видзöтiс Фаина вылö и, колö висьтавны, быдöнныслö сiя гленитчис: бытшöм чужöма, сöстöм — настоящöй городскöй повариха.

— Малинтусиньöй! Кыдз тэ и локтiн!

— Отсав миянлö, осьт столовöйсö! Бригадирша лэдзчис посöдзись, висьталiс строгöя:

— Дугдö! Лучше отсалö нывкаыслö квартирасö лöсьöтны.

Кутю Öльöксаниха бергалiс сэтöн жö и, кöр вежöртiс, мый аркмö, шупыта чепöссис гортас. Ышки-пойки пырис керкуö и сразу жö öшöтчис Параська юрси бердö:

— Ылöстöм кудоба! Лёквир! — чирзiс сiя.

— Мый, мый, мама?

— Мыля менö асывнас эн саймöт, кöр инькаэс шумитiсö? Видзöтан, котöртi бы ны дынö, сразу бы места тэныт адззи! Столовöяс бы тэнö сюрöтi. Вот мый! Ачыт бы пöт вöлiн и меным отсалiн! Ох, господи... Öнi курччав гырдззаэтö.

И Öльöксаниха нёкыртiс нывсö, пуктiс кулакнас кынымиськö горбас:

— Вот тэныт, лягуша яйлö, вот, вот!

Чулалiс неделя. Колхозниккез ытшкисö турун, трактористтэз гöрисö пар. Дзимбыровскöй инькаэз радуйтчисö:

— Ашын пö осьтасö ни столовöйсö, — баитiсö нiя.

— Вот овнытö пондамö! Кыдз баитiсö, сiдз и шогмис.

Асыв. Вöррез сайсянь шондi паськыт кымöссö мыччис, невна думайтыштiс мыйкö, сэсся нёджжöвтiс паськыт мир вылас и давай чикнявны-серавны, шоныт югöррезöн сiйö, мирсö, пöжны. Казялiс шондiыс вöр коласiсь Важ Дзимбыр нима деревня, мигнитiс пöвсиннас: бытшöм делоыс! Одзжык асыввезнас быд трубаись столббезöн кыз тшын путриктiс-петiс, кайис веськыта небоö да курöтiс шондiлiсь синнэсö, а талун любуйтчы: öтi-öтi павьялöны тшыноккес, воздухас некытшöм дук абу. Колхозниккез сьöрсьöн-бöрсьöн мунöны столовöйö, сэтчин дзирыт шыд да каша сёйöны, чöскыт чай юöны. Том поварихаöс быдыс ошкöмöн-ошкö, женскöйес сьöлöмсянь спасибо висьталöны, мужиккес готовöсь иннезныс дырни окавны сiйö.

— И кытöн тэ сiдз велалöмат стряпайтнытö? Шыдыс сэтшöм чöскыт — кыв ньылыштны позьö. Ноко кисьт эшö джын бекöрок да и кашасö, пожалуй, содты, — баитö Фоминалöн жöникыс.

— Сёйö, сёйö, мымда колö. Оз тырмы, дак эшö пуа. И павжнайтнытö татчö локтö. Чöскöтыштат öммезнытö, — горöтчис Фаина да сэтшöм басöка шынньöвтiс, истово шондi. Бригадиршалöн сьöлöмыс пот мунiс: «Вот эшö гленитчас жöникöлö!» — но терпитiс, шы эз сет. Эзö баитö лишньöйсö и мöдiккез. Кылiсö ни, что повариха строгöй, кужö асьсö видзны: удерлун рытнас шофёр Никонов Петька пыралöм поварихаыс дынö. Мый йылiсь ны коласын басниыс мунiс, некин оз тöд, только быдыс адззö: шофёр öнi син увтас новйöтö кидолонь пасьта лöз пятна.

— Эшö пыран сы дынö, Петрован? — юасьö Фомина.

— Вот эшö! Абу эд ылöстöм! — горöтчис шофёр да содтiс невна чöлöм бöрын: — Не нывка, а сатана. — И косöйöн видзöтiс кухнялань.

Быдöн, кин вöлi сэтöн, вак-вак серöмтчис, а Макарихалöн зоныс, Опоньыс, нельки панясьны дугдiс — сэтшöм сылö любо вöлi кывзыны этö смехсö.

Шондi дзарнитiс столовöяс и тожö рыз-рыз серöмтчис: бытшöм делоыс!

* * *

Сёрöн рытнас Опонь локтiс удж вывсянь, посöдзын чöвтiс вывсис солидолöсь комбинезон, сэсся лэдзчис ю дорö да джын час сьöрна гывьялiс асьсö: зыртiс чужöм вылiсь лунся бус да нять, миссьöтiс вывтырсö. Ваыс шоныт, сöстöм. Койыштан вылат джын ведра, и сразу долытжык лоö. Гортас зонка пасьталiс виль йöрнöс, юрсö сыналiс да невна пуштöтiс, медбы читкыллес ёнжыка тöдчисö; сапоггесö Опонь сiдз зыртiс-чышкис важ гуня полаöн, что свиттявны пондiсö. Дзарнитiс зонка мöс син ыжда зеркало торокö и шынньöвтiс: мыйöн не кавалер!

Кынöм талун эз симав, и Опонь сразу жö петiс öтöрö. Медбы не пантасьны мамыскöт (сiя высьтiс мöс), Опонь гусьöник ордйис карта пельöссö, пырис огородечö и чепöссис льöмпуэз увтö. Нiя быдмисö паськыта да сэтшöм тшöка, что пыран ны коласö, дак некин ни оз казяв. Бур сэтöн, öддьöн лöсялö.

Важ Дзимбыр лунся удж бöрын водiс шоччисьны. Эшö неважын баксiсö мöссэз, жольöтiсö ведраэз, кытöнкö сералiсö нывкаэз да зонкаэз, а часöт быдыс ни пишкö-узьö. Только ю сайын гургö трактор да неылын вöрас шыасьлö кытшöмкö ойся каёк. Деревня конецын лявнитiс понок и тшöк мунiс: оныс и сiйö вермис.

Пукалö Опонь, öмас нямлялö курыт турун за и лыддьö минутаэз: öтiк, кык, куим... Сьöлöм токöтö горöн, полöмöнмоз вартчö моросын и дзик сылö. Мыйкö öддьöн пым да кокнитик мезмас сы бердiсь и чепöссяс быдöс вывтыр кузя. «Локтас я? Поди, сералö?» — вöрöтчö юрын дума. Опонь сразу жö кусöтö сiйö, думасö, вöтлö дыв. Локтас! Не сэтшöм сiя нывкаыс, медбы бöбöтны. Тöн вовлiс и некыдз янсöтчыны эз вермы. А кыдз окасьö! Тырппез öнöдз сотчöны. Вот чёрт! Спасибо Гырдзза-аршинлö: бытшöм нывкакöт тöдсöтiс, кужöмöн делосö арталiс.

Тöлiсь öшалiс вöр весьтас, дюттясис ойся руд небоын и жагöник вешшис веськытлань. Вöрас каёкыс дугдiс шыасьлыны — ланьтiс, тыдалö. Шы не тöв. Быдöс природаыс онмöссис. Но вот неылын дзуркнитiс воротка. «Этö сiя!»

Фаина локтiс перыта, ышлолалöмöн, вуджис йöр, пуксис ордчöн Опонькöт. Пуксис и сразу жö жмитiс Опоньлiсь юрсö аслас крепыт морос бердö — пöдтыны готов, сiдз сывьялiс.

— Фоня, сьöлöмшöриньöй!..

— Чöв, гусьöнжык... Кыласö... Фаина лэдзис Опоньлiсь юрсö.

— Кинлiсь полан?

— Мамö вермас кывны.

— Тьфу! Быдмöмат стожар сувда, а сё мамыт мывкыдöн олан. Да вежöрт, что кад ни аслат умöн овны. Мамыт мед юрсö оз сюй, кытчö оз ков. Кытшöм сылö дело миян дынöдз? Ах, Фоня, Фоня... Висьтав лучше: он тэ менö любит? Висьтав: он эд? Параськатö вунöтны он вермы? Сiдз эд?

— Дугды жö. Кытшöм Параська? Да сiя меным син одзö оз ков. Меным только тэ колан...

— Фоня, сьöлöмшöриньöй. Чожа гöтрасямö!

И бöра сывьялiс ас бердас, окалiс дзирыта-дзирыта, сiдз чупнитiс, дзик пистолетiсь лыйисö. И колiс жö лешакыслö как раз эта минутаö пыртны карчйöрас Кутю Öльöксанихаöс! Важын ни охота вöлi старушкалö «чöскöтны» öмсö свежöй кушманокöн да лукасолöн, а нетшкыны аслас гряддэз вылiсь жаль. Вот и пырис талун, как раз ойшöрнас, аслас подружка огородечö. Перво гусясьöмöн кыссис карта бöрöт, сэсся йöр пöлöн локтiс льöмпуэз дынö. Локтiс, кывзiсис невна и, кöр кылiс Фаиналiсь голоссö да Опоньлiсь ышлолалöмсö, том жеребец моз чеччöвтiс йöрыс омöн öтöрö.

— Ох, согрешеннё! — чирöстiс сiя, Макариха керкуö пырикö.

— Мый, сваття? Мый сэтшöмыс?! — кулöм не ловья чеччöвтiс ольпасись Макариха.

— Сэтчин... льöмпуэз увтын... ох!.. маласьöны... Муна йöр бокöт гортланьö, оськала жагöника, а льöмпуэз увтас морт шы кылö. Дзарнитi йöрыс омöн, а сэтчин поварихаыс да Опоньыт...

— Мый тэ баитан! Кытöн сiя, зырымöсь бедь?! Кык старуха, öтамöдöс одзалöмöн, чепöссисö öтöрö, локтiсö льöмпуэз дынö, а сэтöн некинлöн и дукыс абу.

* * *

Мыйкö öддьöн сьöкыт да гажтöм пырис кыкнан старуха сьöлöмö. Ыджыт тревога кань моз гыжьясис моросын, эз сет спокой не он. Кыкнансö маитiс öтiк вопрос: кыдз этö сэтшöм чожа Опонь ештiс тöдсасьны поварихакöт? Кыдз сiя лысьтiс этö керны юасьтöг?

— Сотана сiя, тыдалö, а не нывка, — лöгöн баитiс пöрись Макариха повариха йылiсь.

— Анчихрис, — шуис Öльöксаниха да пернапасасис строгöй лик одзын.

Шондiпетанöдз шушкöтчисö кык пöрись морт ордчöн пукавтöн, сьöкыта ыш лолалiсö, дугдывтöг думайтiсö. Неладно мыйкö делоыс шогмö, не сiдз, кыдз мöдiсö керны.

— Баитi ме тэныт, сваття: эн сет зонытлö волясö, велöт буржыка, а тэ абу менö кывзöмат, — шавгö Öльöксаниха. — Вот и терпит. Анчихрислö зоныт душасö вузалöма. Öнi мый? Век тэныт адын пусьыны, жаровняын жаритчыны. Ох, ох, ох!

Пöрись Макариха эна кыввезсянь перво тувдылiс, сэсся брякнитчис пидзöссэз вылö, кымöснас гымнитiс джодж кузя:

— Енiньöй! Батюшко! Мыля нö сiдз? Ме разь умöля тэныт кеймиси? Ме разь умöля тэнö почитайт!? Мыля нö наказывайтан менö?

Кутю Öльöксаниха тожö сувтiс пидзöссэз вылö, тожö клёнгис кымöснас джодж кузя.

— Эн мырддьы нывкаöлiсь жöниксö. Мыжйы нёштöм поварихасö, чарöт талун жö сiйö. Да мед жö небоыс камгисяс-усяс сы беспутнöй юр вылö, да мед жö биа чарньöв инмас моросö, нятьöсь сьöлöмö. Аминь!

Некöр эшö сэтшöм истöя эз юрбитлö эна старухаэс, кыдз талун. Нiя кыскасисö пидзöссэз вылын, лэбтылiсö киэзнысö неболань, горзiсö-уннялiсö, тэчисö поклоннэз. Вот и шондi койыштiс ни ассис югöррез, вот и курöггез петiсö ни öтöрö, öдззисö готсьыны, вот и пастух мöссэз ыбö вашöтiс ни, а Макариха да Öльöксаниха сё кеймисисö и кеймисисö енлö, лыддьöтiсö молитваэз, корисö том поварихалö смерть, а Опоньлö — мывкыд. И только сэк, кöр кыкнанныс мыдзисö начöдз, кöр Макариха брякнитчис кыминь и эз ни вермы чеччыны, Кутю Öльöксаниха сувтiс кок йылö, лöгöн шуис, Николай Чудотворецлань видзöтiкö:

— Ужо, мыччала эта шырöм кöбылалö! Смерть сылö лоас, оз кö мун деревнясиным. Поткöта юрсö.

— Поткöт, Öльöксаниха, поткöт! А ме тэнö век ог вунöт. Ась отсалас тэныт еныс, — бобгис Макариха. Сiя пондылiс чеччыны, но эз вермы, сiдз и кольччис джодж шöрас, а Öльöксаниха босьтiс сваттяыслiсь тоин и котöртiс столовöйö. «Вия, öнi жö вия, — шушкис сiя мунiкас. — Видзöт кытшöм: йöз жöник бердö кутчисьöма! Не лоны этадз... Нет, не лоны!»

Бытьтö грознöй воин пырис сiя столовöйö, страшнöя дзарнитiс öтмöдöрö. Столовöйын быд пызанок сайын пукалiсö инькаэз да мужиккез, панясисö нывкаэз, зонкаэз. Фаина сулалiс кухняись öшынок дын, приветливöя шыннялiс йöзыслö.

— Чöскыта тэ вердан миянöс, Фаинушка, — баитiс Фомина. — Спасибо тэныт.

— Сёйö на здоровье, сёйö да эд осудитö менö.

— Кытшöм осудитöм! Спасибо, нылiньöй, — баитiсö инькаэз.

Öльöксаниха сувтiс джодж шöрас, гымгыштiс-сöтiс тоиннас и чирöстiс:

— Инькаэз! Вийны колö этö кöбыла рожасö! Сiя жöниккезнытö бöбöтлыны пондас! Инькаэз, кывзö, мый ме тiянлö висьтала! Муна тöн рытнас Макарика льöмпуэз дынöт, а сэтöн поварихаыс зонкакöт маласьö...

Инькаэз осьтiсö öммез, мужиккез вак-вак серöмтчисö.

— Зонкакöт, шуан? Ха! А кинкöт жö сэсся? Тэкöт я мый я?

Фаина петiс кухнясис, жагöник локтiс Öльöксаниха дынö.

— Тэ мыйлö татчö пырин, важ кадила? Тэ мый хулиганитан?

— Вия! — чирöстiс бöра Öльöксаниха. — Локтан эшö Опоньыс дынö — сразу вия! Опоньыс не тэнат, а Параськалöн. Сiдз ен шуис.

— А этö эн адззыв? — мыччалiс Фаина кулаксö. Колхозниккез дугдiсö серавны, инькаэз чапкисö паннезнысö. Ольга Фомина сöтiс кулакнас пызан кузя:

— Дугдö! Тэ мыйлö татчö локтiн, Öльöксаниха? Шум лэбтыны? Мун öнi жö гортат!

— Ме? Гортö?! Дак вот тiянлö, вот, вот! Старуха лэбтiс тоинсö, öвтчис сiйöн, старайтчис сотны повариха юр кузя, но Фаина ловкöя чеччöвтiс бокö, сэсся чепöссис Öльöксаниха дынö, кутiс сiйö косöттяс и петкöтiс посöдзö.

— Тэ кинкöт кутчисян, пöрись вижлок? Кинöс позоритан?

Ёна лöгасис Фаина. Сiя эз вермы видзсьыны и сiдз тойыштiс Öльöксанихаöс канаваö, что мöдытлöн только коккес мелькнитiсö. Кыдз разьсьöм суслон усис Öльöксаниха нятьö, чирöстiс лёкгоршöн:

— Вийисö-ö-ö-ö!

— Ме тэнö вия, пöрись ракаöс! Вот петкöта кипяток да заварита, кыдз горттöм понöс. Сэк и дугдан, небось, честнöй нывка вылö вувтны. Марш öнi жö гортат да сэсся эн мыччась менам синнэз одзö!

Öльöксаниха курни-верни чеччöвтiс нятьсис, чепöссис котöртны. И видзöтiт бы, кыдз сiя котöртiс — дзик том жеребец! Чеччалiс веськыта канаваэз да ва гöппез вевдöрöт, эз и падмыв некытчö. Может, эшö ёнжыка бы котöртiс, да куим карта пельöс сайö сувтчывлыны ковсис: нёштöм шогöт кутчисьöма старухаыт бердö. Инькаэз да мужиккез сулалiсö столовöй дынын, ваксисö мымда прок да ошкисö поварихасö:

— Молодец! Öнi вунöтас, небось, святöйыслiсь нимсö. Бура тэ сiйö репöтiн! Не нывка, а би!

Кык лун и кык ой куйлiс Öльöксаниха гор вылын, ойзiс гусьöник и малалiс дойдöм боккесö. Не öддьöн и ёна шамыртлiс сiйö поварихаыс, а быд коскаок дзуртiс и висис, каждöй жила вöлi зубыт. Параська вердiс мамсö лукасолöн, кушманöн, юкталiс шöма квасинаöн. Порой пыравлiс сы дынö пöрись Макариха и мавтiс боккесö гормöгöн да тёритöм хренöн.

Öльöксаниха мöдiс ветлыны сельсоветö норасьны «анчихрисыс» вылö, но думайтыштiс невна и öвтыштiс кинас:

— Пондыв правдасö кошшыны! Шуасö: тэ первöйыс кутчисин, тэ и виноват... Колö ен отсöтöн.

— Может, чарöтас сiйö ен-батюшкоыс, — надейтчана голосöн баитiс Макариха.

— Доложон чарöтны, дзирыта юрбитiмö. Тэ только велöт буржыка зонтö. Сы увья мученнёэсö терпита. Велöт сiйö, эн лöгöт Кристоссö.

— Велöта, сваття. Öшöпек заптi ни. Локтас гортö — поткöта юрсö, — кöсйисис Макариха. — А тэ веськав, сувт кок йылö...

Куимöт лунас Öльöксаниха лэдзчис гор вылiсь, сёйис кык бекöр лукасов, юис шöма квасина и мунiс сваттяыс ордö.

— Велöтiн ни зонтö? Эн? Но и ладно. Оз и ков, Макарика. Гор вылас куйлi, куйлi, пöжöв-кери боккезöс да пырис эд юрам öтiк дума. Еныс шушкис пель одзам: хитростьöн, шуö, босьтö Опоньсö.

— Хитростьöн?

— Мыйнö. Вот и локтi тэ дынö баитыштны.

Дыр бöра баитiсö Öльöксаниха да Макариха, пукалiсö ордчöн шондi пуксянöдз. Пукалiсö и дзарьялiсö öшынö: оз я мыччись Опонь? И кöр Опоньыс петiс керку пельöс сайсянь, кыкнан старухаыс чепöссисö посöдзö.

— Лок жö, кагу, лок гортö, эн ни аснырав, — ласковöя, кыдз и колö добрöй мамлö, корис зонсö пöрись Макариха.

Опонь эз видзчись сэтшöм панталöмсö, думайтiс, что мамыс, конечно жö, чижьявны öдззас, и невна öшис. «Мый одзын сiдз?» — мелькнитiс юрас дума. Сiя гажтöма видзöтыштiс öтмöдöрö, öшöтöм юрöн локтiс посöдз дынö. А мамыс пырис ни карчйöрö, летiс жалейттöг луктурун, пыртiс йöв, шöралiс нянь.

— Пуксьы да сёй, мыдзин эд...

«Мый лоас, дак сiя и ло», — шуис ас кежас Опонь и пырис пызан сайö. Мамыс пуксис ордчöн, мигайтана синнэзöн видзöтiс зоныс вылö.

— Вот сваттяö посадö ветлöма, — пондöтiс Макариха.

Опонь лэбтiс синнэсö.

— Ветлi, ветлi, кагу, — тэрмасьöмöн шыасис Öльöксаниха. — Панталi сэтчин бытшöм мортöс. Öддьöн бытшöм морткöт баитыштi. Вот, Кристос мекöт, он верит дак...

Öльöксаниха паськыта пернапасасис святöй Петра одзын, лыддьöтыштiс молитва. Опонь дзарнитiс öшынö. Вöлi пемыт ни. Тыдалö, кайис кымöр: кытöнкö ылын-ылын гымнитiс размöд, вирдыштiс не öддьöн югыта. Öшын стекло бердö шваткисö первöй ва воттез.

— Чарöт сiйö, ен-батюшко! — шушкис Öльöксаниха.

— Ох, кылiс эд, кылiс, тыдалö, молитванымöс, — радмис Макариха.

Опонь чапкис паньсö, курччавтöг ньылыштiс быдöс, мый вöлi öмас.

— Кывзы тэ! — вдруг чирöстiс мамыс. — Эн лысьт сэсся пантасьны поварихаыскöт. Сiя — тшыкöтöм морт!

— Умöль шогöтöн шогалöма сiя, — содтiс Öльöксаниха. — Висьтасисö посадас: больницаын пö куим год куйлöма. А сэсся кага кытшöмкö лешаксянь чужтöма да детдомö сетöм. И мороссэс пö сылöн не быльнöйöсь, а вата ковта увтас сюйöма. Вата-а! Вот эд мый! Сэрпöсь сiя!

Опонь чеччöвтiс пызан сайись джодж шöрö, страшнöй синнэзöн дзарнитiс, Öльöксаниха вылö, топнитiс кокнас:

— Мый?! Да тэ кин йылiсь сiдз карзан? И кутiс Öльöксанихаöс сивилёнöттяс.

— Вийисö-ö-ö! — чирöстiс Öльöксаниха. Макариха кыдз вöлi, сiдз и шлёпкисис джоджö.

Сiя шы эз вермы сетны, киöн öвтыштны эз письты. А Öльöксаниха мезмис Опоньыс киэзiсь и чепöссис öтöрö. «Кристос менам батюшко, Кристос менам батюшко, — шушкис сiя. — Отсалiн меным. Ох, вийис бы, сiдз и тöд — вийис бы...»

Старуха сетiс ен одзын кыв не кутчисьны сэсся томмескöт и пуксис йöр бокö, кöть öтöрас зэрис, кыдз ведра понiсь. А Опонь оськалiс ни Фаина ордö. Гыма-йирка кайис посöдзö, вынöн нетшкöвтiс керку ыбöссö. Фаина, тыдалö, только неважын ештöма водны. Керкуын пемыт, кыдз гуын.

— Ой, кин сэтöн, лешак? — повзис нывкаыс.

— Тэ, тэ лешакыс вöлöмат! — горöтiс Опонь. — Мыля менö бöбöтлiн? Кинсянь кагасö вайöмат? Кытöн сiя?

— Ужо, сулав, — спокойнöя шуис Фаина и чеччис ольпасись. Сiя öзтiс би, сибöтчис Опонь дынö.

— Тэ мый горöтлан, а? Кытшöм кага йылiсь öмтö пильтыралан?

Опонь сулалiс, кыдз столб.

Фаина вдруг кутiс киэзнас боккесö, öдззис ваксьыны-серавны и брякнитчис кроватьö. Сiя вежöртiс, кин чушкалöма Опоньсö, — конечно, Öльöксаниха.

— Ох, смертiньöй менам! Ох-ха-ха! Кага пö? Сiдз и висьталiс, пöрись кырныш? Садь бырас!

— И моросыт... вата пö...

— Дугды, лешакпиян! Кывзыны неохота. Кöбы эг любит тэнö, вашöтi бы дыв, медбы эн кывзы ылöстöм старухасö. Вежöртiн? И мый понда ме тэнö любита эттшöм тютя-ляпасö? Ноко пуксьы ордчöн, баитыштам.

Опонь пуксис лабичö, öшöтiс кудриа юрсö. Сiйö маитiс стыд. Колiс жö ойнас пырны любимöй нывка ордö, лэбтыны шум! Колiс жö веритны Кутю Öльöксанихалö! Вот вашöтас Фаина — и кошшы сэсся сэтшöмсö. Но Фаина эз вашöт? Сiя чапкис пельпоннэс вылас одеяло и пуксис ордчöн Опонькöт.

— Любитан менö? — шушкис пель одзас. — Но висьтав, любитан? Не, эн висьтав, оз ков. Ачым адзза ― любитан. Ме тэнö тожö любита. И тöдан мый? Давай гöтрасям. Тырмас сэсся. Охота вöлi свадьба керны. Сэтшöм свадьба — медбы завид быдöнöс кутiс. Но мамыт, мамыт! Ох... Но ми сiйö ог чапкö. Ми сiйö босьтамö дынаным. И вот адззылан, быдöс бур лоас. Давай чöвтчы... И — вод...

* * *

Ойбыт кожгис-зэрис, вирдалiс и гымалiс страшнöя. Макарихалöн керкуюр вылын шовкöтiсö тёссэз, жугалöм öшыннэзö пöльтiс уль тöв и старайтчис кусöтны масiсьсö, кöда сотчис Николай Чудотворец одзын. Сiсьмöм потолок пыр перво тёпöтiс гырись вотьва, сэсся пондöтчис настоящöй зэр. Горвыв сёрдын, потолок увтас, мыйкö нёштöма мутшкöтiс, и старухалö кажитчис, что матича пуыс вот-вот мезмас тшупöттэсис, и потолокыс гиля-голя киссяс сы беднöй юр вылö. Полöм петiс пукавны эта керкуын, öддьöн полöм петiс. Но старухалö воштiсьны вöлi некытчö, и сiя кыскасис пидзöссэз вылас, дугдывтöг юрбитiс и юрбитiс, кеймисис сэтшöм дзирыта, что если бы вöлi еныс, то сiя сёровно бы кылiс Макарихалiсь молитвасö и иньдiс мортыслö быдöс, мый сiя корис.

— Господи, — баитiс Макариха. — Мыля менö наказывайтан, мыля меным он иньды счастье? Ме я ог радейт тэнö? Ме я ог почитайт, господи!

Макариха лэбтывлiс потолоклань киэсö, видзöтiс веськыта ликыс синнэзö, видзöтiс орöттöг, дзик мöдiс пырны еныс душаö да вöрзьöтны сiйö, душасö. Кöр старухалöн бырлiс садьыс и öдззывлiсö дрöжитны коккес, сiя пуксьывлiс веськыта джоджас шоччисьыштны и дырöн думайтiс. Сiя думайтiс аслас олан йылiсь, думайтiс сы йылiсь, мыля эта оланыс вöлi сэтшöм нёштöм да счастьетöм, мыля сiя, пöрись Макариха, пыр и пыр тöдiс öтiк горе, пыр кисьтiс синваэз и почти некöр эз адззыв гажа ойлун, некöр сылiсь сьöлöмсö эз шонтлы радость.

Чужис Макариха вöршöрись учöтик хуторын, чужис ыджыт семьяын, кытöн челядьыс коласын только нывкаэс вöлiсö сизима. Челядьыс корисö нянь, а сiя почти некöр эз вöвлы. Вот и ковсис асывсянь рытöдз масьтыны гырын анькытш гöридз да идзас, ваявны вöрись пипу кач да быдкодь турун. Винерик нылочкаэз öдва-öдва ляшмасисö, часто пыктывлiсö и пыр шогалiсö. Куим соёк учöтик Надежлöн, öння Макарихалöн, кулiсö сэк öтiк ойö. Куим учöтик гроб сулалiсö ордчöн пызан вылын, куим учöтик могила мыччисисö öтiк лунö пемыт вöр шöрын. Кöин моз уннялiс Надежлöн мамыс, пиннесö йирис сылöн айыс, а керны бурсö нем эз позь, колiс думайтны ловьяэс йылiсь — и нiя тшыгöсь эд, вот-вот куласö. И иньдiсö Надежöс пöрисьжык воныскöт чочком свет кузя ветлöтны кортöн.

Ветлöтiсö соя-вона деревняись деревняö, вовлiсö быд öшынок дынö, нюжöтлiсö вöснитик голосоккезöн:

— Криста-а-ра-а-ди-и!

Беднöй отир и рад бы мыйкö сетiсö, но нылöн асланыс нем эз вöв, а богатöйес частожык лэдзлiсö ны вылö поннэзöс и шочажык сетлiсö совет:

— Мунö, мунö татiсь, мунö, горадзуллез. Кеймисьö енлö — сiя отирсö вердö.

Сэк и кылiс первуись Надеж еныслiсь нимсö, сэксянь и пондiс надейтчыны еныс вылö. Но ен-батюшкоыс и сэк ни мылякö косöя видзöтiс соя-вона вылö. Сiя жалейттöг кынтiс кыкнаннысö тöвся туйез вылын, моритiс, тешитчис сэтчöдз, что Надежлöн вонокыс öтпыр сибдiс лым столаö да сэтöн и кынмис, а ачыс

Надеж öдва-öдва ловзис кытшöмкö добрöй бедняклöн гор вылын.

— Енiньöй! Мыля нö менö томсянь наказывайтiн? Мыйöн ме тэнö öбидитi? — дзирыта юасьö талун старуха и паськыта-паськыта пернапасасьö. — Кузьвек тэ менö наказывайтан, кузьвек мучитан, енiньöй!

Öтöрын сё зэрис и зэрис, колöтiс ведра понiсь, вирдалiс и гымалiс сiдз, что дрöжитiс Макарихалöн керкуыс.

— Свят, свят... — пернапасасьлiс Макариха и бöра думайтiс аслас олан йылiсь.

Тринадцать годöдз ветлöтiс сiя кортöн. А кöр невна пондiс прокмыны уджавны, сiйö примитiс строшнöявны öтiк богатöй мужик. Пемытсянь пемытöдз уджалiс нылочка мöс картаын, кайöтлiс юись ва, шонтiс сiйö, юкталiс да вердiс подасö, ойезнас пестунничайтiс и — спасибо енлö! — вöлi пöт. Но вот öтпыр мыйсянь и öзйис мужиклöн керкуыс, сотчис быдöс, мый вермис сотчыны. И Надежöс кулавлытöдз вартлiсö, чуть эз вийö.

— Этö тэ увья, ёрдöм коска увья, еныс накажитiс менö! Тэ, видно, умöля юрбитiн, — чужьялiс Надежöс мужикыс и вашöтiс дыв.

И бöра нылочка ветлöтiс деревняись деревняö, корис нянь кусöккез и кеймисис енлö. О, юрбитны кужис ни сэк Надеж, öддьöн бура кужис. Нужда да надежда велöтiсö сiйö почитайтны енсö. Чуть только петас свободнöй кад, нывка пырö вичкуö и тэчö земнöй поклоннэз. Юрбитö и юрбитö, юрбитö сэтчöдз, кытчöдз садьыс оз быр. Вичкуас и панталiс сiйö пöрись нищöй, Макарлöн айыс.

— Мунам, нылiньöй, миянкöт, гленитчин тэ меным, — шуис добрöй старичок и нуöтiс Надежöс Важ Дзимбырö, кытöн сылöн, старичокыслöн, вöлi аслас избушка и кытöн сылöн зоныс, Макарыс, строшнöялiс богатöй кулак ордын.

— Юрбит енлö да висьтав меным спасибо, — шуис кулак, кöр примитiс Надежöс удж вылö.

Надеж висьталiс кулаклö спасибо, дырöн и дзирыта бöра юрбитiс енлö и öтлаын Макаркöт пемытсянь пемытöдз ниртiс-уджалiс, старайтчис шедтыны невна деньгаок, медбы öтлаын Макарыскöт лэбтыны неыджыт хозяйство да и овны, кыдз ен шуас. Кулак ордын и гöтрасисö Макар да Надеж, олiсö гид кодь керкуокын. Эстöн и чужтiс том Макариха первöй зонсö, кöдö джын год бöртi «еныс босьтiс аслас кипод увтö». Горзiс Макариха, уннялiс кöин моз, жалейтiс зонсö, да нем ни сэтöн он кер.

— Мунам, Надеж, вичкуö, юрбитыштам, — шуис сэк Макар. — Может, кокнитжык лоас.

Юрбитiсö том гозъя дзирыта да истöя, кеймисисö, корисö счастье. Но счастье сё эз вöв, сё эз мыччась. Кöть вод да кув.

Но сэтöн колхоззэз пондiсö организуйтчыны. Ветлöтiсö деревняэзöт умнöй отир, баитiсö собраннёэз вылын, что беднöй йöз только колхозын адззас аслыс счастьесö. Макар гозъя пырисö колхозö — и быль! — пондiсö жагöник сувтны кок йылö: строитiсö аслыныс керкуок, мöс да баляэз видзны пондiсö. Бур делоыс, лöсявны мöдö. Только öтiк умöль: умнöй морттэз баитiсö, что абу некытшöм ен, что сiя — пустöй места. Эз вермö веритны эталö Макар гозъя. Кыдз жö этö еныс абу? Кин нö сэк му вылас олансö керис? Кин сэк вердö-юкталö отирсö? Не-ет, мыйкö неладно сэтöн.

Кöр кывсис, что Важ Дзимбырись пöдналасö часовнясö, а святöй ликкесö тэчасö костёрö да сотасö, Макар гозъя пемыт ойшöрöн вайисö быдöс ликкесö гортаныс. Дас год мымда куйлiсö святöйес джоджулын, ны йылiсь öтiк морт эз тöд.

Чожа пондöтчис война. Макарöс нуöтiсö фронт вылö. Надеж сетiс сылö сьöрас учöтик святöй лик, кöдö Макар новйöтiс пиас кык год. Куимöт годас солдатöс сьöкыта ранитiсö, и сiя недыр мыйись локтiс гортас.

— Енiньöй!— горöтiс Макариха, кöр казялiс жöниксö. — Енiньöй-батюшко, отсалiн! Ловья жöникö!

— Ловья кольччи, Надеж! Отсалiс енiньöй! — радöн горöтiс Макар и тшöктiс петкöтны еннэсö джоджувсис. — Молебен чулöтам!

Чулöтiсö молебен, енлö поклоннэз тэчисö и корисö Макарлö кузь век. А сiя, еныс, кынымкö год бöртi «дзимлялiс» Макарöс. Мыля сiдз?

— Ох, ох! Батюшко! — баитö талун Макариха. — Кöбы не ме, дак вичкусö пöднавтöн быдöс бы святöйесö сотiсö. Мыля менö наказывайтан? Мыля пöрисьувьям öтнамöс колин? Пышшисö зоннэз-ö-ö! Кöдöрö öнi юрöс пиньöвта? Ме я нiйö эг велöт, ме я эг быдты! Пыр строгöя видзи, пыр тэнö почитайтны тшöктi! Мыля нö умсö нылö эн сет, господи?..

Старушка эшö мыйкö мöдiс шуны, но тшöк мунiс. Öтöрын вдруг сiдз вирдыштiс-чавкнитiс, что керкуын кынымкö секунда сьöрна вöлi югыт, кыдз луннас. Сэсся чаркнитiс-гымнитiс, бытьтö небоыс потiс шöри и му вылö öдззисö киссьыны зэв ыджыт иззэз. Макариха кресталiс кымöссö, шуис: «Свят, свят...» — и кунис синнэсö. Дыр сiя шысеттöг клёнöтiс кымöснас и, кöр жагöник осьтiс синнэсö, казялiс, что керкуас бöра пемыт ни, только Николай Чудотворец одзын вöрис масiссянь вöснитик-вöснитик бикыв, аркмöтiс енполка вылас руд вуджöррез. Но вот осьта öшынöт пöльтыштiс тöв, бикылыс öдззис йöктыны — лэбалiс, дзик бабылок, — то куслiс, то вились öзйывлiс, и сэк пöрись Макариха вдруг казялiс, что Николай Чудотворецлöн синнэс... сералöны! Да, да, сералöны...

— Ох, ох, батюшко! Тэ сералан?! — чирöстiс Макариха. — Менам беда вылын сералан?! Ох, ох! Недобрöй тэ... Тэ — тшыкöтöм! Тэ — сотаналöн вуджöр...

Сiя, конечно, эз тöд, что енполка вылас шогмис простöй световöй эффект, что ликыслöн выраженнёыс просто «орсiс» масiсьыс бисянь, бледыник югöррезсянь да вуджöррезсянь. Эз тöд этö Макариха. И сiя ылöстöма медбöрьяись дзарнитiс ликыслань, сэсся жагöника сувтiс кок йылö и пондiс, кинас маласьöмöн, мыйкö кошшыны лабич увтiсь. Кошшис дыр. Ачыс лöгöн мыйкö шушкис, кинöскö видiс, сыркьялöмöн горзiс и норасис аслас неудачнöй олан вылö. Но вот ки увтö шедiс мыйкö чорыт да желля. Макариха пешлiс сiйö öтмöдöрсянь и вежöртiс, что этö как раз сiя öшöпекыс, кöдöн мöдiс поткöтны беспутнöй Опоньлiсь кымöссö. «Бур... бур...» — шуис Макариха и полöмöн вешшис енугöлыслань.

— И-ах! — вдруг горöтiс сiя дзик пурт увтын и мымда вын сöтiс öшöпекнас Николай Чудотворец чужöм кузя. Öтмöдöрö резсисö стекло тороккез, öтамöдöс одзалöмöн усисö джоджö кынымкö лик, кусiс масiсь. Пöрись Макариха брякнитчис кыминь, зубыта дойдiс кымöссö да пидзöссэсö, но эз ни кыв нем — не зубыт, не шог. Сiдз куйлытöн и застанитiс сiйö дошлöй старичок Гырдзза-аршин, кöда ашынас павжун кадö пырис Макариха ордö.

— О-о, вот эта дело! — шынньöв пыр шуис старик, кöр казялiс пустöй енугöвсö.

Макариха вöлi дзик неловья. Сiя куйлiс вöрöтчытöг, и, кöбы эз треситчö пельпоннэс да спина коскаэс, старик, натьтö, неумöля повзис бы. Но Макарихалöн дрöжитiс быдöс вывтырыс, и Гырдзза-аршин шуис бöра шынньöв пыр:

— Здорово, Надежда Прокопьевна! Макариха бергöтчис бок вылас, осьтiс синнэсö.

— Мый меным лоас öнi, Гаврил Фокич? — юалiс сiя. — Мыля ме этчöдз локтi?

— Хо, мыля? Оланыс велöтiс. Оланыс, батя, сэтшöм дело: кин сылö мунö паныт, сiйö и велöтö. А мый, шуан, лоас? Да мый вермас лоны, гырдзза-аршин? Ме ассим святöй ликкесö эшö война одзас горын сотi и, адззан, сё эшö ловья, некытшöм лешак оз босьт. Давай остальнöйесö пизьдам пес вылö и вунöтам енсö. Абу сiя. Тю-тю — пустöй места.

— Кузьвек сысянь счастье кори, а кытöн нö сiя, счастьеыс? — юасис Макариха.

— Хех-хех-хех... Счастье... — серöмтчис Гырдзза-аршин. — Мый сiя сэтшöмыс, счастьеыс? — и висьталiс, кыдз философ: — Счастье, Надежда Прокопьевна, эта сэтшöм штука: кöр душаыт спокойнöй, кöр тэнö нем оз маит — вот и счастье. А вермас я морт лоны спокойнöйöн, кöр сiя томсянь енiсь да чёртiсь полö? Кöр сiя асывсянь рытöдз только енсö и касьтывлö, сэсся нем тöдвылас абу? Нет, оз вермы сэтшöм мортыс спокойнöя овны, сiдзкö, и счастье сылö абу. Вот эд кытшöм делоыс. Вежöртiн?

Макариха шы эз сет, только кваркышалiс синнэзнас да гогинялiс юрнас. А Гырдзза-аршин баитiс одзлань:

— Счастье! Эм сiя тэнат, Надежда Прокопьевна, эм! Зоныт эттшöм нывкакöт öтлаасис. Эта разь не счастье, а? Висьтала ме тэныт: солдат, а не нывка. Мунам ны дынö. Натодиль менö татчö иньдiсö. Натодиль! Фаинушкаыс сiдз и горöтчис: кор, шуö, мамöс татчö, миян ордö, ась олö да красуйтчö. Кылiн? Кор пö мамöс... Мамöн тэнö шуö! А тэ — счастье... Мунам!..

* * *

Таво арнас ме ветлi Важ Дзимбырö. Локтi павжун кадö и, магазинлань оськалiкö, оча чук пантасимö Гырдзза-аршинкöт. Старик небöма четушкаок и öнi важнöя шагнялiс деревня шöрöт.

— Мый, пенсия получитiн, Гаврил Фокич? — юалi сылiсь.

— Кытшöм пенсия месяц шöрас, — горöтчис паныт Гырдзза-аршин. — Пöрись Макарихаыс, Надежда Прокопьевнаыс, нимлуна талун, шестьдесят год тырöма. Вот и муна поздравитны. Кыдз инö, кыдз инö...

И вдруг старичок öшöтчис сосö бердö, пондiс кыскыны:

— Мунам кыкöн! Басни абу... Мунам! Адззылан быдöс аслат синöн.

Ме пондылi откажитчыны, но Гырдзза-аршин сiдз трекнитiс, что юрö чуть эз ор да канаваö эз быгыльтчы. Ковсис согласитчыны.

Фаина квартира дынö сибалiкö миянöс панталiс неыджыт мыгöра старушка. Кöть вöлi буддень, а пасьталöма сiя öддьöн басöк сарафан, кокас кышалöма виль чаркиэз, а юр вылас пуктöма чим гöрд чышьян. Дзарнитi ме и чуть гатш эг усь: да этö жö пöрись Макариха! Быль! Ах тэ, дивовежа! Старухаыс пыр новйис рукйöсь дубас да йöрнöс, шабурокыс вöлi куш дöмас, а öнi видзöт тэ — настоящöй барыня-сударыня!

Пырим керкуö. Югыт сэтöн, гажа. И мый первöйыс усис синмö, дак эта вöлi пызан. Да, да, пызан. Бель чочком пызандöраöн вевттьöм пызан. Мам менам, маминьöй! Мыйыс только пызан вылас эз вöв! Аслам векын ме некöр эшö сымда быдкодь сёянсö эг адззыв. Сэтöн сулалiс не öтiк бекöрын шыд, ыджыт тарелка вылын шыннялiсö басöк рöма пирöггез, вöлi нöкьяйöв, рись, вöлiсö быдкодь кашаэз, вареннёэз, быдкодь ягöд, вöлi солалöм тшак — да етша разь мый сэтöн вöлi!

— Пуксьö жö, пуксьö чожжык, — рочалiс миянöс Макариха пызан сайö. — Быдöс сайкалiс. Стыдитчин бы тэ, Гаврилушко! Эд асыв кежас тэнö кори, а тэ луншöрöдз кыскин...

— А ме нарочно, — сералiс Гырдзза-аршин. — Ноко, мыся, видзчисяс оз менö Надежыс. Ноко, мыся, кыдз сiя менö радейтö-уважайтö. Хех-хех-хех...

Гырдзза-аршин торс сувтöтiс ассис «бутыльсö» пызан шöрö, а Макариха петкöтiс ни джоджулiсь быдса туис сур.

— Юö, юö! — баитiс сiя. — Юö да панясьö. Кинöс видзчисят?

— Хо! Кинöс? Вот адззылан! — хитрöя шынньöвтiс дошлöй старичок.

Дата добавления: 2015-11-16