КОМОЛÖЙ ЧЁРТ

Кöсыник чужöма старичок Попан Илья важын ни лыддиссьö Мырьяч деревняын меддошлöй чери кыйисьöн. И чеччö сiя деревняас, конечно жö, медодз. Талун Илья петiс аслас керкуись как раз сiя кадö, кöр неыджыт лог сайись вöрын шыасис первöй каёк. Шыасис сiя вöснитик-вöснитик голосöн, но саймöтiс сёдаки вöрсис быдöс остальнöй каёккесö: öтдруг öдззисö чивзыны малиновкаэз, кеньжаккез, пистöжоккез. И нельки пöрись рака, кöда эта кадö пыр сунасьлiс гуна сайись косьмöм кöз вылын, шевк-шевк керис борддэзнас да тожö резьöтiс асывся воздухсö нёштöм голосöн: кар-р-р! ― и виньдiс, бöра, тыдалö, онмöссис. Старик грöзитiс сылань кулакнас и эз вунöт сьöвзьыны: «Тьфу, тьфу, нечистöй дук! Аслат юр вылö карзан, срам!» Мырьячын быд суевернöй морт тöдö, что пöрись рака эта одза карзö не бур одзын, кöсйö сiя, нёштöм дук, кытшöмкö оказия. Тöдiс этö и Попан Илья ― тожö эд быд берсясис полiс, тожö суевернöй вöлi. Вот мыля сiя эшö öтпыр лöга сьöвзис и кöсйисис талун жö вештiсьны ракаыскöт: «Вия срамöс, мед оз повзьöтлы добрöй отирсö». Сэсся паськыта пернапасасис и кыскис слега коласiсь кынымкö вугыршать.

Асылыс лöсьöтчис лоны мичаöн, гажаöн. Шондiпетандорын эттшöм асылö Ведень мельница сайын, Пыдын йирын, бура кокалöны кельчиэз да ёдiпияннэз, и старичок решитiс ветлыны сэтчин. «Может, и господин жерех крюкасяс, вот чериняньсö старухаö стряпайтас», ― думайтiс пöрись морт. Думайтiс сiя и мöдiктор йылiсь. Чожа сибалас касьтiсян лун ― семик. Эта лунö Мырьячын, кытшöмкö важ традиция сьöртi, пöжалöны да пуöны медбур сёян, керöны ырöш да сур, а сэсся кайöны могильникö касьтывлыны кулöм отирöс. Семик коста медбур сёянöн лыддиссьö, конечно жö, черинянь. Быдöн, кин ачыс оз кый черисö, касьтiсян лун панытö локтö Попан Илья ордö, корö кельчиэз да ёдiэз. И старик мукöдпырся торгуйтлö. «Талун кыя унажык, вузалышта бöра, ― мечтайтiс Илья. ― Только вот ракаыс... Тьфу! Но да нем! Лыддьöтам молитва и сiйöн-сорöн кыйыштам невнасö».

Ведень мельница дынöдз лыддьöны верста мымда. Подöн ветлöтан туёк нидзыв моз виклясьö перво видз дорöт, сэсся пырö пемыт ягö и казявтöг петö берег дорас. Важын ни, öддьöн важын Ильялöн дедыс, горвыв сёрдын куйлiкö, часто висьтасьлiс, бытьтö Мырьячыс одзжык сулалöма ю дорас, ягыс дынын. Но пöрись отирыс бöрйывлöмась деревняыс увтö местасö неудачнöя: лешак туй вылö пö лöсявлöмась. А эта сэтшöм места, что бурсö нем ни видзчисьны. Только ештасö строитны керкуэсö, кыдз вöрдядь аркмöтас тöвчик-падера и павтыралас быдöс крышаэсö, чапкалас нiйö кытчö шедас. Беднöй отир лöсьöтасö-керасö виль керку юррез, а сэтöн мöдiк оказия ― самöй ойшöрö öзъяс баня, и öдззас биыс гуляйтны. Лöг лешак сотас быдöс керкуоккесö ― и курччав бöра гырдззаэз. Лешак, батя, лешак и эм: оз любит, кöр сы туй вылö морт поздiсьö... Вот и ковсьöма йöзыслö мунны ылöжык нёштöм места дынiсь, виль селитьба кошшыны. «Эх, мыйыс только абу чочком светас, ― думайтö пöрись Илья. ― Сякöй срамыс тыр, батя. Öнi тай оз ни кывсьывлы нем сэтшöмыс, а одзжык быдлаын кульпöлöсыс бöбавлöма... Беда!»

Деревня сайын сiя не тэрмасьöмöн вуджис йöр, сулалыштiс невна шоччисьöм могись и вöрзис одзлань. И только сэтöн сiя казялiс, что туёкыс кузя оськалöма ни кытшöмкö морт: лысваа турун вылын тöдчисö следдэз. Веськыта кö шуны, вöлiсö не следдэз, а только öтiк свальнöй след. Кинкö мунöма, коккесö лэбтавтöг, кыскöма нiйö муыс вылöт, вот и шогмöма орлытöм визь. «Китöм Öльöшлöн делоыс, сiя мегырасьöм. Тыдалö, тожö семик кежö лöсьöтчö», ― решитiс Илья.

Китöм Öльöш ― Мырьячын медпöрись морт. Восемьдесят год ни курзыктö светас, юр вылас öтiк тылöп абу, годдэз быдöс нiйö нетшкöмась-вотöмась, а вот тошсö абу вöрзьöтöмась ― кузь да паськыт сiя быдмöма, гöгви öшалö. Мыгöрнас старик учöтик, вынокыс нем и нем абу ― кытчö падмас, сэтчö и усьö: коккес бердын дзик сьöкыт иззэз öшалöны, лэбтавны оз позь. Кöркö германскöй война вылын Öльöш шедлöма бомбёжка увтö, ыджыт осколок нöбöтöма шульга кисö, вот и ним сылöн öнi ― китöм Öльöш. Пöрись Илья да сысся пöрисьжык Öльöш ― друггез. Шутитöм могись нiя баитлöны мукöдпырся: кык нинкöм ― гоз.

― Может, неважын мунiс, дак вöта сiйö, ― горöтчис Илья и содтiс оськöввез. ― Кыкöн гажажык лоас.

Сiдз, аскöттяс баитiкö да быдкодь думасö думайтiкö, Илья локтiс яг дорöдз. Эстöн сiя бöра невна шоччисьыштiс, кывзiс, кыдз сьылöны кайез. Шондi эшö эз на вöв, но асыв ладорас небоыс ымьялiс ни гöрд рöмöн. Вöр шушкöтчис кокнитик тöлоккöт, тыдалö, висьтасис, мый сiя адззылiс ойнас. Ойнас, батя, пемыт вöрын быдторыс шогмö, ого... Эм мый висьтасьнытö.

Ведень мельница дынö сiя петiс сэк, кöр ю саяс лöсьöтчис ни мыччисьны шондi.

― Как раз ештi, öнi бура кокалö, ― баитiс аскöттяс старик. ― Но кытöн жö дружокö? Неужто одзалi сiйö? Э-э, не, вот кыт ляшмасьöма, йир увтас лэдзчöм. Э-э, да мый эта? Э-э...

Илья кыдз сулалiс, сiдз и кынмис местаас. Йир дынас аркмис мыйкö сэтшöм, кöдасянь пот мунiс сьöлöмыс. Китöм Öльöш мымда садь котöртiс берегыс дорöт, брякнитчис-усис кыминь, проворнöя сувтiс бöр, вились котöртiс-керис и, видзöт, бöра усис, только не кыминь ни, а гатш. Сiя эз ни прокмы чеччыны, му вылас и вартчис киöн-кокöн, дзик мездiсис кинсянькö. «Беда, кулö, тыдалö, ― шушкыштiс Попан Илья да паськыта пернапасасис. ― Беда!» Сiя чепöссис другыс дынö, сувтiс сы весьтö кекеркаöн.

― Эй, кум! Тэ мый этö, а?

― Мун, мун, нечистöй дук! Мун! А-а... чур менö, чур! А-а... ― паныт шыасис Öльöш и эшö ёнжыка пондiс вартчыны.

― Да лöньсьы тэ, кум! Этö эд ме, ме ― Попан Илья! Кытшöм жö ме нечистöй дук? Кум...

― А-а... Сiдзкö, тэ... Отсав, ужо. Чур, чур...

Попан Илья кокнита лэбтiс дружоксö, дзарнитiс синнэзас, а нiя, синнэс, нач ылöстöмöсь. Öмыс стариклöн пиньöвтчöм, а тошыс вöрис, дзик ловья. Öльöш эз письты висьтавны нем. Ильялö ковсис öштыны неетша кад, медбы тöдны, кин повзьöтiс дружоксö. А повзьöтöм сiйö... чёрт!

― Только лэдзчи йир дорас да чапки вугырöс, а сiя сэтöн и эм, ― мыкталiс джын час бöртi Öльöш. ― Буль-боль чепöссис васис, сöтiс бöжнас вугыршатьö кузя и давай жö пиньласьны... Но, ме и ачым ог тöд, кыдз калькалi местасим.

― Мда-а! Сiдзкö, чёрт?

― Чёрт, кум! Быльнöй чёрт! Сьöд гöна, зараза, понся только невна учöтжык. И бöжа.

― И бöжа? М-да! Вот кытшöм оказия. А ме думайтi, чёрттэс бöжтöмöсь овлöны... Тэ, дружок, эн я сунась ю дорас? А? Сунасин эд?

― Кытшöм сунасьöм. Только ештi вугырöс чапкыны. Китöм Öльöш сё эшö дрöжитiс, эз вермы баитны бытшöмика, а Попан Илья осудитöмöн гогинялiс юрнас, сэсся шуис тешитчöмöн:

― Мда! Не весь баитöны: пондас еныс наказывайтны кинöс, дак мывкыдсö перво мырддяс. Да кытшöм жö чёрт вермас лоны Пыдын йирын? Кузьвек вуграся ― некöр эг адззыв.

― Дак тэ он верит, кум? Эд ме сiйö адззылi! ― дорйисис Öльöш.

― Сулема тэ адззылiн. Сунасин, натьтö, и усис вöтö старухаыт. Висьтала ме тэныт, дружок, старухаыт кувтöнняс зэв ни нёштöм вöлi... Сiйö, натьтö, вöтасин. А может, асьтö. Тожö эд басöкнас он ни шу. Ох-хо-хо... Лок мунам, вуграсям невна. Весь кадсö вон мымда öштiмö.

Öльöш только кинас öвтыштiс: ог пö мун, Христос тэкöт... И Ильялö эшö ковсис неетша öштыны кад, медбы бурöтны другсö.

― Мекöт эн пов. Ме, кум, молитва тöда. Не лешак, не чёрт некöр оз локтö. Мунам!

― Но, сiдз дак...

Кык друг, öтамöд бердö жмитчöмöн, лэдзчисö йир дорö, пуксисö пес плашниккез вылö. Öльöшлöн дрöжитiс киыс и некыдз эз вермы пысавны вугырыс бердö гöрд нидзылöс, и Ильялö ковсис отсавны. Ачыс сiя чапкис öтiк вугыр, сэсся мöдiкö, а кöр лöсьöтчис чапкыны куимöтсö, Öльöш чирöстiс горöнся-горöн и сразу жö чепöссис котöртны. Илья тожö чуть гатш эз усь, сыбурна повзис. И вöлi мыйись: васис, как раз сiя местаись, кытчö чапкис вугырресö, буля-боля петiс... чёрт. Илья казялiс, кыдз перво мыччисис вöснитик сьöд чук, сэсся векнитик кымöс, а сэсся нем ни эз адззыв ― чожжык свистнитiс-чапкис вугыршатьсö, шентыштiс боксис туиссö и чепöссис Öльöш сьöрö. Восемьдесятгодся дед öнi лэбзис сэтшöм перыта, что Илья вöтiс сiйö только ягас. Эстöн кыкнанныс падмисö вуж бердö, усисö ордчöн и дыр куйлiсö шысеттöг, вöлiсö дзик кулöмöсь. Садясисö нiя только сэк, кöр ягас пондiсö тронгыны джынняннэз: пастух вашöтöма мöссэсö поскотина вылö.

― Чу, мöссэз, некö, ― шуис Öльöш.

― Нiя. Лок мунам, öнi немись ни повнытö. Вон и шондi петiс. Слава богу, ловьяöсь кольччим...

Стариккез öдва-öдва сувтiсö коккез вылö, жагöник иньдöтчисö деревнялань. Мунiсö нiя чöлöмöн, чёрт йылiсь эз горöтчö и öтiк кыв. И только деревняыс дынын ни кык ёрт дзарнитiсö öтамöд вылö, пернапасалiсö кымöссэз.

― Кум, эд чёртöс адззылiм, а?

― Чёртöс, кум. Ашын вичкуö ветла. Греххез, тыдалö, вöтiсö.

― А нёштöм, срам! Дзик кульöм пон. Вот только мыля сiя комолöй? Чуксö адззылi, кымöссö адззылi, а сюрресö ― эг. Мыля?

Öльöш дыр пишкис нырнас, сэсся, кыдз пöрисьжык и опытнöйжык, шуис авторитетнöя:

― Пöрись ни, видно, усялiсö сюррес. А, может, кинкö смелöй морт сöтiс ны кузя зорöн, чегöтiс. Быдторыс овлö, зонка! Быд берсяыс му вылас аркмыны вермас.

Деревняыс дынын нiйö вöтiс томыник тракторист Васька Ососов. Зонка ветлöма тожö кытчöкö вуграсьны, кыйöм джын ведра кельчиэз и öнi вöлi радся-рад.

― Мый нö черитöг? Али вузалiт ни? ― юалiс стариккезлiсь.

― Беда, зонка. Öтiк кельчи эз шед. Кыскис миянöс кульыс Пыдын йир дынö, а сэтчин и кулöм пескан абу, ― серьёзнöя баитiс Илья. ― Весöтöма кинкö йирсö, нем абу кольöм.

Ососов шынньöвтiс хитрöя, лег-лег керис чуньнас:

― А мый ме тiянлö баитi: лыддьöтö газетаэз. Газетаэз, мыся, колö лыддьöтны. А тi эд и думайтö менö кывзыны. Эх, стариккез, стариккез! Эд неделя ни чулалiс, кыдз гижи ме газетаас заметка: Ведень мельница дынын, Пыдын йирын, олö ондатра. А кытöн ондатра, сэтöн и чери абу ― пышшö сiя сы дынiсь...

― Ки-ин? ― юалiс Илья.

― Мый? ― шыасис Öльöш.

― Ондатра, мыся. Зверь сэтшöм. Йирас быдса семья поздiсьöма. Ачым адззылi.

Тракторист шупыта мунiс гортас, а кык старик некыдз эз вермö вуджны йöрсö. Кыкнанныс сулалiсö, кыдз öшöмöсь, дзарьялiсö öтамöд вылö.

― Кум, видзöт жö, кытшöм делоыс петiс, а? ― шуис Илья.

― Кыдз инö, кыдз инö! Кула ни, натьтö, чожа. Раз звирись повзи, сiдзкö, кула чожа. Ох-хо-хо... Тэ, кум, эн жö лёб некинлö... Серавны пондасö...

― Ачыт эн боньгы, лысöй кöин! ― лöгасис Илья. ― Тэ эд первöйыс адззисин: «Чёрт, чёрт!» Вот тэныт и чёрт. Да эшö не простöй, а комолöй... Тьфу, тэнö!

Сёрöн рытнас Попан Илья босьтiс киас пишаль, зарядитiс сiйö гырись дробöн и гусясьöмöн мунiс гуна сайö. Сэтчин лыйис кыкись ― буз! буз! Вийис сёдаки ракасö: эн карзы, пöрись икота, эн сомущайт добрöй отирсö!

КЫДЗ МЕНÖ КОЛДУННЯÖН ШУИСÖ

Олi ме асланым деревняын, Порсьюрын, пятьдесят год. Олi аслам керкуын, челядьöс кок йылö сувтöтi и думайтлi, мыся, öнi кувтöдз ни нужда ог понды тöдны. А сэтöн вдруг беда вöтiс. Тулысся Миколаыс панытö йöв видзчиси, а Серанькаö ― ась сюррес сылöн чегласьöны! ― кутiс да и эз йöвсяв: абу, нёштöм мыгöр, котрасьöма. Мый сэтöн керны? Баитi öтiккöт, баитi мöдiккöт, куимöткöт сёрнитыштi ― быдöн öтiк öмись советуйтöны:

― Ветлы, Аграфена Петровна, бригадирыс дынö, кор йöла мöс, а ассит «порозтö» мед нуöтöны яй вылö.

Сiдз ме и решитi керны. Баитышта, мыся, бригадирыскöт, Порсьюров Софроныскöт, может, согласитчас вежны мöссö, а оз, дак, может, кöть кытшöмкö директива сетас (любитö сiя этö кывсö, директивасö, öддьöн любитö). Колö тiянлö тöдны, уджалiс сiя городын, а арнас локтiс татчö, мыля, кыдз сюра мöс, некинкöт абу пондöма лöсявны. Локтiс, и сразу жö пуктiсö бригадирöн. Мужиккес, асьныт тöдат, кык-куим кольччисö, да и нiя ме кодьöсь жö ― ладан вылö чушыктöны. А Порсьюровыт здоровöй, ён, дзик кыдзовöй чурка. Мыйöн не бригадир? Вот сыкöт и лöсьöтчи ме баитыштны.

Вöлiт кö тi миян деревняын, Порсьюрас, дак сёравно адззылiт кыксувда пöлiньтчöм керку. Важын олiс сэтöн кулак, Попан Öльöш. А кöр Попан пиянсö розоритiсö да вашöтiсö гортсис, керкуас правленнё осьтiсö. А сыбöрын, кыдз колхознымöс öтлаöтiсö мöдiк колхозкöт, правленнёсö пондiсö шуны бригаднöй керкуöн. Шоча ме сэтчö пыравлi, натьтö, дас годся дыржык ни эг вöв: удж вылас нарядтöг ветлывлi да. Сэтчö жö сьöлöм эз кыскы. Керкуыс важ, быдöс сiсьмöм. Дзарнитан ― сьöлöм гудрасьö. Увдöрись этажыс пырöма муö, только юр тöрик осьтаэз öшын местаэзас кольччöмась да эшö тöдчöны эна осьтаэзын потласьöм косяккез, жугалöм рама тороккез. Стеклоэс ныын абу, и нёштöм дук пöльтö джоджувсяняс ― кулöм каннез да поннэз сiсьмöны пö сэтчин. Тьфу! Эг бы и баит эта керку йылiсь, да сё колö.

Локтi ме асывнас сы дынö и, медбы не кывны джоджувсис нёштöм дуксö, нырöс вевтти запон дорнам. Сэсся дзарнитi öтмöдöрö да жагöника кайи поспуэз кузя. Поспуэс дзоньöсь эшö вöлiсö, крепытöсь. А посöдз джоджыс ― Христос тэ менам батюшко! ― полöм петö видзöтны. Ёнжык плахаэс только кыка кольччöмась, а остальнöйес ниль мунöмась, нельки уввес сiсьмöмась. Слегаэс тожö шучкöп тöрмöмась да багсялöмась, вот-вот чегасö, пожалуй, оз и ризьнитö: быдöс эд, кыдз сiсь тшак лоöма. Мый нö, мыся, эттшöмыс шогмö? Мыля посöдзсö öнöдз оз лöсьöтö? Эна думаэзöн и оськöвтi кык дзонь плахаыс кузя ыбöслань, дрöжитi, кыдз ва вылын шать. Шутка я делоыс: чегасö слегаэс, и укнитан веськыта мöд светас, öтiк коскатор оз кольччы.

Но умöльыс кытчöдз нем эз ло. Осьтi ыбöссö, пыри керкуас. И чуть гатш эг усь. Сымда нятьсö да срамсö аслам векын некöр эг адззыв. Джоджсö, тыдалö, Попан Öльöшыс бöрын абу на миськавлöмась, потолоксянь улö гез кыза чераньвеззэз öшöтчöмась. Но мый главнöйыс ― дак эта дук! Сэтшöм страшеннöй дук ― нырвуж пиньöвтö. Беда.

Дзарнитi ме енугöлас и адзза: пызан сайын морт пукалö, махорка папкö ― ачыс бригадирыс, Порсьюров Софроныс. Ён, кыз, рожаыс биöн öзйö. Лэбтiс сiя синнэсö ме вылö, чигаркасö тырп дор вылас лякöтiс.

― Здорово, батюшко, ― шуи сылö. ― Баитыштны пыри.

― Баит, баит, Аграфена Петровна. Кывза.

Пукси ме лабичö да и пукала. Мыйсянь баснисö пондöтны ― ог тöд. Пола эд тожö: вдруг, мыся, откажитас, кытчö сэк воштiсьны? Вот и зырта запон дорнам нырöс, кваркышала синнэзнам. Сэсся и шуи баснисö пондöтöм могись:

― А посöдзсö мыля нö од лöсьöтö? Нач и нач сiсьмöма. Пырны керкуас оз туй... Лöсьöтны бы колö...

― Директива правленнёсянь абу, ― öмалiс бригадирыс да лэдзис веськыта чужöмам быдса кольта табак тшын.

― А загрек берездасян?

Порсьюров дыр эд видзöтiс чужöмам, мыйкö думайтiс, тыдалö. Сэсся и горöтчис:

― Ог жö, поди. Мортыс ме счастливöй, городын олi. Баитам сiдз, кыдз добрöй морттэз, дзарьялам öтамöд вылö.

Меным бы делоокö йылiсь колö пондöтны, а сё ог вермы. Сэтöн и народ пондiс чукöртчыны öшын увтас.

― Эй, Софрон, тэ ловья? ― чирзöны инькаэз.

― Мый талун керны миянлö? ― юасьöны старичоккез. Порсьюров локтiс öшыныс дынö, öмсис кыскис чигаркасö.

― Ыб вылö мунö, ыб вылö! Кадыс эд павжун ни. А тэ, эй, Онтон, пырав татчö. Почётнöй грамота важын тэныт вайисö правленнёись, да сё сетнытö недосуг вöлi. Бура тэ мöйму мöссэсö пастучитöмат...

― Грамота-а? ― нюжöтiс Онтон. ― Ог эд, зонка, пыр. Хо!

― Кыдз этö он пыр? Мыля?

― Овны эшö охота, а посöдзыт ― тю-тю! Менö он бöбöт! Кылi ме этö и чуть садьö эз быр. Господи, господи! Пырнытö татчö пыри, а кыдз нö бöр-ту пета? Адззан, нельки мужиккез полöны посöдзас кайны. Сiдз повзи, что и мöсокö йылiсь вунöтi. Кутчиси бöра Порсьюровыс бердö:

― Лöсьöт, кагу, посöдзсö. Медбы беда эз ло.

― Директива, мыся, абу. Эн разь кыв.

― А тэ директиватöг. Пет да лöсьöт ачыт. Пода карта дын керрес эмöсь. Плахаэс ― тожö...

― Тьфу, кытшöм тэ öнджа. Нем он вежöрт. Висьтав лучше, мыйлö локтiн?

Сэтöн и пондöтны бы меным делоö йылiсь, не споритны сэсся, но кытшöмкö бес, тыдалö, чувйыштiс юрам. Характерöс эд менчим тöдатö: öддьöн умöль. Лякася кö мый бердö, дак он ни калькöт. Кыдз шышыбар.

― Вот пиньöвтан юртö, сэк адззылан, мыйлö локтi. И эн горöтлы, ме абу пельтöм.

Кыдз сэтöн чеччöвтас Порсьюровыс, кыдз топнитас кокнас!

― Мый? Тэ менö эшö велöтны! Ачым тöда, мый колö керны! Вежöртiн? И мун менам син одзись, эн карзы, пöрись кикимора!

Господи, господи! Некöр эттшöм страстьсö эг адззыв. Чеччöвтi тожö кок йылö да веськыта и горöтчи:

― Ме ― пöрись кикимора? Ах тэ, нятьöсь чук! Ах тэ, стыдтöм рожа! Да пиньöвт тэ ассит пустöй гырничтö, лешак! Меным тэ дынöдз дело абу!

Сiдз видчытöн и петi керкусис, маласьöмöн лэдзчи му вылас, мунi гортö. Пукала лун, пукала кыкö. Лöгувьям Серанькасö кыкись ньöрöн пöльтi, волькöтi боккесö, сэсся лэдзи пороз дынö. А недель бöртi юöр меным вайöны: укнитöма бригадирушконым, Порсьюров Софроныс, öтлаын медбöрья плахаэзнас усьöм, чегöм пö коксö, юрсö дойдöма. Вот тэныт и директива, вот тэныт и пöрись кикимора...

Бригадиртöг деревняын овны оз туй. Мый бердö бы эн кутчись, сё начальник колö. Вот и бöрйим ми бригадирнас женскöйöс ― мужиккес öтiк öмись откажитчисö: кытчöдз правленнё пö оз лöсьöт бригаднöй керкулiсь посöдзсö, бригадиравны ог кутчисьö. Но одö, дак одö. Бöрйим ми Сима Парасьлiсь нывсö, Галясö. И эг сорасьö. Галяыс перво-наперво чукöртiс собраннё да мужиккеслö сетiс приказ: строитö пö виль бригаднöй керку, важсö пилитö пес вылö! Мужиккезлö воштiсьны некытчö, некой пору строитiсö виль керку...

А мый жö Софрон? Куим месяц больницаын куйлiс. Кокыс веськалöма пö, только унаöн дженытжык лоöма. Баитiсö, что и юрыс веськалöм, но ме ог верит. Мыля? А вот мыля. Локтiс сiя больницасис и пантасис мекöт. Но ме и здоровайтчи, кыдз колö, а сiя паныт шлёпнитiс-горöтчис:

― Карзöв-керин, пöрись кикимора? Тьфу! Тэ увья маитча этадз. У-у, сэрпöсь колдуння!

Вот и думайтö: здоров сылöн юрыс али не. Ох-хо-хо... Невесь, тыдалö, баитöны: люкасись мöслiсь кöть сюрресö чеглав, а люкасьны оз дугды... Но да ладно, тырмас сы йылiсь. Делоыс эд, челядь, вот мыйын: дас год ни сэксянь чулалiс, деревняным син одзын вежсис, а менö öнöдз колдунняöн шуöны. Шуöны, конечно, просто сiдз, сералöм могись.

Дата добавления: 2015-11-16