БАСÖК КИКИМОРА

Мунiсö ыджыт туй кузя кык морт, жагöник лыддисö верстаэз, талисö коккезöн бус. Уф-уф... Уф-уф... Мунiсö и мунiсö не тэрмасьöмöн, кыссисö одзлань. Öтыс нöбöтiс спина сайын неыджыт котомочка, мöдыс видзис конувтас бырöм чышьянокö каттьöмöн кытшöмкö добро.

Неöткодьöсь вöлiсö нiя. Öтыс вачкисис майöг вылö ― вöснитик да кузь, мöдыс вöлi тожö вöснитик, умöльтчöм, но мыгöрокнас абу петöма, ёртыслö моросви и быдмöма только. Майöг да пыкöт ― сэсся нем он и шу.

Тöдсасисö нiя тöн городскöй автобуснöй станцияын, кузь лабичын ордчöн пукавтöн, и талун вöлiсö бур ёрттэзöн, шуисö öтамöднысö солиднöя ― ним и айним сьöртi. Кузь верзень шуис дружоксö Спиридон Прокопычöн, мöдыс, учöтжыкыс, величайтiс сiйö Георгий Степанычöн. Кыкнанныс тöн старайтчисö шедны колана автобус вылö, кеймисисö шофёррезлö, но нiя, шофёррес, мустöм йöз, корисö билеттэз, а кытiсь билеттэсö ваян, кöр некöдыслöн и карманнэс абу, медбы новйöтны деньгасö...

Узисö Спиридон Прокопыч да Георгий Степаныч автобуснöй станцияас цементнöй джоджын. Медбы не кынмыны сэтöн, нiя водiсö оча спина пельöсокö, жмитчисö öтамöд бердö. Талун чеччисö одз, бöра кеймисисö шофёррезлö, но нiя бöра корисö билеттэз. Кык дружок сьöвзисö кок увтаныс, öвтыштiсö киэзöн и решитiсö петны туйö. И вот оськалöны жагöник, тальöны буссö. Кыкнанныс чуть да бöра дзарьялöны бöрö, видзчисьöны, оз я вöт попутнöй машина.

Машинаэз вöтiсö и колисö не етша ни. И кöть дружоккез быдпырся лэбтывлiсö киэз, мустöм шофёррез эз и думайтö сувтны. Спиридон Прокопыч быд машиналö грöзитiс бöрас кулакöн, кужöмöн видчис, а Георгий Степаныч только нюлiс кöс тырппесö да чышкис кымöс вылiсь клей кодь ньылöм.

― Вöтас жö, поди, добрöй морт, пуксьöтас! ― надейтчис сiя.

― Доложон пуксьöтны. Не поннэз жö мийö. Да, не поннэз!

― Вот именно... Морттэз ми тэкöт, Спиридон Прокопыч, а не поннэз. Висьтала ме тэныт, дружок: мортöн кöркö вöлi. Ух тэ, кытшöм мортöн! Диво! Вöвлi, кин бы эз пантась, сетö меным поклон, жмитö ки, быдыс шыннялö этадз бытшöма, другöн шуö. И вот, а? Мый тэ шуан, Спиридон Прокопыч? Видзöт, кытчöдз локтi. А? Билет вылö деньга абу.

― Нем сэтöн и дивуйтчыны, ― согласитчис ёртыскöт Спиридон Прокопыч. ― Быдторыс вермас шогмыны. Вот босьтамö менö. Уджалi леспромхозын шофёрöн, вöр кыскалi. Кыдз месяц, сiдз триста руб карманын. Газетаö портрет печатайтлiсö. Доска почёта вылын öшалi...

― Сiдз. И ме, дружок, öшалi кöркö. Деньга тожö эз бырсьывлы. И вöлi ме настоящöй морт: ыджыт мыгöра, ён, рожаö сипож пасьта. А часöт ― шиш!

Георгий Степаныч сьöвзис кок увтас, босьтiс юр вылiсь потласьöм козырёка фуражка и дыр ниртiс кымöссö. Сэсся шоччисьыштiс, керис куритны. И бöра, натьтö, дасöтiсь ни, пондiс висьтасьны дружокыслö, кыдз уджалöма Гайна сайись леспромхозын, вузасьöма сэтчин магазинын и вот шедöма аслас бöб инь кузя решётка сайö.

― Куим год пукöтiсö срам увья. Эта, думайтан, шутка? Тюрьмаыс не мам роднöй. Но да ладно. Мый вöлi ― чулалiс. Часöт муна вот гортö, и сэсся он ни бöбöт. Кöть тэ и басöк и томыник, кöть тэ и Гошаöн менö шуан, а ме тэныт, кикиморалö, ныр увтат метра кузя шиш мыччала. На вот, курччöвт! Дзар сэсся сы вылö ог кер.

Георгий Степаныч кыскис тыр морос крепыт табак тшын, лэдзис бöр нырöт и öмöт, чапкис чигаркасö да талис кокнас. Сэсся шуис мечтайтöмöн:

― А басöк сёдаки вöлi. У-у, кытчö тэ! Неыджыт мыгöра, топытик. Чужöмыс ― картинка, а каджыс ― Христос тэ, батюшко! Кöр мунö, дак только пики-вики... Чёрт! Локтiс сiя кысянькö миян леспромхозö мамыскöт, клубын вежмасьны пондiс. Зонкаэз и мужиккез сы сьöрын ― кыдз пон свадьба. А сiя некинкöт оз кутчись. А мекöт кутчисис. Пырис магазинö, клоп-клоп басöк синнэзнас керис. Но ме и рапми. Чорыт сьöлöмö вöлi, а сэтöн сылiс. Лун-мöд бöртi и гöтрасим. И сразу жö пондöтчис делоыс. То öтiкö, то мöдiкö корö. А ме ― мый? Мый корö, сiйö и ― на! Перво аслам деньга вылö босьтасьлi, а сэсся тöдан эд... А сылö сё етша. То дона пелькытш, то золотöй часы, то платье. И эшö кöритö: «Тэ, Гоша, менö он любит! Гоша, йöзыслöн иннес вон кыдз мöдöтчöны, а ме... Стыд öтöрö петны!» Ме бöра сылö ― на! Мöдöтi, кыдз заморскöй кикимораöс, пыр шоколадöн да конфетöн вердi. А быдкодь дона винасö мымда тыткимö! Кыдз рыт, сiдз праздник.

― Быдöнныс нiя сэтшöмöсь, басöккес, ― öмалiс ёртсö Спиридон Прокопыч. ― Верита ме тэныт, Георгий Степаныч, вот кыдз верита. Эд и менам иньö истово акань вöлi. А умокыс ― шы ни ог сет. Гöтрасим тожö. Неделя пируйтiм. И пондöтчис! Кыкись Кавказö ветлiм, винасö цистернася унажык, натьтö, юим. Сэсся дзар кери ― чегöм грош абу. А сэтöн эшö авария. Мунi кодöн вöрас ― и тран! ― кайи пу вылö. Машина, конечно, рез-паз, меным лёнам сетiсö. Позор! А басöк иньöлö кöть бы мый! Хи-хи-хи да ха-ха-ха... Горесянь юи бöра винасö, чуть эг сотчы. И вот, пожалуйста, больницаын куим месяц тупляси. Öнi не киын, не кокын.

― И мый жö тэ иньыткöт мöдан керны?

― А сiйö жö, мый и тэ. Локта гортö, босьта кламокöс и муна мöдiк леспромхозö. Ась öтнас уннялö! Вот только öтiк беда: вдруг ог вермы? Слабöй ме мортыс, Георгий Степаныч. Пантася сыкöт и ог тöд, мый петас. Верма бöра ылöстöмсявны. Тöдан ― басöк сёдаки.

― Вот сiя и эм. Ме эд тожö пола пантасьнытö. Басöк иньö. О-о! Но мый-нибудь керамö. Ме, Спиридон Прокопыч, ойнас думайта гортö локны. Пыра ойшöрнас, босьта мый колö ― и аллё!

― Ойнас? Вот эта дело! Ме тожö сiдз кера. Вот только тёщаö... Ойезнас оз узь зараза.

Бöра кык ёртöс вöтiс машина, койыштiс чужöмö и синнэзö бусöн, сöтiс ныррез кузя сотчöм бензин дукöн. Мунiс сiя шакардаöн, сувтны эз и думайт. Спиридон Прокопыч сьöвзис сэтшöм вынöн, что дульыс лэбзис дзик пуля, чуть машинасö эз вöт.

― У-у, лякöсь кынöм, ― видiс шофёрсö. ― Ужо, пантасян тэ меным! Да берездасин бы тэ куимись, кöть бы столб бердö жвангисин!

Сэсся лöнис невна, шуис бедуйтöмöн:

― Адззан, Георгий Степаныч, мый керсьö чочком светас? Некинлö эг пондö ковны. А эд вöвлi... Эх, вöвлi, батя. Вöвлi, корасö передовиккезлöн слёт вылö. Локтан городö, а вокзалас тэнö видзчисьö ни такси. Пуксян сэтчö важнöй, кыдз чёрт, чатыртан юртö ― тöд миянöс! А часöт? Эх, олан, олан! Но да ладно. Öнi ме велöтöм мортыс. Вина сэсся ― ша! Кутчися бöра шоферитны, и адззылат сэк.

Георгий Степаныч нюлiс кöс тырппесö, сьöкыта поиктiс. Тюрьмаын пукавтöн сылö неетша павкöма, ёна тöждiсьöма свободаыс понда и часöт вöлi мыдз, нöитöм.

― Вот адзза бытшöмжык удж и понда овны, ― баитiс сiя ёртыслö. ― Виль моз понда овны. Чужöйсö босьтны сэсся он бöбöт. Только бы не пантасьны аканьöкöт, мездiсьны бы сы дынсянь. Вольнöй казак бы вöлi.

― Эта сiдз.

Одзын мыччисис неыджыт посад. Эта вöлi быдöнлö тöдса посад ― Туйвеж. Ыджыт туй сэтöн торьясьö. Öт вожыс мунö веськытланьö, Нагорскöй лесопунктö, кытöн уджалöма шофёрöн Спиридон Прокопычыс, мöдыс кайис веськыта Гайнаöдз. Эстöн кык ёртлö ковсис янсöтчыны, и нiя невна тöждiсисö. Эд öтiк беда öтлаöтiс нiйö, кыкнанныс иннез кузя страдайтiсö. Öтiк беда ― öтiк песня.

Посад дынын, неыджыт расок дорын йирсисö колхознöй мöссэз. Пастух, паськыт тоша дед, пукалiс кыдзоккез увтын и кыйис нинкöм. Кык друг здоровайтчисö сыкöт, пуксисö шоччисьны.

― Кысянь, кытчö? ― юалiс дед.

― Ылын вöлiмö, старик. Тасянь оз тыдав, ― висьталiс Спиридон Прокопыч.

Но сё жö юöртiс, кытöн нiя вöлiсö и мый адззылiсö. Старик гогинялiс юрöн, жалейтiс кыкнаннысö. Сэсся кыскис понуль увтiсь лагун, гöститöтiс дружоккезöс ырöшöн.

Посадын, кöть вöлi буддень, а чарöтiс-орсiс гармоння, почти быд пельöсын кылiсö песняэз, кылiс смех, öтiк керкуын йöктiсö сiдз, что кажитчис ― вот-вот киссяс керкуыс.

― Праздник разь талун? ― юасис Спиридон Прокопыч.

― Кытшöм праздник ― свадьба. Инженер миян гöтрасьö. Неделя ни посадным зыкöн тырö. Винасö магазинсис быдöс юисö. Часöт городiсь ваялöны.

― Богатöй, видно, жöникыс?

― О-о! Инженер! И невестаыс, висьтала ме тiянлö, настоящöй артистка. Пасьтасьöма ― любо видзöтны. Мый инькалöн эм, быдöс вевдöрын: моросыс тыдалö, юбкаокыс проклённöйлöн менам вешьян кокся векнитжык и сэтшöм дженыт ― стыд висьтавны ― öдва гöгсö вевттьö.

― Мода, старик, нем он кер, ― шуис Георгий Степаныч.

― Вот ме и шуа ― мода...

Старик мöдiс эшö мыйкö висьтавны невестаыс йылiсь, но эз ешты. Посадiсь вдруг петiс подвода, сибöтчис ны дынö. Телегаын пукалiс зоночка, видзис вожжи. Ордчöн сыкöт пукалiс праздничнöй мöдöтчана кыз старуха. Телегаас валяйтчис пестер не пестер, а кытшöмкö ыджыт корзина.

― Э-э, бöра мамыс винала гöнитö, ― шуис старик. И ― осьтiс öмсö.

Мый лоис сы гöссезкöт? Мыйись сiдз повзисö?

Ыджыт мыгöра Георгий Степаныч чеччöвтiс кок йылö и мымда прок чепöссис расокас. Спиридон Прокопыч бледöтiс, кыдз смерть, кватитiс чышьянокö каттьöм пажытьсö и тожö ньöвьёсьöн лэбзис другыс сьöрö. «Бöбöлöсь тай, ― думыш керис пастух. ― Мый сэтшöмыс?» Дыр сiя пукалiс осьта öмöн, а кык дружок öтамöдöс одзалöмöн котöртiсö расöттяс, орддисö посадсö и ышки-пойки петiсö туйвежö.

― Чуть эг шед, чёрт, ― шуис Георгий Степаныч.

― Мый?

― Тёщаö телегаас пукалiс.

― Бöбöтчы! Менам тёщаö пукалiс!

― Хо!

― Вот тэныт и ― хо!

― Öнi ме вольнöй кай! ― шуис Георгий Степаныч.

― Öнi ме вольнöй орёл! ― чирзiс Спиридон Прокопыч. Минута бöртi, кöр кык дружок вежöртiсö, мыйын делоыс, öдззисö нöитны и сывьявны öтамöдöс, дзирыта окасисö, жмитiсö киэзнысö.

― Спиридоша, свояк!

― Гоша, друг роднöй! Кыдз сiя, а? Жöник сайö петö! Вот мездiс бедасис, а?

― Мездiс! Вот чёрт! Кöр менö пуксьöтiсö тюрьмаас, дак сiя, видно, сразу мунiс тiян Нагорскöй лесопунктö. Вот и пантасит сэтчин. А ме тöждiси... Эшö козин сылö неби. Петi тюрьмасис да быдöс деньгаöс и видзи.

Георгий Степаныч кыскис котомкасис басöк платье, чапкис туй шöрас:

― Медбöрья мода. Мыся, поди, пригодитчас.

Спиридон Прокопыч пöрччалiс ассис чышьяноксö, чапкис туй шöрö басöк цветтэза кофточка.

― Тожö медбöрья руббез видзи. Эг мöд небнытö, да кытшöмкö бес кыскис магазинас. Хо-хо-хо! Эд сiя, басöк кикимораыс, ме бöрсянь сразу шыбыльтöма татчö. И вот ― свадьба! Но и павкас инженерыслö, тальöв-керас, несчастнöй, миянлiсь туйсö.

Кык морт сералiсö ыджыт туй шöрын, ваксисö-гöрдлiсö лёкгоршöн, эз тöдö, кытчö воштiсьны радсянь. Посадын орсiс гармоння, горалiсö песняэз. Свояккез кывзiсö песняэсö и, кыдз вольнöй кайез, готовöсь вöлiсö лэбзьыны голубöй небоö.

Дата добавления: 2015-11-16