Вот тэныт и Ошпинь

Эта делоыс шогмис таво тулыснас Кушлипак деревняын, как раз сэтчин, кытöн почти быд мортлöн эм аслас родовöй нимкодь. Да эшö кытшöм нимкодь! Öтiк добрöй хозяйкаöс шуисö Варыш Катяöн. Этö сiйöн, мыля Катяыс баблöн бабыс öтiк тшыг годö гусялöма аслас соседкалiсь курöжокöс. Мöдiкöс, богатырь кодь здоровöй детинаöс, Кушлипакын шуисö Дерева Прокопöн: дедыс пö бытьтö чукыля кока вöлöма. Олiсö Кушлипакын Бордтöм Рака Пиля, Кляч Öльöш, Гундыр Фёкла...

А вон сiя керкуын, кöда ляпкисьöма Рытва ю дорас, олö пöрись ни старичок Ошпинь Макар ― кöть тошыс гöгви, зато юрыс нач куш, дзик пöвсалöм калиг. Поди, думайтö: раз нимкодьыс сылöн Ошпинь, то пиннес былись ёнöсь, дзик ошлöн? Не, совсем не сiдз. Макар öмын быдöссö кык пинь, да и нiя сiсьöсь, вот-вот чегасö.

― Деда, а мыля нö тэнö сiдз шуöны? ― юасьлö мукöдпырся внучекыс, кöдö старикыс беда кыдз радейтö.

― Э-э, шуöны тай! ― шыннялö тоша öмнас Макар. ― Шуöны, покась, да и только. Этö, адззан ли, дедöс менчим сiдз нимкодялöмась. Вöлöма старикыт ён да вына, дзик ош. И пиннес сылöн вöлöмась öддьöн крепытöсь. Пев кызаöсь шогмывлöмась.

А олöма дедö беднöя ― лун сёйö, кыкö тшыгйöн витшыктö, крепыт пиннесö тув вылын шоччöтö. Вот и велöтöма сiйö тшыг нуждаыс отирöс смешитны. Конечно, не беднöй отирöс, а богатöйезöс. Öксясö богатöй кулаккез, шуам, пируйтны. Самогон одзаныс тыр, нянь да яй тожö эм, солалöм тшак да капуста ― кöть вилаöн сöвт. Быд торыс одзаныс эм, а вот гажыс пызан сайын абу. Колö бы сералыштны, колö бы мыйкö видзöтыштны сэтшöмö, медбы сьöлöм бурмис, а мый видзöтан? Вот и велалöма дедö ассис проксö нылö мыччавны. Пырöма öтпыр богатöй свадьба вылö, босьтöма пызан вылiсь гырнич и давай сiйö курччавны. Ярс! ― курччöвтас крепыт пиннезнас гырнич дорсö, изас öмас да сьöвзяс. Сэсся бöра ― ярс! Сiдз и курччалöма быдöс. Свадебшана перво синнэзнысö барöтöмась, вöлись ножö дивуйтчыны да гöрдлыны-серавны: Хо-хо-хо! Ха-ха-ха! У-у-у! Вот сiдз нiя сералöмась. И вердöмась дедöс пöттöдз, юкталöмась коддзытöдз. А дедöлö сё етша, рявзö:

― Сувтöтö одзам быдса гырнич каша!

Сувтöтасö сы одзö кашаöн ыджыт гырнич. И мый тэ думайтан? Чулалас дас минута мымда, и дедö одзын нем абу ― не гырнич, не каша. Кодувьяс быдöс тыткöма!

И лоöма старик знаменитöйöн. Кытöн пир, сэтчö сiйö и корöны: гажöт пö, Ошпинь, эн дышöтчы, ми тэнö, сiдз и ло, вердам и юкталам. Вот сiдз и сетöмась сылö нимкодь ― Ошпинь. Этö нимкодьсö айö, покойнöй, кыскалiс, ме кузь век кыскала. Вот эд, покась, кыдз вермас шогмыны. Пыр и пыр думайта, кыдз бы этö нимкодьсö ас бердiсь зыртыштны, нельки йöз деревняö мöдi мунны овнытö, да мый толкыс? Мун кöть кытчö, кöть Сибирьö тарöвтчы, а сiя сёравно тэнö вöтас.

Вöлi ме, зону, томнам война вылын, пишались фронт вылын лыйси. И перво быдöс бур вöлi. Ёрттэзö шуисö менö ним и айним сьöртi. И лöсявны пондiс делоыс. Радуйтча: вунöтасö, мыся, öнi нимкодьöс. И вдруг: «Э-э, Ошпинь Макар! Здорово, земляк!» Барöтi синнэзöс, а сэтöн Ниндуль Терень сулалö, радся-рад, мыля война вылын земляккöт пантасис. А ме чуть ог горзы. Тьфу тэ, мыся, арттöм Ниндуль, чапкисö тэнö сюраэс. Да эшö ванзан ёрттэзö дырни. Тьфу! Но весь сьöласи. Вöтiс менö нимкодь и война вылын, лякасис бöра, кыдз дьöгöдь. Кытчö бы эн мун, сё менö Ошпиньöн шуöны. Вот кытшöм делоыс, зонка. Öбида кутö. Öмам кык пинь, да и нiя вöрöны ни, а шуöны ошпиньöн. Беда. Кузь век думайта, кыдз да мый керны, да сё вот юрö нем оз пыр. Но ужо, поди, пырас жö мыйкö...

Тöвбыт думайтiс этö Макар. А сэтчö и тулыс локтiс. Виш-виш керис нырнас Макар, дзарнитiс öтмöдöрö, сьöдракаэзлiсь уджсö видзöтыштiс и шуис негорöн:

― Дружнöй таво тулысыс лоас. И ыджыт ваа... Висьталiс этö Макар и дзик ваас нёджжöвтiс. Ыджыт лым столаэз чожа сылiсö, гудыра шоррезöн лымыс больгис-лэдзчис Рытва юö, кырöтiс береггез. Рытва перво ружтiс, ризьöтiс, а сэсся сiдз пöльтчис, что петiс береггезiсь. Эта бы и ладно, петiн дак пет, но шогмис öтiк беда: ыджыт ваныр рез-паз жугдiс пос, кöда кузя отир ветлiсö сай ладорас. Сэтчин вöлiсö фермаэз. Куим лун да ой бульчикайтiс Рытва, шумитiс, дзик бöбмöм, куим лун да ой пукалiсö фермаын уджалiссез тшыгйöн, некыдз гортö шедны эз вермö. А нёльöт лунас ва чинiс, Рытва бöра лоис спокойнöй. Спокойнöй, да пондыв вудж, кöр посыс абу! Мый керны?

― Колö адззыны пыж! ― шуис бригадир Маегов, кöдö унажыксö шуисö тожö нимкодь сьöртi ― Сьöктан Егорöн. Томнас дойдлöма пидзöссö, и öнi коксö новйöтiс невна лэбтöмöн. И сiя, дойдöм кокыс, ёна вачкисис сьöктан вылö.

― Пыж колö, нем сытöг он кер, ― шуис Сьöктан Егорыс и лег-лег керис дойдöм кокнас.

― Конечно, колö, да кысь ваян? Деревняаным öтiк пыж ― Ошпинь Макарлöн. Сетас я? ― горöтчис паныт Кляч Опонь.

― Сетас. Доложон сетны, сознательнöй старикыс.

И быль, старик мугтöг сетiс пыжсö. И не только сетiс, а эшö «капитанöс» адззис.

― Миков, ― шуис сiя внучекыслö. ― Давай-ко, дружок, мыччав йöзыслö проктö, уджалышт невночка, покась.

― Ме готов! Мый керны?

― А вуджöтлы пода вöдитiссесö фермаас да бöр.

Миков ― зоночка боёк, визыв. Кытчö иньдан ― сэтчö и мунö. А пыжын отирöс ыслöтны сiя готов ой и лун. Одз асывнас дед да внучек лэдзчисö Рытва дорö, Миков пуксис пыжö и мымда прок уйис фермалань. Сай ладорас сiйö видзчисисö ни инькаэз, радуйтчисö, кыдз челядёккез, шуисö Миковöс юрвердiсьöн. Миков тожö шыннялiс, важнöя рочалiс инькаэсö пуксьыны «теплоходö». Пöрись Макар видзöтiс мöд берегас, кинас малалiс сынавтöм тошсö и радуйтчис.

Рытва юок вöлi спокойнöй, свиттялiс сингусялана гыэзöн, ыжмавны эз ни думайт. И Миков некой пору вуджöтiс фермаын уджалiссезöс деревняö. Эстöн бöра сiйö ошкисö, баитiсö сылö дзирыт кыввез, а Варыш Катя, öддьöн ни ласковöй инька, нельки окалiс зоночкасö.

Вот сiдз и артассис делоыс. Быд асылö Миков вуджöтö подавöдитiссесö фермаö, сэсся мунö школаö, а кöр локтас бöр, лэдзчö ю дорö. То öтiкöс, то мöдiкöс, то фермаö, то деревняö кыскалö аслас «теплоходöн» йöзсö.

Öтпыр луншöр кадö Миков вуджöтiс фермаö бригадирöс, Сьöктан Егорöс.

― Ветла, видзöта подасö. А сэсся Важ Пальникö кайла, ― юöртiс сiя. ― Рыт гöгöрас видзчись менö.

― Быдöс лоас керöм, ― висьталiс зоночка.

Миков ветлiс гортас, не тэрмасьöмöн керис уроккез, лыддьöтiс книга, а кöр шондiыс лöсьöтчис пуксьыны, пасьтасис бытшöмика ― рыттэс кöдзытöсь эшö вöлiсö ― и петiс öтöрö. Öтöрын кöвьясис тшын: Кушлипак деревняын лонтiсисö баняэз. Лонтiсис и Сьöктан Егорлöн баняыс. Кресення панытö морт решитöма пывсьыны. «Сэк чожа локтас. Поди, видзчисьö ни да?» ― думыш керис Миков и содтiс оськöввез.

Бригадир сай берегас эз на вöв. Сэтчин сулалiсö только кынымкö инька, кöдна казялiсö Миковöс и пондiсö öвтны киэзöн: давай пö чожжык, видзчисямö тэнö. Зоночка вуджöтiс нiйö гортö и, медбы не гöжны ю дорас, пуксис избушка сайö, ёнжыка шубöвтiс пасёксö, сюйис киэсö соссэзö.

Дыр пукалiс Миков, думайтiс сякöй думаэсö и нельки дрöгнитiс, кöр сай берегас кинкö öдззис ванзыны:

― Э-э-э-й! Ошпинь Мико-ов! О-о-о! Кытöн тэ? Кылан, Ошпинь?!

Зоночка чеччöвтiс кок йылö, мöдiс горöтны паныт: «Татöн ме!» ― но кылыс бытьтö кынмис öмас, эз письты шуны нем. Миков сулалiс избушкаыс сайын, синнэс кваркышалiсö, юрыс пырис пельпоннэзö. А ю сайын Сьöктан Егор рявзiс и рявзiс шоччисьтöг.

«Ошпинь Миков? Этö ме ― Ошпинь?» ― думайтiс зоночка.

― Э-э-э-эй! Ошпи-инь!

Колiс бы пуксьыны пыжö, вуджöтны бригадирсö, а коккез озö кывзö, юрын ветлöны быдкодь думаэз. Усисö тöдвылö дедыслöн кыввез: «Вот зыртышта нимкодьöс ас бердiсь, сэк пожалуйста...» Кузь век Макар думайтöм зыртыштны нимкодьсö, да кытчö тэ ― абу вермöма. И вот... «Но ме зыртышта сiйö, ― думайтiс зоночка. ― Ошпиньöн менö некин оз понды шуны. Да! И дедöлö отсала!»

― Ох-хо-хо-о-о! Эй! Ошпинь Миков! ― рявзiс бригадир. Эка, ванзö! Ванзы кöть ойшöрöдз, Миковлö тэ дынöдз и дело абу. Вот узян сэтчин мöс картаас, вöлись пондан тöдны Ошпиньсö...

Серöм пыр зоночка сьöвзис пиннес коласöт, шубöвтiс бöра пасёксö, пуксис кер вылö. А бригадир котрасис сай берегас, горöтлiс. Эта коста сiя вылына лэбтывлiс изводалöм коксö, легöтiс воздухас, дзик пыркöтiс сапогсис кöдзыт ва.

― Э-э-э-й!

Котöртiс избушка дынö Макар дед, уськöтчис внучекыс вылö:

― Тэ мый, онмöссин я мый я?

Внучекыс пильснитiс паныт, висьталiс, мыля оз вуджöт бригадирсö. Макар дед кутiс кынöмсö, давай ваксьыны-серавны:

― Во! Молодец, покась! Хо-хо-хо! Ох, чомору! Но и юр тэнат, Миков! Генеральскöй.

Курни-верни локтiс бригадирлöн иньыс, барöтiс синнэсö: ылöстöмсялiсö я мый я дед и внучек? Мыля ваксьöны, а Егорушкосö оз вуджöтö?

― Тi мый?

― А нем.

― Эд баняö важын ни ештiс. Мыля од вуджöтö?

― Сылö сэтчин баняыс бур.

Но бригадирлö вöлi, тыдалö, не öддьöн бур. Сiя сё рявзiс и рявзiс, корис берег дорö Ошпиньöс.

Локтiс избушка дынö Кляч Опонь, сыбöрын сибöтчис Дерева Прокоп. Кылöма шумсö да котöртiс татчö Бордтöм Рака Пиля. Уна йöзыс öксис избушкаыс дынö. А бригадир сё котрасис сэтчин, сай берегас, öвтiс киэзöн, видчис маттисьöмöн, грöзитчис лöсьöтны öтi-мöдiлö страшнöй суд. И только сэк, кöр пемдiс да пондiс зэрны, дед Макар сетiс Миковлö команда:

― Вуджöт, сотанаöс. А то эшö кынмас, покась.

И сэк жö, кöр пыж люкасис нырнас таланись берегö, бригадир, кокнас легöтiкö, уськöтчис Миков вылö:

― Серавны решитiн, зырымöсь бедь? А этö эн адззыв? ― мыччалiс пудовöй кулак. ― Вот сейчас!

― Öвсьы, бöбöв, ― горöтчис Сьöктан Егорлö иньыс. ― Ачыт виноват!

― Ме?

― Конечно, тэ! Ванзан, кыдз лешак, и сё арттöмö: «Ошпинь Миков, Ошпинь Миков!» А зоночкаыслöн аслас добрöй ним эм.

― Кытшöм эшö ним?

Дзарнитiс Миков бригадирыслö синнэзас, шуис чорыта:

― Просто Миков!

Бригадир дыр нем эз вежöрт, а кöр сёжö вежöртiс, перво кунис мыйлöкö синнэсö, сэсся уськöтiс юрсö морос вылö, а вöлись шушкыштiс гусьöн:

― Каналья. Петас жö...

Дыр сiя сулалiс юрсö öшöтöмöн, нельки кокнас эз легöт. Быдöн вежöртiс: маитö мортсö вöвлытöм стыд, сэтшöм стыд, кытшöм вермас маитны только сiйö, кин луншöр кадö мунас базарö и вöлись сэтчин казялас, что петöма öтöрас вешьянтöг. Но вот зэгнитiс бригадир юрсö, вöрзьöтiс пельпоннэзöн, пуктiс кисö Миков пельпон вылö:

― Молодец, зоночка! Кувтöдз ог вунöт этö лунсö. Велöтiн тэ менö. Молодец. Мортлöн эм аслас ним и колö шуны сiйö только ним сьöртi...

― А менö мыля нö Варыш Катяöн шуöны? ― вдруг öддьöн дивуйтчöмöн юалiс Катяыс.

― А менö мыля том и пöрись Кляч Опоньöн шуö?..

― А кытшöм ме тiянлö Бордтöм рака Пиля?!

― А ме разь Дерева кока?!

Лэбис сэтöн сэтшöм шум, что нельки сьöдракаэз шур-шар мезмисö асланыс поззэз бердiсь, койыштiсö небоас и ножö карзыны. Кар! Кар! А избушка дынын Кляч Опонь öвтiс киэзöн и горöтлiс йöзыслö:

― Кин менö эшö кöть öтчид шуас Кляч Опоньöн, ме сылiсь юрсö клячöн учöтик тороккез вылö поткöтла! Вот!

― Кин менö эшö кöть öтчид шуас Варыш Катяöн, ме сылiсь синнэсö шедтала!

― А ме сэтшöм мортсö бордтöм ракаö пöрта!

― Ме сэтшöм мортiсь дерева кера!

Бригадирлöн иньыс кывзiс-кывзiс да и юалiс жöникыслiсь:

― А тэ мый керан, кöр тэнö шуасö Сьöктанöн?

― Тэ дынö норасьны локта, ― важнöя шуис Егор. ― Да эшö сэтшöм мортсö штрафуйта. Вит руб ― и басни абу!

Неважын кывсис, бытьтö Кушлипакын примитöмась решеннё: некöр и некытöн не нимкодясьны, шуны öтамöдöс только ним и айним сьöртi. А кин пондас нимкодясьны, сiйö вайöтны Миков одзö. Мый висьталас Миковыс, сiйö и керасö нимкодясисьыскöт. Нельки вермасö чапкыны ваö и бöр не судзöтны. А мый?

Дата добавления: 2015-11-16