МАД ÆМÆ ХЪÆБУЛЫ НЫХАС

Афганистаны хæстонты ном арынæн

— Уæ, цы мын фæдæ, о мæ худгæ хур,

Дард бæсты? —

Русты туг нал ис, зæрдæйы ныссур

Карз цæссыг.

Ау, нæ дунейыл нæу хæсты заман,

Сау бонтæ! —

Уæд кæмæ райстай ды дæ сау хъама

Рагбонтау?

Æз куы уызтон дæу, о мæ уды цин,

Авдæны,

Уæд дæумæ, хъæбул, кæд ызнаджы хин

Хъавыди?

— Ма кæ, о Гыцци, ды мæ ацыдыл

Хъарджытæ,

Тых кæмæ вæййы, уый æдылыйæ

Барджын у.

Дард Афганы зæхх, ныр мæнæн кæны

Арфæтæ, —

Уым мæ дугъоны судзгæ рог нæмыг

Баййæфта...

Æмæ ахаста мæн йæ сау къæсмæ

Сау сыджыт...

О, бæргæ мын нæу, о, дæ хъæбысæй

Адджындæр!..

***

Æз нæ зонын,
Адзал мын кæд кæндзæни

Сусæг тæрхон...—

Фæлæ иугæр мæлын,

Уæд — лæугæйæ... Æмæ ма

Хъуамæ арауа уый бæрц мæ тых,

Хъуамæ, артау, ныффæйлауа

Риуы

Мæ рагбонты ныфс,

Цæмæй иу уысммæ айрох уой

Царды хъуырдухæнтæ,

Хивæнд мæлæт,

Æмæ айнæджы тигъыл ныффыссон:

— Хорзæй баззайут, Адæм!

Æз уæ рæвдыд нæ базыдтон никуы, —

Иунæг иутæй нæ зæгъын, —

Фæлæ зонут:

Æз мæ уды фæлладæй уæ хорзмæ,

Уæ цинмæ бæллыдтæн,

Сымах та мын, зинтау,

Мæ размæ цæлхдуртæ

Æвæрдтат!..

Дата добавления: 2015-09-05