Хæрзбон у, денджыз!

Гæдыйау, уылæн уылæнимæ хъазы,

Кæрæдзи фæстæ атулынц фæлмæн.

Хæрзбон у, денджыз! Хъызты дæ кæй уарзын,

Зæрдылдаринаг уымæн дæ мæнæн.

Фæнды мæ: ныр къуыззитгæнгæйæ дымгæ

Куы рабалц кæнид сау мигъты, æмæ

Нæ алфамблай æрвæрдыны сырх зынгæй

Куы ныррухс уаид дун-дуне уысммæ.

Куы расхоиккой уылæнты рæдзæгъдтæ,

Кæрæдзи хойгæ, иу цæдау — æмхæст,

Æмæ куы ризид айнæг хох бындзарæй,

Йæ гом фæрстыл куыд фæцæуа дæ дзæхст.

Нызгъалис уæд дæ урс-урсид фынчытæ

Цъæх арвы риуыл. Фехъуысы ма: охх! —

Цыма лæгау æрымысыс дæ зынтæ,

Æрæмбарыс, кæй у æнусон тох!..

Хæрзбон у, денджыз!

МÆ ЗÆРОНД ФЫДЫ МЫСГÆЙÆ

...Он не был плохим,

просто был слшиком бедным,

потому нехорошим...

Жоржи Амаду

Фæзæгъынц адæм, зарын, дам, нæ зыдтай, —

Хæхбæсты-иу дæ ивар кодтой фынгыл,

Ыстæй-ма ноджы мадзура кæй уыдтæ,

Дæ фарсмæ уымæн ничи лæууыд уынгыл.

— Дзæбæх лæг куы у! — бафæрæзта чидæр, —

Ныххудтысты-иу ныхасы зæрæдтæ.

Сылгоймаг уа, сывæллон, комы иудæр

Дæ тызмæг дзырд нæ бадардта йæ зæрдыл.

Уæззау къахдзæфтæй лæдзæджы æнцæйтты

Фæцæйцæуыс дæ уисæйбыд хæдзармæ,

Уæд-иу дæ хъустыл уад: дæ гом сабитæ къæйтыл

Ныццæлхъ кодтой æххормаг лæджы зарæг.

Тæнæг сасирау, уалдзæджы къæсæрыл

Сæ удтæй хъары рухс... Æмæ дæ роны

Æмбæхст хуычъытæ, саджы къах, пысыра

Кæм не сты фаг минасæн æхсæв-бонмæ.

Æрбадтысты хæлынбыттыртау д’ алварс,

Кæй дзы цы фæуа, ууыл у сæ хъуыды.

Дæ бинойнаджы сау дзыккутыл — халас,

Дыууæ нæ зæгъы никæд бон дæ дзырдыл...

Кæм нæй уæд амонд хохагæн йæ къæсы! —

Фæлæ дæ уды нал райхъал и зарæг...

Дæ ингæныл та, — афтæ мæм фæкæсы, —

Куы нæры арв, — сызгъæрин къæвда уары.

Дата добавления: 2015-09-05