Хохаг куыдз денджызы был

Хъæддаг куыдз, дзæбидырау алвæста гуыр,

Сæвджынтæ, бæзхъуын æмæ уыгард хæцъæфтæ.

Йæ фезмæлд — цæхæрау. Тызмæг у йæ хуыз, —

Цæмæйдæр нæ райы йæ зæрдæ.

Хъуымыздзых къæбысæй уый чидæр — хæддзу —

Æрхаста йæ къæсмæ фыр буцæн,

Куы рахъомыл, гъе уæд дзы сфæлмæцыд:

— Цу,

Цæр курæггаг муртæй дæхицæн!..

Бæргæ ма фæцæуид, — нæ зоны кæдæм?

Ам й’ алварс цъæх быдыртæ, денджыз...

Йæ сæрыстыр, йе ’гъдау нæ сафы уæддæр:

Æппæрст дзулы хаймæ нæ фесты.

Фыдфыны хуызæн куыйты, сабитау, ам

Фæхæссынц сæ къухæлгътыл адæм.

Фæкæнынц сын пъатæ, уæд уый та йæ царм

Ныууигъы, ныууынæргъы уадау.

Туристты хæрæндон хæринагæй — дзаг,

Лæг кæд дæ, æрæхгæн ыл ричъи!..

Уæзбынæй фæхæры фысымау йæ фаг,

Куыдзау æй нæ ратæры ничи.

Фæлæ та куы сысты йæ алфамблай тар, —

Цæст хионау нал хæцы иуыл,

Уæд мысы йæ мады дæлвæдджиты хъарм,

Æгомыг Хуыцауыл фæниуы...

Дата добавления: 2015-09-05