Ацæргæ поэты ныхас

Сæнайы хохыл та сæумæйæ

Æрбабон,

Фæлмигъ хъæды гакк-гукк йæ хъæлæба

Систа.

Мæ фæллад цæмæй у, уый нал хатын

Абон:

Цы ис, ууыл — разы сты ивгъуыды

Ристæ...

Цырагъау ыссудзы, куыд мæ фæнды,

Афтæ

Мæ боны рухс...— Райгонд цæмæй нæ уа

Зæрдæ!..

Мæ сагъæс — æвæгæс дзæнгæрæгау

Рафтыд,

Нæ йæ уадзы хъуыды хуыснæгау

Йæ кæртмæ.

Нæ дун-дуне — армыл æвæрдау —

Мæ разы,

Йæ хорз уа, йæ сæфтæй. Цы нæ вæййы

Царды:

Къух ауыгътон раджы мæ хиуарзон

Хъазтыл, —

Нæ кæнын æрратæ

Хæрзамондыл,

Кадыл...

Цæуыл ма фæтыхсын!.. Сатанайау, —

Дзагарм

Мæ уарзон бинойнаг... Дæн райгонд

Мæ цотæй.

Ау, уый та куыд у: æз мæ фæззæгæн —

Цагъар?! —

Мæ дзуринаг фесты мæ рацæргæ

Бонтæ!..

Йе ногæй æрцарди кæфхъуындар

Мæ къæсы:

Нæй дон, æмæ зивæг сах абадти

Хъулау...

Зындоны тæссæй мæм тæссагдæр

Фæкæсы,

Куы мæ кæнынц ахуыр, цы нæ уарзын,

Ууыл.

Гъей, Нарты дзырды фарн, фыддымгæмæ

Тулдзау

Дæ уæззау къæс-къæсæй мæ зæрдæ

Нырризы...

Цæй, ахæм тых ратт, æмæ ма цæуæм

уддзау, —

Уадз зарæг нæ Ирыл

Нæртон лæппу

Сиса!

Дата добавления: 2015-09-05