МА ТÆРС.

Куыд сабыр у дуне... Фæсивылдæй денджыз

Ныллæгъз и йæ кæхцы, раст хъазæн фæзау.

Цæлхдурау мæ разы ныллæууыди хъенæй

Фыд-зивæг, нæ фенкъуысы фурды мæ нау.

Æлгъыстаджы кар: нæ зæронд, нæ æвзонг дæн, —

Кæй уæрдоны бадай, гъе уый зарæг кæ,

Мæн та кæд, мæ боныл, нæ хъару, нæ зондæй

Нæ рæвдз кæны иу дæр: цæргæ йе — мæлгæ!

Нæ, хъæлдзæгдæн абон... Уæрæх гом — мæ рудзынг,

Хæдтæхæджы уæзæй тымбыл арв нæры;

Сыкъаджын сæтæлæг та ивазы хъузгæй йæ бур сæр,

Бæрзæйхæлд уæныджы сæрау.

Æз зонын: ныффæйлауы иуафон денджыз,

Кæркæ-мæркæ урс барц йæ разæй хæссы,

Кæм нæ йæ æрфæнды йæ рухс фидæн фенын, —

Кæмдæр ма йæм чидæр æнхъæлмæ кæсы.

Æууæндын: нæ тыхсы йæ амонды фендыл

Хъæбатыр, рæдау лæг — йæ уæлхъус лæууы...

Æмæ ма кæд уый æдде ноджы поэт дæ, —

Дæ фæндаггаг, мæ хур, дæ разæй цæуы.

Дата добавления: 2015-09-05