РУХС ИЗÆР

Мæнг аууæттæ. Ыстулы рагъыл мæй,

Зына-нæзына тары пæлæз сисы.

Мæ Иры къæс уæд сабыр у, фæлмæн,

Ысулæфы йæ бонгуысты фæдисæй.

Хæрзæфснайд кæрты хъуг цæгъды сынæр.

Дыууæ тынау мæ хойы æрмттæй æхсыр

Сæх-сæх кæны. Йæ урс-урсид уынæр

Цыргъ цæвæджы сыгъдæг зæллангау хъуысы.

У циндзаст хъæу. Нæма кæны фынæй.

Кæл-кæлæй худын... Сусу-бусу... Зарæг.

Цыма зæххыл нæ уыди æмæ нæй

Фыдæх, фыдбон... Æддейау у сæ арæн;

Къæссавæлдæхтау сау рын æмæ хин

Сæ тæригъæдтæ баныгæдтой рагæй,

Æмæ лæгмар нæ кæны буц йæхи,

Тызмæг сырдау æхæлд атомы маргæй.

Мæ райгуырæн! Куыд чъызгæ у дæ цин! —

Фыдæй-фыртмæ хæстарыд у дæ зæрдæ...

Дæ нос-иу ног хъæдгомы бын фæци —

Æмæ зыны сæ дæсæй иу æрмæстдæр.

Æз та? Мæнмæ цы нæ хæрзамонд каст! —

Сæрыстыр дæн дæ хъæдгæмттæй дæ фыртау:

Мæ сабийæ сты гом зæвæтæй барст,

Лæджы кары — æлгъыстаджы фыдфынтæй.

Æмæ кæны мæн иу хъуыдымæ дуг, —

Уый хъуамæ зона афоныл ызнаг дæр:

Куы фемæхса зæронд хъæдгомæй туг,

Уæд у цыфæнды хотыхæй тæссагдæр!

Дата добавления: 2015-09-05