ИЗÆР

Хъæды сæр бандзыг мæй,

Сыфтæр кæны сыр-сыр...

Цъиуызмæлæг дæр нæй,

Бæстæ — æнкъард, æмыр.

Къохы сым-сым кæны

Тулдзы мæрайы уыг.

Хъолойы сыфтыл кæлы

Уæлдæфы сой-цæссыг.

Сагъуыд ыл цыма хин, —

Малы та хæфс хъæрзы...

Нæууыл æруадз дæхи

Æмæ дын ма уа зын.

УАРЫНЫ РАЗМÆ

Хæхты урс къуымбил æлвыны

Дымгæ сау-сауид хæсгардæй.

Къæйтыл урс цæхæр фæзыны

Æмæ арв ныннæры дардæй.

Арт ныууынæргъы мæ разы,

Сдæры тары кæрц æвзагæй.

Къæвда рог æртæхтæй хъазы, —

Уый мæн фæлвары тæрсагæй.

Æз хуыссын мæ сау нымæтыл.

Фыстæ, урс дуртау, — мæ алыварс.

Цард тæфсы мæ цин, мæ мæтыл,

Удрæбын æвæры халас.

Æз ыстыр дунейæ ардæм

Ног мæ рох фæдтыл ыздæхын:

Кæд мæ уд æрцæрид адæн,

Зæрдæ бахизин фыдæхæй.

Фос — тымбыл, физонæг — зынгыл

Бидоны бæгæны сысы...

А изæр нæ хорз, нæ зынтæ

Тугтæригъæд уаид мысын.

Дата добавления: 2015-09-05