НЫСТУАН МÆ ФЫДÆЛТÆМ

Мæ дард фыдæл æмдзæвгæтæ нæ фыста, —

Ивылд донау, ызнæт уыди йæ цард.

Дæрзæг æнгуылдзтæм, сонт сабитау, хъуыстой

Хæрхидон æмæ кард.

Хъысмæт нæ кæны тулгæ дурæн хатыр:

Уысмыл баст у йæ сонт хъару, йæ ис.

Дымгæйау, цырд, æвæллайгæ, хъæбатыр, —

Кæм æй æндæвта сис!..

Цæрдхъом зæрдæ йæ амондыл нæ хъæцы, —

Нывзилы йæ сæрсæфæнмæ йæ дуг.

Нæ дардта уый æмпъузæнтæ йæ кæрцыл, —

Йæ хъæдгæмттыл иу бацахсти йæ туг.

Æмæ фæцыд. Ныууагъта мын йæ фæстæ

Цыргъ хъама æмæ тугисæджы ном.

Æрмæст сæ нæу, мæрдтыбæсты фæдзæхстау,

Хæссын мæ бон!..

Хатыр, фыдæл! Дæ фæндиаг нæ разынд

Дæ сонт бындар. Цы гæнæн ис, хъæц ыл!

Дæ карддын ивын, амонды фæрæзау,

Фæлмæн уд æмæ гутоны къæдзыл!

НЫХАС ПОЭЗИИМÆ

Дæуыл ма ’ууæндыдтæн, Поэзи!

Лæгау дын хъулон хъæбул нæй,

Æмæ нæ зæрдæты цы хорз и,

Уыди уый ратæдзгæ дæуæй.

Хуыцаумæ кувæгау, дæ разы

Лæууы поэт æмæ лæууыд...

Цъæх цады рог уылæн куыд хъаза,

Дæ къæс нын афтæ æнцой уыд.

Æртхуроны æхцайау, кастис

Мæнмæ дæ сонт мырты хъæрзын, —

Цыма мæ райгуырдæй уæлахиз

Мæныл нæ фæци никуы зын.

Ныр та?.. Дыдзы хуры тыныл

Æрттивынц рагсагъæс, мæ сæнттæ.

Фæсивылд денджызы былыл,

Кæфау, тæпп-тæпп кæны мæ зæрдæ.

Ныр та зæххы къорийыл рыг

Куы сыстад атом æмæ маргæй,

Вьетнаймаг сидзæрты цæссыг

Кæлы сæ судзгæ мæрдтыл уаргæ...

Ныр та?.. Хæрамæй зæхх — æмвæз,

Цыма лæгуарзонæууæнк батад,

Цыма рæстдзинады хъæлæс

Тæргай зæххы къорийæ атахт...

Цы ныфс ма бавæрон дæуæй —

Зæрдæйы норст зынджы тæлфынæй?..

Æви дзырды бардуаг — уæууæй! —

Йæ рæсугъд галуаны æрфынæй?..

О, нæ! Дæ уды скондмæ фау

Нæй, нæй! Дæу фемысын мæ фынты,

Æз дæу нывзилдзынæн, кæфау,

Нæ дуджы сонтивылд æрфытæм!..

Дата добавления: 2015-09-05