МÆ ИРЫ КЪÆС

Нæ вæййы йæ номæй цымыдисаг лæг, —

Йæ фарн ис йæ авдæны хъармы.

Æз райгуырдтæн хохы. Нæ хæдзар — ныллæг,

Лæууыди цъæх æврæгъты армыл.

Сычъийы æхситт дзы куы фæцæуы сæрд, —

Ныззæй кæнынц арф кæмттæм дуртæ.

Куы фæлгæсай рындзæй, кæсдзæни дæм уæд —

Дунетæй æввахсдæр дæ хурмæ.

Уым, саджы цæстытау, æнæбын у арв.

Уым хæхтæ, æрсытау, — уæлгоммæ.

Æхсæрдзæн та рындзыл фæуадзы йæ хæрв,

Йæхæдæг ныййарц вæййы коммæ.

Бæзджын хъæр ныккæны гуыбырфындз цæргæс, —

Йæ аууон — хæрæмигъæй тардæр!..

Йæ фыдызæхх райдайы хохаг лæгæн

Байраджы пырх барц æмæ кардæй.

Æз райгуырдтæн хохы, йæ удæй-иу арт

Кæм цагъта мæ фыдæл мæгуырæй:

Йæ къæбæр цæххимæ, йæ суг та — сæнар,

Сæгъдзармæй фыдæмпъызт — йæ куырæт.

Зымæг-иу нæ кæмттæ, нæ рæгътæ — æмвæз

Рыг митæй... Уад ниудта кæуæгау.

Уæд уымæн та къуымы йæ арынджы лæгъз

Уыд афтид ыссады къæрмæгæй.

Уæддæр-иу нæ кодта йæ тухитæй хъаст:

Дæ тъæнджы мæй рагуалдзæг ма мыс!

Йæ удæй зынаргъдæр æм а зæххыл каст

Сæрибары дуг æмæ намыс.

Æууæнчы гæххæтт дзы нæ агуырдта лæг:

Йæ рихийы иу æрду — йе ’ууæнк.

Йæ цины рад ралæууы уымæн æцæг,

Нæртон лæг куы ыссары, гъе уæд.

Мæнæн та мæ хорз уа, мæ цауды фæдтæ

Æвдисы нæ рухс хæхты айдæн.

У дуне мæ райгуырæн, фæлæ уæддæр

Мæ Иры къæсæр у мæ райдиан!

Дата добавления: 2015-09-05