Изæрмилтæ. Æрривæд кодтой галтæ,
Чи у фынæйырдæм, чи та цæгъды сынæр...
Ныссабыр рæздарæн... Чысыл фыййауы артæн
Ысцырын цадæггай йæ зынджыты уынæр.
Уый бадти нымæтыл, ысхъаудта уисæй цæхæр.
Йæ фарсмæ афтид къус, сæгъы цармæй — хызын.
Æмæ йæ уадултыл, раст дидинæджы ’ртæхау,
Сывæллоны цæссыг æнаххосæй хъуызыд.
Ыстыр дуне уыд гом, æнæцар къæсау... Сабыр...
Бæрзонд къæдзæхтæй дон куырм адгуытæм лæдæрст.
Зæрæхсиды тынтæм тылдта йæ къухтæ хъамыл,
Æмæ зæронд тулдзæй æрттывта уыджы цæст.
Кæмдæр та хъæугæрон тымбыл мусы нæудзармыл
Ыскодтой сабитæ картофы хъæдтæй арт.
Къæбæдаахуыр чызг, бæстон æфснайд хæдзары
Нывæфтыд чингуытыл, тæргайгæнæгау, бадт.
Тындзыдта уымæ та æхсæвæрхæссæг рагæй:
Цыхт, йе, хъæдурдзæхдон хæццæ кæндзæн йæ фыд.
Æмæ йын къобор гал дæрзæг, хырыз æвзагæй
Ысдæрдта, фасæгау, йæ даргъ дзыккуты быд.
Дата добавления: 2015-09-05; просмотров: 42 | Нарушение авторских прав
| <== предыдущая страница | | | следующая страница ==> |
| УÆТÆРЫ | | | АФТИД ИНГÆНЫ РАЗ |