БАЛЛАДÆ НАРТЫ УАЦАМОНГÆЙЫЛ

I

Уый кады фыдæлтæй фæхаста йæ фарн

Нæ Ирмæ, нæ абоны цардмæ.

Фæзынди-иу фынгыл — уæд арвы цæфау

Мæнг ныхасæй тарстысты Нартæ.

Фæлитой нæ базыдта уый ронджы гъæд, —

Ныссабыр-иу карз фынгыл дзыллæ...

Куы-иу дзырдта раст лæг, йæ былтæм ын уæд

Рæсугъд чызгау ивæзта былтæ.

Ныр мæнæ ныххус и фæндыры къæдзау,

Йæ хъуыры фыцгæ ронг ысмал и.

Быдзæуы ныхæстæм мах нал хæссæм фау,

Æмæ дзы ысхуыпгæнæг нал и.

Фæтчыгъæдæн ма йæ нæ фынджы кæрон

Тæрсæгау æрæвæры кæстæр, —

Нæу хистæры тасæй ысдзурын йæ бон —

Уæд фарны кæхц аззайы фæсвæд.

Æмæ уæд ныккæрзы дæлфадæй æцæг:

Кæм нæ уыди нартæм мæнгдзурæг,

Фæлæ-иу йæ ницыйыл басасти лæг, —

Бынат ма-иу ссардта сæ цуры.

Æргом дзырд куы кæна — фыдгулæн дæр аргъ,

Мæлæты фæндаг æм нæ кæсы.

Йæ бæхыл-иу ногæй уый бавæрдта саргъ,

Фæцыд-иу æвыдæй йæ къæсмæ.

Цы фæдæ, мæ хъæбулты рæзгæ фæдон! —

Кæд нал у фыдбон уа, фыддуджы

Рæстаг уды фарсмæ æрлæууын дæ бон,

Фæцæр уæд æлгъыстау дæ хъузджы.

Фыдвæды бæсты-иу æвæд истой Нарт,

Сæ цин уыд æхсаргарды азæлд...

Æгадæй кæд афтæ æхсызгон у цард,

Мæрдты уæд

Зындонмæ дæр

мабæлл!..

Гъей, дзагдар, бæстонæй цæуыл уыди дзырд? —

Кæд Иры хæрзæбон, нæ къæсыл,

Кæнæ та рæдауыл, — мæнмæ хауы куывд,

Æри-ма дæ кæхц, æз нæ тæрсын!..

Дата добавления: 2015-09-05