НЫЙЙАЗÆЛД

Уый нал у уарзт. Æрхъуызы мит йæ фазыл,

Бæрзонд хæхтæй рæупакъуытæ хæссы.

Дæ хæдзар — хъарм... Мæ зæрдæйы та — уазал, —

Тыхурæд монц зæйбадæнæй кæсы.

Куыд сабыр у... Куыд иугæндзон у рæстæг...

Æвыд — æдых, мæ сæрибарæй — хызт,

Цæрæнбонты дæумæ æнхъæлмæ кастæн,

Куы нал мæ хъæуыс, уæд ысног мæ рыст.

Зын у мæнæн мæ зæгъинæгты раз дæр! —

Нæ дуне — карз, нæ раст тæрхон — сæудзыд...

Æниу, дæуæн цы уæлдай у, мæ уарзтæй

Ыскæндзынæ, кæй уарзтай, уымæн цыт.

Æмæ зæххыл цы уыди, уый уыдзæни:

Рæдау — ызнæт, тыхагуртæ — сæрæн.

Кæс-ма, мæлæт — мæ иударон фæсдзæуин —

Куы ’рбазына,

Уæд-иу

Æрымыс мæн!..

ЧЫСЫЛ НЫВ

Хур. Гом рудзынг. Сонт чызг йæ фырты цæрдæг

Къухтыл ныззилы. Йæ кæл-кæл, æрвнæрæгау, хъуысы.

Зæрæдты хæдзарæй та рацæуы урсбоцъо лæг,

Йæ бирæ хъæбулты сæргуыбырæй мысы.

Дата добавления: 2015-09-05