МЕ ’РТÆ МАГУСА ХÆЛАРЫ

Лæгау-лæгæн сæ бацамонын — тас.

Сæ фыццаг у: дæ уайдзæфæй нæ цуды,

Тæнзæрдæ, барон. Стæй кæны ныхас,

Уæд хъус æмæ гуыбыныл хæцгæ худай.

У дыккаг хин. Фырдиссаг у йæ конд:

Хæссы йæ лæмæгъ, бонзонгæйæ, уартау:

— Цы мæм хæцут, куы ницы у мæ бон,

Чысыл мæ къухтæ атавон уæ артмæ.

У æртыккаг бынтон диссаг: уый зоны,

Кæй ницы у, уæддæр нæ сæтты — дур.

Ныр цу æмæ сын карз ныхæстæ дзур, —

Зылынджынау æрлæуу сæ разы зоныг.

ФÆНДИÆГТÆ

Цыбыр цард никæмæн уыдис...

Лæгау-лæг цурон ми нæ зыдта,

Æвзæр-иу хъама дæр ныззылдта,

Фæлæ сыл ничи кодта дис.

Хъæрмуд цард никæмæн уыдис...

Лæгау-лæг ыл фæдис нæ кодта,

Æвзæрæн — къухыл нымад бонтæ,

Фæлæ сыл ничи кодта дис.

Фæндонхорз никæмæн уыдис,

Лæгау-лæг, мидбылхудгæ, бастау,

Æвзæры рог хъуыдытæ барста,

Фæлæ сыл ничи кодта дис.

Æнцой цард никæмæн уыдис...

Лæгау-лæг — уаз, æвзæр та, сонтау,

Къæбæрыл былыцъæрттæ хордта,

Фæлæ сыл ничи кодта дис.

Цы кар-иу сæ æркодта зондмæ, —

Хъуынæй дзы нал атондзæ хъис, —

Æвдисæн дугтæ æмæ бонтæ,

Сæ тæрхон сау ингæн ыссис...

Дата добавления: 2015-09-05