Мæ нысаны бæрзонд стъалы

Отар Чиладзейæ

Хæрзбон. Æз басастæн, хæрын уын ард!

Ныфсæй — æххæст, фæсмонæй та — дыгъуырццæг.

Хуыцауы аххос нæу. Уыди уый цард,

Йæ рог сæнттæ-иу чи скодта мæ фыццаг.

Фæлæ цы уыди, уый уыди... Уæнгрог

Мæ къух зылдта æнæтæбын æлхуый.

Мæ цард та цыд. У гæххæттæй дæр рох,

Йæ хинтæй мæ цы рæстæг давта, уый.

Мæ загътатæ сты ницæйаг, лæмæгъ,

Кæд-иу мæ рис æргом загътон, гъе, уæддæр

Мæ нысаны бæрзонд стъалы фæцъæх,

Уæд æм, куыдзау, фæтоны дзырд йæ бæттæн.

ПОЭТЫ МАДЫ КЪУХТÆ

Арын дзы сомихаг поэт

П. Севакъы мады ном

Лыстæг æнгуыддзтæ. Се стджытæ зынынц,

Сæ тугдадзинтæ — цъæх. Фæзæгъынц: рухс сæ хъары.

Сæ армыдзыхъ — æнцъылдтытæ, хырыз,

Хуымы ауæдзау, хус тæлмытæ дары.

Кæддæр-иу сæ тымбыл уырзтæй уæндон

Бæсты рæсугъд йæ даргъ дзыкку æрфаста;

Æвзонг мад сыл — йæ уды рухс, йæ бон, —

Цы уаз хъæбул, цы саг лæджы фæхаста!..

Фыдбон, зынтæ йæ цæрайæ цы сты...

Фыры хъулау-иу фесхъиудта сæ уæлæ.

Ныр къухтæ сты æрттæдæларм рыстæй:

Йæ райгуырдау ын мад уыны йæ мæлæт.

Æз сын фæлмæнæй пъа кæнын, фыртау,

Тыхурæд богъ-богъ мæн нæ уадзы цухæй...

Уæззау цæгъды, зæрдæрисгæ мыртау,

Тæпп-тæпп кæнынц поэты мады къухтæ.

МÆЛÆТМÆ

Бестауты Гиуæргийæн

Гъеныр нал дæн поэт...

Цард мыл разылди зондæй.

Фаг у ’мбисмæ йæ фенд, —

Сцух мæ цыбыркъух бонтæй.

Гъей, рæстæюар мæлæт,

Ныр дæуыл баст у зæрдæ...

Кæн дæ разæй тæлæт

Рог мæ райстбавæрд фæндтæ.

Сау дымгæмæ ныддар

Ме ’ргом уды бæллицтæ.

Æз кæмæй хордтон ард,

Уыцы Ир мыл фæрисдзæн.

Ныр — æгасæй дæр дæу,

Нал дæн, буцау, мæ фынтæй,

Амонд агургæ нæу,

Рох — мæ цинтæ, мæ зынтæ.

Нæ, дзæгъæлзад мæлæт,

Нæу дæ цагъар мæ зæрдæ.

Кæд дæуæй кæнын зæд,

Уæд æцæгæй æвзæр дæн.

Уадз, мæ Иры къæсыл

Зæрдæ судза, æрттива.

Зон: дæ талынг къæсыл

Нæй Фыдыбæстæн ивæн!..

Дата добавления: 2015-09-05