Ответ, 334.

Духовным сущим сказуемым, духовныя премудрости, а не мирския потребы, ко еже разумети глаголемая, глаголет сие преблаженный Андрей Кесарийский [Апок., глава 16, ст. 9].

Зде убо, по предложению твоего вопроса, не о едином колене Дановом нужда рещи прииде, но и о прочих дванадесяти коленах Израилевых. Понеже ваш разум единственно вратится, во еже всякое священное писание чювственно, разумом писменным разумети, убо и заблуждаете во тме вашего неведения. Божественный же Афанасий Великий не тако, по вашему, священная писания разсуждати повелевает, и глаголет [Иосиф Волоцкий, глава 15. Потребник иноческий, лист 359]: "яко потреба, хотящему разумети божественная писания, истязовати со многим опаством плоды, и лице, и ум глаголющаго. Сего ради глаголет божественный апостол: яко писмо убивает, Дух же живит. понеже много от божественных писаний аще не по писанию разумеется, то плоды истязовати со многим опаством, сокровенная в божественных писаниих, и сего убо Дух живит. не разсуждаяй же сия, но по писмени разумеваяй, и сего убо писмя умерщвляет, и того ради во многия ереси впадают". До зде Афанасий.

Того ради, о вопросителю, ныне бы ти должно, аще желаеши, разумети силу словес в божественных писании. со многим опаством испытовати плоды Духа, сокровенная в божественном писании. А не по писмяни бродити, еже есть плотским мудрованием умерщвлятися. Темже, прежде нежели внити во ограду испытания о дванадесяти коленах Израилевых, запечатленных печатию Бога живаго, и последовательне о колене Дановом, не причтенном со оными, зде убо на празе постояти долженствуем. Ибо иносказательне сосуд избранный, о обращении всех жидов при последних временах ко Господу нашему Исусу Христу, глаголет: "яко (рече) недоумение отчасти Израилеви бысть, дондеже наполнение языком внидет, и тако весь Израиль спасется". К римляном, глава 11, зач. 107.

Сие убо спасение Израилю, новолюбителнии архиереи, Стефан Яворский и прочии, указуют пред самем судном дни, а како сказуют, слыши: "егда (реша) жидове прельстятся антихристову учению и поклонятся ему, тогда Илия и Енох исправят их, и к вере святой и Мессии истинному приведут". Противу коего их мнения (емуже и вы последуете о спасении чювствительном колен Израилевых) сице ответствуем: Самая Истина и предведец Господь наш Исус Христос, в зач. 87-м, иже от Луки, первее помалу, таже и яве поведа печали и беды во дни пришествия антихристова. И о тех печалех и бедах, хотящих быти, во образе вопрошения назнаменова своим учеником тако: "обаче Сын человеческий пришед на облацех, обрящет ли веру на земли". Великий же Златоуст и святый Феофилакт, сицевыми словесы сие вопрошение решает: "во образе вопрошения, редко тогда обретаемых верных. тольма бо удержит тогда сын беззакония, якоже прельстити и избранныя аще мощно. обаче же не много обретаемых, и в просте нрав уподоби: якоже кто есть убо верный раб и мудрый. и зде убо тожде являя, яко мало будет, иже к Богу тогда и человеком веру храняще. тогда и Господь молитися уча, веру помяну, являя сокровенное, яко мало будет молящихся тогда, зане и вера в малых обрящется: пришед бо Господь на облацех, не обрящет веры на земли, токмо не во мнозех". До зде Златоуст и Феофилакт.

Слыши убо зде самого Спаса, и святых церковных учителей глаголющих, яко пришед Господь на облацех, не обрящет веры на земли, разве не во мнозех. Новых же учителей, и ваше разумение показует, яко тогда весь род жидовский, или вси племена их спасутся. Како убо сие согласно покажется учению Христову и святоотеческому? Вы глаголете, при последних временех, при самем сыне погибельнем, спастися всему жидовскому роду, и всем племенам их. Христос же со своими последователи сказуют, не точию спасение в жидох оскудеет, но и во всех языцех. Ибо пришед (рече) Господь на облацех, не обрящет веры на земли, точию не во мнозех.

Яве убо ваше сие разумение показуется плотское и враждующее, по апостолу, на Дух, и защищающее не быти еще пришедша сына погибельнаго: но ожидающее обращения всех жидов к вере Христовой. Духовному же разумению святых отец, сей разум зело сопротивоборствен и сливающь времена и лета обрящется.

Божественный же Златоуст, обличая сливающих времена, и не ведящих и не проницающих глубину разума священных писаний, тако глаголет [Маргарит, лист 176 обор.]: "иже убо (рече) времена не ведяй реченных вещей или збывшихся, како возможет показати любопрящымся пророчества сан". Темже, аще желаеши уведети время, обращение жидов бывшее, или о глаголанном от апостола Павла изследовати, еже есть о сем: "дондеже исполнение языком внидет, тако весь Израиль спасется". Слыши, како пророк согласная сему вопиет: "придет от Сиона избавляя, отвратит нечестие от Иякова". Речеши ли, и сему пророческому словеси збытися во времена антихристова, прельщаешися тако глаголя. Понеже, якоже апостолом реченное, не о антихристовых временах глаголет быти, тако и сие проречение: но о Христовых и апостольских, и о последи бывших. Не от единых жидов о обращенных, но от всех язык во Христа Бога нашего веру извествует. Якоже другий пророк, прорицая о пришествии Христовом в мир, и откуду быти, являет сице: "и ты (рече) Вифлееме земле Июдова, ничим же меньши во владыках Июдовых. из тебе бо изыдет вождь, иже упасет люди своя Израиля".

Святии же учители церковнии, во евангелии на Рожество Христово протолкующе, тако глаголют: "и упасет, рече, люди моя Израиля, а не потомит или пояст. друзии убо цари не пастыри бяху, но волцы и томители, Христос же пастырь есть благ и добр. якоже и сам глаголет: Аз есмь пастырь добрый, и познаваю своих си, и познаваем есмь своими. люди же рече Израиля, и сущих от жидов, веровавших и от язык, Израиль бо сказуется ум зряй Бога. отнуду бо вси зрящии Бога, и верующеи Ему, и свершающеи святыя Его заповеди, израильтяне суть, аще и от язычник суть". До зде от толкования. О сих убо израильтян, си есть всех верующих во Христа, аще от жидов, аще от язык, сосуд избранный написа: "егда же (рече) исполнение языком внидет, сиречь егда Христос явится, тогда весь Израиль спасется". Не едине жидове во Христа верующии, но и язычницы отриновени быша от спасении, тогда спасутся. Израиль бо, якоже святии учители протолковаша, сказуется ум зряй Бога, от всех языков, верующих во Христа.

О сем Израили точно и святый Богослов во Апокалипсисе, во главе 7 пишет, о нем же и ты в вопросе своем означил еси: "видех, рече, четыре ангелы, стоящыя на четырех углех земли, да не дышет ветр на землю, ниже на море, ниже на всяко древо. и видех инаго ангела, восходяща от востока. и возва гласом велиим к четырем ангелом, имже дано вредити землю и море, глаголя: не повредите землю, ниже море, ниже древеса, дондеже запечатлеем рабы Бога нашего на челех их". Андрей же Кесарийский толкуя сице: "Сие же, рече, аще и частне древле бысть, веровавшым Христу, от разорения Иеросалима от римлян избегшым, во многия совершающым тмы по велицем Иякове, являющем блаженному Павлу множество их". И паки той же глаголет: "но во время пришествия антихристова, наипаче же будет печати животворящаго креста, отделяюще от неверных верныя, непосрамленне и дерзостне знамение Христово пред нечестивыми носящыя, прочим пребывающым не помогаемым за свое их нехотение помощи. И слышах, рече, число запечатленных 144 000, запечатленных от всякаго колена сынов Израилевых. от колена июдова, 12 000 запечатленнии. Июда исповедание толкуется. чрез негоже явленнии бывают спасаемии, исповедание еже во Христа из Июды возрастшаго. от колена Рувимова, 12 000 запечатленных. Рувим сын видения сказуется. чрез негоже знаменуются стяжавшии духовное видение, чистоты ради сердечныя. от колена Гадова, 12 000 запечатленных. Гад искушание по Иове. от колена Ассирова, 12 000 запечатленных. Ассир блаженство. имже, жительства ради достойнаго, указуется наследующии Владычнее блаженство. Владычняго стояния одесную Христа сподобляемии, и сыны света и дне нарицаемии. от колена Неффалимля, 12 000 запечатленных. Неффалим молитва, еюже начертаваются прилепляющиися Богу непрестанною молитвою. от колена Манасиина, 12 000 запечатленнии. Манасии забвение, сиречь забывающии задняя, отеческия домы, ради божественнаго речения. от колена Симеоня, 12 000 запечатленнии. Симеон послушание, сиречь оправдаемии послушанием божественных заповедей. от колена Леввина, 12 000 запечатленнии. Леввий прият, имже разумеются приятии от Христа за жительство священнолепное. осмый же Леввий учинися, яко по осмих дний воскресения истинному священству указуему сущу. от колена Исахарова, 12 000 запечатлении. Исахар мзда, сиречь приемлюще от Бога мзду, яко добродетельне жительствующеи. от колена Завулоня, 12 000 запечатленнии. Завулон жилище силы, или благовония, имже разумеются укрепленнии в страсти вселением Христовым, и благоволением Его, якоже глаголет Павел. от колена Иосифова, 12 000 запечатленнии. Иосиф приложение, сиречь приемлющии нужная. яже ко еже жити в части приложения с царством небесным, якоже глаголет Господь. от колена Вениаминова, 12 000 запечатленнии. Вениамин сын болезни, или сын дне, или сын денницы, сиречь исполняющий число сие сердечными болезньми. аще ли же вернии тогда от еврей, избегшии пленения римскаго, или еже и паче вернейше спасаемии при кончине от июдей верою. зане, якоже глаголет апостол, по внитии исполнении язык, весь Израиль спасется. и обое приятно есть. известное убо опаство от коегождо колена, мнится являти умножение апостольскаго семене. дванадесятицею дванадесять умножаемому, навершаеми числе 1000, тако совершенная 1000 свершаемому. ученицы бо быша семене падшаго на землю за человеколюбие, и многоразличными всемирнаго спасения плод возрастившаго. возраст же утвержение приемляху первии Христовы ученицы. наипаче от троих, Духа Свята, иже с небесе на ня сниде, и сердца их верою твердою, и теплою ко Христу раждеженному, и мужество имать велие на брань, со всеми того мира противными даде. второе, умножахуся и возрастаху общею сердечною любовию друг ко другу, по реченному: народом же веровавшым, рече, бе сердце и душа едина. ни един же что от имения своего глаголаше свое быти, но бяху им вся обща. третии же, еже есть и дивна во очию нашею, умножахуся и возрастаху гонением, и мучением, и убиением. елико бо их убиваху и умерщвляху веры ради во Христа, толико умножахуся. и иных убо егда убивают, престают быти: правоверных же егда убиваху, выну и наипаче умножахуся. сице в начале во Иеросалиме, и по вселенней возрастаху христиане". До зде убо о дванадесяти коленах Израилевых, прообразуемых от верующих во Христа, чрез 12 святых апостол учение по вселенней тогда умноженных, их же святый ангел прочим повеле запечатлети печатию Бога вышняго. А не тако, якоже вы мните с новолюбцами, еже при антихристе от жидов обращенных, по числу от колен Израилевых, или жидовских, запечатлети ангелу заповедася. Его же вы, яко еще не видяще, ожидаете, в противность Христовы церкве учителем. В защищение же еще ожидания прихода антихристова, сице убо должно суть и о Данове колене духовне разумете, и от него родитися антихристу. А не писменне непщевати, или паче, по вашему мнению, отлучену быти сему седмому сыну Ияковлю Дану, и от того колену происходящему, или от онаго антихристу родитися. Но сие убо точию уподобительне рече, а не существенне, якоже ниже следуемыя о сем укажут свидетельства. Понеже патриарх Ияков, внегда благословяше своего сына Дана, рек сице: "да будет Дан змий, при пути седя и хапля пяту коню". Бытия, глава 49. Сим изречением не уничижаше Ияков своего сына, ибо не рече: Дан есть змий. Но да будет Дан змий, в будущем времени предъявляет быти разумному Дану и змию лукавому диаволу. За тезоименитое во имени, а не в действиях Дану уподобитися хотящему. Того ради Ияков патриарх, ведая что хощет быти на кончину, под именем чювственнаго Дана разумный Дан и змий диявол, образне над чювственным Даном предрек сице: да будет Дан змий, при пути седя и хапля пяту коню. Которая словеса Ияковля, священный Ипполит восприем, видом вопроса и ответа предложив, рече: "змий кий сей; но иже изначала льстец, прельстивый Адама". В слове Григорий Богослова о нищелюбии, Никита Ираклийский толкует: "да будет Дан змий, при пути седя и хапля пяту коню. се же речеся образне и чювственне. разумный же Дан диявол, коегождо нас пяту, сиречь кончину века стрежет". Соборник, лист 78 на обор. Но яко убо чювственно быти Дану змием на кончину века отнюд неудобно, ибо ниже телесному, паче же душевному естеству человечю в змия претворитися, от Зиждителя всех Бога не повелено есть. Дан бо той, яко человек сый естеством умре, или его потомки скончашася, како убо на кончину века сего, или он, или от его потомков змий ожити может? Никакоже, никако. А понеже от онаго же колена быша некия праотцы, иныя же и по благовещению ангел родишася и богоугодно пожиша, якоже Маной, родивый Самсона. Елиав, вторый по Веселеиле, творец ковчега Господня. Езекииль пророк, судия бе в пленении в Вавилоне колену Данову. И иныя безчисленныя от колена Данова, не полагаются быти во отверженных от прочих колен. Но ниже в самом разделе земли Ханаанския, Моисей не отдели того участия и сие колено. Убо аще и во Апокалипсисе с прочими оное не учинено речеся, но тако речеся не чювствительне, но иносказательне разумом аллегорическим. Якоже и Христос глаголет ко июдеом разумом иносказательным: "змиеве, порождение ехидново". Но како человеку возможно от ехидны родитися по естеству? Никакоже. Но и самая ехидна по естеству не может своих чад раждати. Убо и о Данове колене, и о рождении от него антихриста, не есть чювственное сказание, но символическое. Якоже и о двунадесяти колен Израилевых, запечатленных от ангела, не есть чювственное, но относительное на верующия во Христа от жидов, и от всех языков. Прочее же, яко антихрист чювственно не может от Данова колена родитися, в наступающем ответе да глаголется.

Дата добавления: 2015-07-12