Ответ, 323.

Не мы развращаем народ, еже поучаем от отступных и еретических пастырей отлучитися, или от тех не приимати тайнодейства (сие бо согласно Мелетию обретается): но вы и вам подобнии, народ прельщающе, к новорукоположенным своим и неправилным иереем приводяще, сами себе губите, и последующих вам погубляете. (котории) иереи не точию не имеют православнаго и приятнаго святою церковию священства, но ниже святаго крещения. Яже о новшествах и новодействуемем крещении, такоже и о еретическом крещении и священстве, коликая многая, паче же безчисленная (в 21, 44, 161 и прочих ответех), свидетельства приведохом: такожде и о пребывании по нужде без священства святыя церкве и ея чад, в 9, 10 и 305 и в прочих довольно от святых писаний извествовахом. Но и в самом Катихисисе, от тебе указанном, еже без священства спастися за невозможное извествующем, в той же главе, оставя прочия четыре, сводит точию в три тайны спасение, си есть: в крещение и причащение и покаяние. И извествует сии тайны нужнопотребныя суть всякому во спасение, да спасется: якоже (рече) корабль в преплытие глубины морския. без них же ни един спастися может, разве аще не возможет их употребляти, вожделев их.

Зде убо Катихисис и в три тайны спасение без священства заключает, но и о тех глаголет: аще не возможет (кто по нужде) употребляти вожделев их, может, или без которой из них за невозможное, или и без всех, якоже разбойник на кресте, за неудобное спастися. Темже Катихисис сие глаголет, без священства невозможно спастися, во время имения онаго: во время же скудости, и кроме онаго всяко не невозможно спастися, якоже и в выше указанных ответах засвидетельствовахом. Приводиши ли в помощь себе ис предисловия Большаго Катихисиса. Но сие предисловие ниже в старопечатных Катихисисах, кия выпечатаны были повелением великаго государя Михаила Феодоровича, и благословение святейшаго Филарета патриарха, ниже в старописменных не обретается: убо последовати оному сомнительно есть. Да в нем же, якобы утверждают главнейший с Лаврентием латинником, что Никифора патриарха, и Августина епископа Иппонийскаго несть повеления, еже крестити простолюдину. Но Никифорово правило, еже простолюдину крестити, засвидетельствуют афонстии отцы в 203-м правиле: и Севаст Арменополь, монофилакт и судия Фессалонитский, в книзе 1-й, сечение 4, в титле 2: и в книзе 3, сечение 4, в надписи 2. О Августине же засвидетельствует древлевосточный учитель кир Гавриил, архиепископ Филадельфийский, в книзе о седьми тайнах, во главе 7, такожде и Никифора патриарха тамо во свидетельство приводит. Убо и сих ради тамо в предисловии реченное, еже аще где попа не будет, ниже вернии тут могут быти, не несомнительно обрящется. Но и сие вам помоществовати не будет: понеже и тамо речено бяше о правильно рукоположенном попе, и во время православнаго священства, паче же в самую полноту церковных чинов, и в цветущее благочестие. О ваших же иереев ниже тамо, ниже инде в несомнительном священном писании сообразное изъявится, понеже они приходят к вам от множайших и величайших ересей: понеже имеют на себе священничество, от обливанцов рукоположенное: понеже не от епископов власть в священство приемлют, но от подобных себе иереев, в противность апостольским и отеческим правилом. Убо нигде свидетельства себе обрести не можете. Ибо власть епископскую низводити на нижнюю степень иерейства ниже во языцех обрящеши, разве по седмотысящном лете в явльшихся беззаконных, всего Христова и апостольскаго и отеческаго предания окаянных развратников, люторов. Тии бо высокость власти епископския низведоша в простое простых людей рукоположение.

Дата добавления: 2015-07-12