Ответ, 321.

Кая бы нужда многословити излишная святейшему патриарху Мелетию и афонским отцем, аще бы они к митрополитом и епископом сии послании писали, а не к миряном паче; понеже ово глаголют: яко не убо вы на иже от Бога данныя власти выситеся, ибо учинени бывше владычествовати вами пастырие, волцы суще. Яве яко миряном, а не к владыком, митрополитом и епископом писаша. Ова же о ревности тех пишут: вы бо восприясте пастырскую ревность, и злых пастырей отлучистеся. Яве яко к миряном, а не к митрополитом и епископом, по вам, писаша. А ово пишут: яко без пастырей мощно быти. А ин пишет из них: лучше без владык и попов, от диявола поставленных, до церкви ходити. И не попы нас спасают, или владыки, или митрополиты: но веры таинство нашей православной, и сохранение заповедей Божиих.

И яко сия их послания, повелевающая от злочествивых пастырей, аще и высокия чины имущих, освенятися, согласуют и с прочими вселенскими учители. Убо сия послания паче к миряном написанная быти являются, и их утверждают, еже с злыми и богоотступными архиереи и прочими пастыри не шествовати, и мощное и лучшее житие ко спасению без епископов или попов быти утверждают, нежели со оными богоотступными безконечне в геене мучитися.

Понеже и самая вещей збытия показуют, яко сих белороссийцев нужда крайняя тогда обстояше, егда мнози от сущих христиан, младенцы без крещения, болнии без причащения, а умершии без погребения быша. Якоже творец книги О вере, во главе 23, о бедствиях белороссийских христиан жалостне описует. И паки: таможе сей премудрый списатель о нужде, случившейся в священстве по отступлении пяти владык с митрополитом Рагозою к римскому костелу, сказует, яко того ради вмале не сгорети святыни случися церковной, аще бы на той час не подъити Феофану, патриарху Иеросалимскому, и посвятити митрополита в Киеве, и тако вознести святыню в рустей церкви. Темже и от сих доказательств извествуется, яко более Мелетий патриарх и афонстии отцы писаша подкрепляюще к миряном. А еже сей архипастырь церковный, в тех же десяти посланиях, в шестом писаше к Гедеону, епископу Лвовскому, не шедшему вместе со отступниками к костелу римскому: инем образом писаше. Тамо бо его (сущаго полномощнаго во власти церковней пастыря) не нарицает овцею. Тамо не глаголет ему: яко ты восприял еси пастырьскую ревность. Тамо не утверждает его, яко сущаго пастыря, без пастырей быти: но пишет ему о устроении пастырской должности, и указует, како душу свою, по Христову словеси, за овцы полагати, како чины церковныя сохраняти, како епископу должно по апостолу быти. И прочая пишет ему, яко полной власти и архипастырю церковному. Убо и от сего послания явствуется, яко прочия послании Мелетий паче писаше к миряном, а не к епископом. И мы, по твоему словеси, народ не прельщаем, поучающе от сих посланиев, яко лучше тако быти, нежели к еретичествующим, от еретиков поставленным, епископом и попом приступати, и от них приимати или получити тайнодейства, и теми спастися желати: но якоже по гласу сего святейшаго церковнаго архипастыря, и богоносных афонских отец, тако и прочих вселенских учителей, советуем и поучаем, не еже (аще бы были православнии архиереи, или иереи) без священства спастися, но противу новолюбцев, и вас от новолюбцев приимающих неправославных иереев, яко без оных спастися глаголющих не можно, Мелетиев глас представляюще, мы сице глаголем: "Но несть тако несть, мощно бо быти без них, занеже Бог их из церкве изгнал, и обесчестил, понеже недостойне тыя престолы содержат, и то имя на себе носят". Мелетий, послание 10.

Дата добавления: 2015-07-12