ИУНÆГ ЗÆРОНД ЛÆГ

Фыдтымыгъ исы хæдзарæн йæ цар,

Æхгæд рудзгуытæ сонт ризыныл фесты.

Йæ цырагъ судзы. Уат æфснайд у, хъарм.

У хъазы хъуынæй конд, мæ хур, йæ лыстæн.

Нæ, ницæуыл тыхсы: æппæт дæр фаг, —

Йæ фарсмæ хъомвос рагон цæхх ысдæры.

Ыскъæт ныссабыр. Бур галы æвзаг

Хъæбæр цæххыл, фæндыры цагъдау, зæлы.

Мыййаг, æнхъæлмæ никæмæ кæсы:

Фæлыгъдысты йын хионæй, æрвадæй.

Бынылзадау йæ фыдæлты къæсæр

Уый хъахъхъæны йæ маст æмæ йæ кадæн...

Бæргæ ыссарид зæрæдты хæдзар, —

Йæ карæнтимæ дзурын у æхцондæр, —

Нæ дæтты намыс хохаг лæгæн бар,

Кæм райгуырай, уым у мæлын æнцондæр!

Æниу зæронд йæ азтæй кæны лæг,

Æндæр куы уой дæ ныфс æмæ дæ хъуыды —

Лæппулæг ма кæмæ кæна хæлæг, —

Уæд рухс дунейæ ахицæн кæй фæнды?!

Уадз уара мит, фыдтымыгъты фæстæ

Цæрдхъом вæййы, рæдау æфсинау, уалдзæг.

Нæ зилы цырагъ: ацы рох къæсæр,

Цы нæ вæййы, уæд та ыссардта уазæг!..

Дата добавления: 2015-09-05