Ответ, 374.

Во ответе 370 и 371 изъявихом, како о убиении святых пророк Илии и Еноха разумети быти: и како труп ею оставлен будет на стогнах града великаго: и како в новой благодати, и кия от антихриста избиени будут: и довлело бы тем ответом на сей вопрос отсловствовати. Но яко уже к границам ваших вопросов приближихомся, того ради паки на должное словоотдание возвращаемся. И еже тамо глаголахом от святых толковников, и от прочих прикладов священнаго писания, где будут повержены телеса сих пророков на стогнах града великаго. Понеже ваше мнение на чювственное разумение везде в писании востекает, того ради и зде мало от разсуждения и от просвещающих разум человеческих наук побеседуем. Понеже и в самом Апокалипсисе не глаголет града Иеросалима, но Великаго, во знак положено Иеросалима града. Но сие преименоватися может от инаго во иное, и не есть свойственнаго умствования: ибо знаменающия речи кладутся, да из нея познаем знаменанную вещь тако: яко глаголю предатель, значю сим Июду, понеже несть инаго кроме сего предателя. Глаголю ключаря небеснаго, значю Петра апостола. Или глаголю Богослова, значю Иоанна апостола, и прочая.

А сим, еже рещи града Великаго, не мощно от него разумети Иеросалима, ибо великих градов много бяше и есть. Бяху бо из великих велиции гради: Иеросалим, Рим, Карфаген и Вавилон. Из настоящих же времен гради велиции суть: Царь град, Москва, Каир, Лондон, и прочии великими нарицаются.

Но зде инаго некоего великаго града мнится нам знаменати, ему же равна не быти, якоже и в вышеуказанном 370 ответе извествовахом. Который разумеваем быти мир сей, иже многажды и Вавилоном великим наричется великаго ради собрания в нем нечестивых сынов гнева Божия. В нем же и змий он страшный, древний прелесник, седмь глав у себе имеяй, сиречь седмь смертных грехов, глаголем же: зависть, сребролюбие, блуд, чревоугодие, гордость, гнев, небрежение. И сими главами своевольныя народы пожирает, не телеса, но души. В сем граде великом (по толкованию, яже положихом в том ответе) Илия и Енох убиени будут.

Зри убо, яко и зде тайна запечатленная есть, а не по вашему мнению простая и просте разуметися ключимая. Еже бо и ты не ищеши духовнаго, но все на чювство вратиши. Но грядем, и прочии останки словес о Енохе и Илии сказати, о них же во Апокалипсии прочтохом. Глаголет бо тамо [Апок., глава 11]: "(по убиении пророк Еноха и Илии) и узрят от людей, и от язык, и от колен, и племен, телеса ею не оставят положити во гроба. и живущии на земли возрадуются и возвеселятся о нею, дары пошлют друг ко другу, яко оба сия пророка мучиста живущыя на земли". А в толковании того стиха протолкует, что живущии на земли погребати святую телеса не дадут за озлобление и казни, южа наношаста. Сим являет, что живущии на земли не дадут погребсти святых Божиих: но непогребена оставят за озлобление и казни, их же они наношаста.

Но мнится нам о таковых и пророку Давыду глаголати [псалом 78]: "положиша трупия раб Твоих, брашно птицам небесным, плоти преподобных Твоих зверем земным. пролияша кровь их яко воду окрест Иеросалима, и не бе погребаяи".

Подобне же и апостолу о таковех глаголати [ко евреом, зач. 330]: "инии же избиени беша, не приемше избавления, да лучшее воскресение улучат".

И в малороссийской печати Апокалипсисе, како о убиении пророк живущии на земли возрадуются, толкует [Апокалипсис Кутеинскаго монастыря печатн.]: "яко о убиении верных тогда возрадоватися им".

И аще убо от сих свидетельств явствуется яко верных Божиих рабов о убиении радоватися невернии имут, и телеса сих не предадутся обычному погребению: яве ничто иное сие знаменающее суть, точию яко во антихристово время, убиеннии за Христово исповедание, подобающия почести, якоже и прежнии святыя, получити не имут. И страха ради антихристова, не погребены останутся. Како бо явленно останутся? никакоже по видимому: ибо, и ради всем обычнаго по естеству погребения, не можно есть земли не предатися. Но яко обычным погребением святым не почтутся, но останутся: яко бо зле, а не о правде пострадавшии. Ибо по достоинству (за ради велики злобы антихристовы) кто погребальныя песни воспоет над ними? кто страдания их описав, типографским художеством изобразит, и ко уверению подлинное известие о том церкви сотворити возможет? кто верных соньм к почтению святых онех возбуждати властелински будет? кто полномощную благодать и власть имея, во имя их церкви соорудит? и освятив, священнослужением по обычаю церковному исправлять доволен будет? еже неверствию повсюду обдержащу, и мучительству везде бывающу премногу. Котораго ради мучительства и страха, яко обычному погребению, так и подлинному известию о блаженной кончине пророков не возможно быти. Сице и почтению святых, убиенных во время оно, неудобно есть быти. Убо разумети чювственнаго убиения, или не погребения Еноху и Илие, в невозможных суть. Ключимейше быти свойствует по толкованию, и по иному примеру святых писаний, збытися сим на верных Божиих, и избиенных от антихристовых приятелей. Не погребены же обрящутся, яко не почтены будут честию святым потребнейшею. Понеже колико пострада святых по 1000 лет от рожества Христова, еже во время падения веры в Риме от папежев, еже в Царе граде от мамефян, еже в Малороссии от юнитов, еже в Велицей России от никонопоследующих. Но колико их суть, кроме обычнаго погребения. Колико о сих не имут от церкве подобающаго почтения за богоугодное их страдание. Но и еще нам отнюд о неких неведомо суть, кто и коего сана и возраста тии страдальцы беша: коей страны обретахуся: и како имена их нарицахуся: и колицеми томлениями и муками лютыми, и казньми беша изнуряеми: вся суть сия нам неизвестна суть. Убо в толиком многонародном множестве, и в толь дальном разстоянии, и нам подлинно не известном, негли тогда и о святых онех пророцех со Иоанном таковое по писанию явственное исполнение бяше, еже убиеным быти им от диявольских защитников. Но яко за неудобство времене, и разстояние мест, и за множество пострадавших лиц, церкви о том не известно суть, убо и мы умолчеваем. Но от толковников святаго Апокалипсиса познаваем, яко сообразительно сим пророком, вернии от антихристовых приятелей избиени будут, и яко о сих неверствующии возрадуются, якоже в 370-м ответе засвидетельствовахом. О святем же Иоанне Богослове святая церковь своими учители засвидетельствует: яко умре, и гроб его свидетельствует. Зри о сем Пролог, сентября 26. Благовестник, от Иоанна, зач. 67. Слово похвальное маия 8-го святому Иоанну Богослову от святаго Метафраста. И представление его все месяцесловы, якоже древле западнии, тако и грекороссийстии засвидетельствуют быти, в 26 день месяца сентября. Такожде и святым пророком святая церковь память праздновати уставила есть до скончания века. Святому Илии пророку месяца июля в 20 день, такоже и обще Еноху и Илии в неделю праотец. А еже сим не творится празднества их преставлению, якоже и Богослову Иоанну: обаче и всем ветхаго завета праотцам, аще и умроша, но не творится преставлению их празднества. Сице прияла святая церковь, тако и содержится. И мы, по содержанию святыя апостольския церкве, пророком Божиим Еноху и Илии, и громову сыну, сиречь возлюбленному ученику Христову Иоанну Богослову, подобающее почтение воздаваем. И что нам открыся от святых толковников, сия глаголем, о умолчанных же церковию не испытуем, по реченному: "вышших себе не ищи, и глубочайших тебе не испытуй".

Дата добавления: 2015-07-12