Куимöт глава

КОШМАР

Аслас гортö, Тубызö, Боболь Ваня оськалiс не тэрмасьöмöн, öдва коккесö кыскис, öт киас сiя видзис сьöкыт увья бедь, мöднас чуть да бöра лöсьöтлiс юр вывсис лось кучиковöй малахай, чорыт чуннезöн малалiс шагырасьöм кучиксö. Луныс талун вöлi мича ни, небоын мымда прок чикнялiс шондi, чожа шуралiс туйыс и, веськыта кö шуны, здоровöй да вына мортлö позис бы оськавны и перытжыка. Но Пальникын, расчёт получитöм бöрын, фельдшерлöн добрöй хозяйкаыс гöститöтiс плотникöс кушманöн да быд берсянас сiдз, что Ваняöс пондiс пöдтыны, кынöмсö дундöтiс и öнi туй вылас кок садь нач орис. Пызан сайын пукавтöн сылö охота вöлi эшö мыйкö сёйыштны, а часöт казялiс — и сiдз ни унаöв тыткиссьöма, лолавны сьöкыт.

Уна быд берсясö сёйис Ваня, быдторсö пешлiс, а вина эз ю.

— Ась сiйö поннэз юöны, сэтшöм донасö, — важнöя шуис сiя, кöр казялiс пызан вылiсь бутылка.

Хозяйка ёна дивуйтчис, горöтчис шынньöв пыр:

— Да эд ме сiйö тэныт неби, деньгасö ог кор.

— Сёравно ог ю. Донаöв лоис, горшö тарсасьö, — откажитчис Ваня и тшöктiс том инькалö нöбöтны винасö бöр магазинö.

Шуралöм ни вöлi туйыс, а Боболь Ваня сёравно пидзöсви нятьöсьтiс коккесö, сапоггес бердö сымда лякасис нюдз сёйыс, что и сылö, богатырьлö, мунны ковсис сувтчывлöмöн: Ваня умöля адззис кок увтсö, вешьян гасник вевдöрöт буждöм кынöмыс мешайтiс.

Тубызовскöй расöт оськавтöн сiйö кузь туй кольлалiс томыник и кытшöмкö ылöстöм кодь катша. Пыркнитас-лэбзяс плотникыс юр весьтöт, китшкыштас-сералас и чуйнитас пуэз коласö. Недыр мыйись бöра вöтас Ванясö, бöра китш-китш керас, сералыштас гажöна. Ваня повзьöтлiс сiйö бедьнас, но бöб кай эз и думайт кольччыны, сё вöтчис и вöтчис, китшкис горöн, дзик мöдiс шуны: кытшöм тэ нёштöм зверь! Хи-хи...

Кыным ылöжык оськалiс Ваня, сыным сьöкытжык лоис мунны. Медбы шоччöтыштны невна ловсö, сiя пуксис тöрмöм колода вылö, нюжöтiс коккез, ловзисис пыдына. Бонзьöм паськыт тошись, лось кучиковöй малахай увтiсь петiс пар, нырборддэз вылöт визывтiс ньылöм, йиджис кытчöкö тошас-гöнас. Ваня босьтiс шапкасö, дзарнитiс пытшкас, нюкайтiс и дыр нöитiс подкладсö чуннезöн. Ого, дзуртöны-кажöтöны! Вильöсь, сотанаэз, басöкöсь. Ваня сiдз ылалiс шапканас, что нельки дрöгнитiс, кöр сы юр весьтын бöра пыркнитiс катшаыс и öдззис китшкыны-серавны. «Вот срам. Бур одзын я эта?..»

— Мый тэныт колö, лёквир? Мый нёштöмасян, сэтöнкан?! — рявкнитiс Ваня да быд вынiсь свистнитiс бедьнас катшаыслö. Бöб кай лэбзис пуэз коласö и эз ни сэсся мыччась, повзис сёдаки.

Кöр Ваня петiс пальниковскöй вöрись, сiйö Тубызсянь медперво казялiсö поннэз. Уннялöмöн, вувтöмöн-лявгöмöн, öтамöднысö одзалöмöн нiя чепöссисö быд пельöссянь, веськыта ыб кузя лэбзисö Ванялö паныт. И только вöр дорас ни öтiк Бусколö удайтчис вежöртны, что делоыс петiс неладно: думайтiс вöр дорас ош мегырасьö, а сэтöн вон кин вöлöма. Буско виноватöя шымыртiс бöжсö и чожжыка бергöтчис бöр. Остальнöйес уннялöмöн пöльтiсö кинлö кытчö туй. Ванясянь бурсö видзчисьны нем, сöтас юр кузя чер öбукöн, сымда и олан.

Вöр дорас чуклясис-виклясис пыдын лог, сы сайын вöлiсö колхознöй видззез. Быд гожумö видззез вылын быдмис косви турун, а часöт кытчöдз нем эз вöв. Но сэтöн баксiсö ни мöссэз, кылiсö инькаэзлöн голоссэз. Фермаын уджалiссез лэдзöмась подасö öктыны мöймуся чорыт турун заэз, вильöтны зород пыдöссэз. Ваня дзарнитiс видззеслань, и сьöлöмыс нёштöма бергöтчис моросас: сiя кылiс Маришалiсь гора голос:

— Тпруте-те-те, — корис Мариш мöсöс, а сэсся öдззис серавны.

«Смех сылö! Сiя эшö лысьтö серавны! Сэтöнкан...» — лöгасис Ваня.

Тöн, кöр юöртiсö, что племянницаыс юасьтöг-висьтасьтöг чывкнитöма гортсис, мунöм жöник сайö, бöра вöрзис быдöс, сьöлöм пыдöсiсь гудыртiс-лэбис нятьсора баг, и синнэз пондiсö пемдыны. Эх, Мариш! Мариш! Мыля сiдз керин? Не сiдз керин, Мариш, не сiдз, кыдз вöлi думайтöма. Ванялö öнi бöра ковсяс, тыдалö, колхозын уджавны. И Паладьлö эшö дöнзяс, пожалуй, ниртöв-керас горт гöгöрын. «А деньгаыс йöзас шедны пондiс», — думыш керис Ваня и казявтöг волькöтыштiс кинас ассис знаменитöй шапкасö. Деньга! Неделя мымда и уджалiс только Пальникас, а вон мымда заробитiс.

Паськыт ыб шöрын, самöй туй дорас, быдмис кык вожа ыджыт пожум. Пожум увтын вöлi беседка, и Боболь Ваня эз вермы сiйö орддьыны, пуксис бöра шоччисьыштны. Колö бы чожжык гортö мунны, да мый гортас? Кылö Ванялöн сьöлöмыс — нёштöмтор сэтчин вермас шогмыны. Ёна лöгасис Ваня иньыс вылö, бытшкы сьöлöмö пуртöн, дак и вир оз пет, сiдз лöгасис. Увья кудоба! Бöра, натьтö, туран брага тыткис, узис кыдз кольмöм, эз и кыв, сэтöнкан, кыдз Маришыс паськöмоксö петкöтiс. Кудоба! Брага тыткö, а нывкасö эз вермы ас бердас кöртавны, лэдзис бокö. Но ужо, вот локтас Ваня гортас и мыччалас увья кокоралö праздниксö, кувтöдз оз вунöт. «Только бы юрыс кузя срамлö бедьнам не инмыны, не поткöтны лöгувьям кашниксö, — думайтiс Ваня. — Да и корпаас тожö. Тьфу, срам! Кытчö бы эн клёнгы, быдлаын коска, сэтöнкан...»

Деревня ладорсянь пöльтiс пöжсьöм назём дук. Ваня виш-виш керис нырнас и вежöртiс: колхозниккез рознитöны ыджыт кучаись назёмсö, ашын, тыдалö, мöдöны гöрны картов увтö му. А поди, Кона Егор аслас парниккез дынын уджалö. Кона Егор... кытшöм сёжö сотана вöлöма. Кынымкö руб понда лöгасис и гусялöма зоныс сайö Маришöс...

Думайтны Кона Егор йылiсь дырсö вöлi недосуг, пöжсьöм назём дук пыртiс юрö виль думаэз. Колхозниккез рознитöны назём, а сiя, Ваняыс, бöбöв я мый я? Тожö парниккез эмöсь, тожö назём ныö тэчны колö, огуреццез садитны, капуста. Эшö видзöтам, кин унажык карчсö быдтас. Эшö чышкам Кона Егорлiсь ныр увтсö. «Огуреццез менам медодз воасö, меддонöн базарас вузала. А арнас, кöр килоыс копейка-мöд пондас сулавны, сэк и Кона Егор мед торгуйтö. Вот!»

Эна думаэзсянь мичамлiс кынымкö минута кежö сьöлöмыс, буржыка токöтiс. Ваня шынньöвтiс. Но шынньöлыс сэк жö и кынмис тоша öм дорас. Карч! А кин сiйö отсалас быдтыны, кин?

— Эх, Мариш, Мариш! — ыш ловзисис Ваня. — Эх тэ, кудоба!

Мöдiс Ваня чеччыны, мунны Мариш дынö, висьтавны сылö ассис кыв, но неылiсь ыб вывсис вдруг казялiс Максимöс.

Детина мунiс бороздаöт, часто мышкыртчывлiс и босьтлiс киö учöтик му комоккез. Босьтас комоксö, нöитас киас и чапкас бöр кок увтö. «Гöрны лöсьöтчö» — вежöртiс Ваня. Кирзовöй сапоггеза, комбинезона Максим вачкисис настоящöй механизатор вылö. Казялiс сiя Боболь Ваняöс, дивуйтчöмöн нюжöтiс кузь голясö, шынньöвтiс добрöя:

— Здорово, родня! Гортö ни локтан? Пырав рытнас, ырöш юыштам!

Ваня бытшкис Максимöс учöтик синоккезöн, мурзьыштiс небытшöма:

— Пон тэныт родняыс, а не ме. Эшö пиннесö кеслö, сотана! Кайварыш тэ, супоней.

Вак-вак серöмтчис Максим, мыччалiс виль родняыслö чочком пиннез. Боболь Ваня сьöвзис лöгувьяс, сыбöрын эшö сьöвзис, а мый толкыс?

Эта лунö Пелагея Ивановналö киас нем эз пыр, мый кутас, быдöс джоджö усьö. Петас старуха öтöрö — бöра кöть вакрамешö юртö пиньöвт: быдыс, кин пантасьö, нюмыртö тырп дорресö, шыннялö кыдзкö ехиднöя, нёштöма. Пидзыртiс Пелагея Ивановнаыс сэтшöм штука — кöть часöт жö кучиксö куль.

Тöн сiя думайтiс-думайтiс быдкодь думаэсö, луншöрöдз маитчис гортас, чуть эз кув. И медбы лöньсьöтны асьсö, медбы не кувны смерться одзжык, пондiс Пелагея Ивановна юрбитны енлö да поклоннэз тэчны, пондiс аслыс мывкыд корны, а еныс и шушкыштiс сылö пель одзас:

— Ветлы, матуш, Кона Егорас, кор Маришсö бöр гортö. Жалейтас тэнö и локтас.

— Спасибо тэныт, кöрмылеч, — радöна шуис Пелагея Ивановна. — Бöра бур совет сетiн. Господи, помилуй, господи, помилуй!

Чапкис старуха юр вылас быгалöм чышьянок, кышис вывтас рызi-бызi зипун да котöрöн мунiс Кона Егор керкуö. Сёр ни вöлi кадыс, а свадебшана сё сэтöн шöрттöм дöрасö панöны: кин пызан сайын вилкаöн бекöрö тюкö, кин паньöн шыд сöвтö, а кин и западня вылын корскö-узьö... Мариш удасис ырöшöн, вовлiс быд гöсь одзö, шыннялiс счастливöя, корис юны пыдöсöдз.

Максим видзис öт киас бутылка, мöдас рюмка — тожö удасис, корис гöссесö веськöтны юррез. Казялiсö том гозъя Пелагея Ивановнаыс, чепöссисö сы дынö:

— Ю жö, тётка, ырöшсö, — тэрмасьöмöн шуис Мариш.

— Нет, перво винаок пешлы, — горöтчис Максим. — Важын ни тэнö видзчисям. Ладно, что пырин.

Пелагея Ивановна дзарнитiс нёштöма свадебшанаыс вылö, бытшкис вöйöм синнэзöн Маришöс да Максимöс, топнитiс кокнас:

— Разя, разя пон свадьбанытö. Ёрда быдöннытö! Максим эз повзьы эна кыввезiсь, сюйыштiс старухалö киас рюмка.

Пелагея Ивановна мöдiс жельдыштны рюмкасö джодж бердö, вылына лэбтiс кисö. Да эм, батя, му вылас нечистöй выныс, эм! Пондыв добрöй дело керны, дак сёравно быдöс дзугас. Сiдз и талун аркмис. Вайöтiс нечистöйыс рюмкасö перво öм дорö, а вöлись и пöрöтiс винасö горшö.

«Гхы!» — шуис Пелагея Ивановна и — шынньöвтiс. Добрöй Максим тожö паськыта шынньöвтiс и кисьтiс гöстялö эшö öтiк рюмка, сэсся куимöтö. Мый шогмис нёльöтыс бöрын — лучше не касьтывлыны: Пелагея Ивановна паськöтiс кöс киэсö, чатыртiс юрсö, топнитiс кокöн и öдззис бергавны. Локтiс сы дынö Кона Егор, тожö топнитiс кокнас. Сэтöн кинкö пондiс орсны гармонняöн, кинкö пондöтiс йöктан песня. Сват да сватья гымöтiсö-йöктiсö, чеччалiсö кокнита, мыйкö горöтлiсö. Свадебшана шовкöтiсö оча долонь, сералiсö, дзик лешаккез, а Максим сё юктасис винаöн.

Мый вöлi одзлань и кыдз Пелагея Ивановна локтiс гортас — висьтавны этö некин оз вермы. Тöдö старуха öтiкö: ойнас узис стрась умöля, он вöлi, конечно, не он, а кытшöмкö страшнöй кошмар. Ойбыт гыжьялiсö сiйö каннез, пурисö поннэз, кокалiсö варышшез. Пелагея Ивановна вартлiс нiйö öжöгöн, талис кок увтын, а срам табуныс сё петiс и петiс кысянькö, шуксьöмöн-шуксис керкуас и быдыс уннялiс, мярзiс, виксiс и быдыс старайтчис летны мортсö, керны мыйкö умöльö да зубытö. И вот кань öшынöт чуйнитiс джоджулiсь кöсыник кока, чочком запона четушка, рыз-рыз серöмтчис, чеччöвтiс Пелагея Ивановна дынö. Осьтiс старуха синнэсö, а четушкасис — колö жö! — сюра чёрттэз сьöрсьöн-бöрсьöн чуйнитiсö, сотняся унажык петiсö и ножö тешитчыны. Медöддьöн тешитчис пöрись ни, кузь тоша и чегöм сюра чёрт. Сiя босьтiс вила, тальччис старухалö горш вылас и öдззис гильöтны вила вожжезнас кынöм, паккез, старайтчис бытшкыны синнэз. Томжык чёрттэз йöктiсö барыня, сьылiсö свадебнöй песня, вежмасисö страшнöя. А пöрисьыс вдруг водiс Пелагея Ивановна бокö, рявкнитiс «курыт!» — и давай окавны старухасö. «Вийисö, сёйисö! — чирöстiс старуха. — Свят, свят! Господи, помилуй!»

— Вежань, вежань! — вдруг кылiс Пелагея Ивановна. — Вежань, öвсьы...

Осьтiс синнэсö старухаыс, а сэтöн сторожиха Öкуль сулалö, öтiк чёрт некытöн абу.

— Согрешеннё! — шуис хозяйка. — Ылöстöмсявны пондi, Öкуль.

— Ылöстöмсялан, пожалуй. Вон кытшöм делоыс петiс. Мыйлö тэ мунiн Кона Егорас?

— Сюраэс, сюраэс кыскисö, Öкуль. Смерть меным öнi лоас. Локтас жöникö — джагöтас. Не бур одзын ме талун чёрттэсö вöтаси. Ох, ох...

Сторожиха Öкуль юкталiс вежаньсö брагаöн, отсалiс сувтны кок йылö. Сiя жö лонтiс гор, кайöтiс ва, вердiс да юкталiс подаöс.

Луншöр кадö сторожиха висьталiс вежаньыслö:

— Колiс бы лонтны баня, натьтö.

— Былись эд! Нач, батя, вунöтi. Лок жö лонтам!

Тöдiсö Öкуль да Пелагея Ивановна, что Боболь Ваня нем сiдз оз радейт, кыдз сьöкыт удж бöрын пывсьыны жар баняын. Сьöкыт удж бöрын Боболь Ваняöс кушманöн эн верд, а пывсьöт бытшöмика. Баняын пывсикö Ваня нельки деньга йылiсь вунöтлö. Поди, и талун баняыс отсалас? Поди, небзяс сьöлöмыс и овтыштас старик кинас быдöс вылö, мый шогмис Тубызын эна луннэзö? Ох, кöть бы сiдз. А то — смерть!

Баня лонтiсö бур кыдзовöй песöн, лонтiсö сiдз, медбы Боболь Ванялöн небзис сьöлöмыс да душаыс, медбы и коскаэс сылöн калитчисö. Сторожиха Öкуль кайöтлiс ва, а Пелагея Ивановна чувйис горсö öжöгöн, сё сюйис и сюйис кöс пессэз, куимись вöтсалiс горсö. И локтiс сэтшöм кад, кöр не только баняас, но и передникын öдыс сотiс пель йыввез и чуннез. Кыдз быд здоровöй морт, Боболь Ваня любитiс, кöр баняас вöвлi здоровöй дук; мукöдпырся койлiс горсö туран брагаöн, а мукöдпырся öгырас чапкывлiс чепöль-мöд тёритöм хрен да чöснöг. Талун Пелагея Ивановна эз скупитчы, банясö пöднавтöн койыштiс горö джын туис брага, чапкис неетша и хрен и чöснöг. И дивуйтчы! Дукыс сэтшöм крепыт лоис, что лешак бы, натьтö, кувтöдз несйис. Нем и думайтны, Ваня кольччас довольнöй, сьöлöмыс небзяс, быдöс коскаэс калитчасö, и сэк Пелагея Ивановнаöс чуньöн оз вöрзьöт. — Господи, помилуй! Господи, помилуй!

Боболь Ваня оградаын, кöда жын-жын вевттьöма тёсöн да öтмöдöрсянь кытшöвтöма бур заплодöн, веськыт пельöсас, самöй воротаыс дынын, сулалö неыджыт избушка. Тулыс кадö, кöр картаын сылö назём, эта избушкаын добрöй мортлö лолавны немöн, быдöнлö кажитчö, бытьтö кинкö нарошно ыджыт насосöн качайтöма сэтчö быдкодь дуксö да срамсö, кöда овлö тулыснас порсь картаын, кöда петö назём ваись.

Эта избушкаын Боболь Ванялöн мастерскöй.

Кузь руббез сьöрын вöтлiсьтöн, плотниккöт быдторыс овлö. Тöвся кадö сiя мукöдпырся ёна кынмывлö, мукöдпырся вовлö гортö люзьва, мыдз, кыдз пон, öдва кок йылын сулалö. И кытшöм сылö овлö бур, кöр локтас гортас и казялас избушкасö. Сьöлöмын сэк шогмöны шоныт чувствоэз, жилаэзын öдззö буржыка орсны вир, а мыдзыс да шогыс бытьтö эз и вöлö, сразу кытчöкö пышшöны. Гортö локтöн Боболь Ваня быдпырся ёна жолькöтö воротаöн, медбы Паладьыс тöдiс, что жöник бертiс, сэсся курзык-курзык керас, сулалыштас невна ограда шöрас, омöн дзарнитас хозяйскöй синöн и вöлись только сибöтчас избушкаыс дынö. Эстöн Боболь ружтöмöн мышкыртчö и кыскö кытiськö плахаэз увтiсь аршин кузя ключ, жагöник сюйыштö сiйö внутрянöй замокö, öддьöн ыджыт вынöн бергöтö ключсö веськытланьö. Тран-н! — кылас замокас, сэсся бöра — тран-н-н!.. — и избушкалöн ыбöсокыс кокнита оссьö, Боболь Ваня, кыдз ош, мышкыртчöмöн пырö мастерскöйö и час-мöд, а кöр и дыржык, мыйкö керö сэтчин — то ли узьö, то ли кынöмсö малалö.

Пелагея Ивановна нёджжасьлiс öшынсянь, радъялiс, что жöникыс локтiс здоровöй и ловья, пернапасавлiс кымöс: слава тэныт, господи, избушкаö пырис, сiдзкö быдöс бур, деньгаок заробитöма.

Талун старуха да Öкуль пукалiсö тожö öшын дынын, видзчисисö, кöр Ваняыс пырас оградаö.

— Видзöт буржыка, мый сiя пондас керны, — шуис Пелагея Ивановна. — Пырас кö избушкаö, дак быдöс бур лоас.

— Ме и сiдз видзöта, вежань. Ноко, ноко... Вон осьтö ни воротасö...

Ворота, кыдз и пыр, оссис шумöн, дзуркнитiс мавттöм дзирöн. Боболь Ваня сьöкыта вуджис подворотня, недобрöя дзарнитiс öтмöдöрö и мыйлöкö клёнгис кыз бедьöн столб кузя. Пелагея Ивановналöн сьöлöмыс сiдз и вотьыштiс кок пятаö: смерть!

Эз пыр хозяиныс аслас мастерскöйö, сразу иньдöтчис керкуö, гыма-йирка, кыдз дорöм вöв, кайис посöдзö.

— Öкуль, Öкуль, мун жö саяс, нылiньöй, мöд жырас, эн коль менö керкуас öткöн, — дрöжитан голосöн шушкыштiс Пелагея Ивановна. — Пондас начкывны, дак повзьöт сiйö, ёрдöмöс. Шапкасö сэк летышт юр вывсис да чапкы порог дынö. Эта шапкаын быдöс сылöн выныс...

Öкуль, кыдз шыр, чепöссис мöд жырас и только ештiс пöднавны ас саяс ыбöсоксö, кыдз керкуö мурзьöмöн пырис Боболь Ваня. Лöг сiя вöлi, ранитöм ош вылö вачкисис. Пелагея Ивановна шлёпкисис лабичö, эз тöд, мый и думайтны, мый горöтчыны хозяиныслö. Ваня торснитiс бедьнас джодж кузя, горöтчис не аслас голосöн.

— Сэтöнкан! Мый?!

— Мый?

— Начкыла! Мыля Маришыс не гортын?

— Ме разь виноват, Иванушко?

— Часöт пондан тöдны, кин виноват...

Эна кыввез бöрын Боболь Ваня лэбтiс бедьсö и пондiс жагöник вешшыны иньыс дынö. И некин оз вермы висьтавны, мый бы шогмис сэтöн, натьтö, сöтiс бы Ваняыс Пелагея Ивановна юр кузя, и сiя, юрыс, пожалуй, потiс бы, дзик кашник. Но Пелагея Ивановна вдруг кань моз чеччöвтiс местасис и сы юрö, кöдö лöсьöтчис поткöтны жöникыс, кöда весьтын öшалiс ни бедьыс, — вдруг эта юрö пырис öтiк важнöй дума. И сразу жö, кыдз пырис думаыс, Пелагея Ивановна чепöссис енугöлö, кватитiс киас Николай Чудотворецсö, саялiс сiйöн беднöй кашниксö-юрсö.

— Только сöт, только сöт! — шуис сiя петитчöмöн. — Сэк вöлись видзöтам, мый ен-батюшкоыс висьталас! Только сöт!

— Чёрт! Чёрт! — рявкнитiс Ваня и сьöвзис иньыслö чужöмас. — Ах тэ, упадь!

Сы вылö жаль вöлi видзöтны. Дрöжитiс сiя, топöтiс коккезöн, бедьнас öвтчис, а уна я толкыс? Охота сöтны иньыслö юр кузя, да кыдз сöтан? Вдруг ликсö поткöтан...

Пондывлiс Ваня гöгöртны иньсö, шедны сы спина сайö и сэтчинсянь ни камгыны буржыка, но Пелагея Ивановна аскадö ештiс бергöтчыны бокöн, öвтчис чудотворецнас сiдз жö, кыдз кöркöся воин действуйтлöма аслас щитöн. Метитчас Ваня бедьнас иньыслö кынöмö, а Пелагея Ивановна сразу жö лэдзыштас енсö увлань, лöсьöтчас Ваня клёнгыны пельпон кузя, а Николай Чудотворецыс сэтöн и эм ни. Öвтчис-öвтчис Ваня, чеччалiс иньыс одзын и сiдз, и этадз, люзь пымалiс, сё старайтчис гильöтыштны Пелагея Ивановналiсь коскаэсö, да сiдз нем эз и пет. Николай Чудотворец отсалiс беднöй инькалö, ёна талун отсалiс. Пöрись учитель Александр Парфёнович баитiс кыдзкö, что Николай Чудотворецыс — этö пустöй места, некытшöм вын сылöн эз вöв и абу, что сiйö важын колö сотны горын. А видзöт, кыдз петiс! Вын пö сылöн абу... Абу тай!

Боболь Ваня, кöр казялiс, что весь только лöгалiс да вынсö песiс, лöгöн чапкис бедьсö лабич увтö, мыйкö бобгыштiс аслас тошö и мегырасьöмöн петiс öтöрö. Сторожиха Öкуль сэк жö чывкнитiс учöтик жырокись, пондiс китшкыны:

— Вежань, кыдз тэ сiйö, а! Ох-ха, вежань!

— Отсалас ен-батюшкоыс, не весь сылö рыт и асыв поклоннэз тэча, — важнöя шуис Пелагея Ивановна и сувтöтiс чудотворецсö аслас местаö. — Часöт эшö баняын пывсьöта вежöмöс — и сьöлöмыс нач небзяс. Быдöс бур да ладно лоас.

Оградаын эта кадö кыкись трангис внутрянöй замок, кокнита оссис избушка ыбöс. Боболь Ваня пырис мастерскöйö, игнасис. Но вот и ладно, важын бы сiдз. А то öвтчö бедьöн, кöть прокыс абу. Пелагея Ивановна пернапасалiс кымöссö и тшöктiс Öкульсö вайны пызан вылö туран брага.

— Весь только сьöлöммез маитiм, весь лунтыр тöждiсим, — öмсö нюмыртöмöн шуис сiя.

Крепыт мыгöра да вына вöлi Боболь Ваня, настоящöй кайскöй лешак, богатырь, и радейтiс сiя быдторсö керны ас сьöртi: крепытö, ыджытö, ёнö. Ас сьöртiас сiя и баня кöркö сувтöтiс, сы ыждаö камгис — мукöд хозяинлöн керкуыс учöтжык. И кöть вöлi сьöд баняыс, но дивуйтчы: куим полок сэтöн. Öтыс, медувдöрисьыс, паськыт, дзик полать. Сэтöн Боболь Ваня любитлiс просто сiдз нежитчыштны, куйлыштны коккесö нюжöтöмöн да кынöмсö малавны.

Шöрöт полокыс вöлi кыкись векнитжык увдöрисся, и хозяиныс сэтöн дырöн «виöтлiс» ньылöм. Мукöдпырся кынмалас сiя туйын, ёна мыдзас — коскаэс садейтöны, сэк шöрöт полокысся буржыксö нем он адззы. Лонтас Боболь Ваня ассис банясö кыдзовöй песöн, öгыр вылö чапкас чепöль-мöд тёритöм хрен да кушман, сэсся койыштас калитöм иззэз вылö джын ведра ва и чожжык кайö полок вылö. Нюжöтчас сэтчин, киэсö морос вылö пуктас, синнэсö куняс и куйлö, кытчöдз быдöс ньылöмыс оз пет, кытчöдз коскаэс оз небзьö.

Бур! Эх, кытшöм долыт! Охота мурзьыны кань моз, мыйкö сьывны.

Джын часся дыржык вермö куйлыны Боболь Ваня шöрöт полок вылас, оз и пельöн вöрзьöт, öтiк мускулöн трек оз кер. И только сэк, кöр пондас нырыштны он, Ваня горöтчас иньыслö:

— Паладь! Да тэ мый, сэтöнкан? Узян я мый я?

Паладь тöдö ни, мый колö керны. Сiя тэрмасьöмöн койыштö горас эшö джын ведра ва, сэсся койыштö кöш-мöд моритöм брага и чапкö бöра невночка хрен да кушман. А Ваня ружтöмöн кайö медвевдöрись полок вылö, кöда потолокыс бердын ни, водö сэтчин кыминь и нюжöтö коккесö. Паладь пуктö юр вылас кöдзыт ваö кöтöтöм чышьян, пелитö киэзö кеписсез и öдззö пöжавны жöниксö бура пöжöм коросьöн. Шовк! Шовк! Шовк!

— Ёнжыка жарит, кудоба! — рявзö Ваня и мурзьö корось увтас, бергалö бокись бок вылö, то спинасö вывланьö керас, то мороссö.

Паладьлöн садьыс бырас, öдва кок йылын сулалö, а жöникыс сё ряксö, тшöктö содтыны öдсö. Беда! Но вот бурмис Бобольлöн сьöлöмыс, жарыссянь да дукыссянь пондiс ловсö пöдтыны. Перыта, дзик заваритöм чёрт, сiя быгыльтчö вевдöрись полок вывсянь шöрöтыс вылö, сэтöн чашыктö да ойзö невна, сэсся тарöвтчö увдöрись полок вылö, водö кыминь и бöра нюжöтö коккесö.

— Давай, сэтöнкан! — горöтö Ваня.

Паладь и часöт тöдö, мый сысянь корöны. Сiя перыта кайö полок вылас, киэзнас кутчисьö вевдöрись плахаэс бердö, а коккезнас сувтö Ванялö спина вылас.

— Вöрöт ни, вöрöт бедь коккетö! Кулiн я мый я?

— Вот часöт быдöс коскаэтö мургыляла, — паныт шуас Паладь и ножö йöктыны-чеччавны мужикыс спина вылын.

— Ёнжыка, Паладь, ёнжыка таль! Öт, сотана! Чеччалö Паладь жöникыс спина вылын, перыта-перыта вöрöтö коккесö, дзик ной тальö. А Ванялö только эта и колö. Öддьöн славнöй делоыс. Коскаэс и яйыс чорзьöны, жилаэзын вир ключ ваöн орсö. Кулак Якуня Иван, царство сылö небеснöй, кöркö прокод этадз пывсьывлiс и некöр кашык эз кер, здоровöй вöлi, кыдз дьявол...

Вот сiдз пывсьывлiс Боболь Ваня.

Сiдз сiя пывсис и талун. Не öтiк час быглясис полоккез вылын. Старуха жалейттöг кулис сiйö коросьöн, лöгувьяс талис, кыдз ёрдöм врагöс. Ваня кольччис öддьöн довольнöй, настроеннёыс син одзын бурсялiс. А кöр кайис гортас да шоччисьтöг пöрöтiс горшас быдса туис кöдзыт ырöш, баитыштны иньыскöт охота лоис.

— Öтнаным кольччим, Паладь, — гажтöма шуис Ваня. — Вот эд кыдз.

Пелагея Ивановна пуксис ордчöн жöникыскöт, косьмöм киэсö öлöдзö пуктiс, ыш ловзисис пыдына.

— Мунiс, ёрдöм коска, — горöтчис бедуйтöмöн. — Мымда чивералö баитi: эн мун йöз семьяö, кошшы сэтшöм мортöс, кöда бы миянö пырис. Эз кывзы, кудоба.

Но мед, мед мунö. Эшö каитчас лёквир. Да ась жö сiйö пороз люкалö, ась Вильва пыдöсö вöйö.

— Ась вöйö, абу жаль — макнитiс кинас Боболь Ваня.

Сiя дыр гуддисис тошас, малалiс юрсисö, думайтiс мыйкö.

— Олам и сытöг, — дзугис лöньсö Пелагея Ивановна.

— Овнытö олам, но сьöкыт лоас, сэтöнкан.

— Öкульыс отсасяс. Нывка сiя öтка, гожумбыт нем оз кер. Ужо, кöсъя деньгаок...

— Кöсйы, пожалуй. Руб-мöд позяс сетны. А сэсся — шыш.

Мирнöй вöлi басниыс, öддьöн бытшöм. И колiс жö Пелагея Ивановналö шынньöвтны этадз хитрöя да горöтчыны:

— А ме эд гортын тожö весь эг пукав, деньга шедтi.

— Ы-ы? — шуис Ваня.

— Срам назёмсö двадцать руб вылö вузалi! Ванялöн перво дрöгнитiсö пашмöм синкыммес, вöлись öмыс пондiс пиньöвтчыны, сэсся нырпыссэс öдззисö пиксыны. Ваня тура-тара сувтiс кок йылö, иньыслö веськыта чужöмас дзарнитiс.

— Ы-ы? — бöра шуис сiя.

— Удачнöя вузалi городскöй шофёррезлö. Эг сет ачымöс бöбöтны, — сё сiдз жö хитрöя шыннялöмöн шуис Пелагея Ивановна.

— Дак тэ вузалiн назём, сэтöнкан? Быдöс вузалiн? А парниккезас колин? А ассиным карчйöрсö назьмитiн? Эд мöйму эг петкöтлö. Начкыла! — вдруг рявкнитiс Боболь Ваня и керис вид, бытьтö пондiс кошшыны пурт. Пелагея Ивановна кань моз чепöссис енполкалань, босьтiс бöра киö Николай Чудотворецсö.

— Только пондыв, только пондыв!

— Начкыла!

Öддьöн лöгасис Боболь Ваня аслас инь вылö, вийны мöдiс, но кöр казялiс сы киись чудотворецсö, сразу жö сьöкыта ойнитiс, рапмис и, сьöлöмсö веськыт кинас видзикö, жагöник шлёпкисис лабичö.

— Кудоба, кудоба... Колö жö назём вузавны. Мургыльтны бы кöбыла рожалiсь юртö, чапкыны бы сiйö поннэзлö. Эх! Ноко вай деньгатö!

Пелагея Ивановна котöрöн ветлiс комö, вайис жöникыслö двадцать руб деньга. Боболь Ваня лыддис бытшöмика, сэсся босьтiс юр вылiсь шапкасö и дзебис руббесö подклад коласö. Ружтöмöн и ойзöмöн Ваня питкылясис-петiс аслас избушкаö, а Пелагея Ивановна нюмыртiс кöс тырппесö, мигнитiс чудотворецлö:

— Отсалiн, господи, отсалiн... Дас руб суськи сёдаки. Хи-хи...

Кин öнi отсалас? Кыдз овны одзлань?

Эна вопроссэз, дзик кыдзовöй сартасiсь желлез, мöртчисö юрвемö и зубыта дойдiсö быдöс, мый вöлi вемас. Боболь Ваня ружтöмöн бергалiс бокись бок вылö, старайтчис онмöссьыны, вунöтчыны зубытсö кöть бы джын час кежö, да пондыв!

Кин öнi отсалас?

Одзжык быдторсö отсалiс керны Мариш. Вöвлi, ковсяс мöс кок увтö идзас. Но и мый жö? Мариш уджалö фермаын, сiя одзынмунiсь. Кинлö-кинлö, а Маришлö Степан Меливасин ачыс отсалас кутны картаись вöв, ачыс сiйö доддялас, тэчас гуна дорись медбур идзас: кыскы, Мариш, давай нöбöт, кытчö нö воштiсян, колö дак...

А пес тöв кежö заптыны колö? Эшö кыдз! Мукöддэс Меливасинлö готовöсь пидзöсас юрбитны, медбы сетiс кöть умöлик вöлок вайны додь-мöд пес. А Боболь Ваня некöр тай сэтшöм бедасö эз тöдлы. Горöтчас Мариша кыв и ― пожалуйста! Бригадир не только вöв сетö, а трактор. Кыскав, кöть быдöс Кайскöй волоксö петкöт, только уджав мöссэс дын, содты колхозлö богатство!

Нет, некытшöм сэтшöм беда эз тöдлы Боболь Ваня. Кöть колхозас оз и уджав, а мый колö, сiя и эм.

Карчйöр — джын гектар ыжда лоас.

Туланöскöй мыс сайись нюрын видз эм.

Пода тöвйöт кöть быдса ферма.

Вöввез колöны — любöйö кут.

Кöть машина, кöть трактор — пожалуйста.

Да-а, вöлi сiдз.

А часöт мый? Локтан, шуам, бригадир дынö корны вöв, медбы карчйöрсö аскадö гöрны, дак сiя мыччалас порог вылö — и висьтав спасибо.

Избушкаын дук, лов пöдтö: назём ва, тыдалö, джоджулас пырöма. Думаэз юрын зубытöсь, сьöкытöсь, бытьтö изыннэз бергалöны, öбида маитö: мунöма Мариш нечулим Кона Егор зон сайö. А иньыс! Тожö зараза бытшöм. Вон назём вузалöм. Мöдiс Боболь Ваня карчйöрсö буржыка назьмитны, мöдiс босьтны унажык картов да капуста, мöдiс вузавны карчсö городскöй базарын, а часöт — шиш! Мöйму карчйöрсö эз назьмит, таво тожö, тыдалö, сiдз кольччас. Парникö тожö унасö он пукты — кытiсь ваян, вузалöма кудобаыс да.

Ыджыт Боболь Ванялöн избушкаыс, а сёдаки дзескыт. Топчан кöркö кытшöм крепыт вöлi, а öнi разьсьыны, тыдалö, мöдö, дзуртö, кыдз умöлик нярьян, вот-вот паськалас. Коккез нюжöтны оз туй — кытшöмкö лöчыт дорыша кöртторрез мешайтчöны. Водны бы джоджö, нюжöтчыны, бытьтö богатырьлö, да тожö пустöй места абу: сэтöн верстак, сэтöн ящиккез да ларрез, быд пельöсын косьтöм пöввез да бруссэз сулалöны — ачыс хозяиныс заптiс пызаннэз да рамаэз керны. Потолок увтын, кык слега вылын, ыджыт сьöд гроб сулалö. Бытшöм гробыс, крепыт, ас понда керöм, сьöд краскаöн да смолаöн мавтöм. Сто год куйлас сiя муын и трек оз кер, оз сiсьмы. Эта бур. Кулас кöркö Ваня, водтöтасö сiйö эта гробö, муö сюйыштасö. Узь, богатырь!

— Только одз эшö смерть йылiсь думайтны, одз! — чорыта шуис Ваня. — Деньгаок öксис ни... Вот...

Веськыт ки ачыс пырис юрöдзö, пондiс кошшыны шапка, öтiклаö сюйыштiс кисö Боболь — абу шапкаыс, мöдiклаö сюйыштiс — абу! Дзик сöнöга ва койыштiсö сьöлöм вылö, дзик пуртöн бытшкисö моросö — садь бырис. Кытчö лоис шапка?!

Ош моз муркнитiс повзьöм морт, ружтыштiс сьöкыта, кулöм не ловья чеччöвтiс топчан вылiсь.

— Баняас, баняас вунöтi, некö!

Кыдз вöлi, сiдз и чепöссис Боболь Ваня карчйöрö, межаöт котöртiс аслас знаменитöй баняö. Шапка — вот сiя! — öшалö тув вылын, бытьтö сiдз сiя и колö.

— Уф-ф!

Öзтiс Боболь Ваня сартас, щельö мöртiс. И ножö малавны шапкасö, нюкайтны да чуннезöн гуддьыны подкладсö.

— Дзонь! И кыдз ме сiйö вунöтi! Не бур одзын эта... Хо! Не бур одзын! Бур быдöс лоас, сэтöнкан. Чомору.

Ёна повзьöмсянь Боболь Ваня кыдзкö сразу рапмис, незьмис; сiя шлёпнитчис паськыт полок вылас, пуктiс шапкасö юрöдзö и довольнöй, кунис синнэз. Бур сылö лоис, долыт. А кöр юрас кыдзкö видзчисьтöг пырис öтiк дума и совсем небзис сьöлöмыс, Ваня шуис гусьöник:

— Меливасиныс хитрöй, а ме хитрöйжык. Сёравно бöбöта...

И онмöссис сэк жö, и синнас сэсся кваркыш эз кер.

Дата добавления: 2015-11-16