Тубызын, Боболь Ваня керкуын, луныс пондöтчö одз. Петух оз на и думайт юöртны асывсö, блед тöлiсь эшö ыджыт любопытствоöн нёджжасьö льöмпу уввез коласöт öшыннэзö, а Пелагея Ивановна жырын дзуркнитiс ни пуовöй кровать, сэсся мутшнитiс кыз джодж плаха. Этö лоö, что хозяйка чеччис и öнi локтiс пызан дынö. Пызан вылiсь Пелагея Ивановна кималасöн адззис спичаэз, öзтiс лампа. Ойся пемытыс сэк жö тэрмасьöмöн жмитчис стенаэз бердö, пырис лабиччез увтö, кань öшынöт дзебсисис джоджулö, а остальнöйыс пелитчис кашниккезö да ведраэзö.
Пелагея Ивановналöн чужöмыс пыктöмакодь, нöитчöм, синнэс увтö öшöтчöмась понмешöккез, юрсиыс дзугсьöма и гынмöма. А-ох-ох-ха, — осьталö старуха öмсö и быдпырся кресталö-пернапасалö, медбы эз пыр сэтчö кытшöмкö нечистöй дук.
Мукöдпырся баитö йöзыс, что гозйöн олiссез, мужик да инька, мыйöнкö вачкисьöны öтамöд вылö. Может, мукöддэс и вачкисьöны, но висьтавны этö Боболь Ваня да Пелагея Ивановна йылiсь решительно оз туй. Боболь Ваня — лешак, богатырь. А Пелагея Ивановна унажыксö вачкисьö увья стожар вылö — ыджыт мыгöра, кöсыник. Дзар керан сы вылö и диво кутö — кытiсь только öтiк мортлöн сымда коскаыс? Аннэс петöмась бытьтö наковальня дорышшез, спина саяс лопаткаэс мыльк керсьöмась, истово рака борддэз; пельпоннэс и киэс косьмöмась, öшöтчöмась — тожö только кучик да коска. Нет, оз вачкисьö öтамöд вылö Боболь Ваня да иньыс. А Тубызын быд морт син одзын и син сайын висьталас, бытьтö нiя — кык нинкöм. А кык нинкöм — этö гоз.
Пелагея Ивановна кадсö унажык чулöтö городын, базарын. Сэтчин сiя быдпырся, кöр вузасьöмыс овлö удачнöй, босьтö винаок и гусьöн юö ларёккез сайын. А кöр винаокыс абу, Боболь Ваника гортас керö крепыт туран брага, моритö сэтчöдз, что сет кружка-мöд вöвлö, дак и сiя кок йылiсь таралас. А Пелагея Ивановна сэтчöдз ни велалiс юнытö, что нем абу. Тöн рытнас сы ордын вöлi гöстя. Школаись сторожиха Öкуль кылöма, что Боболь Ваня öнi абу гортас, и пыралiс дозирайтны старухасö, кöдö шуö вежаньöн. Кык пöрись морт невна юисö морёнкасö, и талун Пелагея Ивановналöн юрыс тöдчöмöн дичайтiс. Крепытöв сёдаки шогмöма брагаыс, нельки и сылiсь, старухаыслiсь, гырксö быдöс бергöтiс. Кружка да джын, натьтö, и крапкис только, а видзöт — синнэс сё эшö кылалöмась.
— Господи, помилуй, господи, помилуй, господи, помилуй! — пернапасасис хозяйка строгöй лик одзын. — Согрешитi ме, проклённöй коска, пыри грехас: бöра жöникöтöг горшалi турансö. Мый меным öнi лоас, господи?
Дыр висьтасьö Пелагея Ивановна ликыслö, кыдз сiя пырис грехас, кеймисьö, медбы Христос-батюшкоыс проститiс «пöрись кудобасö». Дзирыт молитва петö старуха öмись и, тыдалö, инмö веськыта еныс пеллезö: святöйлöн синнэс жагöник раммöны, сё слабöйжыка и слабöйжыка югьялöны енполка вылас. Кыным югытжык лоö керкуын, сыным етшажык Николай Чудотворец чужöм вылын строгость. Пелагея Ивановналö только эта и колö — проститiс кöрмылеч!
Кöр хозяйка пуктiс медбöрья пернапас, картаын лёкгоршöн ванзiс ни петух, керкуö пырис асывся югытыс и досповна вашöтiс пемытсö джоджулö да Николай Чудотворец спина сайö. Пелагея Ивановна кусöтiс лампа, ружтöмöн пыртiс пес да гыма-йирка чапкис сiйö гор одзö. Шумитö старуха нарошно: охота чожжык саймöтны племянницасö, кöда узьö сайись жырас. Шумитö ёна. То гормöччан кисис уськöтас, то пустöй ведра шентыштас, а Мариш бытьтö нем оз кыв, оз и думайт чеччыны. Бöра, тыдалö, ойшöрöдз клубын вежмасис, бöра шöрттöм дöрасö панiс да йöзсö смешитiс. Медбöрья кадö нывка сiдз вельмис, что гортын немымда бы оз пукав: луннас фермаын койö, а рытнас клубын. А тöн эшö виль юр вайисö: сторожиха Öкуль висьталiс брагасö ютöн, бытьтö бригадир Меливасин быд лун фермаö кежавлö, сё пö мыйкö Маришлö пель одзас шушкö да сказкаэз оша-миша йылiсь висьтасьö.
— Эта мый эшö сэтшöмыс? — повзьыштiс Пелагея Ивановна.
— А ме разь тöда? Поди, öнджа да... — нюмыртiс тырппесö Öкуль.
— Сiдз и тöд: бöра кытшöмкö покась готовитö, бöра миян увтö яма гарйö. Эд сiя, вирьюись, готов ульöн миянöс сёйны, готов ловйöн муö сюйыштны. Джын огородечнымöс мырддис, пес вайны вöв добром некöр оз сет. Мöйму межаэз вылiсь турунок гогналi, дак и сiйö фермаö нöбöтöма.
— Вот ме и шуа...
Пелагея Ивановна лöгувьяс крапкис джын кружка брага, гöститöтiс Öкульöс. Öкуль эз кольччы долгын, эшö öтiк виль юöр висьталiс:
— Максимушкоыс колхозö пö бертöма, бöра пö Мариш дынö леститчö.
— Вот эшö, рестант! Да сылiсь тай юрсö колö поткöтны!
Пелагея Ивановна кольлалiс гöстясö порог сайöдз, пемыт посöдзын бура закажитiс, медбы Öкуль бытшöмика кывзiсис деревняас, видзис пеллесö пыр öшöтöмöн.
— Мый кылан, дак сразу жö ме дынö. Вежöртiн?
— Кыдз не вежöртны. Быдöс кера, вежань, — кöсйисис Öкуль.
Сiя мунiс гортас и, натьтö, сразу жö водiс узьны, а Пелагея Ивановна дыр эшö пукалiс лабичын, юрсö öшöтöмöн думайтiс, кыдз досповна кидтыны Маришöс Максим дынiсь, кыдз керны сiдз, медбы нывкаыс ачыс вайöтiс гортö кывзiсь жöникöс. Думайтiс, думайтiс, юрыс потласьны пондiс, а бурыс нем эз сод. Мариш важын невеста, гезок бердö он кöртав. Мунас и только. Мый сэтöн керны? «Ужо, локтас кöзяинö, сыкöт и думайтыштам, кыдз да мый?» — решитiс Ваника да водтöнняс юис эшö невна брага.
Талун сылöн потласьö-висьö юрыс, дрöжитöны киэс и коккес, сьöлöмыс токöтö сiдз, бытьтö нöшöн вартö. Тшыксьыны пондiс Мариш, воля пондiс босьтны. Адззан, мый петö: узьö, дзик не сылöн и дело. Вöвлi, пыр чеччывлiс хозяйкаысся одзжык, быдторсö керны отсалiс, паныт öтiк кыв эз горöтчывлы, а öнi любуйтчы — узьö!
Эна сьöкыт думаэзöн Ваника лонтiс гор, вештiс би одзас ваöн ыджыт чугун, сувтöтiс ордчöн сыкöт мöдiк сэтшöм жö чугун картошкаöн, сэсся думайтiс-керис да вештiс пессэс бердö тöння похлёбкаöн кашник. Натьтö, шöмалiс ни похлёбкаыс, да не чапкыны жö сiйö порсьлö — тыткиссяс. А Мариш сё оз вöрöтчы, бытьтö оз и кыв хозяйкаыслiсь шумитöмсö. И Пелагея Ивановна лöгöн быд вын чужйис заслонкаö, кöда лöсялiс кок увтас. Трон-н керис кöртыс, дзик мöс голяын джыннян, гажöтiс хозяйкалiсь сьöлöмсö — öнi саймас, небось! Но Мариш и сэтöн эз вöрзьы местасис. Да мый сiя, кулiс я мый я? Ох-хо, вежöм кучик! Мый сыкöт керны?
Медбöрья годдэзö, кöр Боболь Ваня сё етшажык и етшажык пондiс уджавны колхозын (ачыс Пелагея Ивановна дас год ни кыдз пöртчис старухаö), нылöн казявтöг пондiс отöнсявны хозяйство. Одзжык видзисö кöза, кынымкö баля и тырмывлiс: семья учöтик — быдтiсö öтiк зонöс, Öльöшöс, уна я куимыслö колö? А öнi видзöны мöс, ар кежö быдтöны кык-куим порсь, тöвйöтöны пытшпиа маткаöс, дас кыным баляöс, уна дзодзогöс, быдса табун курöггез.
Быдöннысö нiйö колö вердны, юктавны. А кин сымдасö вердас да юкталас? Кин нылö заптас турун, кöрым, идзас, сю?
Да только разь пода. Медбöрья кадö Боболь Ваня гозъя унажык пондiсö садитны картошка, капуста, помидоррез да огуреццез. Аслас карчйöрö Ваня лöсьöтiс нельки мыйкö теплица кодьö, кытöн быдтiс росада, керис бур парниккез.
Кин нылö отсалас садитны да быдтыны картошкасö да карчсö? Кокнит только висьтавны: садитны, кучитны, кайöтны коромысла вылын юись ва да киськасьны, летны ёгтурун, арнас гарйыны, öктыны, керавны, пуктыны гуö... Кин этö быдöс керас?
— Ох, прокленитöм морт я мый я ме, — норасьлiс жöникыслö Пелагея Ивановна, — пемытсянь пемытöдз кок йылын, быдторсö аслым колö керны. Кöть бы чожжык Öльöксеюшконым локтiс. Видзöтан, гöтрасис бы, монь бы лоис. Да не кытшöмкö пустельга, а хозяйственнöй.
— Ужо, локтас Öльöш — гöтралам! Монь лоас, сэтöнкан, — баитлiс Ваня. — Босьтам кывзiсьö. Хозяйство öнi, слава богу, он ни кулит. Якунь Иван, покойнöй, завидуйтiс бы. Работнича колö. Ужо, гöтралам! А öнi кытчöдз котрась ачыт. Да, пожалуй, корлы мукöдпырся Öкульсö, ась отсасьö. Картовкатор нето йöлок верман чапкыны. Да сойыт ась вовлö. Тожö не чужöй...
— Оз сiя лок. Ылöстöмсялöма. Кора кыдзкö вöлi, дак шиш мыччалiс. Ог пö радейт кулаккесö, лучше пö тшыгйöн кула.
— Вот зараза! Абу я сылöн юрыс пым? Роднялö сiдз горöтчö!
Пелагея Ивановналöн сойлö, Ульяналö, овсис öддьöн сьöкыта. Жöникыс бертiс война вывсянь шогалiсьöн — öддьöнöв кынмалöма кытшöмкö ю форсируйттöн, вöлi неöтпыр ранитöм. Локтiс гортö не кулöм не ловья, курзыктiс кынымкö год, маитчис-маитчис больницаын да и кулiс. Кольччис Ульяна год-мöдся кагаöн, быдтiс сiйö, тöв и гожум уджалiс колхозын. Сьöкыт вöлi колхозас войнабöрся первöй годдэзö. Кин прокмис уджавны, сiя мунiс городö. Кольччисö стариккез да инькаэз, да эшö нiя, кöдна нем эз прокмö керны. А нянь колiс быдтыны. И пода колiс видзны. И дöнзис инькаэслö, дöнзис и Ульяналö, — гöрис, кöдзис, кыскалiс заготовкаö сю, тöввезнас уджалiс фермаын. И эттшöм кадö эшö отсасьны Боболь Ванялö?
— Сё колхоз вылö надейтчö, сё бур луннэз видзчисьö, — баитiс жöникыслö Пелагея Ивановна.
— Ась öмсö паськытжыка осьтö...
Сiдз и чулалiс кадыс. Ванялöн быдмис хозяйство, содiс аппетит. Пелагея Ивановна лэдзчисис старухаö, кöть вöлi томжык жöникысся, лунiсь лун жöдзис горт гöгöр, уджалiс садь быртöдз, видзчисис армияись зонсö.
Öльöш локтiс арся лунö, кöр Боболь Ваня гозъя гарйисö картошка. Пырис сiя керкуö ыджыт мыгöра, ён, солдатскöй паськöма, погоннэза — настоящöй молодец, богатырь. Дзарнитiс Пелагея Ивановна сы вылö, и сьöлöмыс пот мунiс: вон кытшöм зоныс! Истово сэтшöм жö, кытшöм жöникыс томнас вöлi.
Солдат дзирыта здоровайтчис аймамыскöт, кыскис чемоданiсь козиннэз — мамыслö басöк чышьян, а айыслö — виль йöрнöс. Гажыс, гажыс мымда вöлi Боболь Ванялöн керкуын! Öльöш висьтасис солдатскöй олан йылiсь, аймамыс ошшасисö хозяйствоöн. Рытнас солдат ветлiс баняö, пывсис кыдзовöй коросьöн, сiдз пöльтiс асьсö вöвлытöм öдын, что локтiс гортö кыдз пуöм рак.
Пызан сайын том морт мыччалiс, что вермö не только бура пывсьыны, но и сёйны. И не только сёйны, но и юны вина: ловзисьтöг пöрöтiс быдса стакан, сыбöрын мöдiкö. Юис бы эшö сымда жö, да Боболь Ваня винасö унаöн некöр эз босьтавлы.
— Локтi ме, ая, недыр кежö, — вдруг явитiс Öльöш. — Кутчиси городын уджавны. Пароход вылö поварöн примитiсö. Ме эд, ая, армияас кухняын служитi, шыд велалi пуны — кытчö тэ!
— Мый! — öтiк öмись горöтчисö Ваня гозъя.
— Стряпайтны, мыся, велалi. Öнi городын понда овны. Не колхозын жö назёмсö тальны. Асьныт тай кöркö пыр баитлiт...
— Ох! Ох! — чирöстiс Пелагея Ивановна. — Да сiйö тай вежöмась! Да эд ми этö кöркö баитiм... А öнi и гортын бур лоас.
Старуха брякнитчис пидзöссэз вылö, тэчис Николай Чудотворецлö поклоннэз. Юрбитiс джын час мымда, сэсся сы дырна жö кисьтiс курыт синваэз. Боболь Ваня пуксис зоныскöт ордчöн, пуктiс кисö сы пельпон вылö:
— Вот мый! Город йылiсь тэ вунöт. И миян Тубызын позяс несьöкыта öнi овны, Велалiм, слава богу. Колхозын, конечно, уджавны немлö. Пондам кыкöн плотничайтны, деньга тыр карман лоас, сэтöнкан... А похлёбка пуны — тьфу! — инькаэз эмöсь.
— Вунöтi ме, ая, кыдз черсö киын видзöны.
— А ме висьталi — некытчö он мун!
— Муна! Квартира сетасö, и тiянöс дынам босьта.
Кин кухняын уджалö, сiя прокод пöт. И деньгатор шедö, ежели юрöн керны.
— Но и тарöвтчы вакрамешö! Повар!
Солдат эм солдат. Кыв сылöн чорыт. Кыдз висьталiс, сiдз и керис. Мымда бы эз горöтлы айыс, мымда эз герьяв мамыс — Öльöш кык лун бöртi мунiс городö.
— Ёрда ме тэнö, вежöмöс, ёрда! — кöсйисис мамыс.
— А ме сiйö плетьöн, плетьöн зырымöсь бедьöс! — рявзiс Ваня.
Керкуись петiкö Öльöш висьталiс, что сэсся и гортö некöр оз лок.
— Вот и видзчисим сiйö, вот и гöтралiм... — бедуйтiс ай.
Пелагея Ивановна вöлi сэтшöм лöг, что и баитны нем эз письты. Сiя быд рыт гусьöн жöникыс шогья юис туран брага, öтiк неделяö рапмис, кельдöтiс. Мукöдпырся пуксьывлiс комö, пемыт пельöсокö, и горзывлiс курыт синваэзöн, жалейтiс зонсö, «кöдö вежöмась армияас», öтпыр только и радмывлiс Пелагея Ивановна — этö сэк, кöр почтальон вайис зоныссянь письмо. Ваня гозъя корисö местнöй учительöс, Александр Парфёновичöс, тшöктiсö лыддьöтны письмосö, — асьныс вöлiсö неграмотнöйöсь.
— Мый сiя гижö? Поди, гортö кöсйисьö? — юалiс мам, кöр пöрись учитель пуктiс ныр вылас жугалöм очкиэз.
— Поди, прошшеннё корö? — тэрмöтiс грамотейсö Ваня.
Александр Парфёнович лыддьöтiс перво гусьöн, сэсся горöн. Нет, Öльöш эз кöсъясь гортö. И прошшеннё эз кор. Сiя юöртiс, что неважын гöтрасис, лöсьöтчöны иньыскöт ветлыны курортö, но вот беда — оз тырмы деньга. Если аймам иньдасö сылö кöть сто руб мымда, то делоыс лöсялiс бы...
— Вот сволочь! Вот понпиян! — эз кывзы письмосö конецöдз Ваня. — Да ме сiйö, зырымöсь бедьöс, начкыла. Гöтраси пö! И курорт понда деньга корö! Да ме сылö куим чунись! Деньгаыс туйö ме сылö агрегат мыччала!
— Гöтрасьö-ö-öм?! — юалiс Пелагея Ивановна. — Да кыдз жö сiдз? Юасьтöг? Христос-батюшко...
И öдззис бöра горзыны, немöн бурöтны эз позь. И кин тöдö, мый бы сыкöт лоис, если бы сторожиха Öкуль эз вай öтiк юöр:
— Беда, вежань! Ог и тöд, кыдз висьтавнытö... Ульянасö пороз люкалöм, быдöс кишкаэсö лэдзöм. Пондöмась кыскыны больницаö, а сiя туй вылас...
— Кулöм?
— Кулöм, царство сылö небеснöй... Простит миянöс, Христос, быдöнным тэ кипод увтын ветлöтам...
Дзирыта горзiс Пелагея Ивановна: жаль вöлi сойыс. Кöть и асныралiс Ульяна, а сёжö сой. Ковсис думайтны, кытчö воштыны сылiсь нывсö — Маришсö. Думайтiсö эта йылiсь Боболь гозъя, думайтiсö колхознöй правленнёын, сельсоветын. Маришалö тырис ни пятнадцать. Сетны сiйö детдомö? Кыдзкö оз лöсяв — ыджыт ни нывкаыс. Уджöтны колхозын? Эшö одзöв: винерик быдмис Мариша, кöсыник. Кытчö сiйö сувтöтан?
— Ась эшö велöтчö, — шуис бригадир Меливасин. — Кончитiс вöлись сизимöт класс, одзöв сылö уджавны. Иньдам городскöй интернатö — школаö. Вот и бур лоас...
Сэк и локтiс колхознöй правленнёö Боболь Ваня.
— Иньдыны нылочкаöс городö? — шуис сiя. — Да абу я юрыт пым? Дыр я нывкалö городас тшыксьыны? Нет уж, некытчö ог иньдö. Ась олö миянын, кытчöдз оз быдмы. Асьным велöтам — не чужöйöсь.
Сiдз Мариша шедiс Боболь Ваня ордö.
Ваня и Пелагея Ивановна примитiсö сiйö бура: небисö виль паськöм-кöмкöт, пöттöдз вердiсö, немöн эз кöритö. Тётка пондiс велöтны племянницасö невнаöн уджавны. Перво тшöктывлiс миськавны бекöрпань, чышкыны джодж, сэсся кайöтлыны ва, песласьны, сёдны пода, уджавны карчйöрын. Мыйöн не работница? Боболь Ваня гозъя сё етшажык пондiсö касьтывлыны непутёвöй Öльöшöс. Одзжык, вöвлi, пуксясö ордчöн, сёрнитöны бедуйтöмöн:
— Пышшис зонным. Чапкис миянöс. Мыйлö сiйö быдтiмö? Пöрисьмам, дак и нянь кусöк некин оз уд...
— Сiдз, Паладь, — согласитчö Ваня. — Не мортöс ми тэкöт быдтiм.
Нёль год ни чулалiс, кыдз мунiс Öльöш, олö кытöнкö городын, гортö эз и вовлы. И нельки адрессö сылiсь некин оз тöд. Но и ен сыкöт, мед олö. Вöлi зон и эз ло. Аймамыс öвтыштiсö киöн, дугдiсö касьтывлыны сылiсь нимсö. Мыйлö сы понда синваэз кисьтны, кöр Мариш эм? Да эшö кытшöм Мариш! Мый тшöктасö, сiйö и керö. Перво быдса год велöтчис, кончитiс восьмилетньöй школа. Сэсся пондiс фермаын уджавны, гортся удж керны. И то эшö дело: кин умöля уджалö колхозын, бригадир Меливасин нылiсь тшöтшкöртiс карчйöррез, эз понды сетны вöв вайны пес да турун, грöзитчис вашöтны дыв деревнясис. А Боболь Ванялö сетö тай! Мариш сымда йöвсö аслас мöссэзсянь босьтö, что чуть да и бöра премияэз сетöны. Кыдз сылiсь дядьсö пондан наказывайтны? Кöть и мырддис Меливасин öтiк карчйöр, сiйö, кöдö кольлiс Ульяна, а мöдсö — пондыв мырддьыны? Некыдз оз туй.
И вот Мариш пондiс асныравны. Бригадир пö сомущайтö мыйкö. Максим бöра колхозö бертöма. Беда!
Горын чалöтöмöн ужгис-сотчис кöс кыдзовöй пес, паськыт бикыв нюлiс горöмсö, мукöдпырся лэбтiсьлiс трубаöдз. Горподыс калитчис сiдз, что койышт кöшись ва, и быдöс кирпиччес потласясö учöтик тороккез вылö. Эта öдын некой пору пизис ва, тöнняся похлёбка пакмис пыдöсöдз, кашничокись петiс тшын. Натьтö, и картошкаыс готов: вот потласьöмась ни вевдöриссес, сотчöмась — кыскыны кад. А Мариша сё узьö и узьö, кыдз вийöм. Пелагея Ивановна сыбура лöгасис, что и видзны сэсся эз вермы асьсö. Сiя лёкись летыштiс жырись ыбöсоксö, кыдз варыш уськöтчис племянницаыс койка дынö. Мариш, тыдалö, неважын только локтöм, чöвтчытöг и водöма кроватьö. И узьö сiя, тыдалö, öддьöн чöскыта: шыннялö, кага моз чупкö тырппезнас. Нiя, тырппес, гöрдöсь, бытьтö краскаöн мавтöмöсь, рожабан йыввес тожö öзйöны, öтiкас шогмöма гöпок. «Басöк кöрöмысла», — думыш-керис тёткаыс. Эта эшö ёнжыка лöгöтiс сiйö, и старуха чирöстiс быд вын:
— Мариш! Да тэ мый этö, а? Тэ дыр эшö пондан? Вот вурышта кыдз!
Кöсыник вöлi Пелагея Ивановна, а голосыс ён, кыз, чирöстiс сiдз, что и кулöм бы саймис. А Мариш вöлi ловья. Сiя чеччöвтiс, кыдз шардöм, тулис синнэз. И кöр тöдiс тёткасö, горöтчис невна ошшасьöмöн:
— Куим куканёк примитi, куим мöс йöвсялiсö! — нывка баитiс горöн, гажöна, ачыс шыннялiс, кыдз тулысся шондi. — А кытшöм ме вöт адззылi! Ой, тётка, кытшöм вöт адззылi! Стрась... Бытьтö вöрын ош менö кутлiс...
— Мый?
Мича шынньöв дзик эз и вöвлы Мариш чужöм вылын, дзик пöльтыштiс тöлок и чышкис сiйö, шынньöвсö. Нывка казялiс, что тёткаыскöт шогмö мыйкö неладно: öмыс пильтыртчöма, кыдз чуман, тырппес шойöтöмась, синнэс, кöдна пыр вöвлiсö быгалöмöсь, талун вдруг тырöмась вирöн, койöны лöг бичиррез.
— Тётка, мый лоис?
— Мый лоис? Луншöрöдз узян и эшö юасян, мый лоис? Может, висьталан, кытi сюраэс ойбыт кыскалiсö? Не чужöй сёдаки...
— Тётка! Ме тай висьталi, мыся, куканнезöс примитi. Ачыт тöдан, мöссэз йöвсялöны öнi. Неважын локтi только. Да тöн жö ме висьталi, мыся, дежуритны очередь.
— Мый?
— Вот тэныт и мый, бытьтö первуись кылö... Маришлöн перыта-перыта вöрисö синлоппес, сiйö и видзöт — брызнитасö синваэз, горшас тасасис кытшöмкö комок.
— Ме жö тэныт висьталi!..
— Ох, согрешеннё! Вот кытчöдз локтi, — шуис старуха да содтiс комö мунiкö: — Асылыс вöлись пондöтчö, а ме кулавлытöдз ни мыдзи. Отсав жö, петав картаас, сёд подасö.
Мариш кышис вывтас, мый шедiс ки увтö, петiс öтöрö. Петiс тэрмасьöмöн, дзик полiс, что сiйö кинкö кутас бöрсяняс, — лишь бы не адззыны тёткасö, сэтшöм сiя нелюбöй вöлi эта минутаö.
Картаын нывка шупыта кайис сарайö, чапкис мöс гидö турун, öшöтчöм кынöма Серанька, кöда неважын только йöвсялiс, уль синнэзöн дзарнитiс нывка вылö, пöльыштiс чужöмö йöв дука руöн. Ордчöн мöдiк гидын, нёштöм голоссэзöн шыасьлiсö баляэз, корисö тожö турунок. Медсайись гидын рёксiс пытшпиа ыджыт порсь, визжитiс лёкгоршöн и грöзитчис павтыртны быдöс картасö, если öнi жö оз петкöтö одзас бур вердас. А сэтчин курöггез, дзодзоггез, сэтöн и куканьыс мексö — тожö эд ловья.
— Мыйлö сымда подаыс? Мыйлö? — шуис Мариш, кöр кылiс быдöс энö шыэсö, этö баксöмсö да рёксöмсö. — Пода тыр карта, а пызан вылö вайны нем.
Эта вöлi быль. Пелагея Ивановна шоча ваявлiс пызан вылö яйтор нето кольть. Только ыджыт праздниккез коста сiя пöжавлiс кольттесö и то лыддьöмöн. И лишь тулысся микола коста мыччисьлiс яя шыд. Остальнöй луннэзö Боболь Ваня сёйлiс кушман да тёритöм хрен, мукöдпырся чöсмöтлiс öмсö солалöм капустаöн, тшакöн. А Пелагея Ивановна да Мариш тöдiсö öтiк картов. Сёйисö сiйö жаритöмöн, пуöмöн, тушитöмöн. Да етша разь кыдз позьö сёйны картошкасö!
— Картов — эта нянь, — важнöя баитлiс пызан сайын тётка. — Висьтав, кагу, енлö спасибо, ась быдтö картовсö.
Нем вöлi вайны пызан вылö. Дак мыйлö жö сымда подаыс? Мыйлö тётка Паладь ой и лун мырсьö — вердö мöссö, кöр пызан вылын некöр абу йöв, мыйлö видзö порссез, садь быртöдз уджöтö ны дынын Маришöс, кöр некöр абу яй? «И ме этö терпита? Тьфу!»
Öбидасянь петiсö синваэз. Нывка нырыштсис швавья столб бердö, кутiс кинас сьöлöмсö. Сiя мöдiс шоччисьыштны, сулалыштны просто сiдз, нем не думайтны. Но керкусис петiс тёткаыс, посöдз вывсянь мыччис помойнöй ведра:
— Пöрöт порсьыслö, ась жоритö. Курöггеслö сюок чапкы.
И пырис бöр. Мариш вердiс порсьсö, сетiс курöггеслö сю, сэсся петкöтiс дзодзоггезлö нöитöм картошка да кöтöтöм няньторрез, öнi кольччис керны эшö öтiк удж, кöдö Мариш медöддьöн эз радейт: чапкыны неыджыт öшынокöт назём. Эта удж бердö кутчисьтöн сылöн пыр дзугыльтчывлiс сьöлöмыс, охота вöлi сьöласьны, öвтыштны быдöс вылö киöн и мунны кöть бы вакрамешö.
Деньга... Деньга... А мыйлö нылö деньгаыс? Боболь Ваня тöв и гожум новйö бырöм йöрнöс да вешьян, умöлик важ зипун да кытшöмкö лось кучиковöй страшнöй малахай. Пелагея Ивановналiсь быдöс паськöмоксö кöть чöрс вылын тресит: куш дöмас да осьта.
Мыйлö нö сэк деньгаыс? Куласö, дак сьöраныс босьтасö? «Тьфу тэ, чёрт! Кöть юр орöт, нем оз позь вежöртны».
Мариш лöгöн свистнитiс виласö сарайö, чöвтiс посöдзын нятьöсь сапоггез да пырис керкуö. Кыдз сiя думайтiс, сiдз и эм: пызан вылын нянь чöвпан, тыр бекöр пуöм картошка... Нет, не сiдз! Вот кашничок сулалö, а сыын — йöв. Мый одзын эта?
— Ог талун мун базарас, мог öтiк эм, — юöртiс тёткаыс. — Сёйышт йöлоксö. Остальнöйсö шöммöтны пуктi.
Мариш вöлi мыдз и сёйис дыша, аппетиттöг. Юрас кокасисö сьöкыт думаэз, лöг петiс тёткаыс вылö. Охота вöлi веськыта дзарнитны жаднöй старуха синнэзö, юавны: мыйлö видзат сымда подасö? Мыйлö маитат асьнытö и меным спокой од сетö? Но важын тöдiс, мыйлö Боболь Ваня гозъя видзöны пода. Нылö колö деньга, öддьöн уна деньга. А мыйлö сiя, деньгаыс? — корсис мöдiк вопрос.
Тöдö и этö Мариш, не учöтик. Тёткаыс быдпырся жевгö: лишньöй копейка кармантö оз бырöт, голя вылö петля оз чапкы, кöть кöр пригодитчас, адззас аслыс туйсö. Ох-хо, деньгатöг, батя, он ов. А вдруг умöлик год пантасяс? Вдруг нянь оз ло? Сэк мый? Тшыгйöн отирыс кулас. А кинлöн деньга, сiя пöт лоас. Нет, спасибо! Боболь Ваня гозъя тöдöны нуждасö, панялыштiсö горесö. Тырмас. Кöркö умöля олiсö, дак öнi кöть невночка красуйтчасö. Не бур олан понда разь пессисö сьöкыт годдэзнас? Хо!
— А ме эд нач вунöтi, — вдруг шыасис хозяйка. — Дядьыт Пальникас мунтöн закажитiс платье тэныт вурöтны. Ась, шуö, гожумсö виль платьеöн панталö...
— Вот кыдз!
— Быль. Тэ рытнас одзжык лок, кыкöн и ветлам сельпоас.
— Платьеэс менам тырмöны, тётка, — мыйкö думайтiкö шуис Мариш. — Да и неохота дядьöлiсь деньгасö видзны. Сылö эд некокнита дöнзьö... Тöн Кона Егорлöн зоныс, Максимыс...
— Максим?! Да тэ мый?
— А мый?
Эта вöлi мыйкö виль. Эта вöлi, пожалуй, вызов.
Вот мыля Пелагея Ивановна лöгасис сiдз, что эз вермы горöтчыны нем.
Районнöй посад ладорсянь ыджыт туй кузя пöльтiсö-локтiсö машинаэз, öтiк, кык... нёль... Кыкыс мунiсö тракт кузя кытчöкö одзлань, а мöд кыкыс кежисö Тубызö, шыбыльтiсö деревня шöрöт, койисö-резiсö нять. Быд машиналöн кабина ыбöсок вылын тöдчöны куим буква: СХТ. Неграмотнöй морт и сiя вежöртас — машинаэс Сельхозтехникалöн. Нiя локтiсö бригаднöй контора дынöдз, сувтiсö. Одзись самосвал кабинаись петiс пашмöм юрсиа, блин кодь гöгрöса чужöма шофёр, шовк-шовк вачкис оча долонь:
— Степан Степаныч! Кытöн тэ, сюртöм кöза?
Бригадир Меливасин мымда прок котöртiс ни ферма ладорсянь, öтiклаын нильдiс да чуть эз тарав канаваö, сыбурна тэрмасис.
— Вайит? Суперфосфат вайит?! Окавны тiянöс готов!
— Иньтö окав. Сiя прокод норасьö, — горöтчис гöгрöса чужöмаыс. — А миянлö мыччав, кытчö ректыны.
— Парник дынö мунö, парник дынö. Ужо, лэдз кабинаат.
Машинаэз вöрзисö. Нiя бöра резiсö öтмöдöрö нять, визжитiсö моторрезöн. Лöз тшынок везъясис быд самосвал бöрын, шовкöтiсö глушителлез. Сiдз некой пору локтiсö кузница дынöдз. Эстöн вöлi неыджыт лог, кытöн сулалiс свальнöй нять. Шофёррез содтiсö газ, мöдiсö сувтчытöг вуджны логсö, да не сэтöн вöлöм. Одзись машинаыс бузнитiс кузовви, нетшкöвтчис одзлань, сэсся бöрлань, дрöгнитiс быдöс корпуснас и лöнис.
— Кытчö тэ менö пыртiн, лешак? — видчис шофёр.
— А тэ кытчö видзöтiн? Колiс бокижык мунны, — дорйисис бригадир. — Но ужо, эн шумит. Отсалам.
Луныс талун вöлi кресення, и сев панытö бригадир сетiс йöзыслö выходнöй. И народ шоччисис: кин не тэрмасьöмöн поленницаö пес тэчис, кин ёг дзимлялiс, а кин и ырöш юис. «Отсаласö я?» — гажтöма думыш керис Меливасин. И сэк жö шынньöвтiс паськыта, кокнита: машинаэз дынö öтмöдöрсянь локтiс ни отир — кыссисö мужиккез, инькаэз, стариккез. А челядь йылiсь и баитны нем. Нiя дзик сэтöн и вöлöмась. Быдöнныс вайисö вöр дорись лыс, потшшез, вöснитик колодаэз, сюйисö быдöс этö машина увтö. Кинкö гарйисис ни колесоэз дынын кöртзырöн. Тубызын народыс дружнöй. Дзик команда сьöртi локтiсö отсасьны, бродитiсö нятяс пидзöсви, не сапоггез, не паськöм эз жалейтö.
— Эй, шофёр! Заводит телегатö! Тойыштам!
И тойыштiсö. Киэз вылын, позьö шуны, и чапкисö, шедтiсö самосвалсö нятись.
— Вот эта вын! — дивуйтчис шофёр. — Вот эта отир! Некин эз кор, а быдöс деревня локтiс!
— Но-но, нем сэтöн дивуйтчанаыс абу. Народ кыдз народ, — ошшасьöмöн шуис Меливасин и пырис бöр кабинаö.
Машинаэз öнi сувтчывтöг мунiсö парниккез дынöдз. Главнöй карчвöдитiсь Кона Егор петiс пельöс сайсянь и, кöр казялiс бригадирсö, неумöля повзьыштiс. «Мый сiя шуас?» Локтiс Егор татчö пемытöн, мöдiс не пантасьны кытчöдз бригадирыскöт, а сiя, видзöт, сэтöн и эм.
— Тэ кысянь? — дивуйтчис Меливасин.
— Э-э, сыбöрын... сыбöрын висьтала. Часöт ректiсьö вот этчö. Э-э... Удобреннёыс öддьöн колö.
— Вот кыдз! Тэ кöр локтiн? Тöн? Мда-а... А ме думайтi, сё шабашничайтан. Вот и стих сочинитi тэ йылiсь. Поди, кывзан?
Кöр Пальник кузя ветлöтан, Кылан только гири-ёр. Этö тшупсьöны кинлöкö Боболь Ваня да Егор. Ох-ох! Тара-рам, Кык шабашник — öтiк срам!
Дзугыльтчис сьöлöмыс Кона Егорлöн, да некытчö воштiсьны, öдззис ваксьыны:
— Бытшöм стихыт! Сiдз и колö меным. Э-э... бура пöжöмыт. Кöть, честнöя шуны, пышши ме Пальниксис...
Машинаэз ректiсисö навес увтö. Кона Егор босьтiс суперфосфатсö тыр кырым, нöитiс сiйö и мыйлöкö нюкайтiс.
— Добро! Öнi обязательство лоас тыртöм!
— Давай тырт! — горöтчис Меливасин. Кона Егор только этö и видзчисис.
Деревняын бригадир висьталiс шофёррезлö спасибо, желайтiс нылö бур туй. Шофёррезлö и быль мунны бы öнi гортаныс, шоччисьыштны тожö кресенняыс увья, но, видзöт, кыкнанныс кежисö Боболь Ванялöн керку дынö. Эстöн нiйö панталiс ачыс Пелагея Ивановна. Сiя курни-верни локтiс гöгрöса чужöмыс дынö, здоровайтчис.
— Но кыдз? — юалiс шофёр.
— А кыдз баитчим, батюшко, сiдз и эм. Деньга вештö и сöвтö.
— Сiдз? А ценаыс?
— Мый тэ, батюшко. Ми жö баитчим городас...
— Значит, розоритны решитiн?! Грех сiдз-ту...
— Кытшöм грех? Назём — этö нянь. А няньыс деньга сулалö.
Шофёр дыр буравитiс хозяйкасö лöг синнэзöн, дзик мöдiс бытшкыны сiйö шучкöп, но недыр мыйись öвсис. Мортлö колö назём. Морт видзö городын карчйöр, кöдö важын ни эз назьмит. А сэтшöм карчйöрын оз быдмы нем. Кытчö воштiсян? Ковсис кыскыны карманiсь деньга, дрöжитана киэзöн сетны хозяйкаыслö. Пелагея Ивановна бытшöмика лыддис и öтмöдöрсянь видзöтiс быд рубсö.
— Спасибо, батюшко, — шуис шофёрыслö.
— Оз ков. Тридцать руб босьтiн назём понда. Кöркö дас руб вылö куим машина неблi.
— Ох-хо! Мый ни кöркöсö касьтывлыны. Кöркö быд хозяинлöн назёмыс тыр вöлi, позис даром нöбöтны. А öнi быдöс колхозыс ыб вылö петкöтö кукуруза увтö. Быд картаись таво му бердöдз зыртiсö.
— Тырмас! Висьтав лучше, кин миянлö отсалас сöвтчыны?
— Господи! Кин отсалас! Да неб четушка — быдöн локтас!
Ыджыт воротаöт машинаэз пырисö карчйöрö, локтiсö назём куча дынö, карта саяс. Эстöн гöгрöса чужöмаыс видзöтiс быдöс кучасö, чужьялiс сапог нырöн.
— Но, Фёдор, ветлы сельпоас, неб инö четушка да кор народсö, — шуис ёртыслö. Ачыс керис чигарка, пуксис подножка вылö куритны. Куритiс öтiк чигарка, сыбöрын мöдiкö. Лöг петiс хозяйкаыс вылö, кöда назём понда курыштiс сымда деньга, охота вöлi кутны сiйö моросöттяс да трекнитны сiдз, медбы коскаэс жиля-жоля киссисö. А Федя эта кадö котрасис деревняыс кузя, кошшис сöвтчиссезöс. Вот пырис öтiк керкуö, Шульга Паша ордö. Хозяин — паськыт пельпоннэза детина — пукалö пызан сайын, юö ырöш.
— Боболь Ванялiсь назём сöвтны? — шуис сiя, кöр вежöртiс, мый корöны. — Тьфу! Да тэ, зонка, кöть аппетитöс эн изводав. Тьфу тэнö назёмнат и четушканат, тьфу!
Петiс Федя эта керкуись, котöртiс мöдiк хозяин ордö. Паськыт тоша дед Уй-Питирим панталiс сiйö оградаын, дыр эз вежöрт, мый баитiсö сылö. Сэсся малыштiс тошсö, серöмтчис:
— Уй, кытшöм богатина адззисьöма! Уй, уй! Четушка небöма... Нет, дона морт, ог отсав. Ваникаыслöн назёмыс дука. Сiя эд, лешачиха, гидас и öтöрасьлö. Уй, кишкаэз мöдрасьöны...
Куимöт керкуын олiс Пахом Игнат, кöдö мöйму пуксьöтлiсö решётка сайö самогон понда. Игнат кывзiс Федяöс гажа сьöлöмöн, кваркыш-кваркыш керис синнэзнас, дульсö чышкис: охота юыштны. Но комись петiс иньыс, топнитiс кокöн:
— Мый?! Вина юны? Вот ме тэнö, дульсмöм синöс, юктала! Вот босьта öшöпек да ылöстöм гырничтö учöтик тороккез вылö жельда. Бöра тюрьмаö охота? Бöра вина бердö?
Игнат кыша-паша чапкис вывсис зипуноксö, кайис гор вылö. Федя эз понды видзчисьны, кöр лöг хозяйка кутчисяс сы бердö, петiс чожжык öтöрö.
Эшö куим керкуö пыравлiс Федя. И быдлаын сералiсö сы вылын, мукöдлаас видiсö, а öтiк оградаын чуть эз травитö понлö. Сiйöн-сорöн локтiс Боболь Ваня карчйöрö, керис тожö куритны.
— Этö кыдз вежöртны? А? — дивуйтчис гöгрöса чужöмаыс. — Ме тэнчит юала: кыдз вежöртны? Кöр сибдiм логас, дак кортöг локтiсö, а сэтöн... И вина вылö, шуан, виш некин эз кер?
— Эзö. Невежöртана кытшöмкö народыс.
— Сiдз! Мый нö кернытö пондам? Не мунны жö простöн?
— Ковсяс аслыным сöвтчыны...
Пöрисьжыкыс босьтiс вила, пурс мöртiс назёмас. Оп! — лэбтiс лöгувьяс ыджыт пласт да шлёпнитiс-чапкис кузовö. Федя тожö кутчисис вила бердö, шуис Боболь Ваникалö:
— Озö тiянöс радейтö деревняас, нёштöма видöны. Мыля бы?
— Завидуйтöны, кага, завидуйтöны. Нiя, лёквиррез, быдöнныс таво сетiсö ассиныс назёмнысö колхозö, а öнi гырдззаэзнысö курччалöны. Но да ладно. Тi ужо, сöвтö, мымда вермат, ме картов гуись мöда лэбтыны. Поди, колö тiянлö картовыс? Верми бы вузавны...
— Ачыт тыткы, — мурзьыштiс пöрисьжык шофёрыс.
— Но сiдз, дак сiдз, — согласитчис Ваника и пырис керкуö.
Пурс! Оп! Шлёп!
Пурс! Оп! Шлёп!
Уджалiсö шофёррез шоччисьтöг, сöвтiсö назём. Кöр бырис садьныс, кыкнанныс юисö четушкасис винаоксö. Сэсся бöра уджалiсö, öтамöд коласын видiсö тубызовчиöс нёштöм кыввезöн, ёрдiсö нiйö.
— Пурс! Оп! Шлёп!
И сiдз павжунöдз. Орисö киэз, визывтiс ньылöм. Но кыдз бы эз вöв сьöкыт, а сöвтiсö тыр машинаэз, нöбöтiсö Боболь Ванялiсь быдöс назёмсö городö.
Öтöрын сё пызитiс-зэрис, лажмыт уль кымöррез сьöкыта уйисö ойвыв ладорсянь, вöлi кöдзыт и гажтöм, а мöсвöдитiссезлöн керкуын гажöн лонтiсис гор и шоныт кöс ру кöвьясис омöн, малалiс чужöм, старайтчис ланьтöтны быдöнöс, кин пукалiс сэтöн, керкуокас. Старшöй доярка Вера Антоновна, кыз вывтыра и рапмöм ни чужöма инька, медбы не сетчыны оныслö, орöттöг печкис вурун, часто зэгöтiс юрнас.
Мариш бытшöмика эз шоччись мöдöдз сутки ни и öнi öдва пукалiс. Кыдз и Вера Антоновна, сiя зэгйис юрсö, часто чеччывлiс местасис и ветлöтiс пельöсiсь пельöсö, петавлiс мöссэз дынö, дозирайтiс куканёккесö.
— Мунiн бы тэ гортат, шоччисьыштiн невна, — шуис сылö Вера Антоновна. — Мöссэтö ми юкталам и вердам. Эн пов.
— Гортын, тётя Вера, и минута кежö пуксьыны оз туй. Кöть ой и лун уджав, сё спокой абу.
— То тай эшö! Кынымись ни баитi: мыччав нылö шиш. Мый, кылыт абу я мый я?
Куимöт доярка, совсем эшö томыник нылочка, пильс-пильс серöмтчис, мыччалiс кинас öшынö да горöн висьталiс:
— Вот видзöтö. Комедия...
Öтöрын шогмис мыйкö былись интереснöй. Деревняыс шöрöт мымда вын котöртiс Ваника. Сiя котöртiс веськыта нятьöттяс, канава сайöдз резiс вачиррез, öвтiс кузь киэзнас, мыйкö, тыдалö, горöтлiс, а мый — эз кыв татчöдз. Вот сiя пидзöсви пырис ва гöпö, проворнöя петiс бöр, лег-лег керис кокнас и вдруг öштiс равновесиесö и нюжалiс туй шöрас. Сы дынын лявгисö поннэз, эрзiсö, готовöсь вöлiсö летны. Но старухалö удайтчис чеччыны, и сiя вились котöртiс, падьялiс, нильдалiс. Öтiк местаын сiя сибдылiс. Ыджыт кирзовöй сапоггез кольччисö нятяс, и старуха невна мунiс кöмтöг. Эта минутаö сiя ёна вачкисис рака вылö, кöдалiсь бöбалöм могись кинкö чегöма бордсö. Нем и баитны, паськöмокыс сылöн вöлi куш нять, эз тыдалö не юрыс, не чужöмыс.
— Беда! Ылöстöмсялiс я мый я? — повзьöм синнэзöн Мариш вылö видзöтiкö, шуис Вера Антоновна. — А, поди, пожар? Поди, мöсыс кулiс да?
Пелагея Ивановна эта кадö локтiс керкуыс дынö, нильдiс и бöра нюжалiс нятяс.
— Мариша-а! Ой, ой, Мариша-а! — ванзiс лёкгоршöн.
Куимнан доярка öтпöвсöн чепöссисö öтöрö, отсалiсö Пелагея Ивановналö лэбтiсьны.
— Мый лоис? Паладь, мый лоис?
— Тётка, тэ мыля сiдз?
— Беда! Ой, ой! Мариш, эд розоритчим мийö! Ох, ох! Господи, господи! Картовка гуас доррезви ва укнитöма!
— Ва? Картовка гуö? Тьфу! — сьöвзис Вера Антоновна. — А ме думайтi, мыйкö лоис.
— Но и мый, пырис дак? — шыасис Мариш.
— Кыдз этö мый?! Эд сiсьмас, сiсьмас! Сто пятьдесят ведра картовкаыс. Ох-ох! Лок жö чапкам васö! Розореннё...
Томыник доярка сералiс синваэз петтöдз, Вера Антоновна сьöласис лöга, а Мариш минута сьöрна и горöтчыны нем эз вермы.
— Ог ме талун мун, — висьталiс вöлись чорыта. — Тэ жö тöдан — ме уджала.
— Кыдз этö он? Эд сто пятьдесят ведра!
— Ась кöть тысяча! — öмалiс сiйö Вера Антоновна. — Нывкаыс мöдöдз сутки ончир эз кер, а тэ кытшöмкö ёрдöм картошкаöн пелитчан. Ах, стыдтöм, стыдтöм! Висьтала ме тэныт, Паладь: джагалан аслат жадностьöн, сiдз и тöд — джагалан. Эд кин вылö тэ вачкисян? Видзöт жö ас вылат: не син, не бан...
Пелагея Ивановна барöтiс быгалöм синнэсö, моросас кыскис воздух, öвтыштiс киэзöн:
— Не тэкöт баита, вежöм! Эн сюй юртö, кытчö оз ков. Эд картовкаыс — нянь. Мый лоас, сiсьмас дак?
— А тэ колхозлö сет, порсьвöдитiссезлö. Нiя и лэбталасö гусис. Сымда жö правленнёыс вештö, мымда базарын килоыс сулалö.
— И-и-и! Велöтан тэ кöин моз уннявны.
— Но и мун сэк татiсь. Эн мешайтчы. Кин тэнö татчö корис? И кыдз тэ лысьтан племянницаыт вылын тешитчыны? Ужо, он кö вежöртчы, бедуйт ас вылат.
— Асьтö тöд, вижлок! Пыр только пиннетö кеслан. А кылыт дзик пон бöж: öтмöдöрö сiдз и кивыляйтö, — эрзiс Боболь Ваника и кöин моз уськöтчис Мариш вылö. — Дак тэ он отсав? И ме тэнö няньöн вердi? Быдтi? Ох, ох! Локтан тэ гортö. Порог дынö матö ог лэдз!
— Эн повзьöтлы, тётка. Верма и не локны...
Эта кадö совсем видзчисьтöг петыштiс керку пельöс сайсянь бригадир Меливасин, паськöтiс киэсö:
— Мый эстöн шогмö? Мыля шум?
Боболь Ваникаöс дзик плетьöн шöрыштiсö. Некинiсь сiя сiдз оз пов, кыдз бригадирись. Чем Меливасинкöт кутчисьны, лучше мунны ылöжык. Сохрани, господи. Кынымись ни грöзитчис вашöтны деревнясис! Пелагея Ивановна чожжык бергöтчис дояркаэс дынiсь и чушки-пашки öдззис бöра котöртны-рöктыны. Котöртiс сiя öнi не гортас, а школалань.
— Öкуль дынö мунö, — висьталiс Мариш.
— Мед вежмасьöны кыкöн, — горöтчис Вера Антоновна. — Кыдз сiйö, кудобасö, муыс терпитö. Некытшöм польза йöзыслö. И диво кутö, кыдз этö тэ, Степан Степаныч, Боболь Ваня гозъялö сермöт он адззы? Дыр эшö ми нiйö терпитнытö пондам?
— Недыр, совсем недыр. Чожа коммунизм лоас. А Боболь Ваня гозъясö коммунизм дынö матö оз лэдзö. Сiдзкö, и терпитны нiйö недыр.
— Да эд нiя кулаккезö пöртчасö. Нылö только воля сет...
— Но этö весь тэ сiдз. Кулакöн öнi некинлö не лоны. Основа абу. Кулаклö колö мый? Унажык му да батраккез, даровöй киэз. Кытiсь нiйö босьтан?
— Боболь Ваня гозъя адззасö. Вон эм...
Вера Антоновна мыччалiс Мариш вылö, мыйöн вайöтiс нывкасö краскаöдз. Сылöн гöрдöтiсö пеллес, бурöй точкаэзöн вевттисис чужöмыс, тырппес вöрисö.
— Ме батрачкаöн некöр ог ло!
— Правильно! Батрачкаöн тэ некöр он ло, — шуис Меливасин. — Эн на вунöт, мый баитi? Мунас, значит, ошыс вöрö тшакла да ягöдла, а нылочкаыс эта кадö скок-скок! — сымда и дело...
Меливасин дыр китшкис-сералiс, хитрöя мигайтiс пöв синнас, кытчöдз эз казяв, что ферма дынö локтö Максим. Зонка оськалiс кузь шаггезöн, перыта. Кöть вöлi нять, а кöмалöма виль хромовöй сапоггез, кышöма виль плащ, и йöрнöсыс вывтас, тыдалö, тожö сниток виль. Мыйöн не жöник? Мариш казялiс сiйö и быдöс чужöмыс пыкнитiс öнi сiдз, что павкöт чигарка — и öзтан...
— Но вот и бур, — шуис Меливасин. — Ужо, ветла Кона Егор дынö, мог эм.
Пелагея Ивановна да сторожиха Öкуль чапкисö картошка гуись тулысся кöдзыт ва. Уджалiсö нiя час-мöд ни, кыкöн лэбтiсö сотня ведра мымда, а кытöн картошкаыс — сё оз тыдав. Ыджытö гусö керöма Боболь Ваня. Уна сэтчö ваыс тöрöма. Лэбтан ведра, кисьтан межа сайö, а гуас сё сымда.
— Беда, нывка, вот кытшöм беда. Сiсьмыны вермас картовкаыс, — ойзöмöн баитiс Пелагея Ивановна. — Розоритчам конецöдз.
— Эн пов, вежань. Нем умöльыс оз ло. Кöркö школьнöй гуö тожö ваыс пыравлiс, дак öтiк картошка эз сiсьмы, — шыасис öкуль.
— Ох-хо-хо... Казённöйыс эд оз сiсьмы. А миян, кыдз на грех, вермас... Вот эд, нывка, кытшöм делоыс.
Öкульлö вöлi пятьдесят гöгöр ни, но жöник сайö некöр эз ветлы, сё эшö лыддиссис девственницаöн, и сылö öддьöн гленитчис, кöр шуисö нывкаöн. Раз нывка, то эшö позьö и жöник йылiсь мечтайтны. Боболь Ваника тöдiс этö, Öкульлiсь мечтасö. Вот мыля и величайтiс крестницасö нывкаöн. Кöр сiдз величайтан, Öкуль пель сайесö адззö и буржыка уджалö. И быль. Уджалiс сiя талун, кыдз ош, Боболь Ваника öтiк ведра лэбтас, а Öкуль эта кадö нёльöтö ни межа сайö пöрöтö. Сiдз уджалыштасö эшö час-мöд, видзöтан, и картовкаыс тыдавны пондас.
— А Маришсö, кöрöмысласö, ме велöта, — шевгис Ваника. — Гуö ва укнитöм, а сiя, пон гöн, и пельöн эз вöрзьöт. Локтас, дак öтiк тылöпöн быдöс юрсисö лета.
— Маришлö мый, — нюмрасис Öкуль. — Сылö бы только зонкаэзкöт...
— Позорита кöрöмыслаöс. Сiдз позорита — öтiк зонка сы вылö дзар оз кер сэсся. Век сылö жöник сайö не мунны лоас.
Баитыштiсö невна, и сьöлöм вылын дзик долытжык лоис. Бöра лэбтiсö ва, кисьтлiсö сiйö межа сайö, видзчисисö, кöр мыччисяс картошка. И кöр Öкульлöн ведра пыдöс гырснитiс картошкаыс кузя, Боболь Ваника чожжыка пырис гуас, пидзöссэзви вöйис ваö. Вöлi кöдзыт, но сiя дзик эз и кыв нем — судзöтiс кынымкö картов, пешлiс öтмöдöрсянь, курччöвтiс пиннезöн — ён!
— Абу эд сiсьмöма, видзöт, бытьтö виль! — радмис сiя. — Буди, сыбöрын разь... Но ужо! Сёравно доброö пöрта. Быдöс тёрита, картошка пизь лоас. Ме сiйö базарö, базарö...
Уджалiсö кык старуха пемытöдз, кыкнанныс вамисö косви, кынмисö. Боболь Ваникалö пондiс ёна писькöтны косас, лыйис моросас, Öкульлöн сяткöтiсö пиннес. Но и сiя бур: ва вöлi чапкöма. Ашын позяс и лэбтыны картошкасö.
— Но вот и дело, — шуис Ваника. — Синнэз полöны, а киэз керöны. Лок жö пырам керкуас. Шонтiсьыштам.
Керкуын Боболь Ваника пондiс лöсьöтны сёйыштны, а Öкуль эта кадö сёдiс пода, высьтiс мöс, лэдзчылiс колодец дынö да кайöтiс гоз ва. Ачыс думанас кыдз кужис, сiдз и видiс Маришöс, кöда увья ковсис талун бергöтны сымда удж. Видiс Маришöс и Пелагея Ивановна, грöзитчис поткöтны сылiсь юрсö, ёрдны Николай Чудотворец одзын.
Ужнайтiкö старухаэз юисö туран брага. Крепыт сiя вöлi, кыдз яд. Öкуль юис быдса кружка, дыр эз вермы ловзисьны. Боболь Ваника нем туйö пöрöтiс тожö кружка и, кöр казялiс, что сiя шонтö умöля, кыскис сундук пыдöсiсь четушка.
— Бöбалыштам невна. Эттшöм удж керим! Öкуль эз откажитчы. Юисö вина, панясисö, ризьдiсö капуста. Сэсся бöра юисö. Сторожиха öдва чеччис пызан сайись. Гортас мунтöн Боболь Ваника эшö юкталiс сiйö брагаöн, кисьтiс туисö йöв. Кадыс вöлi сёр ни. Ваника часто видзöтiс öшынö, видзчисис Маришöс. Ох, кöбы мыччисис! Пелагея Ивановна кодувьяс лешки-вошки бы сiйö керис. Но Мариш эз лок. И старуха ловзисьтöг эшö пöрöтiс рюмка вина да быдса кружка брага. Кыдз сiя кайис гор вылö да пöрис сэтчин — Боболь Ваника этö и ачыс оз тöд. И узис сiя сэтшöм крепыта, что и пушкаöн бы эн вермы саймöтны.
Но кыдз бы эз узь, кыдз бы эз потлась сылöн юрыс, старуха чеччис, кыдз и тöн, öддьöн одз. Картаын эз на базанит петух, льöмпу уввез коласöт керкуö нёджжасис тöлiсь. Пелагея Ивановна тура-тара локтiс пызан дынö, кималасöн адззис спичкаэз, öзтiс лампа.
— Господи, помилуй. Господи, помилуй... Оа-хо-ха-а-ай...
Кöр молитва вöлi кончитöм, Ваника локтiс гор дынö, шумöн босьтiс заслонка, свистнитiс сiйö джоджö. Трон-н-н! — керис кöртыс. Сэсся старуха чужйис пустöй ведраö, босьтiс ухват да быд вын сöтiс мöдiк ведра кузя.
— Мариш! Да тэ мый этö?! Чеччан али он? Мыля горсö öнöдз он лонт? Вот ме тэнö!
Ёна шумитiс старуха, а Мариш нем бытьтö оз и кыв, оз и думайт чеччыны. Сэк Пелагея Ивановна, кыдз и тöн, лёкись ванйöвтiс ыбöсоксö, варыш моз пырис учöтик жырокö, локтiс племянницаыс койка дынö. А сiя, койкаыс, пустöй. Не перина, не одеяло. И Маришлöн мöдöтчаннэс, кöдна пыр öшавлiсö стул вылын, абуöсь. И ачыс Маришыс абу. Дзарнитiс старуха бытшöмика — джоджын окурок валяйтчö. Кинкö куритiсь морт ойнас пыравлöма. «Максим! Некинлö сэсся. Сiя, зырымöсь бедь, куритö...»
— О-о-о! — чирöстiс Пелагея Ивановна и шлёпкисис джоджö.
Сэтчö и пырис сторожиха Öкуль. Бур юöрöн сiя некöр эз вовлы. Сiдз и талун.
— Беда, вежань! Ог и тöд, кыдз висьтавнытö... Маришыс, öнджаыс, Кона Егорö мунöма. Ойбыт талун пируйтöмась. Свадьба пö...
— О-о-о! Начкылiс, начкылiс, вежöм. Ловйöн муö сюйыштiс... О-о-о! Вай жö, вай чожжык! Ылöстöмсяла. Ох!
Öкуль вежöртiс, мый сысянь корöны. Босьтiс пызан вылiсь кружка, гумыштiс корчагаись туран брага, мыччис хозяйкаыслö. Пелагея Ивановна юис, кыдз вöв, пöрöтiс быдöс, а садясьны эз вермы. Сiдз и пукалiс джоджас, кыдз увья палитчöм мыр, кваркышалiс ылöстöм синнэзöн, ойзiс.
А Кона Егор керкуын мутшкöтiс джодж, чаналiсö пеллез. Зыкыс, натьтö, Пальникöдз пуктiс веськыта Боболь Ваня пеллезö. Бригадир Меливасин чуть да бöра чирзiс «курыт!», окасис Кона Егоркöт, баитiс довольнöя:
— Вот и бур! Керимö дело и ладно. Кык кöч, позьö шуны, кутiмö: виль семья арталiмö и Боболь Ваняöс даровöй киэзтöг колимö.
— Э-э, Боболь Ванясö он повзьöт. Оз эд, натьтö, вежöртчы. Горшви ни нятяс пырöма.
— Вежöртчас. Вот локтас гортö и висьталам сылö: кулакöн öнi некинлö не лоны. Басни абу...
Дата добавления: 2015-11-16; просмотров: 50 | Нарушение авторских прав
| <== предыдущая страница | | | следующая страница ==> |
| БОБОЛЬ ВАНЯЛÖН ШАПКА | | | Куимöт глава |