Боболь Ванялöн шапка

ПОВЕСЬ

ПЫТШКÖС:

Кык шабашник

Кулакöн öнi не лоны

Кошмар

Куим чунись агрегат

Ванялöн шапка

Медодзза глава

КЫК ШАБАШНИК

(дзар кер: одзза вариант)

Эшö кынымкö лун бöрланьын Ваняöс адззылiсö Тубызiсь. Ветлöтiс сiя аслас керку дынын и ыджыт кöртзырöн чукöртiс ёг, кöда петöма тöвся столаэз увтiсь. А талун сiя дас верста ылынаын ни: уджалö Пальник посадын, тшупö пальниковскöй фельдшерлö виль керку. Вот, сруб вылын пукалiкö, вылына сiя лэбтiс черсö, паськыт моросас кыскис унажык тулысся уль воздух и камгис-сöтiс кер кузя. Уп! — керис пуыс, дзик ружтыштiс и юалiс, мыля сiйö дойдöны. А Ваня сöтiс ни мöдöтпыр, куимöтпыр, сэсся öдззис и öдззис. Гырись чаггез, дзик бордаöсь, ылына лэбзьöны срубыс вывсянь, увгöны и шутнялöны, тыртöны русö сир дукöн. Мöд пельöсас камöтö черöн кöсыник старичок Кона Егор. Кыкöн нiя медасисö удерлун тшупсьыны — удерлун только! — а талун, видзöт, дасся унажык ряд куйлöны ни öтамöд вылын, куйлöны сiдз, дзик лякöмöсь. Бура уджалöны Ваня да Егор, перыта. Вит-квать минута камöтiсö черрезöн, и угöввес готовöсь. Öнi колö лэбтыны керрез, пуксьöтны нiйö тшупöттэзö да сэсся пазитны.

— Но, Егор, лэдзчам я мый я, сэтöнкан, лэбтам керсö, — корö Боболь Ваня. Ачыс дöраовöй кеписьöн чышкис тшупöтсис поснит чаггез, пöльыштiс сэтчö, бытьтö кузнечнöй мех ушнитiс. Егор эшö кынымиськö сöтiс черöн, тожö чышкис быдöс ёгсö, треситыштiс тошокöн.

— Готов.

Кык плотник лэдзчисö му вылö.

Неöткодьöсь вöлiсö эна морттэс. Боболь Ваня — богатырь, лешак; Кона Егор — винерик, векнитик чужöма, учöтик мыгöра. Но кöр дзарнитiсö асланыс киэзöн тшупöм сруб вылö, кöр казялiсö, кытшöм бытшöма пукалöны одзжык лэбтöм керрес, — шынньöвтiсö öтмоз довольнöя, паськыта: вот пö кытшöмöсь мийö, вот кыдз колö уджавны.

— Но вот, дас руб эм бöра, — чикыртiс синнэсö Боболь Ваня и вдруг содтiс: — Эх, сотана! Мыйлö только виль деньгасö лöсьöтiсö. Дас руб! А одзжык вöлi бы сто руб. Во кыдз! Год да джын ни чулалiс, а сё ог вермы велавны виль руббес дынö. Учöтöлöсь нiя...

— Зато дасiсь донажыкöсь... Э-э...

— Сiдз-ту сiдз да...

Удерлун, кöр фельдшер медалiс нiйö тшупсьыны, кык плотник редитчисö босьтны быд ряд понда дас рубöн. Хозяин невна споритыштiс жö, но кытчö воштiсян? Чукöртны помеч — не етшажык петас. Да и тулыс öнi, чожа сев пондöтчас, колхозниккез öдва ли согласитчасö помечавны. Сэтчö жö правленнё каверзитчыны пондас, висьталасö эшö: фельдшер, а бöбöтлö колхозниккесö аслас керку дынö, öштöма стыдсö. Думайтыштiс-керис сiя и согласитчис. Дас руб, дак дас руб — мый нö керан? И вот, луныс пондöтчö вöлись, а плотниккез карманын дас руб эм ни. Тöн нiя тшуписö вит ряд да удерлун сымда жö. Видзöт, мымда заробитiсö ни!

— Талун вит рядсö тшупамö бöра, пожалуй, — бобгыштiс Ваня и малалыштiс перво тошсö, сэсся кынöмсö. Малавны вöлi мый: тош гöгви, а кынöмыс буждöма вешьян гасникыс вевдöрöт, öшöтчöма торшень моз. — Вит ряд, мыся, тшупам! Этö лоö пятьдесят руб. Öт джыныс меным, мöдыс — тэныт... сэтöнкан...

Кона Егор тожö волькöтыштiс тошоксö.

— Э-э, унаöв, поди, лоас да. Быд лун вит ряднас сьöкытöв жö эд кыкöн-ту...

— Но, пондöтiс! — лöгасис Ваня. — Вит ряд — и точка! Тэ висьтав, мыйлö татчö локтiн? Деньга шедтыны? То-то жö... Кöркö томнам строшнöялi Якунь Иван ордын, дак кыкöн сыкöт, покойнöйкöт, дас рядöн луннас тшуплiмö. Вот кыдз уджавлiм. А тэ — унаöв...

Егорлö охота вöлi споритыштны, но эз понды. Вит ряд, дак вит ряд. Лишь бы деньга унажык шедтыны. И не только унажык, но и чожажык. Морт шедiс бедаö: зонсö не талун, дак ашын пуксьöтасö решётка сайö, оз кö вешты растрата. Уджалiс зонкаыт сельпоын заготовительöн и вот — юöма, каналья, винаок да и öштöм документтэсö, öштöм сто рубся унажык казённöй деньга да эшö кодувьяс быдса телега кольттез рез-паз керöма. Беда! Мöдiс Кона Егор мöсоксö вузавны, да иньыс герьявны öдззис. Ветлiс Егор öтiк-мöдiк ордö — вит рубся унажык некин одзöсöн оз сет: абу пö. А зоныс öнi места оз адззы, готов петляö пырны. Думайтны только: пыр мечтайтiс свадьба йылiсь, невеста бурö адззöма, а сэтöн тюрьма. Мый керны? Думайтiс, думайтiс Егор и мунiс Боболь Ваня дынö. Деньга одзöсöн сiя, конечно, эз сет, но спасибо Бобольлö: адззöм шабашка и примитiс компанияö. Только сорасис, тыдалö, Егор: вон тшупсьö куимöт лун, и куимöт лун сьöлöмсö каннез гыжьялöны, моросас ыждö и ыждö кытшöмкö тревога. Мед öддьöн ни потласьö сьöлöмыс талун, дзик умöльтор мыйкö кылö...

Керыс, кöдö бöрйисö лэбтыны сруб вылас, вöлi веськыт, но öддьöн кыз дына. Сiйö, дынсö, ковсис лöсйыны, сэсся гогнавны. Боболь Ваня шупыта волькöтiс быдöс, а Егор, ассис думаэсö думайтiкö, бытшöмика ровняйтiс ув местаэз, мукöдлаись дзимлялiс культöм кач, сэсся сöтiс обухнас керыс кузя. Пу вöлi кöс и гора, кыдз барабан. Сэтшöм пу вылö видзöттöн быд плотниклöн öзйö сьöлöм, сэтшöм пусö любо и рядö пуктыны.

— Лэбтам! — горöтiс Ваня. Ачыс босьтiс зор, быгыльтiс керсö. Гым-гым-гым тарöвтчис сiя потшшез кузя и ёткисис сруб пельöссэс бердö. Эстöн кыкнанныс кутiсö перво дынсö, пондiсö лэбтыны. Басöк керыс, а сьöкыт. Егорлöн пöльтчисö рожабаннэс, вевттисисö бурöй точкаэзöн, коккес дрöжитöны. Зато Боболь Ваня дзик эз и кыв сьöкытсö: дундöтчыштiс невна и — оп! — кер конецыс лоис сруб вылын. Йывсö сылiсь лэбтiсö совсем ни кокнита.

— Гезокöн бы колiс... öнджа... сьöкытöв этадз-ту, — горöтчис Егор. — Кила вермас петны.

— Тьфу тэнö! — сьöвзис ёртыс. — Эттшöм потшшесö гезокöн пондам лэбтавны, дак курöггез серавны öдззасö. Висьтала ме тэныт, Егор: кишкаоккет — ой-ёй — сунис только и керны бы ныись. Эта разь кер? Эта — потш! Якунь Иван, покойнöй, вугыршаттез вылö кызжыкöсь ваявлiс. А ноко, лэбтам эшö мöд стена вылас!

Лэбтiсö эшö öтiк кер — басöкö, ровнöйö. Сэсся чышкисö кеписсезнаныс кымöссэз вылiсь ньылöм и кутчисисö пазитчыны. Ваня уджалiс перыта, дзик не уджалiс, а орсiс чернас. Сiя син одзын ошшасис выннас, вöлi довольнöй тошнас, аснас, и кöть кин бы казялiс, сьöлöмас поздiсисö песняэз. Думайтны только — кыдз ряд, сiдз дас руб! Егор лолалiс пыдына, сьöкыта и керасьтöнняс гажтöма видзöтлiс деревня сайись ыббез вылö, кöдна кушамисö ни лымсянь и öнi паритiсö тулысся шондiыс увтын. Егорöс сё ёнажык и ёнажык кыскис гортас, Тубызö. Уджыс öнi колхозын тыр. Колö парниккезö назём тэчны да сьöд му, колö эшö öтпыр капуста кöдзыс проверитны. А сэтöн нювсьы сруб вылын.

— Эх!.. öнджа...

— Тэ мый, Егор? — кылiс сылiсь ыш лолалöмсö Боболь Ваня.

Егор шы эз сет паныт. Сiя лöгöн тюкöтiс черöн и жагöник пельдöтiс пазсис свежöй вирöма вöснитик чаггез.

Тубыз деревняын, аслас бригадаын, Кона Егор лыддиссис медхозяйственнöй мортöн, медбур колхозникöн, и кынымкö год бöрланьын сiйö пуктiсö главнöйöн карчвöдитiссез дынö. Егор арталiс парниковöй хозяйство, небзьöтiс муэз, кыскалiс унажык торф да назём — быдöс керис сiдз, кыдз велöтö наука, и пондiс босьтны вöвлытöм урожайез: гожумбыт вузалiс городын огуреццез, лук, арнас машина бöрсянь машина иньдалiс помидоррез, капуста. Правленнёын сiйö ошкисö, гижлiсö сы йылiсь газетаö. Таво районнöй совещаннё вылын Егор босьтiс обязательство: быдтыны быд гектар вылын триста центнерöн капуста. «Молодец!» — шуис сэк райисполкомись председатель.

Молодец! Вот тэныт и молодец. Медсьöкыт кадö, кöр ой и лун колö теплицаын да парниккез дынын уджавны, Егор мунiс шабашничайтны, колис звеносö. Позор! Ох, кытшöм позор!.. Кылас районнöй начальство, дак тшöктас колхозiсь вашöтны. А мыля сiдз петiс, кин виноват? Зоныс! Сiя, каналья, трескöма вина, öштöм казённöй деньга. Адззöм тожö дружоккесö посадас... А эд кытшöм зонка вöлi! Кытчö бы эн иньды, мый бы эн тшöкты керны — быдöс кисис петiс. И вот на тэныт — юöма вина. Мыля?

Кынымкö год бöрланьын Максим, Егорлöн зоныс, кончитiс сизимöт класс. Медбы гожумнас весь не чужьявны тöвсö, зонка кутчис уджавны прицепщикöн. И велалöма сiя механизаторрез дынын нельки рулитны тракторöн. Тулыснас, школасö кончитöм бöрын, мечтайтiс мунны техникумö, а арнас вдруг явитiс:

— Некытчö ог мун. Понда трактористöн уджавны. Велöта машинаэз, а сэсся...

Трактористöн дак трактористöн. Кона Егор думайтыштiс-керис и согласитчис. Велöтчыны некöр не сёр.

Уджалыштас год-модсö и техникумö позяс мунны. И уджалiс зонка. Бура уджалiс. Сэсся служитiс армияын. И кöр локтiс гортö, бöра уджалiс колхозын. Но вот мöймуся засушливöй годö эз шогмы нянь. Колхоз öдва-öдва бергöтiс кöдзыссö и трудодень вылö сетiсö совсем етша. А деньга почти немымда эз дöнзьы. Сэк Кона Егор и керис ошибкасö, кöда понда öнi вештiсьö. Корис сiя зонсö дынас и висьталiс:

— Ме — мужик. Ме чужи ыб вылын, век мусö гöри да кöдзи, вексö, э-э, видзси му бердас и торйöтчыны сы бердiсь ог ни вермы. А тэ — том и грамотнöй. Давай, кошшы бытшöмжык удж, адззы места, кытöн шедiс бы деньга. Ачыт пöт лоан и меным отсалан. Адззан, нянёкыс таво... э-э...

Максим учöтсянь кывзiс айсö, веритiс сылö, некöр эз сувтлы поперёк. Эз понды пыксьыны и öнi. Кöть и дзугыльтчис, тыдалö, сьöлöмыс, но колис ассис тракторсö, мунiс сельпоö. И вот — тшыксьыны пондöма. Да и кыдз не тшыксьыны, кöр нелюбöйö уджсö керан? Мöдiк, может, и бур заготовительöн вöлi бы, кинлö уджыс эта, шуам, сьöлöмви, а Максимлö? Сiя машинаэз любитö, сэк машинаэз дынын и уджöт. Вежöртiс öнi Егор, да мый то керан. Кидтiс зонсö муыс бердiсь, как раз сы бердiсь, кöда мортсö юкталö-вердö, вын быдöнлö сетö. Калькöтiс. И вештiсьö муокыс, мыля сiйö öбидитiсö. Вот и ковсьö сруббез дынын нювсьыны. Баитö эд йöзыс: беда некöр öтнас оз вовлы. Быд беда, кытшöм бы сiя эз вöв — ыджыт нето учöт — кыскö сьöрас мöдiк бедаöс. Перво зоныс вылö усьöма, сэсся и Егор юр вылö камгисис, шабашничайтны тшöктiс мунны...

Эм деревняын олiссезлöн привычка: если тшупсьö виль керку, то обязательно вовлöны да видзöтöны, кыдз сiя тшупсьö. Мукöд морт тэрмасьö кытчöкö аслас делоэзöн, сiдз пöльтö-мунö, кажитчö, и минута сылö жаль öштыны, а кылас черрезöн камöтöм да казялас сруб вылiсь плотниккезöс, — и, видзöтан, кежис ны дынö. Мортлöн йитсьö виль керкукöт виль олан йылiсь мечта, йитсьöны виль думаэз, виль счастье и не интересно разь дзарнитны, кыдз шогмö эта счастьеыс, виль оланыс? Кежас боки мунiсь, висьталас тшупсиссезлö: «Удача да кокнит пуэз тiянлö!» — и сулалö. Мукöд сiдз ылалас видзöтны ловкöй плотниккез вылö, что совсем вунöтас аслас срочной делоэз йылiсь: öзтас чигарка да и сулалас казявтöг кынымкö час.

Кона Егор тöдiс этö привычкасö и перво öддьöн полiс, что пальнишана спокой оз пондö сетны, быдыс пондас кежны и видзöтны ны вылö. Полiс, что локтасö тöдсаэз — Пальникын почти быд олiсьыс Егорлö тöдса — здоровайтчасö Егоркöт и кутчасö осудитöмöн качайтны юррезöн: «И тэ шабашка вылö инмин?..» А мöдiк, может, шуас: «Ха, эта не Кона Егор ли сэтöн?!» Эх, олан, олан...

Но вот тшупсис öтiк ряд, тшупсис мöдiк, куимöт. Вот одзза срубыскöт ордчöн лэбö мöдöдз ни, а ны дынö некин эшö эз кежав, некин эз здоровайтчы и некин эз шу: «Кокнитжык керрез тiянлö». Мыля бы эта? «Осудитöны, — вежöртiс Егор. — Умöлик морттэзöн лыддьöны. А умöль морткöт охота разь кинлöкö баитны?»

Егор пöв синнас нёджжöвтiс ёртыс вылö и бöра ыш ловзисис. А Ванялö мый? Нем сылö абу. Орсö чернас и лыддьö, натьтö, кыным копейка заробитас керыс кузя быд сöтöм понда. Сьöкыт уджавны ордчöн сэтшöм мортыскöт, недолыт. А кытчö воштiсян? Кинöс сэтöн винитны пондан? «Ачым, ачым виноват!» — вдруг муркнитiс Егор да сэтшöм вынöн камгис-сöтiс керыс кузя, — нельки киэс дрöбалiсö.

Павжунöдз тшуписö куим ряд. Кыкнанныс атшалiсö-мыдзисö, люзьва пымалiсö. Боболь Ванялöн пашмöм тошись кайис пар. Ыджыт ньылöм воть летъялiс ныр конецас, син одзын польдiс — и тёп — усис чаг вылö. Лось кучиковöй малахай увтсянь сiдзжö петiс пар, визывтiсö ньылöм воттез. Луныс вöлi жар, а Ваняыс, чёрт тöдö мыля, эз на и босьтлы юр вывсис шапкасö. Пыдына лолалiкö, не тэрмасьöмöн сiя гöгöртiс срубсö, дзарнитiс быд пазö, любуйтчис уджнас. Егор, кер вылын пукалiкö, думайтiс гажтöм думаэз.

— Но, сэтöнкан, онмöссин тай, некö, — локтiс сы дынö Ваня. — Сёйыштны, зонка, колö, куим ряд тшупим, тридцать руб заробитiм. Деньга! Хо...

— Рытнас... э-э... гортö муна, — шыасис Егор.

Боболь Ваня дивуйтчöмöн осьтiс öмсö:

— Егор, тэ мый, сэтöнкан? Ноко пешлы юртö, абу я пым? Да кыдз жö сiдз: редитчим кыкöн, редитчим...

— Мунны, мыся, колö. Ог вермы сэсся.

Ваня чöлöмöн минута дырна буравитiс Егорсö синнэзнас, сэсся сьöвзис кок увтас — «Совсем, некö, ылöстöмсялiс!» — мöдiс шуны Ваня, да дульыс каттисис тошас, лякис тырппесö, и му вылöдз эз усь, конечно, öтiк воть.

Павжнайтны пырисö керкуö. Фельдшерлöн хозяйкаыс, мича чужöмбана томыник ичмонь, пуöма яя шыд, пызан вылö вайöма солалöм капуста, луккез, шöралöма небытик шогдiовöй нянь. Чöскыт дук пöльтыштiс ныррезö, вöрзьöтiс дуль. Боболь Ваня виш-виш керис, шлёпнитiс тырппезнас:

— Мыдзсьöма, лешак. Киэзö тувдöмась.

— Вешшö пызан саяс, сёйыштö, — паннезöн жольöтiкö рочалiс том хозяйка.

Кык плотник гывьялiсö умывальник увтын сирöн ляксьöм киэзнысö, малыштiсö чужöммез — и пызан сайö.

— Э-э, шапкатö, шапкатö... öнджа... — горöтчис Кона Егор, кöр казялiс, что ёртыс шапкаöн и пелитчис ен угöлас. — Не кабакö эд, э-э... пырин.

— Быль эд, вунöтi, — согласитчис Ваня. Сiя босьтiс юр вывсис малахайсö, дзар керис сы пытшкö, бергöтлыштiс ныр одзас и вöлись сюйыштiс ас увтас. — Но вот...

Не öткодьöсь вöлiсö кык плотник. И сёйисö нiя не öтмоз. Боболь Ваня шамыртiс киас чуть ли не джын чöвпан, табанитiс öмас и давай масьтыны. Егор чегöтiс неыджыт шöрöм, курччöвтiс пинь йыввезнас.

— Няньыс небыт, бур. Не кöркöмоз керöны öння хозяиннэс, — бронгис Ваня. — Якунь Иван, покойнöй, помеч коста пыр ваявлiс пызан вылö чорыт нянь и шöравлiс сiйö вöснитика-вöснитика, шöрöмыс шучкöп тыдалö. Вöснитика шöралöм чорыт няньтö помечанин етшажык ештö сёйны.

— Мый жаль я мый я няньыс вöлi? — интересуйтчис хозяйка.

— Да кыдз не жаль. Нянь — нянь и эм, туй вылын оз валяйтчы. Вöвлi, пуксян гöртöн павжнайтны, дак Якунь Иван перво турун сёйлiс. Тшыгувьяс.

— Турун?!

— Мыйнö. Нетшкас остожьяись небытик петассэсö, бöрьяс бытшöмика да öтiк листокöн и чапкалö öмас, нямлялö и ошкö: «Видзöт жö, кытшöм чöскыт, кыдз ма». И работниккеслö тожö тшöктывлiс перво турун сёйны. Вöлись и нянёк сетас.

Ваня висьталiс этö ыджыт охотаöн, дзик мöдiс мыччавны, кытшöм экономнöйöсь вöлiсö кöркö богатöй хозяиннэс. Ачыс сё гардiс и гардiс, бытьтö быдса год тшыгйöн олöма. Перво марскис-сёйис джын бекöр капуста, ньылыштiс кынымкö лук, сэсся вырскис кык бекöр шыд. Хозяйка öдва ештiс котрасьны гор дынсянь пызан дынöдз, сё содталiс и содталiс Ваня бекöрö. «Розореннё тай сыкöт! Ох!» — думайтiс котрасьтöнняс.

— Бура тэ, Иван, изан, верман эшö сёйнытö, — завидуйтiс ёртыс аппетитлö Кона Егор. И медбы эта комплиментöн не лöгöтны сiйö, тэрмасис содтыны: — И тшупсян тэ... э-э... öддьöн бытшöма. Сiдз жö уджалiн бы колхозын, дак...

— Öмтö осьт да видзчись, — тош бердсис поснитик крöшкиэз да капустачиррез мездöтлiкö, шыасис Ваня. — Вот тэ пыр колхозын уджалан и, кывсьö, неумöля пö уджалан, а кынымкö сотня руб растрата вештыны он вермы. Видно, уна эд заробитан...

— Э-э, сякöйыс овлö. Ачыт тöдан, засуха мöйму вöлi...

Боболь Ванялöн öмыс вöлi тыра и эз вермы сразу шыасьны. А кöр ньылыштiс быдöс, шуис:

— Не засухаын делоыс. Дело, Егор, сыын, что тшыкöтiм ыббезнымöс. Вокорень тшыкöтiм. Кукуруза кöдзам, а быдмö йöн. Кöркö сабаннэзöн гöрим, да нянь сёйим. А öнi тракторрезöн. Якунь Иван покойнöй...

— Но, öдззис! — öмалiс ёртсö Кона Егор. — Якунь Иван да Якунь Иван! Тöда ме сiйö тожö. Йöз киэзöн любитiс няньсö быдтыны. Кулак вöлi.

— Не кулак, а хозяин! — эз сетчы Ваня. — А öнi кин хозяиныс? Кинлöн дышыс оз пет, сiя и пуктö асьсö хозяинöн. Вот лоас эшö одзлань сiдз, дак кулам тшыгйöн, сымда и дело. А тэ — гортö муна, колхоз! Тэ вот мый, Егор: чапкы этö думатö, сьöвзьы сы вылö. Тшупсьыштам лун-мöдсö и деньга заробитам.

Хозяйка ыджыт вниманнёöн кывзiс нiйö и думайтiс ас кежас: «Кык кырныш, а кокалöны öтамöдлiсь синнэзнысö». А Ваня сёйис и баитiс:

— Тшыксьö öння йöзыс. Син одзын тшыксьö. Вот тэ, Егор, аслат векын, поди, бутылка вина эн ю, а зоныт, страмеч, пируйтны лэдзчисьöм. Эта разь дело? Тэныт бы колiс плеть босьтны да шöравны спинасö: эн дурит, сэтöнкан, ов морт моз... А тэ, старик, деньга сылö шедтан да эшö тöждiсян: тюрьмаö, шуан, пуксьöтасö... А босьт менчим зырымöсь бедьсö, Öльöшсö. Мыйöн буржык? Локтiс армияись и сразу жö куим чунись агрегат ныр увтам: «Ог ме понды тэкöт плотничайтны, городö муна!» Этö кин сiдз керö? Позьö разь айöс не кывзыны?

— Дак кытчö эд велöтан, — шынньöвтiс тырп дорнас Егор. — Э-э, бурö велöтан, дак кывзiс бы... Ачыт сiйö велöтiн, сё городöн дозыляйтiн.

Ваня вежöртiс, кытчö сiя кöстö, и нёджжöвтiс осудитöмöн: сьöкыт пö тэкöт артавны солиднöй баснисö. Сэсся бöрйис тарелкаись кызжык нянь шöрöм, курччöвтiс джынсö и мурзьöмöн öдззис вильöтны пöжсьöм коска. Но кöть тыра вöлi öмыс, а бронгис одзлань:

— Тшыксьö, мыся, том йöзыс, вокорень тшыксьö. Вот и Мариш оз кывзы менö. Иньда вöлi правленнёö счетоводавны, дак сiя дзик лякасис мöссэз бердö. Тожö эд ум. Грамотнöй морт и вдруг мöссэз дынын! Кыдзкö шуа вöлi, мыся, давай-ко вайöт гортö мужикöс, пондам öтлаын овны... Кытчö тэ! И синöн бöра эз кваркышт. Вот кытшöмöсь томмес лоисö, сэтöнкан.

— Дугды. Эн ни кулитчы, — öмалiс сiйö Егор. — Не миянлö томмесö велöтны. И висьтала тэныт: оз вайöт племянницаыт жöниксö тiянö, жöникыс ордö овны мунас.

— То тай! Этö мыля? Нет, оз сiдз вермы лоны. Ми сiйö быдтiм, ми и висьталам, кыдз керны. Оз сiя миянöс вермы öтнанымöс кольны. Право сэтшöм абу. Пондывлiс тай зоныт туйсö тальны, да мый петiс? Шиш! Тюрьма заробитöм.

— Ме сэтöн виноват, ме, а не зонö... Но ужо, эшö видзöтам...

Мöйму, кöр Кона Егорлöн зоныс локтiс армияись, сiя первöй делоöн кежис Мариш дынö, Боболь Ванялöн племянница дынö. И нем дивуйтчыны. Быдмисö нiя öтiк деревняын, велöтчисö öтiк школаын. Армияын служиттöн зонка чуть да бöра гижлiс Маришлö письмоэз, шуис сiйö быдкодь нежнöй кыввезöн, а медбöрья письмоэзын — невестаöн. Мариш аккуратнöя отвечайтiс быд письмо вылö. Вот и быдöс. А мый эшö? Недель бöртi солдат думайтiс ни лöсьöтны свадьба. И как раз эта кадö Кона Егор иньдiс сiйö сельпоö. Кывсис, Мариш висьталöма сразу: кытчöдз пö он лок бöр колхозö — свадьбалö не лоны. И дзик пуртöн орöтiс — дугдiс пантасьлыны Максимкöт. Может, эта горесянь и юис зонка винасö? Кин тöдö.

— Да, ме сэтöн виноватыс, ме! — шуис Кона Егор и ыш ловзисис.

Сiя чожа пöтiс и висьталiс хозяйкалö спасибо. Боболь Ваня чапкис коскасö, эшö тарскнитiс паньнас пустöй бекöр бердö.

— А мый, ягöд тусиньöй, абу я тэнат кушманок? Видзöтышт-ко.

— Кушманок? — дивуйтчис хозяйка.

— Мыйнö. Сёйи, сёйи, а сьöлöмö дзик эз бурмы. Стрась кушманоксö радейта. Вын содтö.

Хозяйка пыралiс джоджулö и петкöтiс ыджыт кушман. Вундышт сылiсь бöж йывсö и пöттöдз сёян. Но Боболь Ваня тшöктiс весöтны быдöс. Хозяйка весöтiс и думайтiс радъялöмöн: «Öнi пöтан, небось!»

Тёритны кушмансö Ваня кутчис ачыс. Пуктiс öлöдзас бекöр, жмитiс сiйö пидзöссэзнас, лöсьöтiс бытшöмика тёрка да изiс бекöрас доррезви. Сэсся корис кöдзыт квас, кисьтiс невна кушманас, сорлалыштiс паньöн, содтiс луккез, солалiс — и сёян вöлi готов. Сэтшöм сук — пань оз тöр. Керкуын лолавны лоис немöн. Нёштöм дук кöвьясис воздухас. Хозяйка несйис и тулис курöтöм синнэсö. А Ваня, бытьтö нем эз и вöв, öдззис панясьны.

— Бур, öддьöн лöсялö, — пильтыралiс öмсö. — Вот ежели, шуам, содтыны этчö эшö чöснöг да джын кырым мымда тёритöм хрен, нем бы сэсся эз ков. Нельки яй оз ков.

Медбы не адззыны, кыдз сiя сёйö, хозяйка висьталiс кытшöмкö мог и петiс öтöрö.

Кона Егор пуктiс юр вылас фуражкасö и тожö — чожжыка ыбöс сайö.

А Ваня кольччис панясьны.

Öдва ештiс Кона Егор петны öтöрас да сьöкыт кушман дук бöрын тыр морос кыскыны тулысся небытик воздухсö, кыдз фельдшер керку дынö кежис ноёвöй зипуна да кузь пеллеза дзелёвöй шапкаа пöрись морт. Конувтас сiя видзис кыз почтальонскöй сумка. Дзарнитiс Кона Егор эта морт вылö и пикнитiс сьöлöмыс: «Тöдса!»

— Егор сват? Здорово, мужик! — шынньöвтiс почтальон и нюжöтiс кисö.

— Здорово, Прокоп! — паныт горöтчис Егор. Горöтчис приветливöя, шынньöв пыр, керис вид, бытьтö рад пантасьöмыслö, а ачыс думайтiс: «Кыскалöны тэнö сюраэс».

— Кылi, тшупсян пö татöн, и вот кежи, — баитiс Прокоп. — И не пустöй киэзöн. Йöкты, мужик! Бур юöр вайи...

— Йöктiссьöм менам, Прокоп сват. Э-э... Кытiсь меным бур юöрсö видзчисьны? Бедаö сюри да. И тэныт, пöрись мортлö, эз бы ков серавны ме вылын.

— Кытшöм сералöм? Быль! Вот, он верит дак... Почтальон шупыта кыскис сумкасис газета, павтыртiс сiйö. Егор кваркышалiс синнэзнас. Сiя тöдiс Прокопöс кыдз згальникöс и несерьёзнöй мортöс и видзчисис сысянь кытшöм-нибудь неумнöй шутка, тешитчöм. Но почтальон вöлi серьёзнöй:

— Вот, зонка, лыддьöт!

Кона Егор, колö висьтавны, и спокойнöй обстановкаын öдва öктiс букваэсö, а эстöн, öтöрын, да эшö сэк, кöр сьöлöмыс готов вöлi потны, газетасис эз адззы нем. Синнэс сылöн вазисö, мылякö вевттисисö лöзсора веж круггезöн, киэс дрöжитiсö, и букваэс чеччалiсö газета вылас, кыдз микола коста код старухаэз. Но заметкалiсь заголовоксö сёжö арталiс: «Честнöй поступок».

Прокоп казялiс Егорлiсь состояннёсö, шынньöвтiс:

— Киэт, киэт! Эн я Пальникас курöггез гусяв? Ноко, вай лыддьöта.

— Лыддьöт, сват...

Заметкаын вöлi гижöма, что Волысина деревняись колхозник Сергей Платонович Волысин, районнöй посадö локтiкö, адззöма туй вылiсь бумажник. Сыын вöлöмась документтэз да сто рубся унажык деньга. Документтэс сьöртi и тöдöмась, что бумажниксö öштöма Тубызовскöй сельпоись заготовитель Максим Бабкин. Бумажник сетöма владелецлö.

— Вежöртiн? — юалiс Прокоп.

― Э-э

— Но-но! Адзза, вежöртöмат. Ладно инö. Прощай, сват, — тэрмася. Праздникнас кежала Тубызас. Может, и тiянö пырала сурок юны. А газетасö фельдшерыслö сет.

Прокоп мунiс. Осьта öшын увтöт оськалiкö сiя виш-виш керис воздухсö, нюмыртчис, öшынöт петiс страшнöй дук. Сiя дзик нöшöн сöтiс Прокоплö ныр кузя. «Но-но!» — кылö шуис Прокоп и сайöвтчис пельöс сайö. А Кона Егор эз вермы вöрöтчыны, сулалiс посöдз дынас, павтыралiс газетасö и дугдывтöг нюлiс кывнас кöс тырппесö. Вежöртiс я быдöс, мый лыддьöтiс почтальоныс, — висьтавны сьöкыт.

Боболь Ваня ештöма ректыны бекöрсö и, бур öбед бöрын кань моз мурзикö, пöлiнясьöмöн петiс керкусис. Вöлi сiя дзик код: синнэс пöльтчöмась вирöн, гöрдöтöм тырппез вылас кынмöма ылöстöм шынньöв. Кушман сидзöма, тыдалö, сьöлöмöдз и, кыдз крепыт вина, вöрзьöтöма вирсö.

Егор дынö сибалiкö Ваня горзьöктiс:

— Тувдöмыт тай! Кинкö öбидитiс разь?

— Э-э... адззисьöма эд деньгаокыс, — юöртiс сылö Егор.

— Мы-ы-ы-ый?

— Адззöмась, мыся, деньгаоксö. Зонкаö öштывлöма кöдö. То тай гижöмась.

Ваня дугдiс шыннявны, сразу садясис. Киэс сылöн öшöтчисö, тошыс треситчис.

— Кин адззöм? Мыля?

— Платон Серга Волысинаись... адззöм...

— И сетöм?!

— Сетöм. Честнöй мортыс вöлöма.

— Хо! Тöда ме Платон пиянсö. Некöр умнöйöн эз лыддиссьы. Да кыдз жö сiдз: адззöм деньга и сетöм? Позьö разь?

— Неужто оз позь? Тэ бы, шуам, адззин, дак неужто бы эн сет?

— Ме? Деньгасö? Мый тэ и юасян, сэтöнкан...

Ваня öддьöн лöгасис. Сiя дугдывтöг сьöласис, сьöласис сiдз, что пашмöм тошыс, кытöн сё эшö вöлiсö нянь крöшкиэз, чожа пондiс вачкисьны сэрпöсь бон вылö, кöдöн неважын миськалöмась джодж и вунöтöмась, кыдз колö пидзыртны. Быдöс видыс Бобольлöн баитiс: «Кыдз жö сiдз: сетöма сто рубся унажык деньга! Вот страмыт! Да позьö разь?» Медбы лöньсьöтны асьсö, Ваня босьтiс зор, сöтiс лöгувьяс кер кузя и быгыльтiс сiйö потшшез кузя. Страшнöй сiя вöлi эта минутаö, öддьöн страшнöй. Егор каитчис ни, что висьталiс деньгаыс йылiсь и, медбы юрыс эз шед зорыс увтö, невна петитчис Ваня дынiсь.

— Но, сэтöнкан, тшупсьыны колö! — шуис Ваня. Кона Егор эшö ылöжык вешшис сы дынсянь и вöлись висьталiс, что тшупсьыны сэсся оз понды. Сiя сетiс газетасö хозяйкалö, кöда локтiс кысянькö пельöс сайсянь, пуксис поспу вылö и пондiс видзöтны, кыдз нервничайтö Ваняыс: «Завидуйтö Боболь, жалейтö, мыля не сiя адззис... Но и морт!»

Рытъяв кадö удж вывсянь локтiс хозяин и сэтöн жö, срубыс дынын, Кона Егор получитiс расчёт. Сiя дыр бергöтлiс киас нöитöм бумажкаэсö и, тыдалö, эз тöд, кытчö нiйö воштыны. Но вот жагвыв дуллялiс веськыт кисис кык чунь, солиднöя и важнöя лыддис быдöс, тэчис бытшöмика, кыдз кассир — гырисьжыккесö увдöрас, руббез — вевдöрас, мыйкö думайтыштiс и перыта, дзик бумажкаэс сотiсö кисö, сюйыштiс нiйö кытчöкö пиас. Наблюдательнöй морт казялiс бы: Егор рад и не рад эта деньгалö. Кытшöмкö кыкпöвса выраженнё везъялiс чужöмсö, тырп дорресö. Эта выраженнё дзик баитiс: «Эм деньгаок, мыйкö небны позяс, — и сэк жö кöритiс: — Пырöв-керин грехас, пöрись чёрт!»

Боболь Ваня сулалiс сэтöн жö, ордчöн Егоркöт, и орöттöг видзöтiс сылö öмас. Синнэс сылöн югьялiсö нёштöм биоккезöн, тошыс треситчис эшö öддьöнжык, нежели öнтай.

— Бöбöтiн тэ менö, Егор, вот кыдз бöбöтiн!

— Мыйöн?

— Эшö юасьö — мыйöн... Да кин жö оз тöд, что увдöрись ряддэсö кокнитжык тшупны, нежели вевдöриссесö. Вевдöрас лэбтавны колö керресö, а увдöрас только быгляв да быгляв. Думайтi, бытшöм тэ мортыс, сiйöн и соглассё сетi: öт джынсö тэныт, мöдсö меным... сэтöнкан... А тэ хитрöй вöлöмыт. И жаднöй. — Ваня керис вид, бытьтö сiйö öддьöн öбидитiсö. — Увдöрись ряддэсö кокнитжык тшупны, дак тшупсис, а кыдз колö керрез лэбтавны, дак шагом марш гортö... Кывзыны этö басни фельдшерлö вöлi неинтересно, и сiя пырис керкуö. Егор сюйыштiс черсö коскас, лöсьöтчис гортлань. Но Боболь Ваня кутiс сiйö сосöттяс, кöин моз дзарнитiс синнэзас:

— Не-е, сiдз оз лöсяв! — горöтчис сiя. — Тэ вот мый... Давай лыддисям морттэз моз, а вöлись и мун...

— Кытшöм эшö... э-э... лыддисьöм? — дивуйтчис Егор.

— Джын пай тэ босьтiн? Сымда жö, мымда ме? А мый понда? Тэныт етшажык бы колiс, сэтöнкан... раз вевдöрись ряддэсö öтнам понда тшупны, то меным ыджытжыкö пайсö колö...

Кона Егор ниртiс кымöс кучиксö, кваркышалiс синнэзнас. Сiя старайтчис вежöртны, мый этö сэтшöмсö сюльтыртö ёртыс, кытчö сiя пиньöвтö, и кöр вежöртiс, — ёна лöгасис. Мöдiс сьöвзьыны Бобольыслö чужöмас, висьтавны нятьöсь кыв, но сэтшöм кылыс дзик нарошно эз пантась, а керны мыйкö колiс, и Егор нетшкöвтiс Ваня киись соссö, шупыта кыскис писис деньга, метитчис и быд вын свистнитiс ёртыслö чужöмас. Нöитöм бумажкаэз дыша лэбзисö öтмöдöрö. Öтiк веж руб, кыдз кельдöтöм арся лист, лякасис Ваня тошö, сибдiс сэтчö.

— Джагав, каналья! — горöтчис Егор и чуть ли не котöрöн чепöссис Тубызлань.

Туй вöлi нильыг. Кизерик нять сулалiс гöпоккезын, мукöдлаын быльсъялiс сöнöг сора гудыра ва. Но Егорлö некöр вöлi кошшыны кöсжык местаэсö, лэбзис веськыта — кытчö павкис кокыс, а кытчö и эз. И только сэк, кöр локтiс вöр дорöдз, сувтiс лапыт кöз увтö и невна шоччисис. Лöгыс Боболь вылö казявтöг чулалiс, но кытöнкö пыдын-пыдын, самöй сьöлöм пыдöсас, сё эшö поздiсис öбида, и Егор ас кежас видiс Ваняöс канальяöн, ёрдöм коскаöн. Сэсся вдруг паськыта шынньöвтiс, жалкöя кыскис моросас воздух. Мезмис, мезмис сiя, колис позорсö Пальникö! Уф-ф! И быдöс сiя, мый маитiс медбöрья куим лунö Егорöс, кыдзкö казявтöг öшис, пöртчис туманö, кöдö сэк жö рознитiс кокнитик тöлок. Деньга йылiсь одзза дума, зоныслöн бедаыс кажитчисö öнi сэтшöм учöтик тороккезöн, кöдна вылö и сьöвзьыны неохота. «Главнöйыс — совесть, — думайтiс Егор. — Сiя не резиновöй, он нюжöт...»

Вöр дорас бобгисö кöччез, сьылiсö ассиныс немудрёнöй любовнöй песня. Чуть ылынжык, тэлляинын, курзiсö таррез. Кона Егор, пöрись вöралiсь, кывзiс энö тулысся шыэсö öшöтöм пеллезöн и быдöс душанас кылiс природалiсь ловзьöмсö и сё шыннялiс и шыннялiс, кöть тöдiс, что некин оз казяв сылiсь блаженнöй настроеннёсö. Сiдз шыннявтöн и нетшкöвтчис сiя местасис, оськалiс вöрöттяс. Вöрын, тшöк пуэз коласын, сё эшö куйлiс кöс лым. Луннас сiя пондывлöма сывны, а öнi, кöр сайöвтчис шондiыс, вевттисьöма кыз коркаöн, и сiя стекло моз кажöтiс сьöкыт сапоггез увтын. Мукöд местаын, кушиннэзын, лымыс сылöма ни досповна, и мунны нятьöттяс вöлi сьöкыт: коккез нильдалiсö и лякасисö муыс бердö. И кыдз нарошно сэтшöм местаэзын тöдвылö усьлiс Боболь Ваня. Кытчöдз сiя локтöм, каналья! Вöлi морт кыдз морт, колхозö мугтöг пырис, мöсок и вöв ачыс общöй дворö вайöтiс, межаэз кулаккезлiсь гöрис. И уджалiс прокод öтлаын, некин сьöрись эз кольччы. Мый сыкöт лоис? Вон медбöрья руббез мырддис...

И сэтöн Кона Егор вдруг казялiс, что руббес сылö немымда абу жальöсь. Егор быдöс сьöлöмнас жалейтö Бобольсö. Кытшöм сiя лоöма жаднöй! Эттшöм морт вермас копейка понда вийны кöть кинöс, вермас петны ыджыт туй вылö да грабитны любöйöс и каждöйöс. А сэсся — прощай олан. Сэсся шедан тюрьмаö или эшö кытчö. Боболь Ваня кодь жаднöй морт бурöн кончитны ассис олансö оз вермы. Жаль лоис Ваняöс: вермас жадничайттöнняс бедаö шедны.

Мыля сiя сэтчöдз локтiс?

Эта ёрдöм вопрос корис ответ, а ответсö Кона Егор эз адззы, и сылö оськассис гортас öддьöн гажтöма. «Калькалiс отирыс бердiсь, чайдiс — вот и косьмö öтнас, сiсьмö жагöник» — решитiс Егор.

Тубыз дынö сiя сибалiс, кöр вöлi совсем ни пемыт. Деревняын öтi-öтi югьялiсö биоккез, мигайтiсö и вöрисö пемытiнас. Керкуэз тöдчисö неятнöя, вöлiсö дзик лажмытик руд вуджöррез, и ны дынын эз кыв öтiк шыторок, бытьтö нырыштöма быдöс тулысся уль пемытыс, сывьялöма — нельки поннэз онмöссьöмась лунся заботаэз бöрын, ляв оз керö. Эттшöм гажтöм пораö Тубызiсь öдва ли кинöс панталан, но Егор полiс шедны паныт кытшöм-либо тöдсалö и решитiс мунны карчйöррез увтöт, лог пöлöн, кöда пыдöсöт, кылö, больгис ни шорок. Кусiньтчöмöн, чуть я не чибу-чаньöн, сiя кайис крут берегас и, медбы не таравны бöр, кутчисис лажмытик йöр бердö. И вдруг öшöтiс юрсö. Эка беда! Ыджыт да басöк деревня вöлi Тубыз, а медбöрья годдэзö видзöт, мый шогмис: öтiклаын осьта, мöдiклаын пустöй места, куимöтлаын — дорöм öшыннэза керку. Мунö народ, чапкö гортсö, калькалö му бердiсь. Только медбöрья куим годö дас мымда семья мунiсö кытчöкö: кин городö, кин леспромхозö, öтiккез Сибирьö иньдöтчисö, мöдiккез виль муэз вылö — Казахстанö. Прав, тыдалö, Боболь Ваня — не сiдз мыйкö петö, кыдз колiс бы. Неужто и одзлань сiдз лоас?

— Да оз жö, оз! — чуть эз горöт Кона Егор. — Баитöны жö умнöй йöзыс, что чожа вежсяс быдöс. Колхоззэз сувтасö кок йылö, народ бöр пондас локны гортö.

Веритö Кона Егор: сiдз быдöс и лоас. Лöсялас оланыс, богатсялас. Только уджавны бы дружнöйжыка колö, кутчисьны öтвыв...

Дыр думайтiс Кона Егор, сулалiс йöр вылö нырыштсьöмöн и сё осудитiс думанас кинöскö. Сэсся трекнитiс пельпоннэзöн, иньдöтчис гортлань. Уджавны колö буржыка, — решитiс сiя.

Гортас Егорöс видзчисьöма эшö öтiк виль юöр. Зоныс вештiсьöма сельпокöт и петöма удж вылiсь. Тубызовскöй бригадир Степан Степанович Меливасин — бур сiя мужичок — сетöм Максимлö трактор, и зонка лöсьöтчö öнi сев кежö.

— Эта быль?! Висьтав... э-э... быль? — нятьöсь сапоггесö порог дынын гыжтöтiкö, юасис Кона Егор. — Молодец, зонö! Важын сiдз колiс керны! Бур! Сувт, батя, му вылас, чорыта сувт кыкнан кокнат. И нем оз пöрöт... Э-э... А деньга сьöрын не миянлö вöтлiсьны. Деньга ачыс локтас гортö сы дынö, кин оз вöтлiсь.

— Дугды тэ эта деньга йылiсь, ай. Важнöйжык делоыс эм. Кылан керкусис дуксö? Мамö сур соровтiс, ашын готов лоас... Сiдз эд, мам?

— Сур? Э-э... Сiдзкö, сур... Но дак мый жö... Позяс и юыштны невнасö. Да.

Пызан сайын пукалiкö, Кона Егор аппетитöн сёйис пым шыд и бöра баитiс:

— Деньга... Мыйлö только сiйö керöмась... Каналья!

Дата добавления: 2015-11-16