Куим чунись агрегат

Одззуну Тубызын первуись кöдзлiсö кукуруза. Кöдзлiсö сiйö медбур му вылö, Якунь Иванлöн отрубö, неыджыт керöсоклöн лунланись покатас. Керисö быдöс сiдз, кыдз велöтiсö агрономмез: мусö перво ёна назьмитiсö, небзьöтiсö. Сэсся бöра назьмитiсö; петассэсö киськалiсö кытшöмкö виль да дона удобреннёöн — мочевинаöн, мöдiсö босьтны не только зелёнöй масса, но и початоккез. А босьтiсö, кыдз арнас баитiс Боболь Ваня, куим чунись агрегат.

— Только мусö тшыкöтiсö досповна, заразитiсö кытшöмкö проволочникöн. Якунь Иван, покойнöй, хозяин вöлi, эта мысок вылiсь прокод нянь сёйис, быд десятина вылiсь босьтлiс рудзöгсö сто пудöн, а ми чапким быдöс понлö бöж увтас. Тьфу!

Да, эз быдмы кукурузаыс, тшыкöтöма петассэсö кытшöмкö гаг-проволочник, сёйöм быдöс вужжесö. Кукуруза кельдöтiс, рапмис, тырис йöнöн да йöвтурунöн, — кöть тэ мый сэтöн кер.

Правленнёын Меливасинлiсь юрсö эта понда юрси паныт сыналiсö, райкомын сылö выговор мöдöмась тапкыны, да жалейтöмась невночка — медодзза блиныс пö и бур стряпкалöн шогмывлö сэтшöм, что сьöласьны охота.

Мöйму этö ыбсö гöрисö, натьтö, куимпöв, киськалiсö кытшöмкö ядовитöй ваöн, медбы проволочникыслiсь родвуджсö начöдз орöтны, эшö петкöтiсö назём да торф и бöра кöдзисö кукуруза. Районнöй начальство ачыс следитiс, кыдз да мый быдöс керсьö, бригадир

Меливасин — сiя тöвбыт лыддьöтiс кыз книга «Кукурузоводство» — быдса суткиэзöн эз лэдзчывлы ыб вылiсь, быд петасоксö дозоритiс — и вот любуйтчы... Тулысыс вöлi зэра, уль. А севыс бöрсянь сразу жö тапкис засуха, шондi сотiс мусö, косьтiс печинаöдз тран-тран. Беда.

— Шогдi колiс кöдзны, а не кукуруза. Вон мöд ыббес вылын шогдiокыс сёдаки быдмис, — баитiсö смевжык мужиккес. — Эта «королева» велöтас миянöс ыб дорын узьлыны.

Колхознöй председатель гыжьялiс юрбöрсö, чöлiс. Бригадир Меливасин öвтыштiс киöн, тшöктiс колхозниккезлö гöрны Якунь Иванлiсь отрубсö мöдпöв да кöдзны öзим. Öзим назьмитöм да небзьöтöм ыб вылö ёткис кыдз зу. Таво колхозниккез радуйтчисö:

— Вöлись няньсö босьтамö!

— Кукурузасö мед кöин сэсся кöдзö. Миянöс позоритас досповна.

Эзö ни мöдö кöдзны «королевасö», мöдiсö сьöвзьыны сы вылö. Да мый, батя, керан...

Майскöй праздник панытö локтiс бригадаö колхознöй председатель Егор Парамонович, чукöртiс отирсö торжественнöй собраннё вылö, международнöй праздник йылiсь доклад лыддьöтiс, колхозниккез одзö задача сувтöтiс: кöдзны аскадö быдöс, мый планöн видзöтöма — шогдi, зöр, лён, садитны карч...

— Слава тэныт, Исус, — шушкыштiс Меливасин. — Кукурузасö эз касьты.

—...Кöдзны аскадö кукуруза, — чорыта шуис председатель. Сэсся невночка чöлiс да содтiс: — И не только кукуруза, а эшö сахарнöй свекла.

Медбöрья кылыс коми отир коласын эз вöвлы, пырис сiя неважын, и Егор Парамонович, натьтö, сiйöн шлёпкис удареннёсö медбöрья слог вылас.

— А покась, — думанас сьöвзис Меливасин и сэсся эз ни кыв, мый баитiс докладчик. Умöля кывзiсö сiйö и мукöддэс. «Свекла, свекла... Кыдз сiйö сёйöны?» — кылiс быдлаын шушкöтчöм.

Собраннё бöрын местнöй артисттэз мыччалiсö клубын концерт. Тракторист Максим, Кона Егорлöн зоныс, орсiс гармонняöн да сьылiс частушкаэз.

Кöр бура назьмитан мусö

да небзьöтан кö бура,

сэк и быдмас кукуруза,

Дата добавления: 2015-11-16