Быдмас сахарнöй свекла!

Клубын сьылiсö да йöктiсö, а бригаднöй керкуын Степан Меливасин да Егор Парамонович жугдiсö юррез: кытчö кöдзны кукурузасö? А свёкласö?

— Петруш лог сайын муокыс öддьöн бытшöм, — шуис председатель. — Сьöдмусин сэтчин. Кыным гектар?

— Вится не унажык. Сэтчин ми лён мöдiм таво кöдзны.

— Кöдзам кукуруза, — решительнöя шуис председатель и мыйкö кырöвтiс блокнотö. — Лён кöдзамö клеверище вылö. Быдмас.

— А мый, не кöдзны кö таво кукурузасö. Сёравно эд оз быдмы...

— Райкомын этö баит. Сэтчин висьталасö кыв.

— Колхозниккез озö веритö...

— А тэ кер сiдз, медбы веритны пондiсö. Быдты таво кöть вит гектар вылын бур кукуруза. Медбы вöлi сiя кыдз сьöд кöзъяин, — баитiс председатель. — Эд мöйму мыля эз быдмы...

— Засуха вöлi.

— Не только засуха виноват. Ответственность эз вöв. Ыбсö ми эг дозирайтö. Чавканнэз да ракаэз сiйö дозирайтiсö. Кокалöмась быдöс кöдзыс туссесö. Вот тэныт и «королева». А «Союз» колхозын охранник вöлöма, пишались лыйсьöма, повзьöтлöма ракаэсö. Сэтчин и кукуруза босьтiсö.

Председатель бöра мыйкö кырöвтiс блокнотö, зыртiс ассис лысина да сьöкыта ыш лолалiс.

— А свёкласö кытчö кöдзамö? Тожö пö медбур му колö...

— Абу миян лишньöй муыс, — шуис гажтöма бригадир.

— Парниккес дынö кöдз. Кона Егор ась мöдiк участок кошшö. Да и капустаыс — абу. Оз быдмы, дак сытöг олам. Некин оз вид.

Кадыс вöлi сёр ни. Председатель лöсьöтчис гортас. Порог дынын сетiс строгöй приказ:

— Ашын пондöт сев. Нем сэсся кыскыны. Туланöскöй мыс вылын бус ни кайö — косьмöм шучкöп. Петö ашын кöдзны. Кин ашын пондас пируйтны, ась бедуйтö ас вылас. Кöдзны колö, кöдзны! Празднуйтамö сев бöрас.

Вöлi чорыта решитöма майскöй праздник лунö пондöтны сев. Бригадир Меливасин концерт бöрын эшö пантасьлiс трактористтэзкöт да прицепщиккезкöт, кöдзиссезкöт, горючöй кыскалiссезкöт, баитiс ныкöт, медбы эз ылалö асывсянь юны вина да кодавны.

— Срам винасö сэсся öмö ог босьт, — шуис сылö паныт тракторист Максим.

— И менö он бöбöт, — кöсйисис бригадирлö Уй-Питиримлöн зон Öльöшка, ош кодь вына, крепыт пельпоннэза детина. — Ашын, кöр шондiыс койыштас медодзза югöррез, ми петам Туланöскöй мыс вылö.

Винерик пельпоннэза зоночка Понпутш Ерёмка, кöда лöсьöтчис лоны Максимлö прицепщикöн, сэтöн жö частушка сьылiс:

Тöн гуляйтi, вöлi код ме, ох и кули рожаöс. Талун мöда одзжык водны,— поди, ошкас тёщаö.

И, кöть вöлi эшö гöтыртöм, чожжык котöртiс гортас водны ольпасьö, медбы ашын не сунасьны Туланöскöй мыс вылас.

Кыдз баитiсö, сiдз и керисö.

Шондi öдва ештiс калькавны пу йыввез бердiсь, а Туланöскöй мыс вылын гургисö ни тракторрез — сэтчин культивируйтiсö зябь. Мукöд мужиккез доддялiсö вöввез, мунiсö горючöйла, лöсьöтчисö кыскавны кöдзыс. Нельки инькаэзлö адззисис удж: бригадир Меливасин тшöктiс нылö доддявны тожö вöввез да петкöтны Петруш лог сайись ыб вылö унажык назём.

— Кукуруза сэтчин кöдзны мöдам, кукуруза, — шуис бригадир. — Ужо, старайтчамö, инькаэз.

Быдöнлö адззисис удж. Нельки Уй-Питирим, пöрись ни морт, босьтiс чер да кайис вöрö керавны потшшез — колö пö йöрйыны кукуруза ыбсö.

Кона Егор талун ойсö чулöтiс колхознöй теплица передникын. Узис сiя умöля, полiс, медбы не сайкöтны теплицасö: эд сэтöн вот-вот пондасö цветитны огуреццез. Старик лонтiс гор, дзарьялiс термометр вылö, видзис колана температура. Кад вöлi ответственнöй.

Кона Егор неделя-мöд бöртi думайтiс ни босьтны огуреццез.

— А эшö неделя-мöд бöртi огурецсö садита грунтö, — ас кежас баитiс сiя. — Лоас кö шоныт погоддя — тырта колхозсö доброöн.

Асывнас локтiсö парниккез дынö кынымкö старуха. Кона Егор сетiс нылö наряд: петкöтны навес увтiсь торфоперегнойнöй кашничоккез, тэчны нiйö парниккезö да быд кашничокö сюйны капуста кöдзыссэз.

Туланöскöй мыс весьтын кöвьясис кокнитик бус: муокыс былись косьмöма ни, культивируйтчис бура и кокнита. Меливасин ветлöтiс ыб кузя, босьтлiс киö комоккез, пазöтiс и радуйтчис, кöр чуннес коласöт усялiсö кок увтö рышкыт мучиррес; ловзьöм муыссянь ки долоннез бердö кольччис кытшöмкö невежöртана дук, и пöрись няньбыдтiсь тыр моросöн лолалiс эта дукöн тырöм воздухсö.

— Челезнаэз, челезнаэз эд колялö, — горöтлiс сiя трактористтэзлö. — Пыр видзö тöдвылын, что миян делоын медглавнöйыс — этö качество.

Бригадир кыскис голенище сайись вöснитик бедёк, мöртiс сiйö муас, синнэсö чикыртöмöн видзöтiс, пыдына я небзьö мусиныс. Трактористтэз уджöн сiя кольччис довольнöй, шыннялiс: кукурузаыс быдмас или оз, а нянь таво должен быдмыны, тулысыс шоныт, сев пондöтчис аскадö.

— Эй, кульпиян Öльöш, — горöтчис сiя Питирим зонлö. — Павжун бöрын кышалö сеялка. Талун жö кöдзны колö. Максимыс ась культивируйтö, а тэ сы бöрын кöдз.

— И меным кöдзны охота, — шуис Максим.

— Ашын и тэ пондан. Тiян сменщиккез ойнас этö ыбсö быдöс культивируйтасö. Уджавны, зонкаэз, таво решитiмö лун и ой. Вот сiдз.

Эта гажа майскöй лунö Тубызын бура уджалiсö эшö кык морт: Пелагея Ивановна и сторожиха Öкуль. Боболь Ваня тöн керис косилка и висьталiс иньыслö:

— Быдöс назёмоксö петкöтö картаись да тэчö парниккезö. Раз вузалiн, сэрпöсь кöрöмысла, петкöтöм назёмсö, дак часöт быдöс картасис и гидсис остальнöйсö кывнат нюв.

Пелагея Ивановна талун одз асывнас саймöтiс Öкульöс, гöститöтiс сiйö шöмйöлöн да пуöм картовкаöн, ачыс чöскöтiс öмсö туран брагаöн и — керны нем — петкöтiс «нывкасö» картаö.

— Уджалыштам невнасö. Ог эд кулö, — шуис сiя.

И уджалiсö, кисьтiсö сирньылöм, петкöтiсö картаись и тэчисö парниккезö назём. Боболь Ванялöн парниккес куима. Быдöнныс нiя пыдынöсь да кузьöсь. Ого, назёмыс мымда колö!

«Беда», — думанас шуис Öкуль, кöр вежöртiс, что шедiс кабалаö. А Боболь Ваня малалiс тошсö, шыннялiс довольнöя: «Эт, кудоба! Вузалöма назём, и эн лысьт сiйö вартлыны, чудотворец сайö пелитчö... Ужо, пондыв талун асныравны! Öтöрас верма юрыт кузя и бедьöн клёнгыны. Чудотворецыс кытöн? То-то... Керкуын! Сэтöнкан...»

Туланöскöй мыс вывсянь лэдзчикö бригадир Степан Степанович Меливасин кежис колхознöй парниккез дынö. Не охота сылö вöлi локны Кона Егор дынö умöлик юöрöн, тöдiс, что старикöс ёна нырыштас эта юöрыс, да мый сэтöн керан? Колiс тэрмасьны: Кона Егор кöдзас капустнöй рассада, лöсьöтас быдöс, а сэтöн вдруг ковсяс чапкыны логö, капуста туйö кöдзны сахарнöй свёкла.

А кыдз Егорыскöт баснисö пондöтны, мыйсянь? Вöлi бы бур юöр, дак и сразу дело бердö: «Привет, Егорушко! Вот кывзы...» А сэтöн...

Пöрись бригадир кепка пыдöснас зыртiс кымöссö, гыжьялiс юрбöрсö. А мый толкыс? И сэк вöлись решитiс пондöтны сьöкыт баснисö шуткасянь. Корис Кона Егорöс теплица передникö, джек вылö пуксьöтiс.

— Талун праздник. Закуска вылö адззисясö огуреццет?

― Э-э...

— Абу, сiдзкö? Жаль... Тулысся микола кежö, натьтö, лоасö ни?

— Сэк кежö лоасö...

— Этö бур. Огурец — закуска первöй сорт. Только öтiк умöль: вина öнi дона. Босьтан магазинiсь джын литр, и сразу карманат тöв пондö шутнявны. Да!

Бригадир шынньöвтiс гажтöма, юрнас гогинь-гогинь керис. Кона Егор полöмöн моз дзарнитiс сылö чужöмас, старайтчис вежöртны, кытчö кöстö начальство. Степан Меливасин не кытшöмкö вина гаг, весь каттьыны арттöмсö оз понды. Мыйлö сылö закускаыс, мыйлö винаыс?

— Мда... Вöлi ме, Егор, Украинаын. Воюйтi сэтчин. Богатöй край. Мый бы эн сюйышт муö, сiя и быдмö. Шогдi быдмö, кукуруза — дзик сьöд вöр. И эшö быдмö сэтчин, дед, сахарнöй свёкла. Ачым адззылi: керöны свёкласис сахар, быдкодь сироппез керöны. А эшö, Егор, керöны сыись самогон. Сэтшöм бур самогон петö — настоящöй коньяк!

— Кытчö тэ кöстан?

— А сэтчö и коста, Егор. Мый, если и ми таво кöдзамö свёкласö? Быдмас сiя бурся-бур, босьтам вöвлытöм урожай. Конечно, сахар ми керны ог пондö — но сiйö! Ми керамö свёкласис подалö вердчан, öддьöн пö бур вердчан петö. Сёяс мöсыс кык кило и йöв сетö сразу джын ведра. Невна позяс и самогон керны. Коньяк. Вина лоас асланым, закуска — асланым. Ю да сёй мымда колö.

Егор видзöтiс кок ныррес вылö, некыдз эз вежöрт, мыля сылiсь мырддьöны абутöм басниöн дона кад. Но вот вöрзисö сылöн пельпоннэс, старик резкöя лэбтiс юрсö, дзарнитiс Меливасинлö чужöмас.

— Райком тшöктö кöдзны, старик! — вдруг серьёзнöя шуис Меливасин. — Капуста пö сетö доходсö учöтö, а свёкла — вöвлытöмö. Вот и думайт, мый миянлö бур му вылö кöдзны: капуста нето свёкла?

— Кытчö тэ кöстан?

— Не ме коста, Егор, не ме. Правленнёын решитöмась: капуста таво не садитны. Вот кыдз! Капуста туйö тшöктöны кöдзны сахарнöй свёкла. Конечно, позис бы кöдзны и свёкла, и садитны капуста. Но кытöн миян кодя муэс? Быдлаын глина да песок. А свёкла увтö колö сьöдмусин...

Эна кыввез бöрын Меливасин шакардаöн петiс передниксис, öшöтiс пеллез: мыля Туланöскöй мыс вылас öтiк трактор гурöтö, жугалiс я мый я мöдыс? Меливасин лöсьöтчис ни вöлi котöртны машинаэс дынö, мый сэтчин лоис, но вдруг казялiс Понпутш Öльöшкаöс, кöда котöртiс парниккез дынöт деревняö.

— Эй, эй! Öльöшка-горадзуль! Кытчö нö сiдз пöльтан? — горöтiс бригадир.

Öльöшка кежис сылань, шуис гажöна:

— Тöння лунсö кошша. Уджавны колö, а горючöй. бырис.

— Горючöй! А Пахом Игнатыс? Эз разь кайöт?

— Дукыс абу.

Бригадир гажтöма дзарнитiс öтмöдöрö, гыжьялiс юрбöрсö. Кыдз жö сiдз? Эд Пахом Игнатлö вöлi сетöма чорыт заданнё — кыскавны Туланöскöй мыс вылö горючöй. Кытöн сiя? Неужели праздничайтö? Неважын тюрьмаись петiс — и бöра...

— Кытöн сiя, Игнатыс? — юалiс бригадир, Öльöшка вылö гажтöма видзöтiкö.

Сэк и петiс пельöс сайсянь Боболь Ваня. Позис думайтны: парник саяс и сулалiс мужикыт, кывзiсис сэтчин. Локтiс йöзыс дынö, здоровайтчис кыз голоснас, шуис тошсö малалiкö:

— Хо! Игнат вылö и надейтчыны только. Узьö, сэтöнкан, магазин посöдз дынын. Литра пöрöтöма кытшöмкö варсва. Часöт кöть пидзырт сiйö.

Степан Степаныч дивуйтчöмöн видзöтiс Боболь Ваня вылö, тыдалö, думайтiс, мый сыкöт керны:

— Народ! Öтiк код валяйтчö, мöдiк сев коста тöв чужьялö. Мый нö шатласян?

Боболь Ваня висьталiс, что сiя одз асывсянь пукалiс контораын, сё начальствоöс видзчисис, мöдiс наряд корны, да кытöн начальствоыс? Вот и локтiс сiя парниккес дынö. Эд луныс, луныс кытшöм! Золотöй, позьö шуны. Няньбыдтiсьлö только öнi и уджавнытö. Одзза годдэзö, вöвлi, пемытсянь пемытöдз...

— Вот мый, Иван Петрович, — важнöя шуис бригадир. — Доддяв чожжык Игнатыслiсь вöвсö, кайöт мыс вылас бочка-мöд горючöй. А Игнатлö мыччала ме пуж!

— Вот эта ме сьöртi, — гажöна шуис Ваня. — Вöвнас уджавны, натьтö, прокма эшö. Хо!

Бригадир вöлi радся-рад. Сылö и юрас эз пыр, что Боболь Ваня, ассис думаэсö думайтiкö, только этö и видзчисис.

Кона Егор ляшмасьöмöн петiс теплицаись, коккесö му бердöт кыскöмöн локтiс старухаэз дынö.

— Талун быдöс и кöдзыштö рассадасö.

— Оз ков, Егор, — горöтчис сылö Меливасин.

— Чомору! — лöгасис Егор. — Кöдзö этчö свекла.

Капустасö ме аслам карчйöрö садита. Сёравно быдта. Картов позяс кытчöкö ыб вылö садитны. Да! Уна колö картовлö! Киськала назём ваöн, кыкись кучита и босьта урожай.

— И менам карчйöрö садит! Егор, кылiн? Тридцать сотка карчйöрö. Мыйлö меным сымдасö? — гажöна баитiс бригадир, сэсся сьылiс аскерöм частушка:

Таво кöдзам, уна кöдзам мийö сахарнöй свекла. Лоас бур: дзимлявтöн оз ков не литовка, не чарла. Только колö пö кöртзыр. Быр-р!

Вот сiдз и пондöтчис Тубызын тулысся севыс. Пондöтчис неумöля и мунiс тожö неумöля. Трактористтэз тэрмасьöмöн-одзасьöмöн то культивируйтiсö зябь, то кöдзисö. Кöдзисö перво зöр, ид, сэсся шогдi. Ыббез вылын ой и лун сулалiс зык.

Боболь Ваня пемытсянь пемытöдз уджалiс: кыскалiс то горючöй, то кöдзыс. Погоддя вöлi бур, удж мунiс таво перыта, и Боболь Ваня радуйтчис: ловзьыны мöдö оланыс. Оз кö ло засуха или кытшöмкö мöдiк беда, то быдмас урожай. Йöз коласын койтöн мужик кыдзкö казявтöг вунöтiс сьöкыт думаэсö, сё шочажык бедуйтiс, что Мариштöг сьöкыт лоас видзны ассис хозяйство.

Ваня кайöтас ыб вылö кöдзыс, отсалас инькаэзлö кисьтны сiйö сеялкаэзö, босьтас киас тыр кырым шогдi — бур шогдiокыс, золото рöмöн сiдз и свиттялö, туссес гырисьöсь, сьöкытöсь. Эта бур! Эттшöм кöдзыс сетас бытшöм петас.

Пуктас Боболь Ваня киэсö бöрö, жагöник мунас ыб кузя, тыр моросöн лолалас тулысся русö, киö му комок босьтас, пазöтас — славнöй муыс, небыт, назьмитöм. Эх, кытшöм бур.

Лöсялас оланыс, быдмас кö урожай!

Кык неделя уджалiс ни Ваня шоччисьтöг, нельки баняын пывсьыны вöлi некöр. Бригадир Меливасин аслас киöн «Молния» гижлiс, ошкис сэтöн трактористтэзöс, севаккезöс, Боболь Ваня йылiсь шоныт кыв висьталöма.

Кокнита уджалiс Ваня, тулысся дзирыт кад шонтiс сылiсь сьöлöмсö, морт чувствуйтiс асьсö няньбыдтiсьöн.

Пелагея Ивановна кыдзкö пондöтлiс басни карчйöр йылiсь: чорзьö пö сiя, гöрны кад, картов колö садитны. Ваня висьталiс лöгöн моз:

— Ештам! Постановленнё примитöмась: картов садитны только сэк, кöр быдöс лоас кöдзöм.

— Сёрмыны вермам. Вон тулысся микола ни сибалö, — шыасис Пелагея Ивановна.

— Дугды, мыся! Тэныт охота, медбы Меливасин вöвсö мырддис?

Медбы не пантасьлыны иньыскöт, Боболь Ваня кынымкö лун эз и пыравлы керкуö. Локтас удж вывсянь сёрöн рытнас, пырас аслас избушкаö, сёяс, мый ки увтас шедас, и водö узьны. Асывнас одз, эшö петуххез оз китсасьö, Ваня сюйыштас пиас, запон увтö, чöвпан нянь и чожжык коннöй дворö, доддясьны.

Мукöдпырся Ваня кежавлiс Кона Егор дынö. Стариккез миритчисö казявтöг, шуисö öтамöдöс сваттэзöн и мирнöя баитлiсö олан йылiсь. Тулысся микола панытö нiя вель дыр пукалiсö парниккез дынын, касьтывлiсö, кыдз отир празднуйтлiсö кöркö сев бöрын, юрбитлiсö вичкуын.

— Ашын бöра, поди, юны пондасö да, — шуис Ваня.

— Кин тöдö, — горöтчис паныт Егор. Сiя пыралiс теплицаö, петкöтiс Ваня сватыслö кык огурец. — Вот быдмисö ни. Ашын босьтны мöда первöй урожай!

— То тай, батя, сэтöнкан! Видзöт жö!

Боболь Ваня дыр любуйтчис огуреццезнас, чапкалiс нiйö киись киö, вайöтлiс ныр увтас, нюкайтiс. И ачыс эз казяв, кыдз сьöлöмас мыйкö шогмыны пондiс: перво бытьтö ем йылöн кырöвтiсö, сэсся дзирыт дьöгöдь койыштiсö — зубыт! Вот тэныт и на: Кона Егор быдтöма ни колхозлö неетша огуреццез, а сiя, Боболь Ваня, кöда быдкодь карчсö медодз базарын вузавлiс, таво мый? Куим чунись агрегат! Дзарнитiс тöн парниккезö, а сэтöн кык листока туруноккез вöлись. А мыля? Сёрöнöв кудоба кöдзис. Вузалöма назёмсö, и вот...

А басöкöсь майскöй огуреццес, басöкöсь. Нöбöт эттшöммесö городö, дак килоыс понда вит руб сетасö. Ух, тэ!

Дзугыльтчис Ванялöн сьöлöмыс, лöгсянь киэс дрöжитны пондiсö. Ёрдöм вопрос, дзик ловья коромысла, син одзö сувтiс: мыля ме таво огуреццезтöг кольччи?

Кона Егор ассис думаэсö думайтiкö эз казяв, что сватыслöн тшыкис настроеннёыс, шуис гажöна:

— Э-э... Сибалiс, батя, бöра миколаыс. Праздник ашын. Поди, пыралан миянö рыт гöгöрас? Винаок небам...

— Ась сiйö поннэз юöны, винаоксö, — лöгöн горöтчис Ваня. — Сэтöнкан. Ыббез вокорень тшыкöтiм, видззез баддясникöн тырисö. Кукуруза кöдзам, дзимлялам йöн. Тьфу!

— Быдмас, поди, таво да?

— Кукурузаыс? Öмтö осьт да видзчись. Медбöрья пашнясö изводалам.

«Мый сыкöт лоис?» — думыш керис Егор и дзарнитiс сватыслö синнэзас.

Шы эз сет сэсся Боболь Ваня, дзебис огуреццесö пиас, чеччис колода вылiсь и мунiс гортас.

А гортын мый? Пелагея Ивановна дзик öбукöн сöтiс юр кузя, кольмöтiс:

— Пыралiс бöра сотананым, Меливасинным. Павжуннас и пыралiс. Кытшöмкö газета лыддьöтiс. Кона Егорöс ошкöмась.

— Кыдз ошкöмась? Мыля?

— Почин пö керöма. Аслас карчйöрö колхознöй капуста решитöма садитны. Сiдз и гижöмась: «Патриот...» Меливасиныс висьталiс тай: ме пö тожö карчйöрöс колхозыслö сетi. Уй-Питирим сетöм жö. Пиля Öгруш — тожö. Быд хозяин пö таво ассис карчйöрсö кукуруза увтö сетö. А тi, шуö, кыдз думайтат...

— Ми?! Кыдз думайтам? Ах сiя упадь! — рявкнитiс Ваня да кокнас топнитiс. — Вот упадь... Этö, сэтöнкан, сiдз: сет карчйöртö колхозлö, сэтчö кöдзасö кукуруза, быдтасö йöн, а тэ кольччы картовтöг? Хо!

— Рытнас эшö мöдiс пыравны, тэкöт мöдö баитны...

— Мед вовлö!..

— Гöрны колö чожжык карчйöрнымöс. Картов колö садитны.

— Ашын жö гöра! А Кона Егорлiсь юрсö бы поткöтлыны. Сöтны бы черöн да поннэзлö чапкыны. Сомущайтö йöзсö. Патриот!

Боболь Ваня кыскис писис огуреццесö, жельдыштiс джодж бердö, талис сапоггезöн, горöтлiс:

— Вот тэныт, заразалö! Вот, вот!

Дзик не огуреццесö талис, а асьсö Кона Егорсö.

Ашынас одз, кöр хозяйкаэз только лонтiсö горрез, Боболь Ваня доддясис коннöй двор дынын и мунiс складö. Сэтчин сiя грузитiс телегаö вит мешöк кукуруза, сьöласис да матькисис и, сьöкыт думаэз думайтiкö, кыскис грузсö Петруш лог сайö. Тракторист Максим заводитiс ни трактор, лöсьöтчис кöдзны.

— Дасвит гектар эстöн, талун быдöс кöдзышта, — шуис сiя Ванялö, кöда мурзьöмöн, кыдз ош, чапкалiс мешöккесö межа вылö. Боболь Ваня шы эз сет. Сiя гажтöма видзöтiс лог покатыслань, босьтлiс киö му комоккез, нöитiс да нюкайтiс, гогинялiс юрöн. Тöдчис, ёна жалейтiс мусö, кöдö лöсьöтчисö, кыдз сiя баитiс, изводавны. Ыб дорын лэбалiсö ракаэз да сьöдкайез, кокасисö муас, кошшисö гаггез. Но вот локтiс сэтчö жö Уй-Питирим, пельпон вылын пишаль, коскас чер. Дзарнитiс ракаэс вылö, шуис дивуйтчöмöн:

— Уй, мымда нiя сэтöн, уй-уй!

Сэсся кутiс мушка вылö öтiк ракаöс, бузгис-лыйис. Рака эз и пикнит, кыдз ыджыт галя, боткисис му вылö. Остальнöйес карзöмöн лэбзисö лог дорись вöрокö. Питирим кералас вöроксис кузь потш, мöртiс сiйö ыб дорас да мöдiк потшöн лэбтiс самöй йылас вийöм ракасö, кышалiс-лякöтiс ув коласö.

— Вот öнi карзы, кикимора, да повзьöтлы дружоккетö! — шуис Питирим. — Кукурузасö эн сёй!

Максим сералiс, нельки Боболь Ваня шынньöвтiс, мыйкö шуис ас кежас да гöнитiс бöр деревняö. Горт дынас сибалiкö сiя адззылiс, кыдз бригадир Меливасин верзьöмöн гöнитiс кытчöкö посадлань, тыдалö, правленнёö иньдöтчис. Боболь Ваня мигнитiс пöв синнас: вот и бур! Сiя пыртiс вöвсö аслас ыджыт оградаö, юскисис. Сималiс кынöм, охота вöлi мыйкö курччöвтны, но Ваня öвтыштiс кинас. Сiя шупыта кыскис сарайись важ гöр — карчйöрсö ассис пыр гöрлiс только сабанöн — лöсьöтiс постромкаэз да тягаэз, доддялiс вöвсö гöрö.

А ыбын, Петруш лог сайын, гургис трактор: Максим кöдзис кукуруза. Луныс вöлi гажа да шондiа, детина радуйтчис: талун кöдзыштас ыбоксö, заданнё лоас тыртöма. Логас йирсисö колхознöй мöссэз, а Максим чуть да бöра дзарьялiс нылань, шыннялiс: эд мöссэсö дозирайтiс Мариш!

Кокнитик бус кайис сеялка бöрын, курöтiс кöдзиссезлiсь синнэз.

Межа дорын лыйсис Уй-Питирим, вийлiс ракаэзöс, кöдна утугаöн лэбалiсö ыбокыс весьтöт.

Лог дорын, аслас мöссэз дынын, Мариш сьылiс частушкаэз.

А трактор сё гурöтiс и гурöтiс: Максим керис ни куимöт круг, натьтö, гектарся унажык ни кöдзис. И вдруг сiя инькаыс, кöда сулалiс сеялка бöрас, öдззис ванзыны да киэзöн öвтны:

— Бырсис! Абу сэсся кöдзысыс!

Максим сувтöтiс тракторсö, кокнита чеччöвтiс кабинаись.

— Бырсис кöдзыс? А кытöн жö родняö?

— Кин тöдö. Куим верста эд деревняöдззас...

— Должен бы локны ни.

Тракторист керис куритны, дас минута мымда пукалiс чöлöмöн, орöттöг видзöтiс деревнялань: оз я мыччись кöдзысöн телега. Но туй вöлi пустöй.

— Неладно эд делоным шогмö. Мый лоис? — тöждiсис Максим.

Локтiс трактор дынö Мариш, юалiс дивуйтчöмöн:

— Жугалiс разь тракторыт?

— Кöдзыс бырсис.

— Вот тэныт и на!

Эз вермы сэсся Максим пукавны весь, жаль вöлi öштыны дона кадсö. Сiя чуть я не котöрöн иньдöтчис деревняö. Мариш вежöртiс, что шогмис мыйкö неладно, и вöтчис жöникыс сьöрö.

Куим верста котöртiсö нiя, ышки-пойки локтiсö Боболь Ваня керку дынö и вежöртiсö быдöс: Ваня гöрис ассис карчйöр.

— Вот сотана! — шуис Максим.

— Колö жö, а? — отсалiс сылö Мариш.

Пырисö кыкнанныс карчйöрö. Ваня и дзар эз кер ны вылö, летъялiс гöр бердын, шутнялiс. Вот Боболь! Да кыдз жö сiдз? Эд быдöнлö вöлi чорыта висьталöма: гöрны таво карчйöрресö только сев бöрын!

— Тi мыйлö локтiт? Мый öммезнытö осьтiт? — лöгöн юалiс Пелагея Ивановна. — Эд мешайтчö, мунö бöр.

— Не дело тi керат, тётка! — шуис Мариш. — Ыбын кöдзыс бырсис, а тi...

— Мун татiсь, вот тшывыкалка!

Шум пондiс лэбны, отир чукöртчисö. Кладовщица локтiс, Кона Егор локтiс, Уй-Питирим локтiс. А старухаэз да челядь бытьтö сэтöн и вöлöмась. Боболь Ваня эз видзчись сэтшöмсö, повзьыштiс. Но сетчыны эз и думайт, рявкнитiс лöгöн:

— Кин тiянöс корис? Эд адззылö, кыдз карчйöр гöрöны?

— Юскы часöт жö вöвтö, кöдзыс кыскавны колö, — горöтчис паныт Максим.

— Этö эн адззыв? Агрегат!

— Вот сейчас! Мыччалам ми тiянлö агрегат! — лöгасис Максим и, кöть Ваня öвтчис плетьöн, перыта локтiс вöв дынö, кутчисис супонь бердö.

И минута эз чулав, кыдз юскис вöвсö да оградаын доддялiс сiйö бöр телегаö...

Дата добавления: 2015-11-16