Ответ, 233.

Котораго писания и которыя истории не потщался еси развратити, о дивный вопросителю, еже и историю о Данииле епископе Володимирском и Берестинском во образец вашему принятию иереев притягати насилствуеши! Но аще внидем в подробность обыскания о сем Данииле епископе, зело убо отстоятельно обрящем от вашего разума и принятия иереев.

1. Исидор митрополит Киевский, рукоположивый сего Даниила во епископы, не бе исперва латынником, но бяше от восточных стран, и от восточнаго исповедания начало свое влекий: ибо бяше родом болгарянин, якоже о сем богомудрый Захария Копестинский засвидетельствует, глаголя: "Исидор, родом болгарин, року от сотворения света 6847, а от Рождества Христова 1437, поставлен был от Цареградскаго патриарха Иосифа; той толко рок един побывал на Москве, и на собор он Флоренский поехавши, и отступил православия, и принял от папежа Евгения кардинальский титул". Книга Оборона, л. 393. От сего свидетельства познавается, что Исидор не бе изначала латынником, яко не от них крещен бе. Аще бы от них крещен был, не бы от Иосифа патриарха Цареградскаго рукоположен был; такожде и Даниил епископ бе православно крещен. Ваших же иереев изначала крестивый и рукоположивый не православен, но еретик бе: убо и сообразия никоего ваших иереев ко оному Даниилу не обретается.

2. Аще и рукоположися Даниил в епископы от Исидора отступника, но тогда Исидор еще не бяше соборне оглашен и из сана извержен. Святая же церковь, до соборнаго осуждения и проклятия, от еретик не отметает действуемых таин, за нелишение еще Святаго Духа, якоже о сем в 215-м ответе и в прочих довольне рехом: убо вам Даниилово от Исидора приятие хиротонии на подобие ваших иереев приводити отнюдь всячески неподобно и несообразно обрящется.

3. Понеже Даниил, якоже рукоположися от Исидора до соборнаго о нем определения, сице и еще по неведению: ибо не знаяше, яко Исидор бе сообщник и отступник к латынскому нечестию, якоже сам в своей грамоте покаянной к Ионе митрополиту Киевскому глаголет сице: "Се аз, смиренный Даниил епископ Владимирский и Берестинский, что дерзнух поставитися епископом на ту Владимирскую епископию от Исидора митрополита и от инех митрополитов, смудрствующих Исидору, и еже о нем собраннаго тогдашняго в Цареграде собора, а того не разумех, что тот Исидор митрополит, сходатай и споспешник был оному латыньскому, еже во Флоренцыи, осмому собору". Минея Четья макарьевская, месяц август.

Зри убо, Даниилово приятие хиротонии от Исидора в неведении бяше: яве, яко еще соборне не бысть оглашен Исидор. Убо сообразно ли ваших иереев поставление обрящется Даниилову поставлению? Аще Даниил прия поставление до соборнаго осуждения на Исидора, аще по неведению; ваши же иереи по ведению, и по толицем разглашении о Никоновых новшествах, и по толицем прешествии времене от начала оных, свое поставление прияша: убо отнюд всячески несообразно их поставление к Даниилову явствуется.

4. Но аще Даниил и тако, и в таковое время прия поставление от Исидора; обаче и тако приятое, до соборнаго осуждения на Исидора, поставление ни за что почте и яко небывшее вмени, якоже во своей покаянной грамоте пред Ионою митрополитом извествоваше, сице глаголя: "Аз, смиренный Даниил епископ Владимирский и Берестинский, то прежнее исповедание свое и Исидорово мне поставление отметаю, и отрицаюся, и во всем ничто же вменяю. (Ниже) Исповедаю же ся Богови и Пречистей его Богоматери, и повинуюся во всем своему господину преосвященному митрополиту Ионе Киевскому и всея Руссии", и проч. При конце: "подписах сие своею рукою, лета 6960, индикта 15, октября 28".

5. Святейший же Иона митрополит сего Даниила покаявшагоея не тако просто прия, но благословением и грамотою, от себе данною, того на Владимирскую епископию утверди, якоже в его грамоте прощальной сему Даниилу сице явствуется: "Понеже убо благодатию Божиею соединися церковь руская, и в первый мир приведена бысть и уставлена, и по древнему обычаю укреплена бысть, единой митрополии быти, якоже изначала пошло от святаго крещения, и един митрополит Киевский и всея Руссии, по данней ми благодати от Святаго и животворящаго Духа, и смотрению и управлению о соединении Божия церкве того великаго государя, тако же и по челобитью и по исповеданию и покаянию и благопокорению, еже к Богу, и к церкви Божии, и к нашему смирению, Даниила епископа Владимирскаго и Берестинскаго, мы простихом его и благословихом со всеми нашими детьми и сослужебники, со архиепископы и епископы русскими нашей митрополии, елицы в сие время прилучишася при нас, и велехом ему и литоргисати с нами во святей службе, таже и отпустихом его с духовною любовию в предреченную во святейшую епископию Володимирскую и на весь предел епископии. Того ради должен есть боголюбивый епископ Даниил, о Святем Дусе сын и сослужебник нашего смирения, творити в той своей епископии вся святительская церковная оправдания, якоже то издавна пошло. (Ниже) И сего ради дана бысть ему грамота сия нашего смирения, во утвержение его, на Москве". До зде от грамоты прощальной.

Речеши ли, яко просте словом точию прости Иона Даниила епископа? Ответствуем. Но кая убо нужда Даниилу самоустне отметати Исидорово поставление и ни во что же то вменяти? Кая же нужда и Ионе митрополиту соборне принимати Даниила и от себе своею грамотою онаго на Владимирской епископии утверждати? И аще кратко тамо речено бысть, яко "мы простихом с прочими, и благословихом, и велехом литоргисати", но благословение не бяше простое, точию единем словом, но якоже обычай есть на таковых кающихся епископов омофор возлагати, и тако приимати их в церковное соединение, о чесом и Бароний, в лете Господнем 869-м, повествует о патриархе Игнатии, како кающихся приимаше епископов. Зри о сем тамо. Ваши же иереи от кого прощение получиша? От кого благословишася? Кто грамоту ставильную от епископов православных им преподаде? Удивлению великому достойна есть вещь сия!

6. Святейший Иона митрополит бе зело всекрепкий восточнаго православия содержатель, и прежним святым российским пастырем усердный последователь. Древлевосточнии же пастыри еще на 54-м лете по тысящи, не точию хиротонию, но и крещение от латин не начаша приимати, о чем Бароний свидетельствует, яко грецы латин крещаху второе (печати московской л. 1219). Такожде и от последователей восточному благочестию крещение латынское отвергашеся, якоже Потребник сербский, друкованный в лето 1520 в Виницеи, латин крестити повелевает, яко полуверни суть. Книга Оборона, Захария Копестинскаго, л. 376 на об. И Номоканон друку киевопечерскаго при Арсении Жилиборстем, на л. 45, повелевает латин крестити, яко полуверни суть. И российстии пастырие, святии митрополити Фотий, Киприан, Кирилл, Макарий, обливательнаго крещения не приимаху: чти послание во Псков и Стоглав, гл. 17. И преподобнии Варлаам Хутынский и Максим Грек латин крещения не приимаху (житие преподобнаго Прокопия Устюжскаго, июля 8; Максим Грек, слово 48). И святейший Филарет патриарх соборне изложи, не точию латин, но и белорусцев, иже приступивших к папе римскому, аще и в христианскую веру крестившихся от русскаго попа, обаче за отступление и моление онаго попа за папу, крестити паки повелеваются, о чесом во обоих изложениях Филарета патриарха явствуется. И прочии, якоже древлевосточнии, тако и древлероссийстии пастыри, латин вторично крещаху. Зри во Ответех Выгорецких, в 50, в статии 36, довольно о сем. Аще убо крещения древлеправославнии пастырие не приимаху от латин, како хиротонию приимати бы восхотели? Никако же, никако!

Понеже в книзе Обороне Захария Копестинскаго повествует, яко "патриарх Иосиф Константинопольский, и все духовенство, и весь сигклит, царя греческаго Михаила Палеолога с папою согласия в трех пунктах: 1) папежа в молитвах поминать, 2) абы вольно до римскаго двора до суда отходити, 3) римскому папе во всем начальство имети: не прияша, изволиша заточения и беды подъяти" (л. 386).

Афонстии отцы, от того же Михаила Палеолога принуждаеми на согласие на объявленные пункты до папы, не прияша, и кровьми и смертьми запечатлеша (л. 387). "По Иосифе патриархе, грецы Георгия патриарха до посвящения за Михаилом рукоположенных епископов не припустиша, но чистыми от онаго Михаилова с папою согласия из Македонии Германа митрополита Ираклийскаго посвятивше, и той на патриаршество предъявленнаго Георгия посвяти, а о придатку до святаго символа веры иной измены не вчиняли латины тогда" (л. 390). Марко Ефесский митрополит, Григорий Иверский, Софроний Анкирский, и инии мнози, зазираху римлян о ересех, и согласия с римляны не прияша, и анафематьствоваша на Флоренском соборе. Читай послание святаго Марка в книзе о Флоренском соборе (л. 979) [На поле: Собор бысть 1431. Оборона лист 337 ]. "Пахомий патриарх Константинопольский, около року 1516, Арсения диакона, прозванием Апостолипис, погордевша своим пастырем, архиепископом Константинопольским, до Леона десятаго папежа римскаго отшедша, и от того легатом до венетов послана, и столицу митрополии Монемвасийской одержавша, против каноном соборным, посланием от архиерейскаго служения возбрани и непослушавша проклят и до островов Крита и Кафиры и до иных мест венецких, где были православныя, писа на священники, которых он хиротонисал, отлучение, и дал вольность священником и диаконом, от Арсения хиротонисанным, дабы шли до иных архиереов канонных, котории бо второе их хиротонисовали для закона, и правила указуются" (Арменопул 5, л. 376).

Преподобный же Максим Грек, зело притужнейше латинской хиротонии отвращатися повелевая, глаголет: "Римскаго убо (рече) папы, яко отпадшаго лика православных архиереов, рукоположения отвращатися и отметатися достойно и праведно есть, и нужно зело" (гл. 37).

Творец же Книги о вере о папе римском глаголет: "К сему же яко да папеж от патриархов благословение и хиротонию приимал бы, а от него вси западнии того же да сподобятся: сие в то время межи греки и Русиею и латынниками соединение и сообщение будет" (гл. 25, л. 228 на об.).

Приснопомнимый Иоанн, мних святыя горы Афона, в послании к князю острожскому, о поставленных от папежа пиша, сице глаголет: "Ибо вам о очищении церкви нашей православной речь зачалася, и далее то чинити будем: на священнический степень по правилом святых отец да восходят, а не по своих волях похоти плотьской, ради имения и богатства сан восхищают, и всякаго таковаго, иже сам наскакует, не приимуйте, и от короля даннаго без вашего избрания изжените и проклените: не в папежа бо вы крестилися и в королеву власть, да вам дает волки, злодеи, разбойники и антихристовы таинники. Лучше бо вам без владык и без попов, от диявола поставленных, до церкви ходити и православие хранити, нежели со владыками и попами, не от Бога званными, у церкви быти, и тою ругатися и православие попирати. Не попы нас спасают, или владыки, или митрополиты, но веры таинство нашей православной и сохранение заповедей Божиих, то нас спасти хощет". До зде от послания.

Виждь убо, како восточныя церкве последователи о поставленных от латин разумеваху, како поставление от оных, отметающе, не приемляху. Можаше ли, вопреки всей древлевосточней церкви, ея всеусердный последователь и зельный подражатель, святейший Иона митрополит от сущих отверженных православия латин приняти хиротонию? Никако же, никако! Аще и прия Даниила епископа, хиротонисаннаго от Исидора отступника, но еще до соборнаго осуждения, и прия не просто, но с канонным и правильным благословением, и по должности пастырской, и от себе с данною ему (Даниилу) грамотою: убо ниже Иона видится от латин хиротонисаннаго прия, ниже Даниил хиротонию, аще и не от осужденнаго еще соборне, препочте, но всячески ю за ничто положив отверже. Зри убо православную и всеопасную ревность: аще где и не зело вящшаго опасения потреба, тамо зелнейше опасахуся, да не приобщатся коею-любо причиною неправославнаго действия. Сие бо отменная пастырская показуется осторожность.

Дата добавления: 2015-07-12