Ответ, 123.

Приложение иты ко имени Исусову не с иных времен писатися и печататися в книги внововнесеся, но точию с времен никоновых. Виждь древлеписменныя и старохаратейныя книги, виждь и старопечатныя: виждь древлеписанныя и изваянныя иконы, не точию древлероссийския, но и древлегреческия: виждь и прочия белороссийския и древлесербския книги. Во всех сих книгах, и на всех вещех явственно узриши начертанное имя Исусово с единою иотою, а не с иотою и итою. Аще желаеши достовернее уверитися, прочти ответов выгорецких ответа 50-го статию 13, зело явленнейше от многих достоверных свидетельств уверишися.

Темже и показуется, яко везде и всюду древле писашеся с единою иотою имя Спасителево.

Укажеши ли на некия белороссийския книги, яко тамо, аще и не везде, но в неких местех, новопечататися начася с двема буквами, якоже в Беседах киевопечатных и прочих. Но в сих книгах противу московския печати, паче же противу предания святыя церкви, многая показуются несогласия. Якоже во обою Беседу в заставницах распятия без вышния дски и со обвешением напечатанныя. Древлевосточныя же церкве учитель, словеньский же просветитель, Кирил философ, противу вопроса Аннина патриарха тако ответствова: "Четыре бо части крест имать. и аще едина его часть убудет, то уже своего лица не являет". В Беседах же во обоих крест напечатася без вышней дски, в несогласие преданному от святыя церкве, паче же самому Христову кресту: убо и имя с двема литерома напечатася тамо, такоже в несогласие древнепреданному и пишемому от святыя церкве. Паки: В Беседах на деяние, на странице 181, вместо святаго крещения обливание в лицех напечатано. Тако солгано, аки бы и апостол Филипп евнуха обливаше. Зане тии печатники не под русскими благочестивыми цари и патриархи, но под польскими крали, аще и греческаго согласия держащеся, пребываху. Но Филарет, святейший патриарх, про их дает ведати, многая в них виде несогласия церковная в самех тех христианех, яже суть белорусцы в них нарицаются. И тако на сих белоруских книгах о имени Исусове с приложением иты утверждатися не надежно. Укажет ли кто и на острогопечатную Библию, яко тамо по гречески написано имя Исусово с приложением иты. Но аще бы и тако писано было по согласию восточныя церкве, но в греческом диалекте сия буква ита суть безгласна, якоже и у нас ъ и ь. И если желаеши уверитися, вопроси известно ведящих греческий диалект. Обаче в древнегреческих везде бяше пишемо имя Исусово с единою иотою, якоже показуют древлегреческия рукописныя книги: В книзе Кормчей в десть, в книзе Кирила Александрийскаго, в книзе Никифора патриарха, в книзе Епифания Кипрскаго, в книзе Бесед евангельских. Во всех сих написано Iσ. И в прочих безчисленных, в российской в книгохранильнице обретаемых, и от святых древлегреческих преводницех, якоже от Кирила философа, от Киприана митрополита, и от премудраго Максима Грека, в преводных книзех, везде с единою иотою пишемое имя Исусово быти видится. Такоже и на святых и чудотворных иконах греческаго живописательства имя Христа Спасителя с единою иотою под титлою написано является. Яко на образе Пресвятыя Богородицы Владимирском и на Тихвинском, Лукою евангелистом писаных: на образе Лахерньском, иже принесен из Царя града в лето 7000: на образе Корсуньском, на кресте Корсуньском, иже во Успеньском соборе: на вратах меднолитных Корсуньских, яже в Великом Нове граде. На всех сих и на иных безчисленных греческих чудотворных иконах и крестах имя Спасителя нашего Христа в надписании написано с единою иотою, Iс Христос.

И толик облак свидетельств показующ, тако с единою иотою от греков пишемое достоверствуется, достовернейше острогопечатной Библии является. А понеже и тамо уже летосчисление от лет Рожества Христова осмию леты, противу древняго летосчисления убавляется: не соглашается сим древним, елико греческим и российским, толико и киевским до разделения митрополии летописцем (яко древлеписменныя харатейныя изъявляют книги, писанныя в Печерстем монастыре в лето от мироздания 6932: и в Соборнице древлехаратейном, писанном Иосифу архимандриту Печерскому в лето 6581). В сих убо книгах согласно от мироздания летосчислению и от Христа пишется.

Но российская ныне церковь не точию просто без умствования прилагает сие литероначертание иты, но и еще с заключением своего толкования, в противность святей древлеправославней церкви: не умствуя в древлеписанном, паче же пронареченном от архангела Пресвятей Богородице, имени Спасителя и Исцелителя душ наших, но некоего равноухаго, якоже новороссийстии архипастыри Димитрий и Питирим противомудрствуют [Розыск, глава 15; Пращица, ответ 146].

Тем и паче в сопротивность древлеправославней церкви мудрствующе, иного паче, а не Спасителя истиннаго Исуса, но некоего от себе вымышленнаго Иисуса заключающе в свое мудрствование, изображают.

А еже вопрошаеши, видеша ли наши святейшии патриарси сие приложение иты ко имени Исусову. Ответствуем. Понеже всякая ересь не вдруг изращается и в явление приходит, но помалу и малу во перьвых она появляется. А егда же укреплятися начинает, тогда от ревнительнейших мужей благочестия обличается. А егда же укореняется со оправданием, тогда и конечный суд и наказание содержащии ю приемлют. В пример сему полагаем западную церковь, понеже ереси нача еще до шестаго вселеньскаго собора произращати о опресноцех и о ином, к несогласию восточной церкви: тогда помалу обличаеми от восточных бяху, понеже оныя сокровенне имеюще содержаху. А егда же по тысящном лете явленнейше оныя содержати и со утвержением нача, тогда не помалу уже от восточных западным обличение возгреме, но со оным клятва и извержение, и конечное отлучение западным последова. Сице убо и белороссийцем киевляном и прочим, исперва отсекшимся под власть литовския державы, в лето от Рожества Христова 1320, а потом оным киевлянам иного себе (в Киеве), в лето от мироздания 6923, вознесшим митрополита, якоже засвидетельствует в Синопсисе, в самем Киеве от создания мира 7188 друкованнем. Темже совершенно учинившимся под своею областию, а не под благочестивою державою Московскою и митрополиею, Литовской же державе присовокупльшимся, не дивно есть в некия заблуждения впасти. Якоже и блаженный Филарет патриарх многая несогласия к восточней церкви в них деющаяся виде, обаче оных еще не нарече еретиками, понеже не совершенно еще конечным (кроме тех, кия на унею с папою изволиша) отступлением от восточных отразишася. Обаче уже омышление за их несогласие Московстии патриарси начаша имети, якоже святейший патриарх Филарет извести, паче же в числе российских архиереов Киевский митрополит не нача изчислятися. Но и в самех малороссийских христианех омышление о себе нача происходити, якоже познавается от жития преподобнаго Тихона Луховскаго: кий бяше родом Малыя России Литовских пределов, и за уклонение своего народа к различным ересем и в латыньство, оттуду преселися в Великую Россию, не смущенную всячески от ереси. Великороссийская же ныне церковь и паче от сих познася, плавающая в зазренных ересех: егда оныя кроме всякаго принуждения прия: егда сия укрепив утверди: егда всюду тыя воспроповеда, и ложное свидетельство нанесе: егда клятвою не приемлющих обложи: егда гонением и безчисленным мучением содержащих древлевосточное православие вознасильствова. Такоже и сие имя Исусово не просто отверже, но еще и с клятвою и противным мудрованием, и нарече вместо Спасителя и Исцелителя иным и равноухим, сего же Иисуса Спасителем и Исцелителем, и сущим Богом воспроповеда.

Темже по всем сим вышепредложенным показася, еже к приятию сие имя Иисусово всякаго сомнения и всякаго страха и трепета есть, и учинися преполно, и утвердитися ненадежно: паче же боящеся церковных заповеданий, да в приятии новин под анафему не подпадем, при которой искушение казни злыя стретает небрегущих о сем. Книга О вере, глава 24.

Дата добавления: 2015-07-12