Ответ, 124.

Всякое несогласие, о вопросителю, древлегрекороссийския церкве собрати потщался еси, на защищение своей матери новороссийской церкви. Но дивимся, како и иныя, по лености и небрежению вшедшия в малороссийскую церковь, претекл еси, еже есть обливание, и начертание развращеннаго распятия, и иных противств древлевосточней церкви: паче же некия и в России всеваемыя временем несогласия и противеньства, якоже брадобрития, и трегубаго аллилуия, и прочих, якоже повествует Стоглав и иныя древлероссийския истории. Но кая ти нужда востече, еже приводити несогласная и несвойственная, яже по небрежению входящая и утвердитися желающая; не иная кая, якоже рехом, точию твое склонение к сущей ти матери новороссийстей церкви. Но не суть и к ней законно имееши повиновение, понеже и сам за истязаемая от нас от нея отлучаешися: а тая прикровенным образом защищати усилуешися, двоемыслена, паче же равнодушна себе показуеши. Подобаше бы ти на едино скланятися: или совершенно древлеправославней церкви последовати, или, аще ти мнится и новое не тяжестно, то содержательнице великороссийской нынешней церкви конечне прилепитися, и на едину храмати ногу. Но о сем оставим за всегда многословити, обращаемся же к твоему вопросу, в нем же вопрошаемся о пятипросфирной службе в белорусцех, при благочестивых наших патриарсех деющейся, и от них якобы не запрещаемей и судимей.

Но мы по силе нашей в белороссийцех творимей небрежности в преданиях в вышшем ответе засвидетельствовахом. Да и святейшии патриарси не не видиша их преступления. Якоже многострадальный Филарет патриарх, самовидев тех многая нехранения и несогласия к преданиям восточныя церкви: аще и не объяви от тебе искомаго, обаче сим речением, еже многая видев нехранения, не не извести, аще и не явственне, и от тебе вопрошаемаго. Обаче пятипросфирное служение у них не везде и за всегда совершаемо бе: но точию в киевопечатном Номоканоне в лето 7132-е обретается, да и в прочих неких Служебниках (без написания) печатных белороссийскии. В прочих же, пред оным Номоканоном печатанных, якоже при Онисифоре, митрополите Киевстем, в Служебнице в лето 7086: такоже в Служебницех при Гедеоне, архиепископе Львовстем, в лето 7112: и при Иове, митрополите Киевстем Борецком, в лето от Рожества 1620. Во всех сих пятипросфирнаго служения не видится. И по оном же Номоканоне в киевопечерстем монастыре печатаных в лета 7137 и 7147 и 7161-м Служебницех, явственне обретается служба литоргии на седми просфирах. Темже онаго Номоканона издание ни с началом ни с концем согласие не показуется, убо и приятию всяко не достоин есть. К сим же разглашается в приношении сей Номоканон не точию восточным учителем, якоже Симеону Солуньскому, не точию афоньским отцем, не точию древлепечатным Служебником: убо и всячески сей Номоканон к вероятию не есть подлежащ, и вам, вопросителю, ко указанию не суть ключим.

Дата добавления: 2015-07-12