Сонет лæджы карыл

Плиты Грисæн

Куыд карз, куыд уæззау ысты азтæ!

Лæг сæ æргъомбастау хæссы:

Ныр гъа, æппæтмæ у дæсны,

Æппæтæй разыны уæд бастау.

Кæм нæ дын аудынц дæ удыл, —

Дæу сахуыр кæндзысты, бæгуы,

Нæргæ зард сисгæйæ — кæуын,

Цæссыг ныхъуыргæйæ та — худын.

Куырмау дæ нал хæссы дæ къах

Дæ нысанмæ, æмæ та мах

Уæд комдзог рацæуæм нæ удтыл...

Кæны æнус-æнусты Лæг

Йæ сонтæй хистæрмæ хæлæг,

Зæрондæй кæстæрмæ тæхуды.

РОМАНТИКОН ÆМДЗÆВГÆ

Æз æууæндын: фæсцард нæ рафты

Лæг бæласау... Хæрын æз ард дæр:

Мæ райгуырд куыд нæ федтай, афтæ

Нæ фендзынæ ды мæ мард дæр!..

Æз куы мæлон, — Сæнайы хохыл

Ис цъæх цъити, — уый у мæ ингæн...

Мæн рæудымгæ нæ уадзы рохы, —

Уый цур никуы уыдзынæн иунæг.

Æз уыдзынæн йæ иу хай ихæн, —

Уалдзæг хъал дон куы нæра кæмтты,

Уæд йæ уылæнтæй иу ызнæтæй

Иры къæсмæ кæсдзæни джихæй.

Æмæ сисдзæни зæххыл цинтæ,

Мæры базмæлдзæн, гъе, уæд уидаг;

Бæрзы цонгыл чызгайы риутау

Ракъуыбыр уыдзæни дидин.

СОНЕТ

Фæлдисæг æрдзмæ иу хины тых и,

Лæджы кæны æдылы æмæ хивæнд:

Цы уа йæ бон, — фæкæны уымæ зивæг,

Цæмæ нæ арæхсы, — мары йыл йæхи.

Уæд тагъд дон фурды не ’ййафы, бæгуы,

Тæвдæй ма къухтæ авæры йæ рустыл.

Тæргай зæдау йæ зæрдæмæ ныхъхъусы:

Нæ йæ фæци кæйдæр фынгæй ысгуы!..

Фыццаг цæфæй, дам, къодах у бæрæг,

Нæ йæ бафæнды базонын: æцæг

Кæм æмæ кæд ысфидауы йæ зарæг?

Рæстæгмæ ма куы æрцахсы йæ зонд,

Уæд, кæс, æмæ æвзонгæй у зæронд —

Ныххардз ысты йæ ныфс æмæ йæ хъару.

Ныффынæй ис ком. Æмæ хæхты рæгъау

Æрвгæроны систа йæ сытыл.

У бур-бурид æхсæв: уæзбын мæйы нау

Фæсрагъæй ысдары йæ былтæ.

Уымæлвад фæтæнтæн рæууддзæф уырдыг

Ныллæууыд, цъæнут рæгъты фасы.

Æхсыры хъæндил та ныррухс кæны фынг,

Куырмæхсæджы митæ нæ уарзы.

Дæ быны æрытау цъæх-цъæхид кæрдæг,

Мæ хæлар, æркæ-ма бæгæны!

Куы нæ зона амондыл цин кæнын лæг,

Уæд ма-иу ыл тох та цы кæны?

У ацы уысм махæн нæ уды æнцой:

У дун-дуне — рох, мах дзы — рохы...

Фæрнæй-иу фæцæрæнт, кæм кæнынц нæ кой,

Мах — иппæрд нæргæ царды тохæй.

Уадз арты æвзæгтæ æнхъæвзой сæнау,

Рæудымгæ дæ бецыккæй хъаза.

Нæ зынтыл цас раздæр уæлахиз кæнæм, —

Сæ фыддæр фæлæууы нæ разы!

Лæппуйæн йæ митæ æхст фатау — тæлтæг,

Æвронг цард ыл арвау ныккæлы,

Кæд амонды уысммæ нæ зона хæлæг,

Уæд ма-иу ыл тох та цы кæны?!

Дата добавления: 2015-09-05