Нывгæнæджы тæргай

Чыртæй-чыртæй æмызмæлд кодтой дзыллæ

Йæ равдысты. Йæ сæр уыди йæ кой, —

Цымæ йæхиау адæмæн сæ фылдæр

Йæ куыстыты лыстæг хъæнтæ уыдтой.

Уæзданарæзт дзыхы ныхас, сæ кондæй...

Сæ быны митау гауызтæ — сæлæф,

Уæд уымæн та йæ хъулæттæ хæдонæй

Æлгъыстау калди ахорæнты тæф.

Чи хъалзæрдæ, кæмæн нæ уыди адæн,

Кæй нæ ис къуымты адæмæй ысцух, —

Æмæ-иу худгæ сусæг-æргом цадæг

Æрытыхта йæ уарзоныл йæ къух.

Уæд чидæр та йæ хины митæ уафы, —

Хуыцауыскондæй уый хуызæн кæм ис: —

Æнæмбæрсту! Куыддæр цыма... Гъы... Афтæ...

Æниу, уæвгæ... Уæвгæ, цыдæр дзы ис!

Фæлыгъд нывгæнæг удæнцой æрмадзмæ.

Тæвдæй ныддардта цыхцырæгмæ сæр.

Ныффæллад и. Ныр, гъа, йæхи æруадза, —

Йæ цæстыты зынг акалдта цæхæр,

Фæзылд æваст йæ тыгъд хъуымац, йæ сисмæ,

Æрвæрдынау, йæ ахорæнтæ — ’взæрст...

Æмæ та уыд цыбыр дугмæ йæ рисæй

Пехуымпарау ирвæзт:

Уый сныв кодта, быдзæуы размæ халон

Куыд хæссы тагъд-тагъд фаджысрагъæй хъæмп.

МУЗÆМÆ

Хъазгæмхасæн

Поэты уæздан зæд —

Фыдхин æмæ карз,

Нæ былтыл нын бакæныс цъутта.

Ныззоныгта кæнæм дæ галуаны раз,

Цæмæй ныл сæрбæрзондæй худай...

Уæд сау хохы рувасау

Сайаг кæй дæ, —

Йæ мид-зæрды алчидæр зоны,

Уæддæр дæ чи нозтæй, чи царды кæйттæй,

Фыдбонау йæ къæсæрмæ хоны.

Æз нал кæнын абон

Дæ номыл куывдтæ, —

Мæ сис дæ фыры хъулау хъазы:

Дæ тагъд-тагъд дзымандытæй уаздæр дзырдтæ

Куысты бон лæудзысты мæ разы.

Дæ фæзындмæ рæстæг нæ кæсы, тæхы,

Нæ цард та æрвылбон дæр тох у...

Тæрсын: уый дæ сыгъдæг ном ацы зæххыл

Поэттæй куы аззайа рохы!..

***

Миклош Раднотийæ

Поэт дæн æз. Ам никæйуал хъæуын...

Æгомыгау хъуыр-хъуыргæнгæйæ хилын,

Мæ уæлхъус зинау иу чидæр лæууы, —

Мæ дзуринæгтæ сты йæ хъуыддаг иууыл.

Къæрцхъус дызæрдыг рагæйдæр йæ цæст

Мæнæй, мæ хур, йæ фыны дæр нæ исы...

Поэт дæн æз. Дæн судзинаг æрмæст,

Кæй дæн рæстдзинады æвдисæн!

Кæй зонын: арв цъæх у, сæнт урс — зымæг,

Сырх-сырхид туг æмæ æндæртæ...—

Стæй ноджыдæр, кæй нæ уыдтæн тызмæг

Æмæ лæгмар кæйдæртау!..

Дата добавления: 2015-09-05